ليلة العاشر 2023

الوداع الوداع. ياحبيبي ياحسين
........

الليله آخر ليلة يمنه حسين ياروح الزجية
ليلة وداع ومناحه. للصبح نسهر سويه
باجر تحلّ المصيبه ونفترق بالغاضريه
انت تتگطّع يخويه واني عالهزله سبيه

للصباح للصباح. والله ما تغمضلي عين
الوداع الوداع ياحبيبي ياحسين
........

ريت ميته ولا اودعك خويه لسيوف المنية
انت والعباس باجـر. ما يضل واحد الية
شلون لو هجت علينه. زلم وخيول آل امية
من يدافع عن خيمنه. لو رحت جاوب علية

ياحُسين ياحُسين. نشرد بهالهيمه وين
الوداع الوداع.      ياحبيبي ياحسين
..........

ريته ليل العاشر اطول. ما ردت يطلع صباحه
ولا اشوف برمح راسك. عالي مخضوب بجراحه
وجسمك تسحگه الحوافر. للخيول يصير ساحه
الليله خل اگضيها يمك. دمعه ومصاب ومناحه

راح اموت راح اموت. من وداعك يالحنين
الوداع الوداع. ياحبيبي ياحسين
..........

گلــها يازينب اصبري. من تحل بيج المصيبه
مو سهل يصعب علية من بعد ذبحي غريبه
من تشوفيني يزينب. جثّه عالغبره سليبه
عينج عله طفالي يختي لا تجيني يالحبيبه

من تروح من تروح. ينفجع گلبي الحزين
الوداع   الوداع.           ياحبيبي ياحسين
..........

ريته لا طر صبر باجر لا شمس طلعت علينه
ولا اشوف بعيني جسمك بالسيوف مگطعينه
وعالنهر عباس طايح. لا يساره ولا يمينه
بالعمد مصيوب راسه. وبالسهم مطفية عينه

من يجون من يجون. نشرد امن الخيمه وين
الوداع   الوداع.            ياحبيبي ياحسين
..........

ليلة العاشر گصيره. والفجر بيّن طلوعه
وقاسم العريس امّه. بالدمع طفّت شموعه
وعلي الأكبر ودّع امّه مأيسة من كلمة رجوعه
والرباب تناغي ابنها. والسهم ضمّلهه لوعه

عالنياگ عالنياگ. للسبي مسرانه وين
الوداع   الوداع.           ياحبيبي ياحسين

سيد زيد الفحام
_________________________________________

قصيدة ليلة الوحشة 2023

علي ذبحو زلمنه
علي حرگو خيمنه
علي والله انهضمنه
سبتنه الغاضريه
........

ياعلي شفنه بحياتك ما قرينه
تحضر لكل خايف وحاير تعينه
عجب ما تحضر تشوف اصّار بينه
كربله يمك قريبه وماتجينه

هذاك حسين جسمه
تكطع روح يمه
اذا تكدر تلمّه
يحمّاي الحميه
.........

داسته الخيل وتگطع ذاك الحسين
وذاك عباس الكفلني بلايه چفين
ياعلي ظلن بناتك والنساوين
الليله وحشه وماكو خيمه نتّجه وين

علي ردناك يمنه
تجي تحرس حرمنه
تخفف من ألمنه
وتنسّينه الأذيّه
........

ياعلي لا خيمه عدنه ولاستر ضال
بهيمه ظلمه وبس حرم يابويه وطفال
بس علي السجاد ومچتّف بالحبال
گلي من يحرس يحيدر هاي الاعيال

سده الليل بضلامه
ويخافون اليتامه
يرب تگضي بسلامه
شيسكتلي رقيه
.......

گلها يازينب اجيتج لا تخافين
علي آنه البي تندبين وتحشمين
الليله احرسكم اجيت ودمعي بالعين
لا تأذّيني بدمعتج كافي تبچين

يزيتب ما عفتكم
بمصايبكم شفتكم
يَـدُ الله الحمتكم
يبنتي امن المنيه
.........

ياعلي يرضيك نمنه عله الترابه
وبنك المذبوح سلبوهن ثيابه
عكب عـزّ اخوانه وذيچ المهابه
باجر انروح بدرب يكثر عذابه

يبويه انروح للشام
سبايا وبين ظِلّام
دهرنه شضام ماضام
على خواني وعليه

سيد زيد الفحام
_____________________________________

شور ليلة الوحشة 2023

زينب الليله تدوّر عن اخوها. زينب الليله

لبوالسجاد زينب طلعت بليل
تتعثّر مشت بين المچاتيل
تدور عن اخوها السحگته الخيل
صاحت حايره ودموعها تسيل

ياضوه عيوني يخويه حسين وينك ياضوه عيوني
........

اويلي شلون من وصلتله يا ناس
شافت جسمه متوذر بلا راس
صدر وظهر اخوها بخيل ينداس
صاحت صوت ما تنهض يعباس

لو تجي تشوفه تموت امن البواچي لو تجي تشوفه
........

من زينب عجب ما طلعت الروح
من شافت اخوها الغالي مذبوح
بالف وكثر بعد يا ناس مجروح
وزينب تلطم عله الراس وتنوح

تنزف جروحه. تشد ياجرح كلهن. تنزف جروحه
.......

يخويه حسين اگعد خل اداويك
اشدّ جروحك بايدي وحاچيك
شمسويه الحوافر والشمس بيك
متگطع وذر والنسمة تاذيك

لو يخلّوني اظل يمك يخويه. لو يخلّوني
........

اجيت الليله اودعك ياضوه العين
باجر عالهزل مسبية يحسين
تقبل يالعفتني بجمرة البين
مچتوفه بحبل ودخل دواوين

وين اضم روحي. يخي عنّ الشماته. وين اضم روحي

سيد زيد الفحام
__________'_________________________________

مسير السبايا 2023

يالعشت ايدك بديه
من عكب عينك سبيه
.........

چنت مثل الخيال ويايه ياعباس
ابد ما فارگتني حتى بالانفاس
تعال وشوف حالي يا ابوالنوماس
سبيه مچتفه وتنظر علية الناس

يا وسافه الهاشميه
من عكب عينك سبيه
.........

أنه الماچان واحد ينظر خيالي
هسه بكيف كلمن يوگف اگبالي
بين اللي يسبني ويشمت بحالي
وبالسوط الشمر عباس يبرالي

يا شبل حامي الحميه
من عكب عينك سبيه
.........

يعباس اختك شسوه الزمن بيها
ركبت عالهزل والجّاني حاديها
اطب ديوان ابن مرجانه تاليها.
اعبر يا مصيبه وياهي احچيها

يالطحت بالغاضريه
من عكب عينك سبيه
.........

على الناکه الهزيله من عكب خدري
اطب للشام خويه شلون ما ادري
يريت الموت اخذ روحي واخذ عمري
ولاطب مجلس يزيد بهظم دهري
امشي وتمنّه المنيه
من عكب عينك سبيه
.........

عفتني بحيرتي وماتدري بيه اشصار
عله بختك يابوفاضل يابو راس الحار
تقبل وانه بنت المرتضى الكرار
اهل الشام لاگونه بشتم وحجار

تقبل بهاي الأذيه
من عكب عينك سبيه

سيد زيد الفحام
_______________________________________

موشح ليلة الوداع 2023


الليله زينب ما تغمض عيونها
خوتها باجر راحو يودعونها
........
ما تغمض عيونها وتجري الدمع
هاي آخـر ليله باجـر تنفجع
براس اخوها حسين لمن يرتفع
وآل امية بلا رحم يسبونها
.......
بليلة العاشر بقت زينب تنوح
طبت عله حسين تشكيله الجروح
شلون باجر خويه لو عني تروح
والحرم من بعدك يسلبونها
......
يم اخوها حسين گعدت تشكي هَم
شلون لو حرگو يبواليمه الخيم
وآل امية تدري ما عدهم رحم
عاليتامه خيامك يحرگونها
........
گلهه يازينب اصبري عله المصاب
من تشوفيني ذبيح عله التراب
حفظي اطفالي يخيّتي امن العذاب
وعن رقية بالج يضربونها
........
صبّت دموع الحزن من سمعته
يعني باجر تنسبي لو فگدته
راس اخوها عله الرمح لو شافته
لاشك بهالمنظر يفجعونها
.........
منّ ابواليمّه تعنّت للگمر
للكفلهه امن المدينه بكل فخر
ويّه اخوها الهاشمي يحله السهر
عالمصايب زينب يصبرونها
........
تگلّه ياعباس من يحمي الحرم
لو طحت عالمشرعه وطاح العَلَم
گلها عذريني اذا راسي انهشَم
چفوف ادية باجر يگطعونها


سيد زيد الفحام
_'''''_''''_

مسير السبايا الى الكوفه 2023

جابوا انياگ السبي وحان الرحيل
والشمر حادي الظعن عكب الكفيل
.........

خويه من ذبحوك ضامي وراسك انشال
حضّروا نوگ السبي وجابوها الاحبال
كل خواتك چتّفوهن ويّه الاطفال
خويه للكوفه خذونه والدمع سال

ينضرب بسياط كل طفل اليميل
والشمر حادي الظعن عكب الكفيل
.........

بلا دفن عفناك ياروح الزجيه
مگطع ومذبوح برص الغاضريه
حسين يبن امي غصب لا مو بديه
عنك العدوان اخذوني سبيه

ماكو والي ويانه بس هذا العليل
والشمر حادي الظعن عكب الكفيل
.........

خويه مر بيك الظعن لمن مشينه
شفنه جسمك بالسيوف مگطعينه
شگد لطمنه عله الوجه وشگد بچينه
انت گطعوا راسك واحنه انسبينه

راسك براس الرمح دمه يسيل
والشمر حادي الظعن عكب الكفيل
.........

اشتكيلك خاف اجرحك گلي مسموح
خويه هاي النوگ هَزله وتشعب الروح
تعثر ابممشاها بينه وننزف جروح
خوفي لا توگع اطفالك تبچي وتنوح

سياط امية التوجع ودرب الطويل
والشمر حادي الظعن عكب الكفيل
.........

شلون لو حادي الظعن مر بينه بالسوگ
بالحبال مچتّقيـن وتعثـر النوگ
گلبي من هاي المصيبه حيل محروگ
صبر ما ظل عندي خويه وصدري مخنوگ

نظرة الشامت سهم تفري الدلِيل
والشمر حادي الظعن عكب الكفيل
.........

ارد اصيح امن القهر مخنوگ صوتي
گبل لا ينشاف طولي ردت موتي
ريت ميته وماعشت بغياب اخوتي
ولا يگلّي الشمر للديوان فوتي.

چتّفوني وانه بت حامي الدخيل
والشمر حادي الظعن عكب الكفيل

سيد زيد الفحام
__________________________________

رسالة العليله ع مع طير البراري

ياطير اسأله يمته نتلاگه. نظره وعتاب
گلّه العليله هواي مشتاگه. طال الغياب
.........

بالله ياطيــر البـراري اخذ مرسالي إله
دوّر عله حسين ابويه من تطب لكربله
سـلّم وّصـل ســلامي. انحنـي وستقبله
گلّه مـن گلب العليله هالرساله مسجّلَه

ما بية احمل جرحه وفراگه. نار وعذاب
گلّه العليله هـواي مشتاگه.     طال الغياب
.........

اخذ ياطير عله جنحك دمعتي وكلمة عتب
گلّه تنتظـــــرك عليله عجب ناسيها عجب
العليله اللي عفتـــها تشفه بس عازتها اب
انت لو ما ناوي ترجع عاد وضحلهه السبب

والله لونينـي حنّت الناگه. وكل الدوَاب
گلّه العليله هـواي مشتاگه.     طال الغياب
.........

گلّه راح تموت بنتك هم ترد لوما ترد
صارت بيوتك خرابه مقفره ومات الورد
لشوكت تبقى عله بابك تحسب ايام وتعد
فاطمه الطفله العليله هم تجيها وتنسعد

دنيا بغيابه لروحي خَـنّـاگـه ظلمه وسراب
گلّه العليله هـواي مشتـاگـه.     طال الغياب
.........

لو شفت ياطير عمي ابوفاضل بالظعن
انزل عله چفوفه حبها گبل لا يتگطعن
گلّه هم تدري العليله عيونها عليكم عمن
تنتظر جيتك عفتها يابوفاضل بالوطن

نار الهجر بجروحي حَـرّاگه. ودلّالي ذاب
گلّه العليله هـواي مشتـاگـه.     طال الغياب
.........

لو شفت عمتي العقيله زينب بهيبة امام
گلها مولاتي العليله بجنحي ودّتلچ سلام
چنتي مثل امها الحنينه رحمه وبحضنج تنام
هسّه طفله بدار ظلمه وما يفارگها الضلام

شنهو اللي أخّـر والدي وعاگه. مامن جواب
گلّه العليله هـواي مشتـاگـه.      طال الغياب
.........
من تصد وتشوف فارس شاب وبهيأت ولي
هذا اخوي وتاج راسي هيبتي الأكبر علي
بيده سلّمها الرساله انتظر يرجع الي
يرجع وياخذني بيده وفرح بشوفة هلي

ذاب الگلب من جمرة اشواگه. حس بالمصاب
گلّه العليله هـواي مشتـاگـه.        طال الغياب
.........

للعليله الطير من رد شايل الدم عالجنح
يعني راد يگلهه شفته حسين بالطف منذبح
داست الخيل عله جسمه وراسه مرفوع برمح
فتهمت الطفلة العليله. وصاحت بصوت الجرح

ياويلي ابوي الماي ما ضاگه. ظل عالتراب
گلّه العليله هـواي مشتـاگـه.        طال الغياب

سيد زيد الفحام
____'________________________________

#محرم_جاي

يخدام الحسين حسينكم نعمه
محرم جاي شدو الحيل للخدمه
هيّئوها المواكب والحسيّنيات
من هسّه الملائك بيها ملتمّه
رايات الحزن نشروها عالابواب
بس حسين بيها ينكتب اسمه
حَضرو دموعكم للمقتل بعاشور
وصدور اللطم حضروها للطمه
بعد چم يوم يوصل للطفوف حسين
بسيوف ال امية ينسفك دمه
راسه عله الرمح ينشال واويلاه
وبخيل آل امية ينسحك جسمه
انصاره وبنينه وخوته الطيبين
ينذبحون ويلي بكربله يمه
زينب عكب اخوها حسين والعباس
مسبيه تروح بروح منهضمه
للشام العقيله وتدخل الديوان
مضطرّه يزيد تردّه وتكلمه
تتفرج عليها الناس والعدوان
وعيون الشماته اسهام مزدحمه
شلون انواسي زينب كولو ياخدام
واجب كل صدر بچفوفنه انهشمه
اذا من دم دموع المهدي ليل انهار
لازم من دمعنه عيونّه التعمه


#سيد_زيد_الفحام
________

السلام عليكم

https://youtu.be/g14MNJSAsGk
السلام عليكم ارجو الإعجاب بالفديو
والمشاركه والتعليق

خيول عشره  |    محمد باقر العميدي
https://youtube.com/watch?v=iMbLhBceSEE&feature=share