مقدمه علي الأكبر عليه السلام 2023

ياتعب السنين
فگدك مو سهل
نار وتشتعل
بگليبي الحنين
...........

آنه شعندي غيرك يبني يا عافيتي
يبني الاكبر انت الغالي وشمعة بيتي
يوم المابي عطر چفوفك. يخنگ ريتي

امك تعبت وسهرت الليالي
حدما كبرت لشبابك يغالي
تتركني يبني تفارگني تالي

من جفني الحزين
دمعاتي التهل
نار وتشتعل
بگليبي الحنين
.............

ما اتحمّل عيني تشوفك. ينزف دمك
يوگف گلبي لا يوليدي ارحم امك
اكرب ليّة فايض شوگي ارد اشتمّك

هيبة مُحمّد جماله وكلامه
ادعي بدموعي تردلي بسلامه
ما عندي غيرك يراعي الشهامه

يالأكبر لوين
رايح تنچتل
نار وتشتعل
بگليبي الحنين
...........

نار فراگك آ يوليدي تسعر بية
رايح منّي لصوبك اعدائك. صعبه علية
گلبي يگلّي ماظن يبني ترجع ليّة

جاوبها يُمّه اصبري بغيابي
شاء الله بالدم انصره بخضابي
مو سهله ادري يفجعج مصابي

جرحك ما يلين
بضلوعي يحل
نار وتشتعل
بگليبي الحنين
...........

گام الاكبر ودّع امّه طب للحومه
ضامي يقاتل ذل العسكر فارس يومه
بالطف حيدر گالوا عنه طش علومه

تالي بغدرهم وسافه تصوّب
من دم وريده يويلي تخضّب
بسيوف امية تگطّع تگلّب

مصيوب الوتين
ما يرجع عدل
نار وتشتعل
بگليبي الحنين
...........

رد للخيمه كطعو نحره. ينزف دمه
صاحت يبني شبگت جسمه ليله تشمّه
تبچي وتنحب تمسح وجهه طاحت يمه

سيف اليذبحك ذبحني ولچمني
يبني يلاكبر مصابك هضمني
دهري بغيابك بعد ما رحمني

بدموع وانين
اندب ما امِل
نار وتشتعل
بگليبي الحنين

سيد زيد الفحام
__________________________________________

رئيسية علي الأكبر عليه السلام 2023

حان الموعد يالأكبر. يبني يا علي
ذكّرهم صولة حيدر. يبني يا علي
انزل للحرب
يانبض الگلب. يبني يا علي
.........

يا علي الأكبر تعال اگرب علية
آنه ابوك حسين يا روح الزجية
ارد اشبگك يا علي بثنين ادية
گبل لا تنزل تقاتل آل امية

سل سيفك ونزل ليهم ورفع رايتك
زلزل ارض الطف بيهم ورفع رايتك
امليهم رعب
يانبض الگلب.           يبني يا علي
.........

ياعلي يالتشبه الهادي بخصاله
بشكله وبأخلاقه وبصوته وجماله
يبني انزل قاتل اصحاب الضلاله
يا علي بدم نحرك تأدّي الرساله

دين الله احتاج لدمك. وانت الهاشمي
جاهد يوليدي بعزمك. وانت الهاشمي
يالفگدك صعب
يانبض الگلب.           يبني يا علي
.........

سمعاً وطاعه يگلّه بويه يحسين
راح انفّذ امرك عله الراس والعين
في سبيل الله اقاتل ونصر الدين
آنه تـربـاة المعــــــارك والميادين

لعيونك فدوه المنحر. ياروح النبي
ارضيك وخلّ اتوذّر. ياروح النبي
للمذبح اطب
يانبض الگلب.           يبني يا علي
.........

تشابگوا والد وبن حد لمست الگاع
حسين ابواليمّه وعلي الأكبر بلوداع
يعني راح يموت ابنه والحلم ضاع
كربله بيها الموادع يحصل بساع

بوداع وليده اتألّم. ذابت مهجته
راح ومايرجع يعلم. ذابت مهجته
بسيوف الغرب
يانبض الگلب.           يبني يا علي
.........

نزل والسيف بيمينه علي الاكبر
ضنّت الفرسان قالع باب خيبر
لأن ذلّ الجيش كلّه والسبع فر
مئة فارس والرواية تگول اكثر

لوما يعطش يفنيهم ما ظل ناصبي
من گاع الطف يمحيهم ما ظل ناصبي
مسدود الدرب
يانبض الگلب.           يبني يا علي
.........

صوّبو بالسيف راسه وسال دمه
صاح بويه وراح ابوالسجاد يمه
شافه متگطّع وذر بسيوف خصمه
على الدنيا العفا من بعدك يكلمه

للخيمه مگطّع جابه. مذبوح النحر
وامّه نفجعت بصوابه. مذبوح النحر
بالدم منخضُب
يانبض الگلب.           يبني يا علي

سيد زيد الفحام
__________________________________________

علي الأكبر عليه السلام 2023

الله يشهد. من مُحمّد. وجهك تنوّر
روح امك. فدوه لسمك. ياعلي الاكبر
علي علي علي
علي علي علي
.......

ابني واغله من روحي
عمري وبلسم جروحي
ربّيتك بدية سنين وسنين
حدما صرت شاب وتزهي بالعين
ياشبه النبي المرسل
بيك المصطفه تنزّل
شلون اكدر اودعك ياهوى حسين
يبني منين اجتني كربله منين
دخيلك ياضوه عيوني
حالي تغيّر ولوني
وين تريد يبني ياعلي وين
وسيوف آل امية تذبح الزين

لو عفتني وفارگتني. ميته أحسبني
گلبي عندك. ضامي چبدك ياعلي يبني
علي علي علي
علي علي علي
.......
امك آنه يالأكبر
ارحم حالي ما اكدر
اشوفك تمشي لسيوف المنية
عسنّي لا وصلت الغاضريه
شلون اتحمّل الموقف
ونظر دمك الينزف
تتگطع وذر بسيوف امية
تروح وماترد سالم الية
تعب سنيني يالغالي
راح وراحت آمالي
اگرب خل اشبگنّك بدية
ودّع ياعلي وسلّم علية

گلبي يرجف. وانت تعرف. خوفي ما ترجع
ما اعوفك. شلون شوفك. يبني تتگطع
علي علي علي
علي علي علي
.........

ودّع امه بدموعه
ونار الفرگه بضلوعه
سل سيفه علي وللمعركه راح
آنه ابن الحُسين الهاشمي صاح
يشبه بالحرب حيدر
ذكرهم علي بخيبر
طشّرهم جثث والعسكر انزاح
وتلقّب علي قبّاض الارواح
يحصد بالرگب سيفه
وقاد المعركة بكيفه
شردت كلها منّه وصار الاصياح
كسّرها السيوف وذبّ الارماح

الحومه كلهه. بيده ذلهه. ناوي يفنيهم
بالرجوله. والبطوله. درس ينطيهم
علي علي علي
علي علي علي
........

تفطّر بالضمه چبده
قاتلهم علي وحده
عطشان وفناهم لو روه شلون
من يهجم عليهم ما يثبتون
ما گدرو يوگعونه
تكتل خزرة عيونه
گالو ما يطيح إلا بغدر كون
مگبل ما يلاگونه يخافون
طعنوا بالرمح ظهره
طاح الغالي من مهُره
گاموا آل امية بي يوذرون
بسيوف ونبل ورماح يرمون

هالله هالله. من وصلّه. حسين ابواليمّه
طاح يمّه شبگ جسمه. وبالنحر شَـمّـه
علي علي علي
علي علي علي
........

شاله وللخيم جابه
ينزف نحره وصوابه
مد جسمه يويلي گبال امه
مگطع بالسيوف يسيل دمه
عالأكبر هوت ليله
دم المدمع تسيله
انفجعت ونتهت بجروح جسمه
مو ذاك علي المعروف رسمه
صاحت ياعلي يبني
صوابك حيل عذّبني
تلطم عالوجه وتصيح بسمه
جاوب ياعلي وحچيلي كلمه

راح ابنها يا حزنها. تبچي وتودعه
ما تشوفه. من تعوفه. تمشي منفجعه
علي علي علي
علي علي علي

سيد زيد الفحام
_______________________________________________

نزلة علي الأكبر عليه السلام 2023

من صولته ومن خزرت عيونه
بحامي الحمه گاموا يوصفونه
..........

شافو علي الأكبر اجه عليهم
بالرايه والسيف ودخل بيهم
صاحو علي هذا الأجه وشردو
يدرون بي عدوانه يفنيهم

ومنين ما شردو يلاگونه
بحامي الحمه گاموا يوصفونه
..........

طشّر زلمها يمنه عاليسره
فوگ الزلم صاعد على مُهره
من سيفه يحصد روس تتطاير
يشبه علي بالضربه والطبره

فارس بني هاشم يشوفونه
بحامي الحمه گاموا يوصفونه
..........

ناداهم شحدّه اليجي لحدّي
آنه علي الأكبر علي جدي
ودّولي كل الجيش خل يهجم
وآنه اجيكم للحرب وحدي

مثل الأسد والكل يهابونه
بحامي الحمه گاموا يوصفونه
..........

هذا اليوفّي لو حچه حچايه
سوّاها طر الجيش بالرايه
خيل وزلم خلّاها تتراكض
يلمها ويطشها الأكبر برايه

ما خلّه فارس راسه بمتونه
بحامي الحمه گاموا يوصفونه
..........

بكر بن غانم محّد يغلبه
بس يم علي خاف ورجف گلبه
من گبل ما يرمش شطر راسه
ضربة علي ما ثنّه بالضربه

نصّين سوّاه ونخطف لونه
بحامي الحمه گاموا يوصفونه
..........
لوما العطش يفنيهم الأكبر
روس وجثث خلّاها تتطشّر
راية بني سفيــان نكّسها
تملّك زمام الحومه وتصدّر

واگف اسد عجزو يوگعونه
بحامي الحمه گاموا يوصفونه
..........

منهم علي الأكبر اخذ حيفه
لوما غدرهم ما وگع سيفه
بعسكر امية مجزرة سوه
مثل الصگر يتخيّر بكيفه

عالي بشموخه والزلم دونه
بحامي الحمه گاموا يوصفونه

سيد زيد الفحام
___________________________________________

مقدمة للقاسم عليه السلام 2023

إنه القاسم يعمي حسين. اشوفك بالحرب وحدك
ارخصلي امــــوت ويـاك. ما ريـــد العمـر بعـــدك
حُسيناً وا حُسيناه حُسيناً وا حُسيناه
........

يعمي حسين من دونك. ضلام الدنيا ما تسوه
عشت ويّاك من زغـري. يعم عالمُـرّه والحلوه
شلون هنا اعــوفنّـك. وحيد ابعازت النخوه

ابد لا والله ما عوفك. وكلها تجمّعت ضدك
حُسيناً  وا حُسيناه             حُسيناً  وا حُسيناه
........

يگلّه حسين يوليدي. انت امن الحسن ذخري
اشوفك وذكر المظلوم. احبك يا بعـــد عمـري
اخاف عليك يالقاسم وانت بهالأمــر تــدري

شباب تشع جمال ونور. يبني والعـدَه تحسدك
حُسيناً وا حُسيناه حُسيناً وا حُسيناه
........

هاي امن الحسن عندي. وصيّة والدي اقراها
دونك وصّه استشهد. اخالف امره ترضاها ؟
بدموعه قراها حسين. يزينب يختي نادها
لبسي القاسم ثيابه وروح بعزمك اودّك
.......

شباب اربعطش عمــره. فقيّــه القاسم بدينه
نزل ينصر امامه حسين ضحّه بعمره وسنينه
لا دنيـا الثنـت عـزمـــه. ولا مال الحِلَه بعينه

نزل يهتف يعمي حسين. فدوه ابن الحسن عبدك
حُسيناً وا حُسيناه حُسيناً وا حُسيناه
........

مثل وجه الحسن وجهه. رفع سيفه ولبس درعه
ولاچن بعده شاب زغير. بطل اي فارس يصرعه
اخذها المعركه بسيفه. جثث خلّاها متگطعه

يبن سعد بشجاعه يصيح. قسم إلّا افني كل جندك
حُسيناً وا حُسيناه حُسيناً وا حُسيناه
........

انگطع شسعِ النعل اهوه يشده بخصمه ما مهتم
لن فارس اجاه بالسيف. ضرب راسه وتفايض دم
طـاح القــاسـم ونـاده. ادركني طحت يا عَم

وصلّه بآخــر انفاسـه. وفيت بوعدك وعهدك
حُسيناً وا حُسيناه حُسيناً وا حُسيناه
........

شــــالـه وللخيـم جابه. ذبيح مخضّب ابدمه
مذهولة وتون وتصيح. طاحت عالوَلَد امه
ساعه تشدشد جروحه. وساعه تقبله وتشمه

تصيح بصوت يوليدي. رحت منّ ايدي شيردّك
حُسيناً وا حُسيناه حُسيناً وا حُسيناه

سيد زيد الفحام
_____________________________________

رئيسية للقاسم عليه السلام 2023

گلهم بدالك خل يذبحوني
فدوه لجمالك ياضوه عيوني
بچفوفي شمعه
وبعيني دمعه
فدوه لجمالك ياضوه عيوني
...........

يجاسم يمه يا عذب الهوى اليسري
تعبت عليك حدما حدّبت ظهري
رتّـك يالـولَــــد تچّايتـي بكُبـري
وبيدك من اموت تشيلني لگبري

كل ظني تكبر يبني وتهنّه
وحضر زفافك وعجن الحنّه
تاليهه انعه
وبعيني دمعه
فدوه لجمالك ياضوه عيوني
..........

شباب اربعطش عمرك يبعد امك
اموت ولا اشوفن جرحك ودمك
لون بيدي اروح ابدالك لخصمك
يگطعوني ييُمّه وتسلم بجسمك

بعدك زغير عله الحرب يبني
بصواب نحرك لا تصوّبني
ما بيه فَجعه
وبعيني دمعه
فدوه لجمالك ياضوه عيوني
..........

اخاف عليك يُمّه امن اليحسدونك
شلون تريد اصبر من يذبحونك
لون يرضون بية وما يأذّونك
اقدم روحي فدوه وعمري لعيونك

احسبني ميته لو رحت عني
ابقه بعذابي وحسرتي ونّي
نورك اودعه
وبعيني دمعه
فدوه لجمالك ياضوه عيوني
..........

تعال اکعد ينبع المجتبه وعطره
گبل لتروح اودعك وسچب العبره
يجاسم يبني دافع عن ابوالعتره
ابوك الحسن وصّه ونلتزم امره

هاي الوصية نكتبت بقلمه
جاسم يضحّي بكربله لعمّه
لحّد يمنعه
وبعيني دمعه
فدوه لجمالك ياضوه عيوني
..........

لبس درع الحسن وثيابه وتقدّم
ودّع امه بالخيمـه وطلـع مهتم
يدافع عن امامه ويجلي عنّه الهم
لحدما ينگطع نحره ويسيل الدم

قاتل بني سفيان وتصدّر
ذلهم مثل صولة علي الأكبر
عمّه اليشجعه
وبعيني دمعه
فدوه لجمالك ياضوه عيوني
..........

انگطع شسعِ النعل لمن هوه يشدّه
اجاه بالسيف صابه الناصبي بحقده
وگع جاسم مثل ما توگع الورده
مگطّع بالسيوف ودمّه دم جده

راح الحسين لمصرعه وشافه
من گد جروحه مغيّره اوصافه
حيّرني وضعه
وبعيني دمعه
فدوه لجمالك ياضوه عيوني
............

تنزف للخيم جابوك يالغالي
شفتك يالحبيب موذّر اگبالي
طحت عليك اصيح ومنذهل بالي
جاسم يُمّه اگعد ونظر لحالي

ياجرح اشده جروحك هوايه
اكعد يجاسم وحچي ويّايه
ياسهم اطلعه
وبعيني دمعه
فدوه لجمالك ياضوه عيوني

سيد زيد الفحام
___________________________________________

رئيسية للقاسم عليه السلام 2023

بالدم حنّتك ما حسّبت هاي
ياروحي وحياتي وتعبي ورباي
جاسم ييُمّه مصابك يأذّيني
ألمن تروح وعدمن تخلّيني
ياروحي وحياتي وتعبي ورباي
.......

جاسم يا ثمر تعبي _وياروحي ويانبض گلبي
اباريك. اداريك
لأن ماعندي يكفيني _ ولد غيرك يضي عيني
اهم بيك. احاميك
گلت تكبر وزفّك بيدي وتهنّه
ابد ما حسّبت من دمك اتحنّه

يبني منين اجتني الفاجعه اليوم
وعليك المنية بكربله تحوم
ظلمه بغيابك ما ردتها سنيني
ألمن تروح وعدمن تخلّيني
ياروحي وحياتي وتعبي ورباي
.......

انت امن الحسن ورده _ وارث هيبته ومجده
بلخيام يجسام
شاب باول سنينك _ تنصر عمك ودينك
الك ضام. خبر هام

وصية امن الحسن تتسلّم بايدك
تنصر عمّك بطف كربله يريدك

ذاخرهن امانه اليكرم الضيف
درعه ولامته وعمامه والسيف
البسهن انت خل تشوفك عيني
ألمن تروح وعدمن تخلّيني
ياروحي وحياتي وتعبي ورباي
.......
جاسم ناده ودعيني _ بايدج يُمّه حزميني
ابو الكون. بلا عون
عمي حسين ابواليمّه _ ضده الناس ملتمه
يغدرون يذبحون

امامي حسين يُمّه وقائدي وعمي
انصره وخل اموت وينسفك دمي

(هَل من ناصر) ينادي اسمعه
ألمن حيلي باقي وما انفعه
جمرة مصابك تسعر وتچويني
ألمن تروح وعدمن تخلّيني
ياروحي وحياتي وتعبي ورباي
.......

طب للمعركة القاسم _ شدّ عله العدو الغاشم
يحيّاه. ومحلاه
چم فارس فنه بسيفه _ يتخيّر غده بكيفه
من اعداه على هواه

فناهم آل امية تعجّبوا منّه
هزم فرسانهم كلها بزغر سنّه

لوما ينگطع شسع النعل چان
يفني العسكر وماتبقه عدوان
بعدك مماتي وفگدك يبچّيني
ألمن تروح وعدمن تخلّيني
ياروحي وحياتي وتعبي ورباي
.......

براسه الناصبي صابه _ طاح بولية ذيابه
يذبحوه. يوذروه
صاح بصوته ياعمي _ صابوني ونزف دمي
يسمعوه. يأذّوه

وصل للقاسم حسين وشبگ جسمه
شاله مگطّع و رد بالولد لَـمّـه

رمله بلا وعي شبگت ابنها
مذهوله وتون وشتد حزنها
صاحت يجاسم اكعد وحاچيني
ألمن تروح وعدمن تخلّيني
ياروحي وحياتي وتعبي ورباي

سيد زيد الفحام
__________________________________________

نزلة للقاسم عليه السلام 2023

هاشمي ودم حيدر بشرياني
وما ابايع ناصبي وسفياني
........

آنه من صلب الحسن بچّاكم بحرب الجمل
القاسم باول شبابي افتـدي خير العمل
آنه ابواليمّه امامي. مو يزيد ولا هُبَل
ما اطخ للذلّه راسي شامخ بعلو الجبل

بحب ابواليمّه كمل ايماني
وما ابايع ناصبي وسفياني
........

حسين ابن خير البرية. تابع لجدّه النبي
ما يبـايــــع آل اميـة ولا يزيد الناصبي
آنه متربي عله ايده. هوه ديني ومذهبي
اليوم اراويكم قتاله. من يسل سيفه الصبي

والدي بهذا الأمر وصّاني
وما ابايع ناصبي وسفياني
........

القاسم آنه وهذا سيفي. عوض عن سيف الحسن
والـــدي وصّه بوصيته. وآنه ابنه المؤتمن
انصر المظلوم عمي. وهزم اصحاب الفتن
أليمس عمي بأساءة راسه اشلعه امن البدن

إلا آخذ ثاري يا عدواني
وما ابايع ناصبي وسفياني
........

مثل ما گال وتوعّد. للحرب طب مبتسم
القاسم بسيفه غزاها وشردت اشباه الزلم
گام بصفوف آل اميه. يطشّر بسيفه ويلم
الفارس اليوگف گباله. ينذبح لو ينهزم

آنه من بيت النبي عنواني
وما ابايع ناصبي وسفياني
........

عجزوا يلاگـونه كلهم. سوّه بيهم ملحمه
هاشمي وارث شجاعه من علي حامي الحمه
بالغدر گدروا يجوله بني امية المجرمه
صوّبو بالسيف راسه. طاح مخضوب بدِمَه

صاح يا عم فدوه لجلك آني
وما ابايع ناصبي وسفياني

سيد زيد الفحام
____________________________________________

مقدمه عبدالله الرضيع 2023

يسلوة عمري يوليدي ويعافيتي
يضي عيني وهواي الينعش بريتي
.......

يعبدالله تعبت برباك يالغالي
حسبت حساب تكبر توکف گبالي
ونبلة حرمله ما مرّت ابّالي
ولاچنت ادري بالطف ينهجم بيتي
......

اهز مهدك ييُمّه وليلي ما نمته
ألوليلك ولا ساعه المهد عفته
ليل انهار افكّر بيك بس انته
مو بحسابي بيك انصاب تاليتي
........

شحلاتك من چنت تتبسّم ابمهدك
شبه من طه بيك ومن علي جدك
ابد ما چنت احسّب كربله وچبدك

تعطش والسهم يذبحلي حِنّيتي
.........

يريت لكربله لا جيت يمدلّل
ولاشوفك رضيع امن العطش تذبل
الماي بكربله بسهام يتبدّل
ذبحوك بسهم ياطِيب تربيتي
.......

عكب ذاك التعب ومساهري ورباي
يذبحك حرمله بسهمه يضي عيناي
يعبدالله رضيع وماشربت الماي
اموت ولااشوفك دامي امنيتي
........

عسه انشلّت يمينه حرمله الملعون
عجب ما لان گلبه ولا عفاك شلون
يريت بگلبه سهمه ومايصيبك كون
امّ مفجوعه ادعي بدمعتي ونِيتي

سيد زيد الفحام
_______________________________

عبدالله الرضيع عليه السلام 2023

حار السهم چوّاك
حز نحرك واذّاك
صوّب دليلي وياك
عبدالله يبني
عبدالله يبني
..........

يبني يا عبدالله فك عينك علية
ليش مذبوح بسهم ردّيت الية
منين اجتني كربله وسهم المنية
انشلّت ايدك حرمله شسوّيت بية

يا ارذل العدوان
گلبك صخر ما لان
تذبح طفل عطشان
عبدالله يبني
عبدالله يبني
..........

ادري ضامي ومانمت بحضان امك
تالي ودّاك الدهر لسهام خصمك
صوّبوك بسهم قاسي بطول جسمك
بين ادين حسين ابوك وسال دمك

يالعطّشوك هواي
بس ما شربت الماي
لا ظل فكر لا راي
عبدالله يبني
عبدالله يبني
..........

زغير نحرك والسهم ماخذ رگبتك
وبسمتك يوليدي مذبوحه عله شفتك
بين ادية مخضّب ومذبوح شلتك
لا نفس لا صوت بدموعي شبگتك

امّك يبعد الروح
مو دمعه ابچي جروح
حاچيني يالمذبوح
عبدالله يبني
عبدالله يبني
..........

من اجاك السهم حار شگال گلبك
وانت من كثر العطش متشوف دربك
صابك ورفرفت حدما خلص نحبك
باالمهد بعدك رضيع شچان ذنبك

والبي شطت مالوم
چان السهم مسموم
اول طفل مظلوم
عبدالله يبني
عبدالله يبني
..........

نومتك بحضاني چانت ليل ونهار
چنت اخاف عليك حتى امن الهوى المار
شلون لو خلّيت نحرك عالرمل حار
ينلّچم جـرحـك اكيـد ويستعـر نار

لو بيدي ما خلّيك
رمل الگبر يچويك
امشي وافكّر بيك
عبدالله يبني
عبدالله يبني

سيد زيد الفحام
_________________________________________