بحر طويل يقرء (كربلائي او اهوازي او نعي )

يوم العاشر

زينب صوب اخوها حسين راحت تركـض وتعـثر
من گــب ابعـجـاج الخـيـل وادي كـربــلـه تـغـيـر

………………………………

ركـضت زينب عله حسين حـست بالخطر صوبه
لگـت يمـه الخيول اتجول الدنـيـه هنـاك مگـلوبه
لگـتـه شـلـون صايـر بـيـه چـبدته بسهم مصيوبه
وگـالـلـهـا يــزيـنـب مـــاي گـلبي من الضمه تفطر

………………………………

يـزيــنـب بلـكـت امـيــه ابـلـل بـيـها بـس اشـفـاي
العطش يازينب ادخيلچ نار وتشب واسط احشاي
وگـالـتـه يـبـعـد اخـتـك يخويه منين اجيب الماي
وهاي الخيل هاي الناس علـه خـيمـنه غدت تفـتر

………………………………

يخـويـه بـالـخــيـم شـبـت نـــار وانـتــه ما تــدري
نــايــم عـالارض وتـلــوج ونــار بعـيلـتـك تـسـري
وعفتها وجيت اركض ليك انته اللي اشغلت فكري
من شفت الاعادي تحوم وجمعـها عليك ضل يكـثر

………………………………

سمعت هـوسات بالميدان يهـوسون برماح الشـوم
وانـتـه عالـترب مـطـروح وما تگـدر يخويه اتگـوم
شـي بـحـجـار يـرمـونــك شي بسهام تـرمي الگـوم
واجيت وشفت ظهرك بيه طـعـنـات لـغــدر خـنجر

………………………………

شمر ياخويه جاك ابساع يمـشـي وشـره بـعـيونه
اظـنــه لـلـذبـــح نــــاوي شـفـت اسـود گـلب لونه
نظر نظره ويزينب صاح وعليه اصتكـت اسنـونه
گـومـي وخــري يـگــلـي وعـيـنـه تجادحت بالشر

………………………………

وگـلـتله يـا شـمـر وخـر لا تــذبــح اخـــوي احـسين
اذا تـذبحـه اضيـع انـي وبـعـد انـطي الوجـه لاوين
ولـنه برمحـه هالملعـون يـدفـعني وسطـرلي العـيـن
ولن اظـلم بـعيني الكون اشـوفـن دربـي مــا اگـــدر

………………………………

ولـنـه اگـبـالـي هـالمـلـعـون يحـط وسط الگلب رمحه
وضل يرفس اخوي احسين غميچ ابگـلبه اظن جرحه
وشـالـه اعلـه الـوجــه ذبــه وبـسـيـفـه غــده ايذبحـه
وانـي اگـبـالــه يـا هـلـنـاس سمعـته طـگـطگ المنحر

………………………………

شال الراس عن جسمه وعلـى ذاك الـرمــح خـلاه
وچـنه عله الرمح روحي وي راسـه اخـذهــا ويــاه
وبقيت الطم على راسي شلون ابن امي اريد انعاه
ومـا ضلـت الـي خـيـمـه ابـچـي اعلـيـه وي الخـدر

الشاعر عقيل الحسناوي..
.

ابوذيات زينب ع

روحي من الهضم بالشام لابــت
ولاخيمه الـتلمني صفـت لا بيت
رديــــت ولا خــــــوان لابـــت
تسليـني عگب موتـت رقيه ..

اخـوتـي الفـارگـونـي وجفوني
الدمـع نـار بفـگـدهم وج جفوني . حرگ الجفون
انــه ابـديـون تـــالي وجفـوني
وكل الناس تـتـفـرج عليه ..

بنات حسين نار الطف عمـتهن
ركـضـن واليـسـلبـهـن عمـتهن
مـرعـوبـات ويــدورن عمـتهن
بيها ايلوذن من اسياط اميه ..

چلـت كربله بوحـشه وخـيمات
وخدر ماضل بعد النه وخـيمات
شبيدي والزلم تفـتر واخي مات
احشمـن بعــد ينـغـر عليه ..

كـعـبـه والـحـزن بالـهـم يطفنه
احترگنه وما فزع واحد يطفنه
شنو شتاخـذ بـعـد اكـثر يطفنه
اخوتي اتذبحت واني سبيه ..

وكـتنه الضيم بالطف عمه بينه
وسياط الجيش كلـها عمه بينه
ركضنه وشفنه طايح عمه ابينه
بالحومه وترض بيه اعوجيه ..

يخويه مصابك اشعـظمه هز النه
ومن تعب السبي وضيمه هـزلنه
ركــبـنـه بـــلا هـودجــنـه هـزلنه
ودخلنه السوگ گبل المغربيه ..

الشاعر عقيل الحسناوي..

مشهد ـ حرم السلطان ع

انــه الـوالــده والـگــلـب لـهـفان
ودليلي بالحزن والـنـوح لـه فان
على الذاك الظهر لحسين لـهـفـن
ولگـنه مرضرضاتـه الاعوجيه..

الشاعرعقيل الحسناوي

مصيبة الحسين ع.

يالعـطشان مـا شارب لـذيـذ المـاي
اجيتك وبعباتي عليك اسوي افياي
الشمس ياخـويه حارگـتك
عسى تنفـعك عبات اختك
……………………………

طلعت من خيمتي وجيتك اركض بالجثث اعثر
گـبـل ليـذبحـك الملـعـون عرفته لذبحك اتحضر
ويخويه بيا وضع شفـتك جسمك يلـولي امـطبر
الجـروح اشلـون اضمدها اشــدن يا جـرح اگــدر

جروحك عبرن الالـف وتسعـمـيه
شخـيـط ياجـرح تـاه الفـكـر بـيه
بــدمـع عـيـوني ضمـدتـك
عسى تنفـعك عبات اختك
……………………………

شفـتك عالرمل نايـم يخويه وحـار ضل يچـويك
وشمـس العـاشـر التـلـهب تـلـسع بالجـروح البيك
وانته اتـلوج عالـتربـان واشوفك وترفس برجليك
اجيت اركـض الك واعـثر بعباتي گلت افيي عليك

من حر الشمس عادن يخويه ارتاح
ولو محترگـه منها هالعـبايه اصفاح
تـهـيـد مـن الوجـع ردتـك
عسى تنفـعك عبات اختك
……………………………

الشمس حرگـة جلد جسمك يخويه وغيرت لونك
وانـته مـن العـطـش والحـر ذبـلـن يالولي عيونك
الجـروح ابـوجـهك هـوايه بحلگـك كسرو اسنونك
وچـا لـيش بحـجـر يرمـوك نـيـتـهـم يـدفـنـونك

الحجر صاير عليك حسين چن تـله
گـلي شلـون جسمـك خويه اوصلـه
ومـن بـيـن الحجـر لحـتك
عسى تنفـعك عبات اختك
……………………………

يبعد اختك صحت يمك يروحي شصاير بحالك
عدل بعدك يماي العين واشوف مگـطعه اوصالك
الشمـر هـذا عليك يحـوم گـرب خـويه وتـدنـالك
يحــز راسـك اظـنـه ايـريـد هالـمـسـرع تـعـنـالك

اجـه يركض شمر ليك وشهـر سيفه
يريـد اگـبالي حـز نحـرك على كـيفه
ولگـاني خويـه حاضنـتـك
عسى تنفـعك عبات اختك
……………………………

الشمر يضحك علي ويگول الخدر يام الخدر چاوين
حرگـة اخيامـچ وشـفـتـچ تـركـضين بعـمـر خـمسين
واضحك مـن اشـوفـنـچ يبـت حيدر علي اتـطيحين
وهسه احـرگ بعـد گـلبـچ گـبالـچ راح اذبحـه حسين

عـنـك خويه شوفـه هاليجـر بيه
اوخـرنـه ويطگـني بسوطه بيديه
يطگـني وابــد مـا عفـتـك
عسى تنفـعك عبات اختك
……………………………

واشوفك ترفس برجليك من ايطگني تتحسر
تريد اتگـوم بـس تـعـبان حـيلك خويه ماتگدر
ايـدك ما تـحـركـها الظـهـر وي صدرك امكـسر
وتالي گـبالي حـط السيف وبراسك غـده ينحر

رجعت اركض يخويه بدمعي لخيامي
ولگـيت اخـيامي محـترگـات جـدامي
ورجعت بحـزني حشمـتك
عسى تنفـعك عبات اختك

الشاعر عقيل الحسناوي..

.

بحر طويل ( كربلائي او اهوازي )

وصية الزهره يالخادم گـلبك فـتحه واسمعـها
الخـدمه التـتعب عليها بــذنـبـك لا تـضيـعـها

،،،،،،،،،،،،،،،،،،،،،،،،،،،،،،،،،،،،،،،،،

لحـسين شكـثر تـتـعـب هـذا تعـبك ابـعـيني
اعرفك من گـلب والسان بـوليـدي تـواسـيني
بـيـضــه نـيـتــك ادري واحـضرلـك تـخـيـني
وادور مجلس العطشان دروب ابعيده اگطعـها

،،،،،،،،،،،،،،،،،،،،،،،،،،،،،،،،،،،،،،،،،

احـضر مجـلـس الالگـاه بـي خـدام مجـتمـعه
وغـير الونـه ما عـدهـم عالمـذبـوح والـدمـعه
يمـهـم اگـعــد وابـچـي واضلـن عالولـد انـعه
والگـلـبه نـظـيف هـواي ونـتـي راح يسمعـها

،،،،،،،،،،،،،،،،،،،،،،،،،،،،،،،،،،،،،،،،،

بالك يالـتحـب حـسين تزل رجـليك عن دربك
نعرفك بالخدامه تذوب صادق نـعـرف ابحـبك
لچـن دورات يالخــادم تـزعـل احسينك ابذنبك
واجروحه الغميجه هواي بـذنـبـك انـته توجعـها

،،،،،،،،،،،،،،،،،،،،،،،،،،،،،،،،،،،،،،،،،

تره حسينك يحـبك حيل لذلك جابك اتخدمه
حسين الضحه الك بعيال واخيام وبعـد دمـه
تـكـسر خـاطـره بـذنـبـك يالخادم تـره زحمه
وتچمل اسهامه ذيچ اسهام الرادك عود تشلعـها

،،،،،،،،،،،،،،،،،،،،،،،،،،،،،،،،،،،،،،،،،

لسانك صونـه يالخـادم واحفـظ لا تـزل عـينك
وگـلبك عن هواه حفظه يريدك ثابت احسينك
عـالـم مـا يـريـد اتصير ورع راد بـأمـر ديـنـك
وزيل الموش حلوه اعليك وبس الزينه طالعـها

،،،،،،،،،،،،،،،،،،،،،،،،،،،،،،،،،،،،،،،،،

فطرتك خدمتك تعبك كلشي مسجل ومحسوب
لـچـن بالك تـزل ويـاه گـلبه من الذنب متـعـوب
من هالساعه يالخـادم لجل احسين كون اتوب
يـسـتاهـل تـضـحـيـلـه ذنـوبـك ذيــچ ودعـها

،،،،،،،،،،،،،،،،،،،،،،،،،،،،،،،،،،،،،،،،،

افـتـح گـلـبك وعـقـلك وامـورك كـلـها صفـيـها
ومن باچـر تعـال انسان ثاني الخدمه طب ليها
يستـاهل ابـو السـجـاد صفحـتك ذيـچ تطويـها
وذيـچ اذنوبـك الچـانت تعال ابمجـلسه اخلعـها

،،،،،،،،،،،،،،،،،،،،،،،،،،،،،،،،،،،،،،،،،

وگـله الخـاطـرك يحسين اجيـتك سيدي تايب
واريدك ترضه عني وكون يرضه سيدي الغايب
واحلـفـك سيدي بـزيـنب تگـله يمسح اشكاتب
عـني بدفـتـره مـو زيــن والـزيـنـــه يـرجـعـها


الشاعر عقيل الحسناوي..
.

(الظليمه الظليمه من امة قتلت بنت نبيها )

الظـلـيـمـه الظـلـيـمـه .. مـُهـرك ينادي الظـليمه
طاح الحسين يزينب .. سابـح ابـدمـه هضيمه
……………………………

مـُهـرك اتـعـنــه الخـيمنـه سرجـه ملـوي
يصهـل ينـادي الظـلـيمه وصوتـه يـدوي
وانـي محـتـاره يخـويـه شـراح اسـوي
ولـنـه مـُهـرك عـن مـصابـك صـار يـروي

مـُهـرك ايگـلي بصهـيلـه .. لحگـي اخـيـچ يالعقـيله
الگوم اجـته تريد ذبحه .. مصيبة حسينـچ عظيمه
……………………………
گـومـي لحگـيلـه يزيـنب ذاك الحسين
دارت اعلـيـه الاعـادي يخـتـه صوبـيـن
ضعف حيله من الـنزف ميشوف بالعين
عـفـتـه نايـم عالـتـرب سـابـلـها الايدين

بـيـه مـا ضلـت بـعـد روح .. حيل تعبان من الجروح
ومن نزيف اجروحه ذيچه .. خضب الشيـبـه الكريمه
……………………………
عـفـتـه فـوگ الـغـبـره يـتـلوه ولـيـنـه
ومـن جـروحـه يسمـع الشامت ونينـه
يالعـقـيـلـه بالحـجــر صابـو جـبـيـنـه
ونـزل دمـه على عـينـه وطفـه عـيـنـه

عفـتـه اخيچ فوگ التراب .. دمعه وي ادمومه سچاب
راد يزحف صوب الاخيام .. ومنـعـتـه الما عدها شيمه

……………………………
گـالي مـُهـرك اخـيـچ روحي لحگـيه
بالگـلب سهـم المـثلـث منـه طلـعـيه
يالعـقـيـله وبـعـبـاتـچ روحـي غـطـيه
بالشـمـس عـاري يزينـب راح تـلـگـيه

انـي ادلـيـچ امـشـي ويـاي .. ابعـباتـچ سوي الـه افـياي
الشمس تچوي والرمل حار .. وما مش عله حسين غيمه
……………………………
اخـذي لحـسـينـچ عـسه مـن المـاي گـطـره
ولـو لـگـيـتـيـه مـنـذبـــح شـربـيـه بـنـحـره
ولا تـلـچـمـيـنـه علـه كـيـفـچ ويــه صـدره
من السحگ صدره انطبگ يخـته ويه ظهره

بـهـيـده مسحـيله دمـوعـه .. لا تـلچـمـيـهن ضلوعه
بهذا وضعه وفكره مشغول .. بـيچ واطفاله وحريمه
……………………………
وخـاف تـلـگـيـن الشمـر ايحـز وريـده
لا تـگـربـيـلـه تــره اتـسـطـرچ ايــده
روحـي اركـضي للـنهر حشمي عضيده
ولــو ذيــچ الـمـشـرعـه عـنـچ بـعـيـده

روحي حشمي الگمر عباس .. حسين گـليلـه بلا راس
والـزلـم فـزعـت عـالخـيـام .. والحـرم فـرت ابـهـيمه

الشاعر عقيل الحسناوي..
.

ابوذيات نعي لأبالفضل العباس ع

يخويه الرايه طاحت مال اخينه
رحت والگيت جسمه مالـخـيـنه
ومـن مـهـره يزيـنب مال اخينه
بدون اچفوف طاح اعله الوطيه ..

تعـب من النزف حيلـه وگـل باه ـ قل حيله
اشيلـه اشلـون حيرني وگـلبـاه ـ
السهام ابظهر وبصدره وگـلبـاه
رمح نصين طـر گـلبه يخيه..

عله الناگه ودرت وجهي ورايه
شفت جود الكفل طايح ورايه
شني شوره بسبي زينب ورايه
اضل لويرضه اروح اني سبيه..


شني الحصلته من فرگاك وجناي
غير اسياط خويه وسطر وجناي
الشمر من وج خيمنه النوب وجناي
احترگت وليلى گام اطفي بيه.

الامام الحسين ع يخاطب ابا الفضل ع

خبر موتك وصلني وصار علماي
عگبك ياهو خويه يشيل علماي
نايم لا تـضــل عـباس عـالماي
بعـد سـاعـه تـدوس الخـيل بيه..



موتـك خله گـلبي بجـرح يدماي
هدم حيلي وشلـّل صابالي يدماي
طحـت بيدك عـلم عباس (يد ماي)
العـلم والمــاي مـارجـعـن الــيـه..

الشاعر عقيل الحسناوي..
.

يوم ام البنين ع

يالزهره اعذريني .. بـبنـيـني .. راحو فـدوه الأبنـين
ريت انـي علـويه .. ومسبيه .. وي نسوان الحسين
اعـين العـقـيـله
بمحنها الطويله .. واحـرسها بالعـيـن
……………………………………

يافاطمة اسمعت الخبر ولسه بحزن مفجوعه
گـالـو عـزيز ام الحـسن امـهـشمـيـن اضلـوعه
يافاطمة وروحي احس من الجـسد مـنـزوعه
وياريت راسي المنگطع ولا رگـبـته المگـطوعه

يوم الخبر جاني .. ولسه اني .. اسكن ماتم النوح
انـصبلـه تعـزيـه .. لـيــلـيــه .. لمـن تـطلـع الروح
اهـيـم ابـمـناحي
واذوب ابجراحي .. كـل هاي السنين
……………………………………

عذريني يا ام الحـسن وياچ احـس امقـصره
ياريت مـو بـس اربعـه بالطـف بنـيـني عشره
والخيل تسحگـهم سوه وعاـفت عـزيز الزهره
شماضحي لبنـيـچ ولــد مـا وافـي فـضلـچ ذره

خـالقـنـي الـچ الله .. وما اسوه .. يالزهـره ابــلاياچ
كل عمري واسنيني .. وابنـيني .. بكل الغالي نفداچ
لخدمتچ وجودي
اوفـي ابـعـهودي .. يبقـه العهد دين
……………………………………

يا ريت ويـاهـم رحـت واخدمهم ابشيباتي
ياريت من ذاك العطش ارويـهـم ابـدمعـاتي
وسوط الشمر بيه يطگ ولا طگـهن ابنـياتي
يافاطمه وحـرگ الخيم هـو سبب مأسـاتي

من حرگـو الخـيمه .. بالهيمه .. طلعت اخت الحسين
ما تدرين وين اتروح .. للمذبوح .. للمگـطوع الايـدين
يگـلـبـي التـعـذب
عله حيرتها زينب .. كـل هذا الاونين
……………………………………
يافاطمة وگـلـبـي انـمـرد لمـن سمـعـت اعلـومه
گـالـو حبـيـب المصطـفى غـارگ ابفـيض ادمومه
عـطشان نـايـم عالـتـرب ومـسلـيـبـيـن اهـدومه
وخيل العده بصدره ترض وجسمه تطش بالحومه

يا فاطمة لظـهـره .. مـن صــدر .. نـازل حـافـر الخيل
الحافر شلع روحه .. من اجروحه .. ماضل بي بعد حيل
حبـيـبي وعـذابه
ذبحـنـي مصـابه .. مگـطوع الوتـيـن
……………………………………
يافاطمه وابـنـي الـبـچـر راعي الوفه والنوماس
عيونه انطفت عالمشرعه ويلي انفطر منه الراس
وياوسفه اخـته ابغـيبـته اتـشـمـتـت بـيـها الناس
وبكـل ديـواويـن الـغـرب ينـشـدوها عـن العباس

چا وين ابو فاضل .. والكافل .. خـدرچ يالعـقيله
اليبرالـچ ابـعـيـنـه .. چا وينه .. بهالسفرة الطويله
بهذيـچ الشماته
بهـضيمه خواته .. وين الگـمر وين
……………………………………

ويا هضمة الماعدها اخو لـمـن تـطــب للـديــوان
ديـوان مـتـروس بـغـرب وشماتـه زلــم او نـسوان
زينب تـطر وسفـه الزلم يعاينها ضل ياهـو الچـان
اي هاي اخت المـنذبح عالشاطي واخت العطشان

بـيـن الزلم صعبه .. بالغربـه .. شلون الطاهره اتفوت
يالشام وخرايبها .. متحبها .. وتـالـي بـيـهـن اتـمـوت
هـضيمه وظلـيمه
الخرابه الها خيمه .. ويـه النساوين


الشاعر عقيل الحسناوي..
.

يوم العباس ع

گوم ارجع يا خويه  وياي .. لا تـكـسر ظهري
عبـاس  اخـلافـك دنـيـاي .. حافـرها بصدري
بانت للعسكر خلـتي .. خلافك ما ترحم دنيتي
…………………………………………
گـوم  ويــاي  يا عبـاس  اروحـن  فـدوه للخـوه
لتخـلـينـي بـيـن اعـداي  اكـابـر  عالجـرح  گـوه
وحگ عين الطفتها ادماك  وراس الينزف امروه
قـلــة  حـيلـتي  هــسـه  وظـهـري أنـكـسر  تـوه

ياعباس الحگـني وگـوم .. ياخويه اسندني
بعدك ساعة وهاي الگوم .. راح.  تـفـرهـدني
يصير المصار ابجـثتي .. خلافك ما ترحم دنيتي
…………………………………………

يبو فاضل يروح حسين  تره حسينك صفه بحيره
شيسوي الاخـو مذبـوح   ومـا عنـده  اخـو غـيـره
ياهـو بـولـيـت العــدوان   يفــزع  للاخـو ايجـيـره
بمـثـل هالشـده ياعباس  يبـيـن  كـل اخــو خـيـره

بس هسه اني ابلا خوان .. وحـدي ابـلا ناصر
تـتـشمت  بـيـه العـدوان .. محضريلي الحافر
متشمته الناس ابغربتي .. خلافك ما ترحم دنيتي
…………………………………………
گوم ارجع لعد زينب  تراها عليك قلقانه
گـلبها خايف ومرتاب  تصهر بـيـه نيـرانه
اخلـيك وارد اشلـون  الها وهي عـطشانه
شگـللها كـفيلچ مات  وبين الغربـة خلانه

ياعباس وصعبه هواي .. من دونك ارجع
ترجع الها تجيب الماي .. زينب  تـتـوقـع
بهل موقف حيره حيرتي .. خلافك ما ترحم دنيتي
…………………………………………

شگـل لسكينه ياعباس  العطشانه وتريد الماي
شگـللها انـذبـح عالماي  يا عبـاس اريـدن راي
شگل لام الرضيع اهناك  سولفلي يخوي بهاي
وحگـك حيرتي حـيـرة  وما ينقاس ابد بلواي

كـلـها تـريـدك يا عـباس  .. تـرجـع  تـرويـها
واني الحاير افر بالراس .. شلون ارجع ليها
ياخويه چبيرة مصيبتي .. خلافك ما ترحم دنيتي
…………………………………………
اذا ارجـع واعـوفـنـك  السلامة اعليه اقـراها
بعد ساعة يبو فاضل  الرماح بصدري تلگاها
فوگ الجـثة حافر خيل  وحافر خيل جواها
وتلگـه حجار والتربان  هذيچ الجثة غطاها

ياعـباس تـشـوف  الخـيـل  .. اتروح وترجع
وماضل من احسينك حيل ..  تلگاني مگطع
ومن دمي حمرة شيبتي .. خلافك ما ترحم دنيتي
…………………………………………

اذا عـوفك يبـو الغيره   خـيمـنه مـا يخـلـوها
يسلبوها ويـهـدمـوها  وعله الخـدر يحرگوها
وبنات الزهره ياعباس  يخويه الگوم يولوها
يشتموها ويضربوها   وخواتـك راح يسبوها

يصفن راح ابلايه اخيام .. ياخـويه الخدر
ويسبوهـن لديـار الشام .. بوليت هالعسكر
وهامك وياها وهامتي .. خلافك ما ترحم دنيتي

الشاعر عقيل الحسناوي..
.

( ليلة الوحشه).

ليلـة وحـشـه وكـسرة خـاطـر
بـيـهـا شـسـوه ظـهـر الـعـاشـر
المحشومه بين اخوتـها
ضلت وحدها بغـربـتـها .. كسرت خاطر ..

………………………..
من ذبحو عالغبره الضامي وداست صدره الخيل حسين
ومن طـاح اعله الشاطي الكـافـل سهـم بعينه بـلا چفين
ذيـچ الخـيـل وذاك العـسكـر عـالحـره انـدارت صـوبـيـن
وبـين اطفال ونسـوه احـتارت تركـض زينب بيـهم ويـن

ويـن تروح بذيـچ الخــدر
نـار وخـيل ورهـبـة عسكر
زينب محـتاره بحالـتها
ضلت وحدها بغـربـتـها .. كسرت خاطر ..

………………………..

وعگب الصار بحال الوالي گـصدو ليـهـا بـذيـچ النـار
وخيـل وعسكـر دارعـليها وضاعت منها اطفال ازغار
حرمه ومهظومه وهم ثكله  مگطع شافت راعي الدار
تگصدمـن تشكيله الحـاله  لامها الزهـره لحامي الجار

ياهـو اليفـزع ليـها ويحضر
وفـوگ الغـبره حسين موذر
ياهـو يساعدها بمحنتها
ضلت وحـدها بغـربـتـها .. كسرت خاطر ..

………………………..

وضلت زينـب هـاي الليله  وحـدها تـلـم بالنسوان
ومابين المذبـح والشاطي تگـوم وتوگـع عالتربان
ولاخـيمه الضلت تسترها التـهمت خيمتها النيران
تعبـانـه وتـتـنـفـس گــوه خـانـگ ريـتـها الـدخـان

تراب ودخـان الطـف جـوه
ومخـتـنـگـه وضلت تـتـلوه
غـبره ودخـان ابريـتـها
ضلت وحدها بغـربـتـها .. كسرت خاطر ..

………………………..

الله يساعدهـا بهليله  بيـها شـسـوه طـف عاشـور
تلـم بالعيله، تگـعد تبچي، عالميت ضامي ومنحور
تدور اطفال الضاعت منها، تبقه عله الخدر ناطور
تداوي المچـويه برجليها، لو عـظم البطـگ مكسور

وكـفت ذيـچ الليله بحـيره
مهضومـه ومدمعـها تديـره
وشـتسوي بهايه حيرتـها
ضلت وحـدهـا بغـربـتـها .. كسرت خاطر ..

………………………..

عگب الكافـل حـيـف ووسفـه  يحـرسـها صـار الذبـاح
يحـاچـيـها الذبـاح وشـامت  زيـنب كـافـل خـدرج راح
مگطوعه چفوفه عله الشاطي وسهم بعينه الكافل طاح
وحـسيـنـچ طايـح عالغـبره بـسـيـوف مگـطـع وارماح

وضحكـات الشامت تهـظمها
ومـا گـدرت دمعـتـها تظمـها
وسالت فوگ الخد دمعتها
ضلـت وحـدهـا بغـربـتـها .. كسرت خاطر ..

………………………..
الله يساعـدها بمحـنـتها ويالوعـه وياهـم اتحمله
يسبوهـا لو صبح باچـر وبـلا هـودج تركـب هـزله
بالخدر باچـر تـتمحن چم طفل العدها وچم طفله
من الطف لقصر الكوفه صعبه لقصر الشام الرحله

زيـنب بـاچـر مـن يسـبـوها
هـواي المحشومه يعـذبوها
بالغربـه تهـظم وحـشتـها
ضلـت وحـدهـا بغـربـتـها .. كسرت خاطر ..


الشاعر عقيل الحسناوي..

جروح السبي..

ياخويه عالنـوگ .. طبينه للسـوگ
مـن لـمت الناس .. دلالي محـروگ
وبالعـلويات  ..  كـلهم شمات
………………………

يخويه حسين شحچيلك  من دار الوكت بيه
من ذبحـوك يبن امي  خـذتـني الناس مسبيه
اني ام الخــدر زيـنب  الما شـافـو طـرف لـيه
بيا شـيمـة عـرب يحسين  تركب هـزله علويه

بت حامي الجار .. وبيه الوكت دار
وبالهيمه يحسين .. اركض من النار
واشبع طيحات .. كـلهم شمات
………………………


اني ام الخـدر ياحـيـف  المـحـد شـاف اليه اخـيال
اني ام الـدلال الچـان  العـرب بـي تـضرب الامـثـال
بـين الخـيل بـين النوگ  امشي ويـاي غـربه ارجال
وراسك يمـشي عالي وياي  بس فوك الرمح ينشال

او ويانه عباس .. هم يمشي بس راس
بـلا رايـه ويـاي .. ولا سيـفـه لا طـاس
الكـافل من مات .. كـلهم شمات
………………………



وطبـيـنـه بـهذيـچ النـوگ  ويخـويـه النـاس ملـتمه
مستحـيه واگـول اشلـون  هـذا السوگ اطب زحمه
والـتـمشي بضـوه العباس  بمـصابـيـح المـدن تعـمه
المتعلمه عله حچي حسين  بذنها اترن صفت شتمه

تلـگـونه بطبـول  .. ومراگـص اخيول
وغمضنه العـيون .. شنحچي شنگول
ونجر حسرات .. كـلهم شمات
………………………

شحـچـيـلك شـسـولفـلك  طبـيـت وذهـيلـه الراي
زلـم نسـوان مـتحضرين  يحـسين الشماتـه هواي
الحچي بوجهي الأسمعنه ضعـفين انحچه بمگفاي
شـي بحـجـار طـگـونـه  وشـي دارو الحــار المـاي

بنظرات العـيون .. ياخويه يحچـون
بت فاطمه هاي .. واسمع يشـتمـون
صعبه حچايات .. كـلهم شمات
………………………

وحـتى اطفـالهـم خويه نسمـعـهم يشتـمونه
ومن فوگ السطوح هناك  ابكلشي يشمرونه
بشوارع ضيگـه مزدحـمه متعـمدين  مشونه
مهـضومات مكـسورات  كـل الناس شافـونه

ما بيـن الفروع .. مشونه ونلـوع
وراسك عالرماح .. ويانه مرفوع
وبينه الطگات .. كـلهم شمات
………………………

وعگب ذاك الحصل بالسوگ  يبن امي ادخلت ديوان
مـتحضريـن الي الشمـات  شـفـت كـل القـصر ملـيان
نصارى وعـرب بيه ويـهود  بـزلـم مـتروس وبنسوان
واني ابـيـن هـاي النـاس  وحـيده ومـا الـيه اخــوان

ربات الخـدور .. طبن للقـصور
ماعدنه وليان .. ذبحها عاشور
وبالمسبيات .. كلهم شمات


الشاعر عقيل الحسناوي..

يالراسك براس الرمح .. يسبوني لو طر الصبح
جابوها هزلـه ناگـتي.. ونزلت هـظيمه دمعـتي
يالراسك براس الرمح

…………………………

يل عالرمح راسك عله .. وجـثتك رميه مفصله
ودم يجري نحرك
جابولي يحسين الهزل .. وباچر يچتفوني بحبل
ويسبـونـه خـدرك

لمن طحت مذبوح بالطف عطشان
بخـيمنه اجـو شبـو يخويه النـيران
وما النه والي بهل عرب بس نسوان
يتمـرجـل علـينه غـده ياهـو الچـان

الچنت اني هيبه وانحشم .. فرجه اصبحت بين الزلم
ياوسفه من عگب اخوتي .. ونزلت هـظيمه دمعـتي
يالراسك براس الرمح

…………………………

عيني التشوفك منصرع .. عاميها يحسين الدمع
واني غريـبه
اني الچنت ام الخدر .. يضحك علي تالي الشمر
والله مصيبه

يبـن امـي دارت والوكـت بـيه انــدار
خـلـوني اركـض حـافـية فـوگ النـار
اخـيالـي مـا شافـه گـبل حـتى الجــار
وتالي انكشف طولي وتصدلي الانظـار

بين الزلم طولي وگـف .. من المستحه وجهي نشف
كـتلـتني خويه حرگـتي .. ونزلت هـظيمه دمعـتي
يالراسك براس الرمح

…………………………

باچر يروحي اطلع سبي .. والشمس تحرگ بالعبي
ابـلايــه هــودج
كـلش طويله رحلـتي .. وهزلـه ونحـيله ناگـتي
ومن تمشي تعرج

الناگـه هزلـه وعـرجـه وتـعـذبـنـي
خـطـوات تمشـي بـيـه وتطيحـني
وما تحـمـل الناگـه نيـاحـي وونـي
وگامت تون وي وني من تسمعني

ياريت يم جسمك متت .. ولا عالهزل خويه اركبت
عالهزله تصعب رحلـتي .. ونزلت هـظيمه دمعـتي
يالراسك براس الرمح

…………………………

وذاك الدرب ما ينحـمل .. مچـتوفـه واني عالهـزل
لـو مالـت اوگــع
بمتوني كل ذاك الضرب .. يشتموني ياخويه الغرب
واسكت من اسمع

الممشه وي غـربه يخويه قاسي
يشتمون امي واني اهبط راسي
واعيوني يجـرن وانظر العباسي
ويغمـض عيونه الكـفل نوماسي

وبعـيونـه اليـه يعـتـذر .. ويهـزلي راسه المنفـطر
ويگـلي شوفي حالتي .. ونزلت هـظيمه دمعـتي
يالراسك براس الرمح

…………………………

وي الشامت الممشه صعب .. شتم وضرب كل الدرب
واني الجليله
والراسك امشي والتفت .. ساعه ومن الناگه طحت
تميل الهزيله

يـاخـويـه عـذبـنـي تــره هـذا الحــال
من الناگـه اوگـع خويـه لو حملي مال
وابرگـبـتـي وبأيـدي مشـدوده احبـال
وحرمه اني خويه امشي ما بين ارجال

ياريت وافـاني الاجـل .. بالطـف ولا هـذا الحصل
ياخويه تهـظم غربتي .. ونزلت هـظيمه دمعـتي
يالراسك براس الرمح

…………………………

اني العفيفه امخدره .. ديوان اطب باچر تره
بين الشماته
ويزيد ينظرلي بفرح .. وحسينچ ايگلي انذبح
وهايه خواته

جايبـهـن بنـص القـصر مچـتوفـات
وذنـي بنـات حسينـكـم مـرعـوبـات
ويگـلي عباسـچ يزينـب هـم مــات
بنص القصر تضحگ علينه الشمات

ويكـتلـني ياخويه القـهر .. من يجلـد بعـوده الـثغـر
وعوفـه اگـله بصرخـتي .. ونزلت هـظيمه دمعـتي
يالراسك براس الرمح

الشاعر عقيل الحسناوي..

تجليبه لاستشهاد الامام السجاد ع

علي السجاد مات الليله بالحـسره
واجت يمه تحضره فاطمه الزهره

قبل ميموت ابو الباقر اجت يمه
بضلع محني الزچـيه فاطمه امه
والسجـاد چـان اينـازع ابسـمه
بچـبده نـار سمه حيل مستـعره

يصد للزهره عينه والدمع يجري
يكلها جده نار السم غدت تسري
منيتي گربت واني نگضه عمري
وللمـثـلي شيفيده بالشفت عمره

يجده بعيني شفت اهوال ماتنشاف
واذا احجي عليج من هضم ينخاف
شفت حسين من حز راسه السياف
ومثنـي الشمر ساحـگ على صدره

يحـز ابراس ابـوي بعيني شاهدته
وطلعت حافيه تركض يجده اخته
تريـد تخـلص الصارت وذر جـثـته
بلكت ماتـدوسـه الخـيل وتـطشره

لچـن عـنه الشمر ياجـده درفـعـها
بچعب رمحه النذل كلساه يوگعها
يطگها بسوط جده وحيل يوجعها
حـرمـه عمـتي وماتـگـدر تـنـحـره

وعگب ذبحه يجده وكسرت اعظامه
اجـوا صوب المخـيم حـرگـوا اخيامه
وطـشـت بالبـراي وضاعـت ايتـامه
وتـدور ويـن زينـب ويلـي متحـيره

احترك بينه المخيم جده وين انروح
والكـافل ضعـنه عـله النـهـر مـذبـوح
عليمن جـده نعـتب والعتب مسموح
ونشاهدهم جـثث عالگاع متـطشره


الشاعر عقيل الحسناوي..

من جروح الامام السجاد ع

بدروب الشام .. عشناها اجروح
نسـوه وايتـام .. نـبـچـي ونــوح

……………………………

من طف لليوم .. وظهر العاشر ومصابه
ماشفـنه النـوم .. عـللي مسلبـين اثيابـه
سابـح بـدمـوم .. وموسـد فـوگ اتـرابـه ..

أشـسـوه بيـنـه عـاشـور .. ضـيـم قـهــر راوانـــه
كـافـل خدرنه من طـاح .. عالشاطي طـاح الوانـه

محروگه اخيام .. والنــار اتـلـوح
نسـوه وايتـام .. نـبـچـي ونــوح

……………………………

مـرت أهـــوال .. صعبه اعليه و احـچـيـها
عمـتي بحبـال .. زيـنـب مچـتوفـه أديـهـا
ومسبيه اعيال .. بـالطـف ذبحــوو والـيـهـا ..

صعدو خواتي عله النوگ .. بذاك الحچي يسبوهن
واسمع بذانـي الشـتـمـات .. بعيني شفت ضربوهن

متحزمه حزام .. وكـلشي مسموح
نسـوه وايتـام .. نـبـچـي ونــوح

……………………………

يمـشـن بـدمـوع .. عمـاتي ينـزفـن حسـره
مكسوره اضلوع .. بيهن چم دفعه وسطره
والحــره اتـلـوع .. لـو شتـمـو امـها الزهـره ..

الزهره شكـثر ياهالناس .. جدامنه يشتـموها
وعمتي لمـن تمنـعـهـم .. بلا مرحمه يضربوها

شـالـــت ألام .. تـهـدم بـالــروح
نسـوه وايتـام .. نـبـچـي ونــوح

……………………………

لا مانـنساه .. ضيم الشـام واحزانـه
بالحسره وآه .. بدخلت سوگـه اذانـه
ياهو اتلگـاه .. بينـه يصيح وسبانـه ..

يشمرونه گامو بحجار .. اشگد چبيره الهظمه
متجمعه كـل الشمات .. والسوگ صاير زحمه

النظرات اسهام .. عله اخت المذبوح
نســوه وايـتـام .. نـبـچــي ونــوح

……………………………

كل النظرات .. بهل حاله جسره علينـه
وكـل الشمات .. لـتـمـت تـتشمـت بينـه
وعالعـلـويـات .. يتـفـرج ويـنــه ويـنــه ..

التمـو علينه الاجناب .. من كل كـتره شماته
وشمتانه حـتى الاطفال .. بحـسين وبنـياته

علينـه الظـلام .. تضحك واتـروح
نسـوه وايتـام .. نـبـچـي ونــوح

………………………………

الحـد مـا مـوت .. واهل الجور ايسـِمـوني
اصرخ هالصوت .. يـاهـل العالم سمعـوني
هدمولي ابيوت .. بالطـف لمـن أســـروني

اني اللي حرگولي خيام .. واهـلي ضحايه بصحره
ميـهمني اموتن مسموم .. وهظمي اعله بت الزهره

بضـيـم الايــام .. گـلـبـي مـقـروح
نسـوه وايتـام .. نـبـچـي ونـــوح.



الشاعر عقيل الحسناوي..

استشهاد الامام السجاد ع

الليله ابو الباقر باخـر انفاسه
وگاعد اوليده يقره يـم راسه
يقره مصيبة حرگ الخيم
بالهيمه فرت ذيچ الحرم
يقره يم راسه ..
…………………………
العـلـيـل اللـيلـه  يـودع بـاحـبـابه
وفوگ راسه الباقر دمعته سچابه
گعد يـم الابـو والدمعـه يجـريها .. ويقراله المصيبه
قره قصة السبيه وما جره عليها .. زيـنـب الغـريـبـه

وگامت الدمعه  بالهـظم تهمل
التصعد الناگه صعبه من تنزل
وهـيج بالصدر ذاك الالم
بالهيمه فرت ذيچ الحرم
يقره يم راسه ..
…………………………

يالفض بأنفاسه ودم تصب اعيونه
موسـدينـه گـوه يوجـعـنـه امـتونه
عمر گضاه يون لمن ينام ايريد .. بمتنه هواي الجروح
واثـر للجـامعـه لسـه بقـه بالايـد .. تلچمه وتوجع الروح

وبالسبي شاهد قصته الباقر
بجامعـة ايده  لحمـه متناثر
ومتنه  بالضرب كلش ورم
بالهـيمه فـرت ذيـچ الحرم
يقره يم راسه ..

…………………………

بعينه صد للباقر وبالدموع ايگله
بويه موت حيلي ياسهم عبدالله

علل خلـه بـدليلي اچماله بمصابه .. رضيع ابدمه شفته
وسدته ويه ابوي وهلت انه اترابه ..  وبـأيــدي دفـنـته

بويه من شلته دم ترس صدري
چـانت اوداجـه بالـدمـه تجـري
الله اشعمل بينه هالسهم
بالهيمه فرت ذيچ الحرم
يقره يم راسه ..
…………………………

وگبل طَلعت روحه وگبل خمد انفاسه
يصـيح آه يرقـيـه وضل يـدگ ابراسه

مصيـبتـها الظهـر يالبـاقـر اتكـسره .. الماتـت بالخـرابه
بطشت شافت ابوها وقبلت نحره .. وحظنيته بخضابه

بـونــه تشكيله  العـاشـر ويــومه
وعالطشت ماتت اختي مهظومه
من گد مابچت راسه انهظم
بالهـيـمـه فـرت ذيـچ الحرم
يقره يم راسه ..
…………………………

وگـالـهم چفنـوني لومـتت بالرايه
الباقي بيها لسه من الكفيل ادميه

الرايـه من هـوت فـوگ النـهـر قصه .. نرويـها بدمعنه
لهسه بصدري من طاحت بقة غصه .. الراعي المحنه

لعمي ابوفاضل غصه اكو بصدري
بگـطعـت ازنــوده  انكـسر ظـهري
مات وعالنهر طـاح العلم
بالهيمه فرت ذيچ الحرم
يقره يم راسه ..
…………………………

هـــو اصلـن مـيـت  بظـهـر  ذاك الـعـاشـر
بصدر ابو من شاهد يرض ضلوعه الحافر

ميت من هـذاك اليـوم بالحـومـه .. شـاف ابعـينه الخيول
بحوافرها ظلوع حسين مهشومه .. بصدره گامت اتجول

وشاهـد الحـافـر يمـرد ابگـلبه
وعالترب ذبه  بسحگته ايگلبه
گـلبه عالترب يتجره دم
بالهيمه فرت ذيچ الحرم
يقره يم راسه ..

الشاعر عقيل الحسناوي..

رقـية رقـية نامت بالخربه
سبية سبية بالشام وعذابه
توها بطلت نوح ..تعبت من الجروح
رقـية .. سبية
………………………………………

تعبت من نـزيـف الـدم من اجروحـها البيها
وفرشت تربــة الخربـة وذبـت روحـها اعليها
من ذاك التـعب والضيم غمضن گـوه جفنيها
بلكت من تـنام اتشوف بحلمها ايمرها غاليها

لـبـوها لـبـوها رقية هوايه تشتاگ
سبوها سبوها وذبـحـوهـا بالفراگ
دمعها الطفلة مسفوح .. تعبت من الجروح
رقـية .. سبية
………………………………………

وفوگ املوحة التربان نامت والجروح اوساع
نامت والطفـل لـو نـام اذا خايف يفز كل ساع
نامت والمـتـن للسـوط رخيص هواي من انباع
بـلـكـت بالحـلـم تـلگـاه البـيـن الحـوافـر ضاع

حلمـها حلمـها تـشوف الولد حسين
يضمها يضمها ومتنها يطيبه والعين
ويمها يبقـه ميروح .. تعبت من الجروح
رقـية .. سبية
………………………………………

نامت والجفن مطبوگ ومن تحته الدموع اتسيل
وتفـز كلساعه من النوم تصرخ عمه عمه الخيل
وترد تغفـه وترد اتصيح يعمه السوط يوجع حيل
وترد تغفـه وترد اتصيح اطفال الشام بـيه اتـعيل

خطية خطية بيها اشعـامل الخوف
رقـيـة رقـيـة كلشي بنومها اتشوف
وتفز من نومها اتنوح .. تعبت من الجروح
رقـية .. سبية
………………………………………

واخـيـراً بالحـلـم جـاهـا ابـوها حسين الاتـريده
وشبگت حظنه كلش حيل وتشم وتبـَوس ابأيده
يبويه احظنـي اريد ارتاح فرگـتك چـانت ابعيده
بس امتـوني كـلها اجروح اذا تحـظـنـي أبـهـيده

جروحي جروحي غميجة من الاسياط
يروحـي يروحـي فـراگ گـطع انـياط
گـلبي وطلعت الروح .. تعبت من الجروح
رقـية .. سبية
………………………………………

ولا عـبـها وحچـه وياها وحست بالأمان ويـاه
حسين ولا عـب ابنيـته رقـية ولعـبـه يا محلاه
نست كل التعب والضيم واجروح السبـي والاه
لحظـة ومن صدگ فـزت تدور حسين ما تـلگـاه

يبابـه يبابـه من ثاني رحت وين
غيابه غيابه حيـل اذاهـا مرتـيـن
بجفنها المدمع ايفوح .. تعبت من الجروح
رقـية .. سبية
………………………………………

وجـابـو راس ابـوها الـها وچانت قـمـة الصدمة
شافت وجه ابوها حسين كـلـه اجـروح ومـدمه
هوت عالراس تبچي اعليه وتقبل اجرحه وتشمه
ومن كـثر الجـروح البـيـه باست بالوجـن عـظمه

مصيبة مصيبة جروح ابوجهه اهواي
عجيبة عجيبة هـذا المـا شـرب مـاي
جابو راسه مذبـوح .. تعبت من الجروح
رقـية .. سبية
………………………………………

عقيل الحسناوي..
.

بذيچ الخرابه من الحلـم  فـزت رقـيـه
واتـصـيح اريـدن والـدي  جيـبـوه اليه


تعـبانـه من ذاك السـبـي غمـض جفنـها
نامت خـطيه من الوجع  هــود مـتـنـها
طفله ومصيبات السبـي  مرادف لفنـها
واشتحمل احزان ومحن  طفله وسبيه


حـلمـانـه بالوالـد اجـه  يمـسح دمـعـها
الله  يـا فـگــد  الابـــو  كـاسـر ضلـعـها
من كربله الشام الحزن  ما خف وجعها
بالشام ضعـفـين الهـظم  بـالغـاظـريـه


گـعدت لگت ما مش ابو  بذيـچ الخرابه
اتـفـرفـح وتصرخ غـدت  چـا وينـه بابه
تشكيله من ضيم السبي  ورادت عـتابه
ما تـدري بـغـيـابـك انــه   شصاير عليه


وجـابــولـهـا راس  الابــو  نـاگــع ابـدمــه
وبلـهـفـه گـعـدت شبگـتـه  وگـامت تشمه
بوجهه غميجه اجروح اله  بـهـيده تـلـزمه
وگـالـتـلـه مـثلك صـد الي  مجروحه اديه

تحچـيلـه عالصار وجـره   عـن ذيـچ الايــام
عن  فرگـته وعن السبـي  وعن حرگ الخيام
لحد ما وصل بيها الوكت  يـم خـربـت الشام
وبـويه اشـدهـن فرگـتـك  چــانـت عـلــيـه

راوونـي انــواع  الـهـظــم   بـويـه  يـمـذبـوح
هـواي مصايب عشت انــه  واهـواي الجـروح
وشهگت رقيه عله الطشت  ولن طلعت الروح
بـذيـچ الخـرابـه وبـالغـرب  جـتـها المـنـيـه

الشاعر عقيل الحسناوي..
.

الحسين ع ينعى الحسن ع

فارگـني اخـوي وانـه الـه بعـازه
شلون اجنازه راح اتشيع اجنازه
مــات بفـرگـتـه الحـيل ..
ونهاري اصبح علي ليل .. راح اخوي

………………………………

ابن امي الحسن من روحي اعز چان
هـسـه اشلـون اصـيـرن لـيــه دفــان
واشيله علـه المـتـن ما اعرف اشلون
وادفـنـه شلـون بـيدي بحـر الاحسان

تمـنـيـته الي الموت .. ولا شـيلك يتـابـوت
ومعقـوله وللگبور .. بخوي اصبحت زاتوت

مو نعـشه يريت اليـهدل امتوني
تمنيت ابمكـانـه اني اليشيعـوني
شلون اجنازتـه انشـيل
ونهاري اصبح علي ليل .. راح اخوي

………………………………


الچان احزام ظهري واني اله احزام
عليـنـه  شلـون دارت هـسـه الايـام
مـات وردت ادفـنـه بـس يهـل ناس
نعـشـه اهـل الحـقـد صابـوه بسـهام

اخوي الحسن سموه .. وتشييعه يمنعوه
ويـم جده النبي هناك .. ماقـبلو يدفـنوه

بالسم چـبدته ماكـفه مردوها
بسهام الحـقد جـثـته صابوها
ومن نعشه الدمه يسيل
ونهـاري اصبح علي ليل .. راح اخوي

………………………………

شفت چـبده اخوي ابـسم تگـطع
والاحـشاء گـامـت شـفـت  تطـلع
ومن قـوة الألـم يـتـلـوه يصـيـح
وتـطلـع روحـه وي ونـاتـه اسمع

وابن امــي تـغـيـر .. وجـهه لونـه اصفر
وشفت امي الزچيه .. يم الراس تحضر

شفت ام الحسن يم الحسن حضرت
اه يـبـني تصـيح وعالـوجـن لـطـمت
ويـعـلـه مـنـهـا العـويل
ونهاري اصبح علي ليل .. راح اخوي

………………………………

وتـگـابلـنـه انــه وامـي الزچـيه
ويم جـثة الحسن نبچي سويه
وزينب هـم اجت ويانه تـنحب
ويـم راسه نعـقـد مجلس عزيه

شكـثر لمصابه نحـنـه .. وعليه اشگـد لطمـنه
وصحنه بصوت الاحزان .. يريت اوياك متنه

وگتله افتح اعيونك هاي اجت امك
گـامـت شـيـبـها اتـخـضـبه من دمك
وتـصـيـح بــ أه وبـويل
ونهاري اصبح علي ليل .. راح اخوي

………………………………
فتح عينه وبچـه ويصيح يومك
ما كـو مـثله ابـد عالغـبره نـومك
يذبحـونك يگـلي خـويه عطشان
ويگـطعوك ويسلـبونك اهـدومك

تضل عالگاع عريان .. تسترك خويه تربان
ثـلـث تيام يحـسين .. تـضل ابـدون دفـان

راسي  هسه سالم شايلـه بـأيدك
وانته السيف باچر يگطع اوريدك
وتسحگ جسمك الخيل
ونهـاري اصبح علي ليل .. راح اخوي

الشاعر عقيل الحسناوي..

تمت في ـ مشهد ـ حرم السلطان ع

(استشهاد الحسن المجتبى ع)

حمل نعـشه ويهـل دمعه
ابـو اليـمه وحـنى ضلـعه
يحس ويـه الحسن بـيده دفـن عمره
نهدم حيله وعلى فراگـه نكسر ظهره

…………………………
الحسن لمن الى الباري عرجت روحه
بچــه الفـگـده ابـو اليمـه وعلـه نوحه
رحـل عنه وفـتحهـن بالأسى جروحه
واحــلام الاخــوه الـلـيلـه مـذبـوحــه

على امتونه حمل نعشه
بـَلا خوته العمر وحـشه
اذا مــات الاخــو مـا ينـجـبـر كـسـره
نهدم حيله وعلى فراگـه نكسر ظهره
ابـو اليـمه وحنى ظـهره
…………………………

يشيعه وچن جبل شايل عله امتونه
راح الچـان شـايـل طـيـبـتـه ولـونـه
راح الـلـي تـذكـره بفـاطمـه عـيـونـه
الحـسن هـيـبـة علي چـانـو ينادونـه


يشيعه وگوه ضل يمشي ..
الخسر مثله خسر كـلشي
يعينه الله وعلى مصابه يعـظم اجره
نهدم حيله وعلى فراگـه نكسر ظهره

…………………………

الحُـسين بهـل مصيبه مخـتلف حـاله
بدليـلـه چـن رمـح لا مـو حـزن شـاله
الفرگـه ويـه الاخـو بهـل حـاله چـتاله
اليفـارگـلـه اخــو مـوتـه تــره اشـواله

الاخو يكـتل تره افراگـه ..
اذا غـفـلـه الـدهـر بـاگـه
يخلف بالگـلب مـو جمره الـف جمره
نهدم حيله وعلى فراگـه نكسر ظهره

…………………………

ابو اليمه عله ابومحمد وگـع حيله
وابـو فاضل ركـض يـمـه يتچـيـله
ولمـح زينب اخـيته بعـبره توميله
ودمعها عله الاخو عالوجنه اتسيله

وجرن وي زينب ادموعه ..
وابو فاضل حنى ضلوعه
وعله اخوانه الگمر ضاگ الهوه بصدره
نهـدم حـيله وعلى فراگـه نكسر ظهره

…………………………

نكـسر گـلبـه ابـو اليمه لبـچـي زينب
لمصيبتـها العلـه خوتها الرمش شيب
عله هاي الحاله ابوفاضل ظهر حدب
الحسن من النـعش لنه بحـزن ينحب

طلب منـهـم ينـزلـونه ..
وعلى زينب يطمنونه
عله زينب مـيت وگـام وبچـه بعـبره
نهدم حيله وعلى فراگـه نكسر ظهره

…………………………
لمصايـبـها العـقـيله يهـون كـل امصاب
باچـر بالسـبـي يمـشـوهـا ويـه اجنـاب
وتصد لخوتها بالطف نومه فوگ اتراب
وخيمـتـها يحرگـوها السـتر واحـجـاب

تهـد كـل حيل مصيبـتها ..
مره يحرگـوها خـيمـتها
اخوها علـه الثـره نايـم يصب نحـره
نهدم حيله وعلى فراگـه نكسر ظهره


الشاعر عقيل الحسناوي..

استشهاد الامام الحسن ع

خـويه يالحسـن تـدري .. بغـيابك ينكسر ظـهري
       مـا يسـوه بـدونـك يالاخـو عمـري

-------------------------
اخوك اني الحُسين الگاعد اگبالك
هـد حـيلي يخـويه ومايسر حالك
مــلك المـوت گـاعـد يمـنه يبرالك
بنـظـراتك اشـوف اتـودع اعـيالك

صحت رمله تحاچيها .. وتعـاينـلي وتوصيها
       وللقاسم  تعـايـن والـدمـع  يجـري
       مـا يسـوه بـدونـك يالاخـو عمـري

-------------------------
بـنـظـراتـك وداع  وفـرگـه للـخــوه
تـظـن عمري يخويه بغيـبتك يسوه
يخـويـه منـين اجـتك هـايـه الـبلوه
تـلـوج من الـوجـع يـبن امـي تـتلوه

شلها وياك چا جـعده .. وبالسـم مردت الچـبده
       بـين احـشاك سمك نار چـن تسري
       مـا يسـوه بـدونـك يالاخـو عمـري

-------------------------
شـمسـوي بچـبدتـك يالاخــو سمـك
تلـوج اگبالي يجـري بالطـشت دمـك
گمت تچوي يخويه بأيدي اذا الزمك
يلـهـب نــار مـن السـم غـده جـسمك

نـار احشاك احسنـها ..وروحـك ماگـطع ونـها
       عسن نارك يخويه اندارت الكـتري
       مـا يسـوه بـدونـك يالاخـو عمـري

-------------------------
حـالك يالحـسن خـلانـي ابـحـيـره
هضمتي الفرگتك يبن امي اچبيره
ردتك وضعي بالطف توگف اتديره
وتوگـفلي ويـه اخيك راعي الغـيره

باچر بالطـف الوحـدي .. لا خـوانـي لاولــدي
       وبـين اعداي اوگـف حاير ابـأمري
       مـا يسـوه بـدونـك يالاخـو عمـري

-------------------------
باچـر خـويه بالطـف مايسر حالي
گـبالـي يـنـذبـح غـالي بأثـر غـالي
وعلى زينـب اخـتـنه ينشغـل بالي
عگـب مانـذبـح يصبـح شـمر والي

الشمر حادي بضعن زينب .. عگب عباس المعـتب
       زينـب تـنسبي مـن ينگـطع نحـري
       مـا يسـوه بـدونـك يالاخـو عمـري

-------------------------
عگب ذبحـي يخويه انسحگ بالخيل
على التربان دمي من الجروح ايسيل
وبالـ عـاشر يصب اعله العقـيله الويل
تـدور اطـفال ضاعـوا منـها نـص الـيل


زينـب بت علي بحـيره .. تنادي صاحب الغـيره
       ياعباس الحـگـني انـسلـب خـدري
       مـا يسـوه بـدونـك يالاخـو عمـري


الشاعر عقيل الحسناوي..