وداعاً للزنازين

وداعاً .. للقيود الهدت الحيل ..
يطامورة سنين ابوحشت اليل ..

بعد ماتسهر العين .. وداعا للزنازين
…………………………………
وداعاً ياسهر يغفه عله صرخات
سياط امتون من تترك جراحات
بعد ما كو وجع لا ماكو أهات
بعد ماكو توالي الليل دمعات

بعد ماتسمع ونين .. وداعا للزنازين
…………………………………
وداعاً..  للقيود الرضت الساگ
وداعاً للحديد وذيچ الاطواگ
وبعد ماكو ليالي ووحشه وفراگ
ولا حسرة ابو لعياله يشتاگ

نگضت بالغربه السنين .. وداعا للزنازين
…………………………………
وداعاً يانعش شالو حماميل
وداعاً ياجنازه براهب اتميل
ودعا للقيود ودمها اليسيل
غريب ولا اهل تفزعله وتشيل

بعد ماكو هلك وين .. وداعا للزنازين
…………………………………
وداعاً ياچبد ذاب وتمرد
وجسم مرمي بقه او ماله احد
ميت والحديد بجسمه منشد
وعلى حـر الجسر عافوه مدد

مثل جده الحسين .. وداعا للزنازين
…………………………………
وداعاً من عذاب الغربه ارتاح
وعليك الصوت بالهم والحزن صاح
بالسم عمر ابن جعفر غدر راح
يلوج من الالم وسط السجن طاح

غدر من غافله البين .. وداعا للزنازين

…………………………………
وداعاً ياغريب المات مسموم
ياراهب بني هاشم يمـظلوم
وعلى الجسر المصايب گاعده تحوم
خلص سجنك جنازه وتطلع اليوم

ويشيعوك المعزين .. وداعا للزنازين

الشاعر عقيل  الحسناوي..

ابوذيات للكاظم ع

ابن شاهك بـبن جـعـفر  وجربيه
سگاه سم وحشه چبده  وجربيه
وگــع يـتـلــوه يـاويـلـي وجربيه
ويسحلـه گـام عـمداً عالوطيه

بسجن ويطگني ابن شاهك  ولاكـف
ومـن گـيدي الـدمـه يجـري  ولاكـف
اشـاگــف بـيـش مــاعـنـدي  ولاكـف
بحديد امربطـات اچفـوف اديـه..

الشاعر عقيل الحسناوي..

مولد الامام المهدي عج

يا صاحب زماني .. ياكـهفي وأماني
يامهدي .. يامهدي .. يامهدي

ياترافـت عـمري .. وياهـواي العُـذري .. يامهدي
اشهگـك بأنفاسي .. ياغرام احساسي .. يامهدي
ياعـشگ دلالـي .. وياحبـيبـي الغالي .. يامهدي


انته يا اغلـى محـب هايم انــا بضحكاته
بـيك ولـهان الگـلب وانـتـه نبـض دگـاته
لهـفـه بيـه الطلـعـتـك يمته الفرج ساعاته

انته حسن اظنوني .. وماي وجهي ولوني
بطلعـتك چـا يمـته .. تكحـل انته عـيوني
يامهدي .. يامهدي .. يامهدي

………………………………

والله يا معـشوگي .. ما بردلك شوگي .. يامهدي
يافرحـتي وخيري .. يالخذت تفـكيري .. يامهدي
بسمك الهج دومي .. صبح ليل ابيومي .. يامهدي


ياعـُطر وجه الصبح وكـت الصلاه اشـتـمك
ليلي ونـهـاري صرت الـهـج يـغـالـي بـأسمك
عيني ما تحمل هجر مشتاگـه تحظن رسمك

اي وحگ اعيونك .. هايم ومجنونك
طـولت بالـغـيـبة .. ياحبيبي شلونك
يامهدي .. يامهدي .. يامهدي

………………………………

بطيفي لو تلــفـيني .. الفرحه تترس عيني .. يامهدي
روحي الك ملـهوفه .. الغالي يمته انشوفه .. يامهدي
بالگـلب چـم حسره .. لطلـعـت ابـن الزهره .. يامهدي

مرني لـَون دنـيـتي بالوانـها الورديه
روحي يمك امنت منك خـذت حنيه
سيدي مـن المـهد وياك بـيضه النـيه

عشت عمري بخيرك .. وما رحت يم غيرك
وكـبـرتـني بــزودك .. وعـطـفك وتـقديرك
يامهدي .. يامهدي .. يامهدي

………………………………

بروحي اوج اشموعك .. وارتقب لطلـوعك .. يامهدي
احسب ايطل فجرك .. بروحي يمرد هجرك .. يامهدي
بكل صباح الجـمـعـه .. ادعي الك بالطـلعـه .. يامهدي


سيدي بشوگ الدمع ينـزل عالمـصلايـه
اقره قـرآن الـفـجـر ودعيلك ابكـل آيــه
فات يالمهدي شكـثر والباقي هم هوايه

كـل فجـر اتـوقــع .. شمس وجـهـك تطلـع
وتلفي وحشة ليلي .. وليلي اخلصه بمدمع
يامهدي .. يامهدي .. يامهدي

………………………………

اقره الك چم ندبه .. حسين تجبر گلبه .. يامهدي
تـفـرح المعصوره .. فاطمـه المكسوره .. يامهدي
يمن فدوه الصبرك .. فاطمه تنـتظرك .. يامهدي

بهـاي ليـلـة مـولـدك مـن يكـتـمـلـك بــدرك
فاطـمـه ام الحـسن يبـن الحـسن تنـتـظرك
تدعي الله يعجـل بساعـة ظـهورك وامـرك

لله الك دعـواها .. يافـرج بـلـوهــا
واحنه يامهدينا .. ندعي الك وياها
يامهدي .. يامهدي .. يامهدي

الشاعر عقيل الحسناوي..

وداع امير المؤمنين ع

ليلـة اوداع ومـصيـبة .. حيدر ايـودع الغـريبة
العـبرة غصت بالحناجر
وفاضت ادموع النواظر .. ليلة وداع

…………………………………………

هاي اخـر ليلة الـه حامي الحـميه
بدنـيـتـه المـنـها شبـع ضيم واذيه
راح روحـه تـعـرج بـهاي المـسيه
وتـلـتـقي راح ابمـحـمـد والزچـيه

لكن اليكسر فرحـته .. بالاحزان ايعوف بنـته
اختلطت ابروحه المشاعر
وفاضت ادمـوع النـواظر .. ليلة وداع
……………………………………………
يودع احبابه علي وبصدره حسره
ودمعـته تنزل على الخدين جـمره
وداعه هاليلة علي كـاسرلـه ظهـره
ينـظر بذيـچ الوجـوه اشلون نظره

هايـه نـظرات الاخيره .. تركت بنص روحه حيره
بالـوداع اللـيلـه حـايـر
وفاضت ادموع النواظر .. ليلة وداع
……………………………………………

عينه بعـيون الغـريـبه ودمـع العـيـون
يشرح الحـيدر مصيـبة غربـة ام عون
چـن تـگـلـه بالمدامـع بـاچـر اشـلـون
هم تجي بالطف يبويه تشوف المتون

لـو تخـلـيني يحـيدر .. وحدي ابلا خيمة بالبـر
بويـه اريد اهناك حاضر
وفاضت ادموع النواظر .. ليلة وداع
……………………………………………

بويه كونك تحضر بطف المصايب
تشوف شبـان الهواشـم عالـترايب
وبالبـراري تـركـض هـناك الغـرايب
وما كو واحد يفزلعـنه من الغوالب

كلها نومه اعله الوطيه .. مذبحين اهل الحميه
جـثث بويه ابـلا مناحر
وفاضت ادموع النواظر .. ليلة وداع
……………………………………………
كـون تحـضر كربلـه بساعـتـها واتـشوف
خيام محترگـه وعجاج الخليل والخـوف
وعالحـرم ذيـچ العساكـر تـفـتـر اصفـوف
بيش ادافع واني حرمة وچفي مچـتوف

حرمة مفجوعة وحزينه .. بويه اندبـك ما تجينه
تحامي عنه من العساكر
وفاضت ادموع النواظر .. ليلة وداع
……………………………………………
كون تحضر ياعلي وتشوف الحسين
نايم بحـر الشمـس وموسـد الايـدين
وعالشريعـة كـافلي مگـطوع چـفـين
وسهـم المـثلث نبت يا بويه بالعـيـن

من العشيره ما صفالي .. بس عليل ايشد حبالي
ياهـو يدفعـها المخاـطر
وفاضت ادموع النواظر .. ليلة وداع

الشاعر عقيل الحسناوي..

جرح امير المؤمنين ع

لخاطر المظلـومه بنتك .. اشـفـي يابـويه طبرتك
أمــوات قــادر ياعلـي تحـيـها
طبرتك يابويه فـدوه اشفـيها

،،،،،،،،،،،،،،،،،،،،،،،،،،،،،،،،،،،،،،،،

انـت قــادر ياعلي وامفـوضك الله
تحيي ميت تبري اعمه تشفي عـله
يمـن أمــر الـكـون بـيـدك هـذا كـله
الطبره اذا تشفيها بويه عليك سهله

اقسم عليك بغـربتي .. لا تـرد بويه طلبتي
منها اصعب ياعلي وتگـضيها
طبرتك يابويه فدوه اشفـيها.
،،،،،،،،،،،،،،،،،،،،،،،،،،،،،،،،،،،،،،،،
باب خـيبر ذيـچ الثگـيله اقلعـتها
والشمس ادري الصلاتك رجعـتها
واني هاي الطلبه منك بس ردتها
ترحمه حـالي طبرتـك لو طيبتها

لا تخـليـني يتـيمه .. اليتم بويه هضيمه
لـهـضـم زينب لورحت يلفيها
طبرتك يابويه فدوه اشفـيها

،،،،،،،،،،،،،،،،،،،،،،،،،،،،،،،،،،،،،،،،

اليتـم للمـثلي بويـه هـواي صعبه
العيشه من بعدك اليه تعني غـربه
الله مو وصه الموده بذوي القـربه
وقربي اكثر شي علي توده وتحبه

ليش چا اتـركه قـربي .. وجرح تترك وسط گلبي
بنص دليلي اجروح لتخـلـيها
طبرتك يابويه فدوه اشفـيها

،،،،،،،،،،،،،،،،،،،،،،،،،،،،،،،،،،،،،،،،

ادري بيـدك هالامـر وانـتـه التـريـده
بس يبويه شلون ترضه ابقه وحيده
اليـتـم دوره صعـب وشلـون اجـيـده
ريت وي محسن رحت وامي شهيده

لو شهـيده ويَ الزچيه .. هـواي اهون من سبيه
وشمر زينـب باچـر اليسـبـيـها
طبرتك يابويه فـدوه اشفـيها

،،،،،،،،،،،،،،،،،،،،،،،،،،،،،،،،،،،،،،،،

كلشي باچر يختلف لحظة دفنتك
لهلـسبب ويانـه تبـقـه بويه ردتـك
المصايب باچـر اتصب عله بنـتـك
ينسفك دم بويه والحرمات تـُهتك

تنذبح اطفال رضع .. خيمه فوگ الروس توگع
وحـرم تلـطـم منذبـح واليـها
طبرتك يابويه فدوه اشفيـها

،،،،،،،،،،،،،،،،،،،،،،،،،،،،،،،،،،،،،،،،

بويـه ساعـة كـربلـه كـلـش عصـيـبه
نشـوف بيـها ياعلـي ذيــچ المـصيـبه
جثه فوگ الشاطي مذبوحه وخضيبه
وجـثـه يـم اخـيـامـنـه ضلت سلـيـبه

الماي شح عليها گطره .. وخيل بيها اتدوس عشره
الخيل ضلت ويلي تلعـب بيها
طبرتك يابويه فدوه اشفيـها

الشاعر عقيل الحسناوي..

زينب ع في اول زياره الى قبر والدها امير المؤمنين ع..

جيت يم گبرك  اخبرك  جيت يم گبرك
يـاعلي بهجـرك  غريبـه  ياعلي بهجرك

فـهمه وضعي مـن دمـعـتي
ويحچي دمعي عن غربـتـي

،،،،،،،،،،،،،،،،،،،،،،،،،،،،،،،،،،،،،،،
يالخذت كل عمري .. بدمعي اجيت اليجري
زايره گبرك واگـلك .. نكسر بعــدك ظـهري
جيت اسولف حالي .. بغـيـبتك يالغالي
بغربه وبوحشه بغيابك .. والهضم چتالي
ماحملت اغـيابك .. وانـتظر يـم بابـك
بلكي باحلامي اشوفك .. منَ غفه يم اعتابك

اني وايتامي انتظرتك اني وايتامي
بلكي باحلامي تمرني بلكي باحلامي

هــدنـي شوگي اولـهـفـتـي
ويحچي دمعي عن غربـتي

،،،،،،،،،،،،،،،،،،،،،،،،،،،،،،،،،،،،،،،
جيت ازورن گبرك .. ضمني بويه بكـترك
خايفه من شر زماني .. وچان اماني بصدرك
خايفه من باچـر .. بويه يـوم العـاشر
لعيني تتراولي جـثه .. يدوس بيها الحافر
صور هوسه بعيني .. چن اشوف احسيني
طايح ايأشرلي بيده .. وخيل بينه وبيني

عالثره طايح  اشوفه عالثره طايح
بالدمه سابح يبويه  بالدمه سابح
ماي اسمعه يگول اخيتي
ويحچي دمعي عن غربـتي

،،،،،،،،،،،،،،،،،،،،،،،،،،،،،،،،،،،،،،،

ياعلي بهـل حالـه  .. فرهـدوها اعـيالـه
اطفال اشوفنها ضمايه .. اتدوسها الخياله
بنار اشوف اخيامي .. تحترگ جدامي
وهاي مچويه تگلي .. وذاگ يصرخ ضامي
وين افـر بطفـالي .. وطشـروها اعيالي
واحترگ بيتي عليه .. الـمن اخوتي خالي

نــار بخـيامي يبويه نــار بخـيامي
وتسحگ اجدامي بجمرها  تسحگ اجدامي
وگلبي تلهب  بيه جمرتي
يحچي دمعي عن غربـتي

،،،،،،،،،،،،،،،،،،،،،،،،،،،،،،،،،،،،،،،
والنسه الحيرانه .. تركض وعـطشانه
وكربله ذيچ اشكبرها .. بالزلـم ملـيانه
هذا يسلب طفله .. ذاك يضرب رمله
وهذا ليلى ايسب طفلها .. وحايره شتگله
نصيح ياوالينـه .. ياعلي الحـگ لـينه
بالسياط اللي ولـتنـه .. شگـگوها اعبينه

الحگ اعلينه يبويه الحگ اعلينه
حبال بيدينه اربطوها حبال بدينه
منـيدي حبلي  لايد اخيتي
ويحچي دمعي عن غربـتي

،،،،،،،،،،،،،،،،،،،،،،،،،،،،،،،،،،،،،،،
وعگب ميچـتفـوني .. عالهزل يسبوني
وعلى اجساد اخواني بويه .. عمداً ايمروني
شگد خبيث الحادي .. يمشي يـم  اولادي
وبحرگ گلبچ يزينب .. يگـلي نلت امرادي
وبالي ابـد مو يمه .. حسين ادور جسمه
شفته بس اشلون شوفه .. مسبحينه ابدمه

وشافته اعيوني اخيي شافته عيوني
يمـه دفنـوني  يوادم  يمـه دفنـوني
دفـنـو گـلـبـي يــم اخـوتي
ويحچي دمعي عن غربـتي

،،،،،،،،،،،،،،،،،،،،،،،،،،،،،،،،،،،،،،،

وبخـيالي الشفـتـه ..   بويـه مـاصدگـتـه
لهسبب جيتك يبويه ..   احچيلي عنه انته
شـام ياهـو امشيله ؟ ..  ويايزيــد احچـيـله؟
عنك وعن امي فاطم ..  وعليّ يگـوه بحيله
يايزيـد ايسـبني؟ ..  ويجـزي كـلمن طگـني
وراس اخوي يضربه اشوفه .. غير اموت ابحزني

راسه ايضربه اشوفه راسه ايضربه
واسمك ايسبه اسمعه اسمك ايسبه
وانـي حـرمـه  وبـحـسرتي
ويحچي دمعي عن غـربـتي


الشاعر عقيل الحسناوي..

استشهاد الامام الصادق ع

   الصادق نودعـه الليله  .. ودمع الحـزن نبچـيله
هاليله تحـضرنـه الزچـيه  .. تبـچـي الامام الجعـفريه

………………………

ياشيعـته الصادق رحل .. هاليله وافاه الأجل
وغمـضها ويلي اعيونه
ركن الشريعـة منـهدم .. بهذا العزه شدو الحزم
والكـاظم اتـواسـونه
لمجلسنه حضرت فاطمه .. عالخد اجـتكم لاطمه
بنت النبي ومحزونه

الله اليعين بهل مصيبه اعياله
شـيخ الهواشم چـافيات ادلاله
يا وحـشة الدار المـشه راعيـها
ويافـرگت الـوالد صدگ چـتاله

    لمن يمـوت الـوالي .. خلـته تضل للـتالي
وداره تضل دوم بعزيه .. تبچي الامام الجعفريه

………………………

بالسم چبدته تمردت .. والروح للباري  اصعدت
وكل شيعـته حزنانه
وكل هاشمي الليله بحزن .. عالصادق ينوح ويون
وما تـنـطفي نيرانه
وكل فاطميه اتنوح اله  ..  بهاي المصيبه امولـوله
ولبست سواد احزانه

كـسرة ظـهر ياناس فـگـد الغالي
جرحه يضل وسط الگلب للتالي
العـايلـه  اتـيـه  افـگــد  والـيـها
وهلـيلـه احـنه راح منـه الـوالي

   بـهذا المسه صادقـنـه .. يا للأسف ودعـنـه
والعين بالمدمع جريه .. تبچي الامام الجعفريه

………………………

مات وترس عينه الدمع .. او وناته چانت تنسمع
يا عمـتي المسبيه
بنيران بيته من احترگ .. بعبراته ودموعه اخـتنگ
واتـذكـر العـلويـه
من حرگو عليها الخيم .. من النار تـتراكض حرم
واطفالها المسبيه

مــا فـارگ  اخـيالـه صـور عمـاته
كل يــوم عايش بالسبي ولـوعاته
چا شنهو حال حسين ذيچ الساعه
يسحـگن جـمـر شاهـدهـن ابنياته

    وصادقنه عاش الحاله .. نـار وجـمـر بعـياله
ركضت ابيته الهاشميه .. تبچي الامام الجعفريه

………………………

لكنه نعشه من انحمل .. بالدفن حضروه الاهل
وهـالــو عليه اتـرابه
مابيه جرح  لا منذبح .. لا راسه مشيول برمح
وتنـظر عليه احبابه
لفـو الصادق بالچفـن .. واثـيابه  ما  اتـسلبن
ما سلبته السلابه

مات واهل  واحبابـه اليشيعونه
مامات وبخيل  العده يسحگونه
لكـن اويـلي  السحـگـته الخياله
بذيچ الحـوافر ماردات اعـيونه

  محزوز نحره من مات .. ووجهه الحلو بيه طبرات
وركضت اله اخته السبيه .. تبچي الامام الجعفريه

………………………

وماشافـته امه فاطمه .. غرگان ابنها بالدمه
شافت الصادق سالم
بس ذاك ابنها بكربله .. مذبوح من راحت اله
وفوگ الرمل ضل نايم
احسين لمن شـافـته .. امـه ابـد ما عرفـته
امفرهـدينه الوادم

لا وجه ضل عنده وتعرف اعيونه
ولا لـون ضل عـنده وتعرفه بلونه
دم ولحـم مـتـبـدي فـوگ الغـبره
چـا نعـمة الله بحـافـر يـدوسـونه

من داستـه الخياله  .. مردت جمـيع اوصاله
وذيچ الخيول الاعوجيه .. تبچي الامام الجعفريه


الشاعر عقيل الحسناوي..
.

ابوذيات

الصادق صار مثل حسين  طف له
بـداره الـنــار مـا فـــــزاع  طف له
بـذيـچ الـنــار تركـض شاف طـفله
ولـطم راسـه وصرخ آه يارقـيه..

وسف دار العلم والحسب والجاه
عـليـه اشـرار هـالـمنـصور  وجاه
وعلى الصادق هـذاك الـدار وجاه
وغدت نسوانه تـتراكـض سويه..
الشاعر عقيل الحسناوي..

اربعينية امير المؤمنين ع

بـاربعـينـك يا علـي بـدمـعـتي
جيتك اشكي محنتي وغربتي
بـويـه بـعـدك بالهـظـم حالـتي
     بـويـــه .. بـويـــه

……………………………

اجيتك بربعينك بويه شچايه .. يتيمه وحالي .. الدمع يبرالي
بروحي اهموم لو احچيلك اهوايه .. غميجه اجروحي .. ويجرحك نوحي
هجرك بويه زاد عليه بلوايه .. تغير لوني .. وحزن بعيوني
يتيمه هواي صعبه عليه الحچايه .. فگدتكم حسره .. علي والزهره

ما رحمني بويه هذا الهجر
والليالي وحشه عگبك تمر
بگلبي تسعر فرگتك چن جمر
بويه .. بويه

……………………………
اجيتك والهظم والنوح سابگني .. شكبر حسراتي .. وجرت دمعاتي
يمن للغربه والألام عايفني .. عفتني بغربه .. يحيدر صعبه
لون وياك آه يالوالي ماخذني .. ولا عيفني .. يبويه بحزني
الدهر عگبك مصايب كثره طالبني .. وانه ابلا والي .. صرت يالغالي

يحزم اعليه يبويه الفتن
واني گلبي بنايباته انسحن
المن امشي وشكي جرحي لمن
بويه .. بويه

……………………………
النوايب والمصايب راح تلفيني .. يصبهن دهري .. ويهدلي ظهري
مصارع كل اخوتي اتضل تراويني ..  بدمع ابچيهم  .. بهظم انعيهم
الحسن مسموم چبده تبصره عيني .. وانوح الحاله .. بدمعـتي ابراله
يبويه وهل مصيبه اشگد تأذيني .. وانوح واهمي .. لمصاب ابن امي

راح اشوفن بالطشت  چبدته
ويلي بويه لمحنته وغربته
عليه تنزل بالهظم دمعـته
بويه .. بويه

……………………………

وبعد بالطف چبيره هناك المصيبه .. المصيبه اجبيره .. واطيح ابحيره
جروحي الماتصحلهن ابد طيبه .. اشوف اخواني .. عمرهم فاني
اشوف عله الثره مخضوبه چم شيبه .. الدمه يغـطيها .. وتراب عليها
وياگلب السهام امثلثه اتصيبه .. وتصيب اليرضع .. ونحر يتگطع


لهل مصايب ياعلي والحزن
عمري اخلصه بس انوحن واون
من اشوفن چم ظلع ينطحن
بويه .. بويه

……………………………
اشوف حسين يابويه على الغبره .. يصد خيامي .. يبويه و ضامي
وشمر يركب اشوفنه على صدره .. النذل من داسه .. يجر ابراسه
ويلزم شيبته الملعون ويجره .. ويطگ بالنشمي .. ويشتم بامي
ومن مگفاه اشوفه ياعلي ينحره .. بدماه التجري .. كسرلي ظهري

بعيني اشوفن ياعلي ما جره
حسين اخويه منگطع منحره
ويجري دمه بويه فوگ عالثره
بويه .. بويه

……………………………

من ذبحو اخوتي الچان تحميني .. العده سلبوني .. شكثر ضربوني
العساكر داورتني تريد تسبيني .. وبقيت الوحدي .. ودمعتي بخدي
هذا الي يعـتني وذاگ يچويني .. وصحت چا وينه .. الكفلني بعينه
عله الكافل لطمت بحرگـتي عيني .. وصحتله خدري .. نسلب هم تدري

بلا كفيلي بويه صعبه السبي
يحدي بيه شلون يرضه اجنبي
وانه زينب ياعلي بت نبي
بويه .. بويه


الشاعر عقيل الحسناوي..

يوم فاطمة العليله ( وكأني بلسان حال الامام الحسين ع عندما سار ضعن الحسين ع من المدينه الى كربلاء واذا ببكاء وصراخ عبد الله الرضيع بسبب اشتياقه الى اخته فاطمة العلية )

من طلعنـه من المدينة وأمشي بذن الله
گـالـو اوگـف بالضعـينه يـبچـي عبد الله
سمعـته ينوح والمدمع يسيله
احـسـه يگـول ردنـي للعـليـله
يـبچي عبد الله
………………………

بالضعن احدي .. ودمعـتي بخدي
بين حسره وبين لـوعـه فارگت روحي
ودعت طفلة .. بـيها چم عله
اذكر اسوالفهه وابچي وزادت اجروحي

گـالتلي يابويه الهجر اول سهم عذابي
گـتلها منـچ اعـتذر يطول تـره غيابي

بهذا حالي وضعني يحدي بفاطمه فكري
ولنـه طفلي گـام يـبچـي ونكسر ظـهري
الرباب امه اجت گوه تشيله
احـسه يگـول ردني للعليله
يبچي عبدالله
………………………

شفته عبد الله .. مضطرب كـله
فـاتـح اگـماطه ويأشـر صوب ديـرتـنه
طفل مايحچي .. يأشر ويبچي
وكـلنه بچانه عله بچيه وحيره حيرتنه

عبد الله حَس ابفاطمه ماجت مع الضعينه
وچـنـه يگـلي بدمـعـتـه رجـعـني للـمديـنه

كسر گـلبي وظهري طفلي من فگد اخته
شلـون بـيـها لـون تـدري نـبـلـة ذابـحـته
مَحنـتهم عجيبة ومستحيله
احـسه يگـول ردني للعليله
يبچي عبدالله
………………………

بعينه أشرلي .. طفلي ويگـلي
فاطمة بـويـه اخـيتي شلـون تـنساها
عله علـتها .. والنه عـازتـها
من يصير اغـروب وكـته تزود بلواها

تنطيها انته ابهل وكت بيدك چنت دواها
وحـشـه عليها فاطمه ومحـد بقـه وياها

يگـلي ردني بـويه ليها ويـاي تـتسـله
هواي تفرح لون تسمع رجع عبد الله
يبويه الفرگه اني ادري طويله
احـسه يگـول ردنـي للـعليله
يبچي عبدالله
………………………

من بچه عليها .. گـلبه حس بيها
بغـربـه تـبـقـه هالـعلـيله وما نـرد ليها
تعيش دنيتها .. وغربه غربتها
وباچـر ابطفـنه المذابح تصعب عليها

عبدالله حـَس ابـهالسفر ما تسلم المنـاحر
مايرجعلها بس خبر ذبحي وسبي الحراير

لحالي يبچي والها يبچي شاف بحساسه
هـذا راسي بـرمح بـاچـر يمشي وي راسه
ودمنه عالرمح باچر نسيله
احسه يگـول ردني للعليله
يبچي عبدالله
………………………

عيونه لهفانه .. رادها ويانه
وي رقـيه وي سكينه يشوفها گـباله
ماگطع نوحه .. بفاطمه روحه
عالعليله اخـتلف لونـه وانگـلب حاله

انطيني ياربي الصبر هدني مصاب اطفالي
مو بـس عليله فارگت باچر عـطاشا اگـبالي

شلـون بـيه لـو رقـيه تصيح عـطشانه
وطفلي هذا تجيبه امه ويابس السانه
وللعباس اسمعه يشتكيله
احسه يگول ردني للعليله
يبچي عبدالله
………………………

باچر اطفالي .. بالطف اگبالي
الموت اشوفه نـزل بـيـهم واحـد الواحـد
هذا عبد الله .. وذاك عبد الله (عبد الله ابن الحسن ع )
بحضني موته وبيدي دمهم للعرش صاعد

وچم طفله باچر تحترگ تموت بحرگ خيمنه
وچـم طفـل باچـر ينسحگ من تـنذبح زلـمنه

الجيش يحرگ بالمخيم والحرم تطلع
وبالصحاري الضاع منهم بعد مايرجع
اليضيع ابكربله يحير العقيله
احـسه يگـول ردني للعـليله
يبچي عبدالله

الشاعر عقيل الحسناوي..
.

من منهاج محرم القصائد الرئيسية
يوم ام البنين ع

اجه ضعن السبي وطب للمدينه
وركـضـت ام البـْنـين الـحـزيـنه
بلـهـفـه ام البـْنين .. تنشد عن الحسين
ويـنـــه .. ويـنــــــــه ؟؟
……………………………

ابن حذلم دخل ينعه .. بعينه تفرفح الدمعه
يهالوادم بني هاشم .. بوادي كربله صرعه

حسين وأخوته كلهم .. فايض عالتُرب دمهم
جثث ضلو على الغبره .. دم الموت غسلهم

ولـن ام البـنـين اتـصـيح خـبـرني يـهل نـاعـي
ابني حسين شخباره الحزن ماكل تره اضلاعي

وابن حذلـم تعجب لليسمـعه
گال حسين اني ابمـوته انـعه !؟
هاي الفاگده منين .. تنشد عن الحسين
ويـنـــه .. ويـنــــــــه ؟؟
……………………………

گالوله تـره اعذرها .. ولا تكسر خواطرها
ام عباس واخوانه .. فگدهم حيل كاسرها

وعن اولادها يگـلها .. ويخبرها بمقـاتـلها
وهي تگـله يبن حذلم .. روحي لا تعـلـعلها

وعن حسين خـبرني بنـيني اتـروح اله فدوه
المهم ريحانـة الزهره حياتي بدونه ما تسوه

الدمع بعيونه ضل يحچي المصيبه
مـات ، وهـاي اجـت زيـنب غريـبه
حـتارت بينها وبين .. تنشد عن الحسين
ويـنـــه .. ويـنــــــــه ؟؟
……………………………

وراحت للأجن توهن .. السبي شماخذ لگت منهن
بـهذيچ وجـوهن حـارت .. مـا چـن گـبل تعرفـهن

تـدور بالنسه زينب .. وگـلبها بالحزن يلـهب
وگـاللها العقيله ذيچ .. الوجها العالي امترب

وصاحت زينب بهضمه حگـچ ما عرفـتيني
ام ذاك الخدر والجاه وي اخواني عفـتيني

چـنـت زيـنب يـيمـه الهـاشمـيه
رجعت وهسه صار اسمي السبيه
رجعت ودمعـة العين .. تنشد عن الحسين
ويـنـــه .. ويـنــــــــه ؟؟
……………………………

تصدها وحيل منكسره .. تـگـلها هواي متغيره
سواد بعـينـچ هوايه .. سهر لو لاحـتچ سطره

اديچ مجرحه شبـيـها .. الزمـچ خـاف أاذيـها
حبل جارحها لو نيران .. العله اطفالچ تطفيها

ردت يا يمه احضنـنـچ وقريـت ابـهـيـده بعـيـونـچ
شكثر چا يمه قاسي السوط ولهسه مورمه امتونچ


تگـلها الشفـته يمه بكربله هواي
وثـلـثينه كسرته حسين عالماي
رجعلي دموعه نهرين .. تنشد عن الحسين
وينه .. وينه ؟؟
……………………………

يـيمـه فـگـد كـافـلـنه .. بـين اعـدانـه حـيرنه
طاح وطاحت الخيمه .. بأمانه الچانت اتلمنه

وحگ شيبة ابو الاكبر .. اذا تـنـشديني ما قصر
لجل خدري نطه چفوفه .. وعينه وراسه التطشر

شال ابكـربله راسچ وما قصر ابو فاضل
مات وعالخيم عينه الغيرة كـلها بالكافل

مات وضعـنـه يــ ام عباس بعده
وشاف حسين عگبه شلون شده
وغدت عدوانه صوبين .. تنشد عن الحسين
وينه .. وينه ؟؟
……………………………
وشخبرج عن اخوي حسين .. لكن خايفه تموتين
نذبح عطشان يايمه .. جروح بجسمه فوگ الفين

الحوافر لعبة بصدره .. طبگت صدره وي ظهره
اخوي حسين من عفـته .. وذر خـلـيته عالغـبره

بسبي رحت وعفت جسمه ممرود بحوافر خيل
هذا المنه مـتـغيره واجيتچ بالف حسره و ويل

زيـن وعـايشه لسـه بغـيابه
عفت حسين مسلوبه ثيابه
روحي الشافت البين .. تنشد عن الحسين
وينه .. وينه ؟؟

الشاعر عقيل الحسناوي..
.

من منهاج محرم القصائد الرئيسية
يوم مسلم بن عقيل ع

بويه مسلم انته وينك .. هوايه مشتاگـه لحنينك
الكوفه ادخلـها سبيه .. ندارت الدنيه عليه
……………………………

ودعـتـني بالـمدينه وچنت احـسك مـا تـردلي
وغـيـبتك طالت عليه وبالخـواطر گـلبي يغلي
واسـرح بعـالم مغـيـبك ظنـوني يا بويه تـگـلي
يا حـمـيده مايـردلـچ مسلم اعله الله تـوكـلي

اسرح ابعالم ظنوني .. وميت اتشوفك عيوني
وانچـوي بنار الرزيه .. ندارت الدنيه عليه
……………………………

وهسه للـكـوفه من اجينه ارد ازورك ويـنه گـبرك
تراب گبرك ردت احظنه وچني احظن بويه صدرك
وخـدي امرغـنه بـترابك وعن جـروحي ارد اخبرك
وادري اذا سولـف مصابي ينـكـسر بالـگـبر ظـهرك

جيتك ابروحي الغريبه .. اشكي الك نار المصيبه
جروحي تنزف ألـم بيه .. ندارت الدنيه عليه
……………………………

بـكـربلـه لمـن عـطـشنـه گـطـعـو المــاي الـنـشربـه
وگطعو اچفوف السقايه وذبحو عله الشاطي جربه
وذبـحـو بسـهم الضلالـه طفل ضامي شنـهو ذنـبه
وبسـهم حـقد وضغـينه حسين مـردو بـويـه گـلبه

وذَبحـو بالطف ولدنه .. ولا ولي ضل بويه عدنه
حامت اعلينه المنيه .. ندارت الدنيه عليه
……………………………

وعمي الحسين بغربـته رادك تلحگـه وتحضره
دارات علـيه الاعادي ومـا بـقـه واحــد ينـصره
بويه لـو عينك تشوفه من يحـز السيف نحره
بالخيم ونشوفه يرفس جالت الخيل عله صدره

خربت وجـهه البواتر .. گــَطعت جسمه الحوافر
ويشتكي لرب البريه .. ندارت الدنيه عليه
……………………………

وذبحـو حسين واجونه حرگـو اعلينه المخيم
ركـضنه والنـار بعبينه وگـامت برجـلينه تـلـهم
كربله هيمه وچـبيره وين عنـهم بويه نـنـضم
التسلم من النار بويه من السياط اشلون تسلم

نركض وتركـض ورانه .. سياطهم اكلت گـفانه
وهاي الاثــار بأديه .. ندارت الدنيه عليه
……………………………

وبويـه تـاليـها سـبـونه وعالـهـزايـل ركـبـونه
وتـالي للـكـوفه اجـيـنه بـلا محـامل دخـلـونه
الناس تـتفرج علينه وچـن ولا يعرفون ابـونه
يا وكت علويه تمشي بسوگ ما ترحم عيونه

نـظـرة الشـمات تـذبـح .. وچـلـمة العـُذال تجـرح
گوم بويه الحگ اليه .. ندارت الدنيه عليه


الشاعر عقيل الحسناوي..

.

من منهاج محرم القصائد الرئيسية
يوم الانصار ..

نكتب تاريخ بالطف بيد الانصار
وجيل الجيل تاخذ منه الايـثار
لحسين السبط صارو فدائيه
بدماهم سجلو ملحمه شيعيه
…………………………

تاريخ الطفوف ايگـول مواقف للانصار تـعـيش
من وگـفو عدد سبعين بصبر وبهمه ضد الجيش
بعقـيدة ثابـته وايمان مـو ثـورة جـماعة طيش
وي حسين باعـوها بـيـضة ومـا تعـامـل بـيـش

لابو السجاد بالطف باعـو ارواح
بسبيل الزهره دمهم والعلي راح
هـيچ اتصير كـون الكـربلائيه
بدماهم سجلو ملحمه شيعيه
…………………………
لابو السجاد رخصوها هذيچ ارواحهم فدوه
وتعبو لجـل هذا الدين تعبو والـتعب يسـوه
فزعـو دون اهل البيت زلم شرايه للـنخـوه
خذوها بزود غيرتـهم وكـتبوها القصص گوه

قصصهم لسه صارت مضرب امثال
واحـدهـم وسـام الشـرف يـنـشال
بصدور ابطال امتنه الجهاديه
بدماهم سجلو ملحمه شيعيه
…………………………

مواقـفـهـم فـخـر للـدوم عـِـبر من عدها نستلـهم
گـالو قــله بس هـيـهات لجـيـش الكـفـر نستسلم
علمـنه الحسين شلـون نمـوت ابـشـرف لو نـقـدم
ملكنه حسين يوم الطف وعرفنه اشلون اله نخدم

تحـزمـنه بمـحـبة حـيدر احـزام
ولبو السجاد صرنه بدمنه خدام
وقبلها حسين خدمتنه الولائيه
بدماهم سجلو ملحمه شيعيه
…………………………

وعـنـوان الجـهاد اليـوم هـاي القـله والصـفوه
فـزعـو حـين قائـدهم علـيـهم اصـدر الفـتـوه
يربع حسين هذا حسين محتاج لربـع واخـوه
وين الثابت عله الدين بعقيدة صلبه مو رخوه

تعبنه والتعب ياو سفه لو ضاع
نريـد ازلام كون اتخضر الكاع
زلم بس كون عدهم روح ثوريه
بدماهم سجلو ملحمه شيعيه
…………………………

تعلمنه الدروس وصار حشد عدنه يشيل الراس
خـذو من الانصار افـكار ودگـو بالگـلوب الساس
وفزعو من فـته السيد افواج افواج هـبت ناس
شـالـو بالضمـير حسين ورفـعــو رايـة العـباس

والسيستاني من ابـفـتـوتـه صاح
حتى اطفال فزعت شايله اسلاح
داعش فشله ياخذ أمنه مسبيه
بدماهم سجلو ملحمه شيعيه
…………………………

گالو حره هاي الگاع وتضل مصيونه هالثايه
وعراق حسين ماينداس و ماينجس ابد مايه
مادام الحـشد حـمـاي وانطه بدمـه الحچايه
يضل مرفوع دوم الراس وشايل بالنصر رايه

بحشدنه دوم نرفع عالي الراس
يحـرسهم علي والبـطل عـباس
منصورين بالله وراشده النيه
بدماهم سجلو ملحمه شيعيه

الشاعر عقيل الحسناوي..
.

يوم القاسم ع

يولـيدي يالقاسم .. شمعة بني هاشم
طفوها يبني شمعـتك ..وصارت عزيه فرحتك
يوليدي يالقاسم ..

……………………………

ليلة امـس فرحـة وشمع چانت ييمه بالخيم
وبيده الگمر ابخيمـتك يايمه شد ابيض علم
وفرحانه زينب عمتك وسون الك حنه الحرم

لكـن لمـن طـر الصبـح .. تصابحنه عرسك بالذبح
جابوك الي دمك يصب .. وبيك اشعمل يمه الرمح

ويا سلوتي سهمك .. صوب گـلب امـك
سيوف المعاره مگطعتك .. وصارت عزيه فرحتك
يوليدي يالقاسم ..

……………………………

يا يمه وبعرسك ردت افرح مثل باقي النسه
كل أم حلم عدها يضل اليكـبـر ابنـها اتـعرسه
بس اني ابني بكربله مو عرسه احضر مجلسه

مو للفرح هذا الشمع .. بشمع المصيبة انفجع
ورد الانـثره بـزفـتك .. صبح يجاسم منگطع

يالمـنـمرد خـدك .. مات الورد بعدك
نحنه وبچينه بليلتك .. وصارت عزيه فرحتك
يوليدي يالقاسم ..

……………………………

مات الحلم مات الأمل عكازه ردتك للوكت
انـته الـتزتـني للـگبـر تـاليها شو انته المتت
بحضني المنـك وذر يا يمه ابــد مـا حسبت

ردتك ذخر تالي العمر .. تنـزلـني بيدك بالگبر
تاليها اودعك والهظم .. يرافگني يمه باليسر

ولو صرت اودعنك .. وامشي بيسر عنك
عالگاع اعوفن جثتك .. وصارت عزيه فرحتك
يوليدي يالقاسم ..

……………………………

جاسم يبعد امك صدگ تخليني وحدي بكربله
هجـرك وحگ شيبة علي يا يـمه ابـد مـا احمله
ياهـو الينـوخ نـاگـتي من انـسبـي وي العـايـله

يالچنت تبره المحملي .. وتـگـلي يمـه اتـدليلي
باچر يبعد امك سبي .. وياهو البعد عينك الي

ضليت انه الوحدي .. ويچوي الدمع خدي
وحشه يجاسم وحشتك .. وصارت عزيه فرحتك
يوليدي يالقاسم ..

……………………………

هـم تـدري عمـك يالولـد عليك انـكـسر منه الظهر
يالچنت امانة من الحسن لو شافك لشخصه ذكر
اشگـد بچـه يـم جـثـتك عله مصيبتك لا ما صبر

يايمه جابك للخيم .. يزحف واظن ظهر انجسم
يصرخ أيـا تالي الحسن .. والـتمن اعليه الحــرم

واني احضنت صدرك .. وزينب تشم نحرك
تگـابـلنه يم اجنازتك .. وصارت عزيه فرحتك
يوليدي يالقاسم ..

……………………………

يا يمـه ضل الوحـده عمـك حسين وي العــدو
لا صاحب الضل لا ابن يفزعله لا ضل ليه اخو
بـس العـليل ابخـيمـته وغـير النسه لا ما اكــو

وذيچ العساكر شافته .. ضل وحده ويلي ابغربته
عله حسين تالي تكاثرو .. وصارت ييمه امصيبته

ريحـانـة الزهره .. يبني نگـطع نحـره
وهانت عليه امصيبتك .. وصارت عزيه فرحتك
يوليدي يالقاسم ..

الشاعر عقيل الحسناوي..
.

يوم علي الاكبر ع

سباح دلالي انـگـطـع راح الـولــد
ياريت ميتـه ولا علي مـيرد بـعـد
تموت الذي تفـگـد ضناها
يا وسـفـه للضايـع ربـاها .. راح الولد
……………………………

وي گـلبي احس ظهري انكسر .. لمن سمعت بهل خبر
ابـنـي علي لـيه هـجـر .. ما يرجـع الحـضني
گـالـولي ما يـرجـع الـي .. سلــوة حـياتـي وكـل هـلي
يايـمه صحـتـه يا عـلي .. مو وكت وتـذبـني

يا تعـب شيـباتي .. ويا سهـر دمعـاتي
وينـه حـگ اربـاتي
عـمـت بـعـدك عـيني .. بـيا كـتر دليني
ضيـعـيت اسنـيـني

دلـيـني ويـن بـيـا كـتـر طـاح العـمر
خليني اودعك يالذخر موت الهجـر
عيوني تره فگدك عماها
يا وسفه للضايـع ربـاها .. راح الولد

……………………………
الماتـلـها يايـمـه ابـن .. تـفـهم ونـيني من اون
يعاشرها للموت الحـزن .. آ يـا عـلي يمـه
ميتـه تـراها ام الوالد .. لـو مـا يــرد الـها بـعد
لا ما يمـر بـيها السـَعـد .. يبني الولد نعمه

بنـوحها و ونـتها .. عايشه بغربـتها
ومالحـه دمعـتـها
الموت الها راحه .. ولا تضل بنياحه
تعيش ما مرتاحه

الماتـلها بالدنـيه ضنـا تمـوت بحزن
وتبقـه لتوالي هالعمر تطحن طحن
والموت رحمه لو لفاها
يا وسفه للضايع رباها .. راح الولد
……………………………

الضايع رباها والسهـَر .. وما فرحت بعمره الكـُبـَر
فگـده يـهد الها الظـهر .. ويولـيدي يعمـيها
تـتذكر ايـامه المضت .. وي مهـده يـامـا ساهرت
لضحكـاته ياما اتبسمت .. يسرها ويسليها

وهسه ابنها الرايح .. وبالمعاره طايح
عليه تشبع صايح
ما تجـف الدمعـه .. وعالولد بس تـنعه
وبگـلبـها الوجـعه

تموت اليرد الها الابن بس منذبح
بالنوح ما تعرف بعد ليل وصبح
راح الذي يسند گـفاها
يا وسفه للضايع رباها .. راح الولد
……………………………

و بموتـتك مات الگـلب .. هجرك علي يمه صعب
والخيمـتك كـلما اطـب .. بـيها اشم عـطرك
نيـران روحي تشتـعـل .. موتـك علي ما ينحـمل
چا هيچ يمه تنچـتل .. سيوف العده توذرك

ياعلي يگـطعـونك .. بحـافر يسحگـونك
مخربـين عيونك
الف طبره بصدرك .. والف طعنه بظهرك
فرهدولك عمرك

گـصران طولك يالحـلو من الطـبر
جابوك الي چومة لحم دمك يخر
امك تره وضعك سباها
يا وسفه للضايع ربـاها .. راح الولد
………………………………

جابك ابوك ابـيا وضع .. ما سلـم من عـندك ضلع
تگـابلـنه نجـريلك دمـع .. يمـه وتـذكـرنه
ضحكـاتك الحلوه علي .. وانـظر الـه وينـظر الي
ياليلى گـال اتحملي .. عگب الولد ضعنه

وصرنـه دم نبچـيلك .. ثـنـينه نـنـعـيلك
وماگـدرنه نشيلك
شصار يمه بحالك .. مگـطـعيها اوصالك
بـثوبه تـالي شالك

نحضنك نريد وما اكو الك باقي حضن
يا يـمه جـسمـك يا علي شـو منـسحـن
وعمتك اجت نصبت عزاها
يا وسفـه للضايــع ربــاها .. راح الولد
……………………………

يايمه عمتك شافـتك .. وتـتـنخـه صارت غيرتـك
تگوملها يمه رادتك .. بت حيدر اتحشمك
گـالت علي يبن الاخـو .. يا ذخـر الحسين وكـفو
ابوالـدك حـاط العـدو .. يالسابـح ابدمـك

شحال بينه وبينك .. غمضت شو عينك
وحـيد ضل حسينك
گـوم يا بـو الغيره .. حسين طاح بحيره
ويـن وجـهه يديـره

لا ضل ابن لا ضل اخو وحده صفه
وهذا المـخـيم يا علي شـب وطـفه
سهام الوكت بينه رماها
يا وسفه للضايع رباها .. راح الولد

الشاعر عقيل الحسناوي..

.

يوم العباس ع

ياخـويه اجـيتك للنـهر واسمـع ونينك
اچفوف اديك امگـطعه ومطفيه عينك
فايض دمه وماي .. واجروحك اهواي
واسمع ونينك ..

……………………………

ادركني يا خويه اسمعت واركـض اجـيتك للنـهر
نـايـم لـگـيـتك عـالـتـرب وظـهري يـعباس انـكسر
حاچيني شنهو اليوجعك التارك على ادموعك اثر
سـهـم الذبـحـلك جربـتك لـو سهمك الطـفـه النـظر

ونك يخويه ينسمع .. وعالخد اثر جرح الدمع
للراس هذا المنهشم .. لـو وجـع چـف المنگطع

حاجيني يا بعد العمر ياهو من الجروح
هاكـثر خـويه يوجـك ومنك عله النوح
شيفـيدك ادواي .. واجروحك اهواي
واسمع ونينك ..

……………………………

ما چـان لجـروحـي ابـــد يحسين وني ودمعـتي
جرحي الچبير الماله طب ذبحـو الماي ابـجربتي
صرخات ياعـمي العطش براسي اشد من طبرتي
ولوعة سكينه من الضمه يا خـويه مـنـها لوعـتي

ياخويه صرخات الضمه .. عليه اشـد من العـمه
ويا خويه صد الجربتي .. مو ماي متروسه دمه

الماي اجـيـبه واعـدت تدري الوعد دين
وسهم الذبحلي جربتي ذابحني يحسين
وما تـعـبك وياي .. واجروحك اهواي
واسمع ونينك ..

……………………………
صوب النـهـر لمـن رحت المــاي اجـيـبه للخـيم
چنت اسمع اطفالك تون من العطش وي الحرم
ماي اترستها جربتي وحاظنها خوفي من السهم
محاميها بچفـوفي وچنت مغـطيها خويه بالعلم

وچانت اسهـام التنشمر .. بعظامي خويه تنكسر
وچنت اشكر الله واحمده .. كل سهم بيها مايمر

من زغري چانت نيتي احميه تدري
وصابوها تالي جربتي وتبده عمري
وماضلي كل راي .. واجروحك اهواي
واسمع ونينك ..

……………………………
لـتگـلـي ارجـع للـخـيـم ياخـويه مـا ارجع ابـد
لمن رحت صوب النهر چنت اني منطيهم وعد
بالماي ارويـهـم گـلت واسگي الرضيع البـلمـهد
وياخويه هسه رجعتي ما الـهـا اي معـنى بـعـد

شلون ارجع وعندك طفل .. بيه العطش ما ينحمل
وامـه الرجعـتي تـنـتـظر .. وادموعها عله الخد تهل

بــالمـــاي اردن تـنـتـظـر تـــروي ابـنــها
عبد الله يبچي وما هده لحظه بحظنها
من هايـه بـلـواي .. واجروحك اهواي
واسمع ونينك ..

……………………………
يالغـيرتـك فـاضت بـحــر وبگـصتـك مايك طفح
خـجـلان تـرجـع للخـيـم؟ چـي بـيدك الماي انذبح!
راح ارجع وظهري نكسر يالكـافل ودمعي انفضح
وابـاب خيـمـتـنه الطفـل عبد الله الي بعينه شبح

وارجع اجيبه بيا گـلب .. ماي اطلب لأجل الشرب
وبـأيدي عبد الله بسهم .. نحـره يخـويه ينضرب

صعبه رضيعي ينذبح بحظني يعباس
ست اشهر وسهمه فصل جسمه عن الراس
فجعتني دنياي .. واجروحك اهواي
واسمع ونينك ..

……………………………
وهـنـا يخـويـه حـيـرتـي ارجع اشلون الخيمـتي
وبـالبـاب امــه تـنـتـظـر مـتلـهـفه حـيل الجـيـتي
شخبرها يا خويه حرت والله چبـيره امصيبـتي
يـام الـولـد راح الـولـد وابحـضني ذبحـو وردتي

بگـلبچ ربـاب المنجرح .. هاچ اخذي ابنچ منذبح
وراجع انه الموتي بعد .. مستعجل الگلبي الرمح

وتـبچي الرباب وعالولد تلـطم صدرها
عباس خويـه مصيبتي شوف شكبرها
شوف المحن هاي .. واجروحك اهواي
واسمع ونينك ..

الشاعر عقيل الحسناوي..
.

ابا الفضل العباس ع لم يودع زينب ع ؟؟؟!!!

مـاودعـتها من رحت وبگـلبي ضلت حسره
اتموت ياخويه خفت بوداعي بـنت الزهـره
وداع .. وي زينـب هـوايه صعب
وداع .. يهد حيلي ويموت الگلب ..
وماودعـتها من رحت
………………………

لمن رحت صوب النهر .. مكسور گلبي والظهر
لخيمتها صديت النظر .. تبچي شفتها
گوه صعدت فوگ المهر .. حسيت ضيعت العمر
برجليه ماشي للگبر .. وماودعتها

كل خطوه امشي والتفت وزينب تصد عليه
بنـظرات مـتروسه دمـع توادعـنه اني وهـيه
شلت ايـدي الهـا وسلمت وسلمت هـيه علـيه


وللشاطي يحسين اركضت ماشوف جيش اگبالي
عـالمــاي ابــــد مــا طـولت لـزيـنـب ارد كـل بـالي
وداع .. شطولـه علي صار الدرب
وداع .. يهد حيلي ويموت الگلب ..
وماودعـتها من رحت
………………………

شگـد حـاولت ليـها ارد .. بس جـيشـهم بـيـه يـرد
وكل طعنه احس عنها ابتعد .. والـموت گـرب
ومن كـثرت اجروحي ايست .. ومعناها زينب ماشفت
وتاليها اديـه اتگـطعت .. وبالي عله زينب

گـطعو اچفـوفي وبعـمـد نهشمت يخويه الهامه
ومو من هذني جسمي ابد يرفس غده من الامه
الذابحـني زيـنـب تـنـتـظر يـرد الگـمر لخـيامـه

حاير شگول وشعـتذر زينب انه مواعدها
وياهـا اگـضيه العـمر ومـاعوفـها الوحدها

وداع .. موت وهجر طبع الحرب
وداع .. يهد حيلي ويموت الگلب ..
وماودعـتها من رحت
………………………

يحسين حطني عله الصدر .. بيك ارد اشم منها عطر
اللحظه الاخيره من العمر .. اتمنى اشمها
سندني خويه ارد انتچي .. بس فدوه بطل هالبچي
بزينبنه خل بس الحچي .. اعشگ اسمها

أمسح ادموعك يالاخو خليني اشوف اعيونك
صورتـها بعـيـونك تـضل يابـو علي خـيـعـونك
بس اني بعـيـوني طفت صورتها خويه ولونك

وحـده الدمه بـيها جـمد وحده السهم طفاها
شبيدي يخويه عله الوعد الفرگني اني وياها
وداع .. دم ودمـع عـينـي تـصـب
وداع .. يهد حيلي ويموت الگلب ..
وماودعـتها من رحت
………………………
يحسن يمي لا تضل .. اني گرب مني الاجل
لزينبنه ارجع بالعجل .. خايف گـلبها
بخيمـتـها قـلقـانـه تره .. تفرك بديـها وحايره
ماتدري طايح عالثره .. ذاكَ تعـبـها

عالشاطي متگـطع وصل ذاك التعب ورباها
واعـيون التحـبـهـن گـبل دم وتـرب غـطاها
چفوف الوفه متگطعه الچانت سند يمناها

ما ادري خويه هالخبر اشلون راح توصله
كافلچ مات عله النهر تكسر ظهر مو سهله
وداع .. بخـيمـتـها مأتـم ينـصب
وداع .. يهد حيلي ويموت الگلب ..
وماودعـتها من رحت
………………………

خليني خويه عله النهر .. ورد ليها مكسور الظهر
گـللـها عباس الگـمر .. راح من ادينه
يبلغـچ سلامه ويعـتذر .. مو بيده گـلها هالأمر
ولعـطش گـلبچ منفـطر .. گـلبه وجبينه

بس خويه ادري بحالتك ميت ترد لخيامك
تسـتـرجـع ابــالك صـور لايــامـنـه وايــامـك
وشلـون تنـقـل هالخبر لام الحـزن وايـتـامك

سبعين الف موته متت بهالحاله واتصورتك
محني الظهر الهـم ترد واتطيح جدام اختك
وداع .. ميت عله ايتامك تطب
وداع .. يهد حيلي ويموت الگلب ..
وماودعـتها من رحت
………………………

چماله يخويه للضمه .. اتموت بضعة فاطمه
لمن تصد شيبك دمه .. من دم وريدي
لعينك لمن زينب تصد .. لتگـلها راح ومايرد
اخذلها چفي وتستعد .. لو شافت ايدي

تعرف وضعـها وتسـتعد ايـدي اذا شـافـتـها
معـناهـا باچـر للسبـي يحـدي الشمر ناگـتها
معناها يم جثتك تجي الليله وتصب دمعتها


بطف كربله كلشي انتهى وللشام باچر موعد
وي روسنه تـلـم الحرم بذيچ الخرابه ونگعد
وداع .. بذيچ الخرابه عله التـرب
وداع .. يهد حيلي ويموت الگلب ..
وماودعـتها من رحت

الشاعر عقيل الحسناوي..

.

يوم علي الاكبر

گـلـبي علي انصاب ابمصابك
وحـيلي انـهـدم يمـه بغـيابك
ابـد ما حاسبه احساب
اعـوفـك فـوگ الـتراب

* * * * * * * *

يمه مشلوع الگـلب .. شلون اعوفك عالترب
وامشي يايمه بسبي وي ناس غـربه
علـيك ظهري منـكسر .. راح كـل تـعب العـمر
يا علي فراگـك يروحي والله صعـبه
يالچـنـتـلي سلـوتـي .. غـربة صارت دنـيـتي
يمـه اليـفـارگ حبـيـبه ايمـوت گـلـبه
ودعتني وانتهت .. احلامي، واحزاني ابتدت
رحـت والمـدمـع دمه بجـفـاك اصـبه

ميته علي بس جسمي عايش
وحزني بجفوني دمعي فارش
جرحـك يمـه ما طـاب
اعـوفك فـوگ الـتراب

* * * * * * * *

شفـتـك بذاك الفــله .. مغـيره حـالك كربـله
انـتـه مـو ذاك علي ابـنـي العـرفـته
جروحك اينزفن دمه .. جسمك اشلون الزمه
وصل صاير يمه جسمك گوه شلـته
راس مـا بـيه الجـسد .. ويــن راسـك يالـولـد
عالرمـح راسـك يـيمـه عالي شـفـته
ما سـلـم عندك ضلع .. العـظـم طگـته تنسمـع
لـون جـسمـك يا علي يـمـه حظنـته

وحـظـنـك علي تـارسـته السـهام
واسمعه من احظنك طگ العظام
يـيمه مصابك امصاب
اعـوفك فـوگ الـتراب

* * * * * * * *

ويـن اشـمـك يالـولـد .. نحـر ما عندك بعد
نحرك بسيف العـدو يوليدي مگـطوع
شلون اقبل وجنتك .. وعيني يمـه شافتك
راسك ابراس الرمـح يوليدي مرفـوع
علـيك گـلبي مـنشلع .. وگـابـلـيتك بالدمـع
وادري ما تشفي جروحك كل الدموع
هـذا حكـم الله الـي .. هـنا اعـوفك يا علي
وامشي للشام ودلـيلي عليك مشلـوع

امشي واعـوفـك عالـترابه
وگـلبي الـك نوحـه وعذابه
ورمـشي يلولد شــاب
اعـوفك فـوگ الـتراب

* * * * * * * *

راح تعـبي والسهر .. وجرحي بوداعك كبر
يا علي ردتـك يـيمـه التـالي عمـري
چنت اظنك ياعلي .. تالي شيبي اتضل الي
وانـتـه تـدفـني يـيمـه بلـحـد گـبري
تالي من شفـتك متت .. من حياتي ايـست
بموتـتك يولدي والله اكسرته ظهري
صعبه يا تعب العمر .. امشي ظهري منكسر
والسبـي دربـه طويـل ومـات صبري

اعوفك علي يولدي صعبه
ودمـعي يالاكـبر دم اصـبه
ودليلي من الهضم ذاب
اعـوفـك فـوگ الـتراب

* * * * * * * *

گـلبي يايمه انذبح .. ودمـع الموادع طفح
راح اودعك وامشي يا يمه اسيره
يبني اعوفك عالثره .. وتمشي امك حايره
خايفه ويا يمه وجهي عليك اديره
امشي تـاليها بدرب .. بـلا ولي عليه صعب
يالـمـدلـلـني وچـنـت ويــاك امـيره
يمـه هـزلـه ناگـتي .. وحيره يـبني حـيرتي
ياعلي بسوط انضرب والله چبـيره

مـتني تـورم والدمـه يسيل
يبني بعد ما عندي كل حيل
چبير ابمـتني الصواب
اعـوفك فـوگ الـتراب


الشاعر عقيل الحسناوي..
.

ليلة العاشر..( عبد الله الرضيع )

يمه نام .. سهمك وغافي بوريدك
والظلام .. خــيـم اعليه واريــدك
هذا وكت التغـفه بيه يمه عله صدري
ويـن ادورك تـــاه يـا عـبد الله فـكري .. بالظلام
……………………………
هذا وكت ارضاعك ودر صدري يمه
ويـن ادورك كربلـه يولــيدي ظلـمه
اعـثـر ابـين الجـثث عـبد الله زحمه
ضاع عطرگ بالحرگ ما گمت اشمه

انته وين .. بيا كـتر دليني صاير
بالدخان .. ضعت وبعج الحوافر
ضعت وشلون الگه جسمك والله مدري
ويــن ادورك تـــاه يـا عـبـد الله فـكري .. بالظلام
……………………………
يمه من ابـعيد ناغيني ارد اسمعـك
بلـكـت انـدلك يـعـبد الله واتـبـعـك
حيل مشتاگه يروحي وارد ارضعك
خاف باچر امشي يوليدي واودعك

الــــوداع .. يا حبيب امك يغالي
كلشي راح .. تعبي ومساهر ليالي
ياحـرامـات الـلـبــن ضل هسه يجري
ويـن ادورك تـــاه يـا عـبد الله فـكري .. بالظلام
……………………………
ويـن نـايــم ارد اجـي يا يـمـه يمـك
ارد اطلـع من رگـبـتك بـيـدي سهـمك
يمه اريدن شيبي اصبغه بفيض دمك
وخاف هاي الخيل تمرد يمه جسمك

ارد اجــيـك .. حـتـلـو يا يـمــه باللـيل
عليك اخاف .. تنسحگ يوليدي بالخيل
بـلـيـل اجـيك وفوضت للباري امري
ويـن ادورك تـــاه يـا عـبد الله فـكري .. بالظلام
……………………………
يبني يالما عيني شبعت شوف منك
النـار ما تـطـفه بـدليلي الا احـظنك
ليـش فـارگـنـي زمـاني يـمــه عـنـك
ريـت يـمـه ابگـلـبي السـهام الرمـنك

ريت اموت .. شلي بالدنيا بـدونك
نظره اريد .. يمه من نظرة عيونك
نظرتـك تطفي يـيـمه بروحي جمـري
ويـن ادورك تـــاه يـا عـبد الله فـكري .. بالظلام
……………………………

بحظني متعود گبل يوليدي اخليك
خالي مهدك يمه واني ارد اهـز بيك
نايـم بهـيـمه يروحي خايـفـه عليك
حـار يوليدي الرمل وادري يجـويك

والـتـراب .. يـمه لا ياكـل اخدودك
ردلي عاد .. تواسي ليه بذبح عودك
فراگـكـم كـاسـرلي يمـه حـيل ظهري
ويـن ادورك تـــاه يـا عـبد الله فـكري .. بالظلام
……………………………
فـراگ ابـوك امصيبة يا يمـه چـبـيره
تهنه من بعده وصفت حيرتنه حيره
لا اهـــل ضلـيـنـه بـعـده ولا عـشـيره
وعالـنـهر مـذبـوح عـمـك ابــو الغـيره

خايفات .. والشمـر يفـتر علينه
معذبات .. حـرم يايمه شبـدينه
حـرم ضليـنه بمدامـع حـسره تـجـري
ويـن ادورك تـــاه يـا عـبد الله فـكري .. بالظلام

الشاعر عقيل الحسناوي..

.

من منهاج محرم القصائد الرئيسية
يوم مسلم بن عقيل ع

بويه مسلم  انته وينك .. هوايه مشتاگـه لحنينك
الكوفه ادخلـها سبيه .. ندارت الدنيه عليه
……………………………

ودعـتـني بالـمدينه  وچنت احـسك  مـا تـردلي
وغـيـبتك طالت عليه  وبالخـواطر  گـلبي يغلي
واسـرح بعـالم مغـيـبك  ظنـوني يا بويه تـگـلي
يا حـمـيده  مايـردلـچ  مسلم اعله الله  تـوكـلي

اسرح ابعالم ظنوني .. وميت اتشوفك عيوني
وانچـوي بنار الرزيه .. ندارت الدنيه عليه
……………………………

وهسه للـكـوفه من اجينه  ارد ازورك  ويـنه گـبرك
تراب گبرك ردت احظنه  وچني احظن بويه صدرك
وخـدي امرغـنه بـترابك  وعن جـروحي ارد اخبرك
وادري اذا سولـف مصابي   ينـكـسر بالـگـبر ظـهرك

جيتك ابروحي الغريبه  .. اشكي الك نار المصيبه
جروحي تنزف ألـم بيه .. ندارت الدنيه عليه
……………………………

بـكـربلـه لمـن عـطـشنـه   گـطـعـو المــاي الـنـشربـه
وگطعو اچفوف السقايه  وذبحو عله الشاطي جربه
وذبـحـو بسـهم الضلالـه   طفل ضامي شنـهو ذنـبه
وبسـهم  حـقد وضغـينه  حسين مـردو بـويـه گـلبه

وذَبحـو بالطف ولدنه .. ولا ولي ضل بويه عدنه
حامت اعلينه المنيه .. ندارت الدنيه عليه
……………………………

وعمي الحسين  بغربـته  رادك تلحگـه وتحضره
دارات علـيه الاعادي  ومـا بـقـه واحــد ينـصره
بويه لـو عينك  تشوفه   من يحـز السيف نحره
بالخيم ونشوفه يرفس جالت الخيل عله صدره

خربت وجـهه البواتر .. گــَطعت جسمه الحوافر
ويشتكي لرب البريه .. ندارت الدنيه عليه
……………………………

وذبحـو حسين واجونه  حرگـو اعلينه المخيم
ركـضنه والنـار بعبينه  وگـامت برجـلينه تـلـهم
كربله هيمه وچـبيره   وين عنـهم بويه نـنـضم
التسلم من النار بويه  من السياط اشلون تسلم

نركض وتركـض ورانه  .. سياطهم  اكلت گـفانه
وهاي الاثــار بأديه  .. ندارت الدنيه عليه
……………………………

وبويـه تـاليـها سـبـونه  وعالـهـزايـل  ركـبـونه
وتـالي للـكـوفه اجـيـنه  بـلا محـامل دخـلـونه
الناس تـتفرج علينه  وچـن ولا يعرفون ابـونه
يا وكت علويه  تمشي  بسوگ ما ترحم عيونه

نـظـرة الشـمات تـذبـح .. وچـلـمة العـُذال تجـرح
گوم بويه الحگ اليه  .. ندارت الدنيه عليه


الشاعر عقيل الحسناوي..

.