رمضان بين أحد عشر شهرًا
كيوسف بين أحد عشر كوكبًا
فلا تقتلوه..
ولا تُلقوه في الجُب..
ولا تبيعوه بثمن بخس..

بل أكرِموا مثواه عسى أن ينفعنا 🤍 !

#كن_ذا_أثر

١- أذنبت = سيئة
٢- أذنبت وتبت = مُحيت السيئة
٣- أذنبت وتبت وعملت صالحا = بُدلت السيئة حسنة
٤- أذنبت ويأست من رحمة الله = سيئة لذنبك + سيئة ليأسك من رحمة الله

مش انا اللى بقول ✋😁

١- قال تعالى : وَجَزَاءُ سَيِّئَةٍ سَيِّئَةٌ مِثْلُهَا
٢- قال تعالى : وَهُوَ الَّذِي يَقْبَلُ التَّوْبَةَ عَنْ عِبَادِهِ وَيَعْفُو عَنِ السَّيِّئَاتِ وَيَعْلَمُ مَا تَفْعَلُونَ
٣- قال تعالى : إِلَّا مَن تَابَ وَآمَنَ وَعَمِلَ عَمَلًا صَالِحًا فَأُولَٰئِكَ يُبَدِّلُ اللَّهُ سَيِّئَاتِهِمْ حَسَنَاتٍ
٤- قال تعالى : لَا تَقْنَطُوا مِنْ رَحْمَةِ اللَّهِ

احسبها مع نفسك بقى 😁

#طالب_طب

منزلتش موضوعات طبية من فترة ودا لسببين
اولهم انى بجهز حاجة ان شاء الله هتعجبكم جدا 😁
والسبب الثانى انى عندى امتحانات من الاحد القادم للاحد اللى بعده فدعواتكم بقى وان شاء الله بعد اسبوع الامتحانات دا هنزل تانى وان شاء الله حاجات هتعجبكم 😁🖤
دعواتكم
#طالب_طب

كل عام وأنتم إلى أقرب وعلى طاعته أدوم .. تقبل الله منا ومنكم صالح الأعمال ..
عيد فطر سعيد علينا وعلى الأمة الإسلامية وعلى أهلنا فى فلسيطين نصرهم الله وأثلج قلوبهم وقلوبنا بنصرهم على عدوهم عدو الله ..
كل عام وأنا معكم 🌚♥️

#طالب_طب

السلام عليكم ورحمة الله وبركاته
ازيكم ياشباب
لعلكم بخير إن شاء الله
غبت عنكم كتير معلشي بس كان لأسباب كتيره لكن الحمد لله عدت على خير
طبعا الناس اللى معانا هنا عارفه المحتوى واللى مش عارف يطلع للرسالة المثبته فوق وهيعرف
عشان مطولش عليكم
حابب اقلكم انى هنوع فى البوستس شوية طبعا كلها محتوى طبى لكن مش هتبقى كلها امراض زى اللى فوق نظرا لأن البوستس دى بتاخد وقت فهنتكلم عن مرض او اتنين بس فى الاسبوع وباقى الاسبوع بوستس عن ادوية وعن حاجات سريعة كدا ع الماشي زى بوست النهاردة ان شاء الله
وان شاء الله تستفادو

دى المواضيع اللى اتكلمنا عنها فوق
النزلةالمعوية - حموضة المعدة - القولون العصبى - ارتفاع ضغط الدم - ديجافو - الأنيميا - السكرى - النقرس - الجيوب الأنفية ...

وكل موضوع هتكلم عنه هضيف هاشتاج باسمه فى الرسالة المثبته فوق عشان يبقى سهل نوصله لو احتجنا نرجع لحاجة
بالتوفيق 🖤

#حمو_النيل

حمو النيل Nile rash
ايوة هو اسمه حمو زى حمو بيقا كدا بس دا حمو النيل بقى

ايوة احنا عارفين حمو النيل دا اللى هو شوية حبوب حمرا كدا على الجلد بتطلع فى الصيف
دا حتى امى وخالتى وستى والجيران واى حد معدى فى الشارع بيقولو مش تستحموا بمية سخنه عشان بتزوده ..
وكمان بيقولو متطلعش فى الحر عشان العرق بيزوده ..

تعالو مع بعض نعرف اى هو حمو النيل وسببه وعلاجه ..

حمو النيل دا ياعم هو زى مامك وخالتك بيقولو
انت يعنى عايزنى اكسر كلام الحاجة ولا اى ! 🤫
هو فعلا عباره عن نقط حمرا او حبوب حمرا صغيرة على الجلد بتظهر فى الصيف او فى درجات الحرارة المرتفعه ..

طيب سببه اى حمو النيل دا !؟ 🧐
مع ارتفاع درجات الحرارة بتزداد كمية العرق يعنى بيزيد افراز الغدد العرقيه
ودا بيؤدى الى إنسدادها فبيتحبس العرق اللى هو عبارة عن املاح بداخل الغدد العرقية فدا بيؤدى لظهور حمو النيل
بسكدا يامؤمن 🚶

طب علاجه اى حمو النيل دا !
انت عايزنى انا اللى اقلك علاجه
انا علمتك كدا
انا علمتك شوف السبب وانت تعرف العلاج
طب اى هو السبب !
انسداد الغدد العرقية
يبقى اى هو العلاج !
نفتحها 🚶
بسكدا ياعم سهله اهى
فعلا بندى حاجة تساعد على فتح مسام الغدد العرقية عشان العرق ينزل
زى كريم اسمه (Carbamide)ومعاه كمان حاجة مرطبه وملطفه للجلد زى (Calamyl lotion) أو صابونة جلسرين
اى حاجة مرطبة وملطفة للجلد
واهم حاجة فى العلاج بقى ياعم انك تسمع كلام امك وخالتك 🤫🚶
مش تستحمى بمية سخنه ومتطلعش فى الشمس عشان متعرقش كتير
واستحمى مرة او اتنين فى اليوم بماء بارد عشان تنزل العرق من على جسمك

#طالب_طب

#الصفرة

خالتى والدة ورايح أزورها واطمن عليها وعلى البيبى ...
فرحت وقعدت معاهم وامى كانت هناك ... وكان فيه قرايبنا كتير هناك وقاعدين يتكلمو .. وفجأة عم الصمت المكان .وإذا بصوت غير مطمأن كدا خرج من حد رزل : ألا يادكتور محمد
كلنا عارفين ان يادكتور دى جاى بعدها حاجة 🙂
فردتيت عليه : نعم
فقالى : هو لى يادكتور الواد لونه اصفر كدا دا حتى ست الواد حطته تحت اللمبه النيون .. هو انتم اخدتوها فى الكلية ولا لسه ..
فرديت عليه فى نفسي : هو انت لو سكت هيقولو اللى سكت اهو
دا انت رزل ياجدع
والكل عمال يبصلى وأنا قاعد مش عارف اقول اى 🙂
ففى واحد هبد هبده ورد قال : تلاقين بس بيبقى من بطن الام بيصفر الجنين
فلما ينزل بنحطه فى النور النيون عشان يبيض تانى
وقعدو يتكلمو بقى ويتناقشو ويحضرو ماجستير فى الموضوع مع بعضهم وانا ابصلهم وكل اما حد يقول كلمه اقله بالظبط كدا ...

الصفرة - Jaundice

يعنى اى الصفرة دى !؟
يعنى زى مالراجل الرزل سالك وقالك الواد لونه اصفر
بس كدا امال انت مفكر اى
الصفرة هيا عبارة عن اصفرار الجلد او بياض العين او الغشاء المخاطى
Yellowish discoloration of skin, Sclera and mucus membrane

دا ياعم معنى الصفره 😄
ودا ياعم كل الناس عارفاه
لو سالت اى حد يعنى اى الصفره هيرد عليك كدا ...

احنا بقى عايزين نتكلم عن اسبابها وازاى بتحصل ولو ليها أنواع نعرفها وتشخيصها وعلاجها ونشوف اى موضوع اللمبة النيون دا 😂🚶

يلا بينا ...

اى هو سبب الصفره دا !
الاول كدا انا هقول سبب صغير كدا فى كلمة وبعد كدا نفصل ونقول الأسباب كلها
اشطا 😁
سبب الصفرة ياعم هو زيادة نسبة البليروبن فى الدم اكتر من 3mg
Increase serum bilirubin > 3mg

ستوووووووووب كدا
اى البيلروبن دا ياعم وجاى منين 🙃

ركز معايا فى اللى جاى ولو فهمناه يبقى عظمه خالص لانه هيترتب عليه كتير 😁

الدم بيحتوى على نوع من الخلايا اسمها خلايا الدم الحمراء (RBCs) والخلايا دى بتحتوى على مادة الهيموجلوبين ..
معروف ان خلايا الدم الحمراء دى ليها عمر وبتتكسر داخل الطحال
لما بتتكسر الخلايا ويتكسر الهيموجلوبين بيكون الناتج عندى ( هيم و جلوبين )

Hemoglobin = Heam + globin

وكمان يتكسر ال Heam ل Bilirubin و Fe بسكدا

تانى تانى عشان منتهش ...

خلايا الدم الحمراء بتحتوى على الهيموجلوبين ولما بيتكسر بينتج هيم + جلوبين ... ولما بيتكسر الهيم بينتج بيليروبن و حديد

كدا عرفت البيلروبن دا جاى منين
ايوة جاى من تكسير الهيموجلوبين الموجود فى خلايا الدم الحمراء 🚶

ال bilirubin اللى ناتج من تكسير الهيموجلوبين دا يهمنا نعرف عنه كام معلومه ..
1- ان هو لايذوب فى الماء Water insoluble يعنى مش هيعرف يمشي فى الدم لواحده وبالتالى لازم حاجة تشيله فى الدم
هيطلب اوبر يعنى 😁
هنا هيكون هو ال Albumin
2- ال bilirubin دا ليه اسمين
Unconjugated bilirubin or
Indirect bilirubin

طيب ياعم كدا تمام
كدا ال Albumin شال ال bilirubin اللى ناتج عن تكسير خلايا الدم الحمراء وهيطلع بيه بعد كدا على الكبد liver

الاوبر اللى هو ال Albumin هيسيب ال Bilirubin فى الكبد ويخلع
الكبد بقى ياعم يضيف لل bilirubin دا مادة اسمها Glucuronic acid
فيتحول ال bilirubin اللى كان ضعيف مكسور الجناح والدنيا غدرت بيه لانه مكنش بيعرف يذوب فى الماء فمكنش بيعرف يمشي لواحده فى الدم وبيطلب اوبر ...
بس لما دخل الكبد
الكبد خلاه يعرف يذوب فى الماء ويمشي فى الدم لواحده Water soluble
وبقى اسمه
Conjugated bilirubin or
Direct bilrubin

يطلع ال bilrubin دا من الكبد بقى لواحده مش هيطلب اوبر
معدش ضعيف بقى
فهيطلع يمشي لواحده

موجود تحت الكبد كدا عضو اسمه المرارة gallbladder بتفرز العصارة الصفراويه

ال bilrubin هيطلع من الكبد مع العصارة الصفراويه دى ويمشي فى القناة الصفراوية اللى بتصب فى الأمعاء وبالأخص فى الإثنى عشر

كدا ال bilirubin بقى موجود فى الأمعاء
وكلنا عارف ان منطقة الأمعاء فيها بكتيريا
بفعل البكتيريا دى على ال bilirubin هيتكسر لمادة اسمها
ستيركوبيلونوجين Stercobilinogen

جزء صغير من ال Stercobilinogen دا هيمتص ويترشح فى الكلية وينزل البول
والباقى بقى هيتحول داخل الأمعاء الى مادة اسمها
ستيركوبلين Stercobilin والمادة دى بتنزل فى البراز Stool
وهيا اللى بتدى البراز لونه البنى

وهنا انتهت رحلة ال Bilirubin

ازاى بقى بيزداد ويتراكم فى الدم ويعمل Jaundice واحيانا بيزداد ومش بيعمل Jaundice واى علاقة اللمبة النيون اللى ستى قالتلهم عليها دى 😂

كل دا هنعرفه بكره بالتفصيل عشان منتهش ان شاء الله
بس ركز فى الكلام اللى فى البوست دا عشان مهم
وكل كلمه مهمه وهنبنى عليها باقى الموضوع بكره باذن الله
ودا مخطط يسهل عليك رحلة ال bilirubin 😁

هتلاقى هاشتاجات فى الرسالة المثبته بالمواضيع اللى اتكلمنا عنها وكل موضوع بضيفه للرسالة المثبته

#طالب_طب

🛑 اللمبة النيون طلعت فلصو 😂


امبارح كنا بدأنا كلامنا فى البوست اللى قبل دا عن ال صفرة ...
وعشان تفهم الكلام اللى جاى دا لازم تقرأ وتفهم البوست اللى فات
اخر نداء لطيارة الدوحة ...
عشان تفهم اللى جاى لازم تفهم بوست امبارح ...

أيها السادة المسافرون عبر الخطوط الجوية ...
مرحبا بكم على متن الطائرة 🚶

بالأمس كنا قد تكلمنا عن الصفرة وقلنا يعنى اى صفرة وقلنا مبدايا كدا انها بتحصل لو زادت نسبة البليروبن عن 3mg وعرفنا هو اى البليروبن دا وجاى منين ورايح فين ...

طيب عايزين نعرف اى تانى 🧐

عايزين نعرف اى هيا اسباب الصفرة 🤔
ماحنا قلنا زيادة البليروبن عن 3mg

ايوة عارف بس انا قلتلك امبارح ان دا سبب مبدأى كدا ..
دلوقتى بقى انا عايز اعرف اى هيا الأسباب اللى هتزود البليروبن دا بقى ودى تبقى اسباب الصفرة 😁

طيب قبل مانتكلم عن الاسباب عايز اقلك حاجة 😁

امبارح اتكلمنا عن رحلة ال bilirubin
والرحلة دى كانت عبارة عن تلت محطات
محطة التكوين ماقبل الكبد ثم محطة داخل الكبد ثم محطة مابعد الكبد ...
اللى هو خط مسار ال Bilirubin

طب اى اللى يخلى البليروبن دا يزيد لما هو ليه مسار كدا وفى حاله !؟

حدوث خلل فى اى محطة من المحطات التلاته

نركز كدا بقى ونمسك محطة محطة ..

- محطة ماقبل الكبد ...
بيتكون فيها البليروبن من تكسير خلايا الدم الحمراء ويمشي فى الدم مع الاوبر لحد الكبد
طب لو زاد تكسير خلايا الدم الحمراء عن المعدل الطبيعى بتاعها !
هتزداد نسبة البليروبين اللى بيتكون والبليروبن دا زى ماقلنا امبارح اسمه Unconjugated
لما يزداد تكوينه عن المعدل الطبيعى الكبد مش هيقدر ياخده كله
فيرجع للدم تانى ويبدأ يتراكم فى الدم
بس ركز معايا اللى اتراكم فى الدم اى !؟
Unconjugated
اشطا 😁

زيادة تكسير خلايا الدم الحمراء عن المعدل الطبيعى دا عبارة عن انيميا
Hemolytic anemia

فالنوع دا بنسميه ..
Hemolytic Jaundice

كدا اتكلمنا عن مرحلة ماقبل الكبد

فى اسباب تانيه تزود تكوين البليروبن وتراكمه فى الدم فى محطة ماقبل الكبد
لكن ال Hemolytic anemia اشهر واهم هذه الاسباب ... تمام كدا

نروح للمحطة اللى بعد كدا

- محطة داخل الكبد ..
الكبد بياخد البليروبن وبيعدله زى ماقلنا امبارح ..
طب لو حصل مرض فى الكبد
الكبد مش هيقدر ياخد البليروبن اللى جايله من الدم مع الاوبر
مش هيقدر ياخده بنفس كفاءة الكبد الطبيعى
هو هياخد بليروبن من اللى جاى اللى هو Unconjugated بس مش هيقدر ياخده كله فيبدأ الجزء اللى الكبد مش أخده يتراكم Unconjugated
والجزء اللى الكبد اخده وعدله وخلاه Conjugated الكبد مش هيقدر يفرزه لان الكبد فيه مرض
فيتراكم هو كمان Conjugated

يبقى لما يحصل مرض فى الكبد لأى سبب من الاسباب فيروس او غيره
دا هيؤدى الى تراكم البليروبن
بس ركز معايا اللى اتراكم اى !؟
Conjugated and Unconjugated

والنوع دا بنسميه ..
Hepatocellular Jaundice

نروح للمحطة التالته والأخيره

محطة مابعد الكبد ..
قلنا فيها ان الكبد بيفرز البليروبن مع العصارة الصفراوية عن طريق القناة الصفراوية اللى بتصب فى الأمعاء
طب لو حصل انسداد فى القناة الصفراوية بسبب حصوات المرارة
كدا الكبد مش هيعرف يفرز ال Conjugated bilirubin فهيبدأ يتراكم فى الدم

يبقى لما حصل انسداد فى القناة الصفراوية لاى سبب من الاسباب واشهر الاسباب هو حصوات المرارة دا هيؤدى إلى تراكم البليروبن
بس ركز معايا اللى اتراكم اى !؟
Conjugated

والنوع دا بنسميه ..
Obstructive jaundice

تهت !
طب تعالى نجمع كدا
احنا أصلا فين وبنتكلم فى اى 😂
احنا ياعم بنتكلم فى أسباب الصفرة 🙃

1- pre hepatic ماقبل الكبد
والسبب هنا Hemolytic anemia
فبيحصل jaundice بنسميها ...
Hemolytic jaundice

2- Hepatic داخل الكبد
والسبب هنا Hepatocellular disease
فبيحصل jaundice بنسميها ...
Hepatocellular Jaundice

3- post hepatic مابعد الكبد
والسبب هنا Obstruction فى القناة الصفراوية
فبيحصل jaundice بنسميها ...
Obstructive jaundice


يبقى لما اجى اسالك سؤال وأقلك اسباب او أنواع ال jaundice اى !؟
تقول الكلام اللى فوق دا 😄

بس كدا يامؤمن دى كانت أسباب وأنواع ال Jaundice باختصار 😂
اه والله باختصار

طب فيه اى لسه !؟
فيه حاجات بسيطه خالص بقى زى لون ال Urine وال Stool فى كل نوع ودول هتاخدهم لما تدرس الموضوع ان شاء الله

انا حطتلك اساسيات الموضوع عشان تبقى عارف اى هيا الصفرة وأسبابها اى وانواعها



طب يادكتور الصفرة اللى بتحصل عند حديثى الولادة دى سببها اى وتندرج تحت اى نوع من دول !؟

ولا حاجة من اللى قلناها خالص 😂

نعم !؟

ايوة زى مابقلك كدا ولا حاجة من اللى قلناها 🙃

بص ياعم ...
الصفرة اللى اتكلمنا عنها دى pathological يعنى اى !
يعنى مرضيه
سببها مرض بيحصل زى الانيميا التكسيرية أو حصوات المرارة او مرض فى الكبد وغيرها .. فبتزداد نسبة البليروبن عن 3mg


اما ياعم الصفرة اللى بتحصل عند حديثى الولادة physiological يعنى اى !
يعنى طبيعية
ازاى ياعم !!

الأطفال حديثى الولادة عمر اربع خمس ايام بيكون عندهم الكبد لسه immatur يعنى لسه بيلين 😂
وبالتالى الكبد مبيقدرش ياخد البليروبين اللى ناتج عن تكسير كرات الدم الحمراء بشكل كافى ... فبيتراكم البليروبين فى الدم وبيحصل اصفرار فى الجلد والعين
لكن الأمر دا طبيعى
وبيحصل فى نسبة كبيرة من الأطفال وخاصة الاطفال اللى بتولدو قبل ٩ شهور

ومعظم الحالات بتختفى لواحدها مع بداية الرضاعة ...

وزى ماقلت معظم الحالات بتكون طبيعية لكن احيانا بيكون الأصفرار دا مش طبيعى ومؤشر لوجود حاجة وهنا يلزم زيارة الطبيب

يعنى يادكتور امتى اخد الولا واروح للدكتور !؟

لو كان الأصفرار بيزيد يوم بعد يوم
ولو درجة حرارة الطفل زادت عن 38
ولو الطفل بيتغذى بشكل ضعيف وبيصرخ باستمرار

طب اى موضوع اللمبة النيون دا 😂🚶

فلصو 😂
هبد 🚶

هو طبعا علاج حالات الصفرا فى الرضع
دى بيحتاج ل phototherapy بس مش اللمبة النيون ياحبيبى 😂
بس منقدرش نقول كدا 🚶
ال phototherapy دا موجود فى المستشفيات
بس دا طبعا للحالات اللى بتحتاج علاج
واحنا قلنا ان معظم الحالات بتختفى لواحدها 😁

بسكدا يامؤمن 🚶

هتلاقى هاشتاج لكل موضوع اتكلمنا عنه فى الرسالة المثبته وكل موضوع بضيفه للرسالة المثبته


#طالب_طب

#شرب_الماء_اثناء_الطعام

يابنى كفاية شرب مية وسط الأكل 🙄
طب على فكرة بقى شرب المية وسط الأكل غلط 😒
اللى عطشان يشرب قبل الأكل عشان مفيش شرب مية وسط الأكل 🙃

كل هذه وغيرها جمل تقال فى كل بيت مصرى عند الجلوس لتناول الطعام
وغالبا مايكون مصدرها هو الأم 😂🚶

طب ياماما شرب المية وسط الاكل غلط لى !؟
فيكون الرد : هو غلط وخلاص 🙂

طيب هل هو فعلا غلط 🙃

لا ياعم بالعكس كمان شرب الماء أثناء الأكل ليه فوائد كتيرة 😁

منها انه بيحسن ويساعد عملية الهضم
وكمان بيحسن امتصاص المواد الغذائية الموجودة فى الطعام وبيقلل خطر حدوث امساك .. ومش بس كدا ..
دا كمان شرب الماء اثناء الطعام بيحسس الشخص بالشبع ودا مهم للناس اللى وزنها زايد وعايزة تخس
تشرب كوب او اتنين ماء اثناء الطعام فتحس بالشبع ومتاكلش كتير ...

يعنى قول لست الكل ان هو مفيد ومش غلط زى مابتقلك ...
بس بلاش افراط فى شرب الماء اثناء الاكل يعنى كفاية كوب او اتنين
عشان ميعملكش انتفاخ 🥴

هتلاقى هشتاج بكل موضوع اتكلمت عنه فى الرسالة المثبته وكل موضوع بضيفه

#طالب_طب