ما عينفعوك خبرتك. ماباتنفعك الا مرتك

كيف تشتي تكون تفعل لك علاسب تقل انها حبوبه وخفيفة دم يعني تشتيها تكون تفضي لك البيت وتسير بيتهم وانت تطيرف براحتك. ولما تكمل افعلها رنه تجي تنظف بعدك كانها المنظفه حق الصاله والا كيف تشتي تسوي لك تشتي تسير تخطب لك والا تكون تفعل لك دعايه زوجي. زوجي زوجي عشان يزدادوا المعجبين

احمد الله انها بتقبلك وتحبك وانت بتخزن في الشقين وتبزق لصحه واحيان تشربها بالغلط وعادك تجي تحاكيها وتطاير القات لا وجهها
ولا تجي تقلد انك رومنصي تحبها ولقفك شمه وشكله ساع الكرش حق الطلي مليان من بقايا القات وتمكنها تا تا تا تا 😂
إحمد الله انها قابله لك وانت مطنن فوق التلفون
احمد الله انها بتلبس لك وتتمكيج لك وتفعل المستحيل عشان تكون حاليه في نظرك وانت ما كلفت نفسك تنتف الشعر الذي في ازغانك وباقي المخاط اللي في نخرك وتدلك الانقاع ذي بأرجلك

✿لاتصدق لخبرتك الذي جالسين يحرضوك على مرتك وتروح وانت قالب صورة فوقها ساع الشرابات لانها جلست ترن لك شرق هيا روح
هولا ماعينفعوك ولا عيرقدوك ولا عيعشوك ولا عيفرشوا لك ولا عيعطفوا الفراش بعدك ولا عيخلفوا لك بدلها ولا حتى عيصبنو لك السراويل ولا عيكووا لك ولا عيكونو لك يطبخوا لك
والله ما ينفعوك حتى بسندوتش بطاط
دعممهم واكسب مرتك ولاتنسى انهم مابيحرضوك على مرتك ويشتوا يميعوك على اسرتك لانهم بيحسدوك على العيشه والرفاهيه والاهتمام اللي انت فيه


تشتي انشر بقناتك كلمني @ALFkamah

لله ما اعطى ولله مااخذ
انتقلت الى جوار الله من هذه الدنيا الفانيه الى الاخره الباقيه

خالتي اخت امي
بعد صراع مع المرض
فأسأل الله ان يرحمها رحمة الابرار
ويسكنها مساكن الاخيار
في جنات تجري من تحتها الانهار

وانا لله وانا اليه راجعون😔😔

@ALFkamah

هل اصاب حياتكم الزوجيه الركود والملل
هل هناك مشاكل تهدد حياتكم الزوجيه
نحن وجدنا لكم الحل انظموا لقناتنا
( لحياة زوجيه سعيدة🧕🏻) https://hottg.com/llll1lll2

عزيزتي #العمه جعلش السلا حين تقعي حاليه وطيبه وجعلش العمى حين يقرحين الفيوز حقش وتنكدي عيشة ابنش😐

عزيزتي #العمه مرت ابنش مشي مرسله من اسرائيل ولا من مجلس الشيوخ الامريكي علاميد تراجميها بحقش الأسلحة الفتاكه ☹️
هو انتي قلتي تشتي تفرحي بابنش
او تنكدي عيشتش وعيشته 😒
عزيزتي #العمه مشو حالي بحقش ولا يناسبش تقتلبي ضابط مباحثات وتراقبي ابنش ومرته كيف بيفعلوا وما بيسوو .. ابردي وافعلي لش قلب و ريحي نفسش من تنكدي عيشتش
عزيزتي #العمه والله انه عادي وحالي وسابر قوي تعتبري مرت ابنش بمقام بنتش هو اسهل من العداوه والحرب الفيدراليه 😒
قعي ام لابنش ولمرته انا داريه انش احيان بتغيري ع ابنش لكن صدقيني لو ابنش طايع ما عتقدر اكبر قوه ع الارض تغيره عليش..

عزيزتي #العمه ام البنت خليش طيبه وام ثانيه وحنونه وكوني دعممي عاميد راحتش وعافيتش صدقيني سهل الدنيا حق الله الدنيا يشتي لها دعممه عاميد تحافظي ع صحتش جبرش 😊
هم يقولوا ( عمه ولا جربه على الغيل )
لكن مش توقعي ساع الطوفان تهيجي وتسحبي الوادي بكله وجعلش الماغص والناغص حين تنغصي عيشة بنتش مع زوجها
عزيزتي #العمه خلاص من زوج زلج. ما قرح الحنج لبنتش عندش الا بعد ما تزوجيها وقبل الزواجه كودكن في البيت في صياح ولياح لذلممابش داعي تكوني تكملي المزايا اتصالات وتقتلبي محقق معاها ما معاكم وما اكلتوا. وما فعلتوا وما سبتروا. وما ادى لش زوجش ماقال زوجش لامه. وماقالين له امه واخواته وابهي لا يضحك عليش
مابش داعي تتجسسي. على حياة زوج بنتش واهله وامه وخواته يسترهم الله وخلي لبنتش حالها. خليها توضع بقعتها وعلميها تكسب زوجها واهل زوجها وتوضع بقعتها. وعيحبوها اهل زوجها ويخلوها اميرة البيت. ومرت البيت. ( وقولت مرت فلان. ولا بنت فلان )

@ALFkamah

عزيزتي #مرت_الأب
لا طرح لش خير ولا وضع لش بركة بعمري ما لقيت مرت أب طيبه إلا يمكن في العشر واحده 😒

اسكه قلي لي ما بيقل لش عقلش حين تعلمي زوجش على بناته ايش بتستفيدي حين تعلمي زوجش على عياله ونسوانهم😒😒
ما بتفتجعيش ان للظالم نهايه شوعه قوي 😒
ما بيدقش قلبش هذا اذا معش قلب ويقل لش حرام وما يسبرش وراعي ضميرش اليوم حياه غدوه مووت 😒😒
ع الاقل ارحميهم اذا هم #ايتام جعلش النار والجمر الكبار😐
الدنيا ماهي بالحذاقه ولا بالوساخه. ولا بمطابنة عيال زوجش ما عتتخلديش اتقي الله في روحش الله لا روحش ولا فوضش 😐

وبه خالات مرت اب والله انها احن من الام نفسها على عيال زوجها وتعتبر عيال زوجها اعظم من عيالها وتنتبه لهم وتحن عليهم وتحسسهم انها امهم وهذه مأجوره. لها اجر كفالة اليتيم في الدنيا وهذه ما بايعتبروها عيال زوجها الا امهم وما يداعوها الا يا ماه لانهم كبروا في ضل حنانها ماحسستهم باليتم وفقد الأم ابداً
ويا رعى الله من تجمل. وكل واحد عيلقى عمله تجاهه هذا علمي ولا جاكم شر

@ALFkamah

عزيزتي #اخت_الزوج سوا كنتي عازبه او مزوجه او مطلقه او حانقه او حتى مصلعه 😐

عزيزتي ذيه اخوش ما تتدخليش فيه بعد ما يتزوج لانه ما عتقعش حاليه بحقش ابدا شووعه قوي والله 😒
وشغل المراسلات والمعقبات وابراج المراقبه بعد زوجات اخوتش مش حالي هذا حق الناس التافهين 😒
ومشو حالي بحقش حين تجي بيت ابوش زيارة وتجي تبعسسي وتفعلي لش حركات ابو نص كُم وتطرحي حبة البركه وتضوي بيتش😒
وبعدا الكل عيكرهوش ويكرهوا جيتش يا خضعا😕
عزيزتي #اخت_الزوج كوني خليش محظر خير دائماً وابداً وفي كل الاحوال 🙂 قعي خفيفه طيبه 👌وعادي والله تعتبري نسوان اخوتش خواتش وتقعين خوات والدنيا حق الله 😏

و يا عزيزتي خليش بحالش احلا لش واسلم لش وابرد لش وخلي السكوت يزينش لانه كلامش عيقع ثقيل حتى لو كان صح ولذالك كوني شغلي وضع #الصامت 😐 وعيشي حياتش بدون اي تدخلات. ودمتي ساكته صامته مهجعه الناس دوتش وهدرتش 😂امزح . ودمتي بسعاده في حياتش 😊💙💙

وانتي يا مرت الٲخ ياالجني الافلخ قري واهجعي وبطلي تقنباع خلاش ربي وحفظش حين تقعي ادميه وشلش وبزش وطيرش حين تقعي خفيفه عقل 😒
اتعوذبي من الشيطان واعقلي وعادي لازوجش حالي لامه واخواته. عيقع لش ولد وعتجربي كل شي وعادي وهو خير لش حين تكوني تراجعي زوجش وتعلميه كيف يبر اهله ويكون محبوب الجميع وهم عيحبوش🥰
وهو خير لش حين تكوني تهجعي الناس هدرتش.وخبالتش وجبرش عادي لو تصبري ع اهل زوجش كوني احتسبي الاجر..
ودعممي وجزعي عيشتش وانتي راضيه قنوعه
المهم اوبهي تتدخلي بامور غيرش وتحشري انفش بكل صغيره وكبيره اوووبهي لانها ما عتقع منش مش حاليه ابدا ابدا 🙃
وقعي رزينه وعاقله وهداش حين تزيدي الجنان

@ALFkamah

عزيزتي #الزوجه سلام من الله عليش حين تكوني بعقلش وغضب الله عليش حين يخف عقلش🌚

عزيزتي #الزوجة حين تبسري زوجش ضابح لا تتعيفطيش لوتجربي مهارتش كوني تقرصي العافيه وحين تبسريه سالي مشو ضروري تتذكري احزانش وجدتش في الشتاء 😒
عزيزتي #الزوجة مشو ضروري تجلسي تنقلي لزوجش اخبار العالم والحاره والجاره وفلانه وعلانه.. مشو حالي كثرة الهدار 😒.

ومش كل شويه تقولي امك قالت اختك فعلت جدتك سبرت...قعي حاليه رزينه ما يخرج من فمها ٳلا كل طيب. ☺️
ومثل ما انتي بتغيري ع زوجش امه بتغير عليه كل الامهات هكذا لا تجيش تقولي لي مع وللمه وليشه.. انتي عتوقعي أم وتجربي لذالك كوني داري عمتش. ومشي عيشتش ووضعي بقعتش
ومش ضروري تقلدي صاحبتش وزعطانه وفلتانه
واذا مابش معه قدري ضرفه طرحوش وسط قدر وضغطو 😏 والمره الذكيه الذي تدرا كيف تمشي امور حياتها صح 😉👌
مش تجغبصها جغبصه. وتعجنها عجين🥴 قعي نمنمه وعادي لا منعش من حاجات لا تقلبي الدنيا حرب وتخليها محلقه حاكيه تفاهموا تحاوروا يقنعش واقنعيه.. عادي الحياه سهله😕

وفي الاخير اقول لش قد اسمنا الرقيقات المؤنسات الغاليات لذلك انتي الوحيده الذي تقدري تسبري حياتش او تخربيها .. وعتخليه يحبش وعتكون حياتش مثل حياه الملوك
كوني سعيده ومن الهم والغم والمشاكل بعيده😊

@ALFkamah

عزيزي #الزوج سلام من الله عليك حين تكون سالي
وغضب الله عليك حين تكون ضابح والطبيعه مجغوره 😐..

عزيزي #الزوج حين تكون مرتك مسكينه وطيبه ع نيتها هذا مايعنيش انك احذق منها. وحين تبسرها حركيه ومابش مثلها
هذا الشي مايعني انك تتأمر عليها بالكبيره والصغيره
#عزيزي كون فكر وركز ركزوك. على راسك
المره يحتاج لها قلب سالي ..يدراريها ويسعدها ويلبي لها طلباتها بالمعقول. ما عنقلش افعل المستحيل قلنا المعقول بس.
وكون ارفق بها هي ترحم الله ..ولكن اذا اذيتها الله يرحمك 😏

عزيزي حين يكن به مشاكل بينها وبين اهلك
سهل ما عتطبقش الدنيا كل الناس هكذا اوقف معاها قبالهم عشانها غريبه ببيتك وفلتت اهلها وابوها واختارتك سند لها ولما تكونو وحدكم ربيها كيف ما اشتيت انت. وعلمها بأخطأها وصدقني لا تندم على غلطها و ما تكون تخالف لك قول
وكن ساعدها بالبيت ولو مجامله مااحد عيقول عليك شي هو غر جبر خاطر بس مشو عيب ولا حرام. وحين تطلب منك شي وانت مقتدر لا تكسرش بخاطرها إدي لها
هن يرحمين مثل ما قال الرسول "رفقاً بالقوارير"..الكلمه الحاليه عتخليهن يطيرين للسماء. والكلمه الشوعه تنزلهن سابع ارض.👌

خلو حياتكم بسيطه وسعيده بالتفاهم والحب والموده وعمر الصوت العالي والهنجمه ما عتخليها تحبك وتحترمك. وما عتحبك وتحترمك الا من حبك واحترامك لها..
خلوكم ناس واعيين وارجمو الهموم والمشاكل وكل شي يزعجكم وعيشو واستمتعوا بحياتكم الحياه وارتاحوا بحياتكم وريحوهن
العمر بيمشي وانتم جالسين تنكدو ع انفسكم. جبركم هيا هه 😊
@ALFkamah

اسعد مساء الحااااالي لحيث ماااا حل😉💚

وفقرتنا. اليووووووم نقاشيهه🥳🤩

✿لو جاء لعندك طفل صغير ومعه ورقه وقلم
وقال لك اكتب لي رساله أو نصيحه
تنفعني لما اكبر وابلغ سنك وارجع اذكرك
ايش الرساله والنصيحه اللي باتكتب له ⁉️


للمشاركه لا هانا @ALFkamah

والنشر هانا بهذه القناه @FkamhSnaane2

قويتو ومساكم الله بالخيرر ..

ممستغرب من بعض الامهات من كثر حبها لجهالها تقلكم اي حاجة تحصل هي عين 👁
مره تقول ابني صرعوه عين ماعاد بيقدر يذاكر✍
ويضيق لوما نحاكية من دراستة...
وراقد مابيرضاش يقوم يذاكر
يييييه جبرش ابنش هذا مشو مصروع هو بس طسيس ومشو حق قراية ومذاكره انتي بهرري فوقة سوى وصملي علية وابسر كيف عيطلع من الاوائل 👌😅
نجي للي تقول بنتي فيها عين ولاعاد بترضى تاكل واجلس اغصبها كرهن تكمل اكلها..
وانتي جبرش والكل ...هذه مش عين😒
لان بنتش بتسنن وطبيعي ماترضاش تاكل
راعي يطلعين الاسنان سوا واعرفي منها شغل نظيف😆
وعاد باقي حزاوي خيرات من هولا كم وكم
#العين_حق_وكلنا_مؤمنيين_بوجودها✌️
لكن مش كل حاجة تحصل معانا تكون عين 👁
غر اعقلين قوى😁
وسلامتكم من شر العين ومن كل شر... 😊
#واذكرو الله #وصلو على رسوله
ومايضركم شي😒😒
#وذيه علمي ولاجاكم شررر
@ALFkamah

✪ هذا اخبل ماكملش دراسته ...
ولا يعلمون ان مابش معه زلط يكمل دراسته واشتغل وعاده صغير عشان يوفر العيشه الكريمه لااهله

✪ هذا طسيطس وغبي في دراسته ...
ولا يعلمون انه وحيد ومابش معه من يذاكر له
✪ شلوها من ام كيف بتخلي ابنها وسخ ومابتهتم بنظافة ابنها ولا يعلمون ان الولد يتيم الابوين

✪ هذا كوده ضابح مكشر شلوها طبيعه
ولا يعلمون انه ضابح بيهم جهاله واكلهم
وبيهم العيشه ومعه مشاكل عائليه وخارجيه

✪ هذه مابتميزش خوات زوجها...
ولا يعلمون ان خوات زواجها كريهات
ويعاملنها معامله شوعه
✪ هذه كودها بتيه الزنه في كل تفرطه ...
مامعاها الا هذه الزنه الحاليه الذي بتخرج بها
ولا يعلمون ان المره هذه مسكينه وحالتهم ترحم

✪ هذا نخاط كل ماتلقي عليه السلام مايردش
ومش عارفين انهو ادرن مابيسمعش
✪ هذا مابيصليش جمعه قطاع صلاه ...
وهو اصلا بيصليها في بيته لان اصبحت الجوامع مكان للفتنه ومكان للعن والسب والتكفير
والطائفيه ففضل الصلاه في بيته تجنب للفتنه

✪ فلان الفلاني فلت بيته وجهاله مدري اين سار
وهو مسكين صدمته سياره ومات ووللان مفقود
✪ بنت فلان مابترجع البيت الا انصاص الليالي
وهي طبيبه تقوم بواجبها بالمستشفى دوام ليل

✪ فلانه اتزوج عليها زوجها
وماعيتزوج زوجها الا وهي مقصره في حقه...
وزوجها تزوج عليها لان عيونه زايغات
ويشتي يثني ويثلث وليس مسئلة تقصير
✪ ابسرو على قلة حيا وقفت لها سياره وطلعت معاهاوولا يعلمون ان هذه السياره اللي وقفت لها سيارة ابوها او زوجها او اخوها

كم وكم من اشياء نحكم على الناس
وتصرفاتهم دون معرفة ظروفهم....
فخلو خلق الله ع الله ياقوم...
هذا قولي ولا جاكم شر
@ALFkamah

محبي الشتاء الحبايب.....
إياكم أن تهنوا أو تضعفوا بسبب قدوم الصيف
سهل ولو يجي الحماء. الحماء بس اربعه اشهر وعيرحله انا اداري ان الليل قصير وما بتتهنوا نومكم
وداري ان القات بغره ومابش قات حالي
ومابتتهنوا بالسمره بسبب الحشرات والنامس

محبي الشتاء احنا احلا ناس واحنا معوضين
لو لم يكن الشتاء جميلا ما جعلوه موسم الحب والحياة.
اما الصيف فهو موسم الموت واللوبيه والأمراض
والزكمه والدكمه والانفلونزا والبكتيريا...

الشتاء حياة يكفي إنك تشتري خضرة وفواكة
وقات ابو ريشه صفراء حالي وطعيم 😅
وبالشتاء ادخل تحت البطانية واختمد وادفى
وبالصيف ماتقدر تطرح فوقك بطانيه عتطفح
وواذا بعدت البطانيات نامس وحشرات 😍

محبي الشتاء يامنعاة لا تضبحوش...😁
يا منعاااااه لا تفرحوا فينا الأعداء..
اصبروا ورابطوا 😫
@ALFkamah

يا جناه شلونا
هكذا قالت لوما نطلت عليها الخبزه الثالثه
وصيحت اماه قلتلكم خلو التنور القديمه
تيه اتعبتني الخبز بيتناطل مناطله

قالت امها جني لش يا شليته
كم شااجلس علمش املحي العجين سوا
وادهني الملوجه بحلبه
واخيرا سبرين ذوليه الخبز وقدها طافحه
وقد ملجت ملوجه شعير وشويه ذمول

قالت امها اقطبي ايجوا ابوش واخوتش يشتوا يتغدوا علطتي الشركه وطعمتي المرق وابسرتي اللحمه لا قدي ناضجه اوبهي الرز لا يشقذ. الدبيخ لا ينز. ضربتي الحلبه قصقصتي السلطه بين اقولش اقطبي لش جني شلش ما تقعي ساع فلانه حميش😒

البنت. مسكينه مازد درت اين تشلط نفسها
امها : يعااااوه ماقد شفتيش اين اللحوح او ما لحيتيش والزحاوق فحه زيدي لها طماطيس
اخيرا جهزت السفره وقربوا الرجال اكلوا لوما شبعوا

امها : قومي اسكبي الشاهي واغسلي قات ابوش ونشفيهن سوا وقومي رفعي وغسولي ونظفي ورفعي.المجلس عيجوا المخزنين
البنت ناهي حاضر حاضر حاضر مامعاكم الا انا
مامعاكم بالبيت هذا الا انا كل شي انا كل شي انا
والله لو يجي خادم لا اقبل به ولا هذه العيشه

مسكينه البنت تفعل هولا كلهن من فم ساكت
وهذا كله. علشان يقلوا هي حميش النساء 😫

تشتي اكتب وانشر بقناتك كلمني @ALFkamah

»حقنا اليمنـــيات ⁽̚͢🧡₎

ناقصات رقه وحنان من البيئة نفسها
وزاد هذا الايام يسمعين زوامل

و تقولها: كيف انتي كيف اخبارش
تقول مالي شي قوة القوه🥲🥲
@ALFkamah

اسعد مساء الحااااالي لحيث ماااا حل😉💚

وفقرتنا. اليووووووم نقاشيهه🥳🤩

✿ ‌‏كم المبلغ الذي تحتاجه كي تسدد جميع ديونك
الرد بصدق🌚👌😁⁉️

✿ باأيش يتميز الشارع اللي انت ساكن فيه⁉️


للمشاركه لا هانا @ALFkamah

والنشر هانا بهذه القناه @FkamhSnaane2

حبنا الحالم لحنا........... عزفتة شفاتنا
قد طعمناه غراما..... واشتياقا وحنانا
في مكانا شاعريا..... لم يكن فيه سوانا
ياحبيبي كل مافي...... الكون يشدوا حولنا
لاتسلني ياحبيبي عن غرامي والمنى
انت مني يا حبيبي..... واسقني كأس الهناء
ياحبيبي قم نروّي....... الحب من خمر الشفاة
في عناق ابدا...... يسكن الحب هواه
واشتياقا لست أدري.... ياحبيبي منتهاه

♛من يفسر لنا النظرات ولغة الجسد😍😜⁉️

@ALFkamah

ألا يا ساكني صنعاء رعاكم الله ..
ألا واحنا على الفرقة عيعننا الله

ألا يا اخو القمر شلوة قبال عيني ..
ألا لا زد وقف دمعي ولا انيني

الاقمري قلي بكم هو ..
ألا لا عد تبايعنيش قد الكلام هو
@ALFkamah

الحانقات حق زمان .والحانقات حق هذه الايام
كانت حق زمان تحنق بشنطتها ومدكاها ومداعتها و القفل حق الشنطه لوحده #حانقه_حانقه لا تراجع وتدعمم وهذيك الدعممه حتى حين تسير يرجعها تتشرط وترجع البيت وهي زعلانه وعاده يجلس يتراشلها 3 أيام تحاكيه وتضحك له🤪
وتدي لها #مطيط على #سحاوق ياسعم هديه اهم شي نعمه

مش مثل #حانقات هذه الايام تحنق العصر والعشي قدها بتراسله واتس؟!
#وسخيت_تفلتني وهان عليك العيش والملح يا خاين
يعلم الله ماقد معك يا مسوقي قد قنعت مني لكن أنا أستاهل حين رضيت بك وصدقتك وتزوجتك
رغم أن العرسان كانوا طوابير و فضلتك أنت عليهم ونسيت اول ماخطبتها طلعت امها تحجر ملان الجباء وهيه بتقل داخل نفسها(#جنة_ملان_الدرجان_قذا_عتتزوج)

المهم تدي لزوجها الجنان وما قد لها حانقه إلا ساعتين وإذا حظرها زوجها تندعه 5555رساله SMS

واذا وصلت وما بش في بيت اهلها شبكه تضبح وتشتي ترجع وتمكن زوجها رسائل SMS يالله جي لي او قدك مكفي. لكن ماعاد شارجع لك لو تدي مااديت
شكلك ماعاد تشتيني انا داريه انك مرتاح بدوني كرهتكزوتبكر الصبح تندع له رساله يالله جي لي وانا اسفه و و و

و ترجع مش حبا في الزوج
هو عشان الشبكه😁نصابات😁

@ALFkamah

نتحاكا اليوم عن بعض الرجال
حق هذه الايام اللي يحنقين نسوانهم لا قالت له. عتحنق وافلت لك البيت خاطرك تحاكيه وهو فوق الوتس بيراسل. مش داري مابتقل له
يييييي عتحنق. وافلت لك البيت والجهال
يقلها هاااه يلا تمام. وزيدي اشبحي الباب بعدش
وعاده يلحقها للباب يي اطرحي الشاحن حقي😂
وبعضهم فرررحته. لا حنقت مرته. عشان يفضى له الجو يكون يراسل فلانه وعلانه ويلاحقهن من الفيس. للوتس للتليجرام ويمكنهن شكى وبكى وانه مظلوم وهي فلتته وراحت لها وانه عيتزوج عليها. وهو مالقيش حق الكرى يسير يراجعها🤪

وبعضهم مودفين يجي العم مسكين لكن معه عمته ساع الشيخ طفاح مسيطره ولا تحاكا العم تسكته
تقله انا الي ربيت وتعبت وانا الي شادافع على بنتي انت ماعليك وهو يحك راسه ويدني براسه منزل ويبتسم بفجيعه😥
وتمكنه عمته بنتنا كانت مرتاحه ومديين لها كل حالي وغالي وكنا نكسيها المليح وهي كانت تجلس بالبنطلون 5 اعياد ويتداولين على البالطوا هي وخواتها 4 مرات في اليوم
وتشتبح لك تيك العمه وتقول ماعترجع بنتي الا بشروطي وتقول اشتي يكون يكسيها كل سنه من كل شي ياسعم انهي الكعبه لوما يكسيها او انه ناسب خالد بن الوليد وماعاد باقي الا يعرس لها من جديد ويخلي امه وخواته يطوفين عليها ساع الكعبه ويحبين راسها ساع الحجر الاسود ويزيد يديها عندنا كل خميس وجمعه ياسعم انهي فنان عتكون تجي تغني لهم خميس وجمعه و هو يزيد يجي يأيقع معاها وزوجها ابو البنت يقول ايوه. اسمع عمتك ياولد لانه لوما يأيدها زوجها لا تخرجه من البيت معاهم😢
والله يعينه اللي معه عمه متسلطه ومسيطره😵‍💫

وختاما الرجال الاصيله لا قالت المره اشتي احنق وتقله يالله شلني بيت ابي والا شااتصل لخوتي يجوا لي يقوم يراجعها يا مره صلي عالنبي واهدأي وانا ارضيش لو لش من دمي انتي و لاتخرجي من البيت. عتخرج انا ماللبيت والجهال الا انتي ويشل نفسه ويخرج ويفلت لها البيت لوما تهدأ وتشتاق له وتتصل له يرجع البيت

و لا حنقت مرة الرجال تحنق وهي داريه على من عتحنق داريه انه به رجال يشتيها وعيلحق بعدها يرجعها هي داريه انها عمود البيت وما لبيتها وزوجها وعيالها الا هيه
وكان الرجال يشلها بيت ابوها معززه مكرمه وكانها جاءت ضيفه مش حانقه ويخليها ثلاث ليالي وبعدا يجي يرجعها ويوسط الشيخ والعاقل وخطيب الجامع عشان يردوها له ويقل لعمه انا محكم ياعم وقايم. وانت السكين وانا اللحمه وفي تيه الحاله اذا العم غاضب منه يطفى🥹

واذا وصلت وكذبت عليه عند اهلها عشان تبرر حنقتها يسأله ابوها هو صدق فعلت كذا وكذا طبعا على شكواها يجاوب الزوج. ايوه فعلت. علشان يخليها صادقه بنظر ابوها ولو مافعل شي. رغم ان الرجال هو المصدق في هذه الحالات بس يتحمل الباطل عشان انه يشتي يرجع مرته لابيته وعشان يبني جسر الثقه وترجع الموده فيما بينهم

هذا علمي ولا جاكم شر🌹🌹

@ALFkamah

ماترحمني الا تيك اللي تتزوج بوحيد القرن
قصدي وحيد امه اللي مامعها الا هو وخوات
طبعا مش الكل بس بين اتكلم عن الخوات الحشريات اللي يشتين يقعين هن المسيطرات والمتحكمات لان امه تهليه من جهله وطول طفولته متربي بين خواته وخواته كانين يلعبين به حريوه ويمكيجنه ويزفنه 🤪🤪
ولما يكبر شويه تفتجع عليه ماتخليه امه يحتك بالناس ويسير ويجي مع الرجال بتفتجع عليه
لما يكبر وهو فاقد لشخصيته شخصيته ضعيفه بين الناس ولما قده حق زواجه يقومين امه وخواته يختارين له المره ويشتين يتحكمين به وبها ويتحكمين بحياة اخوهن ومرته وما يشتين اخوهن يدي لمرته اي شي الا بعلمهن وأذنهن ولا يخرجها ولا يشلها بيت اهلها الا بأذنهن وموافقتهن

وما تتجعجع الا مرة الابن عايشه تحت رحمة امه وخواته ساع الطبل يضربوها من الشقين تتحمل عشان ماتخرب بيتها وعشان زوجها اللي خلى حياته بيد امه وخواته يتحكمين بها كيف مايشتين ويقلبين زوجها عليها وينكدين عيشتها ويكيدنها عنده ويخلنه يتصورها عدوه وانها جت تشله على امه وخواته اللي هن اولى به من الغريبه تيه ويسكبين دموع التماسيح ويمكننه انا امك. واحنا خواتك وتيك المسكينه تكتئب وتتعقد من الحياه الزوجيه بكلها

وما يرحمني الا ذيك المودف
اللي يتزوج. البنت الاوله والا الاخيره
يجلسوا يمكنوه بنتنا ما تفعل. بنتنا ماتسبر
مدري هو ضوى مره. ماضوى شيخ ولا قلها قومي سبري قومي اخبزي. تقل عتتصل لابي😂
ويمكنوها اتصالات الصبح وبعد الغدا والعشي ساع العلاج. بعد كل وجبه اتصال و أقل اتصال ساعتين وما تفعل معاهم المزايا الا يوم ولا يومين وتقرح😂

وعاد ذيك اللي معه عمه مسترجله
اللي يقلوا له عمتك في مقام 10 رجال
وبعدا تدردح به ساع 10 رجال يعجبها تكون والمسيطره والمتحكمه في حياة بنتها وزوجها وتطبن على بنتها وزوج بنتها وسمها لاهم سديين

بعض العمات دبور خاصه العمات المرملات اللي عادها تشتي تتزوج اول ماتزوج بنتها. يقرح فيها عرق الحسد تشتي رجال ساع بنتها وتضبح لا بسرت بنتها وزوجها. بيضحكوا وسديين
يجي لها الشوق للزواجه ومابش ماتفعل تقوم تنكد عيشة بنتها وتعقد زوج بنتها وتكرهه عيشته

لذلك لا انت تشتي تعيش مستقر. زووج عمتك😂
وبا تدعي لك وتتجمل منك وتتخارج من نكدها

تشتي اكتب وانشر بقناتك كلمني @ALFkamah