صادق: لو بس الله ياخذ عمره جان رهمت احسن ما ضال
مفشلنة كدام العالم بخبالة وحركاتة المزعطا تضحك علي ولله
اتفشل كدام الناس. اكول اخوي اغط بهدومي باقي مبهذل
مخربط ولازك بهذا كبوسة المزرف

صالح: شني السالفة نخنكة ونموتة قابل

صفن عليه صادق وافكار اشكال اتدور براسة بس حتى الورث
يتقسم على ثنين

صادق: شلون بله تكدر تخلي كدام الناس والقاضي مخبل
وفاقد الأهلية

صالح: بكم فلس كلشي يصير

صادق: ولله هذا اخوك طالع لسانه وصاير يوكف ويطالب
وخايف بيوم ما نحس نفسنه غير واكفين كدام قاضي من وراه


صالح : هسه عود خل يجي ذاك الوكت ونشوف شلون
نتصرف وندبرها

صادق: لازم .. لازم نفكر بي هذاك اليوم قبل لا يجي ما انتضر
يجي ياله عود افكر شلون اتصرف

سكتوا دقايق كل واحد بيهم يفكر شلون يكدر يحافظ على
حصته ويحصل زايد فواكها ورجع صالح حجى بتسائل

_زين انت تكول اذا الله ياخذ عمره نرتاح نسيت عنده مرة
وبنات وهم الهن حق ..






صادق : ياكلن تبن احسن سميه تولي لأهلها وبناتها يبقن
عدنه يكبرن نزوجهن لولدنة بلاش وهاي هيه ..

دار صالح وجه يباوع للطريق ساكت وصلوا الشورجه وكل
واحد بيهم راح لمحله كعد بي مر وقت اجه حجي واحد من
الزبائن وصاحب محل يتعامل وياهم باستمرار
وبعد السلام واختار أصناف الأقمشة الي يريدها كعد ويه صالح
يشربون جاي حجى بعد ما اخذ رشفة من استكان الجاي ..

_ لعد صابر وين خل يوصلي الاقشمة للمحل

صالح : لا حجي صابر اليوم ما جاي مريض

الحجي : لالا سلامتة ما يشوف شر شخيرة

صالح: ماكو بس رجله مضروبة ومتأذي منها كتله ابقى ارتاح
اليوم لا تطلع للشغل

الحجي: اي ولله يا بوية هذا أخيكم من أهل الله ابوك الله
يرحمة جانت كلها عنده بكوم وصابر بكوم وحد يعرفة فقير
وهسه انتو بمكان المرحوم ديربالكم على أخيكم بوية ترا الاخ
ما يتعوض

طبك حاجبه صالح باستغراب من الكلام رغم كلام الرجال صح
و يوصي ع اخوه بس صالح لان نيته سوء يعامله بسوء اخذ
الكلام ع نفسه ووجاوبه

_شنو حجي سامع شي اشوفك توصيني باخويه ترى اخوي
هذا اكيد اديربالي عليه ما يحتاج احد يوصيني بيه

رد الحجي عليه

_لا ابني قابل شنو اسمع بس اشوف صابر بهل عربانة باقي
يحمل لهذا وذاك وهو ابن حجي مرهون من التجار الكبار ما
راهمة وتريد الصدك الناس تحجي اذا ما تحجي كدامكم تحجي
وراكم

صالح : شحاجين الناس

الحجي : الكل يكول تاركين اخوهم يشتغل بعربانة مثل الخادم
وهمه لازمين محلات

تعصب صابر من هذا الكلام :

_اول شي هاي امور عائلية بيناتنا وثاني شي صابر هو الرايد
هل شغله شكد حاجيناه وگلناله تعال اكعد حالك حالنة تريد
افتلحك محل واكعد بي بس هو مجلب بهل عربانة

يگول ماعرف للشغل و الحساب وانت تشوفه بعينك شلون
مو صاحي وعلى كد عقله عاد كلنه بدال ما نعوفه يشتغل عند
أحد نشغلة ونخلي كدام عيونه والي اسمعه يحجي ويجيب
طارينه ادوس على راسه ...

الحجي : براحتك بوية على رأيك انتوا عايلة بيت اني بس
كتلك الي ينكال الله شاهد عزاز عليَّ وما يهون عليا اسمع
طاريكم بالشين .. يله اودعناكم ..

كعد صالح فاير من الي سمعه وراح سوالف لصادق الكلام الي
ينكال بالتفصيل

صادق : مو كتلك هذا اذا ما الله ياخذ عمره ما نرتاح

صالح : زين أكلك ليش ما نفتحلة محل بسيط ونخلي يكعد بي
ونفتك

صادق : هاي شبيك صالح صدك تحجي تفتح محل المن
لصابر ولك هذا بصخلة ما اسرحة مو افتحلة محل وانذب علي
كوم فلوس وتالي ينضحك عليه ويتقشمر ..

صالح : وشلون نبقى هيج ينجاب طارينة من وراه صابر

هز رأسه صادق بتوعد : اني اشوف لها حل لازم لازم تنحل ...
.

حجى هل كلام وهو يفكر بشي اذا ضبط وياه راح يخلص ترك
صالح وطلع من المحل

صالح : وين رايح وتارك المحل

صادق : العامل موجود عندي شغله ضرورية اخلصها وارجع

تركه وراح ..

صابر كان طول اليوم بس نايم لحد الضحى على غير عادته ..
يتضاهر بالنوم وكل ما سميه تحاول تكعده يسوي نفسه نايم
.. تقدمت يمه بسمله كعدت يم راسه

_بابا ليش نايم هلكد اكعد يمنه

شال رأسه وحجة بتعب: بابا اني مالي خلك

باوعت اله بحزن على ابوها الي روحها من الدنيا

_انت مريض ؟

صابر: اي مريض اني واصبعي بي اواه وجع

بسملة : ابوسه ويطيب اكعد يمنه حباب

كعدت من نومتة لخاطرها

_ لا بسمه لا تبوسين رجلي اني راح اكعد يله ..

كامت من الكاع وكعدت بحضنة وباستة بخدة

_ بابا اني اكره عمو يضربك بس اكبر الا اموتهم بس يضربوك
ما اخليهم اضربهم هيج حيل..

احتضنها حيل بين ادي وكأنه يريد يحصل الامان الي فقدة من
اقرب ناسة

صابر حيل كاره ضعفة وكاره طبعه الي خلى الناس تستغلة
مر الوقت وهو ما طلع من الغرفه ابد وسمية وبناته كاعدين
يمه .. ندك باب الغرفة طلعت بسملة فتحتة لكت صالح
واكف وعينه صارت على صابر .. حجى وهو يخلي أيده على
الباب

_. ها شلون صارت رجلك

رد علي صابر بدون ما يباوع اله .. على الله

مد.ايده ب

جيبه وطلع شريط حب ودخل الغرفه شمره بحضن
صابر

_هذا مسكن راح يسكن الوجع اشرب منه يوميه لحد ما رجلك
تصير زينة .. صار يحجي ويأشر لسميه على الحب

_ انطي يوميه حبايه يشربها جبتها اله من الصيدليه كال زينة ..


تركهم وطلع وبس طلع صابر بسبب وجع رجلة شال الشريط
وأخذ حبايه من الشريط وبلعها حتى بدون ماي...
يتبع

البارت_الثالث

اخذ من الشريط حباية وبتلعها بدون ماي حتى تسكن ألمه
ويرتاح ..
رجّع خلى رأسه على المخده بحزن يأن من الوجع ينتظر بصبر
معدوم حالة يتغير بيوم او اخوانة يحنون عليه .. كأن يريد
يهرب من شي بالنوم يهرب من الم روحه من الحزن والقهر
الي نهش قلبه من حقد اخوانه الي ما اله اي مبرر غير الطمع ،،
من ضعفه وطبعه الفقير من خوفه منهم كل ذني اسباب يريد
يهرب منهم ..
البنات يلعبن يمه وسمية توصي بيهم بالاشارة لاتاذون ابوكم
لايعلى صوتكم .. تركتهم وطلعت راحت للمطبخ حتى تصب
عشاء الهم وتجيبة للغرفة تعدت الي كاعدين يتعشون ..
صاحت عليها جبرية
_على الحاضر نطبخ وتجي تصب وتدخل بهل غرفة سم كون ..
عبرتها سميو من غير رد لأن أساساً ما سمعتها
ما ارتاح كلب جبرية بهذا السكوت تركت العشاء وراحت
للمطبخ لحكت سمية لكتها مخلية مواعين بالصينية لازمة
الچفچير تريد تفتح غطى الجدر ..
تقدمت عليها جبرية وهي صاكة على أسنانها الشر تارس
وجها لزمت أيدها نكتتها و وكعت منها الچفچير وصارت
تحجي وتأشر حتى سمية تفهم عليها
: اليوم متحججة بصابر مريض وباقية بغرفتج ما طلعتي
وسكتت منج وكلت خليها لأن صالح وصاني بس مال احنه
نطبخ وتجين انتي تصبين على الحاضر حتى تتزقنبين لا عيني
موخدم عند الخلفوج احنه افتهمتي انتي سوي اكل واكلو
جدري ما توصلين يمه وتغرفين ..
سمية صافنة بيها وافتهمت من طريقة كلامها ومن اخذت
منها الجفچير انو هي ما تريدها تصب من الاكل،،
كل الي سوته تركت الجدر وراحت طلعت بتيتة كصصتها
حتى تستوي بساع وخلتها بماي تسلكها انتضرت تستوي
كشرتها وخلتها بصينية كصصت وياها طماطه وخبز وأخذت
الصينيه تعشي بناتها وصابر ..
حجى صالح ويه جبرية يلومها على تصرفها : شجاج جان
خليتها تصب عشاء هسه على التمنات وكفتي عليها الاكل
شو ظال

ذبت الخاشوكة من أيدها وردت بنتر : أكلك اليوم ما شالت
كشايه من الگاع واحنه طبخنة وتجي تصب ما تگوم تطبخ الها
ولبناتها ولله أطلعه سم وزهر عليهم .
ادخل صادق بالكلام بأيد كلام اخوه
صادق : بس انطي صبر على روحج شوية و سايسوهم مو كله
مشاكل
ردت عليه زوجتة فاطمة حقدها من نفس جبرية : خير شنو
اليوم المحنة صاعدة شفتنة مكصصين لحمها شمسويلها
احنه هاي هل سوت عشى وراح يتعشون
ضحك صادق بسخرية يعرف بمكرهن وسوالفهن و يعرف
بعمايلهن الي يسونها
صادق: لا ابد بس النهار كله گاعدات وذابات شغل البيت كله
برأسها عبالج ما نعرف سوالفجن
تخصرت فاطمة وهي كاعدة ما عاجبها زوجها يدافع عن سمية
_ اجت شكتلك ؟ وشغل البيت يوگع ايد رجل شعدنة احنه
هي هل كنسة والمسحة وبعدين اشوفك اليوم انت واخوك
صايرين محامين دفاع الهم خيرررررر ؟
مد صادق راسه فوك الصينيه يتقرب عليهن يحجي بهمس
صادق : عقولجن بكد فصمة التمر وما تفتهمن شيء
الي أبالي سوالف اكبر من فهمج وفهمها مو اروح افكر بسالفة
تنضيف وطبخ انطن مجال شوي و أتركن المشاكل هسه
صارن وحده تباوع للثانية بتسائل ردت جبرية
_ وشنو الي ابالكم شـ تردون تسوون احجوا خل نفهم خو ما
نمشى وياكم ع عمى عيونا
صادق شال سراحية الماي شرب رجعها للصينية رد عليها
وهو يكوم من الاكل
_يجيكم الصافي بعدين بس سدن حلوكجن شويه هالايام ..
سكتت بدون ما ترد عليه باوعت لابنها كاعد يخبط تمن على
المرك وفوكهن روبة صاحت بي كاشه وجها
_ مهدي كاااافي خبط لعبت رواحنة شهل خبيط هذا
رد وهو ياكل باستمتاع
_يوم ولله طيب اني احبه هيج .. شال خاشوكة متروسة وقربها
من وجه أمه .. هاج ضوكي شوفي شلون طيب
دفعت الخاشوكة بعصبيه خلت الاكل البيها يتطشر على ابنها

_دووولي مني عوزي معدتي تخبط من هذا الخبط مالتك كافي
گوم صارلك ساعتين تعلف ما شبعت صاير شسمنك جنك
عمك صابر

حجى بدون ما يدير الها بال يكمل اكله
_عمي صابر مو سمين ضعيف .. كمل كلامه بدون ربط.....
بسملة حلوه يمة بس تكبر اتزوجها
لزمته من اذانه ولوتها حيل خلته يعقج ملامحه بوجع
و نترت بي
_سوك زايد لا تسوك وكمل زقوم وگوم يله
صاح صالح بيها بزعانة روحه
_اوووو شلون هسة تخلصوها صياح كافي عاد ثولتوني ولد
النعل وانتي شبيج مرعوصة تنكتين بروحج نكت الصمي عاد
خل نرتاح بكعدتنا
جبرية : ما تشوف ابنك ساعة يخبط بالاكل ساعة يخبط
بالحجي ابو حلك يتزوج بسملة عوزي احفادي يطلعون لو
خرسان لو مخابيل ..
تركهم وگام بصجر .. عمي هنيالك يصابر على مرتك مرتاح من
لغوة النسوان ماتشوفين حتى من غرفته ما يطلع عبن مرتاح
مثلي اجي اكابلج انتي وابنج تجوعرين
صاحت وراه: ايي لازم ما نعجبك تكعد يمنا هسه صرت اجوعر
وخلقتي ما تعجبك بس تالي الليل اصير عزيزة
وحلوة
تركها بدون رد
كامت هي هم شالت الصينيه بعصبية ودخلت المطبخ وخلتها
على السنك بدون ما تعزلها ووكفت تسوي جاي طلعت سمية
هم بيدها الصينية مال عشاهم حاجتها جبرية وهي تهز بجتفها
وتاشرلها
_ غسلي الاماعين اذا رجعت ولكيتهن اطشرهن فوك راسج
تفهميني لو لا
صارت سمية تنضف بيهن وتغسلهن وك

نست المطبخ وعزلتة
وراحت للغرفة طلعت ثوب وراحت للحمام تغسل وتبدل
الحمام صاير بصف التواليت اجت تدخل الحمام صار بوجها
صالح طالع من التواليت ضل صافن بيها وعلى
بطنها الي استوها بدت تبين بحملها الثالث وملامح وجها
الهادئة وهي صايرة بيها هبطة من اخر مره تحرش بيها صفنت
بوجه بخوف وبسرعة تداركت الموقف وبدل ما تشرد وترجع
للغرفة دخلت الحمام وتركته
باوع يمنه ويسرى شاف محد اكو لزمها من معصم ايدها قبل
لاتسد الباب يباوع الها بنضرات قذره وحجى بسرعة

_ شبيج تخافين مني قابل راح اكلج
بحركه سريعة منها فلتت أيدها منه و خلت ايدها بصدرة و
دفعته وطبكت باب الحمام بوجها وكعدت ترجف
غسّل صالح اديه ورجع گعد بالهول وصاح ابنه يجي يدوس
على رجلية و باله وتفكيرة كله بسمية
ويحسد اخو عليها ..
باليوم الثاني صابر داس على المه وگام من فراشه حتى يطلع
للشغل وطبك حبايتين من المسكن الي جابه اله صالح
وشربهم حتى يسكن ويكدر يشتغل يمشي على رجله بصعوبة
ويعرج منها ..
صعد ويه اخو بالسياره وتوكل على رزقه .. مر وقت ما يقارب
ساعتين يشتغل بالعربانة يروح ويرجع بيها وكل شوي يگعد
بيها يمدد من رجله شويه يرتاح و يرجع الشغله
يمشي يدفع بعربانتة شايل مسواگ ما حس اله انضرب
بضهره بحجارة وگف ودار وجها لگه واحد ثاني هم صاحب
عربانة بعده مراهق يضحك عليه ترك عربانتة وراح عليه يحجي
وياه
: ليش تضرب يمك اني يمك انت شبيك ليش تاذون الناس
التمشي مخبل انت
رد علي يضحك : هههههه اي اني صابر المخبل .. صدك عود
انت ليش تدفع عربانة واخوانك زناكيل ليش ما يخلوك
تشتغل بالمحل لو لأن مخبل
تعصب صابر منا ألم رجله ومنا الم روحه من يسموا المخبل
لزمه من قميصه وصار يغلط عليه
_ اكل خ** مطي * جلب اني مو مخبل اني اعقل منك ومن
الخلفوك اني ما اذي بشر بس انت تاذي الناس انت مخبل
مو اني
الولد تجاوز أكثر رفع ايده ضرب صابر على وجه خلاه يترجع
خطوات ليورا لان الضربه اجت فجأه ما جان متوقع ولج أصغر
منه يمد يده عليه، استغل الولد صابر انشده ابتعد عنه وگام
يصيح بصوت عالي خله العالم تنتبه
_صابر المخبل هو هو مخبل هو هو مخبل ويصوفر
نار صارت بين ضلوع صابر من الناس گامت تباوع اله من
حرگة گلبه شال صابر طابوگة من الگاع ونومها براس الولد
وصار يصيح وهو يضرب بي
_مو مخبل مو مخبل اني مابيّ شي اني اعقل منك مو خبل
اني
خله الولد نايم بالگاع دمه بطوله وصارت الناس تلوم بصابر لأن
فتح راس الولد لزمو كم واحد وجرو وهمَّ يحجون عليهِ والي
يگول عقله طگه ونص والي يگول هو عقله مو تمام ليش
يتحرشون بي وهو يحاول يفتح ادي منهم ويوخر وصلوه لمحل
صالح وحجوله الي صار حچه واحد منهم ذب الوم كله ع صابر

: ابو مهدي خوية الزمو اخوكم شنو فشخ الولد خله دمه يجري
شجاه

گام صالح گدام الناس ما سئل عن باقي القصة ولا گال ليش
ضرب اكيد اكو سبب رأساً تولاه كفخات يدمغ بيه و يصيح
كأنه صابر هو الطرف الغلطان بس بالموضوع
: ولك مووووتتتني فشلتني گدام الناس فشلتني وين اوديك
احطك بالشماعية واخلص منك ووووين
حاول صابر يحجي يبرر نفسه يبرر تصرفة
_ هو صاحلي مخبل حجيت وياه مد ايده ضربني و ضحك
الناس عليَّ صالح
ضربه صالح ع راسي بكل قوه ينتر بي و يزيد ضربه أكثر
_ و تگوم تخلي دمه بطوله انت بهاي سوايتك من صدك خبل
وكل عقل ماعندك
كل الي سواه تقوقع على نفسه وصار يحمي نفسه من
ضربات صالح لحد ما حس نفسه دخل بحاله أشبه بالصرع ..
جسمه كله تيبس وصار ينتفض حيل
تركه صالح بدون ما يرف كلبه وراح يشوف الولد الي نفشخ
وينه وقبل ما يروح صاح لصادق حجاله على صابر وشنو
مسوي .. دخل صادق المحل وشاف صابر واگع بين الوعي و
الفقدان
تقدم اله بحقد ولا كأن هذا اخو ابن أمه وأبو لزمه من كتف
ملابسه وگومة يعت بي بلا رحمة
صادق : امشششي گدامي گوم يله اني أعلمك اليوم ولك تريد
تبلينه توگعنه بمصيبه فاتح راس الولد ولك اذا مات شنگول
ونحجي نوصل للبيت لو ما نوصل بسيطة
نهى كلامه بتوعد كأن السواه صالح ما كفى ولازم ياخذ هو
حصه هم من ضرب اخوه و اهانته و صابر يمشي وراه بلا
صوت بس يتوجع من جسمة ورجلة صعدوا بالسيارة وحركها
راجع للبيت
بلع صابر ريگه بوجع يحجي لاخوه الصار يبرر اله تصرفه عسى
ولعل يصدك بي و ينصفه عكس ما سوه صالح
صابر : هو هو ولله خبث عليَّ وضربني اني ما ماحجي هو
ضربني ويصيحلي هو هو مخبل مو اني
ضحك صادق ولا كأنه الگاعد يمه اخوه بدل ما يوكف الناس
عد حدها صار وياهم عليه يأيد كلامهم

صادق : هوووو انت صدك مخبل صاحي قابل جذب هو انت
مخبل ابتلينه بيك بلوه الله ياخذك ويريحنة ما اعرف شنو
فايدتك من خلفك ابوي
صار يبجي كل قوة ويحجي بحركات عشوائية
_ ولله مو مخبل اني مو مخبل اني كلشي مابيه ليش تكولولي
مخبل ليششش انتو مو اخواني اني عاقل
صاح بي صادق
صادق : كااااافي ولك صوتك ما اسمعه بسيطة بسيطة خل
نوصل واعلمك اذا ما طلعت هذا الجن النايم برأسك بسيطة
بقى يبجي مثل الطفل ويمسح بدموعة بطريقة تكسر الگلب
صادق: كااااافي ولك كافي نغيط صط

رتني صم حلكك عاد لا
اكسر اسنونك بحلگك
صابر: اني ولله عاقل ولله
لم صادق اصابعه بقبضه يدك بيها ع راس صابر و هو يحجي
يشدد ع كلامه بتهديد
_اذا باقية براسك ذرة عقل اليوم الا اطيرها منك على
سويايتك هاي
وصلو للبيت نزل بعصبية وركع الباب ونزل صابر بشكل سريع
يحاول يفلت من اخو ويدخل للبيت قبله حتى يختل بالغرفة
بس صادق لحك بي ولزمه بسرعة ..
_تعاااال ولك تعاال وين شارد وين تروح اليوم تطيرررر تصعد
ل.. (كفر) هم الحكك وانزلك
سحله مثل ما يسحل الخروف للذبح كأن صادق كان منتضر
زلة عليه حتى يعبر عن حقده وغضبة
طلعن فاطمة وجبرية على صوتهم ..
فاطمة : ياااا شكو شصاير
بقى يجر بي بدون ما يرد عليهن وصابر يذب نفسه بالكاع حتى
ما يتحرك وصادق لازمه من عكس أيده ويجر بي
:كوووووم ولك لا تخليني اسحلك بالكاع ولله
اجت سمية وشافته هيج يجر بي ركضت اله ملهوفة تحاول
تفتحة من ايد اخوه تنخى صابر بيها يريد واحد بس يصدگه و
يكول انت عاقل
صابر: سمية سمية اني مو مخبل ولله صادق حباب عوفني
اني اخوك ليش هيج تسوي عووووفني عوفني ولله بعد ما
أسويها
صادق دفع سمية بقوه وگعها بالكاع لزمت بطنها بوجع
ورجعت كامت ورجعت عليه وهم دفعها

صادق : وخررري لا أحبسج وياه ولله وخرررررري
تقربت فاطمة : اييي غير نفتهم شصاااير شبيك صادق
شجاك يمعوددد
تركهن وراح يجر بصابر فتح باب المخزن الي جوه الدرج غرفة
فارغة مخليها مثل المخزن بي فراش الشتاء والحصة
التموينية دفعة ودخل
_ادخل كدامي حجاها،،، وهو يتلفت داير مدايرة شاف واير
ملفوف جره وطبكه
صار صابر يرجع ليورة بخوف
_ لا صادق لاتضربني رجلي توجعني ولله اخوك الزغير اني
صادق لاتضربني اني بعد ما أسويها ولله فدوة حباب ابوسك
خليني فدوه ماعيدها بعد ..
صار يتقدم عليه والواير ملفوف على أيدى
_انت عاقل لو مخبل ؟
رد صابر عليه بدون ما يفهم نيتة اخوه شنو
صابر: عاقل اني عاقل ولله
ضربة كل قوتة خلى روحه تفرفح وكرر السؤال
_انت عاااااقل لو مخبل
تردد صابر بالجواب مايعرف يا جواب راح يخلصه من الضربه
الثانية .. وقبل لا يرد اجته الضربة الثانية وياها السؤال
_ انتتتتت مخبل لو عاااااقل
رد وشفته ترجف بخوف بس گلبه ما ينطي ينطق كلمة مخبل
ع نفسه گضه عمره يحاول يثبت هو صاحي و عاقل و اخوه
هسه يريده ينطقها بلسانه ان هو فاقد عقله
_عاقل اني عاقل
رجع ضربة حيل
_والعاقل يضرب بالناس شفتلك عاقل يمشي و يضرب
بالعالم اكو عاقل يفشخ واحد هيج فشخه بله مااات شنجحي
وشنكول
حجى وهو شايل ادي يحمي نفسه من ضربات صادق الحاقده
ضربات بيهن سم سنين و كره دفين
_هو هو ولله هو ضربني اني جنت ادفع بالعربانة وهو ضربني
بحجارة بضهري ويصيح هو هو مخبل عليَّ رحت احجي وياه
بس هو ضربني
صادق : اي لأن انت مخبل قابل جذب شكلك شكل وأحد
عاقل انت مقتنع بنفسك عاقل لا تعرف تمشي عدل لا تعرف
تحجي مثل البشر
ورجع ضربة وتقرب عليه وكمل كلام ..
_ گول اني مخبل

صابر بعناد : بس اني مو مخبل اني عاقل
صك صادق على أسنانه وحار شنو يسوي حتى ياذي لزم
إصبعه المضروب كل قوته وعصرها شاغت روح صابر
صابر: اخخخ اخخخ صادق خويه رجلي اخخخ خوية حباب وخر
ضب عليها ورد
_ كووووووول انت عاقل لو مخبل
صابر :مخبل اني مخبل
حجاها بقهر و بعجز وبجى نزلت دموعة ع روحة من قلة حيلته
صادق: انت شنووو؟
رد وهو ينشغ بقهر
صابر: مخبل
تركه بألمة وهضيمته وقبل ما يطلع صاح فاطمة
_ تعاي طلعي الحصه منا هذا الباب ما يريدة ينفتح بعد
وجيبيلي قفل
فاطمة : اي شصاير غير نفهم
: ولج فاشخلة ولد فاتح رأسه فتح وصالح ضل يمه مدري
عاش مدري مات كسر وجهنا فشلنه گدام الناس بس اني
اعمله اذا ما اخلي يخيس هنا وضوه الشمس يصير حسره
عليه بسيطة
فاطمة: يا دهر صابك يصابر هي هاي سواية تسويها
راحت جابت قفل سد الباب صادق وقفله وخله المفتاح بجيبة
وحذر فاطمة
_هذا الباب محد يفتحه غيري ممنوع
وبقى صابر لام رجلي لصدره ويبجي بقهر والم
وسميه بقت كاعدة يم باب المخزن تبجي و بناتها يمها ..
بسملة : بابا بابا اني وماما وسلوى نبجي عليك اطلع فدوة
كام من مكانه ويمشي بصعوبة تقرب من الباب ورد عليها
_بسومة الباب مقفول اني ما اكدر اطلع بسومة ديربالج على
امج خطيه لاتخليها تبجي وانتِ لا تبجين اني اطلع ما ابقى هنا
بسلمة: بابا انت ليش هنا ليش عمو ضربك وضمك هنا ليش
رد صابر يحجي ويا بنته كأنها بنت چبيرة يشكي الها همه و
حزنه يسألها بيأس
صابر: اني ما ادري يگلولي انت مخبل .. بسومتي صدك اني
مخبل ؟ مو احبكم انتِ وسلوى وامج اشتريلكم والعبكم ها اني
هم اضربكم هم أصيح عليكم ؟ اني مو مخبل..

بسملة: لا بابا همه مخابيل انت مو مخبل انت تحبنه ومددللنة

ابتسم صابر رغم وجع روحه ابتسم وهو يسمع كلام بنته وهي
مصدگه كلامه و تأيد ان هو عاقل ارتجي ع باب و سألها
صابر: لعد ليش الناس كلها تكلي مخبل حتى اخواني وحتى
يضربوني
_ ما يخافون الله يذبهم بالنار،، بابا لا تبجي اني و سلوى و ماما
نحبك بابا انت حباب لا تضوج
همهم الها كلامها كأنه بلسم ع جروحة راحت بسم

لة شايلة
القراءه تريد احد يقريها ماكو راحت للمخزن تقربت يم الباب و
كالت

بسملة : بابا منو يقريني دروسي ويخليني اكتب حباب لا تضل
هنا اطلع قريني
صابر: اي اطلع واقريج
:شوكت تطلع بعد شكد
رجع راسة على الباب بحزن : مادري بسومتي مادري بلكت من
يجي صالح يطلعني
بقن كاعدات هي و امها و اختها يم الباب ويسولفن وياه على
أمل يرجعون ويطلعوا مر وقت مو قليل سمية أشرت
البسملة تسأل ابوها جوعان ..
بسلمة : بابا امي تكول جوعان
صابر: ما اريد اني بس رجلي توجعني هواي خل تجيبلي حب
يوخر الوجع
ركضت بسملة للمطبخ تريد تصب اكل بس ما تلوح الجدور
الي على الطباخ جرت كرسي صعدت فوكه وطلعت ماعون
فافون وصبت بي تمن وخلت فوكة مرك وخبزة شالت
الماعون ونزلت قبل ما تطلع لزمتها جبرية
_ تعاي ولج هاي المن
بسلمة: عمه الي جوعانة اني
جبرية: الج لو لابوج
: لا عمه الي
: اذا تطلعين تودي لابوج بس يجي عمج اكله اخلي يملص
اذانج
تركتها وطلعت وراحت كعدت يم الباب مال مخزن وبقت
تتلفت وحجت بصوت ناصي : بابا اكل حباب ماما تكول خلي
ياكل دفعتله الماعون من جوه الباب وراحت كعدت بالغرفة
حتى ما يشوفها كاعدة بالباب وما تاكل
تتصرف بذكاء رغم عمرها الزغير 8 سنوات
وأخذت الحب الي ابوها يشرب منه وانطته اله من جوه الباب
ورجعت اخذت الماعون ورجعته للمطبخ بدون محد يشوفها

صابر: بسومتي اني عطشان كولي لامج اني عطشان اريد ماي
بسملة : بابا شلون اكدر ادخل الك الماي ما يدخل من جوة
الباب
صابر: عطشان اني كلش
راحت جابت دولكة ماي وبقت صافنه شلون تدخلها ماتعرف.
باوعت لامها تسألها بعيونها : شلون ماما بابا عطشان سمية
مثلها حايرة شتسوي
صفنت بسملة بتفكير وفزت: اجتني فكرة
ركضت للمطبخ جابت ماعون صارت تدير ماي بالماعون
وتدخله من جوه الباب وأبوها يشرب ويرجع الها الماعون
وترجع تترسه لحد ما ارتوى
بقو هذا حالهم لحد الليل ويا ما صالح وصادق دخلوا
ركضت سمية على صالح تتوسلة بعيونها وتاشرله على الباب
وتطلب منه يطلع صابر من المخزن
صار يأشر يحاول يفهمها ويحجي بصوت عالي
صالح: رجلج ماكو هذا رجلج مخبل مخبلللل ما برأسه عقل
ضرب ولد وخله دمه يجري ويستاهل يتأدب خل يتأدب
ويعقل ونطلعة
بسملة: عمووو انتوا حقيرين تضربون بابا وتحبسوا ليششش
تقدمت عليها جبرية وضربتها حيل على ضهرها ولزمتها من
كصيبتها :
_هاي عليمن ولج تغلطين هاااا على عمامج الا اخليهم
يحبسوج ويه ابوج
بسلمة: اي عمه حبابة خل يدخلوني يم بابا خطية مريض من
رجلة
صالح : ولج انتِ عليمن طالعه هيج عرمة من صغرج شو امج
ما تحل رجل الدجاجة وابوج نص عقل انتِ عليمن هيج عرمة
هاي اختج اشو صوتها ما ينسمع احمي السجينه واخليها على
حلكج واخليج قبل ما تحجين تخافين
فاطمة: فهموني هسه شصار وشسويتو ويه الولد
حجى صالح : وره ما رحت للولد لكيتة صاحي بس سبحان
بدمة والناس تولتني ليش ما تكضون اخوكم اذا عقله مو تمام
خلوني غطيت بهدومي من الفشلة تالي اخذت الولد خيطو
رأسه خياطين وضمدته ووصلته لأهله
وهم اسلتموني بالحجي واني من وره هذا المطي باقي أتوسل
حتى اسكتهم. المهم شرحت وضع صابر وفهمتهم انو ابنهم هو
الي بده وخليت بيد الابو كم فلس من شافهن سكت ..
الحمدلله عدت على خير

رد وهو يأشر على المخزن

_وهذااااا خلي يخيس بالمخزن احسن اله هو الضاهر مال
حبس وربط نربطة ونرتاح من همه وفشلتنه كدام الناس
بسببه
صار الليل وبسملة لازمة قرائتها وحايرة شلون تقراء رجعت
راحت لابوها وحاجته من وره الباب
_بابا عندي قراءة ماعرف أقره وحدي
سمع صوتها كام من مكانة وكعد يم الباب
_ شنو درسكم
گالت اله الدرس انطته القراءة من جوه الباب قرأ الدرس الها
وحفظه هم رجع الها القراءة و كامت هي تقرأ و وين توكف
يساعدها لحد ما حفظت
مرن تلث ايام وصابر محبوس محد يفتح اله الباب غير صادق
يدخل ينطي اكل ويودي للتواليت ويشربة علاج ومهدئات
تستخدم للي عدهم امراض عقليه وإذا يرفض يجبره يشرب
وهل علاج صادق دفع مبلغ لواحد يدبرهن اله لان مو كل
شخص يكدر يدبرة بس بحيلته وفلوسة حصل واحد ما يخاف
الله دبرهن اله
يكمل من صابر ويطلع ويرجع يقفل الباب وسمية وبناتها
ساكنات باب الغرفة و دمعتها ما نشفت باقية لاحولة ولا قوة
صابر اول ايام جان يرد عليهن من وره الباب يسولف وياهن
بس بسبب العلاج الي صار يشربه صار أغلبه وقته نايم لو
خدران لو يهلوس وحده ومايرد على أحد من يحاجي
صار وقت دخول صادق عليه اجة يفتح الباب وجايب وياه
ماعون بي تمن وفوكة مرك لكه سمية وبناتها كالعادة
كاعدات يم الباب صرخ بيهم
_ تضللللن هنا يعني شلووون ما تولن منا شنو كعدتجن
عبالجن راح تخليني أطلعه كوووووووومن
تقدمت بسملة بطفولة
_عمو فدوه خلي يطلع بابا
دفعها منها وتقرب جر سمية وخرها من الباب وفتحه حتى
يدخل بحركه سريعه دفعن الباب ودخلن بس تعجبن صابر
مربوط كاعد لام رجلي لصدره ومخلي رأسه بين رجلي ومابدر
منه اي ردة فعل من شافهن ولا اتحرك من مكانه
بأيام قليلة نفسيته تعبت والعلاج الي يشربه تعبه وخلا خدران
شمرن نفسهم يمه

كعدن : بابا بابا اكعد ليش هيج .. عمو بابا
شبي
صادق : مابي شي كووومي منا
سمية صارت تحاول تفتح بالحبل
ترك صادق الماعون من أيده الگاع و جر سميه طلعها شمرها
و رجع ع سلوى هم شمرها برا بقت بسملة حاضنو ابوها حيل
_ بابا اني بسلمه بابا شبيك ليش ما ترد
بقى صابر ع حاله كانه بحالة اللاوعي جرها صادق من أيدها
حيل و شمرها برا و دفع الماعون ع صابر يأمره
_ ياله اكل حتى تاخذ علاجك بساع
بقى صابر صافن عليه بعيون ذبلانه تحجي قصة ألمه جسمه
خدران مرتخي و صادق يصيح عليه حتى ياكل بعد ما عجز منه
ياكل طلع شريط الحب و تقرب عليه طلع وحده دفعها بحلگه
و شربه مي خلى يغص بيه
ويكح من الماي
تأكد منه بلعها طلع و قفل الباب ضلت سمية گاعده ورا الباب
هي و بناتها وگلبها يم صابر ليش ما يرد ع بسملة من تحاجي
القلق نهش گلبها بعد ما شافت حالة
لليل اجه صالح بيده ماعون العشاء من شافهن كاعدات
بعدهن حجى بملل
_ اهوو انتن ما تملن ترى ما مسويلة شي كعدته هنا احسن
اله و النا
تحضرت بسمله حتى تدفعه من يفتح الباب مثل ما سوت
ويه صادق بقن گاعدات حتى يأمن ويه ما فتح الباب گامت
سميه دفعته حتى تدخل و بسملة دخلت بسرعة
من يمه تدخل لابوها صالح يحاول يدفع سمية وما يخليها
تدخل لكن التفت بسرعة على صرخة بسملة
_ بااااابااااا شبيك بابا ..
يتبع

#البارت_الرابع


هل مره صالح هو الي اجة بدل صادق حتى ينطي عشى لصابر
ترك الماعون على صفحة وكف يفتح بالقفل فتحة ودار يشيل
الماعون سبقتة سمية وبسملة يدخلن للغرفة
لكن دخلتهن على صابر على مره ماكانت مثل كل مرة
سمية نشغت كل حيلها ورجعت ليورة مخلية اديها على حلكها
من هول الصدمة صرخات مكتومة بداخلة تتمنى عدها صوت
يساعدها حتى تطلق سراحهن وتصرخ
وهذا اصعب احساس ممكن يمر بي الإنسان من يكون بوقت
يتمنى يصرخ بي لكن مايكدر ..
صالح الماعون وكع من أيده وتطشر وهو يصيح صااابر
بسملة صرخت بصوت طفلة شايلة هم أكبر منها وهي تشوف
ابوها معلك كدامها وفاقد الحياة .. صابر كان شانق نفسة
منت*حر
وهذا الي وصلة كلة بسببهم .
3
همَّ ما قتلو بشكل مباشر حتى لا ينگال عنهم قتلو اخوهم .. همَّ
قتلو على دفعات
قتلو من ظلمو وعيشو غريب بوسط بيتا وبنص اخوانة
قتلو من أهانو كدام الناس وسمحو للناس تهينة بحضورهم
وهمَّ حتى ما يدافعون عنه ويرحمون ضعفة
قتلو من جبرو يعترف بالسانه انو هو مخبل وسوو بي حالة
نفسيه
وكمولها علي حتى يقتلو القتل الاخير من صارو ينطو علاج ما
ينطي غير للي عدهم امراض عقلية ومهدئات
ووصل لمرحلة الانتحار .. مات صابر وترك الهم حقة وورثة
كل هذا الي سوو هو حتى الورث يتقسم بس على ثنين ترك
وراه اثنين بنات وزوجة لاحوله ولا قوة وحامل اختار ينتقل
بجوار ربه الي هو ارحم علي من اقرب ناسة ..
صرخت بسملة ... بابااااااا ركضت وصارت تلزم برجلي تحضن
وتبوس بيهم وتحجي وياه بدموع غركت وجها .. بابا فدوة
حبيبي شبيك بابا ليش معلك هيج
سلوى تقربت وياها تبجي بدون صريخ ولازمات رجلين ابوهم
صالح صار يصيح وهو يصعد على البرميل الي صاعد علي
صابر ودافعه .. صاددددددق الحكككك ولكككك الحك
صاددددق صااابر ماااات
سمية من هول المنضر صارت بيها حالة مثل الي نشمرت
وجسمها كله تيبس مثل نوبه صرع دخلت بيها ..
الكل اجه يركض على صوت الصياح وتجمعو بالغرفة
صادق من شاف صابر تجمد بمكانه وفاطمة وجبرية صارن
يصرخن بنص البيت وسمية الواكعة حتى محد وصل يمها
وشاف شبيها الوحيدة سلوى تركت ابوها كعدت يم رأس أمها
تبجي وما تعرف شنو تسوي وشلون تتصرف
صاحت عليهن .. عمة جبرية عمة ماما
ردت عليها وهي تصرخ وتبجي : شرايدة انتي شبيها امج بيا
حال احنه
سلوى: ماما فدوة طاحت .. ورجعت تحجي ويه امها .. ماما
ماما أنتي هم متي ويه بابا ماما كعدي شبيج
تقربت يمها جبرية تشوفها وصارت تدك على خدها جابت
ماي رشكتة بوجها وصارت تفتح بايديها الي تيبسن ونقبضن
بقوة
لحد ما نشغت وفتحت عيونها ثواني استوعبت وأخذت نفس
قوي وصارت تبجي حيل كامت بصعوبة من مكانها وراحت
شمرت نفسها على صابر الي نزلو من الحبل ومددو بالكاع و
كعدو يبجون علي .. مدري صدك مدري تمثيل مدري ضميرهم
أنبهم على الي سوو بأخوهم ورب العالمين وحدى يعلم بلي
بالكلب
صار صالح يباوع على صادق وهو عيونة مطعونه دم : هذااا الي
ردته صادق ارتاحيييتتت هسه ماي بارد نزل على كلبك
رد علي بعصبية : واني شدراني راح هيج يسوووي اني ماردت
اموتة
صالح: ما موته بس وصلته مرحلة خليته هو موت روحة
كعدو يبجون فوكة والنسوان تصرخ والجيران التمت وكلها
الجيران بجت على صابر لأن طول عمرة رجال فقير ومن أهل
الله وعمرة ما اذى بشر و الكل يحبة
وبين البجي والصريخ لفو صابر ابطانية وشالو للمستشفى
سمية بعد ما صحت ماخلت لاشعر ما كطعتة ولا ثوب ماشكة
روحها فرفحت هي وبناتها وراه وتريد تطلع تروح وياهم دفعها
صادق دخلها جوة
دررروحي ناقصينج احنه.. فاااااطمة جبرية دخلنها بساع جوة
ماريد اشوف مرة كداااامي
خلو صابر بالسيارة وراحو بي للمستشفى دخلو للطوارى اصلاً
ميت والناس الي جاية وياهم تسأل وتستفسر شنو الي صار
وشنو خله صابر ينت*حر ويسألون على أدق التفاصيل وكعدو
يردون عليهم ..
صادق : صابر اخر فترة صار مؤذي حيل ويضرب حتى بناته
صار يأذيهن حيل ويخوف واحنه هم عدنه جهال بالبيت اني
علمود مصلحتهن خليت وحبستة بالغرفة
علمود ما يأذيهم
صار يحجي بدموع كاذبة ويدك بأيدة على صدرة يمثل التأثر
والحزن .. انييي ادري هيج يسوي بروحه واحبسه اخخخ يا خوية
كسرت ضهري عمت عيني كون قبل لا اخليك وحدك بالغرفة
رد على صادق واحد من جيرانهم الي اجة وياهم للمستشفى
حجى باستغراب من كلام
صادق
: صادق هو صابر قابل ماعنده عقل تره رجال خوش زلمة
وفقير والكل يحبه وبعمرة ما اذى بشر لابكلمة ولا بتصرف
وبناته اشو روحه بيهم اشوفه ياخذهم للمدرسة مخليهن على
كلبة
ويسولف ويتصرف طبيعي وكلشي مابي بعد من شوكت صار
بعقلة وياذي بيكم ..
باوع علي صادق وماعندة رد رجع عود يبجي ومتاثر
رد صالح على الولد
صالح: خوية هذا شي احنه ما نحجي بي كدام الناس حتى لا
يكولون ينطون باخوهم وحتى لحد يخاف منه. بس صابر لو ما
العلاج ما يتصرف طبيعي وتشوف كلشي مابي
بس يخلص علاجة يصير يضرب وياذي
بس احنه ما جنى نحجي هل كلام كدام أحد وهاي شوفت
عيونهم شسوى بروحه
مر الوقت بالمستشفى بين الفحص والتشريح وبين التح

قيق
والسؤال شنو الصار وليش لحد ال2 الفجر يله سلموهم الجثة
أخذوها ورجعو بيها للبيت حتى يشيعو
سمية فاقدة لفلفنها النسوان بدشداشة سودة وربطة وعباية
وكعدت بنص بناتها الي ينشاغن ويبجي
والمصيبة بسملة تصيح كدام النسوان

: عمووو صادق حبسه بالغرفة وصار يضرب بي يومية يومية
ويكتلة صار هووواي حابسة من وره عمووو بابا مات وعمووو
من نكله نريد بابا يضرب بينه يكوم
النسوان يسمعن بيها ويتبسبسن بينهم اجتها فاطمة جرتها
للغرفة ولزمت الشحاطة:
بسسسمة اذا جبتي طاري عمج كدام النسوان اذبحج ولله
اذبحج عرررمة ابوج مخبل وموت روحه عمج شعلييي
رد عليها : من وراكم بابا مات من وره عمو حبسه ومات
اكررررهكم اني
1
تقدمت عليها فاطمة ولزمتها بالشحاطة يبستها وخلت جلدها
احمر وبسملة وياها لسان بالسان. بعد ما تركتها فاطمة
كعدت بالغرفة تبجي على ابوها وتناشغ
لحد ما عيونها ورمن وغفت وهي كاعدة ومرتكية على الحايط.
فزت على صوت عالي وعياط
نفزعت من مكانها طلعت تركض من الغرفة حتى تشوف هل
منظر كدامها . ابوها بتابوت متمدد بنص الهول
وامها فوك التابوت تبجي وتحتضنة فاقدة وصالح وصادق
كدام الناس مدنكين على التابوت ركضت لابوها لكن هذه
المرة اكيد ما راح يكدر يتلكاها بحضنة مثل العادة ولايلمها بين
أيدي ولا يكول الها بسمتي لاتركضين حيل لاتوكعين
شمرت نفسها ويه امها على التابوت وهي تحاجي ابوها
بطفولة وبرائة وتعاتبة ليش تركها
بجو ولطمو وناحو واجة الوقت حتى يشيلو
شالو من الكاع سمية وبناتها طلعن يركضن وراه والنسوان
يلزمن بيها ويرجعنها يشيعو صابر بالمنطقة وكل الناس طالعه
من بيوتها وتمشي بالتشيع ويترحمون لهذا الانسان الطيب ..
الي نطوت صفحة حياتة وصار مرحوم بسبب طمع وجشع
اقرب الناس دمة ولحمة اخوانة
صابر كان ضحية الطمع والنفس الجشعة وكل أمنيتة كانت انو
يعيش هو وزوجتة واطفالة بكرامة وبدون أذية البشر
انذل وهو عايش أبيت ابو الي يمتلك بي حصه مثله مثلهم
مات وكان يتمنى يشوف محنة منهم راح صابر تارك وراه زوجة
وأطفال مصيرهم بيد ناس الطمع عامي عيونهم ..
شدو على السيارة وانطلقوا بي للمقبرة مو للنجف ..
وجه الصبح سمية انتهت وباد حيلها وبس تون ولامة بناتها
بحضنها وكاعدة ..
سوولة فاتحة جبيرة ينحجي بيها والكل يكول لو ذول الإخوان
لو لا شوفو الفاتحة الي سواها لاخوهم بالعافية عليه لحد
السبعة و الناس ما كفت رايحة راجعة عليهم
سمية لفت بناتها وكعدت بغرفتها عايشة الحزن والقهر وحدها
محد يشاركها بي غير ثنين بنات اطفال نكسرو مثل كسرة
امهم ..

فجاء ندفع باب البيت و صدع صوت الصرخة بنص البيت
بدخلو اختهم. الي من سنين مقاطعتهم بسبب طمعهم
وما عرفت بوفاة صابر غير سابع يوم من وفاتة لأن كل تواصل
بينهم ماكو

ياخووووووية يا أبن امي ولك صااااابر يل حنين يبو كلب
النضيف يااااخوية عممممت عيني عليك
كعدت بنص البيت ملخت نفسها وطلعن الها جبرية وفاطمة
تلكنها
جبرية : يبووووووو رااااح صابر سناااء راح اخيج ولجججج
تصخمنه يا خية
طلعو الها صالح وصادق كابلوها وحضنوها يبجووون وياها
صالح: وييننننج خوية راح صابر ذاك الفقير الطيب راح ولج
كتل روحة
كعدت تدك وتلطم لحد ما باد حيلها وكومنها من مكانها
سناء: ولكمممم شلون أمس يله دريت شلوووون ولكم انتو ما
تخافون الله وتكولون اخيتنه ننطيها خبررر
لو ما رجلي شايف القطعة بالسوك لاجان دريت ولا علمت
هيج شمرتوني وسويتوني غريبه عنكم من انعل ابو الفلوس
الي تخرب الإخوان ليش ولكم ما تكولون هاي اختنه الوحيدة
صالح: سناء انتي الي كاطعتينه وكلتي ماعندي اخوان بعد لو
نسيتي
سناء: من عمايلكم وطمعكم اكلتو علي حقي عينك عينك
وحتى هل فقير الراح هم اكلتو حقه وهل راح ببطونكم
حوبتي وحوبته ما تتعداكم
انتفظ من مكانه
صادق: ولججج صار سنين ما شايفين خلقتج ليش تخليني
هسه اسحلج وطلعج كل هل سنين ما كصرت لسانج وبعده
طويل جايه عينك عينك تدعين علينه شكد وكحة عين
سناء : ما جاية عليكم ولا ميته على شوفتتكم انتو باطلين اني
جاية أبيت ابوي وجاية لعزة اخوي ذاك الفقير الراح وانتو
تكفخون على راسة جاية اشوف بنات. اخوي الحنين الضلن
من ريحتة وراجعة لبيتي ما باقية عدكم
جبرية : يااااا شجاج جاية هادة علينه هسه احنه بيا حال ما
تشوفين عدنه مصاب ومكسورين
ضحكت بحزن على كلام جبرية: ههه جبرية خية ترة كلنه عيال
گرّية وكلمن يعرف اخية مكسووورة ؟
انتي مكسورة على موت صابر وحق ترابه البعدة ما نشف انتي
اول الفرحانين بموتة حتى تلهطون الاول والتالي. ولججج
تعلميني بيج انتي واخيتج بنات نغماشة لو غيررجن
بس العتب مو عليجن العتب على ذول
صالح: سناااااااء كومي طلعي بررررررة لا وحق القران اسحلج
سحل
لمت عباتها وكامت : من اجي علمودكم عود اطردني اني جاية
على عزة اخوي وبيت ابوي وعلى الضلن يتامى الله يعلم
شضامين الهن
تركتهم وراحت متوجهة لغرفة صابر دخلت شافت سمية
شلون حالها يكسر الخاطر وبناتها بسدها
بنات صابر حتى ما يعرفن عمتهم ولا يذكرنها
كامت الها سمية وشبكتها وضلن

ثنينهن يبجن
سناء: باطلين اخوتي واعرفهن باطلين وما يخافون الله
شصار ؟ صدك جذب صابر ذاك المتدين ومايفارك صلاتة
ينت*حر اكو شي ما جاي افهمة

صارت سمية تاشرلها وتحاول تفهمها بس سناء مجاي تفهم
عليها
سناء: بسمة عمة تعاي حبيبتي تعاي بحضني
تقربت بسملة بحضن عمتها باستها بخدها وكعدت تسأل بيها
:كوليلي عمامج هم يتعاركون ويه ابوج ويضربو لو لا
بسلمة: عمو صادق وصالح دوم يضربو ويخلو يبجي وعمة
جبرية وعمة فاطمة يخلون بس امي تشتغل بالبيت ويصيحون
عليها وتضربني اني وسلوى وسلوى خطيه كلبها يوجعها وعمو
صادق حبس بابا بالمخزن ويوميا يدخل يكتلة وعافه بالمخزن
هواي ايام وبعدين دخلنه لكينة بابا معلك بالحبل وميت
سناء: الله ينتقم منهم الله لا يوفقهم كون بحق لا اله الا الله
حوبت هل مسكين ما تتعداهم كون ..
طلعت سناء من غرفة سمية تفور لكت فاطمة وجبرية
بالمطبخ :هاااااا ارتاحيتن هسه فاختتتتتت لو بعدها
فرحتن كل ضنكم حق صابر صار الكم لا تفرحن هواي كلشي
اخذتو راح يصير رمادد وعد هذا واتذكرن كلامي زين
فاطمة : اشوووو انتي من جيتي ولهسه ماخذتنه حاصل
فاصل تجاوزتي وكلنة كلبها محترك على اخوها وسكتنه بس
مال تجين تدعين وتتشمين لا عيوني ما مجبورين نتحملج لو
تكعدين باحترامج لو ترحين منين ما اجيتي
تقربت سناء يمها : سمعي ولج من اجي واكعد أبيت نغماشة
ساعتها طرديني .. ولا عبالج من اكلتو حقي صار البيت بيتكم
لا عيوني بأحلامج انتي واختج ولو اهتم للفلوس جان طلعت
حقي من عيونكم بس اني الي سكتت وكلت ما اوكف اخوتي
بالمحكمة على مود فلوس والحمدلله رب العالمين كافيني مو
بحاجة
بس صابر الي مو بعيد مات من وراكم شوفو حوبته وحوبة
الأيتام ذول شراح تسوي بيكم ..
فجاء جبرية كامت تعيط
جبرية :يبوووو ولج هيج سناء هاي تاليها تدعين على اخوتج
وخلفتهم. تعاااالو شوووفو واسمعووو
شوفو اختكم شلون واكفه بنص بيتكم فاتحة زيكها وتدعي
اجو صالح وصادق بسرعة وسمعو كلام جبرية وصياحها :
صادق : سناااااااء طلعي برررة خلقتج ما نريد د نشوفها بعد
صالح : مرتاحين منج صار سنين جنج بوووومة جاية هسه
تدددعين ولج شتردين انتي
سناء : اريد تحطون الله بين عيونكم يا ضلام حابسين صااابر
ورابطينا يا جلاب ليش ولكم تربطو شمسويلكم من تروحون
فدوة لنعالة هل مسكين وحق الزهرة حوبته راح تمردكم مرررد
تقرب الها صادق وجرها : امممممشي طلعي بره برررررة
دفعها وشمر عليها عباتها: بعد لا تشوفينة وجهج ابددد لا بفرح
ولا بحززززن

لبست عباتها وطلعت وقبل ما تطلع صاحت : حسبي الله
ونعم الوكيل حسبي الله ونعم الوكيل عليكم .. رب العالمين
يطلع حقي. وحق هل ايتام من عيونكم

طلعت وهي تتحسب وتبجي ..
سدت الباب جبرية وراها ورجعت الهم
جبرية : شفتووو شكد عرمة مكابلتنه وتدعي وتتحسب علينة
بكل صلافة
صادق: مرتاحين منها صار سنين شجابها هاي
فاطمة: جاية على فاتحة اخوها لا ولله جاية تفتح دفاتر قديمة
هاي
صادق: هاي اذا رجعت ترجع المشاكل وياها واحنه ما صدكنه
لصمت حلكها وسكتت خاف ترجع تطالب وتريد
فاطمة: تطالب بشنوو انتو مو نطيتوها فلوس بعد شتريد
صالح: تره الفلوس الي نطيناهن الها ما يطلعن ربع حصتها
بس هي سكتت وقتها واتجنبت المشاكل لأن تعرف لو تركع
رأسها بالحايط ما تحصل شي بس هسه اشو طالع صوتها
وصايرة توكف بوجهنا بيمن شاده ضهرها هاي ..
جبرية : عموماً اذا اجت مرة ثانية اني من الباب اطردها ترة
خاف تكولون ما كلت الكم عتبت باب البيت ما تفوتة
فاطمة: اي ولله حتى اني ما ادخلها ماعوزنه يصير بينه شي
من ورة دعاويها وخاف تبقى رايحة جاية بحجى بنات اخوها
ومو بعيدة تبقى تترس براس سمية وبناتها علينة
حجت جبرية وكأنما شي رايح من بالها وهسه تذكرتة
موجهة كلامها لصالح
: أكلك صدك شنو سمية ورة موت صابر تضل هنا لو تروح
لأهلها لو شنو بالضبط
صالح: وين تروح هي منو الها حتى تروحلة
جبرية: ليش مو عدها مرت ابوها وعدها اخو وخوات
صالح: مرة ابوها مرة جبيرة وما تحمل واصلا ماتريد سمية اشو
من اخذناها لليوم محد دك.بابها وسأل عليها لا أخ ولا أخت
بعد وين تروح بالشارع تكعد وهي وياها ثنين بنات وحامل
جبرية: لا شوف أكلك بعدها شابة زغيرة وحلوة وارملة تريدها
تبقى كاعدة هنا بنصنة تروح وتجي كدام عيونكم هاي ترجية
واشلعها من اذانك سمية هنا ما تبقى عسى ما تحط خيمة
بالشارع وتكعد بيها ما تضل هنا مو بعيدة تلوف على واحد
بيكم وتلغفة من مرتة
صالح: ولجج وين تووولي هو منو الها حتى تروحلة وبعدين
بناتها يبقن عرضنة هيج نشمر لحمنة بالشارع
فاطمة: اذا كلش ولابد خلي بناتها هنا وهي خل تروح تكعد يم
مرت ابوها
صالح: استغفر الله ربي هاي شلون سالفة
سمعن المرة مو يمجن خلنها كاعدة بغرفتها وساكتة وبناتها
يمها صااادق شبيك ساكت ما تحجي شي

رد صادق وهو صافن : اني كل هذا الكلام ما يهمني تروح تبقى
اني الي افكر بي صحيح صابر مات الله يرحمة بس ضلن مرته
وبناته ومرته حامل مو بعيد يطلع بيها ولد
يعني الهم الي جنه شايلي ما خلصنا منه شدراك ما يطلعون
خلفته أسب

ع من ابوهم ويطالبون بحقهم
شدراك ما سمية اذا راحت وكعدت يم اخوها ما يبقى يزن
برأسها على حصتها وحصة جهالها
على الأقل كدام عيونه تبقى لاتروح ولاتجي

صالح:لعددد اني شنو احجي من الصبح اكلهم خلن المرة كاعدة
وساكتة وبعدين اشو انتن مستفادات مخلياتها شايلة كل
شغل البيت بعد شتردن
جبرية: مانريد تضل هنا وهي أرملة وحرة نفسها
صادق:جبرية اعرف الي ابالج بس تردين الصدك عااادي خلي
واحد من يمنا يتزوجها على الاقل تبقى حصتهم بين ادينه
صرخت فاطمة وكمزت من مكانها
: شنووو شنووو. اي كول من الاول كول هيج هو هذا دكك
تتزوجها تريد صادق والسماك صادق انفطك وانفطها واحركم
ثنيكم سوى اذا فكرت تتزوجها شيل هاي سالفة من راسك
احسن الك
رد بكل برود: وذا اريد اتزوجها شنو خايف منج مثلا لو تمنعني
لصمي حلكج واستكي احسن لاتخليني أسويها بالعناد وبعدين
لتخافين مو اني الي اتزوجها اكو غيري ميت بيها من ايام
ماجنت عد صابر وهو يتمنى يصير صابر علمود سمية
حجى هل كلام وهو يبسمر بصالح الي ضل يبلع ريكة
جبرية: تقصد منو صادق قصدك صاااالح مووو
ولله جنت شااااكة بي دخلي يسويها صدك ويشوف جبرية
شتسوي بس خلي يسويها وسمممية ما تضل هنا تطلع
الاربعين وتولي منا وذا ضلت اسوي بيك يا صالح مصيبة ما
تتسولف
صالح: ولج شبيج شفتيني تزوجتها تره صادق يتشاقة
كااافي هسه خل تطلع الاربعين ويحلها الحلال
كامت جبرية تفور من العصبية : لاااا لاااا قابل ما اعرفك
يصالح عينك زايغة على هاي وعلى ذيج وهسه تلكاها عذر
حتى فلوسنه ما يرحن وحتى يبقون كدام عيونه وما الكاك الا
متزوجها بس تحلمممم تحلم يا صالح اذا خليت الي ابالك
يصير بسسيطة اني اعلمكم
راحت من يمهم بسرعة ودفعت باب غرفة سمية بعصبية
خلتهن ينفزعن من مكانهن بدخلتها سمية كاعدة ودمعتها
على خدها مكسورة وحزينة تقدمت عليها جبرية وجرتها من
ثوبها وصارت تسحل بيها وتصيح:
بوووواكة الزلم بعدج ما طلع أربعين رجلج وصارو يتعاازمون
عليجج
كوووومي طلعي منا وووولي ماريد اشوف خلقتج كوووومي
سميه بس تحاول تفتح اديها منها وحيلها مهدود وبسملة
وسلوى يجرن بأمهم من ايد جبرية .. على صوت جبرية
وصياحها دخلو صالح وصادق وفاطمة
صالح: ولججج تركي المرررة شجاج تخبلتي شفتيني تزوجتها
تركيهاا

: ما اتركها اليوووم اذا ما تطلع وتولي منا ما اتركها اذا تبقئ
هنا تهجم بيتتتتي وتاخذك
فاطمة: اعذروها تره كلبها محروك يا مرة تتحمل تشوف رجلها
يخطط يتزوج عليها وتسكت
بقت جبرية تجر بسمية تريد تطلعها تقدم صالح وجر سمية من
أيدها ومن كد ما حيلها مهدود وتعبانة فوراً وكعت بالكاع ولزم
جبرية طلعها من الغرفه بالكفخات
: انتي خرفيتي من وووكت تخبلتي على الابنيه شجاااج امشي
كدامي انعل ابو الساعة الشفتج بيها
هي شافته ضربها على مود سمية وهي شكت ثوبها وكعدت
بنص البيت تصيح وتملخ بروحها
: تضربني صالح تضربني تالي عمري من وره سمية اسكت
الكم عبالك ولله ما اسكت الكم اذا ما سممت عيشتك
وعيشتها بس اصبرولي
صاح بيهم صادق بعد ما طكت روحه من الهوسة
صادق: اهووووو هاي شلون سالفة ما تلصمين وتسكين
هسه شفتي تزوووج شجاج
صالح: هووو انت شعلتها ووكفت تباوع جبت عمرك هيج
تشعل المصيبة وتخلي غيرك يحترك بيهاااا
صادق : شلووون بله نبتلي نحجي هي حجاية وحجيناها ابتلينة
خو ما ابتلنية وانتي جبرية شدعواج هسه عاد صالح منو
حسين فهمي وهيج ملختي روحج عليه
جبرية : اذا هيج ما هامك وبارد رووح انت تزوجها مو تريد
تهجم بيتي وتطير رجلي مني هذيج هل كدامك وتزوجها محد
لازمك
فأطمة سمعت جبرية هيج كالت وهي انتفضت على اختها
: جبرية لمي لسانك واسكتي احسن الج وخليني اكول اختي
الجبيرة ومحترمتج لا تخليني اسحلج سحل هسه
جبرية: هااا احترك كلبج خية لعد من رجلج يريد يزوج رجلي ما
اشوف كلبج احترك على اخيتج بس هسه طلع صوووتج خلي
يروح هو يأخذها علمود فلوسة
فاطمة: جبرررية مو شفتي رجلج كاتل روحه على سمية كمتي
تردين تلبسيها براس صادق هو رجلج من يوم يومة حاط عينة
على سمية من جان صابر عايش وهو ميت عليها ويحسد
بصابر عليها ومن تفوت منه ما ينزل عينه عنها وهسه هل
اجته الفرصة على طبق من ذهب تردي يضيعها بعدها زغيره
وحلوة
جبرية تخبلت من هل كلام: صاااالح هذااا الحجي صدك عووود
؟
صالح: يبووووووووي كاااااافي ولجن شجاجن فاطمة شلج بهل
كلام
فاطمة: قابل مجذبة ترة ذاك اليوم بعيني هاي شفتك وأنت
بس تريد تدفع باب الحمام وتدخل عليها
كامت تطلع كلشي شايفتة وسامعتة من سوالف خلت جبرية
تخبلت وملخت روحها .. وكل شوي تريد تكوم تهد على سمية
وصالح لازمها
صادق لزم مرته وكتلها وضلت تصيح
: الي اليحجي الصدددك تكتلووو كولو جذب انكررر صالح انت
عينك على سمية من ايام صابررر انكرررر ووهسه مرتك تريد
تذبها على رجلي حتى تعمر بيتها وتهجم بيتي
جبرية: وهو منو البدة بالسالفة وكال واحد من يمنه يتزوجها
مووو رجلج هو الي فتح السالفة خلي يتزوجها اذا هيج هامته
سمية
فاطمة: عوووفي رجلي احسن الج ولا تضلين تنغطين فوك
راسة
: ولج اني اختج الجبيرة

تكليلي تنغطين يا ادب سز
: الجبير يحترم نفسه حتى الناس تحترمة مو شفتي رجلج راح
يطير منج ركضتي علية تردين تزوجين صادق
:ليش مو هو صادق الي ميت على الفلوس مو هو صادق
الحبس صابر وضل يدك علي ورابطة مو صادق الكام يشربة
دوة لحد ما صدك خلاة تخبل. مو بعيدة صادق هو الشنقة
وكال انتحر لأن محد يدخل علي غير صادق
هو صادق من الاول رايد الموت لصابر وهل مات صابر خل
صادق يرتاح وخلي هو يشيل الحمل الي تركة صابر
هجمت فاطمة على جبرية وتلازمن من الشعر وعد وصف
صارن وحده تطلع سوالف الثانية وصالح وصادق يفاككون
بيهن لحد ما كل واحد لزم مرتة موتها كتل ودخلها لغرفتها
وسميه كل هذا ساده بابها وبس دمعتها على خدها وكاعدة
وخاف كانت ناقصة اذية من جبرية وفاطمة هنا من حّسن
ممكن واحد منهم يتزوجها بدن الحرب الحقيقة وياها بالاذية
بس حتى ما يخلنها تبقى بالبيت ويهججنها بكل وسيلة ..
يتبع

#البارت الخامس


»»»»»»»»»»

حين يموت الضمير! تغفو العقول وتثور الأحقاد وتتعطل
إنسانية الإنسان.
حين يموت الضمير! تفقد الحواس قيمتها ويصبح صاحبها
عقلاً لا يفقه، وعيناً لا تبصر، وأذناً لا تسمع، وقلباً لا يدرك.
حين يموت الضمير! يبقى فقط قلبا أسود ينبض بلا ضمير.
حين يموت الضمير! يموت كل شيء معه ..

أربعين اخوهم بعده ما عابر وهم يفكرون منو منهم يتزوج
زوجتة حتى يبقى الورث بين أيديهم وكل ظنهم انو سمية راح
توافق وتستلم بسهولة . وهو استوى اله 15 يوم من توفى

جبرية و فاطمة داخلات انذار وكل شوي يتعاركن و وحدة
تكول للثانية زوجي ما يتزوجها ..

كعدت بسملة بالباب واختها بصفها يباوعن على الرايج والجاي
بالشارع وكل وحدة لعابتها بحضنها .. صاحتهن بنية يلعبن
وياها شدة ياورد بنص الشارع وراحن يلعبن
شدة ياودر شدة
منو هي الورد
شدة شدة ريحان

يلعبن وحدهن تلث بنات دخل بنصهن مهدي وضل يخرب
لعبهن ويغلط عليهن عود هو اكبر منهن

بسملة: شبيك مهدي انت خبيث ليش تخرب لعبنه

سلوى: بسلمة كولي لأمة يخرب لعبنة

بسملة :اصلا تكنلنه وما تحاجي

وكف يقلد عليهن ويطلع بالسانة : بسملة المطية تلعب
بالقوطية سلوى الجلبة

يقلد على بسملة ودفع سلوى بالكاع فجاء سلوى من طاحت
لزمت كلبها وصارت كوة تتنفس تقربت عليها اختها بخوف :
سلوى شبيج كومي كومي

حجت بصعوبة وهي تحاول تلتقط أنفاسها

: كلبي يوجعني بسمة ماكدر اتنفس

سندت اختها وكومتها من الكاع ورجعت التفتت للمهدي
خازرتة وتتحلف بيه : اذا بيك خير ابقى هنا لاتشرد اليوم

: رد عليها يضحك : ما أخاف منج امسح الشارع بشعرج واكول
لماما تكتلج وبابا يكتلج

راحت ودت اختها كعدتها بالباب ورجعت بسرعة لمهدي
واكف عود ما يخاف منها ومنتضرها اجته تركض بدون
مقدمات دفعته وكعدت على بطنه وصارت تجر بشعرة
وضربة الها وضربه اله ملابسها تربن وشعرها انفش

اجة عدنان املح وبجامتة مرفوعة تك وتك وستوه دخل
للشارع شاف بسملة تتعارك أجة يركض بدون ما يعرف منو
الغلطان وشنو سبب المشكلة هجم على الولد ويه بسمة
كطعو تكطع






: ولك مهدي شبيك ويه بسمة ليش تضوجها

بسمة شافت عدنان صف وياها اتسبعت

: اي عدنان اضربه كتلني ملشني من شعري

عدنان يسمعها تستنجد بي وينفخ بروحة بالزايد كوة فلت
مهدي من ايدة ويصيح وهو يعدل بملابسة

:بسيطة عدنان اني اعلمك اني اعلمك بسطية

عدنان: ولله اكتلك بس تحاجي بسمة بعد

رد علي ذاك من بعيد : اذا زلمة اطلع لرأس الشارع وراح دخل
للبيت يفزع بأمة

اجة عدنان وكف يم بسمة وهو يتفيك

: كتلتة الج كتلة تسوى عمرة بس يحاجيكم بعد بس كوليلي
علي وشوفي شلون اموته تموت

: شكراً عدنان انت حباب احسن من مهدي مدري شمالة
يخرب لعبنة ويخبث علينه نهار كلة

:بعد ما يحاجيج اني توبتة بعد فنه يتقرب الج على هاي الكتلة
بعد بس يشوفني يشرد

بقى واكف يمها ينفخ ويهمبل وهو كل عمرة 11 سنة
بسملة اخذت اختها ودخلت للبيت وسلوى تسحب النفس
بكل صعوبة ومتأذية من الوكعة .. كانت جسمها كلش ناعم
وحتى تبين أزغر من عمرها بهواي
دخلن للغرفة يم امهن الي خلال أيام تحسها كبرت فوك عمرها
وغاطة بالاسود وحامل وتعبانة ..
دخلت جبرية مسوية هجوم ولازمة مهدي بايدها

جبرية : ولججج بسيمة شبيج ويه مهدي شمسويلج وهيج
كاتلته ومفزعه عدنان يكتلة

وكفت وردت عليها: يستاهل الكتلة خرب لعبنه وخبث علينا
واحنه كلشي ما مسويلة ودفع سلوى بالكاع

:وتفزعين عليه عدنان يكتلة بعدج هل طولج وتخلين ولد
الشارع يكتلون ابن عمج اذا كبرتي شتسوين تصخمين وجهنه
يمكن

دخلت من باب الغرفة وهي تفور وتريد الزلة على سيمة
وبناتها
لزمت بسملة من كصيبتها وصارت تعت بيها . كامت سمية
من مكانها تحاول تفتح شعر بنتها من ايد جبرية

: ابن عمج تخلين ابن الجيران يكتلة ولج مو من يجي عمج
اخلي يزينج صفر حتى توبين بعد حتى للشارع ما تطلعين هل
وكاحة الشايلتها شنووو الكاع ما تحملج

سمية تدفع بجبرية وجبرية دفعتها بغل :
اددددبي بنتج احسن الج لا اموتها تموووت مو كاعدين على
كلبي انتي وبناتج ما توولين لاهلج وتخلصينة منج انتي نقمة
بهل بيت هذا نقمة
رجلج ومات بعد شعندج باقية.. تقربت عليها لزمتها من كتفها
وصارت تأشر وتحجي تحاول تفهمها .. بس يطلع الاربعين
ترحين لاهلج مفهوم لأن يرودن صالح وصابر ياخذون بناتج منج
ويطردوج احسن الج أخذي بناتج بدون ما يدرون وروح اكعدي
يمهم واني انطيج فلوس

دمعت عيون سمية فهمت نص كلامها وهزت رأسها بقلة
حيلة .. تركتها وطلعت للعصر بسملة هم كعدت بالباب هي
واختها ويه اطفال الشارع فات عدنان منهم رايح لرأس
الشارع يشتري من المحل .. بسمة تردين اشتريلج وياي






بسمة:بس اني ماعندي فلوس ما اريد

رد عليها بح

نان: لا اني عندي امي انطتني اني اشتريلج من
فلوسي

هزت راسها برفض: لا ما اريد اني ما احب احد يشتريلي من
فلوسة غير ابوي اني من تنطيني امي اشتري

:ليش بسمة اني عندي فلوس .. طلع الفلوس من جيبة
يشوفها : شوفي عندي يكفن راح اشتريلج لفة حب لو شنو
تردين قمر الدين احسن الحب يسويج ثولة

جاوبته بعفوية لعد انت ليش كل ما اشوفك تاكل حب يعني
انت ما تصير اثول

جاوبها جواب مو يم كلامها : لا عادي اني رجال
يلة راح اشتريلج قمر الدين ومن انتي تشترين عود اخذ منج

تركهم وراح اشترى لفة حب وقمر الدين وناسي مهدي باقي
متحلف بي ومنتضرة يطلع شافة راح يشتري وكفلة بالركن هو
وجماعتة من رجع عدنان من المحل لزمو مهدي وجماعة
وتكاثرو علي طشرو الحب بالكاع وكتلو ولزمو نزعو ملابسة
خلو مصلخ واكف براس الشارع واخذو ملابسه وذبوهن
بالخياس
بقى واكف يبجي وحاير بنفسة واكف بلا ملابس وخاتل بسد
الحايط
ولايكدر يتحرك من مكانه ويروح يأخذ ملابسة من المجرة لأن
كلشي ما لابس
وبقت بسملة كاعد تباوع منتضرة يجي ويجيب قمر الدين الها
من شافته تأخر مشت للمحل تشوفه وين صار
وبس وصلت للركن اجاها صوته وهو خاتل ومخلي ادي يضم
بجسمة ويبجي

بسملة بسملة
التفت على الصوت شافته والحب مطشر بالكاع : عدنان
شبيك منو وياك

جاوبها فشلان والدموع تارسة وجها

عدنان: شفتي مهدي جايب جماعته كتلوني وذبو ملابسي
بالخيس وطشرو حبي بالكاع اني اعملة الا اموته كتل

حجت مقهور عليه
: مهدي شكد حقير الا اكتلة

: لا خل يولي خاف هم يكتلج بسمة حبابة طلعي ملابسي من
الخيس وجيبيهن الي

راحت للخيس تباوع ملابسه مدمرات وهي مبدلة وملابسها
نضيفة حارت شلون تطلعهن

اييعع عدنان اتدمر اذا لزمتهن وامي ما تقبل

: حبابة فدوة ابقى مصلخ؟ والناس تضحك عليه اني مو
اشتريتلج حبابة

: اوكف اوكف
ضلت تتلفت تدور شي تشيل الملابس بي ما لكت انجبرت
تمد أيدها وتلزمهم بطرف أصابعها ونطتهم لعدنان لبسهن
وهن بخياسهن
ورجع هو وبسملة يمشون يريد يروح لبيتهم طلع مهدي من
البيت صاح بسملة

: تعاااالي هنا ولج شعندج تمشين ويه هذا اليوم اخلي ابوي
يموتج تموت

عدنان روحه طالعه من مهدي وشسوة بي نام فوكة وصارو
بنص الشارع امالخ لزم مهدي موته كتل
طلعت جبرية وشافتهم عاطت بنص الشارع

: ولك عدددنان عوووف مهدي

تقربت جرت ابنها من جواه وهي تسب وتغلط
راح عدنان لبيتهم مر دقائق ودخلت ام خالد تعاتب بجبرية
ليش هيج ابنها مسوي بعدنان






: اكلج خية ليش نخسر جورتنه من وره الجهال هم زعاطيط
يتعاركون ويتراضون وبعدين عدنان هو الي بدة وضرب مهدي


:اي بس مو يلم جماعتة ويصلخو بنص الشارع لو ما بسمة
تطلع ملابسة من الخيس جان بقى حاير بروحه هي هاي هم
سالفة يا ام مهدي

عاينت الي تخزر بعيونها

:هي المشكلة هاي كلها من وره هاي ابسمية العرمة اني
اعلمج اذا ما شعلت كصايبج وتوبتج من هاي الوكاحة
اسطبريلي نوب راح نتخارب ويه الجيران من وراج بعد اذا
شفتج طالعة بالباب الا اكسر رجليج

ام خالد: دعوفيها عيوني هي طفلة ومهضومة على ابوها قابل
متعمدة هم ولد وكحين

كعدت ام خالد بعد العتب وشربت جاي وسولفن وراحت
مر اليوم وجبرية تخزر بسملة وتريد الزلة حتى تضربها وقت
المغرب رجعو صالح وصادق من شغلهم ومثل كل يوم كعدو
يتعشون سمية بغرفتها وبناتها جاعن لفت نفسها وطلعت
حتى تخليلهن اكل كاعدين متجمعين بالهول فاتت منهم
حتى تدخل المطبخ .. صارت عين صالح عليها على طول
الطريق ما نزلت عينة منها
انتبهت جبرية اله عيونها صارت بكصتها من نضراتة

: صاااالح

فز من صفنته على صوت جبرية

: شبيج شكو تصحين كاعد براس الشارع ؟

: وين عيونك ساهت اشوف رحت بغير عالم

تركها بدون رد وسكت منها كامت من مكانها تفور صاح
وراها

: وين رايحه هم سويلج مشكلة عود

دخلت المطبخ وتقدمت على سمية بغل وصارت تحجي
وتأشر

: شعندج طالعة من غرفتج شتردين

أشرت الها سمية بمعنى : البنات جاعو واريد اعشيهن

جبرية: شوفي وافتهمي كلامي مرة الثاااانية حدج للعصر
تطلعين من الغرفة وره العصر الباب ما تعتبي تفهمييين لو لااا
وعشى بناتج من العصررر دخلي للغرفة اذا طلعتي بعد هيج
وكت ما تللووومين الا روحج

صفنت بيها سمية ما مفتهمة كلامها وهل شي خلة جبرية
تفور بالزايد

: يررربي انوب ما تسمع ولا تفهم شسووووي
رجعت تأشر الها وتكرر كلامها

صبت سمية عشى ورجعت للغرفة شوي ودخلت وراها جبرية
وفاطمة كعدن يمها بهدوء وكل وحده منهم تحجي وتأشر حتى
يوصلن الها الي يردنة

جبرية: سمية من يجون صالح وصادق بعد لا تطلعين منااا ابد
ابقى بالغرررفة

فاطمة: انتييي مو تحبين صااابر ؟

هزت راسها بمعنى اي

فاطمة: ذول يردن ياخذون بناتج منج ويطردوج لاهلج ترحين
وما يخلوج تشوفيهن بعد من يرحون بااجر للشغل أخذي بناتج
وروحيي رووووحي لبيت اخوج احسن واحنه اني وجبرية ننطيج
فلووس

رجف كلب سمية من كلامهم الي فهمت اغلبة ..
جبرية: ذووول يكولون سمية ترووح بعد ما تبقى هنا نأخذ منها
بس البنات ومن تجيب هم ناخذ ابنها الي تجيبه
ترررحين احسن لو تبقين هنا ياخذون جهالج ويطردوج

بقت ساكتة بدون رد فعل لاتكدر تصدك ولا تكدر تجذبهن
بقت حايرة وهن من أيسن منها تفهم عليهن تركنها وطلعن ..


ثاني يوم الصبح ندك الباب عليهم .. طلعت جبرية تصيح

جاااي منووو
فتحت الباب ونخمش كلبها من شافت الشرطي بالباب

: تفضل خوية شرايد

: هذا بيت صالح وصادق مرهون

ابتلعت ريكها بخوف وردت : اي اي هو بيتهم خير خوماكو شي


: مطلوبين للاستجواب بالمركز بقضية انتحار صابر مرهون
وإذا موجودين ياريت تصيحيهم

: عيني هاي انت كلتها إنتحار هو شنق روحة صالح وصادق
شعليهم

: اختي هاي مو شغلتي شغلتي اجي ابلغهم بالاستدعاء

: بس هم هسه بشغلهم مو هنا

: اذا ممكن تنطيني عنوان شغلهم

:بالشورجة يشتغلون.. انطتهم عنوان شغلهم
خله وراح سدت الباب وراه وهي ترجف ووجها صار اصفر

: عزا العزانة صالح وصادق شعليهم جاين يردوهم ولجج
فاطمة فاااطمة تعاي سمعي

نزلت فاطمة من فوك السطح
: ها شبيج
: خايبه اجى شرطي يريد صالح وصادق يكول مطلوبين
للتحقيق مدري شنو على موت صابر

:دهررر لعد شعليهم هم
: شدررراني اني شدراني ولج خاف هم متورطين بموته

: جبرية شنو متورطين مو كدامج دخلنه علي هو شانق روحة

: ما ادري ولله دخت لعد شنو يردون منهم

:خاف يردون يسالوهم كم سؤال

: اي اي بلكي صدك

راح الشرطي لعنوان شغل صادق وصالح وانطاهم التبليغ ولازم
يحضرون بالمركز

رجف صادق من سمع سالفة تحقيق و/س و /ج
حجى بتوتر وخوف : لعد هم مو حققو بالمستشفى وعرفو
منتحر بعد هذا التحقيق شنو

الشرطي: اخي مو شغلتي هاي تحضرون وتعرفون شنو سبب
استدعائكم

صادق: زين شوكت لازم نحضر

: هسه فوراً تجون ويانة

بقو يتبلعمون ومتوترين وراحو وياهم وصلو المركز وكعدو
ينتضرون

صالح: صادق شجاي يصير معقول راح نتورط

صادق: وقابل احنه شانقي هن كم سؤال أن شاء الله ونروح

صالح: ما مرتاح ابد

بعد الانتضار والقلق انتفح باب الغرفة ودخل الضابط
بدخولة هم كامو من مكانهم دار على المكتب وكعد على
الكرسي يباوع على الأوراق الي كدامه شال رأسه عليهم
شافهم واكفين اشرلهم بالجلوس






: تفضلو كعدو

كعدو وهم واحد يباوع للثاني بتوتر الضابط بقى يباوع
ويتفحص الاوراق بصمت خله قلقهم يزيد حجى صالح
بارتباك

: اءءء حضرت الضابط اجانه استدعاء وطلبونه هنا صاير شي
بخصوص قضية موت اخوي

شال رأسه الهم الضابط وايد لازم بيها ورقة والايد الثانيه
مخلي عكس أيده على المكتب ولام الكف
رد عليهم : صالح وصادق مرهون اخوان المرحوم صابر مرهون
؟

: اي اي نعم احنه اخوانة

: انتو اخوانه الأشقاء لو من غير ام

صادق:لا حضرة الضابط ابوي ما متزوج غير امي فقط وصابر
اخونه الشقيق

هز راسة ورد : الورقة الي كدامي تقرير الطب العدلي وصلتني
اليوم

هزو رأسهم بدون كلام كمل الضابط كلامة بشك واتهام غير
مباشر

:بالتقرير تبين اكو اثار تعنيف على جسم لمتوفي

رد صادق بطريقة سريعة وقلق
: يعني شنو اثار تعنيف شلون شنو قصدك حضرة الضابط

رد الضابط بكل هدوء
: اني هنا الي أسأل واستفسر وحضراتكم تجاوبون على الأسئلة


صالح: عفوا بس شوي يعني من كلت اثار تعنيف ما فهمنه
قصدك

ضابط: اثار تعنيف على جسمة اثار ضرب يعني مضروب بشي
مثل صوندة أو وراير لأن اثر الضربات صاير على طول ضهرة
وادي و وحدة من رجلي من جهة االفخذ اثار ضرب قوية
وصايرة زركة
وضربه باصبعة هم كلش قوية والاضفر مشلوع
إضافة إلى جرع من الأدوية المهدئات ونوع الأدوية هذه
تستخدم فقط الي عدهم امراض عقلية
وما استبعد ابد انو يكون أحد شانقة حتى يبين القضية قضية
انتحار اني استدعيتكم حتى استفسر اكثر واعرف وياريت
تكون صريحين واضحين وياي وتجاوبوني بكل صراحة على
اسئلتي وكونوا على ثقة اي كذب أو لف ودوران مراح يكون
بصالحكم ..

حاول صادق يسيطر على نفسة ويخفي توترة وارتباكة ويبين
أن هو مستنكر وما قابل على كلام الضابط

: حضرة الضابط افهم من كلامك جاي تتهمنه لو شنو يعني
احنة ناس مكسورين على اخونه الي أربعينة ما طالع
ومنتضرين تقرير الطب العدلي حتى نفهم ونعرف سبب
انتحارة وحضرتك جاي تحجي ويانه بصفة متهمين

رد الضابط علي بشك لأن التوتر كان واضح بصوت ونبرة
صادق

الضابط: شغلي يحتم عليه اخلي الجميع بدائرة الاتهام واتخذ
الإجراءات الأزمة واستجوب اي شخص قريب من الحدث
واستمع إلى أقوالة حتى اعرف الجاني أو المتسبب صابر مات
بضروف غامظة منت*حر شانق نفسة تقرير الطب العدلي
الي وصلني بيبين اثار ضرب وتنعيف على جسدة إضافة إلى
جرع قوية من الأدوية الي ممكن تدفع الشخص إلى الانتحار أو
التفكير بي
اني جاي اسال واريد أجوبة واضحة وصريحة منكم
واسئلت

ي موجها الكم انتو الاثنين واني حاليا ما موجه الكم
اتهام بشكل واضح اني جاي استمع الى اقوالكم لأن انتو
الأقرب اله






السؤال الاول : علامات التنعيف الي كانت على جسدة انتو
تعرفون شي عنها أحد منكم ضاربة او معنفة

صارو واحد يباوع على الثاني بارتباك رد صادق يجاوب جواب
يضن انو ممكن راح بنفعنة

: حضرة الضابط يعني الصراحة صابر قبل انتحارة بأيام صارت
مشكلة بيني وبينة والصراحة تضاربنة بوقتها

:يعني تضاربتو قصدك انت هو هم ضربك ؟

: اي هي مشكلة صارت بالبيت وتلازمنه وتضاربنة

رد الضابط ما مقتنع بكلام صادق: بس اثار الضرب ما كانت
اثار بوكسات او اثار مشكلة الآثار هي اثار ضرب على الجسد
بصوندة أو كيبل يعني هو الوحيد المضروب

صادق: مو. مو هو يعني اصغر مني من مد ايدة عليه اني
تعصبت شلون اخوي الازغر مني يمد ايدة عليه الصراحة
جريت كيبل وضربتة كم ضربة لكن صدكني وراها بشوي بس
هدئت لعنت الشيطان الي خلاني هيج سويت ويه اخوي
ورحت اعتذرت منه وتصالحنة

: اكدر اعرف سبب المشكلة ؟

:على فلوس وشغل وهيج يعني مسألة عائلية

: اني مجاي اتدخل بخصوصياتكم حتى تكلي مسألة عائلية
اني ضابط وجاي أسألك وانت لازم تجاوبني بالتفصيل

:على فلوس وبيت يريد يقسم بيت ابونا لو نبيعه حتى يعزل
بيت وحدة

:هو متزوج ؟

: اي نعم متزوج

الضابط يسأل وهم يجاوبون

: وبالنسبة للادوية الي يشربها

صادق: أدوية شنو ؟

: التقرير يبين انو مأخذ جرع أدوية مهدئات وأدوية ثانية للي
عده‍م أمراض عقلية

صادق: ما نعرف شي عن هذه الأدوية اول مره نسمع بيها
هسه

: يعني صابر كان يأخذ هيج أدوية بدون علمكم

صادق: اكيد لأن اول مره اسمع بيهم

الضابط : وصابر ليش حتى ياخذ هيج نوع من الأدوية

رد صالح بعد ما كان بس مستمع

: هو جان عصبي حيل لدرجة حتى مرته وبناته كان من يلزمهن
يجرم بيهن وكوة نخلصهن منه يمكن لهل سبب

: لكن هيج نوع من الأدوية ما ينباع الا بوصفة طبية مستحيل
يكدر يحصل علي بدون وصفة طبية يعني هو مثلا مراجع
طبيب وكاتبلة هيج نوع من الأدوية

صالح: ما ندري هو اصلا كان شبه منعزل وقليل يختلط بينه

الضابط أكثر كلامهم ما صدكة لأن كان التوتر واضح ومبين
بشكلهم وكلامهم وبعد طول الكلام والاسئلة والاجوبة كال
الهم

: انتو راح تشرفونه هنا لبين ما اتحقق من كل خيوط القضية
وتوصل للاسبب الرئيسي للانتحار
مضطر اتحفظ عليكم هذا الوقت






انتفظ صادق وصالح على كلام الضابط: حضرة الضابط احنه
بشنو متهمين حتى تتحفظ علينه تره احنه قبلكم نريد نعرف
سبب الانتحار الي مات هو اخونة

رد بكل برود : اني استدعيتكم حتى استمع لاقوالكم لكن بعض
اجاباتكم مو مقنعة إضافة إلى الارتباك الواضح عليكم وعموماً
لتخافون اذا انتم مالكم اي يد بانتحارة مجرد كم سؤال
وتطلعون كلها يوم او يومين وخلا هل فترة مضطرين تبقون
هنا

صالح: بس احنه اجينه من المحل يعني الأهل راح يبقون بقلق


الضابط: تكدر تتصل بيهم وتبلغهم

تقدم صالح على التليفون شالة ودك رقم البيت

بعد كم رنه جاوبت فاطمة : الوو منو

صالح: اني صالح

فاطمة: ها عيني صالح أكلك اجه شرطي يسال عليك وجبرية
ملخت روحها هم اجوكم للمحل

صالح': احنه بالمركز هسه اني وصادق

فاطمة: عزززة شصاير وليش

صالح: مو وكت افهمج بس احنه بالمركز راح نبقى اليوم
يحققون ويانه بقضية انتحار صابر خابرت انطيكم خبر حتى لا
يظل بالكم احنه بمركز **

كمل كلامة وسدة وفاطمة صاحت بصوت
عالي وهي تمشي متوجهه لغرفة جبرية: جبررية الحكي ولج
صادق وصالح بالمركز ماخذيهم

نفزعت جبرية من مكانها : عزززة ليشش

فاطمة: اليوم ما يخلوهم يطلعون صالح يكول يحققون ويانه

: عزززة بعيني اي ولله شلووون حظ ياربي مات وما خلصنه
شنو هم موتو قابل شلون ضييم يربي
كله من هاي البومة هي ورجلها

فاطمة: شلون بينه هسه شنو نسوي

جبرية: اني ادري شنسوي ولله ما ادري خل ننتضر لباجر
ونشوف بلكي يطلعون اذا ما طلعو اخابر سمير يشوف محامي
لو نروح الهم

تقربت فاطمة بتوتر وخوف تسأل: معقول صادق اله ايد
بموت صابر اني خايفة لا يكون هو مسويها

باوعت الها جبرية بشك: ولله مادري شكلج انتِ اعرف برجلج
ما جايب كدامج هيج طاري ؟

فاطمة: لا ولله ابد حتى اني سألته وحلفته حلف مامسويها
يكول مستحيل اقتلة لو اخلي يموت ابد اصلا وره موتة ولله
العضيم دوم الكاه يبجي ويلوم بروحة يكول من وراي موت
نفسة

جبرية: لعد أن شاء الله يطلعون بلكي

فاطمة: وهم الشرطة شيردون منهم لعد

: واني شدراني شدراني مو تشوفيني كاعدة يمج ادري اني
شيردون بس اكيد يسألوهم ليش هيج سوة لأن هم اخوانه
وعايشين وياه

مر اليوم عليهن بقلق. وتفكير ويذبن بالوم على سمية الي
سادة باب غرفتها وعايشة بحزنها

صالح وصادق بالحجز صافنين وكل واحد يفكر بالي راح يصير
مر الوقت ورجع الضابط طلبهم وكرر عليهم تقري

با نفس
الاسئلة والأجوبة كانت نفسها ونكرو معرفتهم بالادوية
إجاباتهم كانت غير مقنعة نهائيا السبب الي خلة الشك يدور
حولهم أن ممكن يكون الهم يد بانتحارة ويزيد تمسك الضابط
بحجزهم وتحويلهم إلى قاضي التحقيق مر اليوم وهم قضو
ليلتهم بالحجز
باليوم الثاني جبرية انطت خبر لاخوها واخذتة وراحت حتى
تشوف صادق وصالح بالحجز
كعدت جبرية بغرفة الضابط تفرك بايديها بتوتر دخلو ثنيهم
للغرفة
كامت جبرية بلهفة مصحوبة بخوف

: شصاير يمعودين ليش حاجزيكم

كعد صالح وهو يرد عليها : تقرير الطب العدلي لصابر يكولون
اثار تعنيف على جسمة وهم بجسمة جرعة أدوية مدري شنو
وجاي يستجوبنة لأن احنه الأقرب اله بس ماعرف ليش حولونه
لقاضي التحقيق لسماع اقولنا

حجى اخو جبرية الي جاي وياها: واثار الضرب منين اجته يعني
أحد ضاربة لو شنو

صادق خزرة حتى يغير الموضوع وهو افتهم علي وغير
الموضوع : عموما أن شاء الله بسيطة وتطلعون وإذا اضطر
الأمر أوكل محامي الكم

صالح: ما تقصر بس هسه بعدنه ما مبين شي خلي نشوف
الاستجواب وين يوصل حتى نشوف الموضوع

جبرية: زين هذا قاضي التحقيق شنو يعني شراح يسوي يحكم
عليكم تطلعون لو تبقون لو شنو

صادق: كتلج ما ادري بعد الي اعرفه صابر هو انتحر قابل احنه
قاتلي كلها يومين هيج ونطلع سهلة أن شاء الله
انتي لا تبقين بقلق وطمني فاطمة وياج لاتبقى بقلق

باوعت لصالح بشماته

جبرية : شفت صالح شفت حوبتي ما تخطي بس حركت كلبي
ربك انطاها الك بالكصة

صادق: هسه وكتج انتي وكت هل حجي هذا يله كومي روحي


كامت وهي تكول : جبتلكم اكل بقى بره عود اخذو
سلمت وطلعت ورجعوهم للحجز

مر يومين وتحولو صادق وصالح وكفو أمام قاضي التحقيق
كرر عليهم الاسئلة وهو يباوع للتقرير والصور الي وصلن من
الطب العدلي يبين اثار الضرب على جسم صابر صادق
وصالح بقو مصصمين على اقولهم ونكرو معرفتهم بالادوية
وبعد سماع اقوالهم أصدر أمر بطلب زوجة صابر وبنتة لسماع
أقوالهم ..

كاعدات جبرية وفاطمة وثنيهن يفكرن بالي جاي وشنو راح
يصير اجى مهدي يركض يصيح على أمة

: يما شرطي بالباب

نفزعن من مكانهن ثنيهم : يا ستار شكو بعد شيردون

رفع أكتافة بعدم معرفة: مادري كال اذا احد جبير موجود
صيحية

طلعت متوجها للباب وهي تخلي عباتها على رأسها بدون
حجاب طلعت للشرطي

جبرية: تفضل خوية شرايد

: سميه طعمة و بسملة صابر يسكنن بهذا الدار

: اي هنا خير خويه شرايد

_ بلاغ الهن للحضور سماع اقوالهم

توترت جبريه و فاطمه ورا الباب لطمت ع خدها

جبريه : اءءءء اي اي بس عيني ترة سمية خرسة لاتسمع ولا
تحجي وبسملة بعدها طفلة عمرها 8 سنوات

الشرطي: هذا مو شغلي هذا استدعاء ولازم يحضرن باجر أمام
قاضي التحقيق

: ماشي عيني انطيني الورقة ووقعها

_ لا لازم هي توقع على الضبط ..

يتبع

#البارت_السادس

----------

جرت جبرية نفس بقهر وخوف وردت
:هسه اصيحها الك

دخلت للبيت حاجتها فاطمة مرعوبة
: ولج شلون بينه
جبرية : واني شبيدي قابل خل اروح أصيح هل علة وأشوف
تاليها

دفعت باب الغرفة حيل ودخلت وصارت تأشر لسمية
:كوومي يردوج بالباب

سمية تسأل بعيونها شكو

_ تعالي وقعي مات وما خلصنا نوب ضليتي انتي هم أكبر من
هم رجلج منين اتلكاها من الشرطة الي جرجرت زلمنة لو منج
الي ساعة الساعة تلغفين واحد منهم
صاحت بيها بصوت عالي وتأشر بايديها
كوووومي فضيني

لفت نفسها بعباية وطلعت تباوع للشرطي وتتسائل والشرطي
أشر الها بالقلم والورقة بمعنى توقيع ولازم تحضرين ما فهمت
منه صار يأشر ويحاول يفهمها فهمت شوي من كلامة لكن
ماعرفت توقع لأن ما تقرأ ولا تكتب
طلع الها حبر وخلاها تبصم على طلب الاستدعاء
سدت الباب ورجعت تدخل للغرفة حزينة ومكسورة وبطنها
جبيرة وتعبانة حيل جرتها فاطمة من عكس أيدها للطارمة
باوعت كدامها مدات من ذني الثكال وياهن حصران
جرت فاطمة الصوندة وصارت ترش عليهن ولزمت الفرچة
مال غسل وتأشر لسمية

: بفاتحة رجلج الفراش صار خيسة من الدوس هذا كله هسه
ينغسل تفهممممين لو لا

ردت عليها سمية انو بطنها توجعها وتعبانة حيل وما تكدر

: اكلج صارلج من موتت صابر لليوم ما تطلعين من غرفتج
شنو حلتلج السالفة الضاهر؟ معلك بخيط الجاهل لتخافين
كلشي ما يصير بيج هسسه تغسليهن مو خدم عند الخلفوج
غسليهن يله

جرت نفس بتعب من ناس الضمير ما يعرف طريقة لكلوبهم
السودة سلمت أمرها إلى رب العالمين ودنكت شالت الفرچة
ونزلت بصعوبة وهي لأزمة بطنها من الاسفل على الفراش
الي بالكاع صارت تجر بي وتفرشة بالكاع
شافنها بناتها صارن يجرن ويفرشن وياها ويساعدنها بالغسل
بسلمة كعدت تجلف بالمدة ولازمة الفرچة بثنين اديها و
وسلوى جابت مكناسة وصارت تجلف وياها
وسمية ترش وياهن بالصوندة
والمدة الي يكمل غسلها يتساعدهن تلاثتهم ويلفنها لكن
نشلع كلبهن لأن المدات ثكال
بقن لحد ما كملن غسل كل الفراشات وملابسهن كلها تبللت
دخلت الغرفة بدلت لبناتها وهي بدلت وكعدت بتعب مددت
على ضهرها ونشغت من الوجع الي صار عدها بضهرها
بقت متددة تقريبا ساعة ورجعت عليها فاطمة متخصرة






فاطمة: وانتي من غسلتي الفراش ما عرفتي تشري شغل
الخايسات هذا بطلي ومن تسوين شي كملي للأخير الفراش
تصفى ماية كومي شري على الحايط

تحجي وتأشر وسمية تباوع بتعب بسلمة سمعت كلام فاطمة
وردت عليها

: ماما مريضة بطنها توجعها واحنه غسلنة الفراش انتي شري

فاطمة: انتي ام لسانين تسكتين لو اعلكج من شعرج حاجي
امج يله وكومن شرن المدات
سمية فهمت فاطمة وجرت نفسها بتعب وكامت شالت
الحصران وشرتهن من اجت تشيل المدة ابد ما كدرت
وحست كأنما شي وطك بطنها تركت المده من أيدها ولزمت
بطنها بوجع ورجعت تمشي بصعوبة للغرفة
بقت طول الليل تتوجع من بطنها وبأي ساعة ممكن تولد وهي
بنهاية الثامن كلها يومين وتدخل بشهرها
لحد ما طلع وجه الصبح وهي ما غفت الها عين
كامت طلعت من الغرفة رايحة لتواليت ورجعت دخلت
المطبخ لكت جبرية حاطة قوري الجاي واكفة على الطباخ
اشرتلها بعصبية

جبرية: كعدي بناتج وفضنها خل نولي
تجاهلتها ورجعت للغرفة غسلت لبناتها وبدلت الهن وريكتهن
وهي تتحرك بكل صعوبة وألم وكل شوي تغمض عيونها وتجر
نفس قوي

قبل ما يطلعن حاجتها جبرية بتوعد وحقد وهي تعرف ما
تسمعها وممكن ما تفهمها : سمية والسماچ سمية اذا كلتي
شي ضد صادق وجابر ونحبسو كفيلج الله اشوفج ايام اسود
من ظلام الليل اسود من الفحم

ردت بسملة : عما شبيج ويه ماما ليش تتحلفين بيها
شمسويتلج امي خطية ولله

باوعت الها جبرية : انتي انتي ما لازمة كلبي غير منج تذبين
الگوم عالگوم سمعي ولج من يسألوج شي كولي عمو صادق
وصالح جانو يحبون بابا ومن مات صارو يبجون علي حيل
مفهوووم

ردت بطفولة: هو احنه وين رايحين

جبرية:رايحن لواحد راح يكوم يسأل بيج انتي واختج وامج

بسملة:شنو راح يسألونة

سكتت جبرية لان ماتعرف شنو الراح يسألو لكن تعرف راح
يسألون عن موت صابر

جبرية: من يكولوج ابوج شلون مات كولي شنق نفسه موت
روحه هو

طفلة بهذا عمرها هيج كلام ينحط بأذنها انو ابوها شنق نفسه
ما عرفو هم جاي يقتلون طفولتها ويملون اذانها بسم وكلبها
بحقد عليهم

سمية گاعدة على كراسي الانتظار گدام باب القاضي وبناتها
بجانبها مايعرفون شنو الي جاي يصير وبس يباوعون بعيونهم
وسمية بالكوة متحملة الالم الي تشعر بي






شويه و جابوا صادق و صالح وكفو وياهم لكن الشرطي منع
اي كلام يصير

بينهم وبين سمية وبناتها
صادق واگف و يخزر بسميه تحذير شويه وصاح الشرطي
حتى يدخلون دخلو وكفو أمام قاضي التحقيق لسماع الأقوال
اول سؤال كان موجه لسمية الي عرفو هي من الصم والبكم
وكان موجود شخص يتفاهم وياهم ويفهم القاضي

_ سمية طعمة صابر مرهون زوجج ؟

أشرت اله بمعنى نعم رجع يسأل

: صابر مرهون قبل وفاته هل كان بكامل قواه العقلية لو كان
عنده خلل يعني

ردت علي بالاشارة بعد ما فهمها الخبير

: صابر ما فاقد عقلة بالعكس رجل على باب الله وفقير ولهذا
السبب يكلون عنه مخبل بس هو مو مخبل ابد ومابي شي

هز راسه القاضي يباوع ع الأوراق الي كدامه وكال

_ زوجج صابر كان عصبي حيل يضربج انتي أو بناتج بسبب
عصبيته الزايدة أو تجي حالات تخلي يفقد

أشر الها الخبير بالسؤال دمعت عيونها واشرت اله

_ لا عمره ما رفع ايده عليَّ لو ع بناته احسن زوج واحن اب

نطقت اخر كلامها وبجت هز راسه بأسف القاضي وكمل
اسئلته

: كان يتعاطى شي مثلا يشرب

هزت راسها بالرفض

القاضي: شنو الادوية الي كان يشربها يعني شايفته يشرب
ادوية لو لا

ردت علي بالاشارة: لا ماكان يأخذ أدوية مابي شي بس مرة
نضرب برجلة حيل وصالح جاب اله دوة كال مسكن وصار
يشرب منه حتى يسكن

باوع القاضي لصالح الي صار يبلع ريكة بخوف من كلامها

رجع القاضي وسأل بسملة : حبيبتي سولفيلي على ابوج قبل
ما يموت شلون كان وياكم

بقت تتلفت وتباوع على امها وعمامها بطفولة ساكتة
مستحية خايفة مستغربة الوضع والمكان
كرر عليها السؤال القاضي وردت عليه

:بابا حباب كلش ويحبنه ويشتريلنه اشكال ويلعبنه اني واختي
سلوى

:يعني ما كان يصيح عليكم ويضربكم

:لا ابد ولا يضربنة ولا يصيح.علينة بابا خطية اني ابجي علي

:ليش حبيبتي تبجين

دمعت عيونها صارت ترد بكل عفوية وطفولة وهي تشكي
للقاضي وتكلة

:بابا حباب ويصلي ويحبنه ويشتغل ويشتريلنه كلشي ويحبنه
اني وسلوى وماما بس ماكو هذا عمو صالح وصادق يكتلو
ويخلو يبجي كل يومية ويصيحون علي المخبل المخبل وماكو
هذا عمو صادق كل يوم يكتلة وجابه من الشغل يجر بي جر
حيل ويضرب بي وحبسة بالمخزن كوم ايام حابسه وقافل
الباب وبابا كالي اني جوعان وعطشان انطيته ماي من جوة
الباب ها وهذا عمو من يشوفنه كاعدين اني وماما وسلوى يم
الباب يصير يصيح علينه بس اني دفعت عمو ودخلت لكيت
هيج رابط بابا من أيده رابطه حيل ومخلي بس نايم ويكتله
ويخلي يبجي واني ضليت محد يقريني قراءة وأخذت ثنين
بالاملاء وبعدين عمو صالح فتح باب المخزن لكينه بابا
متعلك وبركبته حبل وكمنه نصرخ ونبجي علي






القاضي يستمع لكلامها بصمت وتركيز ويباوع لصالح
وصادق الي صارو يتبلعمون وبعد الاستماع لكلامهم
طلب منهن يطلعن خارج الغرفة لأن خلص شغله وياهم وبقو
هم بالغرفة
بالحظات صادق من شاف نفسه تحاصر وممكن السالفة كلها
تتلبس برأسه قرر بمكر وحيلة يتمسكن ويغير اقوالة

صادق :حضرة القاضي اني اريد اعترف

صالح فتح عيونه تفاجئ من كلام صادق يتساءل بينه وبين
نفسه شنو الي يريد يعترف بي صادق معقول يعترف بالادوية
ويخلينة ننسجن ؟

القاضي ركز على صادق وكله : تعترف بشنو

لبس صادق ثوب المكر و الحيلة و بداء بالتمثيل و تقمص
شخصية الي ما يريد ينطي باخوه بس مضطر يحجي وحجه
بقهر مصطنع

صادق: سيدي كل الكلام الي كلتة اني مو صحيح وهسه اريد
اعترف و احجي الصراحة

القاضي:تفضل كول شنو الي عندك

صادق: كل شي كلته الك وللضابط كنت اتوقع الموضوع
بسيط ومجرد استجواب بسيط ونطلع فما شفت اكو داعي
انطي بإخوي لأن مهما كان هذا دمي ولحمي مو سهلة علية
اكول عنه شي سيئ وهو ميت بس الي شفته هسه
والموضوع بده يكبر وممكن ننسجن مضطر احجي الحقيقة
صابر كانت عندة حالة نفسية وعنده خلل بعقلة

وهذا كلامي عندي شهود علي كل الناس الي بالشورجة تعرف
صابر ويعرفون هو عقلة مو تمام وتكدر حضرتك تتأكد من هذا
الموضوع
هو تجي ساعات تشوفه طبيعي جداً وتجي ساعات يضرب
ويأذي بالفعل هو كان اب حنون لبناته ويحبهم وما يأذيهم
بس من يطلع خارج غرفته يصير غير واحد قبل وفاته بأيام هو
ضارب ولد وفاتح رأسه والولد كان ممكن يروح بيها لوما ربك
ستر ورحنه لاهل الولد وفهمناهم وضع صابر ولهذا السبب اني
حبسته بالغرفة كم يوم لأن صارت بينه خوفة أن ممكن باي
لحضة يضربله شخص ويموته ..

وبالنسبه لاثار الضرب أني اعترفت من البداية للضابط اني
وياه صارت مشكلة بنيه ولأن مد ايدة عليه وتجاوز بلحظة
عصبية مني ضربته صح ..
أما الضربه الي برجلة هي ضربة اثر حادث صار وياه بشغلة
وكعت حديدة ثكيلة على إصبعه وهم اكو شهود على هذا
الكلام

أما بالنسبه للأدوية فعلا احنه الي جبناهن اله وبوصفه طبيه
والوصفه موجودة والدكتور موجود تكدر تطلبه يشهد اني
وأخوي صالح اخذناه للطبيب النفسي ومن شاف وضعه كتبله
هذه الأدوية ..

بعد سماع كلام صادق القاضي كان مستمع اله رد عليه :
وليش نكرت هذا الك

لام بالبداية ليش ما حجيت اول مره






صادق: كلت لحضرتك السبب ما هان عليه انطي بإخوي جنت
متوقع مجرد كم سؤال ونطلع ما توقعت توصل الأمور لهنا

كمل كلامه صادق وبعد الاستماع الكلامة قرر القاضي إخلاء
سبيل صالح وطلب شهادة الدكتور وقراءة الوصفه الطبية
وشهادة الولد الي ضربة صابر ..

بنفس الليلة سمية لزمها طلوك وهي باقيلها يوم تدخل
بشهرها بس ما تحملت بسبب ثكل الفراش الي غسلته بقت
يومين تتوجع من بطنها لحد ما طلكت
كعدت تبجي بالم وقهر على حالها وتتذكر كل ولاداتها صابر هو
الي يركض الها وهو الي يداريها وحتى يغسل ملابسها
بكل ولاداتها محد يدك عليها الباب ويكلها شنو محتاجة صابر
هو الوحيد الي يحير بيها لكن بهذه ولادتها وحيدة مكسورة
محد الها لا ام تسأل عنها ولا اب زوجة ابوها زين اذا بالسنه
مرة سألت عنها وأخوها من ابوها نفس الشي
مهمومة والدنيا جارت عليها غريبة ولاعدها وكاحة النسوان
الي يدبرن أمرهن ولا عدها اللسان الي يساعدها تحجي وتدافع
عن نفسها
تباوع لبناتها نايمات وهي ولادتها كلها نص الليل تحصرها
بوقت الي الكل نايم
لزمت الحايط حتى يساعدها تكوم وذبت حملها عليه من بعد
رب العالمين وكفت بكل صعوبة وبطنها حيل جبيرة وثكيلة
اثكل واكبر من كل حبالاتها

صارت تنتچي على الحايط وتمشي والماي يجري على رجليها
نكع ملابسها بكل صعوبة وصلت لباب غرفة أكثر الناس
تحمل كره الها ومجبورة تدك هل باب
دكت باب جبرية حتى تعينها وتجيبها دكته بقوى من حلات
روحها وبقت تكرر الدكات فتحلها صالح

شافها كدامه .. سمية هااا شخيرج ؟

باوع الها عرف عدها ولادة صاح من مكانه : جبررية كومي
جبرررية يربي شكد نومج ثكيل لو دمام يدك يم راسج ما
تفزين جبررررية

فزت مفزوعه من صيحته : ها ها شبيك تصيح

جاوبها وهو يرجع لفراشى: كومي لسمية مبنيه تطلك

:اهوووو هسه وكتج

صالح: وكتها شنوو على أساس انتي ما متعودة شو أكثر
النسوان يجنج لو ترحيلهم بنص الليل دكومي جيبيها يمعودة
خطية

جبرية:خطت فوكها حيه كون كااااايمة كايمة

طلعت لسمية الي كوة واكفه واشرلتها : روووحي واني راح
اجي وراج






مشت سمية لغرفتها طلعت غراضها وملابس وحضرتهن
يمها دخلت عليها جبرية تحجي بصوت عالي خله بناتها يفزن
من مكانهم

:فضيني يله نامي خل اشوفج هو هذا المحصلي منج يومية
بطنج كدامج وتعالو يصالح وصادق و اصرفو

باوعت للبنات الي كعدن يباوعن بخوف والنعاس تارس
عيونهم
:كووومن طلعن برة عليش تباوعن كومن برة نامن
بسملة :عما شبيها ماما

جبرية: ما بيها شي راح تجيب الجن اخت

حجت بفرح ممزوج بخوف: الله صدك يعني اخوي الي ابطن
امي راح يطلع بس ماما خطيه جاي تبجي بطلت ما ريدة

جبرية: موووو اخوج اختج اختج امج تسفط بس بنات مبارك
دكوووومي ولج أخذي اختج واطلعن

كامن بسملة وسلوى وطلعن من الغرفة وبقن كاعدات برة
وهن ماليهن الخوف والقلق على امهن الي تون بدون صوت
وجبرية تولد بيها بدون رحمة تعصر بطنها وكل ما تتوجع
وتسد رجليها تضربها على فخذها حتى تدفع الطفل مر ما
يقارب ساعة أو أكثر ولدت سمية وصدع صوت الطفل
بالغرفة .. واجا رعد للدنيا

جبرية: يااااا هذا ولد ولج بعد اكو جاهل ثاني ابطنج ادفعيي لا
يختنك خل أطلعه

خلت رعد على صفحة ورجعت تكمل شغلها وتسحب الطفل
الثاني وطلع وعد .. وهاي ماكانت بالحسبان صابر مات حتى
ما يورث شي لكن طلع الهم ثنين ولد بدل الواحد الشي الي
صدم جبرية وأبد ما كانت تتوقعة ولا خاطر على بالها
وعد من طلع من بطن أمة عكس رعد الي طلع يصرخ وعد
كانت تعبان حيل ونبضاتة حيل ضعيفة وشبه مختنك
جبرية كانت تدري بي عايش بس الي سوتة

جبرية: هذا ميت الثاني

تركته على صفحه مجرد لفتة بوصلة و متأملة أن يموت
ونضفت سمية
وغسلت وبدلت بس لرعد

سمية بنص تعبها دموعها جرن على ابنها الي توقعته ميت
لأن حتى بجي ما كان يبجي كملت جبرية شغلها وطلعت
سمية بصعوبه حيل وجع ما ينوصف دفعت نفسها ومدت
أيدها وباطراف أصابعها لزمت طرف الحضينة الي كان
ملفوف بيها بطريقة مثل الكفن حتى وجها لفته
جرته من مكانه وعدلت نفسها كوة وشالتة بحضنها
طلعت وجها الي كان مليان دم وماي من بطنها وصارت
تبوس بي ودموعها تجري وتنشغ صارت تشيلة وتحط خدها
على خده وبقت دقايق على هل وضع بس حست انو هل
طفل بي روح. حست بي ما ميت
واكو نفس جاي يدخل ويطلع من يمة خلت أيدها على كلبه
حست اكو نبض بي فرحت حيل صارت باصابعها تفرك
خشمه ينطي ردة فعل
سبحان الله الي بهاي اللحظات الطفل بچى وطلع صوته بچيته
طارت فرح وضمته لصدرها
دخلت جبرية للغرفة وجايبها بيها كارتونة حتى تخلي الطفل
بيها بس نصدمت من سمعته يبجي رغم صوت بجيته مو
قوي
بس الطفل عايش ويبجي ومابي شي
تقربت يمهم وهي تاخذة من ايد سمية : عايش هذا ؟
سمية بضحكة ودموعها تجري هزت راسها بمعنى عايش
خاب امل جبري