TG Telegram Group Link
Channel: 科技資訊📱💻🖥📷
Back to Bottom
【Tesla 推出德國柏林限定 Gigabier 啤酒🍺

Elon Musk 又嚟料,除咗車之外,佢耐不耐就搵啲新嘢玩吓。
今次唔係挖隧道,亦唔係上太空,而係出啤酒!😳

Tesla 喺德國鄰近柏林間超級工廠 Gigafactory 仲未正式完成,不過 Elon 兄之前就喺工廠左近舉行咗一個名為 GigaFest 嘅開放日去招待媒體同附近居民。🥳

開放日當日除咗有得食有得玩,更重要嘅就係向外界透露咗更多新工廠嘅詳情。

Elon 話工廠會有一個火車站,員工除咗可以自己揸車,亦可以選擇搭火車返工。由柏林市中心去到工廠車程只係30分鐘,非常方便。🚉

而成個工廠區嘅外牆都會有唔同嘅塗鴉,非常型 (Elon 自己話嘅)。
最令人驚喜嘅係,佢仲宣佈會有啤酒,唔係有啤酒賣咁簡單,而係會出自家啤酒呀!😎

呢款啤酒以柏林工廠命名,叫 Gigabier 。最特別嘅當然係佢個樽,設計靈感嚟自 Cybertruck,係型嘅。👍

不過 Elon 就冇講到呢款啤酒其他地方會唔會有得賣,定係 Gigafactory 獨家?🧐

至於「正職」汽車生產方面,Elon 就話希望今年年尾前可以開始喺呢間新工廠生產 Model Y。 期望到2022年尾工廠可以每星期生產5,000到10,000 部汽車。

但係講乜都冇用,因為當地環保組織對工廠用水以及對野生動物嘅影響作出咗投訴。😔
所以地方當局正在評估緊工廠對周邊環境嘅影響。成功過關先可以得到最終批文,到時就可以開工大吉啦!🙏
.
.
.

我地開咗Facebook啦:https://bit.ly/2EpllBn
MeWe一樣可以搵到我哋,快啲去加入啦!😊😊😊
https://mewe.com/p/muddleup乜都噏
【保時捷Taycan車款非緊急情況下自動打開「雙閃」燈號⚡️需要全部回收👀

保時捷,超級跑車嘅名牌。估唔到佢都會有甩轆嘅時候。🤔
唔使驚,唔係真係甩咗個轆。而係有事要回收啫。😂

講緊嘅係保時捷將會回收喺美國發售嘅11,827部2020年同埋2021年款嘅Taycan型號車輛。呢個數量其實已經差唔多係美國所有嘅Taycan,官方解釋回收嘅理由係呢款車會「錯誤開啟壞車燈」。🚗

喺美國家庭安全管理局(NHTSA)網站上面顯示,保時捷喺10月13號公佈需要回收Taycan嘅原因係「錯誤開啟壞車警告燈」,即係話Taycan有機會喺非緊急情況之下自動開著「雙閃」去警告後車。
又即係,「雙閃」有機會喺未真正發生意外之前就著咗。🧐

保時捷認為呢個錯誤可能會誤導其他駕駛者,從而增加道路安全風險。喺正常情況之下,只有車輛喺緊急剎車或者發生碰撞之後「雙閃」危險警告燈先會自動開著。🌟

即係話由2019年10月21號到2021年9月17號之間生產嘅保時捷Taycan全系列車款,包括Cross Turismo版本,都唔符合美國食品安全標準編號108(FMVSS 108)條款關於「燈、 反光裝置以及關聯設備」嘅要求。

保時捷喺 NHTSA 網站上面發佈嘅回收通告冇解釋到呢個故障嘅具體原因,只係話呢個應該係軟件問題,並唔係硬件上嘅缺陷。
警告燈其實係有效嘅,只不過根據美國嘅安全規定,可能有機會失常 。😳

發現問題之後,保時捷第一時間詳細分析咗呢個功能喺增加車輛安全性嘅同時,係咪真係同FMVSS 108 條款有衝突,包括喺開啟自動危險警報燈之後發送車輛位置。
佢哋同時亦調查咗受影響嘅軟件版本、零件編號同車輛數量。👁

今次回收嘅行動代號係21V794000,製造商代號係AMC1,作為補救措施,經銷商將會對危險警告燈軟件進行重新編輯去優化功能。

當然今次嘅軟件調整係免費啦,因為需要回收嘅所有車輛仍然喺保養期之內。 保時捷北美公司將會由2021年12月13號開始向Taycan車主發送回收通知。🙏

其實早啲著咗棧燈都唔會太危險啩,早著好過遲著?🤷‍♂
戴定頭盔先,我唔識揸車㗎,我亂講㗎咋。😜
.
.
.

我地開咗Facebook啦:https://bit.ly/2EpllBn
MeWe一樣可以搵到我哋,快啲去加入啦!😊😊😊
https://mewe.com/p/muddleup乜都噏
【台灣數學老師將教學影片放上成人影片網站 Pornhub 😂

呢個好笑,估唔到「愛情動作片」網站都可以學到數學!有邊個會諗到 Pornhub 上面可以睇到啲成個鐘頭嘅微積分教學片?!🤣

講緊嘅係一名台灣數學老師,佢到目前為止已經上載咗兩百幾條數學教學影片去自己嘅 Pornhub 頻道。形式好簡單,就係佢一本正經咁喺黑板前面「教書」。📚

點解呢位34歲嘅數學老師會咁做呢?佢話因為佢發現到喺 YouTube 上面嘅數學教學片已經有太多,應該已經到咗飽和嘅程度。
所以佢就決定要向另一個用戶人數極多嘅平台進發。希望可以開發到一個新嘅數學學習市場。💪

基本上從來都唔會有人將一啲數學影片上載去成人網站,仲要係一個咁多人睇咁熱門嘅成人網站,相信影片觀看人數應該唔會太少。💄

事實證明佢呢個諗法都幾啱,計劃進展順利,因為暫時佢啲影片嘅總觀看數字已經超過160萬,仲得到好多人嘅稱讚添!💋

當然最緊要梗係透過呢啲影片成功增加咗佢啲網上課程嘅銷量啦,一啲需要搵數學老師嘅人因為 Pornhub 嘅影片認識咗佢,跟住仲買埋佢嘅網上課程。👍
網上課程每年可以為佢帶嚟750萬新台幣嘅收入。😌

今次真係抵佢成功嘅,咁有諗頭!
果然係要寓工作於娛樂。首先要識得睇「愛情動作片」先,跟住就可以順手學習吓。👨‍🎓
睇完動作片個人咁興奮,學嘢都學得快啲呀!😜
.
.
.

我地開咗Facebook啦:https://bit.ly/2EpllBn
MeWe一樣可以搵到我哋,快啲去加入啦!😊😊😊
https://mewe.com/p/muddleup乜都噏
【Airpods 3 品質出現問題!?😳

Apple 嘅 AirPods 係其中一款熱門藍牙耳機,好多人都用佢。👍

而新一代 AirPods 3 發表之後,好快都已經開始出貨。好多人喺呢兩日已經收到。

不過並唔係個個收到後都咁滿意喎。綜合各大 Apple 網上討論區同外國評論網站得到嘅資料顯示,好多人對今次 AirPods 3 喺造工都唔太滿意。😔

今次第一批 AirPods 3 有好大部份都係由越南生產,有用戶就發現造工方面比以前嘅同類產品差。🧐

當中出現比較普遍嘅問題有幾個,分別係:耳機嘅接合位置造得唔夠光滑,摸上去會有刮手嘅感覺。
另外接合位置會見到膠水漬、聽歌嘅時候會有電流聲、充電盒個蓋會有輕微郁動唔夠實,同埋帶咗耳機之後會有刮耳嘅感覺。👀

聽落好似好多問題?

有專門研究 Apple 產品嘅科技達人就話「基本上」產地對於 Apple 產品嘅品質好壞唔會有太大分別。
但係根據以往嘅經驗所得,越南生產嘅產品的而且確喺質量上面比較參差,包括其他類型產品例如手機、鞋、袋,又或者一啲紡織產品之類都有呢方面嘅問題出現。🤷‍♂

據之前嘅資料所得,其實之前嗰幾款 AirPods 都出現過一啲質量問題。只不過今次越南批次被大量曝光之後就令人比較留意。

根據分析,出現呢個情況嘅主要原因係 QC 問題,過住有上面提到啲問題嘅產品都唔會過到關出貨俾消費者。但由於品質檢查嘅原因,所以一啲有瑕疵嘅 AirPods 都順利過關送到消費者手上。🙅🏼

可能因為第一批貨時間上比較趕先會出現呢啲問題,下一個批次應該會有所改善。
當然如果太大問題就梗係要拎去換啦,話哂都唔係一副平價耳機喎,$1499㗎!
.
.
.

我地開咗Facebook啦:https://bit.ly/2EpllBn
MeWe一樣可以搵到我哋,快啲去加入啦!😊😊😊
https://mewe.com/p/muddleup乜都噏
【Elon Musk 起新大學 🏫 只可以用狗狗幣交學費?🧐

今日時今日 Elon Musk 嘅影響力有幾大?佢真係求其講句嘢都影響到呢個世界呀!😂

話說佢最近喺 Twitter 上面出咗個提及狗狗幣嘅 tweet, 狗狗幣個價又即刻飆升啦。Well, 都唔係第一次㗎啦,唔知佢會唔會因為咁又賺唔少呢?🤔

Elon 兄個 tweet 度提到佢計劃喺德薩斯州建造嗰間名為德州理工學院嘅大學。佢仲話呢間大學嘅學費只接受狗狗幣 (DogeCoin) 支付。
跟住又話如果有養狗嘅人仲可以有折添(唔知佢講真定講笑?佢吹得就吹🌪)。

睇落冇乜特別嘅幾句說話,就令到喺 Elon 未出呢條 tweet 之前價錢唔夠0.25美金嘅狗狗幣。喺佢出咗條 tweet 之後即刻有反應,價錢一度升到去0.28美金。冇幾耐又立即回落返。😳

嘩,Elon Musk 真係噏得出就噏嘅,佢講咩都可能會影響到好多人。所以都係謹慎啲好。

不過,可能佢都好謹慎咁扮到輕鬆講幾句,實際上所有嘢都喺佢計算之內?

睇佢嘅往績,有時好似講笑嘅嘢原來真係會實行。相反有啲好認真嘅計劃最終又會無疾而終嘅。真係估佢唔到呀!🙇‍♂

總之,有錢就係任性囉,佢玩哂囉。🤣
.
.
.

我地開咗Facebook啦:https://bit.ly/2EpllBn
MeWe一樣可以搵到我哋,快啲去加入啦!😊😊😊
https://mewe.com/p/muddleup乜都噏
【由於全球晶片短缺😔任天堂將Switch預計銷售數字下調📉

一路以嚟都咁好賣嘅任天堂 Switch,今季個銷情似乎開始慢慢回落啦。🧐

喺7月到9月期間,Switch 嘅出貨量「只係」得383萬部。同舊年同期相比下跌咗好多,舊年嘅數字係686萬部。 😱

直到目前為止,任天堂總共賣出咗9287萬部 Switch。👍

任天堂表示,由於受到疫情持續加上全球晶片短缺呢兩個唔明朗嘅因素影響。公司將今個財政年度 Switch 嘅銷量預測下調 到150萬部。

之前預計由2021年4月到2022年3月期間嘅銷量係2550萬部,但係依家已經重新將預計數字定為2400萬部。 🤷‍♂

不過,預計銷量數字下調啫,預計收入又冇少到喎。
考慮到匯率嘅影響,以及更高嘅預計軟件銷售額,任天堂預期實際營業利潤將會比之前預測高4%。 ☺️

根據上面嘅預測數字,Switch 嘅總銷量好有可能會喺今個聖誕季節取代 Wii,成為任天堂有史以嚟最賣得嘅家用遊戲機。😄
淨係舊年10月到12月期間,已經賣出咗1157萬部 Switch,而 Wii 嘅總銷量就係1.0163億部。

不過如果將 Switch 當做手提遊戲機計算,佢嘅銷量仍然未追到 Game Boy 嘅1.1869億部同埋 DS 嘅1.5402億部。

究竟 Switch 嘅銷量可唔可以追得上上面呢兩部經典手提遊戲機呢?咁就要睇吓今個聖誕節佢嘅銷售情況,同埋睇吓遲啲有啲咩勁 game 出可以刺激銷量啦。💪
.
.
.

我地開咗Facebook啦:https://bit.ly/2EpllBn
MeWe一樣可以搵到我哋,快啲去加入啦!😊😊😊
https://mewe.com/p/muddleup乜都噏
【三星 Galaxy S22 系列或會放棄自家 Exynos 2200 晶片👀全部使用高通 Snapdragon 898😳

近日三星 Galaxy S22 系列嘅資料已經開始慢慢浮出水面,規格同售價都被曝光,甚至外觀設計都有相片流出(真定假就暫時冇辦法證實)。🧐

啱啱更加有三星員工爆料,話公司決定喺 Galaxy S22 上面會全面棄用三星自家嘅 Exynos 2200 晶片,改為使用高通 Snapdragon 898。🤔

之前某啲三星喺唔同地方推出嘅手機,同一款型號都會因應唔同市場使用唔同嘅晶片。

加上早排都有傳三星喺晶片生產上面出現問題,產量未能達到預期數量。所以使用自家 Exynos 晶片嘅手機會減少,亦都係呢個原因導致 Galaxy S21 FE 到依家都未推出。😔

所以,雖然暫時同其他消息一樣都係未經證實,但係聽落就非常合情合理。

三星一早已經宣佈咗 Exynos 2200 會係第一款配備6核 AMD RDNA2 GPU 嘅晶片,具有光線追踪技術。攪到好多人都對呢款仲未正式推出嘅新晶片期望好高。😍

不過照依家嘅情況睇,似乎根本就冇足夠嘅晶片可以用。真正使用呢粒晶片嘅產品幾時可以同大家見面真係未知之數。

好多科技達人,又或韓國媒體都預測三新嚟緊嘅新機發佈會會喺2022年2月8日星期二舉行。
到時就會知道傳聞係真係假啦。不過仲有成三個月,要俾啲耐性啦。
.
.
.

我地開咗Facebook啦:https://bit.ly/2EpllBn
MeWe一樣可以搵到我哋,快啲去加入啦!😊😊😊
https://mewe.com/p/muddleup乜都噏
【AMC 戲院網上售票接受加密貨幣付款💵

加密貨幣係咪真係越來越普及?買戲飛都用到喎。
不過講緊美國啫。👀

美國 AMC 戲院喺今年8月嘅時候就曾經講過,用戶可以喺年底前用 Bitcoin 買飛。佢哋真係講得出做得到,冇走數。👍

除咗 Bitcoin,仲有另外幾款加密貨幣都可以用嚟網上買飛俾錢。
AMC CEO Adam Aron 啱啱就喺 Twitter 出咗個 post 宣佈,用戶們除咗用 Apple Pay、Google Pay 同 PayPal 俾錢之外,仲可以用加密貨幣。💻
AMC 接受嘅加密貨幣包括 Bitcoin, Ethereum, Bitcoin Cash 同 Litecoin. 遲啲 Dogecoin 都應該用到。

不過以上各種加密貨幣暫時都只係可以用喺網上交易。仲未可以方便到現場都用到,要同用「真錢」一樣可能都仲需要一段時間先實現到。🤔

Adam 仲話呢啲新嘅俾錢方式已經占咗 AMC 網上交易總額 14%。不過佢又冇講清楚係只計加密貨幣吖,定係加埋 Apple Pay、Google Pay 同 PayPal 喎。

不過呢,如果要用加密貨幣喺 AMC 網站上面俾錢,係要經 PayPal 嘅。用戶要揀 PayPal 做付款方式(PayPal 有備註可以使用加密貨幣)然後再喺你自己個 PayPal account 揀番可以用嘅加密貨幣先俾到錢。

即係話暫時想用加密貨幣買戲飛,首先要有個 PayPal account, 而 account 又開通咗加密貨幣交易。兼且,只限美國。😞
好似有啲轉折,睇吓遲啲會唔會有其他方法可以用?

唔知香港幾時會可以用加密貨幣買戲飛呢?香港 AMC 會唔會遲啲都有呀喂。👀
.
.
.

我地開咗Facebook啦:https://bit.ly/2EpllBn
MeWe一樣可以搵到我哋,快啲去加入啦!😊😊😊
https://mewe.com/p/muddleup乜都噏
【Elon Musk 批准員工開工時候聽音樂🎧希望佢哋會鍾意返工👍

Elon Musk 真係識玩,軟硬兼師,啲員工想唔鍾意返工都幾難。😊

啱啱就有一封 Elon 兄向員工發出嘅內部電郵流出。📨
Elon 喺電郵裏面提到好支持工廠員工工作嘅時候聽音樂。

內容大概係咁。佢話非常支持喺工廠裏面播放音樂,又或者做一啲可以令員工們做嘢做得更開心嘅小互動。即係咩?傾偈?玩?🤔

事源係有同事問 Elon 工作嘅時候可唔可以用一邊耳機聽歌,另一隻耳唔聽就可以同時注意到安全。

Elon 聽完呢個建議覺得幾好,佢話音樂可以引起同事之間嘅共鳴,對工作效率都會有幫助。
佢更加提議工廠可以播放環境音樂,咁就唔淨係得自己帶咗耳機嘅人都可以享受到音樂。😘

佢仲喺封電郵度叫個員工如果認為仲有其他建議係可以有效改善工作效率/ 環境等等嘅,都可以同佢講。
因為佢希望員工每日都可以開開心心咁期待返工。☺️

嘩,好老闆呀!🎉

係咪真係咁好先?話哂係老闆,最終梗係想員工們聽聽話話啦。😏

Elon 之後又喺另一封電郵裏面「提醒」員工要記住邊個係呢間公司嘅老闆。
佢仲列出咗啲指引俾員工,教佢哋要點樣回覆老闆嘅電郵。😆

佢話如果老細出咗封電郵,內容係一啲新嘅指令或措施,經理們只有三個做法。
1. 如果佢哋覺得老闆唔啱,唔該回覆老闆電郵,解釋一吓老闆錯喺邊度。
2. 如果老闆講得唔清楚,請員工進一步求證。攪清楚老闆想點。
3. 真接照指示執行。

而如果以上三樣冇一樣做到,呢位經理就可以即刻執包袱走人。🙊

🤔都好嘅,講得清清楚楚。接受到咪繼續做,接受唔到咪走人囉。起碼唔使估估吓老闆嘅心意先啦。👏
.
.
.

我地開咗Facebook啦:https://bit.ly/2EpllBn
MeWe一樣可以搵到我哋,快啲去加入啦!😊😊😊
https://mewe.com/p/muddleup乜都噏
【違反意大利反壟斷條例🙅‍♀Apple、Amazon 被罰巨額罰款💸

Apple 同 Amazon 跌咗好多錢呀!慘慘豬。😔

近日,意大利反壟斷機構 - 競爭及市場管理局(AGCM)向美國科技巨頭亞馬遜同蘋果罰款合共2.28億美金!😱
其中亞馬遜被罰7700萬,蘋果被罰1.512億。

點解要罰佢哋咁多錢呢?🤔
理由就係呢兩間公司涉嫌喺銷售 Apple 同 Beats 產品嘅時候違反咗反競爭條例。

據報導,Apple 同 Amazon 喺2018年簽訂咗一份協議,內容係禁止 Apple 同 Beats 產品嘅經銷商喺意大利 Amazon 網站上架。

AGCM 認為呢項協議違反咗《歐盟合作條約》第101條,並且下令呢兩間公司要即刻停止呢個限制。💻

AGCM 調查發現,蘋果及亞馬遜兩間公司喺2018年簽署嘅呢項協議規定,只有亞馬遜同某一啲特定經銷商可以喺亞馬遜網站售賣 Apple 同 Beats 嘅相關產品。
其他冇被選中嘅官方或非官方經銷商都唔可以賣。👀

協議仲限制咗跨境購買,以上做法被認為係限制咗買家嘅選擇,同時亦剝奪咗消費者喺第三方賣家度購買產品得到折扣嘅權利。

AGCM 喺聲明裏面表示,意大利 Amazon 網站佔咗成個電子產品市場70%,有40%嘅賣家都將 Amazon 作為主要銷售平台。而蘋果同亞馬遜之間嘅協議,違反咗歐盟反壟斷法,所以要向亞馬遜同蘋果徵收罰款。

AGCM 仲話亞馬遜必須要遵守意大利嘅競爭規則,確保所有賣家享有公平競爭環境,買家亦可以擁有唔同嘅選擇。

蘋果方面就話呢條協議嘅目的係為咗令用戶唔會買到假貨。公司同執法部門、海關緊密合作,確保市場上嘅蘋果產品都係正品。👍

目前 Apple 同 Amazon 都計劃就 AGCM 嘅罰款提出上訴。

其實唔單止呢兩間大公司,其他科技公司近年都成為重點監管對象。
今年2月,意大利反壟斷局亦已經向 Facebook 「開刀」。😏
意大利反壟斷局指出,由於 Facebook 未有遵照指示終止對用戶資料嘅不當使用,罰咗 Facebook 700萬歐元呀!

究竟係呢啲科技巨頭越做越衰,定係啲國家近年等錢使?成日都聽見科技公司俾人罰錢,罰親都唔少嘢㗎喎。🤓
罰還罰,唔好將呢啲開支轉嫁落消費者道就得喇。😒
.
.
.

我地開咗Facebook啦:https://bit.ly/2EpllBn
【Apple 19美金一塊布好小事😂Tesla 50美金一個bb (吹嗰啲bb)😏

早排 Apple 出嗰塊布好多人拎嚟笑,又話無謂又話貴,咩都有人講。不過最終都係極速就賣哂。😁

今日就輪到最鍾意玩嘢嘅 Tesla CEO Elon Musk 挑塊布機。
Tesla 網站今日就上架咗一款 CyberTruck 造型嘅 bb(係吹嗰啲 bb,唔係 Baby)。為咗唔好混亂,叫正式啲 - 哨子!🤣

Elon 仲直接指名道姓喺自己 Twitter 度叫人唔好嘥錢買塊愚蠢嘅「蘋果布」,應該快啲去買佢哋個哨子!😏

呢個哨子賣50美金,貴唔貴就見人見智啦。不過根據 Tesla 官方介紹,呢個叫 Cyberwhistle 嘅哨子,設計靈感係嚟自 Cybertruck。
質料方面就用咗經過拋光處理嘅醫用級不銹鋼製成,係一款優質收藏品。👀

雖然好多網友就話50美金一個哨子好似仲離譜過 Apple 塊布,不過身體最誠實嘅,個哨子眨吓眼已經賣哂。😆

斷估好多賣家都係諗住轉賣賺番筆。之前 Tesla 出 tequila 都係一樣眨吓眼就賣哂。🍺 轉個頭就已經有人放上網高價轉賣。

去 Ebay 睇睇,不出所料已經有賣家賣緊個哨子,有人標價標到2,250美金添!😳
Well, 係咪真係有人會用兩千幾美金買個哨子呢?可能諗住佢會一路升值啩?有錢嘅不妨去睇睇,當投資囉。😂
.
.
.

我地開咗Facebook啦:https://bit.ly/2EpllBn
MeWe一樣可以搵到我哋,快啲去加入啦!😊😊😊
https://mewe.com/p/muddleup乜都噏
【Apple Watch 用戶因電池膨脹問題受傷😳集體控告 Apple😱

Apple Watch 由第一代開始已經好多人用。多人用亦代表俾人投訴嘅機會多咗。🤔

啱啱就有一班 Apple Watch 用戶向 Apple 發起一項新嘅集體訴訟。

訴訟係關於歷代 Apple Watch 都存在電池膨脹嘅問題。而呢個問題會造成屏幕破損,導致用戶喺使用 Apple Watch 嗰時被鋒利嘅邊緣割傷。👀

雖然鋰電池膨脹並唔係 Apple Watch 獨有,但係原告方面就指責蘋果未能夠喺 Apple Watch 內部預留足夠緩衝空間。
亦冇採取任何相應嘅防護措施。

所以相關損傷並唔係因為用戶「使用不當」所造成。🙅‍♂

由於電池膨脹產生嘅力量都唔細,屏幕同手錶主體膠層脫離、錶面破碎 / 破裂等等情況已經發生咗好多次。😔

控方其中一位用戶 Chris 就話,佢隻 Apple Watch Series 3 用咗三年就遇到屏幕脫落呢個問題。

事發嘅時候佢坐喺一架高爾夫球車裏面,當佢伸手握住軚盤嘅時候,甩出嚟嘅屏幕「嚴重割傷」咗佢前臂一條靜脈❗️

除咗最新一代 Apple Watch Series 7 之外 (可能用嘅時間未夠耐?🤨),其他所有以前嘅手錶型號(各種尺寸/ 型號),都會包括喺呢單官司當中。

睇嚟呢個設計缺陷(?)對用戶們構成咗一個幾嚴重嘅安全隱患。
已經有為數唔少嘅用戶報稱被割傷或者擦傷等等。😕

被影響嘅用戶就話佢哋最嬲係,蘋果一開始就知道呢個問題,但係就一直都冇向外界披露相關風險。

原告一方依家就要求蘋果承擔當事人所有因為電池膨脹導致嘅費用,包括更換電池或手錶等等。
佢哋亦要求蘋果全面對外披露手錶嘅缺陷同支付官司費用。

睇返轉頭,原來今次已經唔係 Apple 第一次因為 Apple Watch 電池膨脹俾人告。2019年已經有一場集體訴訟係指控蘋果存在商業欺詐同違反保養條款。

總之隻 Apple Watch 就係多事啦,不過仍然係好多人用囉。😛
.
.
.

我地開咗Facebook啦:https://bit.ly/2EpllBn
MeWe一樣可以搵到我哋,快啲去加入啦!😊😊😊
https://mewe.com/p/muddleup乜都噏
【Elon Musk 賣哂自己啲豪宅別墅 👀 據稱可以慳番25億美金稅款 😳

又係 Elon Musk,佢真係花樣多多,鑊鑊新鮮。😂

多得 Tesla 股價大漲,Elon 今年就超越咗 Amazon 創辦人 Jeff Bezos 成為全球首富。
首富都唔止,仲要係有史以來第一個擁有超過3000億美金身家嘅超級富豪!😱

不過 Elon 兄就硬係要與眾不同嘅。傳統有錢人通常都會擁有唔少豪宅、別墅。不過 Elon 就反其道而行,唔單止唔多,依家直頭係一間都冇。😏

唔係話一間「豪宅」都冇,係連一間自己擁有嘅屋都冇呀!
其實本來係有嘅,不過佢就選擇賣哂自己所有房地產,改為做租客租屋住。

今個月月頭,Elon 成功將自己位於加州嘅最後一間豪宅賣出。而為咗可以盡快賣出,佢更加將間屋大幅降價,由3750萬美金降價到最終嘅3000萬美金。📉

Elon 呢間豪宅一共佔地47英畝,係嗰個地區裏面最大嘅一座房地產之一,建築面積大概係16000平方英尺。

今年6月份有消息話 Elon 陸陸續續賣哂自己啲屋之後,租咗一間位於德薩斯州,月租5萬美金嘅屋住。🧐

豪宅喎,普通人求之不得啦。有咁嘅財力都唔住,情願租屋住?Elon 話自己咁樣做係為咗獲得「自由」,財富令佢感覺壓抑,好有壓力喎。係咪講埋呢啲風涼說話先。😠
咁點解只係賣樓?超過3000億美金身家仲有壓力啦,捐哂佢啦不如。😍

所以呢,有心水清嘅人就認為, Elon 賣屋嘅目的並唔係佢口中所講嘅追求自由,真正目的係想避稅。😳
佢想避嘅係加州個人所得稅同資本利得稅。而由於佢依家已經唔再擁有任何加州嘅資產,賣樓呢一個舉動幫佢慳咗高達25億美金嘅稅款!👍

嗱,呢啲咪高招囉,真係估佢唔到㗎。不過話時話,都係估啫。佢有大嗱嗱3000億身家,係咪真係要去避嗰區區25億稅呢?呢個真係佢自己先知啦。🤷‍♂
.
.
.

我地開咗Facebook啦:https://bit.ly/2EpllBn
MeWe一樣可以搵到我哋,快啲去加入啦!😊😊😊
https://mewe.com/p/muddleup乜都噏
【英國反壟斷監管機構指👉 Apple 及 Google 壟斷手機系統市場📱

啲科技巨頭真係成日都惹麻煩嘅。🤷‍♂

啱啱英國反壟斷監管機構「競爭及市場管理局」(CMA)就發表咗一份初步報告。內容係關於 Google 同 Apple 對用戶點樣使用手機擁有完全控制,剝奪咗用戶嘅選擇權。😳

CMA 之前對 Apple 同 Google 嘅操作系統 iOS、Android,應用商店 App Store、Play Store,以及瀏覽器 Safari 、Chrome 進行咗「過份控制用戶」嘅調查。🧐

CMA 調查發現,Apple 同 Google 已經能夠利用佢哋嘅市場影響力,令自己嘅操作系統成為一個自給自足嘅生態環境。所以對其他公司嚟講,想要推出一個新系統同佢哋競爭基本上係極之困難。🙅🏼

Apple 唔容許用戶有其他應用商店嘅選擇。Google 亦都同好多手機製造商簽訂合約,預裝 Play Store 同 Chrome 喺新出廠嘅手機上面。

另外,應用程式開發者亦一定要遵守 Apple 同 Google 嘅應用商店上架規則,其中包括30%佣金。💵

當然兩間公司嘅解釋都係話種種措施都係為咗整體服務嘅安全同質量,亦都係為咗保護用戶嘅個人資料。 🗄

報告除咗指出問題,亦提出咗一系列改善方案,包括俾用戶更容易喺 iOS 同 Android 手機之間切換,轉系統但係又唔會失去某啲功能或者數據。

另外 CMA 都研究緊用戶係咪應該可以喺 Play Store 同 App Store 以外,有其他方法安裝應用程式。

而 CMA 嘅調查結果顯示,2020年所有智能手機當中,超過一半係 iPhone,其餘嘅就係使用 Android 系統嘅唔同牌子手機。👀
Apple 同 Google 嘅瀏覽器佔英國流動設備瀏覽器使用量90%,Safari 佔接近50%,Chrome 大概40%。

CMA 聲稱會繼續展開調查,預計2022年6月會發表最終報告。📋

其實,Android 係可以用 Play Store 以外嘅 store 㗎喎,佢係容許用戶自己裝其他應用商店去 download app 嘅。iOS 一樣都得,不過就複雜啲囉。

事實上係想揀第三個系統都冇咩選擇,鴻蒙又唔成氣候,Windows Phone 又摺埋咗。咁都冇辦法㗎啦。🤷‍♂
.


我地開咗Facebook啦:https://bit.ly/2EpllBn
【隨住染疫人數再次上升 😔 Apple 決定關閉部份 Apple Store ⛔️

到今時今日,疫情都仲係反反覆覆,加埋變種病毒,真係影響好多人。😞

好似美國咁,啱啱又有消息話由於疫情再次爆發,加上員工病例增加,Apple 決定關閉三間 Apple Store。

三間分店分別位於邁阿密、馬里蘭州同埋安大略省。

根據目前Apple 網站嘅公佈,邁阿密店關閉直至美國時間星期五,馬里蘭州同馬里蘭州嗰兩間就關閉到星期六。 🧐

隨住感染人數增加,相信陸續會有其他分店需要關閉。
根據美國疾病控制及預防中心嘅講法,雖然 omicron 變種開始傳播,但之前嘅 delta 變種仍然係美國最主要嘅流行變種病毒。 😨

鑑於疫情嚴峻嘅關係,星期二開始 Apple 再次要求客人要配戴口罩先可以進入美國嘅 Apple Store。😷

Apple 發言人喺一份聲明當中話佢哋會定期監測疫情狀況,並且會因應實際需要去調整各項健康措施。
目的係確保顧客同員工嘅安全。🙏

為咗呢個目標佢哋將會繼續採用綜合方法,例如要求員工定期檢測同埋做健康檢查、員工同客戶盡量避免近距離接觸、店舖進行深度清潔以及向員工提供有薪病假。

而喺暫時關閉嗰啲店舖度做嘢嘅員工,所有都要喺舖頭重開前接受檢測。

據報導 Apple 仲推遲咗員工們重返辦公室嘅日期。👀

之前最新嘅計劃係要求員工喺2月1號以混合工作模式複工,不過最新消息係日期已經被改為「尚未確定」。 🤷‍♂

另外最令員工們振奮嘅係,Tim Cook 喺一封電郵裏面宣佈,work from home 嘅員工將會獲得一千美金津貼。 😍
據聞之後 ,Apple Store 員工一樣都會有呢一千蚊津貼。👍

嘩,好豪呀 Tim 兄,無啦啦多一千蚊,唔知香港有冇呢?大嗱嗱成8千蚊港紙㗎!💵
.
.
.

我地開咗Facebook啦:https://bit.ly/2EpllBn
MeWe一樣可以搵到我哋,快啲去加入啦!😊😊😊
https://mewe.com/p/muddleup乜都噏
【Apple 成為第一間市值超過3萬億美金嘅公司🎊相當於世界第五大經濟體😳

恭喜哂 Apple, 成為全世界第一間市值突破3萬億美元嘅公司。🎉

美國媒體報導,美股2022年首個交易日,蘋果股價上漲到每股182.86美元,令到公司嘅市值突破3萬億美元。💵💵💵
蘋果股價最高仲升至每股182.88美元高位,之後回落返去每股182.01美元。

自從第一次突破萬億美元關口之後,蘋果市值喺唔夠4年嘅時間就跳咗三倍。📈
2018年8月,蘋果市值突破1萬億美元;2020年8月,按股價計算,蘋果市值突破2億美元。

根據報導,蘋果股價喺2021年上升咗34%。👀

之前就有摩根史丹利分析師將佢哋公司對蘋果股票嘅目標價由164美元上調到200美元。😎
普遍認為如果之後 Apple 真係會推出 AR/ VR 產品嘅時候,佢嘅股票交易價格仲會升得更高。

如果按照世界銀行公佈2020年世界各國GDP數值作為參考,Apple 嘅市值只係僅次於美國(20.9萬億美元)、中國(14.7萬億美元)、日本(5.06萬億美元)同德國(3.85萬億美元),相當於全球第五大經濟體!😳

呢個數字已經超越咗英國、印度、法國、意大利、加拿大同韓國呢啲國家2020年嘅GDP。🤭

市值高漲嘅原因好簡單,當然係因為佢啲產品非常好賣啦。 其中 iPhone 系列產品絕對係蘋果最重要嘅收入來源。📱
估計喺啱啱過咗嘅第四季 (2021),iPhone 出貨量達到8300萬部,比預期多出300萬部。

除咗 Apple,其他科技大公司都有唔錯嘅表現。截至目前為止,Microsoft 市值大約係2.5萬億美元,Amazon 同 Google 市值就少啲,低於2萬億美元。

呢啲科技公司全部億億聲,係萬億呀!真係好誇張。🧐
.
.
.

我地開咗Facebook啦:https://bit.ly/2EpllBn
MeWe一樣可以搵到我哋,快啲去加入啦!😊😊😊
https://mewe.com/p/muddleup乜都噏
【Trump 自己個社交網絡 💻 Truth Social 將會喺2月💪美國嘅總統日推出😏

係咪有錢就可以拒絕被滅聲?🤔

好似前美國總統 Donald Trump 咁,流行嘅社交網絡唔俾佢發聲,佢就自己做一個新嘅出嚟。仲口口聲聲強調「真相」(truth)。

根據 Apple App Store 上面新 app 名單嘅顯示,Trump 嗰個新社交網絡 Truth Social 將會喺2月21號正式上架。👀

根據 App Store 介紹個 app 嘅截圖可以睇到,Truth Social 同 Twitter 非常似樣,真頭孖生兄弟咁款。🤣
無論係個人介紹頁面,又或係出 post 都一樣係有回复、轉發、收藏同分享呢幾個選項。

Twitter 嘅 post 就叫 tweet, 而 Truth Social 嘅 post 就叫 truth, 轉發就叫 re-truth. 😏

其實同 Twitter 差唔多又真係一啲都唔出奇。
因為一路以嚟 Twitter 一直都係 Trump 最鍾意嘅發聲平台。

直到2021年1月6號美國國會暴動之後冇幾耐,Trump 就被 Twitter 取消帳號,兼且永久禁止佢再使用 Twitter。
5月嘅時候佢都曾經出過一個 blog,喺嗰度佢仲發表咗佢對Twitter 嘅不滿。😠
但係呢個 blog 就冇佢以前個 Twitter 帳戶咁受歡迎,而且唔夠一個月亦都被關閉咗。

依家仲未知2月21號係只限 iOS 定係會一齊推出網上版同 Android 版嘅 Truth Social。
暫時 Truth Social 個網站只有一個掣俾人可以去 App Store 預訂 Truth Social 個 app,同埋可以填表格加入等候名單。
冇錯,唔係你想開 account 就開 account 嘅。
不過其實都未清楚究竟使唔使好似之前 Clubhouse 咁只限被邀請嘅人先用到。🤷‍♂

嗱,係咪呢。Twitter,Facebook 等等唔受 Trump 玩唔緊要,佢自己推出一個新平台。斷估自己嘅平台唔會唔俾佢講嘢啦啩?😂

順帶一提,推出嗰日正正就係美國嘅「總統日」,睇嚟 Trump 個總統夢都仲未醒。
咁就要睇睇下一屆美國總統選舉佢係咪真係又會參加啦。😎
.
.
.

我地開咗Facebook啦:https://bit.ly/2EpllBn
【瑞士軍隊宣佈🇨🇭禁用 WhatsApp Telegram 同 Signal 👀

即時通訊 app 成日都被人質疑佢嘅安全性,之前就有一輪由 WhatsApp 移民 Telegram 同 Signal 嘅熱潮。🧐

不過,呢兩個 app 都唔係一定安全喎,起碼瑞士軍隊唔認為佢哋係先啦。

啱啱瑞士軍隊方面已經決定咗禁止使用以上所講嘅通訊 app。
咁唔用呢三個 app 用咩?信鴿呀?🕊

咁又唔係,而係要用一個由瑞士自己開發嘅通訊 app。
呢個新規定已經喺啱啱過咗嘅12月生效,軍隊裏面所有人都要停止使用 WhatsApp、Signal 同 Telegram。🙅‍♂

士兵們被規定要安裝 Threema,一款由瑞士公司開發嘅流動通訊軟件。📱

原因好簡單,當然就係軍方擔心一啲對話內容可能會被其他人未經授權而獲得。
軍隊方面嘅解釋係,同其他外國應用程式唔同,Threema 受瑞士法律管制,所以其他國外機構係冇權要求查看任何對話內容。😏

相反,好似 WhatsApp 同 Signal 呢兩個 app 都係美國公司擁有,佢哋都需要遵守美國CLOUD法案,亦即係話美國政府可以要求獲得某啲數據。

就係因為咁,瑞士政府為咗確保冇人可以讀取到軍隊嘅談話內容,所以要強制使用國內自家開發嘅通訊 app。🦾

所以話呢,其實邊度有真係100%安全?睇嚟係時候要養番幾隻信鴿先得啦。🤣
.
.
.

我地開咗Facebook啦:https://bit.ly/2EpllBn
MeWe一樣可以搵到我哋,快啲去加入啦!😊😊😊
https://mewe.com/p/muddleup乜都噏
【1930年任天堂前總部大樓 🏫 改建成為酒店「丸福樓」❤️

冇旅行去,又係「睇咗當去咗」系列。🤷‍♂

機迷們冷靜啲先,尤其係任天堂粉絲。

由任天堂1930年嗰時個總部嘅舊總建築物改造而成間酒店「丸福樓」,將會喺今年4月份正式開業啦!酒店房間已經開始接受預訂添。💻

呢間酒店係位於京都市下京區,裏面一共有18間房,會有標準雙床房同日式套房。相信任天堂粉絲淨係聽到都可以感受到呢間酒店幾咁有歷史意義,1930年呀!係咪好想快啲去朝聖先。🙏

「丸福樓」係由世界級建築師安藤忠雄設計改建。
喺改裝過程裏面,安藤冇破壞到建築物原有嘅特色,亦保留咗佢自1930年以嚟古舊嘅外貌。👍

依家呢座建築物已經唔再係屬於任天堂株式會,而係屬於任天堂創辦人山內家族。今次改建嘅業主係山內株式會社,董事長就係山內溥嘅長子山內克仁。

任天堂早於1889年(明治22年)由山內房治郎創立,公司名嘅靈感係來自成語「謀事在人,成事在天」。 👀
1947年,任天堂前身山內任天堂成立咗一間售賣花牌、骨牌同啤牌嘅公司,名叫「丸福株式會社」。

就係為咗紀念呢段歷史,所以間酒店就叫做「丸福樓」啦。

睇到間酒店啲相,真係好懷舊好有 feel 呀!恨死人啦!😍
其實就算唔係任天堂粉絲,呢間咁古色古香嘅酒店都好值得去住吓,真係幾靚㗎。
.
.
.

我地開咗Facebook啦:https://bit.ly/2EpllBn
MeWe一樣可以搵到我哋,快啲去加入啦!😊😊😊
https://mewe.com/p/muddleup乜都噏
【2022年2月全球熱門流動應用程式收入排行榜📊第一名係:抖音/ TikTok 👀

講錢失感情,但大家對呢個數字又非常有興趣,好鍾意八卦㗎喎。😂

今日就有研究報告發表咗一個關於2022年2月,全球熱門流動應用程式收入嘅排行榜!

冠軍嘅係...... 抖音同埋TikTok。🧐
抖音以及海外版 TikTok,2月份喺全球 App Store 同 Google Play 嘅收入超過2.58億美金。😳 係舊年同期嘅2倍,蟬聯全球流動應用程式 (非遊戲類) 收入榜冠軍。

呢2億幾美金收入當中,大約有36%係嚟自中國版本抖音。美國市場都出咗唔少力排名第二,貢獻咗21.6%收入;沙地阿拉伯市場排名第三,佔3.9%。 😏
留意番,呢啲數字只係計 Apple App Store 同 Google Play 嘅官方 download,唔包括喺第三方 Android 市場下載嗰啲。

咁第二名又係邊個呢?🤔
原來係 Google 自己嘅 Google One,佢以將近1.05億美金嘅收入,位列排行榜第二名,相較舊年同期增長咗143.7%!😱
其中65.8%收入嚟自美國市場,日本市場排名第二,佔3.4%。
唔知係咪因為 Google 取消咗免費相片上傳而好多人「被迫」要幫襯 Google One 買儲存量呢?😑

另外,排行榜第三、四、五位分別係 YouTube、Disney+ 同 Tinder,而第六名就係騰訊視頻。

從以上名單睇到,前幾名基本上都係同娛樂有關嘅 app,當中又以睇片類為主。🎞
依家個世界咁混亂,又打仗又疫情。睇嚟大家都係想睇吓片開開心心又過一日,其他嘢都唔理得咁多啦。🤷‍♂
.
.
.

我地開咗Facebook啦:https://bit.ly/2EpllBn
MeWe一樣可以搵到我哋,快啲去加入啦!😊😊😊
https://mewe.com/p/muddleup乜都噏
HTML Embed Code:
2024/03/29 11:31:41
Back to Top