#حرق_دار_الإمام_الصادق ع
#طور_تمنيته_يدوم الليل / وغيره



يعين الله ابو الكاظم     
                 بداره شبت النيران
وبناته من اللهب فِزْعن
                وتِذكر فعلة العدوان


تهون مصيبتك ندري لجل عماتك ابلبرور
من ركضت ابّين الخيل بين النار اويلي تدور
قِلِت يا نار عسى كِنتي برد وسالمه الخدور
ولا طِلعن من الخيمات ومغطّيهن الدخّان


النّار اوياكم شعدها يبو الكاظم توّج جمره
اول دار حرقوها لأمك فاطمة الزهره
وثانيها خيام حسين أصعبها على الحُره
وشماته وسوط على المتنين بعد ما  أحرقوا الصيوان

#قيل للصادق ممّن هذا التأثر والبكاء , أمِنْ جرأة القوم عليكم أهل البيت ،وليس منهم بأوّل مرة ؟
فقال الإمام ع: (( لا ، ولكن لمّا أخذت النار ما في الدهليز , نظرت إلى نسائي وبناتي يتراكضن في صحن الدار من حجرة إلى حجرة ،
ومن مكان إلى مكان هذا وأنا معهن في الدار
فتذكّرت روع عيال جدّي الحسين
يوم عاشوراء لمّا هجم القوم عليهنَّ ، ومناديهم ينادي : أحرقوا بيوت الظالمين


من حِجره لعد حجره مرعوبات وانا يمهن
بيش النار نِطفيها  بيَاااا حيره واصد إلهن  
وعمتي والنسه ابعاشور  وحدهن لا زِلم عِدهن
وبريتي أشم دخان واظل اتذكّر العطشان


🖊خادمة أبي الفضل

▪️شيخ الجعفريه▪️

في مصاب الامام الصادق عليه السلام


شيخ الجعفريه غمض اعيونه
شمسوي العدا والمن يسمونه
———
ابشيخ الجعفريه انفجعت احبابه
تجوينه المسيه لوعة امصابه
هالليله  تصيح وكلها عد بابه
شمسوي وعليمن  بيه يفجعونه
———
شيخ الجعفريه شايل الليله
مسموم وركد يا ويلي كل حيله
ذابت بالسموم  الجبده وادليله
ابن المصطفى والمن يعذبونه
——-
زرقه هالشفايف صفره الوانه
تسعر بالقلب ياجمرة احزانه
ذوبها القلوب ولوّع اخوانه
ليش الياسبب شنهو اليطلبونه
———
انعزيها الزچيه ابسادس اليمه
بالماتم تون واتصيح يايمه
يسعر بالقلب والله الولد همه
يسگوني المرار وسمه يسگونه
———-
مدري المن انوح والمن اللوعه
وبيمن يالولد يايمه مفجوعه
لمصابك اون للكسروا اضلوعه
لو لاخته السبيه التون محزونه
——-
يايمه مصاب احسين شيحمله
واعيوني دماها القصته اتهمله
روحي كل صباح وكل مسا تونله
ظامي بالفلا اموذر يخلونه
———
بنت الشمري

نعي
في مصاب الامام الصادق عليه السلام

ابوذيه

بجعفر دليلي الليله ينصاب
ودمعي على الوجنات ينصاب
اعليك الماتم ابهالليله ينصاب
انصبه بالسموات العليه
———
مجردات

تبجي الزچيه ابدمع همال
سمك يجعفر يشده البال
فطر دليلي وعذب الحال

امصابك ييمه رجن الكون
زرقه الشفايف اصفر اللون
عميه ياجعفر ريت العيون

عليمن يسمّك ليش منصور
خله الدليل وروحك اتفور
كلكم ذبايح وسط القبور
———-

الفراق

آ ياجعفر    يمه ذوبته دليلي
آياجعفر    منهدم قبلك ياحيلي
آ ياجعفر    دمعتي المن تسيلي

آ يا جعفر     اتنازع اتشوفك عيوني
آ ياجعفر     يمه من سمك رووني
آياجعفر     بيك يمه ايلوعوني

آياجعفر    دمعي المن يمه اسيله
آياجعفر   وكلكم املوع دليله
آياجعفر   مابيديه يمه حيله

آياجعفر     حسين هو اللوعاني
آ ياجعفر    امصابه  بفادي جواني
آياجعفر    وانت مثلي هم تعاني
———-
بنت الشمري
٢٠٢٤

نعي توسل
بالامام الصادق عليه السلام


الجفيري

يالحاير ودمعك همول
انخه الزكي وابن الرسول
ماتبطي والحاجه تنول
جعفر امام الرافضه

يالدمعك ابدا مانشف
حملك عليه ذبه ويخف
نبع الكرامه المايجف
جعفر امام الرافضه

ابن الزجيه وحيدره
ابو الكرامه الظاهره
ايسر الدليل ويجبره
جعفر امام الرافضه
———-
مجردات

انخه المسيه صادق الال
يدري ابدليلي ايشوفه الحال
جيته اشتكيله امن الزمن مال

ادري عليّه ابعطفه ايجود
ودافي الزمان اعليه ايعود
ايبرد القلب  وايعلي السعود

شيخ الايمه وبابه مفتوح
يسمع ونيني ويدري بالنوح
ايطيب دليلي ويشفي الجروح
———
الفراق

آ يا والي    ابدمعتي دقيته بابك
آيا والي      انتظر  منك جوابك
آياوالي      ابجاه  ونات المصابك

ايا والي      ياابو الجف الطويله
آيا والي        برد اليسعر دليله
آياوالي         حملي نظراتك تشيله

آيا والي       صادق العتره  نخيتك
آ يا والي      بجف ابو فاضل رجيتك
آيا والي        قلبي عطشان إل عطيتك
—————
بنت الشمري
٢٠٢٤

قصيده في الأمام الصادق ع :

مُحْي المَجالس..يدعو العوابس..يا شيعتنه
واجِب ذِكـــرنَه..أحــيو أَمُــــرنه..يا شيعتنه
_
من ســادِس الأنـــوار...لـ اهــل البصــيره
يدعــي ذوي الأخلاق...و الـ عدهه غِيـره
أحيو أمــرنه و حـيث... بــهاي المَــسـيره
إحنـه شيــوخ النـاس... و أنتو العشــيره

التِبچيـنه عـَينه..أَجـرَه عليــنه..يا شيعتنه
واجِب ذِكـــرنَه..أحيو أَمُــــرنه..يا شيعتنه
__
عوفو الفـَحَم يا نـاس...و اخْذو الجَواهِر
الـ ما تِتْبَع اهل البيـت...خَــســرانه بـاچِر
اليحضَر مَجالس دوم...لـ الزهــره نــاصِر
الله خِــلـَـقْ جَــنّـــات...لـ اهل الشــعـائِـر

مخصوصـه هيّه..لـ الجــعــفريّـه..يا شيعتنه
واجِـب ذِكـــرنَه..أحــيو أَمُــــرنه..يا شيعتنه
__
أجْرِ البِچه اعله حسين...ماكــو شَـبيــها 
نـــاس الـ تِجي و تزور...بــاچـــر نجيها
الصلَّت علـــينه الـروح...انْسَــلِّم عــليها
و الـ ما تِحــبْنَـه بــيوم...شنـسوي بيـها

و الـ ما نريـــده..محَّد يــفيـده..يا شيعتنه
واجِـب ذِكـــرنَه..أحــيو أَمُـرنه..يا شيعتنه
___

صـوت الرزايه ايعيـش...بيــكـم نسمــعه
اليمشي بضوانه انصير...في گبره شمعَه
بـــالأخـــــره ويـــــــاه... لا ما نِضَــيْعـَــه
و الي حيـــاته اذنـوب...تشفــعله دمعــه

لا مـــا نعــوفه..التلطم چـفوفه..يا شيعتنه
واجِب ذِكـــرنَه..أحــيو أَمُــــرنه..يا شيعتنه
___
شاعر كتبــله بيــت..و عــاش الرزيــه
يهديلــه جنّـه هناك..حــامــي الحمـيّه
واحد كتب لحسين..بچـــه الــزچــيّـه
(يبن أمي عالتربان..عِفــتَـك رمـــيّـه)

كل الخِدمنَـه...بالجنَّه يمْنَــه...يا شيعتنه
واجِب ذِكرنَه...أحـيو أَمُـرنه...يا شيعتنه
____
قِيمو المجالس دوم...هــذه الـ نِــريــده
أنه الـبِـديــتْ بهــاي...يـ اهل العقـــيده
حاچيت أبو هـــارون...بـهــاي القـصيده
بيت الْي بيهْ حسين...يـا مُــلا عِــيــده

المنطينه گلبه...جـداً نحـبّه...يا شيعتنه
واجِب ذِكرنَه...أحيو أَمُـرنه...يا شيعتنه

الشاعر حاتم صبري الكاظمي

واويلاه .. واويلاه  
صادق العتره رحل
@@@
على المولى السلام .. الامام ابن الامام 
رحل عنه وتركنه ابجرح ينزف دمه 
ابفگد نوره الامم .. تعيش ابكل ألم 
ولا سهله يسافر ابن من فاطمه
…
نور الدين .. ابچف البين 
اخذ عمره الاجل  
@@@
عرش الله حزن .. على نور السنن
ابوموسى ولينه اخذ عمره الاجل
الوحي باسمه هتفه .. على عمره وسف
وبچت ليه الشريعه مثل مير النحل
…
يبچي الروح .. عالمطروح
ابن مير النحل  
@@@
على الشيعه قسه .. مصابه ابهالمسه
لان جعفر وليها ونهجها ابمذهبه 
وگف نبض الوريد .. وغمض عينه شهيد
وصعبه مثله ايتمدد على رمل الربى
…
وا مظلوم .. عالمسموم 
غدر بيه الجهل 
@@@
يحوزات العلم .. لضريحه المنهدم 
اعلنوا اعظم  تعازي على ذاك التراب
الفقه ينعى بألم .. ابنعي هز الامم
على افراگه وبعدها هدم ذيك القباب
…
ابلا محراب .. گبره اتراب
ولا صحن انعمل   
@@@
ابگلب بينه انكسر  .. على ماي النظر 
تمنينه نجيله ابلهف عنده حضور  
لچن وسفه انوضع .. حواجز وانمنع 
وسلاسل عالايمه منعتنه من نزور
…
آه اوحيف .. حلم وطيف 
حواجز كل محل  
@@@
علي أحمد الحمود 
١-٥-٢٠٢٤
شهادة الصادق ع 

مو هسه ميت من زمان
عالداسته اخيول الجثيره
مو هسه ميت من زمان 
عالملمو جسمه بحصيره
........
مو هسه اخذني الموت اخذني صارله سنين
من يوم كالولي أنذبح عطشان الحسين
ما ظل عمر عندي بقت بس دمعت العين
ويومية ذابحني الشمر مو مره مرتين

عالبلعطش يابس لسان
اسنيني العمر صارت كصيره
مو هسه ميت من زمان 
عالملمو جسمه بحصيره

.......
الميتله مثل حسين يبقى عايش اشلون
نوحو اعله جدي اعليه ما حاجه تنوحون
اتشيع اني حسين ما ظله اليشيعون
فوك الذبح دوس الحوافر باكت امتون

ودم منحره غطه المكان
واظلوعه يا وادم كسيره
مو هسه ميت من زمان 
عالملمو جسمه بحصيره
........
عاشر محرم يا خلك  شيبلي كل حال
من عندي اخذ روحي وتركني سارح البال
من عنده شنسه انه الحرك لو سبي الاعيال
لو عمتي زينب من خذوهه امكيده بحبال

ظل عمتي ما ينشاف جان
هاي العلي كلش جبيره
مو هسه ميت من زمان 
عالملمو جسمه بحصيره

.....
ما حاضر المقتل لجن وصلتني الاخبار
سولفلي ابوي وكلي جدك طمه الأحجار
ومن كثر ما داست عليهه اخيول الاشرار
صدره اعله ظهره انطبك جدي وصار طشار

مارحمو ابسيد الجنان
الجانت الوادم تستشيره
مو هسه ميت من زمان 
عالملمو جسمه بحصيره


......
عالاقل انه ابين ناسي اوماني اوحيد
بس جدي ما ظل عنده ناصر يا أجاويد
فوك الترب مطروح ظل امسبل الأيد
وعيونه تندار الخيامه الفزعته اتريد 

حتى الزمن تاريخه خان
ما راعه حرمه ولا زغيره
مو هسه ميت من زمان 
عالملمو جسمه بحصيره
.....
جعفر الصادق انه ما ذبوحني عطشان
ولا سلبو مني ثيابي وصرت عريان
ولا جسمي ظل ابكربله اموسد التربان
من غير تغسيل وجفن من غير دفان

ذبحو اويه حسين الامان
من سلبوه ذيج الظهيره
مو هسه ميت من زمان 
عالملمو جسمه بحصيره

......
كلمات
✍ موسى الخادم

القصيدة نزلة على لحن قصيدة ملا باسم الكربلائي ..يرواي ياباالفضل 👇



البُعدنـار يالمنتظر    الك ثار يالمنتظر  
-----------------------
وين يامهدينه        الجيتك اشتاكَينه
ياهو ينسه حسينه   وضعنه المسلبينه
اشكَد الك حنينه    الدنيا ضاكَت بينـه
البُعد ناريالمنتظر      الك ثار يالمنتظر   
-----------------------
يمته تاخذ ثارك     يالله وين انصارك
لسه تلهب نارك       خـل يهد بتــارك
ضيعينه اخبارك      تزهي يمته انوارك
البُعد ناريالمنتظر      الك ثار يالمنتظر    
-----------------------
اكَبور الك مهدومه    اخيام الك مضرومه
هامه الك بالحومه    بالعمد مهشومه
وزينب المظلومه    يمته سيفك يومه
البُعد ناريالمنتظر      الك ثار يالمنتظر    
-----------------------
يمته يامهديها       بالعـدل تمليـها 
المن امتانيها       كَوم صول اعليها
رايتـك عليـها       محد ايصفيـها
البُعد ناريالمنتظر      الك ثار يالمنتظر    
-----------------------
اتجاهلو لوجودك   اتعدو على حدودك
يالله وين اجنودك       بيها بَيـن زودك
كَوم وفي عهودك      وشمرلهـا زنودك
البُعد ناريالمنتظر      الك ثار يالمنتظر    
-----------------------
برايتك نتباها          كربله اتعناها
عالنهر تلكَاها        تلكَه چف اوياها
والله ماننساها        مخضبه بدماها
البُعد ناريالمنتظر      الك ثار يالمنتظر    
-----------------------
الله بيها العالم       طلعتك يالقائم
طلعو اشچم ظالم       ذبحو اشچم قاسم
عدنا كلسا حاكم       يبوكَ قوت الوادم
البُعد ناريالمنتظر      الك ثار يالمنتظر    
-----------------------
ياعلامه البيها        تطلع انتانيها 
جنود بس ناديها       بالحشد تلكَيها
المنبر مربيها         محد ايلاويها
اليُعد ناريالمنتظر      الك ثار يالمنتظر    
***
طلعت اشجم رايه   اتصيح اني الآيه
يريد نمشي برايه    تعرف انت الغايه
مو تعبنه اهوايه   يمته تخلص هايه
البُعد ناريالمنتظر      الك ثار يالمنتظر    
-----------------------
حيدر حسين الكرعاوي

▪️في استشهاد الإمام الصادق (عليه السلام)


يا مُهْجَتي ذوبي ويا عينُ اسكُبي
فلقدْ قضى غدراً رئيسُ المذهبِ

وتوشَّحي يا روحُ جلبابَ الأَسى
للطَّيِّبِ ابنِ الطَّيِّبِ ابنِ الطَّيِّبِ

فُجِعتْ بهِ أمُّ العلومِ فلَمْ تَزلْ
حزْنى تُجافي نَوْمَها بِتَقَلُّبِ

وتقوَّضتْ بالرُّزءِ أعْمِدَةُ الهُدى
فبهِ رمى المنصورُ أقصى مأرَبِ

طلَبَ الرِّضا من آل بيتِ محمدٍ
وسِوى أذاهُ بآلهِ لَمْ يَطْلُبِ

أيموتُ جعفرُ للسمومِ مقاسياً ؟!
ما أظلمَ العلياءَ دونَ الكوكبِ !

كمْ مرَّةٍ قطعوا عليهِ صلاتَهُ ؟!
كمْ مرةٍ جاؤوا بهِ منْ يثربِ ؟!

شيخاً كبيراً أوقفوهُ حاسراً
أينَ النبيُّ يراهُ ؟ أينُ أخو النَّبي ؟

ما زالَ يشكو وحدةً وتَقَلْقُلاً *
لكنْ يهونُ الصعبُ عندَ الأصعبِ

إنْ يَذكُرِ المولى حُسيناً مُفْرَداً
والصحبُ بينَ مترَّبٍ ومسلَّبِ

كمْ ذا "أبو هارونَ" أجرى دمعَهُ
لمَّا دعا "يا مرْيمٌ قومي اندُبي"**

فحسينُ أمسى رأسُهُ فوقَ القنا
والجسمُ تحتَ الخيلِ ساحَةَ ملعَبِ

لمْ يرضَ إلاَّ أنْ يرافقَ ظعْنَهُ
قاسى كما قاستْ نساهُ في السَّبِيْ

عينٌ تسيلُ لمَا ترى برُقيَّةٍ
وتسيلُ أُخرى للحجابِ الزيْنبي..



*وروى الكشي عن عنبسة، قال: سمعت أبا عبد الله عليه السلام يقول: أشكو إلى الله وحدتي وتقلقلي من أهل المدينة حتى تقدموا وأراكم وأسر بكم..الخبر
الأنوار البهية - الشيخ عباس القمي - الصفحة ١٧٠

** كامل الزيارة: ابن الوليد، عن الصفار، عن ابن أبي الخطاب، عن محمد بن إسماعيل عن صالح بن عقبة، عن أبي هارون المكفوف قال: دخلت على أبي عبد الله عليه السلام فقال لي: أنشدني، فأنشدته فقال: لا، كما تنشدون وكما ترثيه عند قبره، فأنشدته أمرر على جدث الحسين * فقل لأعظمه الزكية.
قال: فلما بكى أمسكت أنا فقال: مر فمررت، قال: ثم قال: زدني [زدني] قال: فأنشدته:
يا مريم قومي واندبي مولاك * وعلى الحسين فأسعدي ببكاك قال: فبكى وتهايج النساء قال: فلما أن سكتن قال لي: يا با هارون من أنشد في الحسين فأبكى عشرة [فله الجنة] ثم جعل ينتقص واحدا واحدا حتى بلغ الواحد فقال: من أنشد في الحسين فأبكى واحدا فله الجنة ثم قال:
من ذكره فبكى فله الجنة.
وروي عن أبي عبد الله عليه السلام قال: لكل سر ثواب إلا الدمعة فينا.
كامل الزيارات ص ١٠٦

الشاعر علي عسيلي

#الامام_الصادق
#اللهم_عجل_لوليك_الفرج

هوسات للوداع


وداعك ياوداعك مااريدنه
سهم ويگطع الدلال اهيسنه
فك يحسين صدرك خل اشمنه
(( وصتني بهاي المظلومه ))


وصتني الزچيه وگالت الزهره
گبل الموت شمي حسين من نحره
مثل صدري يزينب ينهشم صدره
(( واتدوس اضلوعه الخياله ))


عشر اخيول گالت تسحگ اعله حسين
وبصدره يزينب ضلع ماتلگين
اجه اليوم الخفت منه وفجعني البين
(( من توگع شيصير بحالي ))


من توگع يخويه اتمرمر اخلافك
اشوف الخيل تتراكض عله اچتافك
چا وين البطل عباس شو عافك
(( خلاك اوحيد الجيدومه ))


تعذر من نخيته ولاگعد لاجاك
ماضل بالخيم للحومه اروح اوياك
گبلك خل تحز نحري اوريدي اعداك
(( والموت امن الضيم اشوالي ))


تريد الموت روحي وماتريد تعيش
انته العين من تطيح اشوفن بيش
وحدك صبحت والتم عليك الجيش
(( والعسكر راسك يردونه ))



من ديوان الدموع الزينبيه الجزء الثامن والاربعون

لشاعرة اهل البيت
ام ريام دخيل الركابي
غير مبري الذمه من يمسح اسم الشاعره او ينسب الرثاء لشخص اخر

▪️في استشهاد الإمام الصادق عليه السلام

١/مَنْ يُعزِّي الصدقَ فالصادقُ ماتْ
بِذُعافِ الغدرِ منْ شرِّ طغاةْ
قد بكتهُ الباقياتُ الصالحاتْ
لتواسي عترةَ الهادي النذيرْ

٢/إنَّهُ في يومِ طٰهَ وُلِدا
وَبُسمٍّ مِثْلَ طَـٰه استشهدا
كانَ بينَ الناسِ نبراسَ الهُدى
آهِ لكنْ جحدوهُ كالغديرْ

٣/طالما استدعاهُ منصورُ الشقاءْ
ما رعى حرمةَ خيرِ الأنبياءْ
ضيَّقَ الأرضَ عليهِ والفضاءْ
فغدا ذو اليُسرِ في حالٍ عسيرْ

٤/لهفَ نفسي إذْ أتى أرضَ السَّوادْ (العراقْ)
"وارِثاً" زارَ بدمعٍ كالعِهادْ
أبكى صدراً رضيضاً بالجيادْ ؟
أمْ على الصدرِ بكى النَّحْرَ الصغيرْ ؟

٥/ناحَ للسبطِ ولكنْ في الإيابْ
خِلْتُهُ ناحَ على أمِّ الحجابْ
رجعتْ من كربلا تنعى الشبابْ
بعدَ سبيٍ شاهدَتْ فيهِ الكثيرْ !

٦/كمْ تمنَّى مثلَها طولَ المُقامْ
علَّهُ منْ دمعِهِ يسقى الإمامْ
قدْ سقاهُ حرْملٌ حرَّ السِّهامْ
وأتاهُ الشمرُ بالكأسِ الأخيرْ..

الشاعر علي عسيلي العاملي

#الامام_الصادق
#اللهم_عجل_لوليك_الفرج

قصيدة مقدمة مجلس للإمام الصادق ♤ع♤

☆۰☆۰☆۰☆۰☆۰☆۰☆۰☆۰☆۰☆۰☆۰☆۰☆۰☆


         وين الذي گال  .......... يا صادق الآل

          في أمان الله ......... في أمان الله

☆۰☆۰☆۰☆۰☆۰☆۰☆۰☆۰☆۰☆۰☆۰☆۰☆۰☆

وين الذي يبچي إله  ........ بحسره ودموعه هامله

بصوت الموالي يندبه ........ مات الامام إعله الملا

       و دمعه جمر  سال  ........يا صادق الآل

          في أمان الله ..........في أمان الله

☆۰☆۰☆۰☆۰☆۰☆۰☆۰☆۰☆۰☆۰☆۰☆۰☆۰☆

وين الذي يجري الدمع .......لجعفر دليله منصدع

وي فاطمه هذا المسه .......... ذيچ الگلبها منفجع

       للزهره مرسال  ..............يا صادق الآل

         في أمان الله .......... في أمان الله

☆۰☆۰☆۰☆۰☆۰☆۰☆۰☆۰☆۰☆۰☆۰☆۰☆۰☆

وين الذي بس يذكره ........ دمعه على  خده  جرى

وجهه الکریم الی یشع ..... هذا المسه تحت الثرى

         وبيت العلم شال  ......... يا صادق الآل

            في أمان الله........... في أمان الله

☆۰☆۰☆۰☆۰☆۰☆۰☆۰☆۰☆۰☆۰☆۰☆۰☆۰☆

وين الذي  بي يأتمر ......... ويحيي  الى جعفر أمر

ينشر علومه ومنهجه ....وفي خدمته  يخلص عمر

        ويعلم أجيال ............. يا صادق الآل

            في أمان الله......... في أمان الله

☆۰☆۰☆۰☆۰☆۰☆۰☆۰☆۰☆۰☆۰☆۰☆۰☆۰☆

وين الذي  صاح بألم  ........وبوجهه عاشور إنرسم

للصادق الخلص عمر  ..... يبچي على حرگ الخيم

      وللشافت أهوال ......... يا صادق الآل

           في أمان الله ..... في أمان الله

☆۰☆۰☆۰☆۰☆۰☆۰☆۰☆۰☆۰☆۰☆۰☆۰☆۰☆

وين الذي هل مدمعه  ........يبچي إله ويبچي معه

للظل غريب  بكربلا  .........جثه   سليبه‌  مگطعه

     وزينب والاطفال ......... يا صادق الآل

            في أمان الله ....في أمان الله

☆۰☆۰☆۰☆۰☆۰☆۰☆۰☆۰☆۰☆۰☆۰☆۰☆۰☆

       الشاعر
جهاد البصيراوي

⬛️🔳القصيدة-5-🔳⬛️

وفوقَ  تِـلآل ِ المجدِ طُـّراً تربَعُوا
   علىٰ ذاكَ أهلُ العقل ِوالدينِ أجمَعوا
هُمُ الحقُ والإيمانُ والنورُ والهدىٰ
            عليهِم يُصلي الله ُوالخلقُ تتبع ُ
وهُم عترةُ المختارِ طـهٰ وآلُـهُ
             وكلُ  مَديح ٍ  بعدَ  ذلكَ  يُقطع ُ
دهتهُم رزايا فرّقتَهُم وهاهــُمُ
           ضحايا غدَوا بين البقاعِ  توزعوا
فكم أُشبِعُوا من آلِ حربٍ مَظالِماً
          وجورُ  بني العباسِ فيهِم لأفَظع ُ
فذا صادقُ القولِ الموقرُ جعفرٌ
           إمامٌ  عظيمٌ  وهوَ  للعلمِ  منبَع ُ
لهُ شَهِدَت كلُّ المذاهبِ بالتقىٰ
           وكانت إليهِ في  الشريعةِ  ترجِع ُ
بهِ فتكَ المنصورُ شُلّـت يمينُه ُ
             يُجَرّعُهُ     الويلات ِ ثمَّ     يُلوّع ُ
ولمّا سقاهُ السُمَّ في عِنبٍ سَرىٰ
             بأحشآءهِ  والقلبُ منهُ   يُقَطّع ُ
إلىٰ أن قضىٰ والكونُ ضجّ لموته ِ
        وموسىٰ ابنُـهُ بالحُزنِ عيناهُ تدمعُ
أيا جعفرٌ نادىٰ عليهِ ووالدي
             لأجلِكَ  أعلامُ  الحداد ِ ستُرفع ُ
وبعدَكَ أفآقُ المعارفِ عُطلَت
           وفي قبرِكَ الأسرار ُوالعلم ُيودَعُ

#سمير_الصالحي
#النجف_الأشرف


⚫️ نعي - موشح
حال الإمام الكاظم ع

ياحسافه  تموت  يالصادق  غدر
وتگضي نحبك بيد منصور  الكفر
وابنك   الكاظم   فلا   ظله   صبر
يصيح   بعدك  نبقى والله بحيره

شنهو   ذنبك  تنسگي  بسم  نجيع
وانت  فضلك ظاهر  وعم   الجميع
خايف اعله الناس من عگبك تضيع
لاچن    الله    العالم    بتدبيره

لفرگتك   ياوالدي   اهتزت  جبال
واظلمت دنياي  من غاب الهلال
ودمعي دم لاجلك تراهو عليك سال
وهضمتي بهل اليوم حيل اچبيره

⚫️ نعي __ مجردات

آنه   الزچيه  وام   الاولاد
كل  گبر  منهم صار  ببلاد
منهم اليمي ومنهم  ابعاد
ادورن عليهم والحزن زاد
مدري  زماني مني  اشراد
فَرّگ اولادي وگلبي ماهاد
——————
⚫️ نعي - مجردات

أدور بالقيع وابچي  من دم
عله الصادق وچبده المسمم
مهدوم گبره  وصاير  اظلم

#سمير_الصالحي
#البصرة_الفيحاء

شيعه احنه لطه واله جعفريه 
حبهم ابدمنه .. حبهم ابدمنه
@@@
 احنه بايعنه وثبتنه بهذي بيعه 
حب اهالي البيت بينه مانبيعه
من نبينه وي وصيه والوديعه  
نفتخر صرنه بولاهم احنه شيعه 
…
اكبرنه واربينه .. حبهم ابدمنه
@@@
جعفريه وهذا اصلاً نهجنه 
وباثنعش آل الهدايه حججنه 
ارخيص الهم نفدي نابض مهجنه
حتى يظهر للبريه فرجنه 
…
والعهد بينه  .. حبهم ابدمنه
@@@
جعفريه وهذا منهج نبينه 
واحنه بالمنهج يوادم وفينه 
جعفر الصادق اليه انتمينه 
ونفتخر گالوا روافض علينه 
…
متنه وحيينه  .. حبهم ابدمنه
@@@
ياللي تسأل عندي شنهي الاماني
ترى بالعتره كتبت المعاني  
ومن كثر حبهم نقشت ابجناني 
جعفر الصادق وجودي و كياني 
…
ديني من دينه  .. حبهم ابدمنه
@@@
انا گلبي بالبقيع الجريحه 
من ازوره بالمدينه ابصبيحه 
وشتماني اللي ميعرف نصيحه 
يگول نشرك لو بنينه ضريحه 
…
مادره بينه .. حبهم ابدمنه
@@@
علي أحمد الحمود 
٢-٥-٢٠٢٤
شهادة الصادق ع 

غالي الخواتة يالاخو يذكرونة
عباس اخونة  الهيبة ميوصفونة
@@@@@@@@@@@@@
زينب إنة ابنيت علي  اموصاية
من كافل اخدور الحرم هالراية
ياهو اليشبهة امن البشر حچاية
افعالة تشهد بالحرب يدرونة
@@@@@@@@@@@
غالي الخواتة وتدري بيه الديرة
بس ابو فاضل عندة  هيچ الغيرة
ما ينطي بينة  وما شفت تقصيرة
ماي وهوى وبغيبتة موتونة
@@@@@@@@@@@@
فدوة الكلامة ويا هلة بفعالة
العندة گمر يضويلة يا هنيالة
ما دامة اخوي وراسي عالي وبجالة
بيوم الرحل والهسة ضلمة بدونة
@@@@@@@@@@@@@
كل ساعة يكبر بيه حزن افراگة
ما اگدر انسة وناري الحراگة
مشتاگ يا روح الاخت مشتاگة
زلمة وكلف بالشدة ويندبونة
@@@@@@@@@@@@@@
ما يعرف افراگ الآخو واحزانة
الما عندة عباس الگمر واخوانة
حيد وكلف محلاتة چان ويانة
مدلل خواتة  واحنة بي حسدونة
@@@@@@@@@@@@@@@@
راكب فرس لو يمشي تهتز گاعة
وارثها من حيدر علي اطباعة
جمر الگلب ما يطفة ساعة وساعة
حگي امن انوح  وفارگتها اعيونة
@@@@@@@@@@@@@@@
كلمات حسن جابر السعيدي

استشهاد الإمام جعفر الصادق عليه السلام وذكرى حرق داره من قبل حكام عصره على طور (لوطير ونيت معذور لباسم الكربلائي)

يخفون - يازيف  - مكشوف
مولاي – هلحال   - معروف
دخان  - والنار - بالبيت      
مهموم -  مولاي - ضليت
راووك - عاشور  - واطفوف
مولاي -  هلحال  - معروف
★★★★★
عدوان  -هلبيت  - وجوه  - بالنار
خلوك – مهظوم -  للدوم _ اشرار
ووجوه - صبيان  - ياصوب - تندار
رضعان - نسوان  - يبچون -   بالدار
طفيت هلنار يانور    
هديت كل حال مذعور
واطفال يبقون بالخوف
مولاي هلحال معروف
★★★★★
ياحيف - اذناب - وتصير - اسياد
علخير -  والطيب - يخفون -  احقاد
جَلَّاد  - ملعون  -مذموم  -من راد
لطفوف  - بالبيت -  هليوم -  تنعاد
لطفوف تنعاد هليوم  
وحسين من ماي محروم
وعباس لاعين واچفوف
مولاي هلحال معروف
★★★★★
من جيت – بلخير- للناس- معلوم
بدروس - للدين - يدرون - معصوم
يردون - اوثان – واصنام  -  للدوم
والدين – مكسور – مخذول - مهظوم
تشريع انطيت واحكام     
وبنيت تاريخ واسلام
وانطوك طعنات وسيوف
مولاي هلحال معروف
★★★★★
يانور – ياخير -  للناس -  موجود
محفوف- باخطار- حراس - وجنود
للناس - تعليم - واحكام -  مقصود
يردون – تنهار- وبحيل  -  مهدود
اشرار يردون  مولاي   
هلناس لادين لا راي
شافوك للدين موصوف
مولاي هلحال معروف
★★★★★
ابشوال - وبأيد  - انذال -  مسموم
اغتالوك-  مولاي- وبيوم -  معلوم
تنفيذ – اقوال  - سلطان —- مأثوم
رادووك – للموت  -  وابقيت-   للدوم
وبقيت للدوم نبراس    وبنيت احكام للناس
يانور باخطار محفوف
مولاي هلحال معروف

الشاعر حسن لعيبي الحريشاوي

في مدح الإمام جعفر الصادق عليه السلام

اتعلمت من الامام الصادق.
اتبع العتره وكتاب الخالق

علماني دوم اوفي بالعهد 
ومنهجه تقويم للروح وسند
والتزم درب الفضيله للابد
ولا انانيه ابحياتي ولاحسد
لساني بالحق والمعارف ناطق
تعلمت من الإمام الصادق

اتعلمت منه نصايح من ذهب
لافخر بالروح ابدي ولاعجب
راحة الانسان تبدي من التعب
لوعرف بين الوجب والماوجب
ودوم ما امشي  وره كل ناعق
اتعلمت من الإمام الصادق

علماني اتوكل بيوم الصعاب
بخالقي لوصارت الدنيا عذاب
صارت أيامه مثل لون السراب
الماتمسك بالامامه  وبالكتاب
عزمي ثابت  وبكلامي واثق
اتعلمت من الامام الصادق

علماني بسيرته ونهجه الصحيح
انهض شمارادت الدنيا اطيح
مااجامل ظالم و قولي صريح
وبوجه مذموم ماعندي مديح
ارفض الشر وعليه ماوافق
اتعلمت من الامام الصادق

أعبد الخالق.   واسلمله الامر
وبرضا الخالق اگضيه العمر
من أمامي تعلمت أنا اشكثر
فدوه إله ايامي والعمر اليمر
الدوم فضله بالمعارف سابق
اتعلمت من الامام الصادق

هو من نهج الحبيب المصطفى
الشرح أحكامه بدرايه ومعرفه
رجع بالخسران كلمن خالفه
دوم مايهتز حكيم ابموقفه
الرَّجْع الباطل ذليل وزاهق
اتعلمت من الامام الصادق

الشاعر حسن لعيبي الحريشاوي