من خلـصت الزياره ما نشفـت العين
من طاحت المواكب اشتاگينه لحسين
يا ابو علي مشكور عالخدمة
____________________
تذرف ادموعه .. الخادم ابـلوعه
من يفلشون الموكب يـرتعش كـله
دنيا ما تسوه .. وعشرتك حلـوه
حسين عيشني ابجروحك جرحك الاغله

عمري بس وياك اعيشنه بكرامه
ارزقني يحسين الزياره والخـدامه
الما يحس ابلذتك ايعيش ابندامه

مني اخذ كلشي وانطيني دمعات
يوميه يحسيني تخنگني حسرات

يا ابو علي مشكور عالخدمه
__________________
بگلبي احچيلك .. سيدي ادخيلك
قوي حيلي وياك لتخليني واهـم
اصعب ايامي .. تدري يالضامي
من اشوف الخادم ايودع ابخادم

جرحك امكبرني والسواني اسمك
وانه كل همي المجالس حته اخدمك
كـون اگضي العمر يابو سكينه يـمك

ما تخلص الخدمه حد گطع الانفاس
ولو بردت اجروحي يقويني عباس

يا ابو علي مشكور عالخدمه
__________________
شحجي والبيه .. كلش شويه
وانه شمقدملك ومنطيني كلشي
عندي بس انته .. والعمر سكته
كلها عايفها واريد ابدربك امشي

فدوه دليني الدروبك يامناي
والله يابو سكينه بس انته هواي
ياشمس كلبي اريدنك ضواي

ابضجت الدنيا تستوحش الروح
من اوصل الگبرك اطيب الجروح

يابو علي مشكور عالخدمه
____________________
روحي متعوده .. ارزقني العوده
كل سنه خليني اخدم بالمواكب
خدمتك ديني .. فدوه خلـيني
اخدم ابزوارك وانتـه تـراقب

كلشي منك يختلف حته الجراح
من اتعب ابخدمة الزاير استراح
وياك يامحله يمولاي النـياح

يالملموا جسمك بذيج الحصيره
لتمينه بخيامك وصرنـه عشيـره

يا ابو علي مشكور عالخدمه
_____________________
بأخر ايامك .. احجي كدامك
حچايه عندي واختصر بيها النهايه
والله احبنـك .. وما امـل منك
وبالختام النيـه هم نفس البـدايه

يالمتت ضامي لجل عين العبـاد
راح اضل ابثوبي ما ابدل السـواد
وكل حياتـي وياك اسويها حـداد

ما تبرد اجروحك والدمع عندي
من المهد يحسين لجيـة المهدي

يا ابو علي مشكور عالخدمه

#سيد_محسن_الجابري

يا نبي الرحمه يا سر السمه
الدين عاش بأسم والدفاطمه
~~~~~~~~~~~
الدين عاش بأسم خاتم الانبياء
شكثر انطه اجروح واتحمل عناء
اليوم مفجوعه بمصابك هالسماء
والأرض حزنانه كلها ومضلمه
~~~~~~~~~
يالترف طبعك ولا مثله طبع
يا ثكلها جدامك الما تنسمع
يا سلاسة حجيك بنص الربع
زمرة الأحقاد ذيج الضالمه
~~~~~~~~~
خلصت ناس شكثر من الضلام
ناس جانت لا حلال ولا حرام
بيا مكان تروحله تخضر كلام
ايقضت ذيج العقول النائمه
~~~~~~~~
يالي شخصك بالوصف ما ينوصف
يالي خيرك فايض وكلك عطف
ابيتك القران خط اول حرف
وكمله بعدك علي حامي الحمه
~~~~~~~~
للفقير اتصير يالهادي وطن
واليتيم اتحسبه جن مثل الحسن
انطيت كلشي وثبت هالدين بعلن
وأسست بيت الكساء الفاطمه
~~~~~~~
فاطمه بعدك تره تبجي وتكول
بعد عمرك كون عمري مايطول
ضاجت الدنيا بدمع هاي البتول
وبنت بيت احزانها بحزن السمه


سيد محسن الجابري

#ميمر

اليوم السمه .. تذرف دمه .. تنعه اعله والد فاطمه
والعنكبوت البالغار يدمع حزن لزهره
~~~~~~~~~~~~
نادت الزهره مودع الله الغالي
عكبك صفه بس الحزن يبرالي
ريتك تشاهد بويه بعدك حالي

طگني ودفع بابي و وكع ومن عندي جن محسن طلع
ونيران يابويه هواي وشحجيلك اعله السطره
~~~~
خانوا وصيتك يالنبي وغدروها
ودار الوحي بعدك تره حركوها
وبتك يبويه العده حيل اذوها

الكون انعمه وسابع سمه بحكم السقيفه الضالمه
للعالم يريد الخير لبيت النبي يبث شره
~~~~~
أتكله بويه فدوه ارحم بنتك
ريت العمر يابوي يخلص بعدك
وياك اعيش وكون اموت ابلحدك

رغم المحن وجور الزمن كللها يا ام الحسن
انتي اول وحده تعيشين يمي وتطول النظره
~~~~~~
دمعت الزهره بهالخبر وبتشرت
بنفس الدقيقه ناحت وهم فرحت
فسريلي كلها عيونج المن دمعت

دمعي الترف وبابي الصلف ومصابك اهوايه كلف
براحه اشعر وياك وبدونك اهوه الحسره
~~~~~~~~
من ونة حسين الحجر ون وياه
والحسن بهروش الكلب ضل ينعاه
وزينب بعدها زغيره وتصيح اااه

سيل الدمع مثل الشمع وبحركه تلطم عالضلع
ما تطفه بضلوعي الاه وبكلبي وجت جمره
~~~~~~~~
الدنيا بعدك سيدي حزنانه
والعين من كد الدمع ذبلانه
والمهدي حاضر هم نحس ويانه

يبجي ويحن ينعه ويون ومخضر بكلبه الحزن
والمجلس يترسه ادموع ويواسي ذيج الحره
~~~~~~~~~~
سيد محسن الجابري

ميمر لسيده فاطمه المعصومه ع

هالدنيا لو ضاگت بيك اتوجه المعصومة
_________________________
بهالدنيا لو مشغول كلش بالك
وحالك تغير واختلف كل حالك
اگصدها واتشوف العجب بفعالك
تكشفلك اهواي اسرار وتسرك المظلومه
________________________
كـل كسره البروحك ترد تجبرها
ولو عسرت الدنيا عليك اتسـرها
مكضيه كل حاجه تره الخـاطرها
سر بيها وهواي انشوف اسرار ما معلومه
________________________
بنت الامام المايرد كل طلبه
اخت الرضا المعروف يگضي الصعبه
عمة الجواد اليشفي من العتبه
انخاها لو طحت بضيج متردك المهمومه
_________________________
انخاها يازاير واجري العبره
وحلفها بمصاب الزجيه الزهره
حاشاها متردك وتشفي ابنظره
معروفه تكضي الحاجات وثق حاجتك محسومه
_________________________
انخه النقيه بـگلب كلش مكسور
وخلي الدموع اتسولف بهالمستور
بحضرتها تتذكر مصايب عاشـور
وحدها تذرف لعيون من تذكر المهضومه
_________________________
قصتها تفجع والوجع من راحت
وجاها الخبر مات الرضا وهم ماتت
الله يساعد زينب اشگـد شافـت
شافت حوافر والروس وماتت واهي ملچومه
__________________________
سيد محسن الجابري

#موشح لمولاتي الزهراء ع

صبت عليه المصايب كالمطر
ورايده اوصيك يافارس مضر
_________________
اباب ابويه بلاذنب طفلي انفرش
وانكسر حيلي وعمر بثمنطعش
من تغسلني وتجهز هالنعيش
ابليل سر تدفني كون بلا بشر
__________________
من تغسلني يبو گلب السمح
اعله هونك لا تفززلي الجرح
دمعتك طاحت عليه جنها الصبح
وانته كل ليلك تخلصه بس سهر
__________________
بعد ما تدفني واتخلص الدفن
تقره ايات الله يمي بكل حزن
وانه اسمع صوتك ابأذني واون
وأنْظُر الزينب تفز من القهر
_________________
إنْظْرْ الزينب يغالي بلا فجع
ولا تحسسها بغيابي المنكطع
ترفه زينب وابد ما تحمل دمع
الها وكت وتنفجر يم النهر
_________________
وللحسين احجيلك وكلي ضمه
لا تسولفله بمأسي فاطمه
يذكر اطفوف المصايب والدمه
وترتوي هالدنيا من دم النحر
_________________
والحسن يابو الحسن ينكط كرم
الجبير الضحه وبكلشي انحرم
الوحيد الحته تشيعه انظلم
وانجتل مسموم وبچبده انفجر
________________

#سيد_محسن_الجابري

قصيدة لشهادة مولاتنا الزهراء عليها السلام
على وزن ( رحنه بضعينه )

باب الزجيه .. هم غاضريه
نـار الخيم .. نار الباب .. معروفه نفس الاسباب
نفس القضيه .. هم غاضريه
_________________________
هاي العقيله الشافت جروح اكثار
يشرح دمعها النه بالبيت اشصار
من زغر سنها وكبرت وياها النار
شافت عدوها يحرك اباب الدار

شافت عجايب .. ام المصايب
ضلع امها وضلوع حسين .. ومتبطل ادموع العين
صبح ومسيه .. هم غاضريه
____________________
شافت سوالف ينكسر منها النوك
شافت رعب بالنـار چـف المحروك
شافت السطره وباب لمـن مطبوك
نفس اللي شافت يمها شافت بالسوك

دهر المـأسي .. وياها قاسي
لوعها بيت الاحزان .. وعذبها ضيم الديوان
عد ال اميه .. هم غاضريه
______________________
حيدر مـگيد بالوصيه ومهمـوم
ماعدنه غيره ودارت اعليه الكوم
بعيونه شاف الزهره تنزف الدموم
هم نفسه زين العابدين الملچوم

هم وحده حاير .. بين العساكر
متكيد ابگومه حبال .. وبصفه يمشي الچتال
اعظم رزيه .. هم غاضريه
________________________
طيحة المحسن تنوجع بيها الروح
بنبلة البسمار انذبح وكت النـوح
بالطف رضيع حسين هم روحه تروح
بسهم المنيه وهيه الجروح اجـروح

نبلة رضيعه.. وطفل الوديعه
متشابها بنفس الدور .. بس الفرق ست اشهور
ودمهم بـديه .. هم غاضريه
_________________________
بالنار هدوا والفعل وكـت الليل
والليل خلص والدمه بعده يسيل
يذكرنه بجروح العقيلـه ويـا ويـل
من شافت اعله حسين داست هالخيل

دم المناحر .. ضل بالحوافر
والحافر ابحيله ايدوس .. ومحوطه گبالي الروس
كل مغربيه .. هم غاضريه

#سيد_محسن_الجابري
#ونسألكم_الدعاء

حيدر محتار بمـره ..لعيون امنه الزهره
لعيون امنه الزهره .. حيدر محتار
____________________________
يل معلمنه الصبر .. عمرك بعازة عمر
بعمر الورده وراحت هيه .. حرام
لونك وياها انخطف .. وحيلك الكله رجف
حيلك ما يشبه راعيـه .. حرام

والله من دون الحنينه ما تضل لرسومي لون
من نهد طيحتها حيدر طيح وياها العيون
هذا حيدر هيج صاير على احواله ينشدون
هو اليفارك خليله ما يسيطر عل جفون

بخياله انشوف كسره .. لعيون امنه الزهره
لعيون امنه الزهره .. حيدر محتار
____________________________
ليلـه ما يخلص بعد .. يالي جنتيله السند
روحه بدونج ‏تلچم جرحه .. عليج
بعدج ايموت الدفو .. كون الموادع عدو
چا وذرته بهاي اجفوفي .. عليج

انه حيدر كلميني كلها من بعـدج شلي
علي ابدونج يالزجيه والله چنه مو علي
انتي روحي وبضعه مني وانتي يافاطم الي
بيتج البي جان ذكرج موحش اليوم وخلي

نشتاك بكل حجره .. لعيون امنه الزهره
لعيون امنه الزهره .. حيدر محتار
_____________________________
المارجف مره بحرب .. رجف طوله بالدرب
يمشي ويوكع من اللوعه .. عذاب
الكاسر ابسيفه الفتن .. انكسر بعد ام الحسن
وغسلها من مي ادموعه .. عذاب

راحت الزهره اليشمها چان حيدر من يطب
هسه حيدر يمشي كوه وضل يتيـه بـالدرب
چـنه دافـن روحـه بيـده لأن جانـتـلـه گـلب
جانت امي حيل تـرفه والله مو مالـت ضرب

ماتت بيها الحسره .. لعيون امنه الزهره
لعيون امنه الزهره .. حيدر محتار
___________________________
دوسة البيت وحرك .. وسطرة الخد والسحك
كلهن صارن بويه گبالي .. جروح
بابك بثگل الجذع .. كسر لمي چم ضلع
وصوبني وذوب دلالي .. جروح

انه زينب لحجي بويه وبالجرح راح امتحـن
من بعد ضيم امي والله انـه اصير ام الحزن
فكلي حضنك هسه بنتك حيل محتاجه الحضن
بيش الوذن وانته دافن حيلك وكلبك يـون

راحت ذيج العشره .. لعيون امنه الزهره
لعيون امنه الزهره .. حيدر محتار
_____________________________
بس ضلع واحد شفت .. وهيج حيل اتغيرت
لو شايفني بيوم العاشر .. شتگول
كبالي نيران الخيم .. وطاح اخويه والعلم
ولو اسولف بجروح الحافر .. شتگول

مو ضلع واحد يبويه ضلوع اخويه بكل كتر
خيول داست صدره يمي وطحنوا ضلوعه الكفر
انته يمك خوش صحبه وانه بس يـمي الشمـر
غسلتها امي وشلتها وجسم اخويه منـشمر

توذر عالگاع صدره .. لعيون امنه الزهره
لعيون امنه الزهره .. حيدر محتار

#سيد_محسن_الجابري
#ونسألكم_الدعاء

المجلسج حزمينـي .. اشبع لطم خليني
يازهراء .. يازهراء .. يازهراء ..يازهراء
_________________
نظره .. منج اتكفي عمر
زهره .. واليشمج ينتصر
حسره .. بيه من ذاك الكسر ..كون اندثر
واصبح جمر .. يــم العتبه

يم حسن سجليها .. الدمعه من اجريها
خيري كله اعليها .. وكلج خير
حققيلي احلامي .. واللطم عالضامي
انته كل ايامي .. ومالي غير

يالجرحج امـربيني .. اشبع لطم خليني

_______________________
رحمه .. ونازله علينه سبب
نسمه .. ومنج انصاغ الذهب
نعمه .. وبس الج يسوه التعب .. كلمن عتب
فكره انسلب .. مــن نظراتج

الدنيا صحره ابدونج .. افتخر مجنونج
كلشي لجل اعيونج .. فدوه يروح

يالجروحج تسوه .. نارج اشكد حلوه
من رحتلج فدوه .. وللمذبوح

لحسينج انذر عيني .. اشبع لطم خليني

________________________
كلبي .. تارس ابحزنج غصص
بدربي .. هوايه مطيتني فرص
حبري .. بسمج ابدن ما خلص ..لا مـا نقص
واللي حرص .. نــال الجنه

شحجي اضل امقصر .. بضلعي الجم و اكسر
بنارج اقره و ابحر .. كون ارتاح

انتي راحت بالي .. وانتي كل احوالي
بدون حالج حالي .. بس اصياح

دونج ضلام اسنيني .. اشبع لطم خليني

__________________________
مرايـه .. لـ الله ياوتر وشفع
هوايه .. خيرج وماينكطع
حجايه .. عندي وبلايه فجع .. دون الدمع
ما انتفع .. بيج الرفعه

مالي قيمه خلافج .. يالسترني احجابج
عمري بس لمصابج .. يسوه هواي

هي بس احجايه .. وبيها دمعه وغايه
بيضي وجهي بهايه .. الخدمه وياي

بس الدمع يرويني .. اشبع لطم خليني

__________________________
بزغري .. يمي دوم اتخيلج
عمري .. وقف خليته الــج
صدري .. كون اكسره لخاطرج .. واتوسلج
ابقه الج .. ما اتغير

دوم احسج يمي .. وكمت اسميج امي
فدوه الج كل دمي .. وكل نبضات

يمج احسد روحي .. يا اميرة نوحي
يا حلاة اجروحي .. الـبس دمـعات

الدنيا ما تعنيـلي .. اشبع لطم خليني

__________________________
رحله .. بعالم احزانج غصت
محله .. جروحج البيها عشت
شغله .. منج اغله ما شفت .. واتيقنت
لمن صرت .. خادم لسمج

فكري بسمج نوْر .. جرحي يمج اخضر
بيها سر الكوثر .. اقره وشوف

الراضيه يسمونج .. بهالاسم يدرونج
چي حنينه عيونج .. ويمها انطوف

حنيتـج التـحويني .. اشبع لطم خليني

___________________________
سيد محسن الجابري

مقطع من قصيدة | حيدر محتار |
الرادود محمد سلامات
كلمات خادمكم محسن الجابري

#كعديه

يالتبچي بمجالس عزه الزهره
بـاجر بالقيامه الـك بـشره
تـحضرك فاطمه اهناك .. وتدخلك الجـنه
________________________
عن لسان العتره اروي وبالروايات الصحيحه
كلمن ايواسي الزجيه بدمعة عيونه الصريحه
بالقيامه الزهره تحضر وبالاسم هـيه تصيحه

تكله يالدمعك جره
ارضيك دنيا واخره
وما اوكفك بالسره .. تسمع من الجنه صيحه

ادخل جنة الرحمن كلها
جي حبيت فاطم ويه اهلها
وتلكة الزهره وياك .. وتدخلك الجنه
___________________________

والنبي الهادي محمد ( ص ) أكد بأقواله ذني
قبل اجفوف الزجيه وكال فاطـم بضعه مني
فاطمه هاي ام ابيها البغضها چن بغضـني

واللي فرح فاطمه
يفرح املاك السمه
وما يشوف الحاطمه .. لأن بفعاله يسرني

هاي الجمله معناها شكبرها
يسر الله ورسوله الـلي يسرها
وتسر فاطمه هناك ..و تدخلك الجنه

___________________________

وصادق العتره يگلك هم بعد عن الوديعه
كونك انته اتصير خادم اخلص بدرب الشفيعه
بالحشر فاطمه الزهره مثل حب تلگط الشيعه

اتنصرك ابطول العمر
وتفرح بـالطم الصدر
وما تـعوفك بـالگبـر .. وماي وجهك ما تبيعه

اشكر الله عالدمعه وعليها
دنيا بلايه فاطم شلك بيها
تكلك كل وكت هاك .. وتدخلك الجنه

___________________________
العسكري عنده روايه عن رضه الزهره الحـزينه
احنه صح حجه عليكم لچن فاطم حجه بينه
يعني اهم شي رضه الزهره والزجيه شكد حنينه

ترضه عالدمعه يصب
وما تعوفك بالـدرب
وللمجالس من تطب .. گلها من عطفج روينه

تحضر بالمجالس لمن تنعه
وتسجل جروحك دمعه دمعه
وصْدك لا متنساك .. وتدخلك الجنه
____________________________
وبالروايات العجيبه نقره عن فضل الزياره
كلمن ايزور ابو اليمـه فاطمه تعـدل مساره
واليواضب عالخدامه ياخذ بأيـده البشـاره

اللي يـروح الكربلـه
الزهره تستغفر الـه
لحـد ما يوصل هله .. وگلبه يتحول مناره

بكل ازياره لـو يرتاح گلبـك
معناها الله يـاخادم يحبك

وفاطم دوم ترعاك .. وتدخلك الجنه

#سيد_محسن_الجابري

لا تتركيني اماه يازهراء .. تبكيكِ عيني اماه يازهراء
ابگلبي صارت نارين .. رجعي لعزيزج لحسين
_______________________
يزهره مو مال فراك .. كل لحظه بيها نشتاك
روحي تريـدج
بلياج مفجوعه الدار .. ومن بـالي متروح النـار
روحي تـريدج

يايـوم اشوفج يمه يا يـوم
ثگلانه بيـه حتـه الهـدوم
عـرفنه بغيابج بيت الاحزان
وويانه كبرت يـمه الهمـوم

لكي خُذيني اماه يازهراء .. تبكِيكِ عيني اماه يازهراء
بعدج نگضيها ونيـن .. رجعي لعزيزج لحسين
________________________
كل ما نشوف احنه الباب .. يلچمـنه نـار المصاب
دموعي تسولف
يـايمه هذا انه حسين .. ما ابطـل عليـج ونـين
دموعي تسولف

زهرة حياتي وذبلـت شلون
من كون تعـمه عليج العيون
الماتت امه يعيش مكسور
ولونه يطيح وماله اي لـون

لا تؤلميني اماه يازهراء .. تبكيكِ العين اماه يازهراء
من عمري ذابت السنين .. رجعي لعزيزج لحسين
________________________________
زينب دمعها مـدرار .. ولاذت بأبوها الكـرار
زغيره وشافت
نـار الهضم والطغيان .. ودم الوگـع عالتربان
زغيره وشافت

لـيهسه بـابج بـي اثـر نـار
وضل احمر وواگف البسمار
زينب زغيره وشافت الخوف
ومن تكبر يضربوها بحجـار

دم بـالجبيني اماه يازهراء .. تبكيكِ عيني اماه يازهراء
ماتدري تتوجه وين .. رجع العزيزج الحسين
_______________________________
الحسن يمي يحاچيج .. يبچي ابصمت المداريج
لا ما ترجـع
ما يگدر الوحده يگوم .. ويگلي من بعد اليـوم
لا مـا ترجـع

ويـن الحنينه العاشـت ويـاي
بعـدج ابـولدج تقسي دنيـاي
الشوفت عيونج يمه عـطشان
ارويني منـج شـلي بـالمـاي

ضاعت سنيني اماه يازهراء .. تبكيكِ عيني اماه يازهراء
وشتسوه بعدج السنين .. رجعي لعزيزج لحسين
________________________________
ضل والـدي بس ينوح .. بس جسد صاير مو روح
مـاتت روحه
القـالع ابچفه الـباب .. ادموعه صارتله انگاب
مـاتت روحه

نـار الفراك ايگـول ذبـاح
الفاكد الغالي يعيش بنياح
بالمـغتسل ما ضله كل حيل
لحظه يگـوم وساعـه يـرتاح

اه للـجنيني اماه يازهراء .. تبكيكِي عيني اماه يازهراء
مكسور يحسوب الدين .. رجعي لعزيزج الحسين

#سيد_محسن_الجابري

#نزال_لمولاتي_فاطمه

نـار العشك تحييني .. حب فاطمه مربيـني
________________________
فاطمه بوجداني .. فاطمه قرئاني .. لهذا الدمع .. شرايه
هيه قطب الدنيا .. وتعرف شما بيه .. وبكل وكت .. ويايه

روحي يمج يالحنين دوم احس مرتاحه
انتي يا زهرة الدنيا وللـخدم فـواحـه
انتي بالجنـه اميره وصـرتي من تـفاحـه
المايحس ابطعم حبج ما يحس بالراحه

يالخيرج امغطيـني .. حب فاطمه مربيني
___________________________
فاطمي يدروني .. خدمتج بعيوني .. انتي الضوه .. لبعيني
ماابطل اقرايـه .. حبج اكبر غايـه .. عمري نذر .. واسنيني

مجلسج بي ذكر رحمه ونضره من الباري
اسمج معلك ابروحي ويـالزچيه ابـداري
ليش يالزهرة من اذكرج ما احس ابنـاري
وليش بس يمج يفاطم احچـي كـل اسراري

اسمج صلاتي وديني .. حب فاطمـه مربيني
______________________________
ما احس بجراحي .. وما اكض اصفاحي.. من انهضم اتوسلج
غير حزنج مـالـي .. انتي كـل احوالـي .. خليني رايـه بمجلسج


الما يحس ابنور ذكرج ما يحس ابحاله
واليواضب عالمجالس هذا الف هنياله
اليترس ابسلته معاصي ما تفيده اسلاله
واليطيح دموع لجلج دمعته تحـلالـه

يالنضرتج تكـفيني .. حب فاطمه مربيني
________________________________
مجلسج علانـي .. ويه النجم خلاني .. عن خدمتج لا ما ارد
نعمه وين الكهه .. بضعه انتي الـ طـه .. تگصديني كل ما ابتعد

اليعيش ابفـي عباتـج هـذا الله يحـبه
واليوج نـاره بعـزائج يصيـر ابيـض گلـبه
واليـفك گلـبه ويشـوفج هذا نـوْر دربـه
واليـدك بـاب ام ابيها ما تضل اي صعبه

العـالمج وديـني .. حب فاطمه مربيني
__________________________________
حد اخير انفاسي .. بيج ارفع راسي .. طول العمر ابقه افتخر
انتـي اهلي وبيتي .. وانتـي كل عافيتي .. وانتي الربح من هالعمر

الج كل دمعي وجروحي والج كل تفكيري
شايل ابروحي مشاعر ما فهـمهن غيـري
والله ما ادري شفسرج حايـر ابـتفسيري
واعتذز عن كـل مقصر وعـذراً لـتقصيـري

كلي الج خليني .. حب فاطمه مربيني

#سيد_محسن_الجابري

#نزال_لمولاتي_فاطمه

يازهراء .. يافاطمه
#####################
احنه تربات المجالس يم حسن وفايه
ما نحس بالدنيـا كلها نحس بس بقرايه
من بقاع الدنيا جينه وترف بينه الرايه
كلشي ماعدنه يزهره وانتي النه هوايه

دوم اعيش ابونـه .. وما اعيش ابمنه
انتي ام الجـنه .. يافاطمه
#######################
مصيبة الزهراء عظيم وفـاز ليواسيها
كون ذني عيوني دوم الخدمتج اعميها
الدمعه لو رادت تطيح اليـا وجه ننـطيها
وانتي بادرتـي بدمعنـه وكلتـي انه اشريها

يالخدمتج تسوه .. نارج اشكد حلوه
من رحتلج فدوه .. يافاطمه
#########################
للأمام الهادي جينه وبالمدامع نحـدي
والحسن ياخذ بدينه وصرنه مثل الجندي
شما يطول العمر بينه نرد بسمج نبـدي
لأرض سامره اجينه انواسي امام المهدي

بالضلع والحسره .. جينه ننعه الزهره
وتبقه بيـنه الكسره .. يافاطمه
##########################
العاشك الخانگته نارج ما يحس ابحالـه
واحنه يالزهراء بعـزائج كل وكت رحاله
اليموت ابدرب عشگج هذا الف هنياله
الخادم بوكت الشدايد تحجي بس افعاله

ما يحس بجروحه .. ودمعته مفضوحه
انتي صرتي بروحه .. يافاطمه
##########################
صرتي بس انتي حياتي والعمر ما اذكره
وبس الج تحله المدامع والج تجري العبره
اهلي ربوني اعلى حبج يم حسن عالفطره
وابد ما سموني بسمي كالوا ابن الزهـره

اسمج العلاني .. وبيج رافع شاني
جرحج الربـاني .. يافاطمه
##########################
ابد ما يبرد حزنه توج دوم الحرگه
لچن يالزهره الحزينه متنه من الفرگه
يمه من نذكر المهدي تضل بينه الشهگه
هم يجي يوم ونشوفه ونحضنـه ونشبگه

نقبـل ابرجلينه .. ونمسح ابچفينه
والنه تنـظر عينه .. يافاطمه ############################

#سيد_محسن_الجابري
#ونسألكم_الدعاء

لحن #نزله+شور

يازهراء يازهراء .. يازهراء يازهراء
########################
الليله ماتت فاطمه .. وبجت املاك السمه
ومطرت الغيمه دمه بهاي المسيه
راحت ام الماروه .. وختنك بينه الهـوه
وانشعب گلبي بلـيالي الفـاطميه

طاحت اعلى الگلع وگلبي انطحن
كلشي مضلم بعد عين ام الحسن
وحيدر الكرار چـن روحـه دفـن
والجنين الطاح يبچي عليها

لمن صبح محسن دمه ضجت الدنيا بالبكاء
يازهراء يازهراء يازهراء يازهراء
###########################
ما يفض عدنا اللطـم .. بكـل مسيه ننهضـم
ونذكر الباب الوكع ميت عليها
شصـار بالدار وجـره .. بـالعزاء نـستذكـره
ونذكر الاشرار من حركوا اديها

خلف ذاك الباب لاذت والصعب
خافت اعلى حسين ليشوف الغرب
وصعبه طفله اتشوف امها تنضرب
وشافت النيران وجت بيها

ما تبچي بس الكاع الج تبچي الج حته السماء
#############################

الزهره نعمه وتنشكر .. الزهره مو ضلع وكسر
بيها سر الزهره من رب الجلاله
واليواضب عـالنحـر .. الزهره تصبحله ظهـر
وهم تنور كلبه وترتب احواله

اليطب مجلسها يطلـع مبـتشر
واليطيح دمـعه اتـكفلـه عـمر
والحسب عمره وقف لم الخدر
روحه لو شتريد هم تنطيها
لوياج مـا يخسر ابد ليـعوفج ايعيش بعنـاء
##############################
رحمة الله الواسعه .. وهيه مفتـاح الدعُـه
كوثر الله وخيرها فايض علينه
بالمجالس حاضره .. وللخدم هم ناضره
تحسب الدمعات وتسجل بجينه

لكل مجالسكم تـره لـهفانه
انـه والله الوالده الـحزنـانه
والدمع ليطيح اسجل مچانه
والحوائج ما ادقق بيها

اتكفل ابكلمن حضر والزهره لتخصه ابـدعاء
###############################

مصيبة الزهره جرح .. بيـها اثبـات وشرح
والدلائل كلها موجوده وخفيه
والمصايب تنـذكـر .. والجـره ابـاب الجمر
وابو كلـمت (وأن) ابـراس القضيه

بـاب من جـذوع و چـبيـر الجرح
انطبگت اعلى ام الحزن طبك الجنح
بهالقضيه المهدي بس عدنا ربح
الحاسم بهذا الامر راعيهـا
اه يـا لثارات الضلع تسمع الدنيـا هالنـداء

#سيد_محسن_الجابري
#ونسألكم_الدعاء

افراح للأمام العباس ع

فوك النجم خوة وفه راسم .. يامحله اسمك ياكمر هاشم
ابو فاضل ابو فاضل
________________________
محله هالاسم .. عباس يمشرد الزلم .. عباس
يحله من النجم .. عباس
حلوه خوتك .. عباس كلفه احجايتك .. عباس رفـت رايتك .. عباس

انته الماي يالرواي نورك بالسمه ضوه
اليتعنك هم يلكاك ماي وبسمه يتروه
الصد اعليك ويحاجيك امـه جابته توه

ليگصد عيونك مايرد نادم .. يامحله اسمك ياگمر هاشم
ابو فاضل ابو فاضل
___________________________
يحله من الگمر .. يا ماي ونحر .. يغله من النضر
يا كلمـة هـله .. بـاء البـسمله .. مـنور كـربلـه

اسمك عاش بيه وصار اسمي خادم انفاسك
غير احساس بين الناس رافع راسي يم راسك
من اشتاك روحي تـروح تاخذني لـشباچـك

لتسطره يوگع منكتل لازم .. يامحله اسمك ياگمر هاشم
ابو فاضل ابو فاضل
__________________________
ما تخطه بفعل .. ياصعب وسهل .. حيرت العقل
حجاياتك همس .. ضرباتك ترس .. اجفوفك درس

فكري احتار حيل وصار واهم بيك تفكيري
من ارثيك ما اوفيـك ومـا ينـفعني تـبريري
مو عالماي انته هواي وما اوصل ابتصويري

لتسطره يوگع منكتل لازم .. يا محله اسمك ياگمر هاشم
ابو فاضل ابو فاضل
_____________________________
هيبه ريشتك .. ترهب خزرتك .. تخضر كلمتك
يضحك بالحرب .. شابعهم ضرب ..ماعنده صعب

غيره وجود يحجي بزود واگف بالخيم ينطر
مو بس سيف لا بالكيف خيـاله هم بعد يسطر
بلايه رماح بس اصياح يـردم بيهـم ويشـمر

ليشمره چفه ما يضل سالم .. يامحله اسمك ياگمر هاشم
ابو فاضل ابو فاضل
_______________________________
شبعهم نـزف .. النشمي التچف .. خاسفهم خسف
صـياد العده .. تكـتل سـاعده .. مـنهو ايعـانده

من يغتاض مو مركاض تطفر كلها كدامه
اليتعناه وبيده الواه بيده ايطكطك اعظامه
بجدمه يدوس كل الروس والدم يوصل الهامه

منهوللي يوصل والگمر نازل .. يامحله اسمك ياكمر هاشم
ابو فاضل ابو فاضل
#سيد محسن الجابري
#ونسألكم_الدعاء

#هوسات_لمولاي_اباالفضل_العباس ع

ابميلاد الگمر شنـوفي ياهوسه
وانه افكاري خلي والجربه متروسه
ابيا موقف نسولـف كلها ملموسه
حيرنه الكافل بفعاله
_______________________
فرحنه بمولدك هاليله يالكافل
والماحس بالفرح ياسيدي غافل
اليكصدك ربح والعافك الجاهـل
والعافك خلي يطم روحه
_______________________
بعيد الحب تسولف عدنه بعض الناس
وما تدري النحبه ابكلشي ما ينقاس
عدنه الحب صدك من نضرة العباس
اليحـبه الكافل هنيـاله

#سيد محسن الجابري