#قصص_الأنبياء(٢)
#السيرة_النبوية_إيمان_شلبي
#الحلقة_الرابعة_عشرة
#الجهر_بالدعوة

وقفنا المرة إللي فاتت عند رسول الله ﷺ لما كان بيدعو الناس في السر لمدة ثلاث سنوات،
في السنة الأولى من البعثة يُقال إنه اتولد لرسول الله ﷺ ولد وسماه عبد الله،
لأن الموضوع فيه خلاف بين العلماء، في علماء قالوا إنه اتولد قبل البعثة وعلماء قالوا اتولد بعد البعثة💁‍♂️

وكنا قلنا قبل كده إن أبناؤه كانوا القاسم وزينب وأم كلثوم ورقية وفاطمة، وقلنا إن القاسم مات ومتبقاش غير البنات،
دلوقتي رسول الله ﷺ رُزق بولد تاني من زوجته خديجة، فهو لم يتزوج غيرها👌
فهي حملت تسعة اشهر وولدت ولد تاني بعد أربع بنات وموت الولد الأول،
فأكيد طبعا الفرحة هتبقى مختلفة ولد على أربع بنات😅
عدت الأيام ومات عبد الله، مات وهو صغير🙊

☆في ناس لو حصل معاها كده تقعد تقول والعياذ بالله طيب ليه بتعطيهولي يارب من الأول لما أنت هتأخذه مني تاني،
ليه تعلقني بيه من البداية...كان بلاشه أحسن😞

وطبعا ده إعتراض على قضاء الله، والناس دي مش فاهمة إن الإنسان مش هيأخذ أجر الصابرين غير لما يتعرّض لمواقف شديدة يبان فيها صبره،
زي الطالب بالضبط، مش هيبان مذاكرته وتفوقه وذكاؤه إلا لما يتحط في الإمتحان👌

رسول الله ﷺ لم يعترض ورضي بقضاء الله وكمّل حياته في الدعوة إلى الله، لأن الدنيا مش بتقف على موت أحد👌
وكأن ربنا بيقول لنا أهه بشر زيكم ومكنش عنده غير بنات وأولاده الصبيان بيموتوا ،
عادي يعني الحياة بتمشي...مش نهاية الكون..أيوة الإنسان ممكن يحزن لكن ميخليش الحزن ده يوقّف حياته👌

خلال الثلاث سنوات الأولى من البعثة أسلم ستون رجل وامرأة فقط من قبائل متفرقة في مكة،
يعني لو افترضنا إننا نقسم العدد ده على الثلاث سنوات هنلاقي إن كل سنة بيسلم حوالي عشرين شخص🤔
والداعية هو رسول الله ﷺ الصادق الأمين إللي مفيش أحد في أخلاقه ولا في بلاغته ولا في قوة اقناعه،
ومع ذلك أسلم العدد القليل ده👌
فما بالنا باللي أقل منه ...كل حاجة حصلت مع رسول الله ﷺ لها معنى ومغزى،
وكأن ربنا بيقول لنا اصبروا ومتستعجلوش، الدعوة عايزة صبر وطولة بال،
إللي أحسن منكم لم يُسلم على إيده غير القليل فمتستعجلوش👌
من الناس إللي أسلمت في الثلاث سنوات دول كان
《خَبّاب بن الأَرَت》و《مصعب بن عمير》و《عبد الله بن مسعود》و《جعفر بن أبي طالب》و《سعيد بن زيد بن عمرو بن نفيل》
فاكرين زيد بن عمرو بن نفيل إللي كان موحد على دين إبراهيم عليه السلام وكان مستني نبي آخر الزمان ودعا الله إن ابنه يكون صاحب النبي ده👌
وسعيد بن زيد ده كان متزوج من ابنة عمه فاطمة بنت الخطاب أخت عمر بن الخطاب، فأسلمت فاطمة مع زوجها سعيد،
وكان إللي بيُسلم بيخفي إسلامه،
والناس إللي أسلمت دي كان اسمهم الرّعِيل الأول، يعني السابقون إلى الإسلام،
وكل إنسان رأى رسول الله ﷺ أو اجتمع معه وآمن به واستمر على إيمانه حتى مات رسول الله ومات أو مات هو على الإيمان فده كده اسمه صحابي👌

فالستين رجل وامرأة الذين آمنوا برسول الله ﷺ دول اسمهم صَحابة👌

☆قبل ما نبدأ في الدعوة الجهرية هنقول قاعدة مهمة لأنها مستمرة معانا في شرح السيرة وكمان دي عقيدتنا كمسلمين وهي:
إن القرآن الكريم《 كلام الله》 يعني كلام ربنا تكلم به بصوت وحرف ولكن بطريقة تليق بجلاله وكماله،
ولله المثل الأعلى مش احنا بنتكلم كلام عبارة عن صوت وحروف ؟
أهه برده القرآن ربنا تكلم وقال القرآن ، يعني القرآن مش مخلوق زي السماوات والأرض وزي البشر👌
والقرآن لم ينزل سور كاملة على بعض،
ولكن نزل آيات متفرقة على حسب الاحداث والمناسبات،
يعني ممكن النهاردة تنزل آية من سورة البقرة، غدا أربعة آيات من سورة الشعراء وهكذا،
يعني لما كانت تحصل حاجة ربنا يقول لجبريل آيات القرآن وجبريل يأخذ الآيات 《من الله مباشرة》 ويقولها لرسول الله ﷺ،
يعني ربنا بينَزّل الآيات على جبريل وجبربل ينزلها على محمد رسول الله ﷺ ورسول الله ﷺ يقولها للناس👌

لكن مش معنى إن القرآن نزل آيات متفرقة يبقى أي حد يحط أي آية مكان الثانية😅
لأن ترتيب الآيات في المصحف توقيفي، يعني رسول الله ﷺ فقط هو إللي رتبها الترتيب إللي احنا عارفينه ده بوحي من الله👌
يعني كان بيقول لكُتّاب الوحي خلوا آية كذا وييجي بعدها آية كذا في سورة كذا،
والقرآن كله عبارة عن مائة وأربعة عشرة سورة، نزل منها اثنان وثمانون سورة في مكة،
السورة المكية التركيز فيها هيكون على العقيدة👌
يعني من هو الله والإيمان بالغيب ويوم القيامة والأحداث إللي هتحصل فيه،
وكمان هيحكي لهم أحداث الأمم السابقة ويدعوهم للتفكير العقلي المنطقي هل الكلام ده مقنع ولّا لأ👌
يعني دي قاعدة ربنا بيضعها لأي إنسان عايز يتعلم الدين،
تبدأ بالعقيدة يعني تعرف مين هو الله ،
وإيه هو اليوم الآخر ويعني إيه جنة ونار وشكلهم إيه،
ونتعلم أخبار الأمم السابقة عشان نتعظ ومنقعش في نفس أخطائهم،
ومع ده كله نتدبر في الآيات والكون وفي أحداث حياتنا عشان الإيمان يدخل القلب والعقل👌

لأن الإيمان لما يدخل القلب والعقل بيترسخ في الإنسان ويبقى مستحيل أي عوامل خارجية تقدر تؤثر فيه زي ما هنشوف الصحابة وإللي حصل معاهم😊

بعد الثلاث سنوات من الدعوة سرا وإسلام الستين رجل وامرأة من قبائل مختلفة،
ربنا أمر رسوله بالجهر بالدعوة لأن دلوقتي بقى في قاعدة نقدر نبني عليها،
في أَتباع للدين... أهل مكة مش هيقدروا عليهم لأنهم من قبائل مختلفة وكمان فيهم ناس كثيرة من أشراف مكة💁‍♂️

الجهر بالدعوة كان على مرحلتين:
◇المرحلة الأولى كانت إنه يجهر بالدعوة بين أقاربه،
ربنا أنزل عليه آية:
"وأنذر عشِيرتَك الأقربين"
والحكمة إن رسول الله ﷺ يبدأ بأهله هي إن الأهل بيحبوا أبناءهم بالفطرة وأكثر الناس يحبوا لهم الخير،
فلو آمن الأهل هيكونوا سند له ويحموه من أي مخاطر ممكن يتعرض لها👌
وكمان الأهل أكثر ناس يتقبلوا كلام الداعية وخصوصا لو كان واحد في أخلاق وصدق رسول الله ﷺ إللي الكل مُجتمع على حبه💁‍♂️
رسول الله ﷺ عمل أكل ودعا أعمامه وأبناءهم من باب إنه يؤلف قلوبهم،
إنتم عارفين الإجتماع على الأكل والكلام والهزار وسط الأكل ده بيعمل جو حلو وبتخلي إللي قصادك يسمع لك😅

كان من أعمام رسول الله ﷺ إللي حضروا عمه عبد العزى أو خلونا نقول أبو لهب،
وكان موضوع الإسلام اتعرف بين أهل مكة، إن محمد بن عبد الله بيقول إنه رسول بيوحى إليه وإنه بيعبد إله مختلف عن الآلهة بتاعتهم،
فأبو لهب قبل ما رسول الله ﷺ يتكلم بأي كلمة راح قايل :
أنا بقول لك قصاد أعمامك وأولاد أعمامك، سيبك من الكلام إللي إنت بتقوله ده، احنا مش هنقدر نواجه الناس، إنت عايز تورطنا😑
ولو فضلت مصمم فاحنا نحبسك أحسن ما يجتمع عليك بطون قريش ومعاهم قبائل العرب فيقضوا عليك،
أنا مشفتش حد جاء لأهله بشر أكثر من إللي جئت به😤
فسكت رسول الله ﷺ ومتكلمش،
ودي حكمة بالغة منه ﷺ، أصل كده هيدخل في جدال معاه ويضيّع هيبة الحق،
وخصوصا إن إللي قاعدين محدش منهم اتكلم ولا حد عارف أصلا إيه الحكاية🤷‍♂️
فالجو مكهرب دلوقتي وأبو لهب له أنصار فالأفضل إننا نقفل الموضوع ونتكلم بعدين😅

☆خدوا بالكم إن أبو لهب بيكلم رسول الله ﷺ بالأسلوب ده وهو في بيته لسه واكل من أكله،
ومع ذلك رسول الله ﷺ حتى مقلهوش عيب ده إنت في بيتي إزاي تتكلم كده👌
ركزوا مع تصرفات رسول الله ﷺ لأنها دين واحنا بنتعلم منه👌

مرة ثانية رسول الله ﷺ عمل طعام ودعا أقاربه مرة ثانية،
طبعا موضوع الأكل ده مُكلف، يعني يُقال إنهم حوالي أربعين رجل 😅
فرسول الله ﷺ دلوقتي مش بيشتغل ومتفرغ للدعوة😕
والدعوة محتاجة للمال فهيجيب منين الأموال🙊
زوجته خديجة قالت له إنه يتفرغ للدعوة وهي إللي هتتكفل بالمصاريف،
يعني خديجة رضي الله عنها كانت بتبذل مالها لخدمة دين الله👌
فقبل ما أبو لهب يتكلم بدأ رسول الله ﷺ الكلام، وقيل إنه في الاجتماع التاني ده لم يدعو أبو لهب أصلا،
المهم بدأ رسول الله ﷺ يتكلم وقال:
"الحمد لله أحمده وأستعينه وأؤمن به وأتوكل عليه، وأشهد أن لا إله إلا الله وحده لا شريك له"

طبعا الكلام ده كان صدمة بالنسبة لهم🙊
وحده لا شريك له😳
أمال فين اللات والعزى ومناة وباقي الآلهة😐
وأكمل رسول الله ﷺ كلامه:
"إن الرائد لا يكذب أهله، والله الذي لا إله إلا هو إني رسول الله إليكم خاصة وإلى الناس عامة، والله لتموتن كما تنامون ، ولتُبعثن كما تستيقظون ،
ولتحاسبُن بما تعملون ، وإنها الجنة أبدا أو النار أبدا"

☆جملة الرائد لا يَكذب أهلَه ده مثل عربي معناه إن الشخص إللي بيكون متقدم على القافلة بيبحث عن العشب والماء،
عمره ما هييجي يكذب على أهله ويخدعهم👌

رسول الله ﷺ لخص رسالة الإسلام كلها في الكلمتين دول، إله الكون هو الله وأنا رسوله، وهتموتوا وهتُبعثوا،
وهتتحاسبوا على أعمالكم وعلى حسب أعمالكم يا إما جنة أبدا أو نار أبدا 👌
ردة فعل أقارب رسول الله ﷺ انقسمت لموقفين:
◇موقف ابو طالب عم رسول الله ﷺ إللي كان مربيه وبيحبه أكثر من حبه لأبنائه،
قال له أبو طالب: أنا معاك وهقف جنبك وهدافع عنك،
فاعمل إللي إنت أُمرت به، فوالله لأعينك وأساعدك وأمنعك من الأذى👌
لكن نفسي مش مطاوعاني إني أسيب دين عبد المطلب😞

☆يعني أبو طالب تيقن وعرف إن ابن أخيه رسول من عند الله وإنه صادق ومع ذلك لم يؤمن،
يعني هو خالف الحق بسبب التقاليد وإن ميقدرش يسيب دين أباه،
وعلى فكرة الموقف ده بيحصل مع الناس في عصرنا😀
لما تكلم واحد في الإلتزام ،واتباع أوامر ربنا يقول لك:
أمي هتزعل، أبويا مش هيرضى،
أخوتي ...أعمامي و...و...
وكمان هم عايشين عمرهم كله كده..يعني هم غلط وإنت إللي صح🤨

◇الموقف الثاني موقف أبو لهب وهو إنه صمم على عدائه لابن أخيه أولا ورسول الله ثانيا👌
وقال لهم : امسكوه يا جماعة ووقفوه قبل ما حد تاني هو إللي يوقفه 🤦‍♂️
☆يعني يقصد اغسلوا عاركم بإيدكم 😅

فأبو طالب قال: والله لندافع عنه طول ماحنا عايشين😤

دي كانت المرحلة الأولى من الدعوة الجهرية،
المرحلة الثانية:
في يوم من الأيام خرج رسول الله ﷺ من بيته،
لحد ما وصل جبل الصفا وطلع عليه ووجّه وجهه ناحية الناس وبدأ ينادي على كل أهل مكة بأسماء قبائلهم:
يااا بني فهر...يااا بني عدي...يااا بني هاشم..ياااا....ياااا
والناس سمعت الصوت..إيه ده ..مين إللي بينادي ده😦
الصادق الأمين...الصادق الأمين😮
أول مرة يعملها يبقى أكيد في حاجة 😱
فكل الناس بدأت تتجمع وإللي مش عارف يروح يبعت حد من عنده عشان يروح يشوف في إيه😳

أول ما الناس اتجمعت قال لهم محمد بن عبد الله بن عبد المطلب ..الصادق الأمين إللي عايش معاهم بقاله أربعين سنة وعارفينه كويس:
لو قلت لكم إن في جيش خلف الوادي ده جاي يهجم عليكم ...هل هتصدقوني؟
قالوا : طبعا احنا منعرفش عنك إلا الصدق وعمرك ما كذبت😲
فقال لهم : فأنا نذير لكم بين يدي عذاب شديد👌

☆رسول الله ﷺ قبل ما يقول لهم أي حاجة أقام عليهم الحُجة،
يعني خلاهم يعترفوا بلسانهم إنه صادق وإنهم كانوا هيصدقوه،
فاللي يخليهم يصدقوه في إنذاره لهم بهجوم الأعداء، فلازم يصدقوا إنذاره بالعذاب الشديد👌

◇في هنا نقطة مهمة عشان الناس إللي دايما بتقول إنتم بتخوفوا الناس من ربنا وتنفروهم،
وربنا غفور رحيم متقعدوش تخوفوا الناس و...و...
رسول الله ﷺ أول ما أظهر الدعوة أول حاجة عملها إنه خوف الناس من العذاب👌
في فرق بين إني أخاطب ناس بصفة عامة وإني أدعو شخص دعوة فردية،
لما أكون بتكلم مع الناس بصفة على اختلاف عقلياتهم يبقى التخويف من العذاب أولا،
لأن الغفلة والبعد عن ربنا بتكون منتشرة بين الناس،
فمينفعش واحد غافل غرقان في المعاصي ومش فارق معاه حاجة تيجي تقول له إن الله غفور رحيم😅
هتلاقيه ساق فيها وازداد في معاصيه، لكن لو اتخوف هينتبه ويقلق هنا بقى ممكن نستعمل معاه الترغيب،
لكن لما يكون الخطاب عاااام زي موقف رسول الله ﷺ
فيبتدي بالتخويف من العذاب عشان الناس تنتبه من غفلتها👌

ياترى أهل مكة كان ردهم إيه على الصادق الأمين؟

ده إللي هنعرفه الجزء الجاي إن شاء الله😊

♡ملحوظة:
أي حد عايز يأخذ القصص وينشرها يتفضل أنا معنديش مانع نهائي.

#Eman_Shalapy

الحلقة الخامسة عشرة👇💛

#قصص_الأنبياء(٢)
#السيرة_النبوية_إيمان_شلبي
#الحلقة_الخامسة_عشرة
#بداية_محاربة_الدعوة

وقفنا المرة إللي فاتت عند رسول الله ﷺ لما طلع على جبل الصفا وقعد ينادي في الناس ويقول لهم إنه نذير من عند الله،
وقلنا إن أهل مكة كلهم اجتمعوا عشان يعرفوا في إيه،
وكان من إللي جاء مع الناس عم رسول الله ﷺ أبو لهب،
فلما سمع كلام رسول الله ﷺ قال له: تبا لك سائر اليوم هو ده السبب إللي جمعتنا عشانه😡
يعني دعا على رسول الله ﷺ بالخسران😑
وبدأ يصرف الناس ويبعدهم عنه،
يعني كأن أبو لهب بيقول للناس بطريقة عملية بصوا أنا مليش دعوة بيه، أنا بوقفه أهه حتى لا تؤذوني معاه وأنا مش راضي عن إللي هو بيعمله😤
ماهو قال لرسول الله ﷺ من الأول احنا ملناش طاقة بالعرب مش هنقدر نواجههم...مش هنقدر نغير إللي الناس اتعودوا عليه😑
فمشكلة ابو لهب الخوف أو خلينا نقول الجُبْن الشديد،
كان جبان جدا لدرجة إنه رفض الإيمان بالله،
هو بالنسبة له عادي إنه يقف مع القوي ويعادي ابن أخيه ويخذله عشان يحمي نفسه،
الإنسان ممكن يخاف كطبيعة بشرية لكن الخوف إللي يوقف الإنسان عن العمل الصالح هو ده الخوف المُهلك👌
فربنا أنزل فيه :
"تبَّتْ يَدَا أَبِي لَهَبٍ وَتَبَّ ۩ مَا أَغْنَى عَنْهُ مَالُهُ وَمَا كَسَبَ ۩سَيَصْلَى نَارًا ذَاتَ لَهَبٍ"
ربنا عالم إن الرجل ده خلاص هيموت كافر، وهنا في إعجاز سبحان الله😮
يعني أبو لهب كان بيسمع الآيات دي بتتقال عنه ومع ذلك مقلش مثلا طيب أنا هدخل في الإسلام وأثبت لكم إن القرآن ده كذب،
وده دليل على إن القرآن من عند عالم الغيب 👌
وكان أبو لهب بيمشي وراء رسول الله ﷺ وهو بيدعو الناس،
فيقول للناس متصدقهوش إحنا أهله ..إحنا أعلم الناس به..
ده كاذب ..ده مجنون.. متخلهوش يبعدكم عن دين آباءكم وأجدادكم😤
والناس مستغربة مين الرجل ده 😕
ماشي عمال يكذّب محمد بن عبد الله، ورسول الله ﷺ مش بيرد عليه ولا بيلتفت له أصلا وبيحاول يبعد عنه وده وراه،

فلما سمع أبو لهب الآيات إللي نزلت فيه راح لأولاده الإثنين
《عتبة》 و《عُتَيبة》 وكانا متزوجين من ابنتي رسول الله ﷺ رقية وأم كلثوم، وقال لهم لو مطلقتوش بنات محمد لا أعرفكم ولا تعرفوني😤
☆خليكم فاكرين اسم عُتَيبة ده عشان له قصة بعدين 👌

ففعلا هم الإثنين طلقوا بنات رسول الله ﷺ،
تخيلوا لما بنتين يتطلقوا في نفس الوقت، أبوهم هيكون شكله إيه قصاد الناس😞
هم بشر على فكرة..بيتألموا وبيتعرضوا لضغط نفسي وكلام الناس بيأثر فيهم،
ومع ذلك رسول الله ﷺ كمل في طريقه،
ومفيش بنت من البنات قالت لأبوها إنت ضيعتنا، ولا احنا اتطلقنا بسببك ولا كانوا حاسين إن طلاقهم ده نهاية العالم..الدنيا بتمشي عادي👌

☆ملحوظة بنات النبي كانوا عاقدين بس يعني مكنش لسه حصل بناء وكان سنهم صغير أصلا 😅
يعني السيدة رقية كان عمرها حوالي من إحدى عشر لثلاثة عشرة عام تقريبا، وأختها أم كلثوم أصغر منها بسنة.

وطبعا زوجة العم كان لها نصيب هي كمان😀
كانت بتجمع الشوك وتشوف فين الطريق إللي هيمشي فيه رسول الله ﷺ وتحطه فيه عشان يدوس عليه ويؤذيه😑
فربنا أنزل فيها:
"وَامْرَأَتُهُ حَمَّالَةَ الْحَطَبِ۩فِي جِيدِهَا حَبْلٌ مِّن مَّسَد"

☆تخيلوا لما يكون عم الرسول ﷺ وأبناء عمه ومرات عمه بيعملوا معاه كده أمال باقي أهل مكة هيعملوا إيه😶

حصل قلق في مكة والدنيا اتقلبت والكل بيتكلم عن الدين الجديد😮
وإنتم عارفين إن الموجودين في مكة مش أهل مكة بس، ده في ناس من قبائل تانية بتيجي لمكة،
فرسول الله ﷺ بدأ يدعوهم هم كمان للإسلام،
يعني كده الدعوة بدأت بأهله وبعدين بأهل البلد إللي هو عايش فيها وبعدين الناس إللي بييجوا لمكة،
ربنا أمر رسوله بحاجتين:
"فَاصْدَعْ بِمَا تُؤْمَرُ وَأَعْرِضْ عَنِ الْمُشْرِكِينَ"

يعني ربنا أمره إنه يبلغ الدعوة وفي نفس الوقت لا يقاتل ولا يحارب ولا يهتم باللي المشركين هيعملوه ..يعني تجنب أي صدام مع المشركين...ركز بس في نشر الدعوة 👌

إللي بيجهر بالدعوة دلوقتي وبيكلم الناس كلهم في كل مكان هو رسول الله ﷺ،
سادات مكة مش عاجبهم الوضع ...مين ده إللي عمال يتكلم عن آلهتنا بسوء وبيقول إنها لا تضر ولا تنفع😡
لازم يتصرفوا وإلا هيبتهم هتروح ومش هيبقى لهم مكانة في مكة😶
وأهم حاجة عندهم موضوع الشرف والمكانة ده😅
لأن مكنش في حاكم في مكة فكله نفسه يكون الحاكم فكانوا بيجتمعوا مع بعض ويتفقوا على قانون مثلا لأنهم كانوا متساويين تقريبا،
فكان كل واحد من زعماء القبائل بينافس التاني، عشان يأخذ الحكم وكانوا كلهم متساويين زي ما قلنا،
فلما يطلع واحد من بني هاشم ويقول إنه نبي يأتيه الوحي من السماء،
هم هيكون موقفهم إيه؟ دي حاجة مش هيقدروا ينافسوا فيها ..هيقولوا احنا كمان عندنا نبي؟😅

◇فكان من أهم أسباب رفضهم لدعوة الإسلام تعصب كل واحد لقبيلته،
إللي هو إزاي يعني أنا أتبع القبيلة المنافسة وأمشي وراهم واسمع كلامهم😏

☆وللأسف في ناس من أعداء الإسلام استخدموا حتة التعصب دي عشان يفرقوا بين المسلمين وبالتالي تضيع الدعوة،
زي إللي بيتعصب لمذهب معين حتى لو خالف الدليل من القرآن والسنة،
وزي إللي بيتعصب لجماعة معينة وبيبقى عايز ينصرها وخلاص حتى لو كانت على باطل ويا إما احنا إللي ننصر الدين ونكون إحنا إللي ظاهرين بين الناس يا إما هنخذلكم ونسلمكم للأعداء ونحاربكم،
وزي إللي بيتعصب لبلده وزي إللي بيتعصب لفريق كرة وغيرها وغيرها،
وإنتم ممكن تشوفوا الواقع وإنتم تفهموا قصدي😀

◇ومن الأسباب إللي منعت الناس برده من الإستجابة لدعوة الإسلام حاجة اتكلمنا عنها في قصص الأنبياء وكانت أول معصية عصي الله بها في السماء،
واستمرت معانا في كل قصص الأنبياء وبنشوفها مستمر لحد دلوقتي 😑
فاكرين وصية نوح إللي قالها لابنه😁
بالضبط كده منعهم الكِبر 👌
والكبر كما قال رسول الله ﷺ:
"سَفه الحق - أو بَطَرُ- وغَمْط الناس"
سَفه الحق يعني تعرف الحق ثم تنكره، وغمط الناس يعني احتقارهم👌
فهم عرفوا إن القرآن ده فعلا كلام مش عادي ، ومع ذلك أنكروا،
وكانوا محتقرين لرسول الله ﷺ، كانوا بيقولوا :
"وَقَالُوا لَوْلا نُزِّلَ هَذَا الْقُرْآنُ عَلَى رَجُلٍ مِنَ الْقَرْيَتَيْنِ عَظِيمٍ"

يعني بيقولوا: يا سلام لو كان القرآن ده نزل على رجل عظيم كنا هنؤمن به☺
ورسول الله ﷺ هو أعظم الخلق وأحسنهم أخلاقا،
لكن هم عندهم إن العظمة في إن الشخص يكون عنده أموال كثيرة جدا😑
فالرجلين إللي كانوا يقصدوهم هما:《 الوليد بن المغيرة 》 من مكة، و《عروة بن مسعود الثقفي》من الطائف،
ومن الأسباب إللي منعت أهل مكة من الإيمان إن رسول الله ﷺ عايز يُحكّم شرع ربنا،
يعني الشرع هو إللي هيأمر وينهى وده هيأثر على مصالحهم وهيسحب البساط من تحت رجلهم، لأنهم عايزين يمشوا القوانين إللي تخدم مصالحهم💁‍♂️

◇وكمان كانوا خايفين على البلد ماهو محمد ﷺ لو حارب العرب عشان ينشر دعوته،
العرب هيفرضوا عليهم حصار مثلا، والبلد الآمن هيتحول لبلد فتن وحروب ومش هتكون مهيأة للتجارة،
ومكة عايشة على التجارة أصلا فمن وجهة نظرهم هو كده هيضيعهم، فدعوة إيه وإسلام إيه بقى ..احنا عايزين ناكل عيش يابني.. إيه إللي إنت بتقوله ده🤓

◇وفي ناس رفضت عشان خايفة على شهواتها وملذاتها،
إنت جايب دين بيأمرني بالعفاف والفضيلة،
وأنا أصلا شغلي كله في نشر الفواحش والإباحية😏

☆ركزوا في الكلام وحاولوا تربطوا بين الواقع بتاعنا في السنوات الأخيرة وبين تفكير أهل مكة وأسبابهم لمحاربة دعوة الإسلام وشوفوا التشابه الشديد،
ودي مش حاجة جديدة الوضع ده مستمر ليوم القيامة لأن دي سنن كونية بس احنا نعرف نتعامل معاها إزاي من غير ما نقع في أخطاء السابقين👌

◇وفي ناس منعها غبائها من اتباع الحق تخيلوا 😳
يعني كانوا يقولوا إزاي يعني نعبد إله واحد..إنت خليت كل الآلهة إله واحد..حاجة عجيبة 😕
"أَجَعَلَ الآلِهَةَ إِلَهًا وَاحِدًا إِنَّ هَذَا لَشَيْءٌ عُجَابٌ"
إزاي يعني ربنا يُحيينا تاني بعد مانموت 😏

فمكنوش مقتنعين أصلا بالفكرة ..زي لما نيجي نحاول نقنع حد بدليل واضح وهو مخه متربس😐
يابني مينفعش كذا وهو مصمم.. يابني لا يجوز وبالعقل يعني ..وده مفيش🤦‍♂️

فكل واحد بقى يدافع عن موقفه باستماتة وعلى الرغم من التنافس إللي كان بينهم إلا إنهم اجتمعوا على حرب الدعوة😑
في الوقت ده رسول الله ﷺ مستمر في الدعوة، ومكنش حد يقدر يقتله مثلا لأنه كان في جِوار أبو طالب😊
كان في أيام الجاهلية قانون اسمه الإِجَارة يعني الحماية، واحد ضعيف يطلب إنه يدخل في حماية شخص قوي شرفه عالي والناس بتعمل له حساب👌
ويدافع عنه هو وقبيلته لو أي أحد اعتدى على الشخص المُستجير، وكان الناس أيام الجاهلية بيحترموا جدا موضوع الجوار ده،
على الرغم إن مكنش في قوانين بتحكمهم لكن كلمتهم كانت هي القانون👌
فكان رسول الله ﷺ في جِوار أبي طالب عمه الكافر وهو سيد من سادات قريش الناس بتحترمه جدا وبتحترم قبيلة بني هاشم.

☆ممكن حد يسأل طيب إزاي رسول الله ﷺ يكون في جوار كافر ويطلب منه الحماية🤔

رسول الله عنده فقه واقع، هو بيستغل أي ظرف لمصلحته ومصلحة نشر الدعوة بشرط مهم وهو إنه لا يتنازل فيها عن أي شيء من دينه👌
فالحكمة ضالة المؤمن أنى وجدها فهو أول الناس بها،
يعني وقت ما المسلم يلاقي حاجة تفيده حتى لو من كافر خلاص يستفيد بها💁‍♂️
زي مثلا اختراع الهواتف النقالة.. الموبايلات يعني،
إللي اخترعها كافر لكن احنا كمسلمين بنستفيد منها عادي،
فأي حاجة تفيدنا كمسلمين نستعملها بشرط إنه ميكونش ده مقابل التنازل عن أي حاجة في ديني زي ما هنشوف مع رسول الله ﷺ😊

¤وبالمناسبة حديث الحكمة ضالة المؤمن حديث ضعيف لكن معناه صحيح 👌

فالمشركين في مكة مش قادرين يوقفوا رسول الله ﷺ عن الدعوة، وهو مستمر في الدعوة ليل نهار عليه الصلاة والسلام،
كان بيروح عند الكعبة ويقرأ عليهم القرآن وبيروح للعبيد والأحرار ويشرح لهم الإسلام،
متخيلين واحد ماشي في الطريق عمال يوقف الناس ويشرح لهم الدين 😮
أظن لو حد عمل كده دلوقتي الناس هتقول عليه مجنون وهيقعدوا يبصوا له نظرات غريبة ومش بعيد يسخروا منه، لمجرد إنه بيدعو لدين الله😞
كفار مكة مش عاجبهم الحال فبدأوا يأخذوا خطوات عشان يقضوا على الدين 👌
أول حاجة عملوها إنهم حاولوا يخلوا الناس إللي بتنصر رسول الله ﷺ على الحياد، مين إللي بينصر رسول الله وبيدافع عنه ؟
أبو طالب..يبقى خلونا يا جماعة نُحيّده يعني من الآخر نوقفه عن نصرته لابن أخيه،
راح مجموعة من سادات مكة من المشركين لأبو طالب قالوا له:
شوف يا أبا طالب ابن أخوك آذانا في مكان اجتماعنا وفي المسجد ،
هو عايز يعبد ربه خلاص يروح يعبده بعيد عننا ،
بييجي عندنا ليه في الأماكن بتاعتنا ،فإنت قول له إنه ميجيش ويبعد عننا😤
فأبو طالب حس إن الكلام منطقي..إيه إللي يودي ابن أخوه هناك ..هي الدنيا ناقصة مشاكل..بيروح يستفزهم ليه😕

فراح أبو طالب لرسول الله ﷺ وقال له:
إن قومك هؤلاء اشتكوا عليك، وقالوا إنك بتروح مجالسهم وبتؤذيهم،
فبلاش تروح عندهم وتقول الكلام إللي بتقوله 😥
فقال لهم رسول الله : شايفين الشمس؟
قالوا : أه😕
فقال رسول الله ﷺ :
"ما أنا بأقدر أن أدع ذلك منكم أن تشعلوا منها شعلة"
يعني زي ما انتم متقدروش تشعلوا من الشمس شعلة أنا كمان مقدرش أسيب الدين ده👌
فأبو طالب لما شاف ثبات رسول الله ﷺ اتأثر بكلامه وراح قايل لهم:
والله ابن أخويا ده ميكذبش أبدا، ارجعوا يا جماعة وسبوه أنا هفضل أدافع عنه 👌

☆حديث: "يا عم لو وضعوا الشمس في يميني والقمر في يساري على أن أترك هذا الدين ما تركته "
ده حديث ضعيف 👌

فرسول الله ﷺ بيعلمنا إننا طول ماحنا ثابتين على موقفنا وعندنا ثقة في الله وفي الدين موقفنا ده هيأثر في إللي حوالينا إنهم يشجعونا ويقفوا جنبنا،
لكن لو الإنسان كان متردد في كلامه ومش واثق أوي هتلاقي إللي حواليك بيضغطوا عليك لحد ماتعمل إللي هم عايزينه👌
كده أول مرحلة منفعتش 😕
ندخل في مرحلة الحوار والإغراء بالعروض😈

فقالوا خلونا نتكلم معاه يمكن نقنعه ،فاختاروا واحد منهم عشان يروح يعرض على رسول الله ﷺ شوية عروض،
فاختاروا عتبة بن ربيعة سيد من سادات مكة ،فراح لرسول الله ﷺ عشان يكلمه،
قال له: يا محمد ! إنت عارف مكانتك إيه بيننا ، ونسبك إيه في مكة، وإنت جيت بأمر عظيم فرقت به بيننا ،
وعِبت في آلهتنا وديننا وكفّرت آباءنا وأجدادنا،
فأنا هعرض عليك شوية عروض فكر فيها يمكن تقبل حاجة منها😓
فقال له رسول الله ﷺ: قل يا أبا الوليد .
☆وأبو الوليد كانت كنية عتبة بن ربيعة 👌

فقال عتبة:
يا ابن أخي، لو إنت عامل القلق ده كله عشان محتاج أموال،
قول واحنا هنجمع لك أموال لحد ما تكون إنت أكثر الناس مالا،
ولو إنت عايز شرف هنخليك سيد مكة، منخدش قرار غير لما نرجع لك، ولو إنت عايز مُلك ..هنخليك ملك مكة تحكم زي مانت عايز،
ولو إللي بيجيلك ده مس من الجن هو إللي بيخليك تقول الكلام ده هنجيب لك أحسن الأطباء حتى لو دفعنا كل ما نملك لحد ما تخف👌
كل ده ورسول الله ﷺ يسمع ..مقطعهوش ولا مرة،يعني هو عمال يتهمه باتهامات باطلة ورسول الله ﷺ بيسمع،
فبعد ما خلص قال له رسول الله ﷺ: خلصت كلام؟
فقال له عتبة خلصت😅
فقال له رسول الله : فاسمع مني👌
وبدأ رسول الله ﷺ يقرأ القرآن من بداية سورة فُصّلت:
"حم ۩ تَنْزِيلٌ مِنَ الرَّحْمَنِ الرَّحِيمِ ۩ كِتَابٌ فُصِّلَتْ آيَاتُهُ قُرْآنًا عَرَبِيًّا لِقَوْمٍ يَعْلَمُونَ ۩ بَشِيرًا وَنَذِيرًا فَأَعْرَضَ أَكْثَرُهُمْ فَهُمْ لَا يَسْمَعُونَ "
واستمر رسول الله ﷺ يقرأ ويقرأ وعتبة يستمع للآيات،
بيسمع القرآن بصوت رسول الله ﷺ مباشرة متخيلين🙊
فلما وصل رسول الله ﷺ عند آية:
"فَإِنْ أَعْرَضُوا فَقُلْ أَنْذَرْتُكُمْ صَاعِقَةً مِثْلَ صَاعِقَةِ عَادٍ وَثَمُودَ "
فهنا عتبة خاف وقام ووضع إيده على فم رسول الله ﷺ وقال :
ناشدتك الله والرحم ..ناشدتك الله والرّحم.😰
يعني بيستحلفه بالله وصلة الرحم إللي بينهم إنه ميخليش
ربنا يعمل فيهم زي ما عمل في قوم عاد وثمود.

☆فاكرين قصتهم 😁

فأكمل رسول الله ﷺ تلاوة باقي السورة لحد ما وصل لأية السجدة وسجد،
وقال لعتبة: هذا ما عندي.
فقام عتبة من عند رسول الله ﷺ ورجع لأصحابه إللي كانوا مستنيين الأخبار،
أول ماشافوه جاي عليهم في حالة ذهول ..وشه متغير..قالوا والله عتبة راجع لكم بغير الوجه الذي ذهب به😳
إيه جرى لك يا أبا الوليد😦

قال لهم: ......المرة الجاية إن شاء الله نعرف قال لهم إيه😅

♡ملحوظة:
أي حد عايز يأخذ القصص وينشرها يتفضل أنا معنديش مانع نهائي.

#Eman_Shalapy

https://m.facebook.com/story.php?story_fbid=535693374764570&id=100049717356242
هام لكل شخص عنده إمتحان أو إمتحاناته قربت🥺♥
متنساش تعمل شيرر وتفيد غيرك ولك الأجر

🔊 مستعدين للعيدية☝️
طبعاً كلكم عارفين يعني إيه عيدية 😊
يعني دورة جديدة رائعة

🗣️ اتعلمنا في دورتنا السابقة (فن الحياة) كيفية التعامل مع كل شئ محيط بينا..🕊️🌿

لكن السؤال دلوقتي... إزاي نتعامل مع أنفسنا🤝🏻🤩

✍🏻إزاي أعرف احتياجاتها و إزاي أعرف أقنعها بسلوك طريق الهداية ....❓

عيوبها كتير... فيها جهل و ظلم و عجلة ... ✍🏻هل ممكن أحول العيوب دي لإيجابيات❓

طيب أعمل إيه مع الكبر و الرياء و غيرها من الأمراض

↩️ لو نفسك تعرف كل ده يبقى اسمح لي
أقدم لك دورة جديدة خفيفة مفيدة بعنوان:
🌱 (فن التعامل مع النفس)
يقدمها لنا✍🏻 م علاء حامد

دورتنا خفيفة مش حتعطلك عن مذاكرتك😃💙
8 محاضرات بس ... والبداية قريبة جدًا بإذن الله 💪🏻

بادر بالإشتراك ونشر الاعلان فالدال على الخير كفاعله 🕊️💪🏻
_
▪️ للإشتراك من خلال الرابط
https://docs.google.com/forms/d/e/1FAIpQLSd3oilegp-6bLYMwIe9D7u7WXvVmRq-gLw4GYe2u9lZoqpzqQ/viewform
___
🔷 واتساب للتواصل عند وجود مشكلة في التسجيل 👇🏼
▪️ 👥 رجال:
http://wa.me/201032575230
▪️ 🧕نساء:
https://wa.me/message/LTVCFC3SC5XGC1
__

مشاهدة "يا من تشتكي الهم والضيق والغم والقلق(إسمع)" على YouTube
https://youtu.be/qcUucQgAKwo

🔘 سبحان اللهِ وبحمدهِ، عددَ خلقِه، ورِضا نفسه، وزنة عرشه، ومداد كلماتهِ

مشاهدة "قصه عجيبة عن فضل الصدقة" على YouTube
https://youtu.be/OjsFesOzExg

- الحمدلله 🌿

سبحان الله، والحمد لله، ولا إله إلا الله، والله أكبر

- الحمدلله 🌿

- سُبحان الله ❄️

استغفر الله

🔘 سبحان اللهِ وبحمدهِ، عددَ خلقِه، ورِضا نفسه، وزنة عرشه، ومداد كلماتهِ

- الحمدلله 🌿

- اللهُ أكبر 🍁