📜موال: [ ساعة عمرك ]
🎤أداء الملا قحطان البدیري
🖊الشاعر سيد عبدالخالق المحنه
📆 شعبان ١٤٤٠ هـ.
——————————
ساعة عمرك و المهد ما یحتویك
و هو طف انشاف ماشافوا مهد
بیه امرادم خیل و اسیوف و صهیل
و بیه اخیام و مشرعه و چلمة وعد
اهوایه محتاره بقت أم البنین
الصایر ابعباس ما صار بأحد
لو بچه ما یسکت إلّا ابذولفقار
و من یلزمه بیده مایبچي بعد
من یشوف إخته تجي ایحاول یگوم
و حته لو غافي اعله صوت إخته گعد
من تباوعله یدگ صدره و یصیح
و زینب اتعرفه یگللها عهد
و من یشوف احسین یرفعله الچفوف
و الحسین ایصیح یبوفاضل مدد
ما زحف مثل الخلگ واگف عمود
أول أیامه خذه دور العمد
طیحة الحره تدورلها کفیل
و طیحة الدمعه تدورلها اعله خد
من یدگ عالگاع یعني اخیمنه وین
یمته یا زینب أدگ بیدي الوتد
و من یشوف الماي ینظر للحسین
یعني گبل احسین مایشرب أبد
و من یشوف السیف یعلن بالهجوم
و من یشوف الخیل یتصور صعد
ابگصته ایبین علي و حمزه و حسین
ابخزرته ایبین ألف صعصع رعد
من تجي زینب یحس روحه کفیل
و من تمیل اعلیه یحس روحه سند
من تشبگه یشعر ابطعم الوداع
و من تعوفه یشعر ابچفه انفگد
أول احچایاته زینب، رایه، جود
أول الخطوات خیّال و لِکَد
بالمشي مشیة قیاده و خلفه جیش
اتگول جدامه ألف فارس شرد
• الّلهُـمَ صَل عَلَی مُحَمّد و آل مُحَمّد
--------------------
• مُحبّي الرادود قَحطانْ البْدیري
• للقصائد المکتوبة
@qahtanqasaed
>>Click here to continue<<