ايد ولا رجل ، نهد حيلي وجنت اتمنى لو ميت قبل هذي اللحظة ، اجاني باسم يركض وشالني وهو يكولي ..
باسم … على كيفك يخوي ما بيها شي ان شاء الله
خالد… بنيتي هاي ياباسم تعرف شنو يعني بنيتي ما اعيش بدونها
دفعته وركضت لبيتهم ، دخلت واني ادور على جمال العار وجنت اتمنى اللزمه.

طلعت اركض واني اريد اوصل لسيارتي وحسيت رجليه وكفن وما اكدر اتحرك ، وكعت على وجهي واجيت اكوم وحيلي انتهى ، اجاني باسم وانتجيت علي وكمت وطلبت منه يسوق ويطلع وره فاضل بسرعة ، صعدت بالسيارة وباسم صعد يسوق وطول الطريق وجسمي يرجف وصورتها بعقلي وهي مفرفحة وتتوسل حتى يطفونها ، ااااخ يا كلبي شتتحمل بعد ،
بعد ربع ساعة وصلنا للمستشفى واني نزلت اركض مثل المجنون وادور عليها ، لاكاني فاضل ولزمني وهو يهدأ بيه واني ادفع بي واتوسله يعوفني…
خالد… ابوس ايدك خلي اشوفها
فاضل.. خالد اهدأ شبيك راح تموت
خالد… عوفني بس اشوفها لك روحي فرفحت عليها
فاضل.. خالد ميصير تدخل عليها متسممه بسبب الحرق
خالد… فاضل عوفني ولا تخليني بحسرتها

فرفحت روحي وهمة لازميني وميخلوني ادخل عليها ، شوية واجه الدكتور وسألنا شلون احتركت…
اجيت احجي بس قررت اخذ روحه لجمال بأيدي وانتقم لبنيتي من كولشي سوا بيها.
مر الوقت واني كاعد يم الباب ومنتظر كلمة من الدكتور ، وكلما تطلع الممرضة أسألها ودكول (ادعولها)..
بعد ساعة اجت امها تصرخ وتلطم ، كمت ورحت يمها واني حاقد عليهم كلهم …
خالد… انتي السبب
ام ستار … ليش يمه اني شعليه
خالد… انتي عفتيها يم رجلج العار وحركها
ام ستار .. يمه ما جانت ادري راح يسويها النذل
خالد… اسكتي ما الج حق تبجين واسمعيني زين اذا ريم صار عليها شي انتي وجمال النذل اخذ روحكم بأيدي
فاضل… لك خالد شبيك تخبلت شلون تحجي ويه المرة هيج وكلبها مفجوع على بتها
خالد… اي تخبلت مو كافيهم ٨ سنوات حارميني منها وهي السبب هي وامك خططن وحرمني منها وتالي يحركونها كبالي والله ما اسامحهم والله

فاضل… كافي خالد صوتك وانت بالمستشفى مو وقت هالحجي
خالد … اني رايح اخذ روح جمال وبعدين اني مستعد انام بالسجن والله ما ارجع اذا ما اطفئ نار كلبي
فاضل… تعال وين رايح ولك شبيك تخبلت انت وين عقلك
خالد… جاي اكلك عوفني لا ابتلي بيك

دفعت فاضل واجيت اطلع واني اصيح ( ثاري اخذه بأيدي) وفجأة لزموني علاء وعباس وهمة يسحبوني للسيارة…
حاولت ادفعهم بس جان حيلي مهدود…
خالد… عوفوني يا جبناء عوفوني
علاء… اهدأ خالد انت متعرف شجاي تسوي انت فاقد
عباس … بس اهدأ والله اخليك تشوف جمال النذل كبالك يتوسل بس اهدأ راح تأذي نفسك
خالد… عساني بالموت كتلكم عوفوني اكرهكم كلكم كلكم
علاء… ماشي اكرهنا وكولشي سوي بس اهدأ فدوة اروحلك

وبعدها ما حسيت بشي ، ما اعرف شكد مر من الوقت وفتحت عيوني وجان عباس وعلاء فوك راسي ، انتبهت مخليلي مغذي وتذكرت بنيتي بين الحياة والموت ، جريت المغذي وطفرت اريد اروحلها ، لزمني عباس وهو يصيح الممرضة…
عباس.. الله يخليج تعالي رجعي المغذي وانطي مهدء
خالد.. لك جبان حقير عوفني اريد اكوم
عباس… راح دكوم بس مو هسة لحد ما يكمل علاجك

بعد يومين…
فتحت عيوني واني بالمستشفى ومشكليلي مغذي ، انتبهت عباس نايم على الكرسي بصفي وعلاء نايم على طرف السدية… اجيت اكوم واني احس الم بجسمي موتني ، فتحت الكانونة وسديت المغذي واني جاي اكوم كعد عباس ..
عباس… شلون صرت
خالد.. اني ليش هنا وريم وين احجي شصار
عباس… الحمدلله ريم تعدت مرحلة الخطر وصحت وانطت افادتها
خالد… يعني راح تعيش
عباس… ان شاء الله
خالد… اااخ كلبي ، وين هسة هي
عباس… بالمستشفى وكالوا شهر يله يكدرون يطلعوها
خالد… ماشي
كمت واني انتجي على عباس ورحت لغرفتها ، وكفت واني اتمنى ادخل عليها واشوفها ، كعدت يم الباب وصورة النار وهي تاكل بيها مجاي تروح من بالي ،

ثواني ودخلت امها واختها ودق واني ما جنت متحمل اشوفهم ، اجتي وكفت كبالي وهي دكولي …
ام ستار.. اعرف انت حاقد عليه وتكرهني بس يمه ما الي ذنب والله
خالد… كافي ما اريد اسمع شي

عافتني وراحت كعدت هي وودق …
بده الوقت يمر واحنه كاعدين كبال الغرفة وفجأة رن موبايل امها.. جاوبت ولفت انتباهي الكلام الي سمعته ..
ام ستار … الووو منو
حمزة… ام ستار اني حمزة جيرانكم
ام ستار … هلا بيك يمه
حمزة… خالة لكينا ابو ستار مقتول ومشمور باب البيت
ام ستار … شلون شنو مقتول
حمزة… اي والله خالة وبلغنا الشرطة
ام ستار … ماشي

سدت الاتصال وكامت تهلهل بنص المستشفى وهي تصيح ( ما راح حقج يريم النذل مات ، جمال النذل نقتل وخلصت منه )
تفاجئت بالي جاي دكوله ، كمت وتقربت يمها واني اريد استوعب كلامها ..
خالد… مات شلون مات
ام ستار… مكتول وشامرينه باب البيت
خالد… حرامات ما اخذت روحك بأيدي يا جمال
ام ستار… كول الحمدلله من ما لوثت اديك بدمه

بعد بمرور ستة اشهر….
صحيت الصبح واني مفزوعة بعد الكابوس الي شفته ، هذا الكابوس الي مايفاركني من ستة اشهر وكل يوم لازم اكعد مرعوبة بسببه ، متت وما عفتني ، متت وبعدك تلحكني ، اريد اخلص منك كافي تجيني حتى بنومي ، اخذت مني كلشي ،اخذت مني سعادتي وروحي وجسمي شنو الي تريده بعد ، كمت ورحت للمطبخ وجانت الساعة ب٥ الفجر ، فتحت باب المطبخ وطلعت للحديقة واني اريد اتنفس اختنكت وصرت اشهك قوي ، رفعت راسي للسمه ودموعي تجري ،
الي اعرفه انت عادل ورحيم ، اريد تاخذلي حقي من الي سوه بيه هيج ، رفعت اديه بالظلام وشفت شكلهم يخوف ، كعدت بالكاع ونهاريت بجي، شنو ذنبي انحرم من كولشي ، شنو ذنبي ياربي ،

بعد ساعة حسيت نفسي ارتاحيت ، كمت دخلت جوة واني احس نفسي جوعانه ، بديت احضر ريوك الي ، سمعت اكو حركة بالبيت ،رحت حتى اشوف منو وطلع علاوي بوجهي وهو يباوعلي بنظرة خوف …
علاوي… وين جنتي ماما
ريم… بره حبيبي شبيك
علاوي … خفت تروحين وتعوفيني
ريم… لا حبيبي عمري مراح اعوفكم
اخذت علاوي وكعدنا نتريك اني وياا ، بده علاوي يحجيلي شلون هو جاي يشوف ابوو وسام بالحلم.
كملنا ريوك وراح علاوي يقره واني كعدت بغرفتي ما طلعت منها لحد ما اجتني ماما العصر وهي دكولي ..
ام ستار … كومي يمه خلي نطلع نتمشى بره ونغير جوو
ريم… مالي خلك
ام ستار.. يمه كومي فدوة الجهال مختنكين ويردون يغيرون جوو
ريم … ماشي
كمت بدلت وما اعرف ليش لبست ملابس ضيقة عبالك متعمدة ، طلعنا واحنه دنأجر تكسي انتبهت لخالد وهو جاي من بعيد ، وكفت كبالي ولزم ايدي قوي …
خالد… شلون تطلعين بهيج ملابس
ريم … وخر ايدك عني وانت منو حتى تحاسبني
سحبني من ايدي واخذني للبيت ، دفعني جوة بالبيت ووكف كبالي …
خالد… كلمتين ريم سمعيهن ،خسرتج مرتين بس مستحيل اخسرج هالمرة وتوافقين وغصبا عليج واضح لو لا وهسة تبدلين ملابسج هذني وتلبسين شي محتشم.
ريم .. انت شتريد مني وليش متمسك بيه شنو الي عاجبك بيه ، عاجبتك اديه المحتركات لو صدري الي صاير اسود لو رجليه المزلغات ، فهمني شتريد مني

تقرب عليه وصار كبالي وهو يتنفس سريع …
خالد… انتي الي من يوم نخلقتي والحرك الي تحجين علي ميهمني لان اني ما حبيت جسم ولا شكل اني حبيت روح حبيت ريم ما حبيت جسمها ، فهمتي لو لا

ريم… ريم ماتت يا خالد ، الله يخليك عوفني ما أفيدك
خالد… هذا الكلام لا تعيدي والا ابتلي بيج والله وصيري حبابة وسمعي كلامي
عافني وطلع وكعدت بالكاع ابجي واني محتارة ، شنو الي عاجبه بيه ، معقولة ميخاف مني ولا يشمئز واني كارهة نفسي وتجيني مرات اخاف من نفسي ، وقررت اني ما اوافق حتى ما اضلمه وياي.

ومرت الايام والسنين وبكل يوم خالد يدك الباب علينه ويخطبني من ماما وارفضه وهو لا مل ولا عجز ولا تذمر ، بكل يوم يدك الباب لحد ما رحت لاخوو وطلبت منه يلزم اخووو ويبعده عني وما فاد وحاولت ادخل علاء وعباس واكوللهم يبعدوا عني وما فاد وجان متمسك بيه لدرجة ما توقعتها عمري كله …
لحد ما بيوم تعرفت على بنية حبابة ولطيفة كولش وفجأة قررت احجيلها قصتي وهي بدت تسمعني وتتأثر بقصتي ومرت عليه ليالي وأيام واني بكل يوم اتصل عليها ونبقى نسولف واحجيلها عن قصتي ومعاناتي لحد ما وصلت لتمسك خالد بيه وإصراره وفجأة بدت البنية تشجعني وتطلب مني اوافق وبدت تقنعني اوافق وابدي حياة جديدة وما اعرف شلون كدرت تقنعني افتح صفحة جديدة واعيش بسعادة مع الانسان الي تمنيته وبعد مرور سنتين على حادثتي الأخيرة وبالتحديد… بتاريخ ٢١/٦/٢٠٢١

-انطيت موافقتي على خالد وجانت أحلى لحظة بحياتي وما جنت متوقعة ابواب السعادة راح تنفتحلي من جديد.
بيوم زواجنا…
بالفستان الابيض واني انتظر فارس احلامي الي ملك قلبي وروحي من صغري وكلبي أعلن استسلامه لان هاللحظات جانت أكبر من أمنياتي وبده الخوف يسيطر عليه وفجأة سمعت صوت الموسيقى والطبل والطلقات واني اشوف الكل فرحان حتى جهالي يركصون … جان حلم وتحقق ومحد جان متوقع يجي يوم ويتحقق هالحلم ومحد جان يتوقع ينتصر هالحب.

صارن اديه يرجفن واني اسمع اصواتهم وهمة يكولون اجه العريس واجتي ودق تركض غطتني وخلت الطرحة على وجهي ، نزلت راسي بالكاع وبعد ما اشوف شي ، انتبهت لرجلين اقتربن عليه وشميت عطره واجيت ادوخ واني ما مصدكة حلم عمري تحقق.. حسيت باديه لامسن اديه وهو يضغط بايده على اديه عبالك راح اشرد منه ، رفع الطرحة عن وجهي وجان جماله مينوصف ، تقرب عليه وباس راسي وهو يهمسلي..
خالد… ولج يا تعب عمري واخيراً أنصفني القدر
فرحت بكلماته ونزلت دمعتي وهو تقرب عليه وباسني بخدي وهو يكولي …
خالد… ما دام اني عايش ما اريد دموعج تنزل فهمتي يروحي

اخذني وطلع وجانت اول مرة اطلع من هذا البيت واني فرحانة والسعادة غامرتني وجنت لازمة ايده حيل وخايفة يطلع هذا حلم .. صعدني بالسيارة وزفونه للفندق… اول ما وصلنا الفندق ودخلنا الغرفة جان كلبي يدك بالثانية الف ، كعدت واني منتظرة احلى لحظات حياتي ، وكف خالد كبالهم وكللهم …
خالد… تعذروني هذا اليوم اني انتظره قبل ٢٠ سنة فاتمنى منكم تجفوني شركم وتخلوني اعيش لحظات عمري ويه حبيبتي .

الكل ضحك والكل صاروا يكلوله (حقك) وفعلاً كلهم طلعوا وبقينه بس اني وياا… قفل الباب واجه كعد يمي ،
رفع الطرحة وصار يباوعلي بنظرة ذوبت كلبي وروحي …
خالد… تعرفين شنو شعوري هسة
ريم… شنو
خالد… ما اعرف احس نفسي نولدت هستوني للدنيا ولج يا عذابي متتخيلين شكد تألمت بغيابج
ريم… ما اريد نحجي عن وجعنا بهذا اليوم
خالد… لا ماكو وجع بعد اليوم
حسيت بلمسات اديه على ظهري وهو يتقرب مني ويشم بشعري واني ذبت بين اديه ونسيت حتى وجع جسمي ونسيت جسمي المشوه بين اديه ، صار يتقربلي اكثر لحد ما ( صدك ما تستحون منتظرين مني اكولللكم شصار عيب يله اطلعوا بره ، عرسان بيناتهم ، مع الاسف عليكم بعدكم ما طالعيين يله اطلعوا بسرعة 😂😂😂)


جنت اركض بوسط بستان تفاح وعلى جمال المكان كعدت جوة شجرة تفاح وصار يوكع عليه ثمرة تفاح ، اخذتها واكلتها وجان طعمها كولش حلووو…

صحيت واني مبتسمة على الحلم هذا وانتبهت للمساته على وجهي وهو يكولي …
خالد.. صح النوم حبيبي
ريم… صباح الخير
خالد… صباح الحب والسعادة والعسل ، شبي حبيبي كعد مبتسم
ريم… شفت حلم حلووو
خالد… ياربي كل حياتج حلوة من اليوم
ريم… بوجودك أكيد
بده يوزع بوساته على وجناتي وهو حاضني ويهمسلي بكل مرة …
خالد… بنيتي احبج


وبعد مرور ٣ اشهر على زواجنا احب ابشركم هسة اني حامل من حبيبي وفرحة عمري واتمنى يجيني ولد يشبها …
خالد… نجبي بنيتي اني اريد بنية تشبهج
ريم… لا ولد
خالد… جاي اكولج بنية
نرجس…. اثنينكم تسكتون لا ولد ولا بنية ان شاء الله يجيكم قرد
خالد… ههههههههه
ريم…. هههههههههه

#النهاية….
-ابطال روايتنا الحلوة تزوجوا وخلصنا منهم وعلاء وودق عايشين بسعادة واستقرار وصار عدهم بنوتة وولد وعباس خطب وتزوج قبل شهر وام ستار عايشة ويه ريم وخالد واطفال ريم عايشين بحب وحنان خالد الهم ولامهم ورواء تشافت من مرضها وإيمان صار عدها ولد أسمه (ادم) وفاضل عايش مرتاح ويه دلال ونسيت اكوللكم صارت عنده بنية من دلال وما ذكرت هذا الشي ضمن الاحداث لان جانت اكو احداث اهم والكل عايشين وباستقرار والحمدلله.
_____________________________
الى هنا اُعلن عن نهاية أجمل تجربة بحياتي وهي كتابة هذه الرواية التي عشنا معها الحزن والالم والفرح والمعاناة وكل احاسيسها وشاركنا ابطالها بكل ما مروا به.
الى اللقاء … نلتقيكم برحلة جديدة
#كونوا_بخير
#نرجس_صادق

#رسائل

السلام عليكم ورحمة الله وبركاته
انقل إليكم رسائل الأبطال بالتسلسل…

*ريم
حبيت اكول شكراً لنرجس اولاً وشكراً لكل الاعضاء الي شاركوني قصتي والي تألموا لألمي وفرحوا لفرحي ، من صدك جانت أحلى تجربة بحياتي هي مشاركة قصتي وياكم وبقلم احلى كاتبة ، نصيحتي لكل بنت …
لا تكونين ضعيفة ولا تخضعين اذا جان الموضوع يتعلق بمستقبلج حاربي وصيري شوكة بعيون كل شخص يريد يحرمج من حياتج ، لا تسكتين للضلم اني جربت السكوت ومشفت منه غير العذاب وبنفس الوقت اذا مريتوا بضروف صعبة اصبروا وخلي تكون عدكم ثقة بالله لانه راح تفرج وراح تجيكم أيام تعيشون بيها السعادة والفرح والراحة مثل ما جاي اعيش اني حالياً.. بالنهاية شكراً من كل كلبي



*ودق
اني احب اكول لنرجس ولمتابعيها اني احبكم كولش كولش وشكراً على مساندتكم ودعائكم إلنا واريدكم تدعولي انجح من الكلية صعبة 😭😭🥺

ونصيحتي لكل بنت …
اختاري الي يحبج ويضحيلج مو الي تحبي ولا تتزوجون من وقت 😅😅



*خالد
كل الكلمات قليلة بحقج نرجس وبحق متابعينا الحلوين ، عمري ما عشت تجربة احلى من هذي ،تجربة شاركت بيها قصتي ويه احلى ناس والحمدلله جانت تجربة ناجحة وكدرنا نفيد ونستفاد من اخطائنا

نصيحتي للكل…
رجاءاً قدسوا الحب ولا تحجموا بشروط وخيارات لا تحجمون الحب بالجمال ولا بالجسم رجاءاً انقذوا الحب من شباك السطحية وخلوا رباط مقدس بين الارواح والقلوب فقط
لا الشكل يحكم على الحب
ولا الجسم
ولا المال
ولا الشهادات
الحب أنقى واطهر من كل هالشكليات.

نصيحتي للشباب…
البنت الي تحبها ضحيلها وخليها بعيونك ودللها وكون الها اب قبل لا تكون إلها حبيب ولا تنجرف بغرور المشاعر السطحية واخيراً احب اكول لكل رجال وعد ووفى بوعده… بارك الله بيك


*علاء
مراح اشكركم لان الشكر قليل بحقكم بس راح اكوللكم كنتم خير سند إلنا طول فترة الرواية


*عباس
شكراً للكل واحبكم كلكم وبالأخص معجباتي 😅 واعرف راح انعلس بعد هالرسالة بس سامحوني اذا متت.



ختاماً سأنقل لكم رسالتي…
اكو شخصية بالرواية ذُكرت بقلة وما شددنا عليها لانه كان دورها ضعيف ومقتصر على النهاية فقط…
#ديار

شخصية استثنائية قوية شجاعة رفضت العيش مع شخص ميحمل إلها أي مشاعر وكانت لا تتصدر اولوياته فقررت الانتقام لكرامتها بالضغط على قلبها العاشق والهروب بعيداً.

لازم نتعلم ونفهم بآنه احنه نساء خُلقنا جميلات بكل أشكالنا وخُلقنا رقيقات بكل تنوعاتنا وجريمة نرتكبها بحق أنفسنا انه نعيش مع شخص ميحمل إلنا اي حب أو احترام ، هنا ينتهي دور القلب وراح يتصدر العقل ولازم نرفض الواقع بكل أشكاله ونقاوم ونحارب حتى ننتقم لكرامتنا ،فنصيحة مني لا تقبلون تعيشون مع شخص ميحبكم انتم نخلقتم للحب والحنان والحب من ابسط حقوقنا فلا تتنازلون عنه ولا يغركم كلام بعض الأمهات (تبقين مع زوج ميحبج افضل من الطلاق ) لا ارفضوا هذي العادات السخيفة والطلاق أفضل من الموت على قيد الحياة ،صح المجتمع يرفض المطلقة لكن المطلقة نفسها أشجع انسانة في هذا المجتمع بما انه رفضت الذل وفضلت العيش بكرامة ،خلوا #ديار تكون قدوتكم .


#كونوا_بخير
#نرجس_صادق

السلام عليكم

متابعيني الحلوين نعود إليكم بقصة جديدة ورحلة مختلفة عن سابقتها والم جديد وحزن شديد

قصتي الجديدة بعنوان * ضحية تُنجب ضحية*

سيتم تنزيل القصة اسبوعياً.. حيث في كل اسبوع بارت واحد فقط وسيكون في يوم الجمعة.

مراعاةً لضروفي وضروفكم ولانشغال الجميع بالدراسة والبعض بالعمل .


تحية طيبة من القلب ❤️
نرجس صادق

حيث كانت تلك العادات المميتة تطيح بأبرياء صغار كضحايا الحرب..
قصة تُسلط الضوء على شاب يُكافح منذ صغره وقد أطاحت به العادات والتقاليد ضحية لها.

فهل يُنصفه القدر أم ماذا••؟
وماذا بعد ••
كونوا معي بقصة جديدة وحقيقية بكل احداثها •••


كونوا معي في كل يوم جمعة الساعة 11 مساءاً لنروي لكم ما حدث•

نرجس صادق

البارت الاول

ضحية تُنجب ضحية
#نرجس_صادق

‎هذا عمـري مكالب اويه الضيج
‎ما مــر الضحج مـرة اعله سني

___
عُدنا معاً لندخل احد البيوت العراقية ونشاركهم كل لحظات حياتهم ونستذكر معهم كل ما ترك الأثر في قلوبهم ..
سنة 1980 …
كربلاء المقدسة بالتحديد مدينة طويريج ••
وفي آحد البيوت المتزمتة بقوانينها ذات الطابع العشائري الجائر ••

فائز…
شاب عراقي يسكن بأحد القرى الريفية بعائلة متكونة من اب كبير بالسن ملتزم وصارم وام تقليدية تجبر ابنائها على كل كلمة يكولها الاب نسبةً للعادات والتقاليد المتبعة بالعشائر … فائز اخ ل ٦ شباب و٢ بنات.

غريب .. الاخ الاكبر لفائز وجان عسكري من ضمن الالاف العسكرين المجبورين على الانظمام بالجيش العراقي

باقي الاخوة .. نصر وكاظم وماجد
فائز الابن الثاني للعائلة وجان مختلف عنهم .. كادح , قوي ,مطيع, هادئ.

في ذالك اليوم بالتحديد الساعة ال 3 ظهراً…
فائز… اوف والله تعبت
غريب … انت شجابرك على هذا التعب صير مثلي وعوف الدراسة وشوفلك شغلة ثانية
فائز.. لا غريب اني حلمي اكمل دراستي وبعدين لاحك على الشغل
غريب.. بكيفك بس انه نصحتك
فائز… الله كريم
رجعت اقره واني عندي امل اكمل دراسة و تصير عندي شهادة.
واني اقره اجاني صوت الوالدة وهي تصيحني على الغده .. كمت ورحت اتغده وجانت بيوتنا كصب … اللتمينا على نفس السفرة الي جان يترأسها ابوي..
الاب.. غريب انت شني كل مرة جاينه شارد تريدهم يكضونك
غريب.. يابه اني اكره العسكرية بس من لا جارة
الاب… اللزم مكانك واسكت ما نريد طلايب
غريب.. ماشي يابه
الاب.. وانت فائز ليا وكت تبقى مكابل كتابك ما ناوي تشوفلك شغلة
فائز… بويه غير اكمل دراستي
الاب.. شراح تاخذ من دراستك عوفها واكعد اشتغل
فائز.. يابه ما اكدر اعوفها
الاب.. اني كلت تعوفها وتشوف دربك شوفلك شغيلة وفيدنا بيها
فائز.. بويه ما بقالي شي هي جم سنة وتكضي الدراسة
الاب.. حجايتي ما تصير اثنين واليكسرها ما يبقى هنا
فائز… صار يابه

كمت من الاكل واني مغثوث وكل قهر الدنيا بصدري .. لا من جنت صغير تهنيت ولا من كبرت وحتى دراستي راح اعوفها.

مرت الايام واني عايف الدراسة وادور على شغل .. وبيوم لكيت شغل بمعمل طابوك
بديت اشتغل ..نكص طابوك ونبيع وجان يجيني منها مصروف عالي وكله جان ياخذه الوالد بحكم هو جبير العائلة.

استمريت اشتغل بالمعمل وجان الشغل تعب ويهد الحيل بس جان يرضي الوالد لان مصروفه عالي وبقيت على هاي الحالة سنين واني محروك كلبي على دراستي الراحت وشغلي الي كاسر ظهري.

وبيوم جنت اشتغل بالمعمل واجاني اخوي نصر يركض واني من بعيد عرفت عنده شي ..
نصر … فائز فائز
فائز … ها ولك شكو هديت حيلي
نصر … خلي ارتاح
فائز.. ولك احجي شترتاح مو وكعت كلبي
نصر … غريب هم اجه شارد ويدورون علي
فائز.. كول غيرها
نصر… والله وابوي مختله يم بيت عمي
فائز … راح اجي ورك هسة

طلعت اركض واني الف حسبة ابالي .. شلون راح نفك غريب من هالورطة.

وصلت للبيت ولكيت ابوي منتظرني..
فائز .. ها يابه
الاب.. هذا غريب ما ناوي يفكنا من طلايبه
فائز .. جا وهسة شنهو الحل يابه
الاب .. والله ما ادري بلكت يهدون ويفكون عنه
فائز… وغريب وين
الاب.. بيت عمك وكتلهم يختلونه ولا يخبرون احد بمكانه
فائز.. شكد حجيت ويا ولا فاد
الاب.. خلي يفكونه وانه اللي شغل ثاني ويا

وراحت ايام وردت ايام وغريب ما يطلع من مكانه خاف يلزمونه ويروح بيها إعدام.. بعد هاي الحادثة قررت اعوف الشغل بالمعمل واشتري حلال واسويله مكان قريب على البيت حتى اتحضر لإي طارئ.

واشتريت الحلال وبديت اطلع للزرع كل يوم الصبح واديم الحلال واني كلبي ما مرتاح واشوف كل يوم الدوريات تفتر وكل يوم نسمع بيهم لازمين هارب من الجيش وكل الي لزموهم حكموا عليهم بالاعدام.. زاد الخوف عدنا وقررنا نهربه لغير مكان بعد ما صارو يجون لبيوتنا حتى يفتشونها.

وبيوم مقررين نهرب غريب من المحافظة كلها داهمتنا دورية ونلزم غريب واخذوا وبعد فترة سمعنا بخير حكم الاعدام على غريب ..

امي تخبلت وصارت تنوح على غريب وابوي نهد حيله وصار يتوسل بالرايح والجاي حتى يتوسطله.
ما كدرت اسكت وعفت شغلي وحلالي ورحت ادور واسطة لغريب وبيوم جنت ادور واسطة طلع كتاب يشملني بالعسكرية ونجبرت اروح للعسكرية بالاخص جانت الحرب على ايران هستوها بدت ..

اخذونا لمنطقة اسمها نهر جاسم وهناك جانت الحرب مشتدة حيل وعلى ساعة نموت ..
يوم بعد يوم والحرب تشتد اكثر وهواي خسرنا جنود .. واني بكل مكان اروحله اتوسل بيهم يشوفولي واسطة لغريب حتى اذا بفلوس .
جنت مستعد ادفع عمري بس ينفك الحكم عن اخوي .. فعلا لكيت واسطة تخلص حياته من الاعدام بس بمبلغ جان حيل جبير.

وبيوم جنه متحضرين لأي طارىء بعد ما صرنا نسمع ضربات .. وفجأة صار ضرب قوي على الجيش العراقي .. وبهاي الضربات تصوبت برجلي وجانت الاصابة قوية حيل اضطروا ينطوني إجازة حتى انزل لأهلي.

نزلت لأهلي فرحان بخبر رجعة غريب وما اهتميت لجرحي ابد.. استقبلونا بفرحة جبيرة وامي كامت تهلهل وهي فرحانه برجعت غريب.

خلصت إجازتنا ورجعنا اني وغريب للعسكرية وجان غريب مجبور بس ما يكدر يحجي لان ابوي هدده يطرده اذا سمع بي شارد مرة ثانية.. ومثل كل مرة حرب وقصف وضربات قوية راح بسببها هواي ناس.


وصار وقت اجازتنا ونزلنا اني وغريب للبيت وهاي المرة استقبلونا بهوسات وهلاهل وجان ابالنا فرحانين بنزلتنا من العسكرية ..
الام … هلا بالعرسان
غريب.. شني عرسان يمه
الام.. يمه انه خطبتلكم بنات خالكم رسمية ونورية وهالاسبوع نزفكم
فائز.. شني يمه مو بكيفكم انه ما اريد
الام.. جا هي مو بكيفك وانه انطيت كلمة لخالك
فائز.. يمه اذا العرس مو بكيفي جا شنهو بكيفي
الام… وعلي اخلي ابوك يطردك
فائز.. جا يطردني اهونلي من ما اخذ نورية
الام .. جااا شبيها نورية
فائز… يمه هسة صرتي ما تعرفين شبيها نورية
الام… ولك لا تطلعني من طوري وتاخذ نورية وغصبا عليك
فائز… ما اخذها ولا اريدها
الام .. خوش اكومن اشوف ابوك شنهو رأيه

طلعت وانه مهموم واحس القهر يحرك بصدري .. ما لكت غير نورية تخطبها الي والله مالي نفس بيها.
لليل وسمعت صوت ابوي وهو يصيحني.. كمت رحت يمه وجان يصيح بيه بدون ما يسمعني..
الاب… وعلي اخلي العصى تلعب على ظهرك شنهو تريد تفشلنا ونكلهم ابنه ما يريد بنتكم جيف ما تعرف تحجي.
فائز.. جا تريدني اخذ وحدة اسمي ما تعرف دكوله
الاب.. وهي المرة تقيسها بالحجي
فائز.. انه ما اريدها وما الي نفس بيها

وبذاك اليوم ضربني ابوي لحد ما كلت موافق يله عافني .. عفتهم وطلعت وانه مهضوم وما اعرف المن أشكي.. تقبلت البنية وكلت هذا هو المقسوم.
____
اعتذر على التاخير ولكن التأخير بسبب البطل لآنه تأخر عليه اليوم
البارت الاول كان مجرد بارت تعريفي بالاحداث الاولى
ويعتبر هذا البارت مدخل لبداية الاحداث الحقيقية.

للعلم البطل بعده ما نولد 😁
تحياتي
نرجس صادق

البارت الثاني


#ضحية_تُنجب_ضحية

فائز…

‏يا أسود رمش
هنيال لون الليل
چي لنّه ويه عينك دوم يتودد

——————————————————
فائز…
طلعت من البيت وبأيدي الفلوس الي انطانياهن ابوي واني اباوعلهن بحقد واني ماشي حتى اشتري ملابس للعرس وقررت اشتري دشداشة سودة ..
ما يصير العريس يلبس اسود وهذا جان فال مو زين بس انه صرت اشوف حياتي جحيم ويه نورية ..

اشتريت الدشداشة ورجعت للبيت .. تلكتني امي تهلهل وتهوس ومن شافت الدشداشة سودة صاحت يبوو واجه ابوي يركض وانه ما حسيت غير على العصه وهو يضرب بيه ويصيح..

الاب… لك ابن الكلب شنهي تكسر كلمتي ولك انه هيج ربيتك من تسودت عيشتك وطاح حضك يا مهتلف
اخذت الدشداشة وطبيت للبيت وكعدت افكر واكول …

شنهي ذنبها يجوز هي هم مجبورة او يجوز ما تدري بيه مالي نفس بيها خلي اعاملها بالحسنى والله كريم.

واجه يوم الزفه وانه عندت ما اروحن اجيبنها من أهلها.. عاد أمي صرخت ولطمت وانه دكيت رجل ما اروحن اجيبنها واضطرت امي تروح تجيبها من بيت خالي … واجتي تمشي وامي لازمتها وتهوس وانه كاره شوفتها واشوفن الشر بوجها ..
طبت للغرفة وانه بالف قل هو الله احد يله طبيت وراها وشفت الشيطان بوجها وكطعت افكاري وكلت اعاملها بالكلمة الطيبة وماكو جارة..

_ شوفي يا بنت الناس انه ما هاويج بس هيج حكمت الضروف طيعيني وما تشوفين غير الطيب
_ ان شاء الله ما يكون خاطرك الا طيب

خلصت هالليلة على خير وبعدها بيومين انه اللتحقت وخلصت ايامي بين الالتحاق وبين الشغل وانه مالي نفس ادخل البيت ..

بيوم نزلت من العسكرية ومن وصلت لأهلي مثل الهم وثكل بصدري .. طبيت لغرفتي وانه مصدوم من الغرفة ..
_ نورية شنهي هذا الوصخ ما دكولين رجال جاي تعبان من الشغل خلي اغسل الغرفة وازينها
نورية… وانه شمعرفني انت جاي
فائز.. يعني هذا الوصخ ما تغسلينه الا اجي انه شنهي متعودة على الوصخ
نورية… انه مو وصخة بس هذا الوصخ من اخوتك
فائز.. اخوتي شجابهم بالنص
نورية… همة وصخين مو انه
فائز… جا انعم الله عليج اخوتي وصخين ما تنظفين بدالهم
نورية.. خلي امك تنظف وصخهم مو انه

اشتعلت نار وانه كلبي شايل عليها واشوف وجها وجه الشيطان .. لعبت نفسي منها وطلعت ومن ذاك اليوم وانه شفت وجه نورية الثاني ..

بكل يوم انزل بي من شغلي اشوفن مكاني وصخ وكلما اجي يمها وانوي اتقرب منها تروح تنام يم اختها واذا حجيت حجايه ما تحترمها ودومها ترفع صوتها عليه ..

مرت الايام وانه ما طايق العيشة وياها وبيوم نزلت من العسكرية ورحت لبيت خالتي بالحله.. وهناك شفت بنية صغيرة جاية من المدرسة تمشي بهداوة وكل ضني هاي غريبة من اهل المنطقة … وانه اشوفنها طبت لبيت خالتي طارت روحي وراها وركضت وراها وطبيت وشفت خالتي تسألها على مدرستها.. صرت احس كلبي يريد يطلع من صدري وانه اريد اتذكر خالتي شوكت صارت عدها بنية بهالعمر وسبحان الخالق على هالوجه المرسوم… عشكتها اي عشكتها ونسيت انه متزوج وضلت عيني تتبع أثرها.. لمحني رجل خالتي وصاحني من بعيد..
_ يا هلا بالضيف تعال بوية ادخل
_ هلا بيك عمي ولو انه اجيت بوكت مو مناسب
_ لا يابه انت تدلل هلا بيك هلا
_شلونك وليدي
_ بنعمة عمي الحمدلله .. انه نزلت من العسكرية ومفتقد خالتي واجيت اشوفنها
_ اي هلا بيك يمه نورتنا يخالة
_ رحم الله والديج خالة انتي شلونج
_ على الله يمه الحمدلله
_ الله يكويج ( معناها الله يقويج 🌚)

اللتفت وصارت عيني بعيون ذيج الغزالة الواكفة يم خالتي وسرحت وانه ما منتبه شيحجي ابوها.. شوية واسمع صوت خالتي وهي دكلها..
_ يمه حميدة روحي بدلي ملابسج خلي نحضر الغده على جية ابن خالتج
_ حاضر يمه

اويلي اسمها حميدة وياريت لو الله يحن عليه ويرزقنياها.. خذت كلبي وهي تلتفت وتدخل الغرفة وانه عيني وراها ..

فززتني خالتي وهي تصيحني..
_ يمه وين بالك واني اسئلك على امك
_ والله خالة افكر بأمي اخافنها تقلق وانه ما منطيها علم بجيتي لهنا
_ اي يمه حقها خاف يحترك كلبها عليك
_ لا ان شاء الله ما يصير شي لان همة ما يدرون شوكت انزل
_ خير ان شاء الله يمه

وجنت احسب دقيقة دقيقة حتى يكضي هاليوم واروحن لأهلي وافاتحهم بهالموضوع.. الكلب قفل عليها وراسي صار ما يفكر بغيرها.

خلص هاليوم ونزلت لاهلي ركض وصلت لباب البيت وتلكتني امي تهوس وتهلهل..
الام .. يمه صلوات على محمد نورية حامل واحنه منتظرينك ترجع ونفرحك
فائز.. خير ان شاء الله
الاب… بالمبارك ان شاء الله
فائز.. شكرا يابه

رحت لغرفتي واشوفنلك الغرفة بوصخها والخانم نايمة بيها .. طلعت وانه روحي طالعة ..
فائز.. هاي البليتوني بيها روحي شوفي الغرفة ، اكو مرة عايفة غرفتها وصخة وضاربة الدنيا كلها وما مهتمة لرجلها
الام.. جا شتريد المرة حبلة متخليها نايمة
فائز.. افتهمنا المرة حبلة جا الغرفة ليش وصخة
الام.. انت بس تريدلك مكسورة تشمرها براسها شمسويتلك هالمكرودة
فائز… شنهي يمه ما تحجين الحق انه عدوج لو ابنج
الام.. بنت اخوي جوهرة بس انت عايفها

فائز … جا خوش اسمعيني زين وانت يابه هم تسمع انه قررت اتزوج ومحد يحكني بشي ( محد يحقني بشي🌚)
الاب… ياهي هذي الي تريد تجيبها ضرة لحرمتك
الام.. اكيد وحدة من هالساقطات الجلبت لزلمة معرس
فائز.. بنت خالتي حميدة انه عاشكها واخذها يعني اخذها
الاب… شنهو ولك تريد تاخذ من بنات الحلة الساقطات ولك هذني مو شريفات ونساوين خفيفة مو من ثوبنا
فائز… يابه شهالحجي شنهو مو شريفات وشنهو خفيفات جا هي غير بنت خالتي
الام.. والله لو تبقى بس حميدة ما اخذها الك ولك هذني الله اعلم شلاعبات وشمصخمات وهنة يروحن ويردن للمدارس .
فائز… شنهو هالحجي ما تخافون الله وطعنتوا بالبنية وهي اشرف من الشرف
الام.. الله اعلم شمسويتلك وسالبة عقلك هالبنت الكلب
فائز… يمممممه ما اسمح تحجين عليها شنهو متخافين الله مو هي بنت اختج مثل هاي المطمورة بنت اخوج
الاب… من الاخير هاي ما تاخذها ولا تناسبنا ولا من ثوبنا
فائز… وانه كلتلكم اخذها اخذها وعيونكم تشوف

عفتهم وطلعت وروحي مفرفحة وانه اشوفن اهلي وضلمهم الي فوك ما مزوجيني وحدة لا تهش ولا تنش والله اعلم شضامتلي من مصايب فوك الي شفته منها .

مرت الايام وردت الايام واللتحقت وانه كل تفكيري بحميده ذيج الغزالة الخذت عقلي … انه كاعد بالمقر واجاني غريب وبوجهة كل هموم الدنيا..
غريب.. سمعت انت هاوي بنت خالتك وناوي تاخذها
فائز .. اي والله يا غريب يا خوية انه رايدها ومن البداية تدرون انه ما هاوي نورية
غريب.. حقك يخوي هو منو يكدر يهواهن وشرهن ما سلم منه احد ، تخيل انه قبل اسبوع نايم بغرفتي واشوفنلك ذيج الشوفة
فائز.. شنهو شفت
غريب.. شفت رسمية ونورية وهنة يرشن مي اسود مثل الخيسة بالبيت وانه متفاجئ محد لمحهن
فائز.. شنهو هذا المي الاسود
غريب.. والله يخوي ماكو غير سحر وهالنسواين ناويات الشر وما شفت بوجوهن الخير
فائز.. جا ليش ما كتلي يخوي وانه اكول شني هالريحة الخايسة بغرفتي
غريب.. يخوي ابوك وامك مكربسيهن بروسنا وما منها جارة وما تكدر تكسر بيهن وهنة نساوين واثنينهن حوامل
فائز.. والله اطلكها وانعل الخلفوها
غريب.. انت ناسي حرمتك حبلة
فائز.. وشنهو نشوفهن يصولن ويجولن ونسكت
غريب.. الله كريم بلكت يصيرن امهات ويعقلن

تخبلت وروحي وجرت نار وتمنيت ارجع واطفي نار كلبي بيها هالحيوانه .. من يوم شفتها وانه ما شفت الخير.

بيت الحجي…

نورية.. ولج رسمية هذا يريد ياخذ مرة عليه
رسمية.. شنهي ما نفع بي العمل
نورية.. ما ادري خلي اروحن لام قاسم واشوفن ليش ما نفع
رسمية.. وانه هم اجي وياج خيه
نورية .. امشينه لعد ناخذ اذن من عمي ونروح

تمشينه لغرفة عمي حتى ننطي علم لعمي ..
رسمية.. عمي احنه ماشين لاهلنا نزورهم ونرجع ما نتأخر
الاب.. روحن بوية ما دام زلمجن مو هنا شوفن اهلجن وتعالن
نورية… مشكور عمي

طلعنا ومشينا لام قاسم ووكفنا ننتظر سرانا يجي .. ومن اجه السره طبينا وسلمنا عليها وكعدنا ..
ام قاسم.. شنهي عدجن
نورية.. الرشة الي انطيتينياها كلشي ما فادت
ام قاسم… مستحيل انه ما اغلط بشغلي
نورية.. زلمتي يريد ياخذ علي
رسمية… وزلمتي لسه ما يباوع بوجهي
ام قاسم… سويتن مثل ما كتلجن
نورية.. بالحرف الواحد
ام قاسم.. وين شمرتي
نورية.. رشيته بكل البيت
ام قاسم… وانه كتلج ترشينه بغرفتج
نورية… يعني انه خليته غلط
ام قاسم.. جا متشوفين ما جاب نتيجة
رسمية.. شوفيلنا حل الله يخليج
ام قاسم… راح اسويلجن عمل ما يخطى ابد
نورية.. خوش
————————————————
ما هي توقعاتكم…
هل حب فائز لحميدة مباح ام عشق ممنوع ؟

كونوا بخير
تحياتي … نرجس صادق

تقرر تنزيل البارتات يومين في الاسبوع ❤️



كونوا معي في يومي الجمعة والسبت
موعداً لتنزيل البارتات ❤️


نرجس صادق

البارت الثالث 🌸🌸

#ضحية_تنجب_ضحية

فائز....

ايريدني انسة المضى وصار وجروحة
الخلص حياتة بسجن تنطي لوحة رسم
يرسم حبل مشنقة يعدملك اللوحة

______________________
بعد عدة أشهر....
فائز...
كضت أيام الدوام وتجهزت حتى انزل لأهلي وتذكرت هاي ايام ولادة نورية وانه كل همي الي بطنها يجي سالم خايف على ابني من فعايلها وشيطانها ...

وانه بالطريق وخطرت ابالي ذيج الحلوة الخذت عقلي وروحي .. اه لو اكدر اخذها جان انه بالخير هسة .

وصلت لأهلي واول ما دخلت البيت تلكتني نورية وهي معبسة ووجها ما يتفسر ..
فائز.. خيرج
نورية.. جا زين من سألت عليه
فائز.. شوفة عينج انه هاي جيتي من العسكرية
نورية.. لا على اساس لو جنت هنا جان خلصتها وياي غزل
فائز.. نورية رحمة لاهلج تعبان ومالي خلك الطلايب
نورية.. تغطى ونام جا شاريد منك انه
فائز.. لا تكعديني
نورية.. خوش

رسمية...
وانه منتظرة غريب يرجع من العسكرية اريدن ابشرنه ومرت دقايق وطبوا علينه اثنينهم.. طفرت وتلكيت غريب وانه اشوفنه تعبان وماله خلكي ..

رسمية.. يا هلا بأبو عبدالله
غريب.. شنهو
رسمية.. ابشرنك انه حبلة
غريب.. بيها الخير ان شاء الله
رسمية.. شدكول اذا ولد نسمي عبدالله واذا بنت نسميها فوزية
غريب.. الله كريم دكومي بالسلامة بالاول
رسمية.. ان شاء الله

عفته ينام وطلعت اركض لنورية اريد انشدها السحر سره مفعوله لو لا .. تلكتني نورية واخذتها وطلعنا للبستان..
نورية.. خيه جن ما فايد السحر ابد
رسمية.. شنهو السبب خافن غلطتي بتعاليم ام قاسم
نورية.. لا خيه بس هذا الزلمة ما ناوي يفك عن هذيج البت الي يحبها
رسمية.. ولج بنت عمتج حميدة الي يحبها
نورية.. هاي شوكت تصورت وصارت وخذت زلمتي مني
رسمية... تلكينها دكتله ناعم وحجتله جم كلمة حلوة
نورية.. خيه انه ما ميته عليه بس اريدنه يصير محبس بأيدي
رسمية.. خيه على اساس انه الميته على غريب لو ما كلمة ابوج جان خذت الي يهوى كلبي
نورية.. تهون وانه ما امل اذا ما اشوفه يطيعني
رسمية.. ان شاء الله خيه



بيت ابو غريب ..
الام.. جا هذني النسواين وين ولن
الاب.. شنهي مو بالبيت
الام.. راحن يتمشن بالبستان مو نورية مقربة ولادتها
الاب.. خوش صيحيلي نصر خلي يتمشى وراهن يصيحهن
الام.. تم يابو غريب
_ يابو غريب هذا نصر اجاك
الاب.. تمشى وره نسوان اخوك وصيحلهن
نصر.. صار بوية

تمشى نصر وصاح للنسواين واجه هو وياهن وطبن لغرفهن بحجة يتفقدن زلمهن وكل وحدة بيهن بايدها بطل المي الي لازم يرشنه بزوايا الغرفة.


فائز...
فزيت من نومي واول ما فتحت عيني شفت نورية نايمة ومتغطاية بصفي وانه تفاجئت اول مرة تنام يمي .. شنهي معقولة عقلت هالمرة هاي .. كمت من فراشي وشميت بالغرفة ريحة خيسة واجه على بالي كلام غريب .. وعرفت هالشيطانه هاي شامرتلي سحر بالغرفة ..

طلعت من الغرفة وانه لعبانه نفسي واتمنى اخنكها لهالحيوانه هاي .. كرهتها ضعف كرهي الها ..
تلكتني امي وهي صادة عني لهناك.. وكفت كبالها وكتلها..
_ شنهو يمه تصدين عني جان كاتلج مكتول
_ ما ارضى عليك دامك مو زين ويه حرمتك وداك رجل تريد تاخذ هالساقطة
_ يمه لا تحجين على البت شمسويتلج وبعدين ياهو كلج مو زين ويه حرمتي
_ جا يمه عمري ما شفتك توددت الها بكلمة ولا طيبت خاطرها بكلمة
_ بنت اخوج الكاتلة روحج عليها شوفي شمخيسة الغرفة روحي وشمي الغرفة وتعاي لوميني
_ ولك اخوتك يصولون ويجولون بالبيت وخيسو الغرفة وهالمكرودة حبلة ما تكدر تنضف
_ جا خوش خلي الغرفة خايسة مثلها

عفتها ورحت للبستان وانه من زمان اريدن اشتم هوى نضيف .. من بعيد شفت اخوي غريب كاعد جوة شجرة .. رحت يمه وكعدت ..

باوعلي بنضرة حزن وكلي ..
غريب.. يخوي ديربالك هالحرمتين ناويات الشر
فائز.. شنهي خوية سامع شي
غريب.. والله يخوي صاير اشوف كوابيس هواي وخايف عليك حيل جنهن قاصداتك وحرمتك ما بوجها غير الشر
فائز.. لو الله يخلصني منها والله يخوي نفسي بعد ما تريدها بت خالتك خذت عقلي وكل تفكيري
غريب.. الله يسهلك يخوي

كعدنا نسولف انه ويا على الزرع وانه صارلي فترة هامل البستان وقررت اترك العسكرية وارجع اجيب حلال .
رجعنا للبيت ويه المغرب وكعدنا كلنا على السفرة وجان ابوي متوسطنا وبايده عصاته.. كملنا الاكل وشالنه النسواين وكاموا اخوتي يتعاركون على الفراش .. صاح بيهم ابوي حتى يكعدون وبهذا الوقت سمعنا صرخة نورية وهي تصيح .. طفرنا انه وغريب وامي وشفت نورية بالكاع وتصرخ ..

نورية.. لحكوني راح اجيب
الام.. ولك يمه شوفلنا اركض صيح الولادة ( المرأة التي تولد النسوان سابقاً)
فائز.. اي يمه رايح

ركضت لبيت ام جاسم واجتي تركض وياي .. طبت للغرفة وانه كلبي يدك وخايف على هالطفل من فعايل نورية .. خايف الله يعابيها بهالطفل..
ومرت لحظات وسمعت ام جاسم وهي تصلي على النبي ..

طلعت امي وبايدها الطفل وهي تهلهل وتهوس..
الام.. صلاوات على النبي يمه اجتك بنية
فائز.. الحمدلله يمه انطينياها
الام.. اخذها يمه

اخذت بنتي وجانت صغيرونه وبعدها لحمة صغيرة فرحت واحسها صارت قطعة مني .. شميتها وبوستها وانطيتها لامي وكلتلها..
فائز.. اسميها فرح
الام... يا يمه محلاة هالاسم

وصارت تمر الايام بجية بتي فرح حلوة بس نورية صارت تهملها وطول الوقت عايفتها بأيد الجهال وكل مرة احجي وياها وما يفيد..

وبيوم انه راجع من العسكرية وشفت فرح بأيد ماجد .. تسودنت وركضت اخذها من ايده وانه اشوفنه ما يعرف يشيل طفلة صغيرة ..
اخذتها من ايده وركضت للبيت .. طبيت وصحت على نورية..اجتني تركض وانه طلعت ضيم كلبي بيها ..
فائز.. ولج شنهو من ام انتي عايفة هالطفلة بايد الصغير
نورية.. جا شمدريني انه اشم كفه ايدي
فائز.. جا متدرين لعد وين جنتي عن بنتج
نورية.. انه عفتها بالغرفة نايمة
فائز... خوش

اخذت الطفلة ورحت للغرفة وانه اباوعلها.. هالوجه البريئ شنهو ذنبها يربي .. خليتها كبالي وكعدت أتأملها..
واجت على بالي غزالتي السالبتني الراحة.. اوف لو الله يفرجها .. اوف لو جانت هالطفله منها..
سرحت بافكاري وضليت اتخيلها وقررت ارجع احجي ويه ابوي بموضوعها..

طبت عليه نورية وانه حاضن بتي ونايم..
نورية.. جا اذا هيج عزيزة انت داريها من اليوم
فائز.. نورية مالي خلك سوالفج خليني ارتاح
نورية.. هو انت يايوم كعدت وياي وتوددتلي
فائز.. من سوالفج وعمايلج الواحد الغيري شامرج يم اهلج
نورية.. شنهي كاتلة اهلك انه وهيج تكرهني
فائز.. ولج من اول يوم كتلج طيعيني ما تشوفين غير الطيب بس ما شفت منج غير طيحان الحظ
نورية.. خلف الله عليك

طلعت وفكت مني وانه روحي مخنوكة منها ومن سوالفها.. حضنت بتي ونمت.. كعدت بعد ساعات وانه مكسر جسمي وكوة اتحرك.. شفت الطفلة تصرخ وتبجي ولا جن واحد يسمعها... طفرت واخذتها برة ..
رحت لنورية وانه متحامي عليها .. كاعدة هي واختها ..
فائز.. ولج ما تسمعين هالطفلة تصرخ من البجي ولج انتي شنو من كلب عندج
نورية.. جا انه شمدريني مو انت مخليها يمك ما دكول لروحك
فائز.. ولج لو ما مجفي الشيطان جان كسرت راسج على هالحجي الماصخ
نورية.. جا انت متقاوي عليه وصاير زلمة براسي
فائز.. ولج نورييييية تجفي شري ولزمي لسانج لا اكسر راسج ادبسزز
نورية... لو بيك خير جا ما خذتك النسوان وضحكن عليك بكلمتين

فارت روحي ولزمتها طلعت كل قهري بيها .. اجت امي تركض وتسحب نورية مني وانه ما ارتاح كلبي منها .. ولا نسيت كلمتها هالحيوانه ..

سحبني غريب منها وخذاني للبستان.. روحي فرفحت واشتعل صدري نار ..
غريب .. يخوي على كيفك لا تقهر بنفسك
فائز.. فورت دمي هالحيوانه فوك شينها كواة عينها
غريب.. يخوي شتريد منها انت خليها تداري هالطفلة وبس وانه اليوم احاجي ابوي بلكت يوافق يخطبلك حميدة
فائز.. ياريت يخوي بس هي حتى بتها ما دايرتلها بال
غريب.. والله انه حالي من حالك هالنسواين مو على هوانا ولا هنة نضيفات كلب
فائز.. يخوي الدنيا باردة حيل وهالطفلة تعوفها بدون غطه ولا تداريها
غريب.. الله يعينك


تمر الايام وانه ما يغفل بالي عن التفكير بحميده.. اويلي لو يرضى ابوي يخطبها الي .. وطول هالوقت انه مقاطع نورية وما يطخ لساني على لسانها.. متجفي شرها وحتى الطفلة انه اداريها وبس الرضاعة انطيها الها وهم ما ترضى ترضعها وحرت منين اجيبلها حليب.

وبيوم من الايام انه نزلت من العسكرية وطبيت البيت وبوجهي لغرفتي وجانت الدنيا باردة ثلج وما تنحمل .. طبيت الغرفة واشوفن الطفلة تصرخ ومختنكه كوة تتنفس.. اخذتها وركضت لأمي..

فائز.. يمه شبيها فرح هيج تصرخ
الام.. يا يمه اسم الله شبيها هاي الطفلة
فائز.. يمه الله يخليج شوفيها شبيها
الام.. يمه اخذها للمستشفى

اخذتها وطلعت بوجهي للمستشفى وقبل لا اوصل الطفلة سكتت وكطعت حتى النفس هنا انه حيلي نهد وحسيت روحي فرفحت .. طبيت اركض بالمستشفى وانطيتها للدكتور.. اخذها مني وبعد لحظات اجاني وهو يكولي..
_ البقاء بحياتك
_ كول غيرها دكتور يعني بتي ماتت
_ اي صاير عدها ربوو بسبب البرد انتو عايفيها بالبرد وما مهتمين بيها الظاهر
_ دكتور انه عسكري وبين فترة وفترة يله انزل وبتي هالوحيدة ما عدي غيرها
_ الله يعوضك

اخذت الطفلة وطلعت وانه مكسور ظهري واسودت الدنيا بعيني .. كرهت نورية اضعاف كرهي الها .. حقدت عليها هي موتت بتي هي كتلتها باهمالها.. الله لا يوفقج نورية.


رجعت للبيت وتلكتني امي تدك وتلطم وهي تصيح..
الام.. ها ولك يمه شبيها الفرخة
فائز.. ماتت بتي يمه ماتت
الام... يبوووووووو سودة بوجهي يا يمه ماتت بسببنا احنه ما داريناها
فائز.. نورية وين
الام.. يم اهلها

انطيت الطفلة لأمي وركضت لبيت خالي وانه متحمل عليها وكل قهر كلبي اليوم اطلعها بيها .. دكيت الباب بقوة وطلعلي خالي وهو مفزوع..

ابو رسمية.. ها خالي خيرك جاي هاد علينه
فائز.. خلي تطلعلي نورية اليوم احملها الك جنازة
ابو رسمية... احترم نفسك واللزم حدك شنهي واكف ابابنا وتهدد بتي
فائز..

بتي ماتت بسبب اهمالها بسبب طيحان حضها وسحورتها والله ما يبرد كلبي اذا ما اشيلج جنازة ينورية
ابو رسمية.. شنهي بتك ماتت لا دكول ماتت الفرخة
فائز.. اي ماتت ماتت جا اكو ام تعوف بنتها وتسير على اهلها مرتاحة
ابو رسمية.. تهدى بالرحمان يبوية وهسة انه ارزلها لهالطايحة الحض على هالسالفة
فائز.. صدك انتم ما تخافون الله شنهو روح بتي مو بعينكم اكلك ماتت دكلي ارزلها

عفته ورحت والدنيا سودة بعيني وكاره حياتي .. اخذت بتي ودفنتها وتوجهت للنجف وانخى امير المؤمنين يبرد كلبي.
————————————————————
توقعاتكم للقادم؟؟؟

هل سيستمر الحال على ما هو عليه ام للقدر رأي أخر ؟

كونوا بخير
نرجس صادق

سلام عليكم ورحمة الله وبركاته
اسعد الله اوقاتكم وجعلها مليئه بألطاف صاحب الزمان(عج)
اعتذر نيابة عن الكاتبة بخصوص تأخير البارت
اذا الله قدر غدا تنزل 4 بارتات تعويضا عن التأخير ☺️

البارت الرابع
#ضحية_تُنجب_ضحية
فائز...

‏يا هني
و يا شوگ روحي
و يا عزيز
و يا مزار يطفح بچفي حنيني
و من حنيني إعليك اغار

———————————————————
فائز...
فتحت عيوني واني بصحن الامام علي والناس تروح وترجع كبالي .. باوعت على الصحن ونخيته من كل وكلبي وكل الي طلبته منه تتحقق امنيتي وتصير حميدة من قسمتي.. وانه رافع اديني وادعي تذكرت بنيتي فرح .. بجيت بحركة وبغصة جبيرة وبوقتها كرهت نورية وكرهت حتى أهلي وقررت ما ارجع للبيت وابقى هنا واريده يحن عليه ويرزقني الي ابالي.

بقيت بالنجف يومين وبعدها توجهت لكربلاء ورحت للامام الحسين ولزمت شباجه ونخيته يحنن كلب ابوي عليه ويوافق اخطب حميدة..

لمدة شهر وانه اتنقل من مرقد لمرقد وذبيت كل حملي يمهم وانه كلي أمل ارجع للبيت وابوي يوافق .. رجعت بعد غياب شهر وانه كلي هموم وتعب من التنقل..
دخلت البيت ومحد تلكاني وماكو احد كلي شلونك .. عاد انه ما اهتميت ورحت لغرفتي حتى انام.. خليت راسي على المخدم ولفحتني ريحة كريهةً شلت راسي عن المخدة وانه نفسي تلعب ... فتحت المخدة وانصدمت من الي شفته بيها .. بيها شعر وجلد ودهن مال ميت وكتابات

طفرت من مكاني وركضت لنورية... واشوفنها تلكتني معبسة وجها وانه لزمتها وبدون اي حجاية فوخت كلبي بيها وما كمت منها الا على صوت ابوي وهو يغلط عليه ..
الاب.. ولك يا عار الا اغضب عليك ليوم الدين فوك ما هاجر المرة جاي تريد تموتها
فائز... كافي الله يخليكم انه مليت انه تعبت هاي المرة بعد ما تلزمني ولا اريدنها وطلعت من نفسي وانه من اليوم بعد ما اريدنها
الاب.. ولك تعصي امري وتريدني اغضب عليك
فائز.. شنهو الما سويته انت يابه
ألأم... لعبن بعقلك المايخافن الله دوهننك السحارات
فائز.. والله بنات اخوج هنة السحارات وعايشات على السحر ونجاسته
رسمية... شنهو ياابو فرح تايهات احنه حتى تشمر علينه تهم
فائز... انتي مالج دخل ولا تخليني اهجم بيتج وافضح عمايلج
رسمية... تسمعين عمه وانت يا عمي جاي تسمع جا احنه لان على نيتنا نمشي هيج يصير بينه اختي تنضرب وانه انهان ومحد يوكفلي وحق علي ما ابقى لحظة اروحن لبيت ابوي احسنلي
فائز... روحة بلا رده واخذي اختج وياج خلصيني منها
الاب... ولك انجب تطردها بوجودي وانه واكف
فائز... بويه انه مليت وعلي ما عندي تحمل بعد لا اكدر انامن مثل العالم بغرفتي ولا اكدر اطلع وانه مرتاح

عفتهم ومشيت وانه روحي موجرة نار ودمعتي تريد تنزل.. طلعت اتمشى بالبستان واشوفن الحلال.
رجعت للبيت والدنيا المغرب.. طبيت وانه كاره العيشة وياهم مثل المغصوب على شي .. جان تتلكاني رسمية وعيونها حمر دم...
رسمية.. انه اتعذر منك خوية بس وعلي انت ضالمنا احنه ما ندور هالسوالف والي مسولفلك عنه جذاب
فائز.. انه محد سولفلي انه شفت بعيني
رسمية.. شنهو شفته مو زين يا خوية
فائز.. شفت حقارة اختج وسحورتها وشفت غرفتي الريحتها تكتل
رسمية... يخوي الغرفة وسخة والغلط مو من نورية
فائز... جا الغلط منين
رسمية... الغلط منك يخوي
فائز.. ليش الغلط مني
رسمية... جا انت تركض تصيح على نورية وما تحاسب اخوتك الي بكل يوم يوسخون الغرفة
فائز.. رسمية انه هاي الاعذار ما تمشي عندي وانه ما اشوف اخوتي يدخلون بغرفتي ابد
رسمية.. يخوي انسى السالفة وانه اطلب السماح منك
فائز.. خير ان شاء الله

عفتها ومشيت لغرفتي وشفت نورية تلم بغراضها وتريد تروح لاهلها ... ما منعتها ولا عارضتها.. خفةً وراحة.

راحت نورية لاهلها وبدت حرب ابوي الي وغضب امي الي كل يوم تعيد نفس الكلام عليه .. انت هاملها وانت حرام عليك وهي حبابة وجوهرة وانه مغلس وساكت .

وبيوم انه كاعد واجتني رسمية شايله صينية لبن وتمر على راسها واجت كعدت يمي وهي تسولفلي على الحلال .. مدت ايدها وانطتني لبن..

اخذته واجيت اشرب وشميت بي ريحة غريبة .. استغربت ووخرته ما شربت.. جان تسألني..
رسمية.. ليش ما شربته يخوي لبنه تفوتك حيل حلوة
فائز.. انه ما مشتهيها عوفيها بعدين اشربها
رسمية.. خوش خوية

كامت وهي تباوع على اللبنه الي كبالي ومن نظراتها عرفت اكو شي ... الف فكرة اجت بعقلي وانه اكولن معقولة مخلية بي سم ..
واني بصفنتي وافكر بالي راح يصير.. ما حسيت غير ابن اخوي اخذ اللبن وركض.. عفته يشربه وكمت أفتر ..


صارت الدنيا ليل وانه افتر بالبستان .. كعدت جوة شجرة ورجعت ابالي الذكريات وانه اتذكر حميده .. اوف لو بس يفرجها عليه رب العالمين وتصيرين الي جان انه بخير ..

وانه شارد بافكاري واسمع صوت صريخ من البيت .. ركضت وانه مثل المسودن
طبيت للبيت واشوفن رسمية لازمه ابنها وتصرخ .. واخوي يفرفح وحيله مهدود .. ركضت اخذت الولد منهم وطلعت مفزوع ما اعرف شاسوي ..
وصلت للشارع ووكفتلي سيارة .. صعدت وطلعت بيه للمستشفى..

وصلت للمستشفى واني شايله بحضني .. اخذوا مني وانه ركضت ورا ..
دقايق وشفت غريب يركض عليه ..
فائز.. على كيفك يخوي
غريب.. وينه احجي وينه
فائز.. اخذوا وما اعرف عنه شي منتظرهم يطلعون

غريب .. عايش بعده عايش
فائز.. ان شاء الله ادعيله يخوي
غريب.. والله اذا مات اخذ روحج يا رسمية وما يرفلي جفن
فائز.. شنهو الصار وشبيها رسمية
غريب.. الصار بالولد بسببها وبسبب افعالها
فائز .. شلون عرفت
غريب.. لان الولد وكع فجأة وبدون سبب
فائز.. تذكرت يخوي ، العصر رسمية جابتلي لبن ورادتني اشربها وانه ما ردتها لان شميت بيها ريحة وابنك شربها
غريب.. شنهو البن مسممته
فائز.. ما اعرف بس يجوز هذا سبب وكعة الطفل

واحنه ننتظر .. اجانه الدكتور وشفت بوجها معاني الحزن ..
غريب ... ابني مات
الدكتور.. لو يموت لو يفقد الحركة
غريب.. يعني شنو
الدكتور .. يعني ينشل
غريب.. يابويه الحكلي
وكع غريب واني سندته والدكتور يطمن بي ويكول ادعوله ..
كعد غريب بالكاع وهو يفرفح مثل الطفل.. رحت للدكتور واخذته على صفحة ..

فائز.. دكتور شبي الولد وشصايرله
الدكتور.. لحد الان ما معروف شنو سبب حالته بس على الاغلب شارب سم
فائز... يعني ماكو امل
الدكتور.. ادعوله
فائز... مشكور دكتور

رجعت ذاكرتي للحضة الي اخذ اللبن وشربه وتمنيت لو اكدر اخنكها لهالحقيرة جانت تريد تسممني.. الله لا يوفقهن بعمايلهن موتن اطفال ابرياء

رحت لغريب وشفته ضايع ويبجي على ابنه .. كعدت يمه وطمنته بكلام الدكتور ..
فائز... كول يالله وادعيله يخوي
غريب.. بس ارجع راح اطلكها لحظة وحدة ما تبقى بحياتي
فائز.. الله كريم بس خلي يطلع سالم

وعلى هالحالة يومين واحنه ننتظر الخبر حتى نعرف شنهو حالة الولد .. وباليوم الثالث اجانه الدكتور ..

طفر غريب وركض للدكتور وانه ركضت ورا ..
غريب.. دكتور شنهو حالة ابني
الدكتور .. الحمدلله الولد تعدى مرحلة الخطر بس للاسف فقد الحركة
غريب.. كول غيرها دكتور الله يخليك
الدكتور.. كول الحمدلله ما فقد حياته
غريب... اخخ يوليدي
فائز.. كول يالله خوية الحمدلله الولد بعده عايش
غريب.. والله محد يخلصها من ايدي الا اخذ روحها اليوم
فائز.. لا تتسرع يخوي عوفها لربها يحاسبها انت طلكها واشمرها على أهلها
غريب.. ما ارتاح اذا ما اخذ روحها
فائز.. لا يخوي لا تسويها خلي تولي لا تشيل خطيتها

مشه غريب وانه اشوفن مشيته مكسورة وضهره محني.. جربت هاللوعة وهالالم وشفته بعيوني.. الله يكون بعونك يخوي

طلعنا الولد على كرسي واخذنا للبيت .. تلكتنا امي وهي تلطم على خدها من شافته ..
الام.. سوده بوجهي ولك يمه شبي الولد
فائز.. يمه بس خلي يدش ليجوة وانه اسولفلج
الام.. يا يمه يا غريب سودة بوجهك على حضك يا يمه
فائز.. يمه رحمة لاهلج لا تلوعين كلبه هو روحه مفرفحه

طببنا الولد جوة وفرشناله ونومنا وغريب ما نطق حرف واحد.. اجتي امي تبجي يم راسه وهي تدعي على الي جان السبب..
غريب.. وين رسمية
الام.. يمه البت تخربطت من نوحها على ابنها وخالك اخذها للمستشفى
غريب.. وينها هسة
الام.. يمه البت ما هودت وكل شوي نلزمها انه وابوك تملخ بروحها وتصيح وليدي
غريب.. ما يرتاح بالي اذا ما اخذ روحها بايدي
الام.. يا يمه تهدى بالرحمن شنهو هالحجي جا هي شعليها المكروده
غريب... ما اسمع ولا كلمة بنات اخوج يصولن ويجولن واحنه نعرف بكل فعايلهن وسكتنالهن لعيونج بس والله اذا ما اكتلها اطلكها
الام.. ولك يمه خافو الله مو كلشي يصير شمرتوا بروسهن هالمجاريد
فائز.. يمه احنه نعرف الي انتي ما تعرفينه ولا تضلين تبرين بيهن
الام.. الله يهداكم يا يمه خافوا الله واكعدوا شوفوا من ضلمكم الله اخذ حوبتهن بولدكم

————————————————
كونوا بخير
كونوا بسعادة
تحياتي
نرجس صادق

البارت الخامس


#ضحية_تنجب_ضحية

فائز...

واعيش بحسرتك هايـم
اشب نوبه بعذاب الروح
نوبه بلومة اللايم

———————————————————
بعد اسبوع..
جنت كاعد وغريب يمي .. اجت امي وهي تصيح ..
الام .. ولك يمه اللحك
فائز.. خير يمه شكو
الام .. خالك يريد يذبح نورية ورسمية
فائز.. ليش
الام.. لان غريب يريد يطلك رسمية ، بالي هالبنات بلوة يكلهن بيجن العيب وزلمجن ما يردونجن
فائز.. وهسة شنهو المطلوب يمه
الام.. ولكم يمه لحكوا خالكم لا يذبحهن وتدخلون بخطيتهن
فائز.. ان جان ابالج ارجع نورية فأنتي غلطانه يمه
الام.. يمه جا انتم مو ولد بطني ما عدكم محنة على هالبنيات ولكم حرام عليكم
غريب.. لو اشوفه يذبحها كبالي ما يحن كلبي ولا ارجعها
الام.. اغضب عليكم ليوم الدين اذا ما ترجعونهن
فائز.. يمه شنهو هم بالغصب
الام.. انه كلت العندي

عافتنا امي وراحت .. غريب كام وراح يم ابنه .. طلعت للبستان وانه مفكر اروحن للحله.. اشتاقيت لشوفتها وجنت مقرر اشوفن ردة فعلها ..


بعد يومين تحضرت وطلعت وانه طالع تلكتني امي ووياها نورية .. استغربت ليش امي جايبة نورية وجاية ..
فائز.. خير شعدها هاي جاية
الام.. شفتكم ما بيكم حظ رحت انه جبتها واجيت وذيج سودة عليه ما رضت ترد لبيتها من وره اخوك
فائز.. خوش جا خليها تفيدج
الام.. وانت وين ماشي
فائز.. رايح بشغل
الام.. شنهي شغلك هذا
فائز.. ما تعرفينه

عفتها ورحت وانه ما اريدن شي يخرب عليه فرحتي .. كلما اتذكر انه راح اشوفنها ترد روحي وارتاح ..

وصلت للحله وانه فرحان .. نزلت امشي بفرعهم واتذكر اول مرة شفتها بيها وجانت مثل الملاك ..
وصلت للباب وشفت الباب مفتوحة .. دكيت الباب وماكو احد .. رجعت دكيت الباب مرة ثانية وفجأة اجاني صوتها .. اي صوتها اني اعرفه ..

حميده.. منو
فائز.. اني فائز
حميد.. هلا فائز، تفضل
فائز.. شلونج حميده
حميده.. الحمدلله
فائز.. عساج بخير
حميده.. تفضل
فائز.. شكرا

حسيت بكلبي يدك وروحي طارت من الفرح وانه اسمع صوتها وهي تحجي وياي .. طبيت للبيت واستحيت اشيل عيني واباوعلها ..

فائز.. وين خالتي
حميده.. امي جوة
فائز.. الوالد وين
حميده.. بالشغل
فائز.. انتي شعجب مو بالمدرسة
حميده.. قبل شوية رجعت من المدرسة
فائز.. خوش ، صيحيلي خالتي

راحت تمشي كبالي وانه ابوكن نظرات واباوع لطولها .. خذت كلبي هالبت وخذت عقلي ..
شوية واجتني خالتي واجت حميده وراها ..
ام حميده .. هلا خاله هلا بيك
فائز.. شلونج خالة
ام حميده.. على الله يخاله وانت شلونك ، الاهل شلونهم
فائز.. على الله خالة يسلمون عليج
ام حميده .. الله يسلمهم ، تعال خاله تفضل
فائز.. مشكوره خاله

طبيت للمضيف وانه اريد ابوكن نظرات عليها بس ما اكدر لان خالتي مكابلتني وما اريدنها تعرف اخافن تضربها ..

كعدت خالتي تحجيلي عن حياتهم وانه ضاربلي صفنه وافكر بيها .. طبت وهي شايله صينية الجاي وتمنيت اكوم اخذها منها واشبع عيوني منها ..

خلتها كبالي وطلعت وخالتي ضلت سولف وياي وانه بالي يفكر بيها..

صار العصر وانه كاعد بالمضيف .. طب رجل خالتي عليه وهو يرحب بيه .. سلمت علي وكعدنه نسولف.

ثاني يوم الفجر وانه ليلي ما كدرت انامه وعقلي مشغول بيها وكلما اتذكر هي قريبة عليه يوزني الشيطان اكومن احاجيها .. بس اتعوذ واكعد.
لحد ما كعد ابوها وشافني كاعد ..

ابو حميده.. شنو عمي ما نمت
فائز.. لا عمي نمت بس انه متعود اكعد من الفجر
ابو حميده .. خير ان شاء الله

ومر اليوم وانه احاول احاجيها وما تجيني الفرصة لحد ما أيست وقررت ارجع للبيت واعوفنها وره الله .. وباليوم الثالث كعدت من الفجر وترخصت منهم وودعتهم ورجعت .

وانه راجع للبيت .. تلكتني امي نفس الحجي ونفس الموضوع.. طكت روحي وما اكدر اسكت بعد ..

فائز.. يمه الله يخليج مو كافي تره تعبت تعبت
الام.. ولك فوك شينك كواة عينك
فائز.. يمه انه ابنج لو عدوج بس فهميني ليش تسوين هيج بيه
الام.. شنهو عبالك ما ادري وين جنت
فائز.. عساني جنت بجهنم يهمج عود
الام.. جنت يم ذيج الساقطة ام السحورة بواكة الزلم بس العتب مو عليك العتب على ابوها المايعرف يرد بنته
فائز.. استغفر الله انه رايح

طبيت للبيت وحضرت غراضي وقررت اللتحق واخلص من وجع الراس هذا ..
ثاني يوم رحت للجيش وانه كل هموم الدنيا شايلها واكولن شوكت تحن عليه الدنيا وتعتقني من هالعذاب ..
مرت الايام والحرب مشتده واحنه بكل يوم نخسر جنود وصرت اتخيل نفسي اموتن هنا واخلص من سطوة ابوي وعذاب كلبي .. وبيوم جان عدنا هجوم وصار ضرب علينه واحنه مفزوعين ونضرب .. ما حسيت غير على الم بجتفي وحرارة اشتعلت بجسمي وشي بده ينزل من جتفي.. عرفت نفسي تصوبت..
صرخت عليهم واجوني يركضون .. شالوني وخلوني بسيارة وبعدها ما حسيت بشي .. فقدت الوعي وما حسيت غير وانه بالمستشفى وجرحي مشدود.. وعرفت انه صارلي يومين نايم والحمدلله الجرح مو خطير .. انطوني الاذن انزل لاهلي واخذت سيارة ورجعت وانه بالطريق تذكرت الحله اقربلي..

رحت لبيت خالتي ..

نزلت يمهم ودكيت الباب وطلعلي ابوها .. رحب بيه واخذني للمضيف وصاح لخالتي حتى تحضرلي مكان ارتاح بي ..
انه كل تفكيري بيها وبعد الصارلي قررت اخذها ..

بيوم جنت كاعد الفجر وانه اتوجى حتى اكوم لان جرحي يوجعني.. كمت ورحت بره للمغاسل.. وكفت اغسل حتى اتوضى واصلي .. سمعت باب المطبخ ينفتح .. شفتها وهي تطلع وتمشي على كيفها واجت يمي ..

حميده.. صباح الخير
فائز.. صباح النور يا هلا
حميده.. فائز شلونك
فائز.. بخير بشوفتج
حميده.. عساك بخير
فائز.. حميده
حميده.. ها عيني
فائز.. اني رايدج بالحلال وشاريج
حميده.. شنو
فائز... كتلج انه شاريج يعني انه اريدج ، موافقة لو لا
حميده.. موافقة بس امي ما تقبل
فائز.. عوفيهم عليه
حميده.. ماشي

راحت تركض وطبت جوة .. وانه ما مستوعب الموضوع وما مصدك .. حميده موافقه عليه يعني اكدر امشي عليها.. بس اذا اهلها ما وافقوا شاسوي .. خلي امشي عليها والله كريم.

انتظرت جرحي ينشف واخذت غراضي ورجعت لاهلي وانه ناوي هالمرة اخطبها ان جان رضوا لو ما رضوا.

وصلت لاهلي وتلكاني اخوي غريب وهو يسألني شلون صار جرحي ..
طبيت للبيت وانه ناوي احجي ويه ابوي عليها وان جان ما وافق اروحن اخطبها وحدي ..

صار وحجيت وتعاركت وما فاد وانه مقرر اروحن اخطبها من غير ما يوافق ابوي .. اخذت اخوي غريب للبستان وكعدنا نسولف ..
غريب.. ها يخوي
فائز.. انه اريدن امشي عليها
غريب.. وابوك
فائز.. اخطبها بدون ما يوافق
غريب.. جا محد راح يمشي وياك ان ردت تمشي عليها
فائز.. انت وانه بس
غريب.. وراح ينطوك مرة ان سمعوا انت جاي تخطب بتهم من غير ابوك
فائز.. ما بأيدي شي
غريب.. ما ادري يخوي

انتظرت يمرن هاليومين واروحن للحله واخذ اخوي غريب حتى اخطبها .. ومرن هاليومين وانه تحضرت وجان ابالنا نطلع للحله.. فجأة اجانا خبر شيخ سالم اخوها لحميده نفقد بهاي الانتفاضة وضليت محتار شاسوي لا بيدي اخطبها هسة ولا اكدر اسكت عنها .. قررت اروحن للحله وادور على المفقود ..

ثاني يوم طلعت للحله ورحت لبيت خالتي وجان البيت مكلوب.. خالتي تنوح على ابنها وابوها مكسور ضهره على ابنه .. ضلينه ندور علي ايام وأشهر بس ماكو اثر..
وبيوم جنت كاعد بالمضيف .. ندكت الباب وانه طلعت حتى اشوف منو ..
فتحت الباب وجان شيخ معمم شايل بايده رساله ..
الشيخ.. السلام عليكم
فائز.. وعليكم السلام يا هلا
الشيخ.. هذا بيت الشيخ سالم
فائز.. اي كول خوية انت منهو
الشيخ.. انه مكلف اوصللكم خبر من الشيخ سالم
فائز.. شنهو من خبر والشيخ وينه انت تعرف مكانه
الشيخ.. خويه البقية بحياتكم الشيخ سالم نعدم
فائز.. شلون نعدم فهمني
الشيخ… هذا الصار وانه اجيت اوصللكم الخبر
فائز.. رحم الله والديك شيخ
الشيخ.. في امان الله

طبيت للمضيف وجان عمي كاعد .. باوعلي وضاع الكلام مني وما ادري شلون اكله..
ابو حميده.. شبيك بويه ومنو جان بالباب
فائز.. عمي البقية بحياتك سالم مات
ابو حميده.. شلون شنو مات
فائز.. عمي كول يالله وأهدى انت لازم تواسيهم اذا عرفوا بالخبر
ابو حميده.. ولك بوية شلون مات
فائز.. نعدم يا عمي نعدم
ابو حميده.. يا بوية يا سالم كسرت ظهري يابوية
—————————————————————
كونوا انتم
كونوا بخير
تحياتي
نرجس صادق

السلام عليكم اعضاء قناتي الحلوين

اعتذر على الغياب لكن تعرضت لهواية أحداث محلوة لكن تجاوزتها والحمدلله
وحاليا راح أعلن عن عودتنا لعالمنا الجميل وهو عالم القصص والروايات ❤️😍لكن بقناة جديدة


بعد فترة راح انقل محتوى هذي القناة لقناة جديدة وكلها أعضاء حلوين مثلكم وننقل رواياتنا الجميلات ونبلش من جديد ❤️😍
وراح انزل رابط القناة بعد ترتيبها ان شاء الله ❤️


#ضحية_تنجب_ضحية مستمرة هذه الرواية