قصيدة ( معرض صور ) بعد الظهور المبارك في محرم وكأن الامام المنتظر يقيم هذا المعرض ويشرح الفاجعه للعالم


معرض صّـور يالمنتظر للطف نصبته
والمشكله يـا سيدي اليشــرحه انتـه
توّضــح لـوُحه لوُحــه
جــرح يصعـب تشرحه
يالمهدي يالموعود يالمهدي يالموعود

*

بعاشر محـرم مـن يجـي مــوعد ظهورك
تنصب صّــور للفاجعــه وتشرحهـه دورك
لونْ الصّــور يــا سيـدي مــن دم نحـورك
وانته التوضح هالصــور كـون بشعــورك
(( كل صوره بالمعرض أحس گلبك تألمه ))
(( واليسألك عنها أبحــزن انتـــه التفهمه ))
اليجي المعرض يــزوره
توضـّح صـوره صــوره
يالمهدي يالموعود يالمهدي يالموعود

*

لوحة عطش من يبتدي المعــرض نشاهد
لونْ الضمّـه يــا سيدي بيها أقسـى واحد
بوجوه الأطفــال أنرسـم بأغــرب مشاهد
رغم الضمّـه ماي الشرف ظل بيها صاعد
(( والعالم يشاهد ورد باللوحه شــاحب ))
(( ومن يسألك ياسيدي حيره شتجاوب ))
العطــش بيــها علامه
نـهــر ينبـــع كرامــه
يالمهدي يالموعود يالمهدي يالموعود

*

لوحه وفـه أعلى المشرعه بلون الفجيعه
بيها الگمــر فـــوگ الأرض چفـــه گطيعه
بيها أنرســم ظهــر انكســر يم الشــريعه
وبيهــا نبــل يشتــم ورد منحـــر رضيعه
(( العالم يناشد عالگمر ظل نوره بعده ))
(( واگع لچن يمه بحزن ذبلانه ورده ))
نحر يتفايض إحساس
يتــاني عمّــه عبـــاس
يالمهدي يالموعود يالمهدي يالموعود

**

ولوحَه التجي بيها نبي مــرسومه بأحمـر
فوگ الأرض يعكس ضوه من وجه الأكبر
صــورة محـمــد عــالارض لـكـــن تطبّــر
تشرحهــا للعـالم صعــب يالمهدي تگــدر
(( واحد يگول أعلى الأرض شو چنه عيسى ))
(( والأخر يگول اعتــرض لا هذا موسى ))
نبـي بالــطــف تمـدد
علـي بصــورة محمد
يالمهدي يالموعود يالمهدي يالموعود

*

لوَحَــه تهــل يمهـا دمــه كـــل البـــريه
مـــا تنــوصف طـول العمر بيها الرزيه
بيها الشمس من الخيم طلعـت سبـيه
هــاي أقسى لوحه سيــدي بالغاضريه
(( كل الحضور أتحيرت هــل اللوحه بيها ))
(( ليش الظلام اعلى الشمس هاجم عليها ))
صعب تشرحها ادري
شمس وتنادي خدري
يالمهدي يالموعود يالمهدي يالموعود

*

لوحــه تهز كــل البشر مرسومــه بالدم
يمهـا الخــلايـــق تنتحـب كلهــا أتألــم
بيها نحر ضامي يصب من عنده زمزم
بيهــا گلــب حــاضـن نبــل بـس يتكلـم
(( كل الحضور أتهــل دمـــع بيها أتحيــّر ))
(( هذا النحر يحچي أظن وضـح انه أكثر ))
يگول أجروحي كثــره
حــرم تمشيلي أســـره
يالمهدي يالموعـود يالمهدي يالموعـود
*
الشاعر
موسى البديري

كعديه إلى كريم ال محمد الامام الحسن المجتبى عليه السلام


برمضان الحسن أشــرق جماله
صلي أعلـى النبــي الليله والــه
اليوم أنولد ديــوان للزهــره الزچــيه

****

الليله أول نــور أزهـر للنبي وشــع بكمــاله
اليله حتى أمــلاك ربنه عالنبي صلـت واله
لان اول نــور ازهر للزچيه بكــل خصــاله
يا نــور وي شهر الفـرض
عم السما طول وعــرض
نور الحسن شع عالارض
والكــرم تــمم كمـــالــه

أيــه وللكــرم جـــده تــلاهــا
للزهره وعلي البــاري نطاها
بــاب الكرم موصوف للــزهـره الـــزچـيه

****

بلهفه حيدر شاله بيده وعطــر للجنه يشمه
يا علي سمـيه گالت فاطمه وفــرحانه أمــه
گلها يـا بت النبوه من الله راح يكون اسمه
وبعينه صدله المصطفى
غــذاه حكمــه ومعــرفه
من جده ماخذ كل صفه
نوره من نوره أويه رسمه

وارث جــده بخـلاقـــه وصفـــاتــه
وظل شخص الحسن من معجزاته
ايه الحسن لليوم للزهــره الزچــيه

****

نور من صلب الصميده ومن رحم امه الزچيه
شــابه المخــتار جــده أوالــده حــامي الحميه
كــوّنــه رب الجــلاله ســيد لـهــاي البــريـــه
لليوم أنــــواره تشــع
لكل غانمه هــوه نبع
ابن المبادئ والشرع
رغــم كــل الناصبيه

رغم أهــل الحقـد يبقى أمامي
وآنه بكل فرض ابعث سلامي
وادري يوصل الشوگ للزهــره الزچــيه

****

عالكرم لـو ردنــا نحچي حاتم يحّيــر بــزمـانـه
صعبه ما نگـدر نقـــارن بالحسن هـــايه خيـانه
فرق بين الوهب عمره وبين واهاب بس حصانه
باب الكرم سده الحسن
يشهد اله باقــي الـزمن
بالســر مضيـف وبالعلن
والوصف حــاير لسـانه

أهــلا بالحــسن نــاده مضيــفه
بحيره يظل عمر كلمـن يضيفه
يبقى الحــسن عنــوان للزهــره الزچــيه

****

شكثر تاريخ النواصب حــاول يغــير الحقيقه
الحسن مثل الذهب باقي واضح ويلمع بريقه
لان نهجه نهــج جــده والنبي واضح طـريقه
ضــده الصحــاح اتجنـدت
وچم عوره من عدها بدت
مــن ربنــا كلــها اتفـنـدت
والبقــت بــــس العــريقــه

من نفس الصحاح اقره حياته
تظهــر للعـلن كــل مكــرمــاتــه
شع رغم الحقد نور للزهــره الزچــيه

**
الشاعر
موسى البديري

‏مقطع صوتي من ٩٨٤٣٥٣

قصيدة ( بويه علي ) في ذكرى شهادة الامام علي عليه السلام


بويــه علــي مخنوگه تدري أنفاســـي
بويــه علــي امســح أبيـدك راســـــي
يا بــويه مثل الفقــره
أبابك علـي منتظــره

*

يا بــويه حيّرني الــزمن
يــوم ابن ملجم صابـك
مشتاگه اشوفن بسمتّك
منتظــره بــويــه أبــابك
يا بــويه گالــولي صدگ
دمــك يغالــي اخضابك
يــا شمسي الما غـرّبــت
مـو هسه وكــت أغيابك

ليل الحزن مــا تنگضـــي آهاتــــه
ليل الحزن يتــلاهبـن جمـــراتــه
وشيطفي بويه الجمره
أبابــك علــي منتظــره

*

يوم الشلت چفي بحـزن
ودمـــع المــوادع نـــازل
وبچف أبو فاضل صفت
وگتلــه يبــويه الكــافـل
زينــب وصيّـــة والــدك
لا يمــر بيــها العـــايـل
أعيوني رسمتلك نعـش
عـن گلبي باچـــر شايل

انرسمتْ خيّم بدمـــوعــك السچابـه
انرسمتْ خيّم أبنـــار العــّده الّهـــابه
بگلبـي الخيّم مستعره
أبابـك علــي منتظــره

*

يــا بـويــه وي النــايبــه
عشت انــه تدري ابزغري
يــوم المشّت ام الحسن
حسّيتـه غـــادِر دهــــري
محلاتـــه يمك يـــا الابو
لـو ينگضي كـــل عمــري
وبحضنك الدافي ياعلي
أمنيتـــي اظلن تـــدري

محله العمر يا بــويه وانتـه اگبالي
محله العمر لــو يگضي وي الغالي
بدلالـي ظلت حسـره
أبابك علـي منتظــره

*
وي المــوادع مـــن زغــر
دلالّـــي عَــاشـــر همّـــه
وماتت على أشفاف الحزن
چلمــة يــزينــب يــمّــه
وچلمــة يبويـه يــا علي
يــا بويـه أحس متيتمه
بين أمي وفــراگ الابـو
دلالّــي طــف يـــرسمه

عشت اليتم من عمر خمس اسنيني
عشت اليتم كل ساعه أشوفه بعيني
وراسي شبگته بعشره
أبابـك علـي منتظــره

*

خيمه يبويـه مــن المـحن
لـــو عــاكســت أيامــي
أحلامي بيها اگضي العمر
انهدمت يوسفه أحلامي
چم خيمه بعــدك تحتــرگ
يا علــي كــل أخيــامي
اليوم انته بيتامك حـــّرت
بالطــف تحّيـَـر أيتامـي

بويه اليتم يكسـر دليـل الفــاگــد
بويه اليتم باچــر يمر چم واحــد
لو رحنه باچــر أسره
أبابــك علي منتظره

*
عيد المبــارك يـــا علــي
باچـر تمــوت إخلافـــك
يا بويه چن طعــم الشهد
لـو تطلــع من اشفافــك
جفني يمــر بيـــه العمى
باچــر لوّن مــا شافــك
والموت لو يرضه أبـدل
ياخذنـي ريتـه وعافـك

دونك علي ريت الأجـل وافانـي
دونك علي ولا بالدمــع خلانــي
فگد الابـو شيجبــره
أبابــك علـي منتظره
*
الشاعر
موسى البديري

قصيدة ( باچر عاشور ) وصية الامام علي إلى السيده زينب عليها السلام


وصاني حيدر يا زينب باچـــر عاشــور
باچر عينچ بالطف تنظر مذبـح النحور
تسهل هل الطبره يا بــويه الحره
باچر عينچ بالطف تنظـر مذبح النحور

**

نظـــر دمعــي ابــوي وگلــي يــا زينـب
گلبـــچ ادري بي مثــل الجمـــر يلهـــب
انفجعتي بيوم شفتي شيبي المخصب
بـاچــر بالطفــوف يمــرلــچ الأصـعب

باچر خيل أتشوف اعيونچ عگب الخوان
ومحتاره بأيتام وعيله ورَكضــت نسوان
وأّخيــمْ مستعره يــــا بويه الحره

*

دمعتـچ گـال ظميهـا لظهــر عاشــور
يــوم التنظر أعيونــچ گطيعـه أنحور
تهون الطبره باچر چم جسد مطبـور
واظلــم ليلــچ ومــا بي يزينـب نــور

باچر ظلمه وليلچ يــرهب عگب العباس
باچر مفجوعه ومسلوبه مــا بين الناس
وبآه وحســره يــا بويه الحره

*

طبيبي ضمد اصــوابي وگطــع نــزفه
تشاهـد باچــر اعيونــچ صـــور كلفـه
بصدر حسين خيل ادوس يـا وسفـه
واخــوچ الكافــل يطيـح بغـدر چفـه

چــم صـوره يشاهـد دلالـچ يــا زينب آه
فوگ الغبـره حسين مگطع تغسل بدماه
ومرضرض صدره يا بويه الحره

*

عد راسي مــن أمــوت اليـوم أولادي
وللتشييــع باچــــر صحبتــي أتنــادي
وصريع حسين وحـده وجـده الهادي
وسبــي للشام بيكم يحــدي الحــادي

والحادي ما يرحم زينب مچتوفه أحبال
ومحتاره ابيتـام وخــدر بـــويه وأطفال
وبگلبــچ جمــره يــــا بويه الحره

**

لبـنْ راد الطبيــب وفــزعت الأيتــام
ظنهم بويـه جـرحي وطبــرتي تلتام
ترد الفزعه لكن بويـــه بـأرض الشام
شتم وأحجــار يبويه بغربتـچ والآم

والأصعب ديوان الباغي متروس أجناب
مصابچ يا زينب ما مثله بالكون أمصاب
ورثيتي الزهـره يــــا بويه الحره

**
الشاعر
موسى البديري

مجموعة ابوذيات بذكرى شهادة الامام علي عليه السلام

علـــى النـــوح الـــدهر طشنه ولمنــه
وبعــــد مـــا تهــــده ونتنــــه وألمنـه
أجانــــه العيـــــد لا أبــــونـــه ولا أمنـه
صرنـــه أيتـــام حمّــــــاي الحميــــــه

** **

يبويـــه أهــــلال عيـــد الفطـر هل هل
ودمـــع عينـــي عليك أدمــوم هل هل
يبويــــه الشامــت بهـــل يــوم هـلهــل
لچـــم گلبــــي ونهــــاري اظلم عليه

** **

دمـــع عيني دمــه من العين منسال
ودليلي مـــن المصــايب دوم منسال
على هامــك السيـــف اشلون منسال
وطـــبر راسك يحماي الحميـــــه

** **

ريض يـــا نعــش بــرجـــاك مــرهان
مو تدري الگــلب بالنــــوح مـرهان
جزّن حلــوه الليــالي وبقـن مــرهن
وبعد هيهـــات وكتـــي يحن عليه

** **

عگــب عينــاك أدگ الصــبر والهــم
وبعد هيهات أجافــي النـــوح والهــم
علــى المطــبور راسه بسف والهــام
أنـــوح ولا تهيـــد الــــروح بيه

*
الدهــــر وياي ســوه الراد مــا راد
ومصابك يـــا علي لحشاي مــــارد
يبويـــه الگلب راد ويـــاك مـــاراد
عليـــه تبعد يحمــــــاي الحمــيه

** **
الـــدهـــر عالـنوح هــددني وعـيــده
وحــــزن أم الحســــن رده وعيــده
الگلب بحــــزانه متگبـــع وعيــده
صــــــار همــــوم وآلام ورزيــــه

** **

بزغر سنـــي وچفــوفي الــدهر لاون
ولا دمعــه التسلـــي الـــــروح لاون
يبويــــه رايـــح ليـــا صــــوب لاوين
أجانــــه العيد ونعيّـــد ســـويــــه

** **


الشاعر
موسى البديري

وزن نجفي من التراث



يا ناعـي المصيبـه شهل الصيحه الرهيبه
نادت يــالـمجبلين گلبي انجسم نصين

**

يـــا نـــاعـي المصيبــه هلـــت الدمعـــه
وي صـــوت اليهـز عرش الله والسبعه
اظــن جبـــريل هـــذا اليصــــرخ وينعه
انطبـــر ديــــن الاله وعلّته وشـــــرعه
يا نـــاعي الامامـه اصبحنـه يتـــامـه
من بعدك يبو حسين گلبي انجسم نصين

*

يـــا نــاعــي المصيبـــه انعـــه ليــامي
الگلـــب للنوح بعده من الضلع ضامي
وي بسمـــار امــــي منطبـــر هــــامي
وگبـــل الوالـي راسي أمخضب ودامي
اصـرخ هالمسيـــه يا حـامي الحميــــه
رايـــح يا بويه لوين گلبي انجسم نصين

****

يا نــاعي الصوت خلِّـف بالگلب اثار
مثل مـــا خلِّف من أمـي اثر بسمــار
يـــا گلـــب يتحمـل فـــرگت الكــــرار
مـــنْ البـــاب وجّـــتْ بالگلـب يا نـار
نـــار امي الزچيــه وجّــت هســـه بيه
تسعر بيـِّه نـارين گلبي انجسم نصين

****

يناعي مصاب حيدر ريض بهونـك
يتامــه اهـــواي بسك لا يسمعونـك
اذا گصــدو الك ظــلوا ينشـــدونـك
بالك لا تحيـــر وينخـطـــف لــونـك
گلهم باچر يگـــوم أبــوكم نــايم اليوم
حگهه تدمع العين گلبي انجسم نصين

*

يناعـــي مـــا تفيد اللــوعه والحنـّـه
اذا ابـــونه مشــه وبحسره فــارگنه
باچـــر مـــن يجينـــه العيــد بالونـه
حگي مـنْ الفــرح لــو اگطع الضنه
يـــا عيــد بغيابـــه يتعنه أعلــى بابــه
عيدي دمع وونين گلبي انجسم نصين

*
يا نــاعي المصيبه أوداعـه ياذينــي
شايل روحــي أنــت وزايـد اونينــي
چــم أوداع شـافـــت للأهــل عينــي
يظل طاري الوداع امرافگ اسنيني
يـــوداع الغــــوالي سهـرني الليــالي
يا أهلي يـــاطيبين گلبي انجسم نصين

*
الشاعر
موسى البديري