Navroʻz bayrami munosabati bilan Jizzax politexnika instituti rektorining bayram tabrigi

Aziz vatandoshlar, qadrli jizzaxliklar!
Jizzax politexnika instituti jamoasi va oʻz nomimdan barchangizni Navroʻz ayyomi bilan chin dildan qutlayman.
Oʻlkamizga iliqlik, uygʻonish va yasharish, xalqimizning azaliy bunyodkorlik, dehqonchilik ishlariga qut-baraka, yangi kunga umid va ishonch uygʻotib kirib keladigan ayyom hammamiz uchun omad va barokat olib kelsin. 

Hurmatli hamkasblar, qadrli talabalar!
Shunday shukuhli damlarda barchangizni yasharish va yangilanish timsoli, mehr-muruvvat, tinchlik, ezgulik bayrami Navroʻzi olam bilan samimiy muborakbod etaman.
Yurtimiz ravnaqi va xalqimiz farovonligi yoʻlida amalga oshirayotgan ezgu ishlaringizda ulkan zafarlar yor boʻlsin. Ilm oʻrganishdan, koʻzlagan maqsadlaringiz sari dadil qadam tashlashdan aslo charchamang.
Navroʻz har bir xonadonga, butun el-yurtimizga tinchlik-xotirjamlik, baxtu saodat va qut-baraka olib kelsin!

Hurmat bilan,
rektor t.f.d., prof. A.Usmankulov

Jizzax politexnika instituti rektorining Ramazon hayiti tabrigi

Hurmatli professor-o‘qituvchilar, aziz talabalar va ishchi-xodimlar!

Barchangizni mehr-oqibat, ezgulik va saxovat elchisi – Ramazon hayiti munosabati bilan chin qalbimdan tabriklayman.

Ushbu muborak kunlarda Yaratgandan xonadonlaringizga farovonlik, tinchlik-xotirjamlik, dasturxoningizga to‘kinlik, yaqinlaringizga sog‘lik-salomatlik, qalbingizga quvonch, ezgu ishlaringizga rivoj tilayman.

Shunday fazilatli oyda tutgan ro‘zalarimiz, qilgan xayr-u ehsonlarimiz qabul, ezgu duolarimiz ijobat bo‘lsin. Shu tabarruk ayyom qalblarimizga iymon va xotirjamlik, manfaatli ilmlar olib kelishini tilagan holda Ramazon shukuhi va barakasi yil davomida hamrohingiz bo‘lishini tilayman.

Muqaddas ayyom - Ramazon hayiti barchamizga muborak bo‘lsin!

Institut rektori,
t.f.d., prof. Alisher Usmankulov

Jizzax politexnika instituti rektorining Xotira va qadrlash kuni munosabati bilan bayram tabrigi

Qadrli institutimiz jamoasi!
Aziz urush va mehnat faxriylari!
Hurmatli vatandoshlar!

Barchangizni 9-may – Xotira va qadrlash kuni hamda Ikkinchi jahon urushida qozonilgan buyuk g‘alabaning 80 yilligi bilan samimiy tabriklayman.

9-may – mazkur kunda Ikkinchi jahon urushida, qolaversa, butun tariximiz davomida Vatanimiz tinchligi va ravnaqi uchun jonini fido qilgan barcha ajdodlarimizning muqaddas xotirasini yod etamiz, vatandoshlarimizning jasoratini, front hududlaridan yurtimizga ko‘chirilgan bir millionga yaqin oila va bolalarni qabul qilgan xalqimizning bag‘rikengligini anglaymiz. Kun sayin urushning dahshatiga guvoh bo‘lgan qahramonlarimiz oramizni tark etmoqda. Safimizda yurganlariga esa hurmat va ehtirom ko‘rsatib ardoqlash, qo‘llab-quvvatlash barchamizning vazifamiz ekanligini unutmasligimiz lozim.

Xotira bor ekan – millat barhayot. Tinchlik uchun jon olib, jon bergan hamyurtlarimiz xalqimiz qalbida mudom yashaydi. Ularning jasorati, urushning ayanchli oqibatlarini unutmasligimiz, tinchlik, xotirjamlik, shuningdek, oilamiz va yaqinlarimiz xavfsizligining qadriga yetishimiz, Vatanga sadoqat hissi bilan yashashimiz zarur.

Fursatdan foydalanib, barchangizni bugungi muborak ayyom bilan tabriklab, sihat-salomatlik, baxt-saodat, xonadonlaringizga qut-baraka tilayman.

Yurtimiz tinch, osmonimiz musaffo, mustaqilligimiz abadiy bo‘lsin!

Institut rektori,
t.f.d., prof. Alisher Usmankulov

Jizzax politexnika instituti rektorining Qurbon hayiti munosabati bilan bayram tabrigi

Qadrli hamkasblar, aziz talabalar!

Shunday munavvar kunlarda Siz azizlarni, sizlar orqali oila a’zolaringizni Qurbon hayiti munosabati bilan chin qalbimdan tabriklab, o‘zimning chuqur hurmatim va ezgu tilaklarimni izhor qilaman.

Xayr-ehson, saxovat, mehr-muruvvat bayrami hisoblangan fayzli onda barchamiz, avvalo, Yaratganga bugungi qutlug‘ va barokatli kunlarga yetkazgani uchun behisob shukronalar aytamiz.

Qurbon hayitining ma’naviy hayotimizda olijanob fazilatlarni, bag‘rikenglik, muruvvat, do‘stlik va hamjihatlik kabi ezgu qadriyatlarni mustahkamlash borasidagi o‘rni va ahamiyati beqiyos.

Muborak Qurbon hayiti bilan yana bir bor tabriklab, barchangizga baxt-saodat, tinchlik-xotirjamlik hamda mustahkam sog‘lik tilayman.

Xonadonlaringizni fayz-u baraka va osoyishtalik aslo tark etmasin!

Institut rektori,
t.f.d., prof. Alisher Usmankulov