【本日焦點新聞 2023年12月15日】

//警方國安處於早前高調宣布懸紅通緝 8 名海外港人，琴日（14 日）再增加通緝 5 名海外港人，包括鄭文傑、許穎婷、邵嵐、霍嘉誌及蔡明達，分別涉及「勾結外國或者境外勢力危害國家安全罪」、「煽動分裂國家罪」等，分別懸紅一百萬元。

國安處總警司李桂華今日公布，新一批被通緝名單共 5 人，包括鄭文傑、許穎婷、邵嵐、霍嘉誌及蔡明達，其中鄭文傑涉及聯同其他人成立政治組織，包括英國港僑協會、香港影子議會等，呼籲外國政府制裁香港官員。

李桂華指，霍嘉誌及蔡明達均在社交平台開設頻道並發佈影片，霍嘉誌呼籲人加入及組織軍隊、鼓吹港獨等，蔡明達則提倡在外國接受軍事訓練，推翻香港現有狀況。翻查資料顯示，蔡明達創立 YouTube 頻道「升旗易得道」。

李特別提到，早前涉及早前「曾志健」喺香港流亡但最後被捕嘅案件，捲走幾十萬並留低健仔唔顧，形容行為令人髮指。//

———————————————
更多資訊，包括最新一期《自由港》請點擊以下連結⬇️⬇️
https://linktr.ee/HarbourofFreedom
捐款支持我們:
https://ko-fi.com/harbour_of_freedom

【本日焦點新聞 2023年12月18日】

//黎智英案今日（18 日）開審，係港版國安法下第一個被控「外國勢力勾結罪」嘅政治犯，佢喺2020年被捕，「未審先坐」已經超過三年，而一旦罪名成立，可能面臨終身監禁，而國安法至今嘅定罪率為100%。案件由高院《國安法》指定法官杜麗冰、李素蘭及李運騰審理，但由於律師團及預計旁聽人數較多，所以假於西九龍裁判法院開庭，預料審期為80日，不設陪審團。該案備受國際社會關注，被視為對香港司法獨立嘅考驗，國際媒體亦將此案視為港版國安法下針對香港頭號國安嫌犯嘅一場里程碑式審判。

警方喺法庭外嚴陣以待，出動裝甲車並有反恐特勤隊持槍戒備，大量警員喺附近巡邏，國安處處長江學禮、國安處總警司李桂華均有到場視察。過百位市民喺寒風中到法院外排隊旁聽，王婆婆亦喺法院外抗議，高喊支援黎智英等口號，隨後被警員圍堵並帶往法庭對面嘅示威區。澳洲、新西蘭、美國、英國、瑞士及加拿大亦派出領事館代表到場旁聽。旁聽審訊嘅仲有92歲嘅榮休主教陳日君樞機，以及民主黨前主席劉慧卿；後者對傳媒表示，黎智英已還押逾千日，佢嘅家人朋友都感到心痛、難過，期望黎智英同其他民主派人士都能得到公平公開審訊，展示俾市民同國際社會睇香港仲有司法獨立同法治。

英國外交大臣卡梅倫對「英國國民黎智英」被政治檢控表示關注，呼籲港府停止起訴並釋放黎智英，並指香港國安法明顯違反1984年簽署嘅《中英聯合聲明》，呢次係第一次有英國現任外相公開呼籲港府放人。之前，黎智英兒子黎崇恩曾批評英方「軟弱得令人難以置信」，佢亦喺開審前嘅幾日會晤新任外相卡梅倫進行游說。唔單止英國，喺審訊前一日美國國務院也敦促港府立即釋放黎智英，指黎喺案件開審前被還押超過三年，港府同北京當局亦拒絕比佢選擇律師。美國國務院發言人米勒喺聲明中指：「我地敦促北京同香港當局尊重香港嘅新聞自由。打壓新聞自由同限制信息嘅自由流通，以及北京同港府『完善』香港選舉制度，降低直選同禁止泛民主派及本土政黨候選人參選將削弱香港民主，損害香港作為國際商業同金融中心嘅聲譽。」//

———————————————
更多資訊，包括最新一期《自由港》請點擊以下連結⬇️⬇️
https://linktr.ee/HarbourofFreedom
捐款支持我們:
https://ko-fi.com/harbour_of_freedom

【本日焦點新聞 2023年12月19日】

//梵蒂岡琴日（18日）宣布，教宗方濟各正式批准神職人員，可為同性伴侶送上祝福，但只限喺「非天主教正規教會儀式或崇拜儀式」、及「非婚禮或民事結合儀式」。梵蒂岡強調，天主教教廷反對同性婚姻或民事結合的立場不變，但因「天主接納及幫助所有人」，先有呢個頒布。

教宗方濟各上個星期日（17日）簽署批准由教廷信理部發報嘅文件，文件以英文、德文、西班牙文、法文及意大利文五種語言，闡述最新神職人員給予祝福嘅條件。文件首次表示教廷贊成「非正常情况伴侶與同性伴侶」可以接受祝福，神職人員應按具體情況判斷係唔係給予祝福，文件指「任何人都唔應該阻止或禁止教廷，親近身處各種處境，並希望通過簡單祝福尋求天主幫助嘅人，而天主會接納及幫助所有人，因此毋須經過『徹底道德分析』」；但文件重申，教廷仍然視婚姻為「一男一女」嘅終身誓言，因此上述祝福唔適用喺天主教正規教會或崇拜儀式、婚禮或民事結合等場合，因為祝福不會令「異常情况」喺教廷合法化，所以唔可以同異性婚姻混為一談。

方濟各當選教宗後，作風一直相對開明，期望改變道德教義以吸納性小眾進入教會。方濟各亦曾致函保守派樞機，指無論任何人對天主請求祝福，神職人員都應以牧靈慈悲之心回應。今次頒布允許神職人員給予同性伴侶祝福，被形容係天主教發展一個極具意義嘅里程碑。//

———————————————
更多資訊，包括最新一期《自由港》請點擊以下連結⬇️⬇️
https://linktr.ee/HarbourofFreedom
捐款支持我們:
https://ko-fi.com/harbour_of_freedom

【本日焦點新聞 2023年12月20日】

//美國參議院早前通過有關出年嘅國防政策及支出的《國防授權法案》（National Defense Authorization Act），長逾3000頁嘅法案書中，提及將中國、香港、澳門均被列為「海外敵對勢力」，將同北韓、伊朗、俄羅斯、古巴及委內瑞拉齊名。法案已獲參議院及眾議院投票通過，待美國總統拜登簽署該法案，有關法案就會正式生效。

法案內容提及將增加國防預算3%，包括撥款147億美元用作支援美國喺印太地區嘅軍事部署、增加行動次數等，以制衡中國喺南海同印太嘅勢力。法案亦列明會新增撥款，調查香港官員同商人有無干犯反人類、種族滅絕等國際刑事罪行。

呢次嘅《國防授權法案》參議院以87比13票通過法案，喺第二日眾議院亦以310比118票通過，涉破紀錄嘅軍費開支，為8,860億美元。//

———————————————
更多資訊，包括最新一期《自由港》請點擊以下連結⬇️⬇️
https://linktr.ee/HarbourofFreedom
捐款支持我們:
https://ko-fi.com/harbour_of_freedom

【本日焦點新聞 2023年12月21日】

//港府相隔8年再推俗稱「投資移民」嘅「資本投資者入境計劃」，將提高投資門檻至3,000萬。港府料計劃可帶黎1200億，又認為相對新加坡類似計劃，香港「有吸引力」。

港府周三（19日）舉行記者會宣布出年將重推出「投資移民」計劃並接受申請，新計劃申請人須投資3000萬港元在股票及債券等金融資產，當中300萬要喺計劃指定嘅創科及其他重點行業發展。財經事務及庫務局局長許正宇稱，香港一直吸引世界各地的人來港發展，舊年15萬名超高資產淨值人士在亞洲，香港佔1.5萬人，數量是「全球第一」，參考過往每年約有4,000人申請，估計今次可以帶黎1,200億新資金。佢又話，今次計劃門檻俾以前 ，但相對新加坡類似計劃，「有信心」香港嘅計劃有吸引力。佢喺港台節目指：「新加坡計劃都有類似要求，（投資）門檻比我們高，要1000萬坡幣，即5、6000萬港元。作為投資者，要選擇一個地方取得永久居留權，不只是錢的問題，亦要透過此工具到這裡生根和發展其他東西，香港的配套和發展前景，我們很有信心。」

財經評論員顏寶剛就認為，港府高官說法「離地」，未能「居安思危」。佢指，以往香港投資移民大部分吸引有外國永居身分嘅中國公民 ，但如今香港有國安法，資產安全成疑，質疑新計劃未必能守得住呢批「大客」。至於港府自2003年推出「投資移民」後，大批中國人「炒樓」令樓價急升，於是2010年將投資門檻提升由650萬港元至1000萬港元 ，並剔除投資房地產，整項計劃到2015年暫停。今次新計劃重新加入房地產 ，包括放寬可投資不多於1000萬港元嘅非住宅房地產，同時同「高才通計劃」一樣，享有「先免後徵」印花稅。

事實上，新加坡近年係中國富豪走資熱門「避風港」，2022年有過萬中國人移民新加坡，但大量財富流入，導致當地樓價同其他生活費用飆升。新加坡政府繼去年後，再於今年3月大幅提高「全球投資者計劃」門檻，包括投資金額由250萬坡坡紙升至1000萬坡紙（約6000萬）等。雖新加坡不斷「加辣」，惟目前申請隊伍卻愈排愈長，由去年4個月，延長至少8個月至1年。//

———————————————
更多資訊，包括最新一期《自由港》請點擊以下連結⬇️⬇️
https://linktr.ee/HarbourofFreedom
捐款支持我們:
https://ko-fi.com/harbour_of_freedom

【本日焦點新聞 2023年12月22日】

//據台灣內政部移民署統計資料顯示，2018年至今年10月底，香港人獲台灣居留許可人數為4.6萬人。陸委會近日聲稱，港人申請喺台灣居留許可核准率逾97%；符合一定條件後，定居許可核准率近75%。

台港經濟文化合作策進會周三（20日），由陸委會港澳蒙藏處長兼台港經濟文化合作策進會秘書長盧長水指，近5年港人申請喺台灣居留獲許可者，核准率逾97%；以就學、就業等事由居留無法申請定居外，符合一定條件獲定居許可者約9,000人，核准率近75%；而尚未通過定居審核的保留觀察案件，政府持續輔導補正資料，希望比真心誠意留台發展嘅香港朋友實現定居規劃。

據台灣內政部移民署統計資料，2018年至今年10月底計，香港人獲台灣居留許可人數為4萬6,564人；港人獲台灣定居許可人數8,132人。2018至2022年期間，港人獲台灣居留許可人數最高峰為2021年，全年達1萬1,173人；相較2018年激增7,025人、增幅為169.3%。//

———————————————
更多資訊，包括最新一期《自由港》請點擊以下連結⬇️⬇️
https://linktr.ee/HarbourofFreedom
捐款支持我們:
https://ko-fi.com/harbour_of_freedom

【本日焦點新聞 2023年12月26日】

//中共一直大力宣揚「無神論」，喺今年聖誕節，官方再次強調要堅持基督教中國化。喺黨要求「從嚴治教」下，廣東、福建、黑龍江等地都有學校及幼兒園要求學生同家長拒絕過聖誕節，呼籲「要保持文化自信，不盲目跟隨其他國家嘅節日」。 

中共中央政治局常委、全國政協主席王滬寧喺上個禮拜中國基督教第十一次代表會議上指，新一屆基督教全國「兩會」要堅持基督教中國化方向，對教義教規作出符合當代中國發展進步要求、符合社會主義核心價值觀同中華優秀傳統文化的闡釋，要「講好中國宗教故事」。 

及後，多地慶祝聖誕的活動受到嚴格限制。據《路透社》報道，雲南省一家物業管理公司出通告指傳統唔應該被「盲目」追隨，應該對中國文化充滿自信，要求商場租戶唔好賣聖誕卡同有關物品，以及唔好掛飾物。另一喺深圳嘅物業公司都發出倡議書，要求店舖唔準賣同聖誕節同平安夜相關嘅禮物、賀卡、平安果，都唔準商家喺商場、店內懸掛有關節慶裝飾物品。 

而學校方面，廣東東莞厚街開賢學校向學生家長發出「弘揚傳統，不過洋人節」嘅倡議書，形容近年喺社會同校園過聖誕節、平安夜嘅風氣有蔓延趨勢，「平安夜、聖誕節係西方國家嘅傳統節日，對國外嘅傳統文化有所了解係應該嘅， 但我地唔倡導同盲目跟從。」哈爾濱市勝利小學都發出倡議書，要求學生「堅定文化自信」，拒絕過洋人節。
 
喺平安夜當日，多名網民指喺河北、河南、福建、天津等地嘅教堂都有警員看守，唔準叫口號、有大動作，便衣警察喺教堂內來回巡視。中國宗教事務條例規定，喺中國信奉嘅宗教「不受外國勢力支配」，因此，即使上海同重慶等大城市嘅商場都佈置左聖誕樹點綴著燈光、緞帶同禮物盒迎接顧客，但因憂慮「外來影響」，所以並唔鼓勵過聖誕節。 //

———————————————
更多資訊，包括最新一期《自由港》請點擊以下連結⬇️⬇️
https://linktr.ee/HarbourofFreedom
捐款支持我們:
https://ko-fi.com/harbour_of_freedom

【本日焦點新聞 2023年12月28日】

//AI竟然裝到入肛門？河南象棋選手顏成龍17號喺「中國全國象棋民間棋王爭霸總決賽」擊敗對手，榮升民間棋王，奪得10萬元人民幣獎金。然而，賽後顏成龍卻爆出懷疑喺比賽中用「肛珠」作弊；中國象棋協會經調查雖然未能證實，但將褫奪他的頭銜及獎金，並罰停賽一年。 

「肛珠」作弊係將可收發訊息嘅肛珠藏入肛門，用括約肌發送訊號，連接電腦分析棋局，然後透過震動刺激直腸神經提示下一步棋點落，係一種新型嘅作弊手法。由於當日比賽結束顏成龍退房後，酒店員工發現浴缸懷疑有排泄物，有象棋圈內人士猜測，顏成龍係喺浴缸排出及清洗肛珠。 

中國象棋協會琴日（25日）發布「關於對註冊運動員顏成龍不當行為調查處理的情況通報」，協會表示收到舉報後進行調查，指顏成龍喺17日當晚同其他人喺酒店房飲酒，18號喺房間浴缸內排泄，暫時無法證實顏成龍係咪用「肛珠」作弊，但顏成龍破壞飯店公物，違背公序良俗屬實，對賽事同象棋項目造成負面影響，性質非常惡劣，因此決定收回佢嘅全部獎項，唔發放獎金，以及停賽一年。 

至於顏成龍矢口否認有作弊，強調係因為忍唔住先喺浴缸大便。佢話：「12月17日奪冠了，有點開心，當天晚上喝酒了，喝多了，腸胃不舒服。另外，我是北部人，去海南比賽也有點水土不服。 」至於點解唔用馬桶，佢解釋「拉了很多次。凌晨4點那次實在憋不住，在浴缸裡大便了。 浴缸剛好在衛浴門口，浴室比較大，浴缸離馬桶有四、五公尺遠，實在來不及。」 

現年48歲的顏成龍，喺2004年贏得河南象棋省錦標賽冠軍，2007年擔任河南省象棋隊總教練，多次代表河南省同農業體協參加全國團體賽及全國農民象棋賽，2021年更奪得第14屆全運會群眾比賽象棋男子個人冠軍。//

———————————————
更多資訊，包括最新一期《自由港》請點擊以下連結⬇️⬇️
https://linktr.ee/HarbourofFreedom
捐款支持我們:
https://ko-fi.com/harbour_of_freedom

【本日焦點新聞 2023年12月28日】

//8男女被指策劃喺法院、警察總部及政府大樓等公共設施放置炸彈，案中主腦、19歲青年早前承認「串謀恐怖活動」罪，另一名「賢學思政」前成員、23歲男學生則喺今日（28日）承認「串謀導致相當可能危害生命或財產的爆炸」罪，二人各被判監6年。一名「光城者」成員、中六女生曾介紹上述兩日互相認識及商討計劃，則被判監2年半。仲有24歲男司機，獲控方申請終止聆訊當庭釋放，為首位獲撤控嘅國安法被告。

案情指，2021年郭文希加入組織「光城者」。同年郭、何和歐文喺一次飯聚中談起涉案計劃嘅念頭，自此郭和何經常喺 Telegram 討論計劃，尤其係 TATP 點用。張離開「賢學思政」後，經常與郭及「光城者」成員討論使用炸彈同武器，以及教育市民政治文化等。張提及佢成立嘅激進政治組織「矢名」，計劃連繫唔同大學嘅學生會，以佢地嘅影響力同網絡去支持同資助反政府運動。

何早前承認《國安法》嘅「串謀恐怖活動」罪；郭早前承認《刑事罪行條例》下「串謀導致相當可能危害生命或財產的爆炸」罪；張尚未答辯，佢否認「串謀恐怖活動」罪，但承認交替控罪，即《刑事罪行條例》下「串謀導致相當可能危害生命或財產的爆炸」罪。控方庭上透露，張最初係控方證人，惟隨後警方調查發現佢無交代曬喺案中嘅角色。之後其他被告向警方提供資料指證張昊揚，警方始決定起訴張。控方指，張錯誤引導警方的調查，打算唔繼續起訴第一被告陳凱量（24歲，司機）。喺聆訊中，控方向法庭申請終止針對陳凱量（24歲，司機）的檢控程序，獲李官批准，並吩咐陳凱量可以離開被告欄獲當庭釋放，期間還柙約1年3個月。

《國安法》指定法官李運騰判刑時指，3名認罪嘅被告喺社會騷亂發生之前均為良好學生，但社會騷亂能夠輕易扭曲人嘅道德判斷，整個社會事件嘅腐敗性質（corrosive nature）亦輕易地使具有良好品格的人轉趨激進，為求目的不擇手段，所以即使求情信指稱被告有良好品格，也未能有助於被告。李官指，縱使3名被告年輕及沒有案底，法庭判刑時須側重保護整體社會及阻嚇性多於更生因素，最終判監2年半，並撤銷教導所命令，即時執行監禁刑期。//

———————————————
更多資訊，包括最新一期《自由港》請點擊以下連結⬇️⬇️
https://linktr.ee/HarbourofFreedom
捐款支持我們:
https://ko-fi.com/harbour_of_freedom

【本日焦點新聞 2023年12月29日】

//前學生組織「學生動源」召集人鍾翰林，周三（27日）喺Facebook指抵達英國尋求政治庇護。佢因國安法下嘅「分裂國家」同「洗黑錢」罪服刑近四年，至今年6月獲釋，但仍守監管令一年。懲教署今日（29號）召開記者會嚴厲譴責，並指已發出召回令，會同執法部門通緝。

懲教署更生事務副署長梁建業出席記者會，佢對鍾翰林到英國尋求政治庇護予以譴責：「逃避責任並明目張膽發布破壞國家安全嘅言論，懲教署予以嚴厲譴責。就著違反監管令規定，懲教署已即時向鍾翰林發出召回令，並聯絡了其他執法部門，依法將佢通緝。喺度我呼籲鍾翰林，希望佢回頭是岸，為自己行為負責，盡快返港。」

懲教亦交代事件經過，指鍾翰林今年6月獲釋，須接受一年法定監管。但今個月14號同監管人會面時，指佢會喺20至25號去日本沖繩旅行，到今個星期一（25日）監管人員接獲鍾翰林來電，指趕唔到飛機要改時間，28號才能返港。監管人員28號晚嘗試聯絡佢但未能成功，之後透過社交媒體及傳媒報道，才知鍾已赴英尋求庇護。

梁建業澄清，根據監管條款，受監管嘅人有出入境自由，所以唔存在要由懲教署批准，只需要「通知」監管人員。至於鍾翰林透露出獄後受國安滋擾，又指被迫收錢做線人，提供其他社運人士資料，懲教署未有正面回應，但亦無否認。梁建業：「至於國安公署人員見佢，我地只可話，監管人員同佢會面，係根據監管令要求去執行監管，亦就著更生需要提供輔導服務俾佢，至於其他機構去見佢，我地就唔會評論。」而中國外交部的例行記者會亦被問及此事，發言人毛寧回應時，批評鍾翰林「挾洋自重，必定被依法追究」。//

———————————————
更多資訊，包括最新一期《自由港》請點擊以下連結⬇️⬇️
https://linktr.ee/HarbourofFreedom
捐款支持我們:
https://ko-fi.com/harbour_of_freedom