Цягнік сышоў з рэек у Валгаградскай вобласці РФ. Расійскія СМІ пішуць пра атаку беспілотнікаў.

Уначы тут загарэлася цыстэрна з дызельным палівам, адна з іх выбухнула і падпаліла ўсё вакол чыгункі.

Праваслаўныя беларусы сёння святкуюць Радаўніцу — Вялікдзень для памерлых. У нашай традыцыі гэта дзень, калі прынята наведваць магілы продкаў.

На могілках загадзя прыбіраюцца, каб у дзень памінання было ўжо чыста. На пахаванні прыносяць кветкі — паклапаціцеся дзеля экалогіі, каб яны не былі штучнымі.

У савецкі час Радаўніца была пад забаронай, аднак людзі нярэдка бралі выходны за свой кошт, каб ушанаваць продкаў. Выходным днём свята стала пасля заканчэння камуністычнай улады ў 1991-м.

Візавы скандал у Польшчы можа кепска адбіцца на беларусах. Выявілася, што тысячы фэйкавых студэнтаў атрымлівалі візы, але не пачыналі вучобу.

Па звестках газеты Dziennik Gazeta Prawna, гэта было выгадна шэрагу прыватных вну: яны атрымлівалі грошы за першы год навучання, а свежаспечаныя "студэнты" разам са студэнцкімі візамі — доступ да рынку працы.

Хоць гэта былі ў асноўным ураджэнцы Афрыкі і Азіі, з наступствамі аферы могуць сутыкнуцца і беларусы. Правілы выдачы візаў зрабілі больш жорсткімі, таму некаторым сапраўдным студэнтам з Беларусі ўжо адмовілі ва ўездзе.

Кірыла Буданаў мяркуе, што Расія можа пачаць наступ на Сумшчыне. "Сітуацыя на мяжы. Кожную гадзіну набліжаецца да крытычнай".

Пра верагоднасць нападу праз 3-4 дня ён заявіў у інтэрв'ю The New York Times. На думку кіраўніка ГУР, мэта войскаў РФ — пасеяць паніку і адцягнуць рэзервы УСУ. Цяпер расійская армія атакуе Харкаўскую вобласць, адкуль украінскія ўлады эвакуююць людзей.

Калі "санкцыі не працуюць": ад летась беларуская малочка становіцца ўсё менш выгаднай. Чысты прыбытак ад яе склаў толькі 144 млн рублёў — у 2022-м вытворцы зарабілі на 85% больш!

Найбольш прасеў Лідскі малочны камбінат — выручка склала толькі 43,75 млн рублёў. І нават суперпаспяховыя "Савушкін" і гарадзенскі "Малочны мір" зарабілі на 52% і 36% менш у параўнанні з 2022 годам.

Між іншым, кошты малочкі за 2022 год выраслі, аднак нават гэта не ўратавала заводы ад скарачэння прыбыткаў.

Мігрант абакраў польскага памежніка. Ён прасунуў рукі праз агароджу на мяжы і адабраў у службоўца радыётэлефон — польскі бок паспеў яго адключыць.

Памежнік прыйшоў зняць з агароджы пазнаку, якую пакінуў "сталкер". У гэты момант адзін з мігрантаў і падбег да вайскоўца.

Здарэнне адбылося ў ваколіцах польскай Чарэмхі, якая мяжуе з Камянецкім раёнам Беларусі.

Сабаленка і Азаранка выйшлі ў чвэрцьфінал турніру ў Рыме. Беларускія тэнісісткі паспяхова выйгралі ў матчах 1/8 фіналу грунтавога турніру.

Вікторыя Азаранка перамагла Марыю Сакары з Грэцыі — 6:4, 6:1. Наступнай яе саперніцай будзе амерыканка Даніэль Колінз.

Арына Сабаленка выйграла ва ўкраінкі Эліны Світолінай ва ўпартай барацьбе — 4:6, 6:1, 7:6 (9:7). Пасля выйгранага другога сэта беларусцы спатрэбіўся медыцынскі тайм-аўт праз болі ў спіне. У чвэрцьфінале саперніцай Сабаленка будзе прадстаўніца Латвіі Алена Астапенка.

У Мёрскім раёне выявілі масавы "транспартны ваенны сабатаж". За паўтара года прадпрыемствы 11 разоў не выканалі ваенна-транспартны абавязак.

Праверкі паказалі, што не ўсе арганізацыі гатовыя ў выпадку вайны прадставіць свае машыны войску. Аўто былі без тэхагляду, не было ані запчастак, ані інструменту да іх.

Але суд пакараў не ўсіх, спаслаўшыся на адсутнасць адміністрацыйнага правапарушэння.

На Гомельшчыне нарэшце пачнуць рэканструкцыю трасы ад мяжы з РФ да Кобрына. У першай чарзе — участак паміж Рэчыцай і Калінкавічамі, праезную частку якога пашыраць да 4 палос.

На 85 км дарогі ўлады выдзеляць 208 млн рублёў і два гады, каб скончыць працы. Іх старт запланаваны на наступнае лета.

Рамонт планавалі пачаць яшчэ ў 2010-я з удзелам Еўрапейскага банка рэканструкцыі і развіцця, італьянскага, турэцкага, карэйскага і кітайскага капіталу. Але пасля падзей 2020 года інтарэс да беларускай часткі "Шаўковага шляху" згас.

Дэпутаты "Грузінскай мары" імкліва эвакуююцца з парламента. Яны сышлі з пасяджэння адразу пасля галасавання па законе аб "іншаземных агентах".

Праект закона ў трэцім чытанні падтрымалі 84 дэпутаты, 30 прагаласавалі супраць. Згодна з ім, НДА і СМІ, у якіх замежнае фінансаванне складае больш за 20% гадавога даходу, будуць абавязаныя рэгістравацца ў якасці "арганізацый, якія праводзяць інтарэсы замежнай сілы".

З'явілася петыцыя за перайменаванне вуліцы Кнорына ў Мінску. Назваць вуліцу аўтары тэксту прапануюць у гонар Тадэвуша Касцюшкі ці Станіслава Шушкевіча.

Сутнасць прэтэнзій да савецкага дзеяча наступная: ён не ўраджэнец Беларусі, а галоўнае — адмаўляў існаванне беларусаў як нацыі.

Сапраўды Вільгельм Кнорын (сапраўднае прозвішча Кнорыньш) нарадзіўся ў Латвіі. Быў кіраўніком інфармацыйна-прапагандысцкага аддзелу Камінтэрну, напісаў "Кароткі курс гісторыі ВКП(б)".

29 гадоў без "Пагоні": 14 траўня 1995 года прайшоў "рэферэндум" па змене дзяржаўнай сімволікі. Беларусь засталася без нацыянальных сімвалаў і беларускай мовы ў статусе адзінай дзяржаўнай.

Тагачасныя дэпутаты Вярхоўнага Савету ад БНФ наўпрост заяўлялі пра незаконнасць "рэферэндума", бо фармулёўкі супярэчылі Дэкларацыі аб незалежнасці, Канстытуцыі і самому закону "Аб усенародным галасаванні".

Па-багатаму: у Брэсце пабудуюць трыумфальную арку з надпісам па-руску. З'явіцца яна на вуліцы Маскоўскай, якая вядзе ў горад з мінскага напрамку, гаворыць цяперашні "мэр" Сяргей Лабадзінскі.

Падобная канструкцыя з'явілася ў 2018 годзе ў Магілёве з нагоды 750-годдзя горада. Адметна, што там беларускай мове знайшлося месца — спадзяёмся, што знойдзецца і ў Брэсце.

24 траўня вырашыцца, ці змогуць беларускія абітурыенты без праблем паступаць у Польшчу. Там хоць і не прызнаюць Лукашэнку прэзідэнтам, але працягваюць патрабаваць ад нашых выпускнікоў дакументы, якія беларускія чыноўнікі не выдаюць. Таму шмат маладых беларусаў і беларусак знаходзяцца ў стане чакання .

У Міністэрстве адукацыі Польшчы кажуць, што на сёння няма праўнай падставы, каб рабіць выключэнне для беларусаў. А ў нас тут каментар ад Алеся Лапко, кіраўніка Беларускага Моладзевага Хаба і кандыдата ад Моладзевага Наступу на выбарах у КР, які 14 траўня быў на сустрэчы ў Кураторыюме Асветы ў Варшаве.