يامن حبك يسري ابروحي
يال منك تتداوه اجروحي

عشگي ومن يمك تربيتي
متشرد والگيتك بيتي

*

يامصدر في يضوي ويا كوكب احلامي
يا شمعه ابعز روحي وتضوي ابأيامي
منك صوت البلبل تترتل باحساسي
ياسر شوگي وشعري ياحبري البقلامي

يالأقرب من دم شرياني
متطشر حبك لماني

شايل عشگك بين اضلوعي
ياستري وبالضلمه اشموعي

*

محبوبك خليني الحب ابدونك غربه
يال بس انته اتسوي شنهو الروحي اترغبه
ياساكن وجداني عطرك وي كله نسمه
اتمنه انه اميه وشفافك التشربه

جود اتحول وشرب مني
وبريجك كون اتنزلني

يامن لمن هوه يصدلي
مو بس انه اجروحي اتصلي

*

يلحبك خلاني اتنفس عل نيه
يل خيرك خلالي حب يصب قدسيه
ياسگاي للحب دوم تسگيني امن عيونك
عافيتي ويا صحتي ويا راحه النفسيه

يل تستاهل مو بس عشگي
كونك دم وتمشي ابعرگي

صاير ورگه وفوگي اتندي
ابحچي اوصافك شترك شبدي

*

ربي الي مربيني يل عشگك خلاقي
من لونك وعيونك صارت عدله اخلاقي
يا شجره ابفي تضوي وياساحر ساحرني
خلصن بسمك اكتب يا محبوبي اوراقي

لجلك الله امسوي اعيوني
مرسوم ابحيلي وبجفوني

يل صاير لجروحي المرهم
عشگك بس الگلبي اليرهم

*

يا كشخة كل خاتم صاير لونك شذره
ويامحلات ايامي اوياك اگضيهه العشره
يا نية كل نادم خاضع يرجع لله
انته التارس صدري ريحة شوگ الحضره

يالعطرك ينضح حنيه
ياهيبة لبس الخاچيه

يالدينك معروفه اركانه
بالأبهر مرسومه الوانه

*

علي محمد النصيري

يا معشوگ شوف العين يا ساكن تفاصيلي
يا صفنات شاعر شاب ياگمره ابوسط ليلي

متفارگني چن ضلي
ساكن گلبي وبعقلي
ياحنيت رب الكون ياگمره ابوسط ليلي

*

يا بلسم عشگ وانفاس يامن صار ترتيله
تستاهل تعبهه الروح شاعر يسهر ابليله
يبچي اگليبي واعرف ليش چيف انته التلوليله
گلبي اترف منال ورگات لين انته التفييله

يدمي اليسري بيه
نضراتك عليه
هذن اعضم هديه

نضرت شوگ والأحساس منك نضره تشفيني
ما بردان بس والهان اريدنك تغطيني

يمدفيني بوصافك
اضيعن انه بخلافك
يمعيشني تنطي امراد ياگمره ابوسط ليلي

*

عينك لو تصدلي اتطير روحي وماعرف شحچي
يامسند دليل الشوگ گلبي اعليك يتچي
لو مرلك عله البيبان ارد مرتاح من اشچي
لو حس بيك راضي اهواي يوجعني ابفرح فچي

ياهيبة مناير
ياحصن اليسافر
حب ابگلبي داير

ضايع بيك چيف اهواك واضيعن انه مندونك
والله اهواي هايم بيك واعشگ نضرة اعيونك

باوع عل گمر فرصه
خل يعرف منو نصه
يال بيك الله خله النور ياگمره ابوسط ليلي

*

ماشفتك لچن يحسين ذكرك يطرد الخنگه
بس وصفك يرد الروح چا شتسوي بالشبگه
مايچذب دليلي اوياك واضح بالرسم عشگه
الگلب ينباگ بس محلاه من اعيونك اتسرگه

يا نبضه ابدليلي
معشوگي وخليلي
يمضويلي ليلي

افخر دوم بيك اهواي وبعشگك احس رابح
چي حبك دلال ابعوز دنيه واخره ناجح

يا نضرة عطف منك
اعشگ وصفك وحسنك
يازمزم يبير الخير ياگمره ابوسط ليلي

*

ابدولت عشگي انه امخليك تملك گلبي واحدوده
نشيد الدوله اسمك صار مامحتاج لنشوده
العشگ لو خيمه انه ادريك انته اتصير عاموده
روحي امچلبه بيك اهواي چن بالحضره مشدوده

يا حس القياده
عشگك چن عباده
رازقني الإراده

مو بالنوم واحلم بيك يالي اتمرني بالصحوه
لو طايح طريح افراش اذكر اسمك اتگوه

عمري ما خلص يحسين
اليعشگ ينرزق عمرين
واريد اوياك عمريني ياگمره ابوسط ليلي

*

ابنص عقلي مهاد اتصير منك زاد ادراكي
فاطر بالعشگ وياك لو تمشي اعلن امساكي
تخجل كل عطور الكون لو مر عطرك الزاكي
اخويدم عندك انه ازغير وانته اتصير ملاكي

يادراك الحقيقه
ورده ابنص حديقه
ماعوفك دقيقه

لا ماضيع لو وياك امشي امغمض اعيوني
نورك شاع واعرف بيك تبين ابطبگة اجفوني

خيرك واصل الراسي
يلتسوه هلي وناسي
فدوه اندارلك يحسين ياگمره ابوسط ليلي

*

علي محمد النصيري

يفراگهم هدالي حيلي منالسهر جمره حرگ يفراگهم
يفراگهم ما خله بضلوعي گلب صامد يدگ يفراگهم

*

حزن ما ينحمل
تره يكتل كتل
شيصبر گلبي والبيت يذكرني ابأهلنه
دليلي الوحده
يسولف للصده
يگله الراحو ابعيد بعد شنهو اليلمنه

تره افراگ الأهل كلفه ما احمل دقيقه
بلكت افز من نومي وما يطلع حقيقه

يفراگهم خلاني فگدان الأهل چلمه ابحلگ يفراگهم
يفراگهم ما خله بضلوعي گلب صامد يدگ يفراگهم

****

جنح دمعي خفگ
احس ضلعي انطبگ
وره الباب واحس حيل يرك بيه كلامي
اليضيع ابموطنه
يحس گلبه انحه
واريد انه لهلنه اسافر وي هيامي

علي مجره الدمع ينزل راح يردني طينه
بحر بخدودي يتوارد وما الگه سفينه

يفراگهم هضمه والم حرز الفگد لو ينعلگ يفراگهم
يفراگهم ما خله بضلوعي گلب صامد يدگ يفراگهم

*

ابحلم وشعر الي
رجعو كل هلي
وفز شوگ من النوم وردن بنكساري
وانامن بالألم
وشم عطر الخيم
ابحلم چن اشوفن توجي بيه دياري

وشم عطر الخيم مره ومره چن يجوني
هلي بالنومه والصحوه والله حيروني

يفراگهم ابحر الغرب ارجف رجف سني يطگ يفراگهم
يفراگهم ما خله بضلوعي گلب صامد يدگ يفراگهم

*

احس هدهد سبأ
اجه الگلبي ودفء
ويوديلي مرسال لحد شيخ العشيره
الكتابه امنالدمع
وضوه اشواگي يشع
وريدن ويه مرسالي اعبر ديره ديره

هلي يوصلهه مرسالي وما شوفنهم انه
ونعيش افراگ بالضلمه وضوه العشره جفانه

يفراگهم ضلمه ووجع وسط الگلب طبن حشگ يفراگهم
يفراگهم ما خله بضلوعي گلب صامد يدگ يفراگهم

*

لهلي مسك الحچي
خلص وكتي بچي
يخلص يومي بدموع و اختمنه اببواچي
احس جفني انشرگ
وحس مني انسرگ
حنه وصارم وطاس وسرگوني تراچي

وحس ابصدر عبد الله منه انباگ نسمه
اخر نحر من بيتي ما يوسعني اشمه

يفراگهم چن كربله ابروحي ابتدت وجت عشگ يفراگهم
يفراگهم ما خله بضلوعي گلب صامد يدگ يفراگهم

*
علي محمد النصيري

طفله انه بويه الوحدي وبيه الوجع چن حرگه
مسلم حميده اتألمت ذيچ التعيش ابشبگه

غربه الزمن
وعيوني بعدك ينعمن
وتلفلفت چني ابچفن
غربه الزمن

اخ الوجع
دلالي احسنه انشلع
واليتم وي اسمي انطبع
اخ الوجع

وجهي وين انطيه گلي
وين اصد اليا درب
راح امشي ابعمه گلبي
وناقصه اشفافي شرب

يا دليلي يا دليلي يادليلي

*

يا ساگي گلبي امنالعشگ ماضلي منك گطره
عطشانه اعشگ وانعشگ مو امشي وسط الصحره

حيلي انچفه
مسلم عله الدنيه العفه
يابويه مو مالت جفه
حيلي انچفه

جمرة عذاب
بالحرگه الوعن واكتئاب
مامر علي هيچي مصاب
جمرة عذاب

خاف اطيح ابدرب ضلمه
ويركني بضلوعي المهر
وما يوگفني گرايب
بيده ويجرني الشمر

يادليلي يادليلي يادليلي
*

ياريحة البويه اختفت دليني وين اشتمهه
بنتك وحيده اتطشرت ردلهه بيدك لمهه

يابو الدلال
من موتك ارجعلي تعال
چتفو حميده بالحبال
يابو الدلال

من السبي
حمره اصبحن لون العبي
گدامي ضربو بت نبي
من السبي

مسلم ابنيتك سبيه
وانته ما ترضاهه هاي
خلني ازيد الطين بله
الشمر يركض وراي

يا دليلي يادليلي يادليلي

*

گالولي مسلم وحده وبالسنسله امچتفينه
مايبچي هوه منالألم لين انتي نضرة عينه

طولي انهدم
دمك عله اوراقي انرسم
يالطيحتك طيحت علم
طولي انهدم

روحت ابو
ماضلي بضلوعي دفو
ماعند اب اولا اخو
روحت ابو

يالطيحتك تچوي الگلب
ما تنحمل مثل الخيام
طفله ويتيمه الوحدي
واتمنه تاخذني السهام

يا دليلي يا دليلي يا دليلي

*

انه امشي واصفن بالدرب بويه اصبحت مچتوفه
وحيلي ونضرتي وخوفتي كلهن مشن للكوفه

طلعة نفس
والخوفه صارتلي لبس
وبالامك اتعايش وحس
طلعة نفس

ماكو جريب
حداينه واحد غريب
وبس انته لجروحي طبيب
ماكو جريب

انه ميته وبيه سوله
اله اشمنك وعيش
يعني اضلن ميته انه
ونته نص لحدك فريش

يا دليلي يادليلي يادليلي

*
علي محمد النصيري

يا ترجمة نوحي
يا لچمة اجروحي
حزني الك يوحي
ها يبوي

*

انه حميده احچي الألم
فگد الأبو طعنة سهم
تاذيني مسلم فگدتك
ارجف مثل ريح وعلم

يا بويه توجع روحتك
مشتاگه روحي الريحتك
ابچي وارد اضحك بعد
لو اصفن اتمر بسمتك

يا چلمة الحلوه
اب انته والخوه
يلروحتك بلوه
ها يبوي

*

فگدك يطر گلبي ابوجع
دلالي منك ما شبع
ارجع يمسلم مو متت
طفله واحس گلبي انشلع

مو حلوه من تمشي واضل
يچوي الفگد لا مو سهل
ما اعرف اوصف روحتك
مثل البچي مال الطفل

بيه الوجع ضيگه
لا والله ماطيگه
امسمم بلع ريگه
ها يبوي

*

انه المتت مثل الشجر
وگفه لچن جذري اندثر
كسرت غصن ما تنحمل
هيچي دليلي امن انكسر

امفارگك فگد الوطن
ومچلٓبه ابحفنت رسن
ميته وچفن ماكو ابد
وتلفلفت كعبه ابسدن

يالفگدك اطلابه
يا چلمة البابه
گلبي انته صلابه
ها يبوي

*

بويه الفگد مثل الضمه
ومثل السواد البلعمه
فاطرلي گلبي ابروحتك
مثل الرعيده البلسمه

شحچي وشسولف حالتي
السكته توصف كسرتي
فگدك يمسلم عل خلگ
ما ينوصف وي طاگتي

يالفة الشيله
يالريحتك هيله
عالو عله العيله
ها يبوي

*

واخر كلام امنال نضر
مشتاگه چن نضره ابصور
مشتاگه روحي الريحتك
خليني اشم عطر النحر

يالطيحتك من السطح
تفسيرهه ابگلبي رمح
طوله اعله طولي امنالالم
اتساوه طولي اويه الجرح

يا طاري صفناتي
ياحسره باهاتي
بالكسره چلماتي
ها يبوي

*
علي محمد النصيري

يالعباس يا احرورت شيمه
يا رجال يا اوتاد الخيمه
خل اوصيك حكمه من بدويه
ابحر الصيف صير انته اميه

*

يوليدي يا باشط علي يازلمه يالملك وصف
احچيلك اسوالف نده اتنفذها انته بالحرف
لحسين اخيك صح ضهر وحچيله بسوالف عطف
لو ماي يطلب سيدك بجفوفك اسحله الجرف

ياصارم انته وزود يا رجال هيبة قاده
عينك تسولف موت هيبة شيخ لهل الساده

جاي اوصيك وانته ما تتوصه
يطول السان بيدك انته اتگصه
شگ احلوگ والرگب گطعهه
ضيج الگاع ادبچهه وتوسعهه

*

يابو الكلايف يا شهم يمسهل الوان الصعب
ابني واريد افخر الك لمن تطب وكت الحرب
ارعد رعد وچوي السمه ومطر ابخزراتك رعب
كون التخزره امنالخيم يمن النهر خل ينصلب

يا كشخة الخزرات يا كفال بيك اتباهه
اوصافك تحير الناس فدوه اندار للسواهه

اوليدي الزود يل ما فشلني
رفعة راس ريشاتك يبني
كشخة روس ياعگال الغيره
يا صركال وخو شيخ الديره

*

يوليدي بيض مهجتي گدام حضرة فاطمه
كون امشي مرفوعة گلب واتباهه يمهه بالسمه
يوليدي چلماتي تضل خليهه تمشي اويه الدمه
كون السهم لمن يجي اتقدمله عينك للعمه

لا تشرب انته الماي گبل حسين يابو الكلفه
كونك تذل اجروف خلگ الماي بيدك نشفه

ابعذب الماي كون تعرض خوه
لجل حسين ماي والشط فدوه
گل للروح صبري انتي وهوني
لولى حسين انتي ما تكوني

*

اضرب خراطيم الكفر وبكربله ماكو نفس
بالطف اريدن ياشهم الخوفه حته امن الفرس
خلهم يگولون النزل عباس وبوجهه العبس
مو جربه يترس من نهر بصدورنه الخوف انترس

يوليدي اريدن كون كلهه اتخاف لو تدخلهه
زرعه الرعب عباس بيهم كون من تشتلهه

ريحة موت لو تطب بالعركه
واليدناك تگض خشمه اتفركه
كون الجاي رجلك انته تسحگه
ابحر الراس اليدنه يمك حرگه

*

باچر اريدن تنذكر عباس سگاي العذب
ينجاب طاريك يضل بالماي يبني اويه الشرب
وسمك يجي وي الرعب ما ينحلف بسمك چذب
واليحلف ابأسمك چذب يتسجل اعلي چم ذنب

يوليدي كون اتخاف كل الناس منك عاده
مو مني امرك صار لا والله الله الراده

اسمك كون يچوي كلمن جابه
وتصح دوم سيف مو بگرابه
يتحزمون بيك كل الشيعه
والينخاك هاذه لا متبيعه

*
علي محمد النصيري

هلا ابفخر الله وتچوتي وهيبتي وانصاري
يايميني الشال سيوفي ويا ارزاق الباري
هلا ابديواني وعزوتي يا سگف من داري

انتو منكم مالگيت
صحبه انتو وصرتو بيت
شامخ اوياكم يهيبه
وابد ما يوم انحنيت

انتو ناري وانتو دلتي وموگدي
انتو چفي وانتو سيفي وساعدي
انتو يا صوت الجمال اعله اذان
بدوي غرد صوته من يقره حدي

هلله هلله انصاري خوش ازلام
*


نافع اوجون وبرير وعابس اويه الحضرمي
انتو سلة سيفي والله وانتو لزمت معصمي
انتو يا فزعه ويهيبه وانتو كشخة هاشمي

كشخة يازود الرجال
امعوديني اعله الدلال
انتو ضهري وانتو وجهي
وياي يمين ويا شمال

صحبه صرتولي مثل بيت النبي
وستر علويات تفصال العبي
انتو خوش ازلام ياريحة سيوف
ماكو منكم لا چبير ولا صبي

هلله هلله انصاري خوش ازلام
*

غيرة الله وعين حيدر بس عليكم انتچي
انتو يمزامط اشيوخ ومرجله ابوكت الحچي
الگابلكم لو يموت لو ترجعونه اببچي

انتم ازغركم چبير
ما شفت الكم نضير
الواجهوكم والله غشمه
لأن للموت المصير

الواجهاكم يرجع ابكسرة ضهر
ما شفت خيال من يمكم عبر
اليجي يبارز ونتو ضده يموت هيچ
حيدر ومرحب من الهامه انشطر

هلله هلله انصاري خوش ازلام
*

يا ادياري وياعمودي ويا رفيفي العالي
كلكم اعزازي اعله گلبي وگلبي يهوه الغالي
انتو يا حنيت گلبي وانتو فكرة بالي

بيكم اتوضه واصوم
وبأسمكم من اگوم
الله يحفظكم اليه
وخير حبكم هم يدوم

يديمه ربي الخير منكم يا زلم
انتو محراب المحارب والعلم
انتو شوفتكم علي هيچي تمر
شيخ ونطيتوه قوه اهل العزم

هلله هلله انصاري خوش ازلام
*

ها يزودي ويا مراجل يا ابطال الصفوه
انتو حيلي بالمعارك وانتو چلمه تگوه
انتو ربعي وخوش خوه اهل صحبه التسوه
الرافگاكم فوگ دومه وما يصد للجوه

انتو يا وصف الحنان
گبالي انتو بكل مكان
الله لا يحرمني منكم
ابقو يمي ابكل زمان

انتو شامه عله خد وجه السمه
وانتو عين الگمر وانتم مبسمه
انتو يا انصار گلبي ويا احنان
امي تتنومس باسمكم فاطمه

هلله هلله انصاري خوش ازلام

*

علي محمد النصيري

جاسم امير ابعرش الحرب
متعلمه ايده اتسل بالضرب
وببيرغه لو شد جبهته
امخازر عركته لمن يطب

سهله المعارك عنده وزغيره
يسحگ عليهم دوسه ابحصيره
العركه التعسر يمه يسيره

يا قاسم مدد يا قاسم مدد

*

يشبه عمامه هيبة جبل
قاسم يخوف لمن نزل
چنه ابو فاضل لمن يطب
هوه الفحل من سابع فحل

هوه المراجل من اهله تطلع
زوده ابعمامه للغيره منبع
ناره الچبيره ماضنهه تشبع

يا قاسم مدد يا قاسم مدد

*

وينه اليزامط صوته اعتله
وسنطه المعارك نص كربله
گال الهم انه الزلمه اجيت
بالقارعه ابدي وبال زلزله

اية حرايب بسم الله طبهه
من الاعادي اتبرت رگبهه
سهله المعارك ماي وشربهه

يا قاسم مدد يا قاسم مدد

*

ليلة زفافه عاف العرس
عنده المعارك حلوه وأنس
يحچي اويه عمه الموته عسل
والعركه لجلك راحة نفس

شايل هويته ابصمصامه سيفه
ديوانه باشط والرگبه ضيفه
يشرد العساكر يمشي اعله كيفه

يا قاسم مدد يا قاسم مدد

*

يتلاوه ويه الموت ابخلگ
وچفوفه توجع لمن يطگ
ناره الچبيره اتچوي السمه
ليلاگي وجهه يوج يحترگ

عيونه اتجادح چن بيهه جمره
واليدنه يمه يكسرله ضهره
خوفهه كلهه بس وجهه گمره

يا قاسم مدد يا قاسم مدد

*
علي محمد النصيري

علي الاكبر غيرة الله ومرجله
علي صگار الزلم نص كربله
سيفه لمعزب رگب چلمة هله
دنگو گدامه بس هوه اعتله

ابو دم الشايط
يسل سيفه الباشط
بالرگب يتلاعب
شرط عل دم شارط

منه والله ونعم
ابخزره يچتل زلم
هوه غيره ومدد
علي الاكبر شهم

علي الاكبر يا مولاي

*

شاب بس وكت العرك خبرت دهر
علي متعلم اساليب الگمر
لون طبو بالحرب ضهر ابضهر
گول ضهر الگاع بالدبچه انكسر

علي هيبة شارب
من يطب يحارب
العده تتراجف
لون يدخل غاضب

هوه هيبة جبل
عينه تحله ابزعل
ابمهره يرعب رعب
اويسطر امنرتجل

علي الاكبر يا مولاي

*

زلمه غيرة راسه تجادح جدح
شمس تاخذ من ضوا لو حل صبح
شرد اسولف عنه مايكفي الشرح
علي طول ابطول يتلگه الرمح

بطل وابن الساده
هيبه شمرت قاده
تچوي نضرت عينه
لو يحل اعناده

ابطبته ماكو هوه
بيده يحله الوه
ضلمه تصفه الحرب
وجهه ينطي الضوه

علي الاكبر يا مولاي

*

قالع البيبان جده حيدره
ابطرف عينه والله تلگه الاخره
صوته يتراعد رعد چن زمجره
الجيش كله ابطبه وحده بعثره

چفه غيرة هاشم
عل رگب ضل حايم
يفطر ابطگ سيفه
لون تلگا صايم

هوه زود وشرس
نوره بچه الشمس
عنده بيته اوهله
خدر يُمنع لمس

علي الاكبر يا مولاي

*

راسه بركان ايتهايج لو غضب
علي الاكبر ابنَ قتال العرب
سيفه مثله يهوه تگطيع الرگب
ايده سل اتسل تراهو لو ضرب

يهوه لمعت سيفه
بيده ياخذ حيفه
والشرد گدامه
ايكتله حته ابطيفه

علي ما ينلحگ
ابچفه يصفگ صفگ
جمره عينه تشب
ابخزره يحرگ حرگ

علي الاكبر يا مولاي

*
علي محمد النصيري

ياخويه رد ضهري انكسر
خليت اخوك ابلا ضهر

ياخويه ردلي وحاجيني
يل افداك اسنيني وعيني

بقيت اخوك ابلا ضهر

*

بقيت اخوك الوحده ودموعه تجري ابخده
عباس ردلي ابغربتي باب المفارگ سده
ذبلت اعيوني امنالبچي ذبلت ذبول الورده
ردلي يخويه امنانولي ياهوه اخوك ايسنده

رد ليه يا ردة نفس
ردة سجين امنالحبس

جاوبني يا كل اسنيني
يال افداك اسنيني وعيني

بقيت اخوك ابلا ضهر

*

لا توگع اتوج خيمتي والخوه اصل الوگفه
گلبي وگف وي طلعتك كلش حنين اتعرفه
اليرسل رساله امنالگلب روحه يحطهه ابضرفه
وانته العزيز التنعشگ يال اعز من الخلفه

امنيتي تبقالي ذخر
ترضاهه يوليني الشمر

ياخويه الفرگه اتبچيني
يال افداك اسنيني وعيني

*

ياكافل اختي ومفزعي بعدك تموت الخوه
لو تمشي مني وتبتعد هاذه النفس ما يسوه
من توگع ابصف النهر من الوجع اتلوه
عباس ياخويه النفس بعدك يمر بالگوه

والخوه ما اگدر تره
هاي العده لزمو سره

نيران افراگك تچويني
يال افداك اسنيني وعيني

*

فگدك يشب بيه الجمر ويهيج المنخمده
هل دنيه جابت حرمله وطولك عليه اتبعده
اليفگ اخو احزام الضهر غير الكسر ماعنده
ارجوك ابقه ابخيمتي هاذ الطلب لترده

ابقالي يا هيبة جبل
يا مرجله ابوكت الزعل

ياهوه البعدك يحميني
يال افداك اسنيني وعيني

*

واخر محاطات الوجع نتلاگه يم الضفه
واعدني نهر العلگمي موش الدمع لتنشفه
نتلاگه وبعينك سهم وتوجع وما اشفه
ما چنت اضن هيچ الگمر يم النهر ذب چفه

گلبي يطگ امن الألم
فگدك نشب بيه سهم

بعدك تتبده اصواويني
يال افداك اسنيني وعيني

*

علي محمد النصيري

خل احچيلك امصيبه
طاحت عل ارض شيبه
شفت طايح چبير الگوم
حافر فرهد الهيبه

ابچي حگ بير طايح اچبير كونك اتحير حته تفهم
ابچي اله ادموم وحده يحوم يوگع يگوم ابچي من دم

طايح چبير الگوم وينازع
يرفس الوحده البلثره واگع
وفوگ الهضيمه الچوت دلالي
حافر فرس بضلوعه ضل طابع

عله الغريب واويلي

*

طايح والوجع ضالم
فوگ الغبره ضل نايم
واگع كل جزأ بمچان
يشبه حنة القاسم

واگع اوحيد والاخو ابعيد خنصر الأيد چنه مگطوع
گلبه يچوي ترجف ايدي كلشي ياذي وحده يلوع

نص كربلاء امطشره احروفه
والحاء فوگ الرمح بالكوفه
حته اخته حارت شنهي شتسوي
اتعوف الجسد لو راسه لتعوفه

عله الغريب واويلي

*

وجهه امگابل الگمره
تلمع عينه چن شذره
من فوگ الرمح لحسين
دمه يطيح من نحره

نحره مرفوع صب الدموع دگ الضلوع طايح الزود
وجهه يندار نحو الزغار كلشي بي صار طگه عامود

صوب اليتامه عينه دايرهه
ويشوف بنته انكسر خاطرهه
فوگ الرمح ودموعهه هماله
اگلوب اليتامه ابراسه كاسرهه

عله الغريب واويلي

*

راسه يحاچي بالغيمه
كسرانه وعله ضيمه
من فوگ الرمح راسه
وگع عل گاع ابو الشيمه

وگع بلگاع والخلگ ضاع من الاوجاع هضمه ياناس
غبرت الكون تطب بلعيون واهله يبچون
كسرة احساس

وجهه تجرح من وره الطيحه
ومن طاح راسه گبت الصيحه
عرفو مكانه من وره عطره
وتراب نحره محد يزيحه

عله الغريب واويلي

*

دخلو للقصر نحره
ويزيد يباوع الشعره
يگول ابسرعه اجاه الشيب
شيب من وگع ضهرله

شيب الراس والله ياناس عله العباس بال مصيبه
فاتح العين لهله لحسين يشوفهم وين
يا عجيبه

ينضر عله اخته وهيه بالوعه
اثار دم ابخدهه مصفوعه
ابديوان اميه تهتز اشفافه
ومن عينه گالو تنزل ادموعه

عله الغريب واويلي

*
علي محمد النصيري

شفتك من بعيد اتريد عوانه
وكلهم راحو ومحد بقه ويانه
اول قائد ابعركه يصيح ابصوت
وماكو احد يسمعه امخشب السانه

هبت ريح صفره وفطرت شفتك
عيني اتشوف بس امنيتي ماشفتك
شيخ اوحيد وطاحت كلهه طايفتك
چا شيصير گلب البلخيم اختك

شفتك وحيد اتفزع ومابيهم احنين
وقائدهم ايگلهم يموت الينصر حسين
ونسوانه راح اتروح غربه اتطب دواوين
ياليلة العاشر يگلبي اتذل نساوين

انعاك والونه خفيه
كون الجرالك خويه بيه
كون انكتل وامشي سبيه

حسين حسين ياخويه
*

وضعك يستحق الدمعه و الحرگه
اگبالي الوحدك بس والله ممصدگه
وشفتك من هويت امنل مهر للكاع
چن فصل الخريف ايطيح الورگه

والميمون نيته بميلته ايعدلك
والرمايه كلها امحزمه لكتلك
طحت ابگاع بس ابصهوتك رجلك
منضر ضيم رجلي اتريد توصلك

رجلك امچلبه ابصهوتك والمهر يحتام
هل منضر يچوي الگلب واقسه امنالف شام
وفوگ الوجع نص كربله يرموك بسهام
طايح حنين ابنص عرب مابيهم ازلام

هاذ الأمر خلالي عله
عگده الجره مابيه افله
يل طيحتك ضربتني نبله

حسين حسين ياخويه
*

يل هدو عليك اهواي بالهيمه
وعيني اتواردة بالدمعه وي غيمه
وغدر بيه النضر من كثر الترابه
ها يا كسرت الخوان ياضيمه

شنهو الصار ما اعرف شنو اليجري
گلبي ينوح ياخويه اشكبر كسري
من حاطوك شفت اهواي دم يجري
منك هاذ منهم خويه ما ادري

من خفت الغبره وشفت جسمك يمدلول
مسلول سل امنل وجع يا سيف مسلول
امن الزهره خويه هل جسم شابع دللول
معقول تتلملم عليك الناس معقول

بيه الوجع ياخويه هضمه
وضليت وحدي خويه حرمه
من اكتئابي الدنه ضلمه

حسين حسين ياخويه
*

امدربيهه الخيول اعليك مسراهه
واقسه امنالجبال اتدوس حذواهه
الخيل الاعوجي معروفه الامه
وسناسل من حديد انوب فوگاهه

من داسوك وانته امطشر ابهيمه
صوت اعضام صدرك خويه بالخيمه
خويه حسين ياجرح الگلب ضيمه
شب نيران بيه وهيج الچيمه

هدو علينه وبل خيم عدوانك اتحوف
علتله خويه انه اركضت وتوچدك شوف
نيرانهم وسط الخيم خلوهن اتطوف
حسين ما ضلالي كافل ضحه بچفوف

ياخويه خنگه وبيه صرخه
هاذه الشمر نضراته وصخه
المابيهه ماي وگصته صبخه

حسين حسين ياخويه
*

يا شلعان گلبي الدنيه مو هيه
يشيلوك ابرمح وانه امشي مسبيه
وتمنيت خويه النضر كون يروح
چي نحرك ابرمحه يباوع اعليه

يا بو الخير نحرك وزع ادمايه
وكسرك زاد غربه الشالت الرايه
شلون ايصير هزله اتصير ممشايه
وفوگ الضيم انطگ من وره ابچايه

يضربني گدامك يخوه الشمر بالسوط
وبل ممشه اتراجف رجف رجليه انه اتروط
وعدوانك ابگيد السبايه اتحوطت حوط
ترضاهه ياخويه العليل ابحبل مربوط

هاذه الجرالي وانته سكته
راس ابرمح گلبي يفته
حسين الحنين انضربت اخته

حسين حسين ياخويه
*

علي محمد النصيري

خويه ادخل الهه وخل ترف الرايه
وخلي النهر يتبره من يم مايه

*

يا كافل اختي من تطب اعليهم
خلي الزلم ترجف رجف رجليهم
زلمه وشجاع اعرف تره اتبچيهم
وابخنصر ايدك كلهم اتلاويهم

ابعين اليضدك انته صح سلايه
خويه ادخل الهه وخل ترف الرايه

*

نشمي اوشجاع اوغيرتك حراگه
سيفك لذيذ ايموت كلمن ضاگه
امشابگ ارگاب ابسيفك امنتلاگه
حته النهر ريجه نشف وارياگه

خلي التهلهل تنگلب عزايه
خويه ادخل الهه وخل ترف الرايه

*

هاذه الشمر منخوفه تيه حلگه
يسمع ابسطراتك وخاف اتصفگه
غير ابو فاضل انته چا مو حگه
يگلهم اشردو اليفر لا ميلحگه

كلهم اگلال وانته بس اهوايه
خويه ادخل الهه وخل ترف الرايه

*

عيشهم انواع الرعب خوفهم
ابكل نخله يم العلگمي چتفهم
كون النهايت كربله اتوصلهم
محد يجيك ايواجهك وشحدهم

خلي الشمر منك يدز شچايه
خويه ادخل الهه وخل ترف الرايه

*

من تدبچ ايطگ بالضهر زلزالك
خويه المراجل بس الك تحلالك
سبعين الف اسحگهه جوه انعالك
يكحيل يل يهوه الحرب دلالك

يل ما تردني وما ترد احچايه
خويه ادخل الهه وخل ترف الرايه

*

علي محمد النصيري

دمعه انزلت من الجفن
من گلبي طلعت هايه
طف كربله شب الحزن
من طاح راعي الرايه

طاح الشهم
يا ربي واقع لو حلم
من التفت گمت انلچم
طاح الشهم

يا كربله
هاذه الوجع وش يحمله
طيحتي كون بأكمله
يا كربله

راح اخوي و سند ضهري
يا كربله اشسويتي الي
اخذي روحي ولا ابو فاضل
ياهوه يكفل بت علي

يا خويه عباس. يا خويه عباس. يا خويه عباس

*

دنيه انتهت ما ضل امل
كلشي انتهه واذاني
راح الشهم راح البطل
نص كربله خلاني

يا وحشتي
راح البقه من اخوتي
صركالي حامل رايتي
يا وحشتي

وين انتچي
خلاني وحدي اويه البچي
فگد الاخو لا مو حچي
وين انتچي

وشتريد الناس مني
اخذو اخوي اوبسمتي
حيلي راح وكلشي رايح
ومن يمي راحت طاگتي

يا خويه عباس. يا خويه عباس. يا خويه عباس

*

يا كربله ابوكت العصر
چان الاخو ايسليني
وهسه الوكت مثل الجمر
و سبللي دمعة عيني

مر الوضع
من صدري احس فاگد ضلع
و بعيني يتراكض دمع
مر الوضع

ادلالي انچفن
هذا الأمر بچّه الحسن
و تغربت نص الوطن
ادلالي انچفن

كربله هل دنيه مره
و شلون اعيشن من سواه
اتفقنه الموته وحده
چا ليش اموتن من وراه

يا خويه عباس. يا خويه عباس. يا خويه عباس

*

يا كربله اخذي الهوه
هاذه الهوه ماريده
خلينه بس نرجع سوه
و خل ايدي تلزم ايده

ما حرگتچ
دمعاتي چا ما هزتچ
ليش التزمتي ابصفنتچ
ما حرگتچ

راح الوفه
يا كربله و العاطفه
وجّر دليلي و ما دفه
راح الوفه

جرحي ياكل حيل بيه
الحيلي منه بساعه راح
العمره ما گايلي خويه
من گلي خويه وياها طاح

يا خويه عباس. يا خويه عباس. يا خويه عباس

*

ظهري انحنه و صار الوجع
ياكل اكل دلالي
يا كربله گلبي انشلع
و بحضني مات الغالي

اخ اشصرت
مو هوه انه الي متت
و بطيحته انه الطحت
اخ اشصرت

طولي انحنه
اللحظه تمر بيه ابسنه
شمحلاهه من هوه و أنه
طولي انحنه

هوه هذا الخفت منه
افگد اخوي و صارمي
كربله و اشصار بيه
احزامي ارتخه اعله العلگمي

يا خويه عباس. يا خويه عباس. يا خويه عباس

*

علي محمد النصيري

انه ذيچ الطفله الميتمينهه
انه ذيچ الأمهه سطره ابعينهه

انه بيه الهضمه شبت نارهه
انه شفت امي تودع ازغارهه

انه زينب انه زينب

*

امي چانت مسكني
وابحضنهه موطني
شلون اودع حضن امي الديره

امدللتني امن الزغر
چان ما يمشي العمر
وماتت امي وهسه صرت اچبيره

احجابي چان اتعدله
وچنت يمهه امدلله
ومن وره الباب انه عشت الحيره

حسرتي من بعد امي تريد حيل
وحشه صار البيت كله كون اشيل

امي شالت بعد شلي ابدارهه
انه شفت امي تودع ازغارهه

انه زينب انه زينب

*

الباب غربه اتعتبه
وامي ماهي امحجبه
ودفعو الباب وتغشت بيدهه

ارد اعيدنهه ابحزن
انطبگ طبگة جفن
وعصرو امي ومنهه طاح اوليدهه

صوت امي اليا سمه
صاحت انه فاطمه
وأن گالو والعصرهه يعيدهه

تنعصر چم مره وتطگ الضلوع
گوه گام اتجر نفسهه وبس تلوع

الباب دخل بالضلع بسمارهه
انه شفت امي تودع ازغارهه

انه زينب. انه زينب

*

السطره وحدهه وجع
منهه دلالي انشلع
الطگهه كون الباري يسطر عينه

اعله الطفل ضهري انكسر
وضحكه اسمع من عمر
يگلهه ها يا فاطم ابنچ وينه

الباب متروسه حطب
هايه فاطم يا عرب
العله الباب البايع اصله ودينه

امي خلف الباب بس مابيهه روح
المنضر ايگطع دليلي وخلني انوح

الهده هوه الثاني صح فيارهه
انه شفت امي تودع ازغارهه

*

ومن بعدهه امي التوت
امحدبه لمن مشت
انه اشوفنهه وتضيج انفاسي

اسألهه ويهل الدمع
يوجعچ يمه الضلع
وهيه تتبسم وتمسح راسي

اتگلي لا ما بيه شي
واگدر انه اعله المشي
وهيه تحچي وما يصدگ احساسي

ادري امي اتگلي هيچي خاف اخاف
وهيه واضح بالضلع بان انعطاف

امي ما گالتلي شنهو اخبارهه
انه شفت امي تودع ازغارهه

انه زينب. انه زينب

*

امدده فوگ الفرش
صارت ابثگل الرمش
وامي طلبت من ابوي اولادهه

بالدمع يحچي الحسن
صيح ادلالي انچفن
والحسين ايبوس بيهه وگادهه

يگلهه يمه ابقي الي
هل حچي موت علي
وعلي ما يگدر تره اعله ابعادهه

حچت چلمه ضججتنه بالنحيب
ابليله ضلمه ادفني يا اعضم حبيب

وذبلت الزهره ابحضنهه ازهارهه
انه شفت امي تودع ازغارهه

انه زينب. انه زينب

*

علي محمد النصيري

تنزف روحي من يا مطرح اتريد
باچر رايحه اتطيح الخواچي
زينب انه لاچن مالي كل راي
باچر رايي بس حزن و بواچي
راح ايروح مني الوجهه ينهاب
الينگط مرجله ابوكت المحاچي
باچر من خيمنه اتطيح عمدان
وتاخذ كربله منه التراچي

عله البال تضل دوم چلمة انه رايح
والحسين يالحسين گلبي اعليك نايح

*

ليش الما تريد اخوانهه تروح
تلگه الموت بالزردوم حاشر
عشرتنه احنه حلوه خويه يحسين
لا تجبرني بس دمعات اعاشر
اخر ليله ليش اتذل اللحنان
ماريد اوصل النجمات عاشر
ليش اوصل اللحضة انته مطروح
وذباحك اشوفه ابسيفه ناشر

يالحسين الاحنان ليش اتروح غفله
ترك حيل بالضلوع رايح والچن الله

*

زينب ما تهيس جرح الابدان
بس جرح الگلب بالروح اجيسه
المسافر يقيس ابحسرته اميال
جرح اگليبي گلي اشلون اقيسه
مو حلوه المفارگ بين الاخوان
الله يعين اليفارگ انيسه
بين اذياب عايف اختك اشلون
يم الذيب ما تسلم فريسه

بالعيون يشوفون طول امخدراتك
يالحنين يضربون كلساع ابخواتك

*

امشي امحدبه وبيه التعب راك
اول سنبله ابشكل المناجل
حر الگاع يحرگ واحنه حفاي
واحس ابرجلي هل تربان تاكل
واذا علنوگ نصعد توجع النوگ
تهد الحيل مسراهه الهوازل
خويه اختك چبيره وعمري خمسين
من الممشه توجعني المفاصل

يضحكون يشمتون من اتطيح وحده
يضربون يالحسين ذباحك تعده

*

خويه السوگ فشله واحنه نسوان
هاي الناس بس النه تناضر
من يم الشتايم گلبي محروگ
چلمات الشتم چنهن بواتر
نسوانك انذعرت من وره الناس
وحجار وسياط ابأيد كافر
خويه السحگتك گدامنه اتفوت
ودمك هوه هوه بالحوافر

يگولون تدخلون ديوان ال اميه
يالحسين والتموت يم راسك رقيه

*

علي محمد النصيري

حان وقت اذان جرحك ياعلي
ولل يتامه بعد ياهو يضل ولي

لا تروح اوتترك ايتامك وحيده
ابقه يمنه ونفتتح صفحه جديده

يا علي

*

مو وكت مولاي جرحك
ابقه يمنه چنه نضحك
والله يا مولاي تجرح
من تروح ويغفه صبحك

ابقه يمنه اتعودينه اعله الدلال
لا تسافر فدوه رد النه تعال
جرحك اياذيك واقع لوخيال

ايتام سهرت ما تغمض هالجفن
اليل يگضونه ابدعاء اهل الحزن

خلگ ايتامك مجاعه وماكو صيده
ابقه يمنه ونفتتح صفحه جديده

*

والله يا مولاي صعبه
ايتامك يضلون غربه
فدوه قاوم بس لجلنه
نار فگدك لا تشبه

انهض وخلينه بحضانك حنان
ماكو مثلك لينه يبقه بهل زمان
يالصرت انته ابمحنتك ترجمان

انته يا معجم بحر اهل العلم
نضرة اوداعك يحيدر چن حلم

انته يارحمت الباري خلهه بيده
ابقه يمنه ونفتتح صفحه جديده

*

گوم لا تتركنه لچمه
گوم يله الحيل لمه
نستمد النور منك
لا تطيح اتصير ضلمه

گوم لا تضلم الدنيه وبينه خوف
والله ايتامك ابابك بس تطوف
گوم حيدر مو عمينه خل نشوف

انهض الوحدك مثل وگفت وتد
طه ماكو وهاي طبره مو رمد

كلمة الله وياك بويه اشگد شديده
ابقه يمنه ونفتتح صفحه جديده

*

حيره عاشتهه اليتامه
ليلة اوداع ابتسامه
واليتيم اشلون يحچي
اوداع اليعلمه كلامه

ياعلي ايتامك تناضر بنكسار
واحد يسولف للاخر شنهو صار
والبن بچفوفهم كل الزغار

اختنگنه خنگة امفارگ وطن
اتلملمينه ابطوس صرنالك لبن

اترد علينه هاذه كل الي نريده
ابقه يمنه ونفتتح صفحه جديده

*
بويه كون الطبره بينه
طبرتك مسره سفينه
عله اچفوفك شفنه دمك
هاي الچفوف الحنينه

دمك اعله امچان سجداتك يطوف
ومحبسك بي هم اثر دم الچفوف
ابن ملجم حسه خله بينه خوف

الطبر راسك چان من يمنه يتيم
اتلبسه جدد والحسن يلبس قديم

وبثياب مرگوعه الحسين يگضي عيده
ابقه يمنه ونفتتح صفحه جديده

*

علي محمد النصيري

خلگ شاعر سولف بيك لهل الگاع
فعل حاضر علمك ابد لا ماضاع
ابو الشيمه يا مشداد ضهر اسباع
العلم شاطر چي علمته الك ينصاع

سوره قارعه يا بحر الانوار
يا كشخة محمد راسك الحار
ياوسع علوم الدنيه والدين
تعلم بالخفايه وكل الاسرار

العلم خريج مدرستك
تعلم كل حچي شفتك
تصفن كل علوم الكون
من اتگول سالفتك

علي علي يابه الحسن

*

علي ابسيفك ماخذ للاسلام احگوگ
تره ابكيفك تخيط لو تشگ احلوگ
جمر لاهب خزراتك تيبس اعروگ
ترد حيفك بيهم تضل بس اتسوگ

حيدر يابطل يا كعبة الصيت
يالترسم ربيعك وين حطيت
ياسياف يالبيك الوصف حار
تمطر روس لو بالعركه طبيت

ترعد من طرف عينك
غيرت الله بايمينك
يا عامود كل الدين
الصلا توصفهه چفينك

علي علي يابه الحسن

*

عشگ ربنه چذبه الگالو ايعبدوك
صدگ حبنه والعبدوك ما حبوك
الك عبدو لاچن والله ميعرفوك
يبو الجنه ندريهم صدگ اذوك

مابيهم صدگ كلهم چذاذيب
واحچيلك احچايه وگلبك يطيب
يالمتبري منهم واعرف اشلون
مثل دم يوسف المنه بري الذيب

اعرف بيك تكرهم
اولو بيدك علي اتشلهم
بس گلبك ولا ينطيك
اتريد ال الله تسحبهم

علي علي يابه الحسن

*

وتد واگف حته اتحامي عن الدين
بحر ناشف مليته ابخلگ يابو حسين
يبو اليمه يا معشوگ شوف العين
العدو خايف يابو السيف ذو حدين

يا زلمة الدين الوحدك جيش
السيف ابيمنتك يتناشغ افيش
الرگب تحچي اعله طگتك يابو عباس
حيدر طگته عدله وما يطگ طيش

ملعب للرگب سيفك
بيدك تاخذ ابحيفك
تگل للرگبه طيحي اتطيح
وتگلك علي ابكيفك

علي علي يابه الحسن

*

شنو يوصفك ضيعت الحچي ولوصاف
العدو يعرفك ما يدناك چيف ايخاف
شريد احچي شسولف ما احس انصاف
بهر چفك لو يطبر يطخ لچتاف

يامن سيفه مايتلاگه بگراب
يمرجف اليهود ابقلعة الباب
يا صنديد يامن خوف الخوف
يا فحل المراجل انته ابو تراب

عدوك انته خناگه
يابو سيوف براگه
ياهو يريد ملگه الموت
خلي وياك يتلاگه

*
علي محمد النصيري