***
Бу боғда ҳушини  йўқотар шамол,
Чўчиб кетмасин деб аксирмайди куз.
Дилдирар олмалар навжувон мисол,
Бир тушса, сўнг яна қарайверар кўз.

Сездирмай сайр этар завқ ва ҳаяжон,
Япроқлар бағрида титроқ ўрмалар.
Қизлар кулгисидан уйғонади боғ,
Бандидан узила бошлар олмалар.

✍ Баҳодир БАҲРОМ

👇👇👇
https://hottg.com/eng_suluv_armon

Adiblar ijod haqida

    ***
   "Katta she’rlarni o‘zimning tajribamdan aytaman, bir o‘tirishda yozib tugallash qiyin. Unga odamning nafasi yetmaydi. Bo‘lib-bo‘lib yozish ham qiyin. Bu bir syujet bo‘lsa ekan, davom ettirib ketaversangaz. Agar hazilroq qilib aytsam, bunday she’rlar yo‘talga o‘xshaydi. U tutishi kerak. Tutmasa, qasddan yo‘talsangiz, yo‘tal chiqmaydi. Yo‘tal o‘zi ichdan qo‘zib chiqishi kerak. Shuning uchun shu besh-olti yo‘tal mobaynida, katta  she’rlarni yozib tugatganman. "

    Abdulla ORIPOV
    ————————
    Адиблар ижод ҳақида

    ***
    "Катта шеърларни ўзимнинг тажрибамдан айтаман, бир ўтиришда ёзиб тугаллаш қийин. Унга одамнинг нафаси етмайди. Бўлиб-бўлиб ёзиш ҳам қийин. Бу бир сюжет бўлса экан, давом эттириб кетаверсангаз. Агар ҳазилроқ қилиб айтсам, бундай шеърлар йўталга ўхшайди. У тутиши керак. Тутмаса, қасддан йўталсангиз, йўтал чиқмайди. Йўтал ўзи ичдан қўзиб чиқиши керак. Шунинг учун шу беш-олти йўтал мобайнида, катта  шеърларни ёзиб тугатганман. "

    Абдулла ОРИПОВ

* * *
Бизни унутқонни унутмоқ керак...
Заҳириддин Муҳаммад БОБУР

Олислаб боради алвон қизғалдоқ,
Шамолда тўлғониб боради кўйлак...
Сулаймон олдига келармиди тоғ,
“Бизни унутқонни унутмоқ керак”.

Тасалли излайман, шеър варақлайман,
Шоҳ байтлар остида мағрур бир юрак.
– Унутмайман, деди, – ўзни оқлайман,
– Бизни унутқонни унутмоқ керак.

Бу вассали уйни топгайми висол,
Юлдузлар боқгайми бир бор жонсарак!
“Ахир, у вафога ягона тимсол,
Бизни унутқонни унутмоқ керак”.

Умрим саҳросидан ўтди кўп карвон,
Қўнғироқлар берди соғинчдан дарак.
Кўнглим – устуни йўқ ғариб бир айвон,
“Бизни унутқонни унутмоқ керак”.

Китобни ёпаман, шивирлайман, оҳ,
Шамолда тўлғониб боради кўйлак,
Олислаб боради алвон қизғалдоқ...
... Бизни унутқонни... унутмоқ керак!

✍ Баҳодир Баҳром

👇👇👇
https://hottg.com/eng_suluv_armon

Абдулла Орипов

ЎКИНЧ
Рафиқамга

Ўтган фурсатларни бўлмайди тутиб,
Ўтган ўтди энди – буни билгайман.
Ва лекин гоҳида дардимни ютиб,
Тазарру қилгайман, тавба қилгайман.

Билмасмиз яхшилик келгайдир қачон,
Билмасмиз муддатин ёмонликнинг ҳам.
Кимнингдир омади чопса ногаҳон,
Кимнидир пойлайди ташвиш билан ғам.

Қай замон бир тўда зотлар бешафқат,
Гуноҳсиз Инсоннинг суғурди жонин.
Имконим бўлса-да этмадим журъат,
Мен ўша шўрликнинг олмадим ёнин.

Мудом хуш кўргаймиз лутфу хандани,
Бироқ, бир ҳолатга гувоҳ бўлганман:
Масхара қилишса ожиз бандани,
Даврага қўшилиб, мен ҳам кулганман.

Кимнингдир дардидан бўлмадим огоҳ,
Комил этолмади бирорта мактаб.
Бир шоир дўстимнинг олдида ногоҳ
Бошқа бир шоирни қўйганман мақтаб.

Ўтган кунларимга ташлайман назар,
Ҳар нечук, биз уни яшаб ўтганмиз.
Тақдир бошимиздан сочмаса ҳам зар,
Жоним, шу кунларни интиқ кутганмиз.

Узоқ сафарларга сенсиз йўл олсам,
Мени койимадинг, кўнглим тўқ эди.
Қайдадир тентираб, агар кеч қолсам,
Мен ўйлаб топмаган сабаб йўқ эди.

Кечалар термилиб ойга, юлдузга,
Қоп-қоп ваъдаларнинг тошини тердим.
Йўқчилик азобин илмадим кўзга,
Бахтлиман дедим-у кўксимни кердим.

Бу кун шеър битурман шукрона айтиб,
Дардкаш қаламимни қўлимдан қўймай.
Билурман, ёшлигим келмайди қайтиб,
Ҳануз дийдорингга боқурман тўймай.

Аллоҳ тўзим берсин бардош, сабрингга,
Баъзан ўкинч билан бағрим тилгайман.
Айтгил, етолдимми Сенинг қадрингга,
Тазарру қилгайман, тавба қилгайман.

✍2009 йил 22 сентябрь

@abdullaorifijodi

Усмон ҚЎЧҚОР

Ўт тушган саҳрога бошлади йўлим,
Куйди дил, куйди дил... Куйиб битмади.
Юлдузларга етган менинг бу қўлим
Ёнгинамда турган гулга етмади.

Ойсан – мен заминда ёполмаганим,
Кўнгилда илоҳдек тутганим менинг.
Излаган кунимда тополмаганим,
Кутмаганда келган кутганим менинг.

Худойимнинг мендан яшириб, мубҳам
Қайси сандиғида ётган сирисан?
Дафъатан келаркан бахт ҳам, бало ҳам,
Билмайман, гулим, сен қайси бирисан.

Кўрдим мен тақдирнинг қасос олганин,
Розиман, мен ҳамма нарсага шайман.
Ўтган умрим ўтди... Аммо қолганин,
Хонгулим, мен сенсиз қандоқ яшайман?

Хаёлингда менга жаннат тўрт тараф,
Оловинггда ҳечдир дўзаҳ деган чоҳ.
Сени севмоқ наҳот шунчалар шараф,
Сени севмоқ наҳот шунчалар гуноҳ?..

hottg.com/mensevgansheriyat

"Fayzli kun" dasturi ijodiy jamoasiga rahmat!

Kecha "Qashqadaryo" televideniyesida sheʼr, adabiyot va hayot haqida suhbatlashdik.

👇👇👇
https://hottg.com/eng_suluv_armon

26-апрель Ўзбекистон халқ шоири Муҳаммад Юсуф таваллуд топган кун (1954–2001)

Бор бисотим

Бор бисотим олди ёшлигим,
Юрак шунга кўнди-ю кетди.
Ёдда шундай қолди ёшлигим: 
Қуш дарахтга қўнди-ю кетди.

Демак, дунё чиндан тор экан,
Демак, видо куни бор экан,
Тушиб келдим ойнинг олдидан,
Ўт бир ёниб сўнди-ю кетди.

Дунёда энг катта бой эдим,
Гижинглаган асов той эдим, 
Шарқираган тошқин сой эдим,
Сувим совиб сўнди-ю кетди.

Етишмайди менга не жиҳат? 
Аллақаерларимдур диққат.
Ўша қомат, ўша бўй, фақат 
Юрак чил-чил синди-ю кетди.

Дўстларим кўп эди, дўсларим.
Кескир-кескир эди сўзларим,
 Хира тортиб қолди кўзларим, 
Сочга қиров инди-ю кетди.

Дарахтга қуш қўнди-ю кетди...

✍ Муҳаммад ЮСУФ

👇👇👇
https://hottg.com/eng_suluv_armon

ТУЙҒУЛАР ИСЁНИ

Булбуллар сайрайди менинг боғимда,
Юлдузлар – қисмати улғаймас ойлар!
Алпомиш келбатли тоғлар бағрида
Барчиндай солланиб оқади сойлар.

Шабада – руҳимнинг эрка синглиси!
Сочингни қирқкокил ўрмоққа шайдир.
Сени чўчитмай деб, ёруғ дунёда
Кўринмай яшайдир, кўнмай яшайдир.

Сен эса,
Тоғларга боқасан узоқ,
Хўрсиниб қўясан, озодлик хоҳиш.
Диққат қил!
Жонгинам, ахир боғимда
Сен учун булбуллар айлайди хониш.

Суманбар бўйингдан,
Райҳон бўйингдан,
Ўргилай, кўнглимнинг баҳори, ёзи.
Кипригинг тебратиб чалган куйингдан
Васлинг истаяпман орзиқиб, озиб...

Денгизми, осмонми бу мовий кўзлар,
Термулмоқ осонми?
Бу мовий кўзлар
Ёндирар жонимнинг қат-қатигача,
Ё Тангрим, еткургил шафқатигача.

... Булбуллар сайрайди менинг боғимда,
Худойим баҳордан тутмагин айро.
Алпомиш келбатли тоғнинг бағрида
Барчиндай солланиб оқади дайро.

✍ Баҳодир БАҲРОМ

👇👇👇
https://hottg.com/eng_suluv_armon

ИМДОД

Кетди дегин?! Кетганлар қайтмас бўлиб кетарми?
Ёки юрак дардини айтмас бўлиб кетарми?
Қанотсиз парвоз этиб, сармаст бўлиб кетарми?
Кетар одам кетарда сарбаст бўлиб кетарми?
Азобим жондан ўтди, оғу бергин, художон,
Мангулик куй яратар чолғу бергин, художон!

Бир хаёли шердаю, ҳам оҳуда дунёси,
Билмам қандай яшайди жим, осуда дунёси.
Унутгани йўқ ҳали бу олифта дунёси,
Омаднинг келмай гали заб ошуфта дунёси.
Севгиданда улуғроқ туйғу бергин, художон,
Мангулик куй яратар чолғу бергин, художон!

Кўзёшнинг қуйқасига жоним қўйилганмиди?
Навраста капалакка қоним қуйилганмиди?
Борки, инсон аталмиш собит туюлганмиди?
Дўстлар, бизим исмимиз тошга ўйилганмиди?
Тошларга ҳам жон берар бурғу бергин, художон,
Мангулик куй яратар чолғу бергин, художон!

Баҳор ҳам топиб келди, турналар учиб келди,
Шамол кўзи очилмаган гулларни қучиб келди,
Дўстлар гап орасида “вақт йўқ” деб қўшиб келди,
Ўттиз йилки, юрагим шу ғамдан чўчиб келди,
Берсанг, шеърга муносиб қайғу бергин, художон,
Мангулик куй яратар чолғу бергин, художон!

Эгилдим фақат сўзга, қилганим сўзга таъзим,
Ичимда шеър айқирар, бузай дейман қафасим,
Ўрдадами, Хадрада кезиб юрар нафасим,
Ўйлайман, жанубларда ўчиб кетмасми сасим,
Мангулик куй яратар чолғу бергин, художон,
Мангулик куй яратар чолғу бергин, художон!

✍ Баҳодир БАҲРОМ

👇👇👇
https://hottg.com/eng_suluv_armon

MUALLIMNING KO'MIRI
(Abduvosiq hoji ota Vahobov xotirasiga bag'ishlanadi)

BEK ALI she'ri

Tasvirchi: Kazibek Kurbanov
Ovoz rejissori va musiqiy sayqal: Elbek Hamdamov
Assistentlar: Bahriddin Shavqiyev, Nosir Otajonov

9-may Xotira va qadrlash kunida muallim ahlining qadrli, munosib vakillaridan birini xotirladik.

@bek_ali_ijodi
@erkinbozorovv

ТЕНГҚУРЛАРИМГА

Юрагингда портласа вулқон,
Тилинг тишлаб жим қоласанми?
Ўттиз ёшга кирган эй, ўғлон,
Озодман деб айтоласанми?

Шукур бўлсин юртинг-ку озод,
Қолгани йўқ ёвлар измида.
Қарамликдан ўртанар ҳаёт,
Вужудингнинг қай бир қисмида.

Қобирғалар аслида қафас,
Метинлашар жоннинг қасдида.
Ололмайин чин дилдан нафас,
Яшамоқ ҳам ўлим, аслида.

Кўчаларни кезасан беҳуд,
Беруҳ, бебуд боқиб оламга.
Торлик қилар сенга бу ҳудуд,
Ишонмайсан наҳот, қаламга?

Чўзиласан тўшакка ҳорғин,
Малҳам каби туюлар уйқу.
Келиб ўткир тирноқли лочин,
Юрагингга ташланар туйқус...

Улуғ халқнинг сен-эй, бандаси,
Сен ҳаммага ўхшай бошлайсан.
Шундай бўлар инсон эртаси,
Сен ҳаммадай яшай бошлайсан.

Нурдан гилам тўшайди бу йўл,
Дунё кечмас сендай дўстидан.
Минбар бўлиб учасан буткул,
Денгизлару, тоғлар устидан.

Чапаклардан тикасан қанот,
Ҳис этмайсан виждоннинг ўчин.
Мукофотар беради ҳаёт,
Халқ дардидан қочганинг учун.

Туюлади бутун бир умринг
Гулдай гўзал, гулдай муаттар.
Ҳис этасан одамларнинг энг
Улуғидай ўзни муқаррар.

Шундай ноёб истеъдод билан,
Озод бўлар эди ҳақиқат.
Шундай ноёб истеъдод билан
Сен-чи ўзни алдайсан фақат.

Ром этади сени алдовлар,
Ўйлайсанки, шу толе, тамом!
Шўх олқишлар, сохта мақтовлар,
Ҳар нигоҳда нурсиз эҳтиром.

Чидолмайман, қандай шодумон
Келаверар тинмай куйлагинг.
Қафасдаги шўрлик қушсимон
Инграйверса халқнинг юраги.

Дўст, орзуга бера ол тартиб,
Ҳар бандаки, ўз-ўзига тан.
Истагим шу, болам маддоҳ деб,
Уялмасин шу камтар Ватан.

Чўзилмагин энди тур, етар,
Раҳминг келсин шўрлик тўшакка.
Рутубату қаролик кетар,
Ҳақ сўз етса суяк-суякка.

Шиддатда ён, қуёшдай балқи,
Умид бўлиб уйғон ҳар саҳар.
Қай давлатким, озодмас, халқи
Одил сўзни айтмаса агар.

Бу миллатга ўгай бўлганлар,
Кўриб қўйсин чин фарзанд кучин.
Курашавер ўла-ўлгунча
Шоир дўстим, озодлик учун.

Тобутимиз ортидан абас
Умид каби, эй, шоир дўстлар,
Ҳурлик сўраб бўзламасин, бас
Занжирини судраган сўзлар.

✍Баҳодир БАҲРОМ

🕰 2019

👇👇👇
https://hottg.com/eng_suluv_armon

ИЛТИЖО

Шамоллар осуда эсиб турибди,
Табиат барчасин сезиб турибди.
Нохос пайдо бўлган йилт этган чақмоқ
Осмоннинг бағрини узиб турибди.

Ногаҳон хаёлдай эсган шаббода
Вафодор дўст бўлиб қуймоқда бода.
Ва лекин бу ақлим жим турмаяпти,
Руҳим боғларини қилар ихота.

Англадим, захматдан ҳикматдир пайдо,
Ҳикмат излаганлар роҳатдан жудо.
Худо деб ёлворган бандаларингни,
Бандангнинг қўлига топширма худо.

🕰 23.05.2025

✍ Баҳодир БАҲРОМ

👇👇👇
https://hottg.com/eng_suluv_armon

***
Маюс куним кўзим тушса,
Куяр осмон, тушунмайсан.
Мени само тушунгайдир,
Сен, эй инсон, тушунмайсан.

Куйиб кўксим ўтар бўлсам,
Оқар бўлсам, кетар бўлсам,
Мени дарё тушунгайдир,
Сен, эй уммон, тушунмайсан.

Мен ҳам шайдо, мен ҳам мафтун,
Мен ҳам ҳеч кими йўқ Мажнун,
Мени лайло тушунгайдир,
Сен, эй жонон, тушунмайсан.

Менинг йўлим узун армон,
Ўзим довон, ўзим карвон,
Мени саҳро тушунгайдир,
Сен, эй сарбон, тушунмайсан.

Менинг борим эрур кўнглим,
Менинг ёрим эрур кўнглим,
Маюс танҳо тушунгайдир,
Сен, эй хандон, тушунмайсан…

Маюс куним кўзим тушса,
Куяр осмон, тушунмайсан.
Мени Оллоҳ тушунгайдир,
Сен, эй хоқон, тушунмайсан.

Кўнглим гул, кўзларим гулдир,
Юзим гул, қўлларим гулдир.
Мени сабо тушунгайдир,
Сен, эй тўзон, тушунмайсан…

Ғуборимдир бўйи райҳон,
Миноримдир тилим бийрон.
Мени дунё тушунгайдир,
Сен, эй нодон, тушунмайсан.

✍ Муҳаммад Юсуф

👇👇👇
https://hottg.com/eng_suluv_armon

****

Қувончим, тинчим йўқ Ўзингдан ўзга,
Ҳеч кимга ишим йўқ Ўзингдан ўзга,
Бағримни эзолмас дунё қайғуси,
Ҳеч нарса, ҳеч ким йўқ Ўзингдан ўзга.


Мирзо КЕНЖАБЕК


@m_kenjabek
┈┈• ❀ 🌷☘️🌷 ❀ •┈┈•

⚜️TAKLIFNOMA⚜️

Hurmatli ADABIYOT MUXLISLARI!

Sizni O‘zbekiston Yozuvchilar uyushmasi a’zosi, otashnafas shoir Azim SUYUNning "TANLANGAN ASARLAR" i va adabiyotshunos olim Qozoqboy YO‘LDOSHning “AZIM SUYUN shaxsiyati va ijodiy qiyofasiga chizgilar” nomli kitobi taqdimotiga, hamda fotograf Ahmad TO‘RAning “KO‘NGIL KENGLIKLARI BO‘YLAB" nomli shaxsiy fotoko‘rgazmasiga taklif etamiz.

⏰ 20-iyun, soat 16:00 da

📍 Manzil:O'zbekiston Yozuvchilar uyushmasi

Ⓜ️ "Milliy bog'" metro bekati

O‘zbekiston Yozuvchilar uyushmasi Axborot xizmati

📱Rasmiy sahifalarimizga obuna bo‘ling!
Telegram | Instagram | Facebook | YouTube

ҲАЛОВАТ
Дилда ҳоким бир кемтик,
Этай кимга ҳавола?!
На шаҳарлик, на кентлик –
Аросатда наволар.

Дилдаги андуҳимни,
Май каби симирсамми?
Беҳаловат руҳимни,
Ниначига берсамми?

Гуллар тутса тўрт фасл,
Баҳорга кўмилсамми?
Яшолмайман бу зайил
Анҳорда чўмилсамми?

Кетсаммикан тоғларга,
Чўчитсамми ҳайқириб.
Кўксим – ер туёқларга,
Отлар чопар айқириб.

Ғуборим тўкиларми,
Қамиш бўлсам сойларга?
Ҳаловат топиларми
Бағрим тўлса ойларга?

Қиличдай ялтираган,
Кескир кунлар ҳаққига.
Япроқдай қалтираган
Вужуд ўлгур ҳақига

Ҳайқириб бир кулайми,
Йиғлайинми жим, сокин.
Йўнилмаган бир найни
Чалмоқчидайман токи…

Хуллас, яшамоқчиман,
Тупроқ билан сирлашиб.
Даҳо-даҳо боболар
Хоки билан бирлашиб.

✍ Баҳодир БАҲРОМ

👇👇👇
https://hottg.com/eng_suluv_armon

БАҲС

Икки қавм ёвлашарди азалдан-азал,
Ҳар нарсадан қийиқ излаб, ясарди тузоқ.
Ҳеч баҳона тополмагач, дейишди бир гал:
Бизнинг эшак уникидан ҳанграйди зўрроқ.

Эшакларнинг ўзлари ҳам туришмади жим,
Сал бошқача кечар эди баҳслари бироқ.
Улар дерди: тенг келолмас бизларга ҳеч ким,
Бизнинг қавм у қавмдан кўра эшакроқ.

✍Абдулла ОРИПОВ

2008 йил 18 декабрь

https://hottg.com/qashqadaryo_adabiyoti