أحرگني گتله حطب
بيه ادفى واني احتمل
وكيف حرگني ودفه
وطفاني بعد الحرگ
گتله ضميرك صحه !
لا گال اريدك فحم
مرتين راد اشتعل
وطبع السعاده دهِن
وماي انه ما ننجمع
اشما ننخبُط ننعزل
والفرحه طير بغصِن
سهام الملامه وهلي
وعداي والمستحه
معقوله ما تنكتل !
والخلگ شعره صُفه
واقنعني ما تنگطع
بين الخبل والخبل ..

يا كِل البگلبي وانتَ لو ما بي
چا هسه انه خالي وكلشي ماعندي
انتظرتك وانتظر
وعُيوني وكت الموت
انطيهِن لواحد ينتظر بعدي ..

بَعدها عيونَك أحلى عيون بعيوني.

متحطُم
وأشوف احلامي تِنهار
وانه شعندي بس كلمة هضيمه
اقنِّع نفسي اگولن باچر تهون
ماتُبقى عالحال
احسبها غيمه
صار سنين اگولن باچر تهون
لا ميت ولا فك گلبي ضيمه
سگف عندي
وحبل بالبيت موجود ..

الهوى يلتم عليه منين ما ذكروك
وأدگ رجلي واضل بعازة الخنگه
وأغص بريحتك ما گمت أغص بالزاد
المفارگ النسمه العابره تغرگه
مو بس الصواب النفس هم كتال
سهم يمشي الخريف برية الورگه
نيتك صافيه وتعرف شلون تروح
وتندل يا حلم مِن ليلك تشگه
صحره بعين بدوي اتمنى روحي تصير
على حرورة رمُلها يطگ عشب خلگه
مِن اشوفك حسّبت حُضنك يصير گماط
وتدگ روحك صليب بضلعي بالشبگه
واشد مِن غيبتك ماصخ طلع فرگاك
اجيت وجدمي ليل ودمعتي تسبگه
انا مالح وأغزر مِن ادوس الگاع
شني ما غزرت وياك بالملگه !
رايدلي خلگ يعبُر صهيل الليل
علّي گامت طيوفك مِن تجي مدنگه
شزغر بيه وعفتني وكبرت فرگاك !
دمعتي وصورتك فوگ الجفن رفگه
عليك مِن انسأل تصفن بروحي سنين
وما ميز بين اللچمه والدگه
العلّي سألوك هم سألوني وأحتاريت
سويتك نبي وگلت انجبر حگه
اناشغ والبچي يوصل لسابع ليل
وفشلتي بدمعه تبدي وتنتهي بصفگه

عليك مِن انسأل تصفن بروحي سنين
وما أميز بين اللچمه والدگه
العَلّي سألوك هم سألوني واحتاريت
سويتك نبي وگلت أنجبر حگه
اناشغ والبچي يوصل لسابع ليل
وفشلتي بدمعه تبدي وتنتهي بصفگه
طش بديرتي حتى التفت والگاك
اختنگ صدري ومتت بمدافع السحگه
گبل ماجُر نفس الا الهوى المَر بيك
چنت بكيف روحي مِن الهوى استنگه
اليحط عينه بگفاي يشـوف الملاگيه
مبين شكو بروحي شعافت الحِرگه
الچنت گبالهم طولي اعلى گد الشوف
زغرت بعينهم مِن كُبرت الفرگه
بعيده ولايتك والصدفه فكت باب
واجيت ومِن لگيتك وجهك مسرگه
مِن عدها وعرفت بنشغة المَكتول
وشتعوف الرصاصة حروره بالتفگه

شويه شويه صِرت تتغير عليه
شويه شويه تسحب أيدك مِن ايديه ..

شسولفلك يغالي
شسوه بيه الشوگ
تدري شگد الك
هالروح مشتاگه !
مثل رمش برمش
يتوسلن بالعين
يمته العين ترمش
حتى نتلاگه