هەڵسمان لە ئسڵام ئاباد غەرب(شاباد)، ژیانەوە لە مەهاباد
کوردبۊن و فانتزیاێ کوردی لە ژیان و مێژگ کوردەیل جوور وڵاتێان لەت‌لەت و ستەمە جیا لە فەرهەنگ و هونەر خاڵ هاوبەشێ لەێ سەردەمانە پێا کرد ک یەکان‌گر بوود. کوردبۊن ئرا من لە شار ئسڵام‌ئاباد درسە جوور ناوچەیل و پارچەیل تر پڕ لە ژان و تروماس ئمجا تایبەت‌مەندیەیل خوەیش دێرێد. من لە میرات فەرهەنگی و خەبات بەرەیل پێشو بێ‌بەش کریامە و خوەمان تەنانەت جوان ئمروژیێگ باێه کوچگ وە کوچگ بنەیمنە بان یەک و مێژوو خوەمان، خوەمان بنۊسیم. کاتێ ک لە شاباد وە دزیەو لە بان کاغەزێ پیتەیل کوردی ئرا فێربۊن ڕێنۊس کوردی دەس وە دەس کری، لە کوردسان ڕومان و چیروکەیل فەرەگ وە چاپ هاتۊد، ئیمە ئەمان وژنێ نێایم و خەبات کردیم لە خولەکوان پشت سەرمان هێز بگریم و پا بنەیمنە ناو هەبۊن، هەبۊنێ ک تام خودئاگاهی و شووناس دەێد. لەێ 30 ساڵە پاگردن ئەدەبیات و فەزاێ شووناس‌خوازانە لە کرماشان و ئیلام وە خۊن دڵ بۊە و کەسان فەڕەێ ک ناوێانیش لە هیچ جی نیە وە گیان و دڵ تەقەڵا کردن ئرا زینی هیشتن زوان کوردی و زاراوەێ کەڵهوڕی. ئێ پەڕە‌پێیا کردنە جیا لە تەقەلا و پاوەگەزدان چاڵاکەیل خود کرماشان و ئیلام بێ دڵگەرمی و پشتیوانی و یارمەتی دڵسوزەیل ناوچەیل تر وە دی نات. خەڵات‌گردن لە سلێمانی، سنە یا مەهاباد ئرا من سنوورشکنە، وەرجێ لە هەر چشتێ لە ئاست نەمادین و زهنی. ئەمان مەهاباد باسێ جیاس، شارێ ک نە ئرا من، ئرا هەر کوردێ گرنگی نەمادین تایبەت خوەێ دێرێد. پڕ وە دڵ ئرام شانازیە و جی ڕێزە لە نیشتمان خوەم لە مەهاباد هەست وە ماڵ خوەم بۊن کەم. دنیاێ ئەدەبیات و چیروک ئەو خاڵ هاوبەشەسە ک ئێ نزیکایەتیە قۊل‌ترەو و قورس‌ترەو کەێد.
خوەم وە بەختەوەر زانم ک خەڵات چیرۆک لە فستیڤاڵ چیرۆکی مەهاباد گرتم و وە ئەرک خوەم زانم لە لاێەن خوەمەو ڕێز و سپاس بێ‌ئەنیات خوەم ئاراستەێ وە‌ڕێیەوبەرەیل ئێ فستیڤاڵە و وە‌تایبەت بنکەێ فەرهەنگی موکریان بکەم.
کەیوومەرس بەڵەدە
>>Click here to continue<<