أمدرمان بعيدة ، أمدرمان سفر ، أمدرمان مش عارف شنو ..
نفسي أعرف أمدرمان دي بعيدة من وين بالضبط ؟!
لعله من لاس فيغاس أفريقيا ؟!
يعني نفسي أفهم محاولة التقليل من العزيزة أمدر هدفها شنو ؟!
طبعاً الناس البقولوا أمدرمان سفر ديل ، أحب أقول ليكم إنتوا لو ما أصولكم أمدرمانية فإنتوا الجايين من السفر ذاته 😅 .
مافي زمن أتكلم عنها لأنه محتاجة وقت كتير ، ولو جيت أتكلم فالحديث عن اسماء الأسر العريقة فيها بس محتاج سنيين .
عن أعرافها وحواديت حواريها محتاج سنين ..
عن الفن المرق منها ، عن الرؤساء السكنوا في أعرق أحيائها ، عن الإذاعة والتلفزيون عن الهلال و المريخ أكبر وأعظم الأندية في السودان إللي كل لاعب في السودان بتمنى يمر بشارعهم بس ..
ححتاج سنين ..
عن أشخاص غيرو في شكل التاريخ السياسي و الإجتماعي والفني والثقافي و الرياضي .. ححتاج سنين ..
عن المحنة ، عن لمات أهلنا وعن حبوباتنا وحواديت حبوباتنا ..
ححتاج سنين !
أمدرمان ما بعيدة ، أمدرمان السنتر والأصل .. الصُحبة و الخوة والرُقي .
أمدرمان هي الأساس ، وعمرها ما كانت ولا حتبقى ونسة ..
أنحنا بنحب أمدرمان جداً ، وأصولنا أمدرمانية ولو رحلنا عنها..
لكن الرابط الوجداني وحده كفيل بإنه يخلينا نقيف لمجرد كلمة فيها ، عشان أمدر ما ( نُكتة ) ، أمدر تاريخ .
من بحري ، من الخرطوم ومن كل شبر في السودان :
إنتي السودان يا أمدرمان 💚✨
>>Click here to continue<<