لمة عزه
فاطمه العليه مع والدها الحسين ع

گاعده  بالدار   وتنادي  العليله
آنه غير حسين ماعندي وسيله
وآحسيناه               وآحسيناه
_________________
هاي طفله وبالحزن خلوها
كـل أهــلها راحــوا وتركوها
ماأظـن من السـفر  يلفوها
راحوا الطف كربله وعافوها
 
فـرگة الأحـباب هذي مو قليله
آنه غير حسين ماعندي وسيله
وآحسيناه               وآحسيناه
______
راحت  الجدها النبي وتحچيله
راحوا   أهلي  يالنبي  وتـشكيله
وآنه هد حيلي المرض واعليله
وحدي عافوني وأعد چـم ليله

أنته سيد الرسل واليحمي دخيله
آنه غیر  حسین  ماعندي  وسيله
وآحسيناه                  وآحسيناه
______
آنـه طـفله والدهــر عــاداني
وكـلش چـبيره عـليه أحـزاني
حسين لو من سفرته ماجاني
والله مـيـته بـغـيبته يـلگـانـي

طفله بس شيبني أبو اليمه رحيله
آنه غـير حـسين مـاعندي وسـيله
وآحسيناه               وآحسيناه
______
راحـــوا ومـحد بـقــه يـبرالي
بس دموعي وذكريات الغالي
فكري يمّه سـارح وكـل وبالي
خــاف مايرجـع بــعد للـتالي

لو يغيب الغالي مايحصل بديله
آنه غير حـسين ماعندي  وسيله
وآحسيناه                وآحسيناه
______
راحـوا ومدمع بـقه بعيوني
مانشف من يـوم ماعافوني
طفله وبحيره وهجر خلوني
لا رحـت وياهـم ولا جـوني

راحت أويه حسين أيامي الجميله
آنه  غير  حسين   ماعندي  وسيله
وآحسيناه                    وآحسيناه
______
بالدرب راح أگــعد وأتـناهم
بــلكــت يــمروني وأتلگاهم
وشكثر يصعب علي فرگاهم
همه أذا ينسوني ماأنساهم

ماأظـن أيـامي بـالفرگه طـويله
آنه غير حسين ماعندي وسيله
وآحسيناه               وآحسيناه
____________________
الشاعر  (أسعد قاسم الگريعاوي)

نزلة للعلية

ياحُسين/بأسمك الهج بالصلاة
ياحُسين/صرختي الحد الممات
ياحُسين ياحُسين/ ياحُسين ياحُسين
_____________________
بيوم   بيهِ  القررت  بويه  رحيلك
چلبت بيك وصحت أرجع دخيلك
ياأبو  بهل  دنيا  مايحصل  مثيلك
بالسلامه تعود  يحسين  اندعيلك

ياحُسين/أوياك راحت الأمنيات
ياحُسين/صرختي الحد الممات
ياحُسين ياحُسين/ ياحُسين ياحُسين
______
بالي كله أعليك مشغول أويه فكري
شگد   أحبك   ياحبيبي  الله   يدري
ليل وي أنهار  فكري  أعليك  يسري
سلمت   للباري   يابو   اليمه أمري
 
ياحُسين/غيبتك   بس   نايبات
ياحُسين/صرختي الحد الممات
ياحُسين ياحُسين/ ياحُسين ياحُسين
______
ليلي  كله  ياحبيبي  لحد  صباحه
لجلك  أگضي  بالونين   وبالمناحه
بهذا عمري ماشفت يحسين راحه
شنهو تاليه  الهجر  گلي  بصراحه

ياحُسين/عايشه أويه الذكريات
ياحُسين/صرختي الحد الممات
ياحُسين ياحُسين/ ياحُسين ياحُسين
______
علتي يابويه  تدري  شگد چبيره
عالمصايب والهجر كلش زغيره
يالچنت   أنته  تسميني  الأميره
أرد أگلك  فاطمه حيرتها   حيره

ياحُسين/أنظرك  من كل جهات
ياحُسين/صرختي الحد الممات
ياحُسين ياحُسين/ ياحُسين ياحُسين
______
روحي  من  المرض  يابو  اليمه ملت
منكم أشچم ذكره وسط البيت ظلت
وأذكرت   أهنا   رقيه   أختي    صّلت
وأنظر الورده  الچنت  أسگيها  ذبلت

ياحُسين/ماخذتني أويه الخوات
ياحُسين/صرختي  الحد  الممات
ياحُسين ياحُسين/ ياحُسين ياحُسين
______
كلشي  بغيابك  يبويه  ماله قيمه
ليش بعدك  بالسفر  وأشعر يتيمه
شو أشمن عن بعد  عطاب  خيمه
بويه بس لاصارت بحقكم جريمه

ياحُسين/مالها أي طعم الحيات
ياحُسين/صرختي الحد الممات
ياحُسين ياحُسين/ ياحُسين ياحُسين
_____________________
الشاعر (أسعد قاسم الكريعاوي)

أساسية
فاطمه العليلة مع والدها الحسين ع

بويه/ عمري بعدك ماأريده
بويه/ لا تــخليــني وحـــيده
يل ودعتني / عدمن عفتني
بويه يابويه-------بويه يابويه
____________________
يبويه حسين أخذني الكربله وياك
أموتن  لو  تودعني  وحگ   عيناك
أحمّل  عّلتي  وما   أحتمل  فرگاك
وي وكت الفرض أفرشلك مصلاك
 
بويه / خذني أخدم بين أديك
بويه / تدري أموت آنه  عليك
يل دللتني / عدمن عفتني
بويه يابويه-------بويه يابويه
_______
أخذني  وي  رقيه أويه عبد  الله
أنه   بلمتكم    وشوفتكم  أتسّله
تخاف أعليه أموتن بالدرب سهله
يامحلى  اليموتن  بويه  يم  أهله

بويه/بدونك أشتسوه الحياة
بويه / ريته  يلفيني  الممات
ريتك شفتني/ عدمن عفتني
بويه يابويه-------بويه يابويه
_______
گلبي إعليك بويه يستعر جمره
ياريحانه   الهادي   أويا  عطره
خوفي   ماترد    يابويه   بالمره
گلي  لشوكت آنه أبقى منتظره

بويه / رافعه أيدي للدعاء
بويه / ترد إلي من كربلاء
فراگك يفتني / عدمن عفتني
بويه يابويه------بويه يابويه
_______
عليه شگد صعب يابويه فرگاكم
چنت حتى الهوى أتنفسه وياكم
أمــوتن وأخــتنگ آنــه بــلا ياكم
لا تــتــأخــرون إعـــليه أرجــاكم

بويه / علتي  بيكم  تطيب
بويه /بدنيتي مالي نصيب
لو فارگتني / عدمن عفتني
بويه يابويه------بويه يابويه
_______
يم أم البنين  الحره  راح  أگصد
وبدرب الضعون وياها آنه أگعد
يامحلى الوداع بكل مسه  نردد
نقره الفاتحه ونهديها للمبعد

بويه / لو كثر بيه الحنين
بويه / أعتني  لأم  البنين
يل حيرتني / عدمن عفتني
بويه يابويه------بويه يابويه
____________________
الشاعر  (أسعد قاسم الكريعاوي)

طفله وعليله وعالحزن ماعودوني
راحوا هلي الطف كربله وچنهم نسوني
_______________________
لمن مشوا راح الهنه وراحت ضحكتي
ظليت أكابر وحّدي آنه ودمعتي
خوله وسكينه أو والدي راح أويه عمتي
وأختي رقيه وحتى عبد الله سلوتي

لمن مشوا گلبي أنصدع وأختلف لوني
راحوا هلي الطف كربله وچنهم نسوني
______
ندري العليل بشوفت أحبابه إيتشافه
مايشفه من علته الذي محبوبه عافه
ودعني أبويه والمرض ضعفين ضافه
جرحوني وآنه چل فراشه أملك ترافه

لو ما رسالة جدي ماچان أتركوني
راحوا هلي الطف كربله وچنهم نسوني
______
آخر وداع أويه الأبو ضمني أعله صدره
شميته من صدره الشريف وبست نحره
يمسح على راسي وكتاب الباري يقره
راح وعرفته مايرد من دار ظهره

ماأگدر بدونك يمن تگدر بدوني
راحوا هلي الطف كربله وچنهم نسوني
______
چنت العزيزه الغاليه وأمدلله آني
فراگ الأهل هدحيلي ياناس وعماني
من مثلي وبهذا العمر وشيبي غزاني
مدري أحير أبعلتي مدري بزماني

صار الدمع هوه اليرد للينشدوني
راحوا هلي الطف كربله وچنهم نسوني
______
راح أعتني الأم الوفه أم عمي عباس
ياعمي آنه وياها مجروحات الأحساس
هم مثلي هيه تشهگ الدمعه بالأنفاس
فراگ الغوالي شگد صعب ويشيب الراس

وأم البنين أتنادي ولدي فارگوني
راحوا هلي الطف كربله وچنهم نسوني
______
لو أدري بي حي والدي جان أعتنالي
گلبي يگول أعله الرمح راسه يلالي
والعايله متيّسره وماعدها والي
وضعن النشامه بلا زلم يرجعلي تالي

ميته عّسَني ولاشفت خاليه ضعوني
راحوا هلي الطف كربله وچنهم نسوني
_______________________
الشاعر (أسعد قاسم الكريعاوي)

أبوذيات للعليله.ع.
________________
 يزرع إلي زرعته / مانميته
ويليل  المر  عليه / مانميته
بهجرهم ماني حيه/مانميته
عليله والمرض أثر عليه...
_____
بعدكم داري مادخله/وسكنه
ونياحي مابطل ونه / وسكنه
تفارگني رقيه أختي / وسكنه
وأبو فاضل وعمتي الهاشميه...
_____
حرت  يامحنه أشكيها/وياهم
وياهو اليعتني  بحالي / ويهم
تمنيت أرحل  وأمشي / وياهم
ولا ظل وحدي ودياري خليه...
___________________
الشاعر(أسعد قاسم الكريعاوي)

نزله أعگيلي لأم البنين عليها السلام

ماخيب واحد تدروني
أم العـــباس يسموني
__________________
آنـــــه أم العـــباس الـــحره
آنـــــه وأم حـــسين الزهــره
كل مجلس لحسين أنحضره
ننحب عــليّ گـــطعوا نحره

واسوا الزهراء أو واسوني
أم العـــــباس يـــسموني
______
يـــاناس أم العـــباس آنـي
مـــارِد كـل واحــد ينخاني
هــذا الجاه الباري أنـطاني
بل أيد أنطي مراده الجاني

أحضركم يامن تنخوني
أم العـــــباس يسموني
______
شـرفني حسين أبن الهادي
چـي بالطف أنطيته أولادي
وربي أنطاني بفضله مرادي
خـلدني وحـققت أمـجادي

حسين أنطيته ماي عيوني
أم العـــــــباس يــسموني
______
أوصيكـــم ياشــيعه الهِــمّه
وآنــه أعرفكم گــد الكــلمه
لتــعيفوهــا الهــاي الخدمه
ماكو أعظم من هاي النعمه

وياكم أحضر تلگوني
أم العـباس يسموني
______
آنـه أم الكافـل مـعروفه
بالشده الطايح مـاعوفه
آنــه أم المارد أضــيوفه
وآنه أم الـعّزب بـچفوفه

لا بالعطشان تحلفوني
أم العــباس يــسموني
______
أدعي الباري بفضله وجوده
وهـاي الدعوه ألكم مريوده
هـل خدمـه تبقى وموجوده
ويسگـيها العــباس بــجوده

أشكركم يل ماتنسوني
أم العــباس يــسموني
______
الله يــتقبل مــن عــــــدكم
وأســئل مـنّه أن يــحفظكم
والهاي الخــدمــه يــوفقكم
ونظره الهل مجلس يـرزقكم

ألكم أدعي يل تدعوني
أم العــباس يــسموني
___________________
الشاعر (اسعد قاسم الگريعاوي)

لمة عزه

فدوه ألك أربع ولد/عني بس لا تبتعد
وآنه أصرخ يبني رد/ياحسين
______________________
والله لو عندي ولد يحسين عشره
فدوه ألك واحدهم ومايغله عمره
أشما  أقدملك أحس أني أمقصره
أرد أبيّض وجهي  يم أمك الزهره

يالرضا الباري رضاك/آنه واولادي فداك
أرد اضحيلك بعد/ياحسين
______
چنت أشوفك كل صباح وكل مسيه
وچنت  يوميه  تجي   تصّبح   عليه
تبوس  راسي  دگلي  يآ أمي الوفيه
أنتي  طيبه  وتشبهين  أمي الزچيه

كل صباح وكل مسه/بنظرتك متنومسه
من أشوفك أنسعد/ياحسين
______
وداعت   العباس  أبني   گمر   هاشم
جفني   بفراگك    أبد   مالحظه  نايم
رمشي شاب ومحني ظهري الله عالم
عمري ألك أنطي   اذا ترجعلي  سالم

شوفتك هيه الدوه/وانته لعيوني ضوه
لو ترد عمري يرد/ياحسين
______
آنه بيك أتشرفت  يارفعت  الراس
آنه لومو انته ما أملك هالأحساس
إني  أتشرف  أخوك  يصير  عباس
والله هنياله  وألف هنيالي  ياناس

آنه وين وأنت وين/شرفتني ياحُسين
حققت بيك المجد/ياحسين
_______
أنته موبس أبني يحسين أنته أمامي
ومن الواجب   آنه أبدي في سلامي
وأحسب  أحساب أنه وياك بكلامي
أنته  معصوم   وألك كل  أحترامي

ولدي حين إيكلموك/علمتهم يندهوك
سيدي مثل العبد/ياحسين
_______
آنه   محسوده  لأن  عشت  ونظرتك
أحمد   الله   وأشكره    لمن  عرفتك
تشرفت يحسين من جيت وخدَمتك
وصار   أبني   كافل   الحوارء   أختك

أفتخر ياسائلي/أبني كافل بت علي
حقي لمن أنحسد/ياحسين
______________________
الشاعر (أسعد قاسم الكريعاوي)

يوليدي يحسين/وين السفر وين
مآخذ  هالأعيال   /ياگرت  العين
___________________
يبني  رايح  وين  يانور   الليالي
چنك  مسافر  ولا  ترجع  يغالي
گلبي گلي لو رحت متردلي تالي
بعدك بيا حال يمه يصير حالي

لـو تمشي يـبني / دهــري يذبني
ويتغير الحال / بعدك يالحسين
مآخذ  هالأعيال / ياگـرت العين
______
يبني أخذني وياك أخفف بعض همك
بلكي أعوضك عن حنان الزهره   أمك
صد  عليه  يبني وآنه الصدري أضمك
ياأعز    واحد   عليه   وغالي   أسمك

لو ماتجيني / يكثر ونيني
هاك أربع أبطال/مثل الميامين
مآخذ هالأعيال / ياگرت العين
______
هاك أخذ يبني البنين وياك أخذهم
أربع    بدور   وألك   مايغلى   دمهم
هاك أخذهم  كلهم أوياهم گمرهم
بس  أريدك سالم  انته  تعود منهم

يبني يعباس / يارفعة الراس
يانعم الارجال / ضحيله  چفين
مآخذ  هالأعيال /ياگرت  العين
______
چن  أشوفك   رايح   ومابيك  جيه
وچن أشوفك عاري  نايم عالوطيه
وصدرك أيسحگونه بخيول أعوجيه
وراسك    يگطعوا   أتباع   آل  اميه

محد بگالك / يحمي عيالك
زينب والاطفال / تدخل دواوين
مآخذ هالأعيال / ياگرت  العين
______
آنه كل خوفي عـلى زينب يجوها
هالأعادي  ومن خدرها يسلبوها
وبالسياط أعله المتون أيلوعوها
بالأحـبال وعــالهزيله أيصعدوها

وتـمشي يـسيره / ديـره لديره
عگبك يكفال/مچتوفه الأيدين
مآخذ  هالأعيال /ياگرت العين
______
أني راح أبقى أتاني بدرب الضعون
وراح أسئل  عنك اليرحون ويجون
وبغيابك   لا تظنها   تغفه  العيون
إله كلكم يمه  والله الداري تلفون
 
وحـشه يـداري / ليلي ونهاري
ماجاني مرسال/عنكم يطيبين
مآخذ  هالأعيال/ ياگرت العين
____________________
الشاعر  (أسعد قاسم الكريعاوي)

لمة عزه أو نزله
حوار مسلم مع طوعه رض

گومي أستقبلي ياطوعه خطارچ
مسلم بن عقيل  الليله يم دارچ
__________________
مسلم ظل وحيد وحاير أبأمره
مابين  الأزقه  يجذب  الحسره
عطشان  ودليله  يستعر جمره
لمن شاف  طوعه  گلها  ياحره

أشوفچ حايره وتوزعي أنظارچ
مسلم بن عقيل الليله يم دارچ
______
ياطوعه آنه مسلم  ماتعرفيني
مالي أي  گرابه أهنانه  تدريني
فضل منچ إذا عندچ تضيفيني
گالتله هلا بجيتك يضي عيني

كريمه وماتردين  أدري  زوارچ
مسلم بن عقيل الليله يم دارچ
______
مو  داري يمسلم أحسبه دارك
ومو خطاري  انته  أني خطارك
وخلي هذا ليلي يضوي بأنوارك
أدخل  لا تشع  يامسلم أخبارك
 
ماقصرتي والله إيعلي مقدارچ
مسلم بن عقيل الليله يم دارچ
______
طب الدار طوعه  ومنحني الهامه
مايندل   حجرته    وهيه    گدامه
طاحت من خشوعه بيده العمامه
شايل غيره من   أسلافه  وأعمامه

والتاريخ   باچر  يذكر   أخبارچ
مسلم بن عقيل الليله يم دارچ
______
خوفي  عليك  لا  باچر  يچتلونك
بالكوفة    وشوارعها   يسحبونك
غدارين    أهلها   وما  يرحمونك
ومن قصر الإماره خوفي يرمونك

من دون النسه الله إلي أختارچ
مسلم بن عقيل الليله يم دارچ
______
إلچ ياطوعه هذهِ وصيه أوصيها
أمانه  هالوصيه  وزين  أحفظيها
أوصيچ   بحميده  من  تشوفيها
عني   بالنيابه   الهامه   مسحيها

سلميلي عليها لو تجي  أديارچ
مسلم بن عقيل الليله يم دارچ
____________________
الشاعر ( أسعد قاسم الكريعاوي )

أساسية
عنده وصول حميدة لدار طوعه رض

ياطوعه ياطوعه___آنه   حميده
ياطوعه ياطوعه___مسلم أريده
جيتچ آنه من السبي/والدي كل مطلبي
    آنه حميدة               آنه حميدة
_______________________
من  كربله  للكوفه من  وصّل  ضعنها
فرت حميده أمن الضعن وأزرگ متنها
تسئل  على طوعه  وتناشد عن سكنها
من وصلتاها  بلهفه  والدمعه بجفنها

ياطوعه ياطوعه___حاچيني وينه
ياطوعه ياطوعه___مشتاگه عينه
الحجرته أحَبي حَبي/والدي كل مطلبي
    آنه حميدة            آنه حميدة
_______
أحچيلي عنه  من أجه عطشان  چبده
ألمن ذكر من  جبتي كاس الماي عنده
دگللها شاف  الماي والدمع أعله خده
وگال السلامُ أعله الحسين وعلى ولده

ياطوعه ياطوعه___حس بعطشنه
ياطوعه ياطوعه___ يلهب   گلبنه
جيت أحلفچ بالنبي/والدي كل مطلبي
      أنه حميدة           أنه حميدة
_______
يابنتي  مسلم   والـدچ گـالالي بسمچ
گلي  أذا  طـفله تـجي  أعـتبريها  بنتچ
وصّفلي كل هاي التفاصيل إلي عندچ
خَــبرني  عـن أخـوانچ  وخـبرني عـنچ

ياطوعه ياطوعه___ مسبيه جيتچ
ياطوعه ياطوعه___ وطيبه لگيتچ
أجر بيه أكسبي/والدي كل مطلبي
      آنه حميدة           آنه حميدة
_______
وين إخوِتچ ماجوي وياچ وشفتهم
بس   لا  أبن  مرجانه   يتبّع   أثرهم
لو   يعثر  أعليهم   تره   مايغفرلهم
ولا مو بعيده هالعدو يگطع نحرهم

ياطوعه ياطوعه___ تــمـنيته مـوتي
ياطوعه ياطوعه___ ولاشفت أخوتي
حز نحرهم الأجنبي / والدي كل مطلبي
      آنه حميدة            آنه حميدة
_______
ياطوعه كل ضني أجي المسلم وشوفه
مشتاگه  أحضن والدي  وأشتم چفوفه
ليش أعله مسلم  هالعدو  جرد سيوفه
ياطوعه  ملعون   الذي    يغدر  ضيوفه

ياطوعه ياطوعه___ بعده  يتيمه
ياطوعه ياطوعه___والله هضيمه
بالغدر چتلوا أبي /والدي كل مطلبي
     أنه حميدة          أنه حميدة
_______
راح أرجع  العمتي  أظن  تنشد  عليه
وراح أمشي ويه العايله وأرجع سبيه
ومدمع  عيوني أمزجه  بدمعت رقيه
ونصيح يامحلى  الوداع أبهل  مسيه

ياطوعه ياطوعه___أنتي وفيتي
ياطوعه ياطوعه___وماقصريتي
قصة أحزان أكتبي/والدي كل مطلبي
      آنه حميدة           آنه حميدة
_____________________
الشاعر(أسعد قاسم الكريعاوي)

لمة عزه
لمسلم بن عقيل ع

يامسلم أتركهم           غداره نعرفهم
غدروا قبل عمك علي~~~أرجع أرجع
_____________________
يامسلم  الكوفة  أبد  منهم  متسلم
غدروا قبل عمك علي وراسه تخذم
ولتأمن  بذاك  الذي  بوجهك  تبسم
والصله  خلفك  عافك وبعده مّسلم
 
لا لا تعاتبهم / معروفه شيمتهم
باچر يمسلم تنولي~~~أرجع أرجع
______
بالمسجد تصلي ولمن  ترفع جبينك
لو سلمت لا يسره   تنظر  لا  يمينك
صدگ مراح أتشاهد  إلي  أمبايعينك
وحدك تظل بس الله يامسلم يعينك

لوصافحت چفهم / أي والله تعرفهم
أنته العفيف أنته الولي~~~أرجع أرجع
______
لتصدگ بذاك  الذي أنظم بصفوفك
ولتصدگ إلي  عاهدك  والله يعوفك
لو تنتفض ضدّ الظلم  باچر يشوفك
يگودك لابن مرجانه ويكبل چفوفك

يامسلم أفضحهم/خل ينكشف سرهم
صيح اليضدنه يبتلي ~~~ أرجع أرجع
______
غدار   إبن    مرجانه   لتصدگ  عهوده
باچر  عليك   أيكثر   الجيش  وحشوده
ماتلگه بيهم   واحد اليوفي بوعوده
بس طوعه تلگه إلي تضمك من جنوده

هالحرمه تسواهم/ تكشفت نواياهم
وصوت الوفيه يعتلي~~~أرجع أرجع
______
أرجع   يمسلم   والرسائل زوروها
باعوا  ذممهم والضماير مارعوها
شنهو العذر لو جثتك باچر رموها
بالكوفة  وبكل   الأزقه  يسحبوها

أي رحمه ماعدهم/باعوا ضمايرهم
بيهم حقد ماينجلي~~~أرجع أرجع
______
أفتح  كتاب الله  وأخذ منه  أستخاره
وسلم على حسين الأبي وأقره الزياره
والظالم    بحقك    تره   صدر  قراره
قرر   يذبك  من   على  قصر   الإماره

جهزوا جحافلهم  / سلحوا عساكرهم
بالحق يظل صوتك علّي~~~أرجع أرجع
_______________________
الشاعر  (أسعد قاسم الكريعاوي)

أساسية
حوار حميدة مع الحسين ع

عمي يحسين//تسأل حميده
والدي  وين //  الليله  أريده
تأخر عليه______ومارد اليه
الليلة أريده // الليلة أريده
_____________________
عمي يحسين انه بت مسلم حميده
وين  أبويه    الراح   بديار   البعيده
إدعي  رب الكون  إلي  بويه  يعيده
مثل   يوسف  رايده   مسلم  تعيده

موعده  طال//يمكن نساني
مدمعي سال//راح وجفاني
ونتي خفيه____ومارد إليه
الليلة أريده // الليلة أريده
______
ليلي   ويه  ونهار  سهرانه   بونيني
والصخر  ذاب   وتفسر من  حنيني
لو  شخص  من  والدي عنه يجيني
عمري انطيه وحياتي وكل وسنيني

ياهوه  الهاب //مر  على  الغالي
گلبي مو ذاب//خبره أعله حالي
عيني ربيه_____ومارد إليه
الليلة أريده // الليلة أريده
______
من سمعها حسين ظل يسعر لهيبه
ياحميده   ونينچ   الگلبي    يصيبه
مايرد     مسلم   يبنتي  من   مغيبه
وخله بگليبي  جرح يصعب  طبيبه

وصلت أخبار //راح ابن عمي
وسجّر  النار  //وزيدلي همي
جته المنيه _ومارد إليه
الليلة أريده // الليلة أريده
______
ليش اشوفك عمي حاير هالمسيه
ودمعه  بعيونك   يبو  أليمه  جريه
وتفعل   أفعال   اليتامه ليش   بيه
چنه   مايرجع   بعد   مسلم   إليه

ويه  الأيتام // أمشي  يسيره
وأدخل الشام//والحيره حيره
بعده سبيه _ومارد إليه
الليلة أريده // الليلة أريده
______
صاح  لخته حسين  زينب   أحضرينه
وآسي هالطفله أصحبت يختي حزينه
راح  ابن   عمي   وبعد   ميرد   علينه
بالغدر      مسلم    يزينب     چاتلينه

مسلم وراح// من بين أدينه
بالغدر طاح //يختي الحزينه
تحمل أذيه___ومارد إليه
الليلة أريده // الليلة أريده
______
مسلم  بدمه  صنع    أعظم   سفاره
وحافظ اعله وصيت حسين أبجداره
ماخضع     للضالم     وغير     قراره
وذبته   الظلام    من   قصر   الإماره

عاف  الحسين  //  يكابر أبهمه
ودمعه بالعين //لجل أبن عمه
صان الوصيه ___ومارد إليه
الليلة أريده // الليلة أريده
____________________
الشاعر (أسعد قاسم الكريعاوي )

ميمر للأنصار

لا لا تهِم / عندك زلِم
بالـشده آبد ما تنهزِم
أنصارك أحنه السبعين / بالروح آلك شرايه
________________________
أنصارك أحنه وما نهاب إعدانه
نقسملك بـرب السـمه وقرآنه
منعوفــك الآخــر نـفس مولانه
يبن النبي / نموت وعلي
ولا زينب أخـتك تنسبي
طمئنها يحسين وهاي/من عدنه خذها حچايه
_______
لا تعتقد بينه اليّغير رايه
وراية أبو فاضل وحگ هالرايه
نعگدها منعوفك وآلك وفايه
هذا العهد / والكل شهد
يرخص ألك مـال أو ولَد
عدنه بقت بس هالروح / وماتغلى لجلك هايه
_______
هوه العمُر فرصه ويمر بس مره
وهل فرصه منضيعها يابو العتره
يرخص ألك دمـنه وحـگ الزهره
عدنه القتِل / بدربك سهل
أحــلى والأذ أمـن العـسل
الرايد يشم عطر حسين/متهمه أبد سلايه
_______
هاي الشهاده بدربك أشمحلاها
والجنه وياك وعلي شفناها
والدنيه من بعدك ولا ردناها
هوه العمُر / فتره ويمُر
باچـر نـصير أبــفد گـبُر
وناس التزورك يحسين/بينه تمُر الغايه
_______
يحسين ألك كلمن يضحي يعله
محظوظ إذا يم گبرك أنته تقبله
اليمك يدفنونه أشيريد أمن الله
هيه النِعم / أتعم الخدم
هـنياله مـن عمره أنختم
ويه الغريب العطشان/ويرفعه بايه بايه
_______
من الأنصار أخذ الدرس يالخادم
والله الذي يخلص أله مانادم
وين أندفن گلولي سيد جاسم
مخلص أله / حسين إقبله
وأصــبح مــقامه بــكربـله
والزار أبو اليمه يزور/ گبره ويذكره أبآيه
______________________
الشاعر (أسعد قاسم الگريعاوي)

ديوان حسيني لخادمات الحسين ع
مع نشر قصائد جديده لمحرم الحرام
https://hottg.com/Jafar_Jafar_ssss

لمة عزه
لأنصار الأمام الحسين عليه السلام

تصرخ الأنصار غيره  مانريد
مانعوف حسين ونبايع يزيد
ياأباعبدالله / ياأباعبدالله
_____________________
يـاليـلة الأنــصار / بــيها أشـكثر أخـبار
جون وحبيب وقيس/ثاروا على الأشرار
عابس برير وقـيس / ماقصروا  الأحرار
أنصار أبو السجاد / والله ونعم الأنصار

عالعهد باقـين عـنه مانحيد
مانعوف حسين ونبايع يزيد
ياأباعبدالله / ياأباعبدالله
_______
هوّس حبيب وصاح/وتعنه وي الأصحاب
يم خيمة الحوراء/وگلبه أعـله زينب ذاب
گاللها أمـني اليوم / ارتاحـي يبت الأطياب
ولن زينب تحاچي/وهال أعله راسه تراب

لو توذرنه وذر يخت الوحيد
مانعوف حسين ونبايع يزيد
ياأباعبدالله / ياأباعبدالله
_______
جوي أخوت العباس/عبد الله جعفر عون
ويه جملة الأصحاب/ ويم زينب يهوسون
ولـن كـافـل الحـوراء / نـادها يـختي تهون
صـحبتنه والأخــوان / فـدوه ألـچ يـروحن

أحنه واحدنه بطل يلوي الحديد
مانــعوف حــسين ونـبايع يــزيد
ياأباعبدالله / ياأباعبدالله
_______
كلنه على أستعداد / عـالبيعه والأتمام
وسيف إلي عاهدكم/بگرابه حاشه ينام
لا مايمسكم سوء / وبينه النفس يكرام
لا مانـعوف حـسين / ونـصافـح الظلام

واليموت أوياه من الله شيريد
مانــعوف حـسين ونـبايع يزيد
ياأباعبدالله / ياأباعبدالله
_______
منهم  أخذنه دروس /  وتخرجّت  أجيال
سحگوا على الكفار / عدنه الحشد الأبطال
من صحن أبو السجاد/فتوى نطت الأرجال
زلمه  الذي خطها / والله  ونعم  من  گال

كل شهيد الطاح كاتب بالوريد
مانعوف حسين  ونبايع  يزيد
ياأباعبدالله / ياأباعبدالله
________________________
الشاعر (أسعد قاسم الكريعاوي)

لمة عزه

يرتل كل فرض صوت المحبين
سلام الله وملائكته على حسين
___________________
سلامي الساكن أرض الغاضريه
أبــو السـجاد والعــباس أخــيه
وعلى أنصاره وأصحابه المسيه
الحبيب أبعث سـلامي والتحيه

وعلى عمره الگضن خمسه وسبعين
ســلام  الله ومــلائكته عــلى حـسين
______
أذكره فـي مسائي وفـي صباحي
وعــلى مـصابه كثر  ونيّ ونياحي
وعلى جروحه تظل تنزف جراحي
ســلامي للوفـي الحُــر الــرياحي

وبرير  وعابس  وجون الموالين
سلام الله وملائكته على حسين
______
صحابه أختارهم رب السماوات
مثلم   بالوفاء   أنشوف هيهات
سطروا بالدماء أعظم  بطوالات
ونالوا   بالوفه   أعظم   كرامات

شفاعة  فاطمه وسيد  الكونين
سلام الله وملائكته على حسين
______
أصحاب ويظل خالد ذِكرهم
ضحوا للحُسين بكل عمرهم
تمنيت أنــدفن  أنــه بكترهم
وأســمي ينكتب ويه أسمهم

وتجي  وتزورني هاي  المحبين
سلام الله وملائكته على حسين
______
بكل حب وأراده وهمّه وأصرار
صاروا أيد وحده بوجه الأشرار
ضحوا  دمهم  وأصبحوا أحرار
أنصار  الحسين  ونعم  الأنصار

منين  الگه مثلهم بالوفه منين
سلام الله وملائكته على حسين
______
لجل أحسين نالوها الشهاده
يعرفون  الممات أويا سعاده
وفه وأخلاص وأصرار وأراده
وإلى العباس تحلاله الـقياده

صاح أدركني من طاحن الچفين
سلام الله وملائكته عـلى حسين
______
اليخدمه ماخسر وأنطاه عمره
يظل طول العمر مرفوع قدره
وحـــتى بالگـبر يـختلف عـطره
لإن حسـين أبـو اليمه يـحضره

ولو ما تحضره  وين المفر وين
سلام الله وملائكته على حسين
______
يبو  إليمه وحـگ الزهــره أمك
دماء الناس ترخص لجل دمك
نظل لآخر نفس أحـنه نخدمك
بحاشيت الخـدم سـجلنه يمك

خِدامك ونظل بالخدمه ماضين
سلام الله ومـلائكته على حسين
____________________
الشاعر  (أسعد قاسم الكريعاوي)

لمة عزه للأنصار

أحنه الأنصار / نادينه الثار
أحنه السبعين/منعوف حسين
________________________
أنصارك  يحسين  وأحنه / نفديك  أبدمنه
يرخص كلشي لجل عيونك/والله وميهمنه
هذا اليوم  البي نرضي الله / أوالدنه وأمنه
دربك  يابو  الأكبر  هوه /  بل  جنه  إيلمنه

خطينه حروف/ دربك منعوف
أبدم أموقعين/منعوف حسين
________
شلون أنعوفك وأحنه أنصارك/ياروح الزهره
هوه الي  يعوفك  شيسوي / يحسين بعمره
هايه  الفرصه   منضيعها  / ويومك  ننتظره
حتى يقدم تحت أجدامك / كل غالي نحره

عابس وي جون/اليوم إينادون
بالدنيه ودين / منعوف حسين
________
قيس وعابس جون  ونافع/ والحر  إينادي
أرخصلي واحدهم  يصرخ / ياروح  الهادي
خل أنزل للحومه ورايد / تحقيق  أمجادي
بين أچفوفك حتى أستشهد/وآخذ أمرادي

نادينه بصوت /خلينه نموت
دون الطيبين/ منعوف حسين
________
لن شيخ الأنصار إينادي/ويحشم الأنصار
يحسين وجدك  منعوفك/ مابين  الأشرار
نختارك  من بين  الوادم/ ماغيرك   نختار
لو عفناك أحنه بيا صوره / ننظر  للمختار

نعوفك معقول / باچر  شنگول
السيد الكونين/ منعوف حسين
________
خل زينب ترتاح وگلها  /أنصاري السبعين
للموت وياك أحنه وحاشه/نتخلى يحسين
محد يگرب يم خيمتها / وأحنه موجودين
وشحده اليگدر يسبيها  /وتدخل أدواوين

لآخر أنفاس / والگطع الراس
شلنا بالعين / منعوف حسين
________________________
الشاعر (أسعد قاسم الكريعاوي)

ليلة السابع لمة عزه
حوار بين الأمام الحسين والعباس عليهم السلام

الوداع الوداع خويه عباس الوداع
_________________________
اليوم أودعك يابو فاضـل  والمدامع هامله
چِـــنه مــانـفترق خــويه وفـرقتنه كــــربله
شــلون أرد خويه الخيامي وشعتذر للعايله
بداعتي عباس أحلفك خلي جسمك أحمله

الوداع الوداع خويه عباس الوداع
______
وسفه مابينك  وبيني  حــال ياخويه  الممات
خـويه  ياعــباس بعـدك والله ماريـد الحـيات
الوفه  العندك يخويه  چان مـن أجمل صفات
وچنت لمن أنده أسمك أنظرك من كل جهات

الوداع الوداع خويه عباس الوداع
______
خويه من شاهدت حالك طايح أعله المشرعه
ردت  أضـمدك بـس شــضمد جثتك متگطعه
لو  أضــمد خــويه راســك  الســـهم شـيّطلعه
وچــفك  المــبتور  گـــلي ياگـــمر شـــيرجـعه

الوداع الوداع خويه عباس الوداع
______
شلون أعوفك يابو فاضل وأنته نايم عالنهر
يالچنت خويه وعضيدي  أنته وحزام الظهر
تدري بعدك  يبو  الغيره  الظهر  مني أنكسر
هاك  شاهدني  يخويه  وأشعمل بيه الدهر

الوداع الوداع خويه عباس الوداع
______
شاب  أجيتك  ياعضيدي  وشيبتني  ياحنين
أصبحت يعگوب چني من ترك يوسف حزين
شلون  لو  تنظر  وضعنه  فاطمة وأم  البنين
لاشـك  إيصيحن  يعينك  الله  يبني  ياحسين

الوداع الوداع خويه عباس الوداع
______
گبل لاترحل يخويه وصيه الك عندي وسلام
خويه  سلملي  أعله أختنه لمن أترد  للخيام
وگلها  يتعذر  كفيلچ  جسمه مملي بالسهام
مگطع   العباس  گلها  مختصر  هذا  الكلام

الوداع الوداع خويه عباس الوداع
_________________________
الشاعر(أسعد قاسم الكريعاوي)

هذا العباس/هذا العباس
لو علي بكربله
هذا العباس
غيره ونوماس/غيره ونوماس
عباس ومرجله
________________________
عباس البطل يشبه علي أو وارث صفاته
مايهتز جبل وكت الحرب باقي بثباته
حيدر بالأمس حامه النبي من كل جهاته
واليوم الگمر لحسين إخوه ضحه بحياته

مرفوع الراس/مرفوع الراس
والله مانزله
مرفوع الراس
غيره ونوماس/غيره ونوماس
عباس ومرجله
_______
من زغره أسد شهم كلف حيدر يشوفه
بساعة مولده ضمه علي وقبّل چفوفه
راده للحُسين أبكربله ذخر وطفوفه
يدري للخــدر عـباس أبد لا مايعوفه

شحدها الأرجاس/شحدها الأرجاس
توصل للعايله
شحدها الأرجاس
غيره ونوماس/غيره ونوماس
عباس ومرجله
_______
زلمه ومن ظهر زلمه الگمر والكل شهوده
يفنيها العده بسيفه لون عنده زنوده
عالشاطي أنكسر ظهره أخوه حسين أعله موده
وصاح بحسرته راح الإخوه بعد أشيعوده

لا ماينقاس/لا ماينقاس
حزن الاخ مشكله
لا ماينقاس
غيره ونوماس/غيره ونوماس
عباس ومرجله
_______
مافارگ أخوه أحسين أبد حد المنيه
حتى أبموتته يمه أندفن بالغاضريه
روحه بروحه مشدوده كفيل الهاشميه
أبن أم البنين الطاهره الحره الوفيه

لآخر أنفاس/لآخر أنفاس
رايه مآبدله
لآخر أنفاس
غيره ونوماس/غيره ونوماس
عباس ومرجله
_______
من نذكر أبو فاضل نشم عطر الرجوله
يتقشعر بدنه لو فقط إسمه نگوله
سيفه وراسه حار وما نذكره بالسهوله
والزاره بضريحه محنته وهمه يزوله

ودگول الناس/ودگول الناس
حلال المُشكله
ودگول الناس
غيره ونوماس/غيره ونوماس
عباس ومرجله
_______
چفوفه من هون عالمشرعه صارن مناره
يرتاح الذي ألهن يصد وكت الزياره
ورايه العل نهر طاحت أمس كتبت عباره
إن الكافلَ رمزَ الأخوةِ والغيارهَ

بابه الينباس/بابه الينباس
بي شفه القبّله
بابه الينباس
غيره ونوماس/غيره ونوماس
عباس ومرجله
______________________
الشاعر (أسعد قاسم الگريعاوي)

الليله السابعه...
لمت عزه أو نزله

لأستشهاد الأمام العباس ع بمزج التراث

واويلي على العباس/واويلي على العباس
________________________
ياليلة    العباس  /  بكل   ليلة  ماتنقاس
مانلطم أعله أصدور/ لازم  ندگ عالراس
راسه أنشطر نصين  /  وأمگطع   الچفين
بعينه السهم مكسور/ناده حزين أحسين

يزينب را أبو الغيرة / أجيتچ طايح بحيره
ياخويه تلگيني / ظهري أنكسر عينيني
أجيتچ طايح بحيره...
 واويلي على العباس/واويلي على العباس
_______
راسه  أنرمه بعامود/طاح  العلم  والجود
والرايه هم طاحت/ من  گطعوا   الزنود
عالمشرعه من طاح/جسمه أنطعن برماح
زينب عليه صاحت / خدري بوداعك   راح

يعباس فگدك هضمنه / يعباس حرگوا خيمنه
واويلي على العباس/واويلي على العباس
_______
آه أعله زينب آه /مو هينه لا والله
راح الگمر عباس/ماظن بعد نلگاه
بحالتها مدري شلون/لوهالعده يعيلون
وتوليها  هالأرجاس / وإعليها  يتعدون

يالنايم أعلى المشرعه من نومتك گوم
يهنالك النوم
ماتگعد تسوي العليلك والحرم چاره
واويلي على العباس/واويلي على العباس
_______
من طاح أبو النوماس/طاح العلم والطاس
ظل وحده  أبو السجاد / والتمت الأرجاس
حاير يدير العين/بلا ناصر ولامعين
همّه كثر وأزداد/من شاهد الچفين

 عالمشرعه العباس صاب السهم عينه
أحا ياسهم البين /وأنكسر ظهر حسين
وأحنه أنگطع بينه ...
واويلي على العباس/واويلي على العباس
_______________________
الشاعر (أسعد قاسم الكريعاوي)