تعبت وياك وأنت من أولك عله
حبيتك نعم بس الفراك احله

شفت وجهي جزيرة وردت بس ترتاح
من حقك تدور راحتك اوله



أمجد الدراجي 💜

أحن الكلبك الما حن
وتلذذ بهجرك والوصل وياك

وأذكرك ، وأبتسم …
وأنوب أرد أحزن



حسين السعيدي 💜

رايد ابجي بحضن روجه حتى متعيرني عين
كُون اسافر سفرة الدخان محد يدري وين

هل مضن سنتين أتاني وما تجيني
أمس من مريت منكم دفعت الشباج عيني



محمد الوسمي 💜

متحبني وأحبك .. والمصيبة انوب
أريدك وأنهزم من اليريدوني

ومن دونك صرت ما عيش وي الناس
وأنت بكل سعادة تعيش من دوني



جبار رشيد 💜

خلصنه .. وكلمن يرد المكانة
بس بكلبي غصة للأمانة

صح فارقتك وفرق اليروحون …
انا رايح وفي وأنت بخيانة



علي تالي 💜

تعرف قيمتي من تلگه ثاني
راح يسد فراغك مو مكاني

ما أمدح بروحي ولا أذم بيك
بس الصدك .. ما اتعوض أني



محمد صلاح 💜

مشتاكلك لا تضحك من احجي وياك
چا هيج من تشتاك عندك هينه

ما دام عينك حلوه من بعد افراك
مو داعي اسولف چا معزتي مبينه



ليث ماجد 💜

جبتلك كلب اصفه من البياض البيك
وأنت من السواد اسود

مشيتك جنح على غيم …
وأنت وياي مشيت الدمع على خد



علي طالب 💜

خايف شارد من الصوت
أجيتك ما أريد أحجي

وليغرك ترا معدل بشكلي هواي
جنت أبجي …!!



سجاد مجبل 💜

ردت أفتهم ليش أختلف !!
مو هوه كايلي وحلف .. ميعيش لحظة بدوني

ساعتها حيل تعلقت …
والله احلى من عنده شفت ، بس كلبي غش عيوني



مهند العزاوي 💜

انا من انجرح ما أشكي شي لناس
ولا طلع حركتي وكلشي ما كسر

انا اصغر أخوتي وشلت كل البيت
زحمة الشالهم يلگونه متأثر



مصطفى أبو سمير 💜

انام وما يجيني النوم
وأمل من السهر وأسهر

وأشد خلكي وي خلك الليل
وعاين للفجر ما مر

شلون أغفه وانا بهل حال
كلب متلفلف بخنجر !!



سمير صبيح 💜

صوري العندك بكل گتر شامرها
وانا سنين ما شايف الصور الثانية
الموجودة بالألبوم ..!!
الصورة الاولة ما جاي أكدر أعبرها



أحمد مهدي 💜

من كلبي تطلع صدك
چم ااخ من أنتجي .. أسئل حياطيني

متغير وما عدت ذاك الكلبه قوي
و أي سالفة على الهجر كامت تبجيني



حسين الحبتري 💜

اتخوف احجاية أحبك من بشر رايح وجاي
طيرة ما قبل الذبح ينطوها ماي !!



علاء بيان 💜

مو عشت وياي وشفت وهواسي
تخيلني من كالولي عنك ناسي !!

البيده ماتت أمه من راد ينام
يمكن بذيج الساعة نام براسي !!



سجاد مجبل 💜

لو تدري بمعزتك والله لو تدري
لان يكضي العمر ما صيحلك عمري

واصل مرحلة خايف على عيونك
كلت لاهلي من اموتن لا يبلغونك



علي طالب 💜

شكد ارتاحلك وشكبرة ودي
اجازة من التعب شوفتك عندي

مو من الصفر تبدي الحسابات
انا وداعتك من عندك أبدي



رائد ابو فتيان 💜

العمر خلصان وانت انطيته قيمة
يبو الروح التسولف بالعزيمة
حضرتك بيد وحدة وما انجريت
ولا دنگت راسك بالهزيمة
من اهلنه شكثر شايل وجهك اوصاف
ضحكتك دافية ونفسك كريمة
شكثر حاولوا شيطنتك لچن لا
تساميت اعله النفوس الرجيمة
وياك اتنفسينه العزة بالقول
ولمسنه الشرف بالصولة الحكيمة
اكبالك گاموا اصحابك يطيحون
بمواقف كلها احس چانت اليمة
گلبك ينعصر وبچفك يصير
ولهب نارك يجر عشب الهضيمة
وانت بكل ثباتك ترسم حسين
ومهر صبرك يسولف بالظليمة
تفگتك فگست اعيون الشياطين
وگفتك ياعلي كلش عظيمة

د فلاح الزيدي

كبر بيه الصلح حد التواسيل
وانا ما حامله من جان نية



عصام كريم 💜