سافروا عني ونسوني ومااجوني.
وبين دمعاتي وحسرتي ضيعوني
اغله الاحباب. عني غياب.
مااجوني

حملوا ظعن المناية وتاريكيني
وآنه بعيون الدمع يبجي حنيني
كتله يابوية تجي لوما تجيني
كلبي لاجمني بسفركم تهمي عيني
شفته نزلت علوجن حمرة دمعته
والجواب اعرفته حالا من سكته
يعني ميعود كلبي ممرود
مااجوني

احجي وي الدار انوح وناري بيه
هنانه جان حسين يكعد وي رقيه
هنانه جنت اشتم ركبة ابن الزجية
والله لو اندل رحت للغاضرية
بين جدرانج يدار اسمع حسرتي
ومن مشوا عني الاحبهم وحشه صرتي
كولي يادار. كلبي شب نار
مااجوني

كولي يدار الاحبهم هم يجوني
واكعد وياهم واكولن مانسوني
شكد طويل الليل ويهيج شجوني
ياكلب يذبح حنين الفاركوني
مارجع منهم جواب ورد اليه
خاف ابوي اتمرضت عنده رقيه
شنهي الأسباب ماكو اجواب
مااجوني

تربي عيني اعله الدرب يوصل خبرهم
بلكي طارش جايني ايخبرني عنهم
جائز احبابي نسوني مااظنهم.
عمري راح اكضي اعيش انا ابأملهم
آنه عافوني وحيده وي الاماني
مااصدك يرجع ويصفه زماني
صارت احلام. ذيج الأيام
مااجوني

اه يادار الاحبهم وشبكالي
انه فاركت ابحياتي اغله غالي
بعد ماترجع ابد ذيج الليالي
ولايرد حسين ويشوف الجرالي
مايجيني يشوف دمعاتي الاكتها
ويسمع الونه الابد مافاركتها
الدنيا يحسين. بي صفت وين
مااجوني

يالعفتني وسافرت هايالعفتني
وبين جمرات المدامع ودعتني
غيرتني الفركه بعدك غيرتني
وبين مرضي وبين فركاك اتركتني
انه وي الدار اسولف واشكي حالي
خالي يادار الاحبهم ليش خالي
ياهوى الروح. كلبي مجروح
مااجوني

عندي وردة وجنت اساكيها بدمعتي
كلت من يرجع ابوي انطيه هديتي
تكبر الوردة واحس تكبر حسرتي
ليمت ايعود واقدمله وردتي
تكبر الوردة وامل وي روحي يطلع
حتى اقدمها لبوي بيوم يرجع
راحت ايام. وردت ايام
مااجوني

من اجه الناعي ونعى دمعاتي صبن
هدم اركاني واحس رجليه ماتن
طاحت الوردة من ادية وكل شي سكن
واظلم الكون واحس اعظامي بادن
يااهل ياثرب يصيح احسين ذبحوه
صحت لو ميت اريده اليوم جيبوه
بس احاجيه. واشبك اعليه
مااجوني

شاعر اهل البيت: حسين العبودي☆●#

قبل خروج الظعن بليله واحده كأني بلسيده زينب خرجت لزياره امها الزهراء عن بعد



نظره من ابعيد
زارت وتريد
من امهه بعاشور
نظره من ابعيد
...........................
اخر ليله زينب عدهه باجر يرحون
بين معاتب بين موادع بين يصلون
طلعت سكته تزور الزهره شتكول ام عون
يالما شفتج من تشيعج شوفيني شلون
مو خمس سنين
سبعه وخمسين
باجر احتاج
نظره من ابعيد
..........................
باجر امشي وكل تفكيري عايفته هنا
يم الطفله الماياخذهه والدهه وياه
يم الجابت جف ابنيهه وباست يمناه
تكله انساني وهودج اختك بالك تنساه
لو ظعني غاب
يكعدن بالباب
يبقن كل ساع
نظره من ابعيد
..............................
منا للطف امشي مأمنه واخواني حزام
بس احتاجج يوم التاسع ماراح انام
من اخيمنه تدوي بونة رمله وجسام
تخوف ليله تشم بالاكبر من فوك الهام
تظيك الانفاس
وانظر عباس
ينظر للجاي
نظره من ابعيد
.............................
ظهر العاشر لوجيتيني لاتدّنين
ظلي بعيده واني اتقرب لو طاح حسين
وينج وين الركظه وظلعج موبي كسرين
جفج مجوي بنار اخيامي لاتجّوين
بثوبي المحروك
عالتل من فوك
ها يالكرار
نظره من ابعيد
..............................
يالمدفونه بليل اتعني بس هم بليل
من يجلجل ليل الحادي وماهيه الخيل
ظلمه الطف وعينج وحده واحتاجج حيل
مانتّيه كل النسوه بس روس اتميل
ينامن ونروح
ندور المذبوح
نوصل ليه لا
نظره من ابعيد
..............................
سولفتيلي هواي عللطف وامصابه الجاي
يالعفتيلي اثيابج ذنّي كلهن وياي
ريحة حرك الباب عليهن محتفظه بهاي
حته اشتمهن فوك الناكه ساعات اسباي
بيهن آثار
دم البسمار
واسترهن خاف
نظره من ابعيد
............................
#عباس الموّاشي

عيوني كلش وشلت مابيها ماي
هاي اول مره هيج الزم كفاي
هجرك صعب ياذيني
يابويه بس حاجيني
**************

فرحانه يابويه اشكثر
ومحضره عود اهدومي
كامن خواتي وانتظر
واحد يكلي كومي
يابويه من كثر الدمع
متغيره حيل ارسومي
وهمومي يابويه اشكثر
ياهو اليشيل همومي

سافرت وانه بجفاك اشكد بجيت
كتلي ارجع وانه اتاني وما اجيت
محد يون لونيني
يابويه بس حاجيني
.....................


يا ناس اليفارك ابو
كل عمره ما يتهنه
وتصير روحه بالصور
وتهد دليله الونه
عافني وانه اذكر كبل
بالباب نكعد جنه
لا يرضه ابوي ايرد الي
ولا عيني شبعت منه

جلمت البويه تعذبني اشكثر
شنو ذنبي اتيتميت امن الزغر
امفاركني ومخليني
يابويه بس حاجيني
......................

اتمنيت اشوفك يالابو
يالكطعت دلالي
غالي انته ويموت وعلي
كلمن يفارك غالي
كل ما اروح الحجرتك
الكه مكانك خالي
كل يوم بالباب انتظر
هلبت ترد يالوالي

انته ابوي وانته ابو الحضن الحنين
عيني من يوم الرحت شبعت ونين
عايفني ومخليني
يابويه بس حاجيني
..................

يابويه من رحتو صبح
خالي مهد عبد الله
راح الالوليله جنت
وكل ساع اكله اسم الله
حزني كبر وتعذبت
محد كدر يوصله
دهري خذاكم يا هلي
وغافلني بيكم غفله

كمت اشم بكماطه وركض للمهد
جنت الوليله دللوه يالولد
هالموقف ايبجيني
يابويه بس حاجيني


يابويه ماريد انتظر
كلي اشوكت ترجعلي
والناس هظمتني اشكثر
ميرد ابوج اتكلي
مليت من هذا الحزن
تدري الحزن مو حلي
ضليت احشم بالدرب
ياناس اريدن اهلي

انه طفله وضيعت ذاك الدلال
بويه وينك خل احضننك تعال
نار الهجر تجويني
يابويه بس حاجيني


تمت
محمد غازي

#قصائد_محرم الليلة الأولى_ع_١٤٤٥_ه

ــــــــــــــــــــــــــــــــــــــــــــــــــــــــ

هوه الحضور بمجلس حسين
للخدم مثل الشـــــوف للعين
مجلسه بشوك اتنطره
أعمه اذا ما احضـــره
مجلس حبيبي
****
متاني محرم وأنتظر وأحسب الايامه
لهلاله أعد طول السنه والليل مانامه
أدري ملائكة السمه تسجل اللطامـــه
وأتمنه أسمي يندرج في سجل خدامه
أمنيتي بيه حسين يقبل
وهنيالي لو خادم أتسجل
وأخدم اليخدم منبره
أعمه اذا ما احضـره
مجلس حبيبي
****
كالوا أبيتك وأستمــع أقرايـــه ليليــــه
مادروا من يوم الصرت بيتي الحسينيه
لو سامح الله وما أدگ صدري ابلطميــه
أعتبر نفسي ويه المحب ماصافيه النيه
روحي لعزاء احسين تمشي
الكعده بالمجلس تسوه كلشي
أبلياه روحي أمكدره
أعمه اذا ما احضـره
مجلس حبيبي
****
المجلس أهم امن المهم مافوت المجلس
وأيام لو ماكو لطم أشعــــر إنـــه بهندس
عندي أعزوأفضل وقت بالمأتم أمن أجلس
الساعات بيه تركض ركض بيها أبد ما احس
أشما نحضر أحنه بيها ونوح
بهذا الحضور نطهــــر الروح
مجلس العتره الطاهره
أعمه اذا ما احضـــــره
مجلس حبيبي
****
أشما أتعب أتمنه التعب راحه التعب بيها
لن سيدي يسوه التعب روحي اله أفديها
من زغري هاي التعزيه كلبي انصب عليها
ومتفوتني مهما حصل هيهـــــات أخليها
بعشرة محرم آنه لو اموت
ما اخلي ليله اعليـه اتفوت
ماعوفه لو مهما جره
أعمه اذا ما احضـــره
مجلس حبيبي
****
أشما تكثر أعليه العلل عندي دوه أوصفــه
بهاي المجالس وصفتي ليها أمن اطب أشفه
أتهذب كياني وترفعه واتكمله وأتشرفــــه
وتشافي أمراض الكلب وتبيضه وتنضفــه
هنيالــــــه اللي أتوفق ألها
ويحضر ليالي العشره كلها
عيوني بمحرم ساهره
أعمه اذا ما احضـــره
مجلس حبيبي
****
لتظن أبالغ بالحجي بلياه صدك أعمــــه
أعمه البصيره الماحضر مجلس أبواليمه
يرتاح كلبي لو شفت خدامـــــه ملتمــــــه
وارتاح لو شفت الخدم بالعـــزه مهتمــــه
عالراس أخلي الخدم كلهم
وشكـــــد معزه بكلبي ألهم
مجلس حسين المفخره
أعمه اذا ما احضـــــره
مجلس حبيبي
****
الخدام أخوه وبالعزه شمحلاها من تلتم
لمتهم أتطيب الجرح لمــه تروح الهم
الخدام بالمجلس فقط بحسين تتكلم
بيناتهم أگعد وأظل من عدهــم أتعلم
شمحله التواضع على الخدام
منهم اتعلــم روح الاســــــلام
وأخشع القاري لو قره
أعمه اذا ما احضـــــره
مجلس حبيبي
****
سلام المشعل

العليله                #احمد العكيلي

كلما يحل وكت الفرض
افرش دموعي عالارض
واتوجه لرب السمه     انه العليله فاطمه
ــــــــــــــــــــــــــــــــــــــــــ
ارحل لبوي بحسْبتي .. من افرش امصلايته
من گال اعوفج وحّدج .. مو سهله هاي احجايته
يدري شكثر احتاج اله .. وابصاية الله وصايته
يعفيني من ضيم السفر .. اعرفهه جانت غايته

حنيته ما الهه وصف
شايل گلب كله عطف
يدري بسفرتي مؤلمه     انه العليله فاطمه
ـــــــــــــــــــــــــــــــــــــــــ
لحظات انام اوانتفض .. وايمرني جم حلم ابحلم
عبدالله شفته من العطش ..لشفافه بدموعه يلم
صرخاته تشرح حالته .. بين الحرب ضاع السلم
يطلبله شربه والدي .. وامحاوط اسهام وزلم

عبدالله يتروه ارتجه
لن سهم المثلث اجه
هد حيلي ياسهم الضمه .. انه العليله فاطمه
ـــــــــــــــــــــــــــــــــــــــ
مر بيه هالليله حلم .. جن فاطمه ام الحسن
كالتلي نمشي الكربله .. ونشاهد افعال الزمن
جن شاهدت يم النهر .. جفين يم رايه ارتمن
لن عمي ابو فاضل وكع .. وعيونه بسهام انعمن

الجود طاح اعله عالنهر
وذاك الوعد يم الكمر
وعيوني نصبت مأتمه    انه العليله فاطمه
ـــــــــــــــــــــــــــــــــــــــ
بيه استمر نفس الوضع .. اطول حلم طوله عمر
جاسم والاكبر بالحرب .. من العطش صارو جمر
ومن ظل ابوي ابوحّده .. بس العده بدربه  تمر
حلمي انذبح من عاينت .. كاعد على صدره الشمر

ياويلي من حز منحره
ما ادري بالدنيه اشجره
صارت حياتي مظلمه .. انه العليله فاطمه
ـــــــــــــــــــــــــــــــــــــــ
لسكينه تهمل دمعتي .. وادري برقيه امدللـه
شيصير بيهن ياترا .. لمن يدخلن كربله
عماتي وامي بالدرب .. بيهن تمر جم مشكله
غربه وعطش نار وسبي .. تنطر وصول القافله

حالتهن اتشمت العدو
  لا والي يبقه ولا اخو
بين البراري هايمه .. انه العليله فاطمه
ــــــــــــــــــــــــــــــــــــــــ
ضعن الحبايب من رجع .. جمعت حزنهه غيمتي
معقوله هاي ام الخدر .. متغيره كلش عمّتي
اتكلي ياعمه العده .. حركو عليه خيمتي
وايتام واطفال وحرم .. ظلو يعمه بذمتي

ظل فكري حاير منشده  
  واستغربت هذا الوجه
جرحتني اثار الدمه   انه العليله فاطمه

قصيده مقدمة مجلس للخدمه

يالرايد قبولك ميّه بالميّه
اخدم للامام بخالص النيّه
***

باچر بالقيامه ينصب ميزان
ميّفيدك تره فلان وكلام فلان
اليفيدك بس حُسين وخدمته البرهان
يخلصك من جهنم نار محشيّه
***

صيتك لو كبر لا تنغر بصيتك
لتراب الگبر والدود تاليتك
المهم گلبك يخادم والمهم نيتك
بالك تنغر بدنياك مگضيّه
***

لا تبعد يخادم عن ابوالاكبر
عمرك خلّصه كلّه بخدمت المنبر
بالك بالمجالس مرّه تتكبّر
حسين يگلّك اطلع لا ترد ليّه
***

حسين يريد خادم يقره عالفطره
ما يتعجّب بنفسه اذا يقره
كون يبچّي ناسه ويسچب العبره
وكون ام الحسن تبچي لنواعيّه
***

من حمزه الزغيّر سيّد اليقرون
روح اسمع قصيدة ( گلّي يالميمون )
اكيد بهالقصيده تفهم المضمون
قراها بفطرته ونبرات قدسيّه
***

نتعلّم شعائرنه بشهر عاشور
من عبدالرضا ومن كاظم المنظور
خَطّوا للشعائر واللطم دستور
قصائدهم بقت للآن مقريّه
***

بحسين التزمنه وتشهد ايّامه
حاشه حسين ينسه هناك خدّامه
كل خادم يخدمه ياخذ اوسامه
اليوسمه حسين ثق للجنّة تاليّه

سيد زيد الفحام
_________

عفتوني عفتوني ويحبابي ضيعتوني
تانوني تانوني مو راح تعمه عيوني
يهل المحنه يهل المحنه
**
بيدي الهدوم وكلبي ملجوم بلكت اكسر خاطر الحادي ويردلي
وحدي بالدار وفكري محتار ليش محد امشي ويانه يكلي

كل ساع اطيح اعله الوجه ويكلي ابوي اسم الله
تدرون مو يم المرض ضل بالي يم عبد الله

بجاني بجاني والحادي ما صاحاني
خلاني خلاني من دون كل اخواني
مغربين اهلنه يهل المحنه
****
من تروحون اصبر اشلون يهلي تكتلني بجفاكم كعدت الباب
ليش اليروح ياخذ الروح ينعصر كلبي عصر لو طال الغياب

اشلونج يكلولي الخلك وانه يبويه اشلوني
والدنيه كلها من رحت طلعت تره امن عيوني

نتلاكه نتلاكه مدري اشوكت نتلاكه
مشتاكه مشتاكه وطول ابوي افراكه
ونه اعله ونه يهل المحنه
*



وحدي ضليت واظلم البيت والحزن دك باب بيتي وصاحباني
تغير الحال ودمعي همال انه ابوي اعله الهجر ما عوداني

ليش اليتاني اعله الدرب تيبس الدمعه بخده
من وحده اخلص يا هلي والنوب اطيح بوحده

سهرانه سهرانه عيني امن امس سهرانه
حزنانه حزنانه ومن امن القهر ذبلانه
كل شيبي منه يهل المحنه
*
وحشه الليل تاخذ الحيل ينكطع سباح كلبي من تكطعون
ذيج الايام صارت احلام يهلي اطيب امن المرض لو بس ترجعون

بالطيف يابويه امس وكت المسه اتلاكينه
اشلونج كلتلي بددمعتك وكتلك ابد مو زينه

تدريني تدريني افراك الاهل ماذيني
ناسيني نايني وبغربتي مخليني
ضايع املنه يهل المحنه
****







عكب الاحنان كلبي خلصان وجرحي عالحيطان من راحو رسمته
صار الغروب وسدوا لبوب وانه بالباب انتظرهم وبجي سكته

محد اجاني من هلي واحجيله ضيم البيه
والحادي عني من مشه ما كال هاي بنيه

يالغالي يالغالي يابويه عاين حالي
دلالي دلالي اعليك انفطر دلالي
ومكوع ضنه يهل المحنه
*
تمت
تحسين الخفاجي

#قصائد_محرم الليلة الاولى _ع_١٤٤٥_هـ
ــــــــــــــــــــــــــــــــــــــــــــــــــــــــ

قصيدة.. محرم الحرام.. 1445.
جديد.... (  حياة خادم)




غير بس الدمعه ابد  ماعندي اني

والله  لو  ماانت  ماعيشن ثواني

  يا ابا عبدالله _   يا ابا عبدالله
                
""""""""""""""""""""""""""""""""""""""""""

اهواي امفضل  اعليه

انت يالطبعك حنين

وين  ماكو مجلس اني

اعتنيلك  ( ياحسين)



يامذبوحي    _   شوف اجروحي

         يلماكو مثلك بالدنيه


من حبيتك     _    اني الكيتك

       انت الحب يابو ارقيه



اني دورتك  لكيتك انت غالي

ولذالك  ماكو غيرك شغل بالي

   ياابا عبدالله _ ياابا عبدالله

"""""""""""""""""""""""""""""""""""""""""

فتحت عيني لكيتك

انت ابو الروح الصدك

خيمه  للخادم  جبيره

ويه كل نبضه  تدك



من اخيامك       _    من  ايتامك

       ارزقني شوغة علويه


من الحافر      _    من  العاشر

      خليها الصوره تمر بيه




وحده  من  شوغة رقيه ما اوفيك

لو اظل  ابجي  لمماتي ما اجازيك

   ياابا عبدالله _  ياابا عبدالله
""""""""""""""""""""""""""""""""""""""""

جروحك الف وتسعميه

فدوه  ارزقني  جرح

من  تمر  ابالي  انت

كل دقيقه  انذبح



تارك  حسرات    _   تارك  لجمات

     شكد عنك اهلي يحجولي


اني بزغري        _     الطم صدري

     عفيه  بالخادم صاحولي




من شفت جرحي لجمني طلعت الروح

حللت  دمي  لكيتها  عاشك  النوح

  ياابا عبدالله _  ياابا عبدالله

""""""""""""""""""""""""""""""""""""""""""
كلشي ماريد بحياتي

فقط  نظره ياحسين

امحلفك بعباس اني

اوياك اكضيها ونين




بدونك مولاي       _   ضايع اهواي

          كلما  ابعد  ودليني


يابو الاكبر        _   بجاه  المنحر

     زيدلي  جروحك يحسيني




فقط هاي الخدمه عندي الباقي فلسين

والاهم من هذا  كله  ترضه يحسين

    ياابا عبدالله _ ياابا عبدالله

""""""""""""""""""""""""""""""""""""""""""
حلم عندي يبو الاكبر

ارتجي  طول السنين

امنيه من زغري هايه

صرت خادم ياحسين



لو مر عاشور    _   جن دمي يفور

      أبجي  عالغالي ياروحي


اقره  المقتل      _    والهظمه التل

     لزينب تاخذني جروحي



كربله  جرحي  تضل نوحي وبكائي

كل سنه  عاشور  عندي  كربلائي

   ياابا عبدالله _  ياابا عبدالله
""""""""""""""""""""""""""""""""""""""""""

الخادم _  ابو فدك الشام

#قصائد_محرم الليلة الاولى_ع_١٤٤٥_هـ
ــــــــــــــــــــــــــــــــــــــــــــــــــــــــ
للخدمه والخدام

سيدي او مولاي انت كل رجواي
__

هايم ابابك اهل دمعي وأسيله
واسمك ابروحي حرز يحسين اشيله
والشعار البي اردد ليله ليله
آنه غير احسين ماعندي وسيله

انت امل دنياي انت كل رجواي
__

مدّت الأيد ابعرفنه عار تنعد
لچن يم بابك شرف يحسين تنمد
يمن لولاك الله ماضل ساعه يُعبد
والله احبك والدموع اعليه تشهد

ياطبيب الداي انت كل رجواي
__

آنه ماعندي وسيله غيرك انت
يمن كل الخير شفته من خدمته
ضايع ابدنياي اذا دربك تركته
حلمي ابشباچك الليله عگدته

لاتردني ابهاي انت كل رجواي
__

حلمي ابشباچك اعگدته واريدك
اتحن عليه وأتحسبني من عبيدك
گاعد ابابك اعاين ل الله وايدك
لاتردني الخاطر الكافل عضيدك

ضامي وانت الماي انت كل رجواي
__

يا أمل روحي دخيلك لا تردني
من المدامع والبواچي اعليك زدني
مثل ون يعگوب لبنه خلي وني
بيت للاحزان بين اضلوعي ابني

ياجمر بحشاي انت كل رجواي
__

بيت للاحزان ابني بيه يحسين
كون كل عمري اتلاله دمعة العين
كون كل اسنيني تخلص بينك او بين
زينب المرمر گلبها او شيبه البين

استجب دعواي انت كل رجواي
__

ابو فاطمة الطائي