استشهاد الامام السجاد ع

الليله ابو الباقر بـاخـر انفـاسه
وگـاعد البـاقـر يقره يـم راسه
يقره مصيبة حرگ الخيم
بالهيمه فرت ذيچ الحرم
يقره يم راسه ..
…………………………
العـلـيـل اللـيلـه يـودع بـاحـبـابه
وفوگ راسه الباقر دمعته سچابه
گعد يـم الابـو والدمعـه يجـريها .. ويقـراله المصيبه
قره قصة السبيه وما جره عليها .. زيـنـب يالغـريـبـه

وصارت الدمعه بالهـظم تهمل
التصعد الناگـه صعبه من تنزل
وهـيج بالصدر جرح وألم
بالهـيمه فرت ذيچ الحرم
يقره يم راسه ..
…………………………

يالفض بأنفاسه ودم تصب اعيونه
موسـدينـه گـوه يوجـعـنـه امـتونه
عمر گضاه يون لمن ينام ايريد .. بمتنه هواي الجروح
واثـر للجـامعـه لسـه بقـه بالايـد .. تهيج ألامه بالروح

وبالسبي شاهد قصته الباقر
بجامعـة ايـده لحمـه متناثر
ومتنه بالضرب كـلش ورم
بالهـيمه فـرت ذيـچ الحرم
يقره يم راسه ..

…………………………

بعينه صد للباقر وبالدموع ايگـله
بويه ماخذ روحي ياسهم عبدالله

علـل خلـه بـدليلي وزيـد امصابه .. رضيع ابدمه شفته
وسدته ويه ابوي وهلت انه اترابه .. وبـأيــدي دفـنـته

بويه من شلته دم ترس صدري
چـانت اوداجـه بالـدمـه تجـري
الله اشعمل بينه هالسهم
بالهيمه فرت ذيچ الحرم
يقره يم راسه ..
…………………………

وگبل طَلعت روحه وگبل خمد انفاسه
يصـيح آه يرقـيـه وضل يـدگ ابراسه

مصيـبتـها الظهـر يالبـاقـر اتكـسره .. الماتـت بالخـرابه
بطشت شافت ابوها وقبلت نحره .. بدمـه وبـتـُرابه

بـونــه تشكيله العـاشـر ويــومه
وعالطشت ماتت اختي مهظومه
من گد مابچت راسه انهظم
بالهـيـمـه فـرت ذيـچ الحرم
يقره يم راسه ..
…………………………

وگـالـهم چفنـوني لومـتت بالرايه
الباقي بيها لسه من الكفيل ادميه

الرايـه من هـوت فـوگ النـهـر قـصه .. نرويـها بدمعنه
لهسه بصدري من طاحت بقت غصه .. الراعي المحنه

عگب ابو فاضل بالغـصص عمري
بگـطعـت ازنــوده انكـسر ظـهري
مات وعالنهر طـاح العلم
بالهيمه فرت ذيچ الحرم
يقره يم راسه ..
…………………………

هـــو اصلـن مـيـت بظـهـر ذاك الـعـاشـر
بصدر ابو من شاهد يرض ضلوعه الحافر

ميت من هـذاك اليـوم بالحـومـه .. شـاف ابعـينه الخيول
بحوافرها ضلوع حسين مهشومه .. بصدره گامت اتجول

وشاهـد الحـافـر يمــرد ابگـلبه
وعالترب گـلبه بسحگـته ايگـلبه
ضل اعله الترب يتجاره دم
بالهـيمه فرت ذيچ الحرم
يقره يم راسه ..

الشاعر عقيل الحسناوي..

استشهاد الامام علي السجاد ع

جـابـر يجـابـر .. خــل ارويـلك الصـار
تركض حـراير .. وشـبت بالخيم النـار
من الخيم .. طلعت حرم .. والنار بعبـيـهن

-------------------------------
هوايه ياجابر عذابي .. مايشيله احد مصابي
يهضم الشفـتـه
حسين من گطعوله نحره .. گبالي خيل اتطحنه صدره
وجسمه ماردتـه

شفته من ينذبح .. بصدره حافر يلح
تطشر على الغبره
الخيل المعصبه .. لسحگه متدربه
الحافر على الطبره

ابـصـدره الخـيـل .. لعـبت ويلـي مـيدان
ودم جسمه اليسيل .. فايض على التربان
خيل العدو .. ضلوع الابو .. شمسويه بيـهن
-------------------------------
وعگب ما ذبحو ولينه .. ندار جيش العدو لينه
ابمشاعل نار
تكاثـروا ياعم علينه .. والخيم حرگوها بينه
وماتت النه ازغار

من احرگوها الخيم .. وين افر بالحرم
وحاير انه بعلتي
گطعوا النه الدرب .. الـتنلزم تنضرب
شگد لوعوا عمتي

ياعمـي الانذال .. التشرد يضربوها
يلحگوها بحبال .. وگـوه يچـتفوها
موقف صعب .. شبعن ضرب .. وانظر عليـهن
-------------------------------
خيمتي احترگت عليه .. وگامت اتجر عمتي بيه
واني ما اگدر
علتي اني چبـيره .. وعمتي طايحه بحيره
والهـضم يكـبر

امشي خطوه وطحت .. وبالسياط انلحت
كلهم يطگوني
چفي هم محترگ .. بيش ادفعه اليطگ
اتلگه بمتوني

كـلـهم يطگـون .. بيـه ويشتموني
عليه يضحكون .. برمح يعـثروني
بجدامي الجمر .. ضل يستـعر .. اذاني چويـهن

-------------------------------
والله ياجبر مصيبه .. عمتي زينب غريبه
حامي ما الها
عالنهر ذبحوا حلمـها .. وحيل اذها وهضمها
موت كافـلـها

الچانت مدللـه .. نذلت بكربله
من مات واليها
عمتي بنت الفحل .. وسفه تركب جمل
والشمر يسبيها

عافوها الاخوان .. بطف الغاضريه
مـتانيـها ديــوان .. تدخـلـه سبـيـه
عيون الخدر .. مدمع تدر .. مايگطع بچيـهن

-------------------------------
الحيره ياعمي بخواتي .. الله لو ماخذ حياتي
ولا شفت ماصار
زغار مو مالت هضيمه .. تشب عليهن ليش خيمه
وينچـون بالنار

رقيه سحگت جمر .. سكنه حارت تـفـر
ومچـلـبه بخوله
يشردن من الضرب .. يضيعـنه الدرب
الطـف خـطر كله

ومالـيه انـه حيل .. والحگهن خـواتي
نار وسحگ خيل .. توگـعني خطواتي
شردن ركض .. چن الارض .. ماتحمل مشيـهن

-------------------------------
الشام ياجابر كـتلني .. حيل اذني وهضمني
وزاد لـوعـاتي
يزيد وكفنه على بابـه .. وبيتانه بنص الخرابـه
وهضم عماتي

يهـضم اللي جــره .. وگـلبك تفـطره
ياعمي حيرتـنه
بالخرابه شفت .. رقيه فوگ الطشت
ماتت عـزيزتـنه

وبغــربـة الشـام .. عفناها واجينه
نضل طول الايام .. مايگطع بچينه
وهذا الدمع .. ماينگطع .. لعماتي وسبيـهن

الشاعر عقيل الحسناوي..

تجليبه لاستشهاد الامام السجاد ع

علي السجاد مات الليله بالحـسره
واجت يمه تحضره فاطمه الزهره

قبل ميموت ابو الباقر اجت يمه
بضلع محني الزچـيه فاطمه امه
والسجـاد چـان اينـازع ابسـمه
بچـبده نـار سمه حيل مستـعره

يصد للزهره عينه والدمع يجري
يكلها جده نار السم غدت تسري
منيتي گربت واني نگضه عمري
وللمـثـلي شيفيده بالشفت عمره

يجده بعيني شفت اهوال ماتنشاف
واذا احجي عليج من هضم ينخاف
شفت حسين من حز راسه السياف
ومثنـي الشمر ساحـگ على صدره

يحـز ابراس ابـوي بعيني شاهدته
وطلعت حافيه تركض يجده اخته
تريـد تخـلص الصارت وذر جـثـته
بلكت ماتـدوسـه الخـيل وتـطشره

لچـن عـنه الشمر ياجـده يدفـعـها
بچعب رمحه النذل كلساه يوگعها
يطگها بسوط جده وحيل يوجعها
حـرمـه عمـتي وماتـگـدر تـنـحـره

وعگب ذبحه يجده وكسرت اعظامه
اجـوا صوب المخـيم حـرگـوا اخيامه
وطـشـت بالبـراي وضاعـت ايتـامه
وتـدور ويـن زينـب ويلـي متحـيره

احترك بينه المخيم جده وين انروح
والكـافل ضعـنه عـله النـهـر مـذبـوح
عليمن جـده نعـتب والعتب مسموح
ونشاهدهم جـثث عالگاع متـطشره


الشاعر عقيل الحسناوي..

ليلة استشهاد عزيزة الحسين رقيه ع

جروح ابوجـهك هواي .. شفـافك مارون ماي
يمن مذبوح عطشان .. شكـثر يابويه ذبــلان

--------------------------
قبل ساعـه چـنت يمي بمنامي
اسلم اعليك وانته اترد سلامي
هـسه ليش وجـهك بويـه دامي
شفافك ذابله وحيل انته ضامي

راسك شفته مذبوح .. هواي بشفـتك اجروح
هاجت بيه الاحزان .. شكـثر يابويه ذبــلان

--------------------------
اصـد وجـهـك يـبـويه اتـغـيـر النور
شفـت هـواي وجـهك بويـه مطبور
عـظـم الوجـنه هـذا حيل مكـسور
چا هـم مـثلي انتـه هـواي مسطور

هم هواي طگوك ؟ .. هم بالنار حرگوك؟
اشمن بيك دخان .. شكـثر يابويه ذبــلان
شكـثر يابويه ذبــلان

--------------------------
اشوف هـواي متـغيره عيونك
العـطش يابويه غير حيل لونك
بحلگـك ليش كسروهن سنونك
اذا مـذبـوح الـمـن يضـربـونـك

يمن عطشان منحور .. سنك ليش مكسور
وراسك كله تربان .. شكـثر يابويه ذبــلان

--------------------------

دمك خـل اوخره العامـي العيون
فك عينك يبويه وشوفني شلون
اراويـلك شـصـار بـهـاي المـتـون
بيـه هـواي مـن بعـدك يضـربـون

نزل لعـظامي السوط .. وچـفي بحبل مربوط
الحبل سوالي نيشان .. شكـثر يابويه ذبــلان

--------------------------
عگب ذبحك خيمنه اشتعلت بنار
احـترگت انـي يـبويـه وي الزغـار
انسبينه احنه ودخلنه شام الاخطار
اطـفال الشـام بـينه تشمر احجار

بحجر بينه يشمرون .. يشتمونه ويضحكون
وراسك عالي بالزان .. شكـثر يابويه ذبــلان

--------------------------
بويه الشام تهضم كلش الشام
ونظرات الشماته مـثل السهام
بخـرابه بلا سكـف خلونه انام
خرابه وليـلها مانعـرف شضام

خرابه وصوت الونين .. يـهد الحيل يحسين
نون باليل نسوان .. شكـثر يابويه ذبــلان
شكـثر يابويه ذبــلان


الشاعر عقيل الحسناوي..

شهادة عزيزة الحسين رقيه ع.

بحظنك بويه راسي ردت اخـليه
اشو راسك اجاني وحظن ما بيه
صدرك وينه حظـنـه .. حـوافـرهـم خـذنـه
بــابــا حـسيـن .. بــابــا حـسيـن

……………………………
صدرك ويـنه الـدافـي بحـنـيـنـه
الچـان ايلـمني انـي وي سَكـينه
اشـو بـس راس هذا الجـايبـينه
يعـاينـلـي اشوفـه وتبچـي عينه
اثــاري بخـيـل صدرك مـارديـنه
وجـسـمـك يـاحـبيبي مـوذريـنـه

من شفتك نسيت ابكربله شصار
يمن دفنـوك بويـه بـذاك الحجـار
كـون وياك مـتـنه .. حـوافـرهـم خـذنـه
بــابــا حـسيـن .. بــابــا حـسيـن

……………………………
يمـن داست عـليك الاعـوجـيه
وعفـنـاك ومشـينه عله الوطـيه
ردت حـظـنـك واسـولفـلك عليه
من حـرگـو خـيمـنه جـنود امـيه
گـامـت نـــارهـم اتـچــوي بـيـه
وگـمـت اركـض واطفـيها بـاديه

ركضنه وبابا بابا بكربله نصيح
نعـثـر بالجـمـر خـلونه ونطـيح
خـيمنه من چـوتـنه .. حـوافـرهـم خـذنـه
بــابــا حـسيـن .. بــابــا حـسيـن

……………………………

شردنـه والزلـم لحگـتنه بالخيل
وجلد من المتن بسياطها تـشيل
من ذاك الركض ماضل بعد حيل
تطشرنـه وعلـينه چـلچـل اللـيل
وجـمـعـتنه العـقيله ويـه اللعليل
وتگـابلنه ونـون ودموعـنه تسيل

يـاذاك الــدلال ابكـربـلـه الـــراح
بـيـن اسـيـاط ضلـينـه والـرمـاح
نبـچي وعالي ونـه .. حـوافـرهـم خـذنـه
بــابــا حـسيـن .. بــابــا حـسيـن

……………………………
عگب ماعمنه فوگ المشرعه مات
يبويه من الهـزل خلصنه طيحات
يطگـونه ويـبو فـاضل الصرخـات
العـقـيلـه تحـشم وبالعـين دمعـات
وگـضيناه الدرب يابويه شـوغـات
كـلمـا عالظـعـن راسك جـزه وفات

راسـك بـويــه مـن ايـمـــر عـلـيـنـه
كـلـنـه نصـيـح يـابـويــه انـسـبـينـه
وتصد بحرگـه النـه .. حـوافـرهـم خـذنـه
بــابــا حـسيـن .. بــابــا حـسيـن

……………………………

وللـكـوفـه يـبـويـه مـن دخـلنه
بشماته الناس طلعت تنظر النه
هـذا اللـي يسـبـنـه واليـطـگـنه
وهـذا اللـي يـشـتم الزهره امنه
يـبـويـه بكـربلـه ياريـت مـتـنـه
عــاد المـوت يجـمـعـنه بشملنه

بالكـوفـه عـلـيه الـتـمـت اطفـال
يعـثروني وطيح بجـرت الاحبال
تجرها وكـلنه طحـنه .. حـوافـرهـم خـذنـه
بــابــا حـسيـن .. بــابــا حـسيـن

……………………………
علـيـنـه شـلـون دارت ذيــچ الايـام
شـسولـفـلك يـبويه بدخـلت الشـام
ونـظـرات الشمـاتـه المـثـل السـهـام
شفنه مصاب اشـد من حرگ الخيام
طگـــات الحـجـر تـكـسـر بـالعـظـام
ودمــه تـتجاره گـامت حـرم ايـتـام

هـذا اليجـري دمــه وذاك مكـسـور
بـهـاي الحــالـه طـبـيـنـه للـقـصـور
الهـظم بويه كـتلـنه .. حـوافـرهـم خـذنـه
بــابــا حـسيـن .. بــابــا حـسيـن.

الشاعر عقيل الحسناوي..

بذيچ الخرابه من الحلـم فـزت رقـيـه
واتـصـيح اريـدن والـدي جيـبـوه اليه


تعـبانـه من ذاك السـبـي غمـض جفنـها
نامت خـطيه من الوجع هــود مـتـنـها
طفله ومصيبات السبـي مرادف لفنـها
واشتحمل احزان ومحن طفله وسبيه


حـلمـانـه بالوالـد اجـه يمـسح دمـعـها
الله يـا فـگــد الابـــو كـاسـر ضلـعـها
من كربله الشام الحزن ما خف وجعها
بالشام ضعـفـين الهـظم بـالغـاظـريـه


گـعدت لگت ما مش ابو بذيـچ الخرابه
اتـفـرفـح وتصرخ غـدت چـا وينـه بابه
تشكيله من ضيم السبي ورادت عـتابه
ما تـدري بـغـيـابـك انــه شصاير عليه


وجـابــولـهـا راس الابــو نـاگــع ابـدمــه
وبلـهـفـه گـعـدت شبگـتـه وگـامت تشمه
بوجهه غميجه اجروح اله بـهـيده تـلـزمه
وگـالـتـلـه مـثلك صـد الي مجروحه اديه

تحچـيلـه عالصار وجـره عـن ذيـچ الايــام
عن فرگـته وعن السبـي وعن حرگ الخيام
لحد ما وصل بيها الوكت يـم خـربـت الشام
وبـويه اشـدهـن فرگـتـك چــانـت عـلــيـه

راوونـي انــواع الـهـظــم بـويـه يـمـذبـوح
هـواي مصايب عشت انــه واهـواي الجـروح
وشهگت رقيه عله الطشت ولن طلعت الروح
بـذيـچ الخـرابـه وبـالغـرب جـتـها المـنـيـه

الشاعر عقيل الحسناوي..
.

الحسين ع ينعى الحسن ع

فارگـني اخـوي وانـه الـه بعـازه
شلون اجنازه راح اتشيع اجنازه
مــات بفـرگـتـه الحـيل ..
ونهاري اصبح علي ليل .. راح اخوي

………………………………

ابن امي الحسن من روحي اعز چان
هـسـه اشلـون اصـيـرن لـيــه دفــان
واشيله علـه المـتـن ما اعرف اشلون
وادفـنـه شلـون بـيدي بحـر الاحسان

تمـنـيـته الي الموت .. ولا شـيلك يتـابـوت
ومعقـوله وللگبور .. بخوي اصبحت زاتوت

مو نعـشه يريت اليـهدل امتوني
تمنيت ابمكـانـه اني اليشيعـوني
شلون اجنازتـه انشـيل
ونهاري اصبح علي ليل .. راح اخوي

………………………………


الچان احزام ظهري واني اله احزام
عليـنـه  شلـون دارت هـسـه الايـام
مـات وردت ادفـنـه بـس يهـل ناس
نعـشـه اهـل الحـقـد صابـوه بسـهام

اخوي الحسن سموه .. وتشييعه يمنعوه
ويـم جده النبي هناك .. ماقـبلو يدفـنوه

بالسم چـبدته ماكـفه مردوها
بسهام الحـقد جـثـته صابوها
ومن نعشه الدمه يسيل
ونهـاري اصبح علي ليل .. راح اخوي

………………………………

شفت چـبده اخوي ابـسم تگـطع
والاحـشاء گـامـت شـفـت  تطـلع
ومن قـوة الألـم يـتـلـوه يصـيـح
وتـطلـع روحـه وي ونـاتـه اسمع

وابن امــي تـغـيـر .. وجـهه لونـه اصفر
وشفت امي الزچيه .. يم الراس تحضر

شفت ام الحسن يم الحسن حضرت
اه يـبـني تصـيح وعالـوجـن لـطـمت
ويـعـلـه مـنـهـا العـويل
ونهاري اصبح علي ليل .. راح اخوي

………………………………

وتـگـابلـنـه انــه وامـي الزچـيه
ويم جـثة الحسن نبچي سويه
وزينب هـم اجت ويانه تـنحب
ويـم راسه نعـقـد مجلس عزيه

شكـثر لمصابه نحـنـه .. وعليه اشگـد لطمـنه
وصحنه بصوت الاحزان .. يريت اوياك متنه

وگتله افتح اعيونك هاي اجت امك
گـامـت شـيـبـها اتـخـضـبه من دمك
وتـصـيـح بــ أه وبـويل
ونهاري اصبح علي ليل .. راح اخوي

………………………………
فتح عينه وبچـه ويصيح يومك
ما كـو مـثله ابـد عالغـبره نـومك
يذبحـونك يگـلي خـويه عطشان
ويگـطعوك ويسلـبونك اهـدومك

تضل عالگاع عريان .. تسترك خويه تربان
ثـلـث تيام يحـسين .. تـضل ابـدون دفـان

راسي  هسه سالم شايلـه بـأيدك
وانته السيف باچر يگطع اوريدك
وتسحگ جسمك الخيل
ونهـاري اصبح علي ليل .. راح اخوي

الشاعر عقيل الحسناوي..

تمت في ـ مشهد ـ حرم السلطان ع

(استشهاد الحسن المجتبى ع)

حمل نعـشه ويهـل دمعه
ابـو اليـمه وحـنى ضلـعه
يحس ويـه الحسن بـيده دفـن عمره
نهدم حيله وعلى فراگـه نكسر ظهره

…………………………
الحسن لمن الى الباري عرجت روحه
بچــه الفـگـده ابـو اليمـه وعلـه نوحه
رحـل عنه وفـتحهـن بالأسى جروحه
واحــلام الاخــوه الـلـيلـه مـذبـوحــه

على امتونه حمل نعشه
بـَلا خوته العمر وحـشه
اذا مــات الاخــو مـا ينـجـبـر كـسـره
نهدم حيله وعلى فراگـه نكسر ظهره
ابـو اليـمه وحنى ظـهره
…………………………

يشيعه وچن جبل شايل عله امتونه
راح الچـان شـايـل طـيـبـتـه ولـونـه
راح الـلـي تـذكـره بفـاطمـه عـيـونـه
الحـسن هـيـبـة علي چـانـو ينادونـه


يشيعه وگوه ضل يمشي ..
الخسر مثله خسر كـلشي
يعينه الله وعلى مصابه يعـظم اجره
نهدم حيله وعلى فراگـه نكسر ظهره

…………………………

الحُـسين بهـل مصيبه مخـتلف حـاله
بدليـلـه چـن رمـح لا مـو حـزن شـاله
الفرگـه ويـه الاخـو بهـل حـاله چـتاله
اليفـارگـلـه اخــو مـوتـه تــره اشـواله

الاخو يكـتل تره افراگـه ..
اذا غـفـلـه الـدهـر بـاگـه
يخلف بالگـلب مـو جمره الـف جمره
نهدم حيله وعلى فراگـه نكسر ظهره

…………………………

ابو اليمه عله ابومحمد وگـع حيله
وابـو فاضل ركـض يـمـه يتچـيـله
ولمـح زينب اخـيته بعـبره توميله
ودمعها عله الاخو عالوجنه اتسيله

وجرن وي زينب ادموعه ..
وابو فاضل حنى ضلوعه
وعله اخوانه الگمر ضاگ الهوه بصدره
نهـدم حـيله وعلى فراگـه نكسر ظهره

…………………………

نكـسر گـلبـه ابـو اليمه لبـچـي زينب
لمصيبتـها العلـه خوتها الرمش شيب
عله هاي الحاله ابوفاضل ظهر حدب
الحسن من النـعش لنه بحـزن ينحب

طلب منـهـم ينـزلـونه ..
وعلى زينب يطمنونه
عله زينب مـيت وگـام وبچـه بعـبره
نهدم حيله وعلى فراگـه نكسر ظهره

…………………………
لمصايـبـها العـقـيله يهـون كـل امصاب
باچـر بالسـبـي يمـشـوهـا ويـه اجنـاب
وتصد لخوتها بالطف نومه فوگ اتراب
وخيمـتـها يحرگـوها السـتر واحـجـاب

تهـد كـل حيل مصيبـتها ..
مره يحرگـوها خـيمـتها
اخوها علـه الثـره نايـم يصب نحـره
نهدم حيله وعلى فراگـه نكسر ظهره


الشاعر عقيل الحسناوي..

.استشهاد الامام الحسن ع

خـويه يالحسـن تـدري .. بغـيابك ينكسر ظـهري
       مـا يسـوه بـدونـك يالاخـو عمـري

-------------------------
اخوك اني الحُسين الگاعد اگبالك
هـد حـيلي يخـويه ومايسر حالك
مــلك المـوت گـاعـد يمـنه يبرالك
بنـظـراتك اشـوف اتـودع اعـيالك

صحت رمله تحاچيها .. وتعـاينـلي وتوصيها
       وللقاسم  تعـايـن والـدمـع  يجـري
       مـا يسـوه بـدونـك يالاخـو عمـري

-------------------------
بـنـظـراتـك وداع  وفـرگـه للـخــوه
تـظـن عمري يخويه بغيـبتك يسوه
يخـويـه منـين اجـتك گلي هالـبلوه
تـلـوج من الـوجـع يـبن امـي تـتلوه

شلها وياك چا جـعده .. وبالسـم مردت الچـبده
       بـين احـشاك سمك نار چـن تسري
       مـا يسـوه بـدونـك يالاخـو عمـري

-------------------------
شـمسـوي بچـبدتـك يالاخــو سمـك
تلـوج اگبالي يجـري بالطـشت دمـك
گمت تچوي يخويه بأيدي اذا الزمك
يلـهـب نــار مـن السـم غـده جـسمك

نـار احشاك احسنـها ..وروحـك ماگـطع ونـها
       عسن نارك يخويه اندارت الكـتري
       مـا يسـوه بـدونـك يالاخـو عمـري

-------------------------
حـالك يالحـسن خـلاني بـالحـيـره
هضمتي الفرگتك يبن امي اچبيره
ردتك وضعي بالطف توگـف اتديره
وتوگـفلي ويـه اخيك راعي الغـيره

باچر بالطـف الوحـدي .. لا خـوانـي لاولــدي
       وبـين اعداي اوگـف حاير ابـأمري
       مـا يسـوه بـدونـك يالاخـو عمـري

-------------------------
باچـر خـويه بالطـف مايسر حالي
گـبالـي يـنـذبـح غـالي بأثـر غـالي
وعلى زينـب اخـتـنه ينشغـل بالي
عگـب ماننذبـح يصبـح شـمر والي

الشمر حادي بضعن زينب .. عگب عباس المعـتب
       زينـب تـنسبي مـن ينگـطع نحـري
       مـا يسـوه بـدونـك يالاخـو عمـري

-------------------------
عگب ذبحـي يخويه انسحگ بالخيل
على التربان دمي من الجروح ايسيل
وبالـ عـاشر يصب اعله العقـيله الويل
تـدور اطـفال ضاعـوا منـها نـص الـيل


زينـب بت علي بحـيره .. تنادي صاحب الغـيره
       الحگني يبو الغيره انـسلب خدري
       مـا يسـوه بـدونـك يالاخـو عمـري


الشاعر عقيل الحسناوي..

زينب ع تحيي ذكرى استشهاد الحسن ع في خربة الشام
نعي..

هل شهره صفر خويه علينه
وتمر ذكرة وفاتك يالحسن بينه
وگعدنه بالخربه ومجلس احيينه
ولطمنه عليك يبن امي وبچينه
يالچبدك بسمهم ما ردينه
وگبرك عن گبر جدك باعدينه
وبالنشاب نعشك صايبينه
اريد اوياك اسولف ياولينه
دريت احسين اخيك ذابحينه؟
دريت بخيل صدره طاحنينه
دريت برمح راسه شايلينه
دريت اثيابه اخيك سالبينه
دريت الگمر طفو خويه عينه
ويسرته انگطعت وگطعو يمينه
وراسه بعمد ويلي جاسمينه
دريت احترگت اخيمنه علينه
ويخويه اخلاف عزنه اتسلبينه
وركضنه عله الجمر ويچوي بينه
يبو محمد تره للشام انسبينه
ودخلنه اقصور نتستر بدينه
ويتشمت يخويه الباع دينه
ويزيد اعلينه تضحك خويه عينه
يشتمني ويسب حيدر ولينه
ويريد ايسمع الوادم بچينه


الشاعر عقيل الحسناوي..
.

موشح ..

جـيـنـه نـنـشـد كـربلـه بـالاربـعـين
زينب اشلون التـگـت وي الحسين

جينه وادموع الحزن عالخـد تـصب
نـريـد نـتـلـگـه الاجـت مـن الـغـرب
شلـون زينب كـربـلـه راحـت تـطـب
المنـها طلعت عالهزل مچـتوفه ادين


شلـون طبـت كربـلـه عگب السبي
تمشي چانت لو اجت تحبي حبي
شلون شافـت گـبر اخوها الطالبي
وشبگـت اتـرابه العقيله بـيا حنين


بـيـا وضع زينب اجـت يـم الگـبر
بـيا مصيـبـه لا گـتـه وبـيـا عـسر
وعدله ضلت لو خلص منها العمر
شسولفت وي الاخـو ذاك الحِنين


شسولفت ويـاه عن ذيـچ الجـروح
عن سبيـها وعن هضمـها الما يروح
وعجبه يم حسين ما طلعت الروح
حيـن تشكـيله ويـرد صوتـه بونين


شسولفـتـله او ونـته بحـسره عـلت
شسولفـتـله وتـربـتـه ادموع انبـعت
ولـيـش ذاهـت روحـهـا لمـن بـچـت
الله يدري شسولـفـت واقـع حـزيـن


يجـوز گـالتله انسبيت اعله الهـزل
واحـمـلت ضيـم الـذي مـا ينحـمل
خويه عالنـاگـه ويوگـعـنـي الـنـذل
يضـَحـك اعليه يخـويـه الشامتين


يجـوز گـالتله مشت زينب ابسوگ
وطرت بنـص الخلـگ بـيـنه النـوگ
وگـمـنه نسمع حچي النه ما يلـوگ
يشـتـمـون امـنـه وأمير المؤمـنين


بـذيــچ الولايــات نـاگـتـنـه تــدور
وتالي زينب بت علي طبت اقصور
وبطشت راسـك شفـت بالدم يفـور
حيـن يشتـمـني يزيـد ابن اللـعـيـن


خويه شحچيلك بعد شروي وشقص
والسـوالف چــن عـظم بيـهـن اغـص
طفـلـه مـن رديـتـلـك عـنـدي نـقـص
خاف تـنشدني وتـگـلي ارقـيه ويـن


الشاعر عقيل الحسناوي..
.

من جروح يوم الاربعين

                   رد ضعنا .. وين اهلنا
استقبلوا ضعن الحزينه .. من اليسر هلـ يوم اجينه

-----------------------
هاليوم اجـيـنه مـن اليسر  وبـيا وضـع ردينه
بهضم وغرب. لوعة گلب حزن وألم هم بينه
بالشام شفنه شگد هضم ضحكة شماته علينه
طـبـينه للـشـام وشمـر  عـگـب الگـمر حـادينه

             واني حالي  .. بلايه والي
وبحبل مچتوفه ادينه .. من اليسر هلـ يوم اجينه

-----------------------
شحـچـي شـسولف ياجرح  عن ياقهر مراني
اهواي ابد ماتنحسب  تشيب الجنين احزاني
من يوم مارحـت وعـفت  امـذبحـين اخواني
درب اليسر ضيم وقهر  شماتـت عـدو راواني

                دنيه دارت .. وبينه جارت
وصبت امصايب علينه .. من اليسر هلـ يوم اجينه

-----------------------
من يوم ما داس الشمر  صدرك يعشرة زغري
لـ هـاساعـه يابـن فاطـمه محـتاره اني بأمري
من سَـلبوا ثوبـك اجـوا  ياخويه سِلبوا خدري
وياريت لحـظة مصرعك يمـك هجـرني عمري

         ولا سبوني .. وركبوني
ناگه هزله ياولينه .. من اليسر هلـ يوم اجينه

-----------------------
ومن عگب كافل هيبيتي  ودعت يمه الهيبه
يامـر علي تـالي الوكـت  هـذا الشمر  عجيبه
تمـنيت تبـلعـني الارض ولا شفنه هلـ مصيبه
بـت فاطمه وحيدر علي  تمشي بـيسر غريبه

                    يامصابي .. ويا عذابي
مو ابوفاضل يحدي بينه .. من اليسر هلـ يوم اجينه

-----------------------
عالنـاگــه مشـوني بـيسر ومچـتـفـه بحـبالي
طول الدرب چـان الضرب فوگ المتن يبرالي
كالساعه امشي والتفت. ضل فكري يم اعيالي
خـافن طفـل نـص الدرب ايضـيع مـن اطفالي

                  دولبـوني .. ومرمروني
كلفه يا خويه الضعينه .. من اليسر هلـ يوم اجينه

-----------------------
ذاك الـدرب كـله ابـد مـا بطـلن دمعـاتي
امشـي وعايـن خـايفـه واتفـگـد ابنياتي
يبن امي كل ذاك الدرب  مابطلت وناتي
عشـرتـنه اذكرها الگبل وتحسر من الأتي

         بهذا وضعي .. اجري دمعي
واذكر ايام المدينه .. من اليسر هلـ يوم اجينه


الشاعر عقيل الحسناوي..

رجوع السبايا الى كربلاء

خويه الك ردينه.. وبهضم نادينه
وبهضم نادينه.. ياعباس.. ياعباس
…………
خويه جيت من اليسر يابعد عمري
شوگ بيه الشوفتك مالمني صبري
خويه اريدن يمك اذكر ذاك خدري
التفرهد مني خويه بدرب يسري

خويه عشت بخيبه.. عگب ذيچ الهيبه
عگب ذيچ الهيبه.. ياعباس
…………
ارد اسولف باليسر جيت الجرالي
عالنهر من عفتك اني اختلف حالي
عيني مانامت ابد كل هاليالي
لوغفيت ابسوط الشمر اعتنالي

لو أغمض عيني.. يطگني ويبچيني
يطگني ويبچيني.. ياعباس
……………
ألشمر ياخويه من بعدك هضمني
امشي عالناگه واجه برمحه دفعني
يضحك اجنوده يجي بسوطه يطگني
وخويه من طگه بعد ماهيسه متني

ما احس بمتوني.. بكثر ماطگوني
بكثر ماطگوني.. ياعباس
……………
راح احچيلك هضم ذيچ الدواوين
من دخلت امچتفه ويه النساوين
خويه شفته بعيني يضرب راس الحسين
يگلي زينب كافلچ عباس چا وين

يگلي شنهي احساسچ.. من انذبح عباس
من انذبح عباسچ.. ياعباس
……………
بعينه ينضرلي يزيد ابكل شماته
يگلي وين الماگدر يحمي خواته
وينه ألماعاف زينب كل حياته
گبال راسه راح ابچيهن بناته

گبالي يضرب راسك.. بخيزرانه داسك
بخيزرانه داسك.. ياعباس
……………
ومن عگب راسك يعباس ومصابه
تالي امرهم يگعدونه بخرابه
فراش مابيها وگعدنه عله الترابه
وگلبي شيفده بعد لومه وعتابه

ماتطيب اجروحي.. ونتي ولانوحي
ونتي ولانوحي.. ياعباس

الشاعر عقيل الحسناوي

( استشهاد الامام الرضا ع)
لحن مثل طبع النسر طبعي

اجــت يـم الرضا اللـيلـه بكـسرهـا فاطمه الزهـره
لأرض طوس اعتنت تنحب عله بنها الثامن بعبره

غريباً وا غريبا .. غريباً وا غريبا

……………………………

ارض طوس اعتنت ليها الحزينه الطاهره البضعه
تـولـول بالحـزن وتصـب عله سطرتها دمه الدمعه
وبصـوت القـهـر واشجـان گـامـت فـاطـمـه تـنـعـه
آه يـبـنــي الـگـضـه مسـمـوم نحـبـه وبغـرب عمره

غريباً وا غريبا .. غريباً وا غريبا

……………………………

گـعـدت يـم ابنـها اتنـوح بحـظنـها رادت اتـوسده
ولنـها تصدلـه وتـشـوفـه زراگ السـم طعـن خـده
وگـام من الألـم ينـزف دم حـلـگـه ولفـض چـبـده
والزهـره تصدلـه ولــن تـلـطـم خـدهـا بـالحـسره

غريباً وا غريبا .. غريباً وا غريبا

……………………………

بـزويـه تـكـتـرت فاطـم ودمعـها گـامت اتـصبه
هــواي اتـألـمـت هـيـه خـطـره حـالـتـه وصعـبه
ياوسفـه الرضا عـمـره بسم يخلـص عگب غربه
غريـب وحالـتـه الصعـبه كـل خاطر تـره تكسره

غريباً وا غريبا .. غريباً وا غريبا

……………………………

والاصعب من جرح سمه وداعه لذيچه عايلته
بنـظـراتـه يـودعـهـم وادمـوعــه تصب سكـتـه
وعـبـره بصوتـه طلـعـها سلام الفـاطمه اخـته
بعـيـده عـنـه معصومه ماگـدرت تجي تحضره

غريباً وا غريبا .. غريباً وا غريبا

……………………………
هنـانه تـذكـرت حالـه الزهـره وصاحت وناحت
وداع حـسيـنـهـا وزيـنـب لـمـن للـيـسـر راحـت
الاخت عالناگه اتودعه اخوها وبالهضم صاحت
اودعـك واني مچـتـوفه يمن نايم على الغـبـره

غريباً وا غريبا .. غريباً وا غريبا

……………………………
الرضا يسمع ونين امه الزچيه وصبت اعيونـه
ييـمه يگـلـها انعـيلي عـالسـلـبـوهـن اضعـونـه
اريـدن مجـلـس بصوتـچ وعـيالي يسمـعـونـه
يـيمه مجـلسچ هـذا يـضل طـول العمـر ذكـره

غريباً وا غريبا .. غريباً وا غريبا

……………………………
اقريـلي عله الذبحـو رضيعـه بالسهم عـطشان
وهوه عله الرمح راسه وجسمه موسد التربان
وحريمه بهـيمـه تـتراكض الهـن مابقه صيوان
ستر ماظل ظهـر عاشر بخـيمـهن نـار متوجره

غريباً وا غريبا .. غريباً وا غريبا

الشاعر عقيل الحسناوي..

عودة السيده زينب ع يوم الاربعين

مـن الـيـسر يحـسين لمـن رديـت
گبرك ازوره اشلون خويه احتاريت
بضعن السبيه .. ماجت رقيه
هناك ادفنـتها .. بشام الرزيه
…………………………......

رديـت من ذاك اليـسر ودمـع الهـظم اديـره
وبروحي كل ذاك الدرب تاكل يخويه الحيره
الگـاك خويه بـيـا وجـه ياحـسرتي الچـبـيـره
ضعـن السبي لمن رجـع فـاگــد بـعـد زغـيره

بذني وصيتك خويه من صار اوداع
چنت برقيه توصي وانته عله الگـاع
خويه من اجيتك .. ومرمي لگيتك
چـانــت رقـيــه .. اخـر وصـيـتك

…………………………......

بـيـن الهـظم بـين التـعـب الشفته خويه بـيسري
وما بيـن شوگي ولهفـتي والمستحه الـهـد ظهري
والله يبعد اخـتك حرت شحچي وشگول ابعذري
بـس راح اخـبرك مـا جــره ولله افــوض امـري

لمن يخويه الراس منك گـطعـوه
وبالنار ياخـويه المخيـم حرگـوه
خـويه نسبـيـنه .. ولـيه نـوليـنه
وياخويه بحبال .. شدوها ادينه

…………………………......

اخذونه خويه عله الهزل وچتفونه وحده بوحده
حاديـنـه يحـسـين الشـمر ذرة رحــم مـا عـنـده
كـل ساعـه يضـرب نـاگـتي يوگـعـني نـيـه العنده
وبالسوط مـتـني ورمــه ولا اخــو الـعـنـدي يـرده

بنص الضعـن يـتـوسط وضل ايصيح
يجنودي زينب كون كل ساعه اتطيح
ياخويه بلـوه .. ومتحمله گـوه
يضحك علينه .. ويـن الميسوه

…………………………......

وللكـوفه رحـت ميـسره ودارت يخـويه الايـام
الچـنت اني اميرتـها گـبل طبـيتها وعندي ايـتام
واتعـجبـو زينب تـطب مچـتـوفه بنت الضرغام
من الكوفه كملت السبي واخذوني خويه للشام

والشام اه الشام الـف مـيت اه
الديوان ياخويه دخلـته بويلاه
بين اليضحكون .. وبين اليشتمون
يخويه يحسين .. طبيت انه اشلون

…………………………......

طبيت ياخويه القصر وضل حالي يبچي الحالي
وينـظر يزيـد عله الضعن ويضحك بصوت العالي
وگـباله راسـك بالـطشت ويضرب الراس اگـبالي
وما ادري امسـح دمعـتي امسـح دمــوع اطفـالي

كـل ما يطـگ الراس الاطفـال اتـلـوع
وگلبي عله راسك يلاخو ضل مشلوع
من يضرب الراس .. عيني عله عباس
ومابـيـها نخــوه .. وتـفـزعلك الناس

…………………………......

وياخـويه من ذاك القـصر بـيـتنه تالي بخربه
لا سگـف بيها ولا ستر وليلـتـنه چانت صـعبه
نامن بناتي من التعب واني احرس من الغربه
وگـعدت رقـيه ورادتك وجابـولـها الي اتـطلبه

جابولها خويه بطشت ذاك الراس
وعالراس چان الها اخير الانفاس
خويه مصيبه .. تموت الحبيبه
هناك ادفنتها .. وجيتك غريبه

الشاعر عقيل الحسناوي..

ليلة دفن ابو الزهراء محمد ص

يحيدر والدي ادفنته .. دفنت وياه عسن بنته
         يحيدر وحدي راح ابقه وغريبه
………………………
اشوفك جاي ياحيدر ثگيله برجلك الخطوه
عله خاصرتك تحط ايدك تجرجر بالنفَس گوه
الچنت وياه ظهر واحد  اجيت وياك ما هوه
اظن اچفوفك اتگلي  دفنت المصطفى توه

وروحك مشتعل ونها .. چفوفك دفنتك چنها
         شمـال اعمـامـتك كلش تريـبه
         يحيدر وحدي راح ابقه وغريبه
………………………
دمعتك صايره بطولك يحيدر منكسر ظهرك
اشوفك تاكل بروحك وايدك تاكل بصدرك
تگعد ساعه ساعه تگوم  معلگ چفك بخصرك
شمالك ماتحاچيني  صبرك ياعلي صبرك

اصبرك لو تصبرني .. اموتن راح من حزني
         چبـيره اعليك ادريـها المصيبه
         يحيدر وحدي راح ابقه وغريبه
………………………
شگلك يالخذت حيلي ودفنته بمگبرة حزنك
كسرة گلبي بكثر نوحك راح تموت من ونك
راح الچان خيمه النه اليحامي عني او عنك
يبو الشدات اظن باچر الشدايد راح يلونك

من الوذن ياعلي اببابي .. الثاني يحرگ احجابي
         ويرد يحـرگ علي داري  عجيـبه
         يحيدر وحدي راح ابقه وغريبه
………………………
عگب عين النبي باچر تدوس الزمره نص دارك
ويحرگ ياعلي دارك  الچان ايخاف فقارك
ويدفع بابك برجله الچان اليلوذ بكتارك
والاصعب يحامي الجار  مايفزع الك جارك

محد يفزع يمنعه .. عن دارك يجي يرجعه
          متهـدلـك ولا مـن عدها شيـبه
         يحيدر وحدي راح ابقه وغريبه
………………………
وجدامك يبو الحمله ضلعي ياعلي ايكسره
يدفع بابك اعليه  وماتگدر تجي توخره
يحيدر غمض عيونك لونه جابني بسطره
اخافن تنسه الوصيه وتذبحه اليضرب الزهره

اصيحن ياعلي صبرك .. نطيني بهالوضع ظهرك
        شتحـمل محسن بهـالنـار اجـيبه؟
         يحيدر وحدي راح ابقه وغريبه
………………………
بس اشلون اني اصبر  يحيدر من يجرونك
ومن كل صوب ياحيدر ابواترهم يحيطونك
اخاف الثاني والاول على البيعه يجبرونك
واخافن ياعلي بغيهم وحقدهم لا يذبحونك

الاول ياعلي يريدك .. تبايع للحكم بيدك
       ويريد الثاني ذبحك من نصيبه
       يحيدر وحدي راح ابقه وغريبه


الشاعر عقيل الحسناوي..

وداع يتـيمة النبـوه.. 

وداعــة الله بالسـلامـه .. ونـلـتـقي يـوم القـيامـه
بويـه واشكـيلك غـربـتي
بعـيني مانشفـت دمعـتي .. وداعــة الله
----------------------------------
بويه بس ماغمضت عيونك اجوني
ابــاب داري  يـامـحــمـد شـتـمـوني
الـثـانـي والاول يـبـويـه مـا رعوني
قــرروا بـالـنــار بـويــه يحـرگــوني

عليه دفـعـوا بويـه بـابي .. ولـذت حتى اسـتر حجـابي
وكسروا اضلوعي بعصرتي
بعـيـني مانشـفـت دمعـتي ..  وداعــة الله
----------------------------------
تــراب گـبـرك مـايـبـس يابـويـه بعـده
وصب عليه الثاني كُرها وضيم حقده
تجــاوز الحــد بـويــه وعـلـيـه تـعــده
يطـگـنـي وانـي حـرمـه مـا اگـدر ارده

بعـيني يابـويه سطـرني ..حـتى طـيح قـرط اذنـي
وعيني حمره من سطرتي 
بعـيني مانشـفـت دمعـتي ..  وداعــة الله
----------------------------------
بـويـه مـو انـي التـسـمـيني الزَكـيه
ليـش چـــا يتـجـاسر الظـالم عـلـيه
ليش قـنـفـذ سوطه يلتف اعله اديه
طايحـه علـه الگـاع يرفـس هـو بيه

طايحه عله الگـاع الوجـن .. والدمـوع بعـيني يجـرن
صعـبه يابـويه مـحـنـتي
بعـيني مانشفـت دمعتي .. وداعــة الله
----------------------------------
طـاح محـسن بـويـه منـي مـن عـصـرتـه
وطحت فوگ اوليدي بجروحي وحظنته
يـذبـحـه بـويـه ايـريـد بــس اني منـعـته
ورمـحــه ابخـاصرتي اجـت بـويه ضربته

بالرمـح لمـن ضـربـني  .. راد يـذبـح محـسن ابني
وعالـولـد صارت وگـعـتي
بعـيني مانشـفـت دمعـتي .. وداعــة الله
----------------------------------
بـويـه من جـابوا حطبـهم شبوا النار
والحـسن وحـسين چانوا يمي بالدار
ويـن اروحـن وين افــر ابهـاي الزغار
بزينب ابنـيتي الزغـيره فكري محتار

تخـيـلت هـاي العـقـيلـه .. بكـربلـه ياهـم تـشـيلـه
بالخـيم محـتـاره بـنـتي
بعيني مانشفـت دمعـتي .. وداعــة الله
----------------------------------
بـويـه من چـوتـني نيـرانـه وجمرها
تخـيلت بالطــف شنـو زينب صبرها
بيـن نيـران الخـيـم يخـلص عـمـرها
شلـون عگـب حـسين يتـدبـر امـرها

حـالـها شلـون الحـزيـنـه .. بـلا عـلـم تمـشي الضعـينه
شتـعـلت بروحي جمرتي
بعـيني مانشفـت دمعـتي .. وداعــة الله


الشاعر عقيل الحسناوي..

     

نعـي.
بعد دفن النبي المصطفى ص جاءت فاطمه ع تسأل علي ع عن الوصيه.

من مات ابوي شخبرك
مقهور چنت اني انظرك
خبرني عالوصيه

يادار راح اليحترگ
ويا باب راح الينطبگ
ويكسر ظلع علويه

العلويه ياهي التنصفع
ابخدها ياچف ينطبع
قنفذ يطگ ياهيه

بس لا يحيدر هالمره
اني وضلوعي مكسره
وبنارهم مچويه

شمسويه ياحيدر اله
وبيتي يحرگه بمشعله
يهجم يجي عليه

مواني بت طه النبي
ومرة الوصي الغالبي
وفاطم انا الزچيه

يعرفني زين اني منو
ابسوطه يضربني شكو
وليش اشگف اباديه

يضربني اطيح وحالتي
انزف دمه من وجنتي
وعيني بعد مدميه

عالگاع الوجن والجمر
يچويني گام ابكل كتر
وبسماري نابت بيه

وبخصري من طكني برمح
المحسن سگط بس منذبح
ويلوج يم رجليه

يافضه اصيح ودمعتي
تلچملي گامت سطرتي
وي بني طحت مرميه

الشاعر عقيل الحسناوي..

ليلة دفن ابا الزهراء ع

علي الليله نكسر ظهره .. دفـن بيده ابو الزهره
علي دافـن حبـيـبه .. شعـظم هاي المصيبه
………………………
رجع يـم فاطمه حيدر حاني من الألم ضلعه
يتمايل علي بمشيه عله شيباته يصب دمعه
علي ذاك الجـبل هـسه النسمـه تگـدر توگـعه
رجـع للزهـره بالعـبره لمصيبـتـهم گـعد ينـعه

نعـه بصوت الحزن الها .. راح المصطفى يگـلها
نفجـر حيدر نحـيبه .. شعـظم هاي المصيبه
………………………
يصد الفاطمـه وعـينه تصـب عـبره بأثـر عبره
يروح المصطفى توني دفنت المصطفى بگبره
اليدفنـلـه اخـو يعـني  دفـن ويـه الاخـو عمره
مـن هـايـه وعـرفـنـاهـا معـنى اليـنكسر ظـهره

الدفن بيده الاخو توه  .. عله بيته تهـد زلم گوه
وحـيد ايظل نصيـبه .. شعـظم هاي المصيبه
………………………

يبت طه النبي اتحظري بعد ساعه الهظم يبدي
محمد بيدي واريتـه ودرو  هـسه صرت وحدي
على داري تـهـد ربـعـه  تريـد البـيعـه من عندي
وتشب نـار الحقـد بـينـه وتتراكض رعب ولدي

الوصيه مچـتفه اديـه .. من اشوفچ انتي مچويه
بجـمـر يسعـر لهـيـبه .. شعـظم هاي المصيبه
………………………

العـدل لازم يعـزونه ويواسـونه بمـصيـبتـنه
لچـنهم من رحل طـه  استغـلو بعده وحدتنه
يزهـره استخـلفي الله يشاهـد هـوه محنتنه
نضل بعـد النبي بحيره يزهره وغربه غربتنه

بعـد طـه يخـذلـونـه .. الغـرب بعـده يسمـونه
غريب ويه الغريبه .. شعـظم هاي المصيبه
………………………
يفاطم لو اجو للدار الحطب راحو يجيبونه
وعلى باب النبي بغيهم بمشاعلهم يحرگونه
وضلعـچ ياضلع طـه على الحايط يكسرونه
يوجه الله بحقد وجهـچ يفاطمتي يلطمونه

يبت طـه يلـطمـونـچ .. يزهره ويعـمن عيونچ
وجرحچ ماله طيبه .. شعـظم هاي المصيبه
………………………

يزهرة عمري وسنيني گصيره اسنينچ اويايه
تمـوتـيـن بـهـظـم واني اضـلـن للـمـحـن هـايه
علي بعـدچ يضـل اسمـه يرتـلـونه بحـزن أيـه
فگـد المصطفى وفگـدچ  عليه يصيرن هوايه

اصبر فاطمه ادعـيلي .. بفگـدكم ينـهدم حيلي
علي يكـثر مشـيـبه .. شعـظم هاي المصيبه


الشاعر عقيل الحسناوي..

مواساة الامام الحجة عج باستشهاد الامام الحسن العسكري..

يعظم الله اجرك يمهدي بـهل رزيه
مـات ابـوك العـكسري بـَسم المنـيه
الليلة گـلبك منكسر
الله ينـطـيك الصبر
.. يابو صالح ..
……………………………
مـرت اعلـيك بحـزن لـيلـه عـصيبه
يساعد الله گـلـبـك بـهـاي المـصيبه
عودك ادفنـته وبـقت روحك غريبه
وما گـطع گـلبك ابـد نوحه ونحيبه

عالابو من دم بقت تجري دموعك
فرگـة الوالـد حـنت منـك ضلوعك
يصعب عليك الهجر
الله ينـطـيك الصبر
.. يابو صالح ..
……………………………

چــبـد ابـوك العـسكـري شفـتـه تـگـطع
بجـسمـه كـلـه الـسـم يمـهـدينـه تـوزع
يلـوج شفـتـه من الألـم والـونـه تسمـع
وشفت روحه الطاهره من جسمه تطلع

بـيـن اديك او والـدك سلمـهـا روحه
وللحشر گـلبك يضل يبچي وينـوحه
تعيش بالنوح العمر
الله ينـطـيك الصبر
.. يابو صالح ..
……………………………

شيعـتك يبن الحسن جينـه نواسيك
نريـد مولاي الحـزن انـخـفـفـه اعليك
ندري مو هـين فگـد يالمـهـدي والـيك
يعـينـك الله چـم جـرح خله اثـر بيك

جروح گـلـبك سيدي نـدريـهـن اهـواي
واصعب اجروح الگلب عالماشرب ماي
جرحه ينزف للحشر
الله ينـطـيك الصبر
.. يابو صالح ..
……………………………

انـتـه زيـن او والـدك بـيدك دفـنـتـه
سالـم وما بـي جـرح لمـن حـضرتـه
بـس اويـلي عالذي حـضرتـله اخـته
بلايه راس وعالترب مرميه جـثـتـه

انته بيدك راسه شـلته وفاض عمره
وبـيـن اديها شالـته بـلا راس نحـره
وهلـكـسر ما ينـجبر
الله ينـطـيك الصبر
.. يابو صالح ..
……………………………
سيدي ولمـن دنـت ساعـة منـيـتـه
غسلـت بـيـدك ابــوك وچـفـنـيـتـه
وتـعـزيـه سويت الـه وي اهل بيته
وحضرت الشيعه تواسيك ابعـزيته

وبالبچـي والنوح اله صارت عزيه
وبالحـزن تـنـعـاه كـل الـهـاشمـيـه
ويجرن ادموعك حمر
الله ينـطـيك الصـبر
.. يابو صالح ..
……………………………

لكن احسينك بقـه عالغـبره عاري
ضل ثـلث تيـام مرمي بالصحاري
ماحضرله واحـد وجـسمـه يواري
عـيالـه مسبيات يمـشـن بالبـراري

محد ايدفـنه وبقـه عالغبره مطروح
والفـواطم عالهـزل يـنـعـنـه بالنوح
ينوحن عليه باليسر
الله ينـطـيك الصبر
.. يابو صالح ..

الشاعر عقيل الحسناوي..
.