نخوة باسم أم البنين

ننخاچ نخوه فاطمة لا تخيّبينه
…………
ننخاچ نخوه بالتي كسروا ضلعها
وفوق الوجن والعين ظالمها صفعها
الزهره عندچ غاليه وغالي دمعها
اعليج جينه نقسم ابضلع الحزينه
…………
اعليچ نقسم ابدمع حامي الحميّه
يوم اللي وارى بالقبر ذيچ الزچيّه
وبدمّه نقسم من جرى فوق الوطيّه
يوم اللي صوّب الدعي غرّة جبينه
…………
اعليچ نقسم بالذي قطّعوا چبده
الحسن اللي سمّته الملعونه جعده
وبدمع أبو السجاد اليجريه عنده
يمّ البنين ابهالمسه ننخاچ جينه
…………
ننخاچ نخوه بالذي حزّوا وريده
وبدمّه وبچفّين مقطوعه لعضيده
وبجاه زينب البقت بعده وحيده
نظره منّچ فاطمه وحنّي علينه
…………
ننخاچ يا أم البنين ابأربع اقمار
انذبحت وقلبچ لجلها يشتعل نار
يمتى نروح لكربله ونتعنّى زوّار
انزور بو فاضل وحسين وبنينه
…………
ننخاچ بالمهدي إمام الإِنِس والجان
الشيعه صارت في محن وبشدّه واشجان
يمتى يسعدها ابطلّته حجّة الرحمن
ونتشرف ابذاك الوقت نخدم ولينه
…………
أبو فاطمة الأحسائي
١٤٤٥/٠٦/١٢هـ

جلوة لذكرى ميلاد الزهراء عليها السلام

شقد عظيمه ام الحسن . ما تنوصف هالزهره
أم لأبوها أصبحت . وام لجميع العتره
………..
هذي البتول الطاهره في الدنيا ما تكرّر
الله خلقها من لدن لطفه وجعلها جوهر
ولساني اشما يحچي عن هالزهره دوم امقصّر
والله وصفها في الذكر بالطاهره والكوثر

رحمه من الله فاطمه . وآيه منَ الله كبرى
أم لأبوها أصبحت . وام لجميع العتره
………..
الجنّه هيّه فاطمه ومخلوقه منّ الجنّه
وامّه يقول المصطفى والبضعه فاطم منّه
واليطلب امن الله الرضا للزهره بس يتعنّى
يلقاها جنّه ويطلب امن الجنّه ما يتمنّى

يرضى الإله لفاطمه . وترضى لرضاه الزهره
أم لأبوها أصبحت . وام لجميع العتره
………..
بضعة محمّد من تشع اعله الخلق تتباهى
لنّ الإله اعله الخق مثل النبي سوّاها
نور وقداسه وطاهره وعن كل رجس زكّاها
يكفيها لو قالت أنا بضعة محمّد طه

لهذا نعشقها ابفخر . ونحبها بس ابفطره
أم لأبوها أصبحت . وام لجميع العتره
………..
من شعّت انوار القدس من هالزچيّه البضعه
ازدانت أراضينه ابحلل واستقبلتها السبعه
واملاك ربّي اتنزّلت يم النبي مجتمعه
والحور نزلت للأرض تحمل ورد وَيْ شمعه

الدنيا فاحت بالورد . لبنت النبي متعطْره
أم لأبوها أصبحت . وام لجميع العتره
………..
فرحان طه المصطفى من أقبلت هالزهره
وهذي خديجه ابفاطمه مستبشره ومسترّه
وحيدر أظنّه من سمع انولدت أمّ العتره
أقبل يهنّي والد البضعه ابعظيم البشرى

شاهد محمّد مبتشر . بانت نواجذ ثغره
أم لأبوها أصبحت . وام لجميع العتره
………..
عترة محمّد هالمسا مستبشره ومسروره
انولدت امهم فاطمه وازدانت المعموره
حوريّه في صورة بشر وشقد عظيمه الصوره
وذاكرها الله ابمصحفه وسوره تهنّي سوره

يا ربّي حقّق كل طلب . هالليله ابحق الزهره
أم لأبوها أصبحت . وام لجميع العتره
………..
أبو فاطمة الأحسائي
١٤٤٥/٠٦/١٨هـ

مولد الزهراء ع

شلون أقدر أوصف الزهره البتوله
ومحد عرفها غير خالقها ورسوله
..
الزهره محبوبة علي والله ونبيّه
ومحبوبة املاك السمه كلها سويه
من جنّة الله انخلقت الزهره الزچيه
والباري شاهد عالكلام اللي أقوله
..
ما تنوصف ام الحسن باشعار وامثال
ابحور الشعر تتعب وتتعب كل الأجيال
يكفيها حجة على الأيمّه العسكري قال
ما تنوصف يا شيعه هالزهره الجليله
..
بالدنيا حقها تفتخر فاطم يشيعه
ويوم القيامه تصير عند الله شفيعه
نالت شرفها بالنبي الزهره الوديعه
وللمرتضى الكرار هم صارت حليله
..
بضعة محمد عالبشر من حقها تفخر
الأبو طه المصطفى والزوج حيدر
والله ابكتابه اطلق اعليها الكوثر
خل يعرف العادى النبي جاته البتوله
..
الباري عرشه زينه ابخمسة الأشباح
وتزين ابطه وعلي عالم الأرواح
والليله فاطم أشرقت بالدنيا مصباح
امن العرش نور الوديعه اصبح نزوله
..
يا ناس عندي اويا البتوله الليله طلبات
تشفي عللنا وتقضي ابأمر الله حاجات
ابأمّن يجيب آنه نخيت أم الكرامات
وادري كريمه وما ترد يدنا ذليله
..
عجل ترى ضاقت يمهدينه الوسيعه
وضعنه ييوسف فاطمه ابهالدنيا ضيعه
عجل نريد اوياك نتعنى الوديعه
ننظر قبرها والدمع يمها نسيله

أبو فاطمة الأحسائي
١٤٤٥/٠٦/١٩هـ

في ذكرى استشهاد الإمام الهادي (ع)

نرفع تعازينه ابألم للحجّه
الليله جدّه عالفراش امسجّه
انعزّي مهدينه ** بالهادي والينه
……*****……
اعله بيت الهادي صعبه هالمسيّه
قرْبت امن الهادي هالليله المنيّه
يمّه ينعى العسكري ابدمعه جريّه
وتبچي اعليه السما وتنعى الوطيّه

صعبه على آل النبي هالليله
العسكري دمعه ابدماء ايسيله
والباري ايعينه ** بالهادي والينه
……*****……
ما جرى مثل المصاب اللي نسمعه
اعله بيت المصطفى ونجري له دمعه
امصيبة الهادي ابمثل هالليله فجعه
اعليها نجله العسكري بالحسره ينعه

يالهادي ونّات الحسن مرفوعه
والعيله لمصابك تون مفجوعه
تنعه اشجرى اعلينه** بالهادي والينه
……*****……
فاطمه ابهالليله عالهادي حزينه
والوصي المرتضى ينعه وبنينه
والنبي عالي على الهادي ونينه
وفاجعه ابسامرّا حلّت والمدينه

امصابك ايأذّي النبي يالهادي
والزهره في هذا المصاب اتنادي
الينعى چا وينه ** بالهادي والينه
……*****……
يا علي جرح ابقلب كل شيعي لجلك
وندري ابهالليله ينعى المهدي نجلك
سيّدي الشيعه اشكثر محتاجه مثلك
خل يجود اعله البريّه الليله فضلك

شيعتكم ابهذا الزمن محتاره
جاتك دمعها اعله الوجن يتجاره
نرفع تعازينه ** بالهادي والينه
……*****……
يا علي ابهالليله مد للشيعه چفّك
كِلْها جاتك هالمسا ومحتاجه عطفك
يا وسف هالدنيا كِلْها ما تعرفك
ويعجز لسان اليحبّك ما يوصْفك

دقّينه يابو العسكري ابوابك
وجينه ننعى ابهالمسا لمصابك
ونواسي مهدينه ** بالهادي والينه
……*****……
أبو فاطمة الأحسائي
١٤٤٥/٠٢/٠٢هـ

وفاة العقيلة زينب عليها السلام

أشعر بروحي ترفرف هالعشيّه
ودها توصل يم غريب الغاضريّه
خل تعرف الناس * ما أنسى عبّاس
وما نسيت حسين من خر عالوطيّه
…..*****…..
آنه بنت الزهره ولعاشرتِ لاحزان
من بعد طه الحزن أصبح ليْ عنوان
جدّي المختار طه وعالي الشان
اوالدي الكرّار خيرة آل عدنان
وشكثر ربّي حباني ابصفوة اخوان
الحسن وحسين عزوه وسادة اكوان

آنه درّه امن النبي وبنته الزچيّه
ولوصفنه الباري ابخير البريّه
تخضع لنه افلاك * وتخدمنه الاملاك
والله خص الهادي واله ابهالعطيّه
…..*****…..
من خلقني الباري وسوّاني من نور
ما شفت بالدنيه بهجه وفرحه وسرور
من رحل طه علينه زايد الجور
هجمت اعلينه الأعادي بعده بالدُور
انكسر قلبي يشيعه ودمعي منثور
من سمعت الزهره تنعى ضلعي مكسور

ابعيني شفت ادموم تنزف للوديعه
وطفله وانظر للاخو ميّت فجيعه
خر اعله الاعتاب * وضلع امّي منصاب
تنادي يا فضّه ابعجل لحقي عليّه
…..*****…..
ماتت الزهره وابونه انشوفه باكدار
من يصد للباب عينه اتشوف مسمار
وانقضت أيّام ابونه وبالقلب نار
ودمعه للزهره وضلعها ابجمره نثّار
من بعد طبرة ابونه ابعيلته اشصار
مات والينه وعلينه انقلبت اشرار

جارت اعله المجتبى العدوان بعده
وتالي بالسَّم انفطر يا وسفه چبده
ومن جور الايام * صابوها بسهام
جثّة اخويه والخبر عند الزچيّه
…..*****…..
ما جرى مثل الجرى في الغاضريّات
ابعترة الهادي اشكثر حاطت بليّات
ابكربله ننظر أعادي بالحقد جات
تحمل اضغان الجمل تزحف زُرافات
انفنت آل النبوّه ابجنب الفرات
والشهيد احسين وسفه بالعطش مات

وسفه ابن أمّي انذبح بالغاضريّه
ورضّت اعظام الشهيد الأعوجيّه
بعد الولي احسين * وذيچ الميامين
عيلة الهادي النبي راحت سبيّه
…..*****…..
اشكثر قاسيت يا شيعه امن لالام
ويكفي الشفته ابشماتة بلدة الشام
حرمه مسبيّه ابتليت ابنسوه وايتام
اوظعن ابو اليمّه التسوقه وسفه ظلاّم
انقضت بالهم سنيني وراحت ايّام
وما شِفِت بالدنيه راحه ابطولِ لاعوام

انقضت يا شيعتي أيّام عمري
وحيّر العالم وهذي الدنيه صبري
صبري ما ينقاس * وتشهد لي الناس
وتشهد لصبري طفوف الغاضريّه
…..*****…..
راحوا كل اهلي وبقيت ابصرخة الآه
ولقضى امن اهلي وبنيني روحي تنعاه
ويكفي لو أنعى ابجراحي وا حسيناه
آنه لو أنسى حياتي حاشى أنساه
عايشه ابدنيه المآسي ابلوعه ويّاه
واصبحت نبضات قلبي وا حسيناه

راحت أيّام العمر كِلْها ابمآسي
واشعر اتحوم المنيّه فوق راسي
راحت هلسنين * ونوحي على احسين
شيعتي في كل وقت نوحوا عليّه
…..*****…..
أبو فاطمة الأحسائي
١٤٤٥/٠٧/٠٧هـ

في وفاة السيدة زينب عليها السلام

أنا زينب ** دهر أنحب
غريبه ودهرني عذّبني
.....*****.....
جرح قلبي الدهر وآنه ابصغر سنّي
جرحني من أخذ كل الأهل منّي
فراق البضعه وي حيدر يعذْبنّي
وأظن حتى الصخر ذاب ابكثر ونّي

بدا همّي ** بعد أمّي
غريبه ودهرني عذّبني
.....*****.....
ضلع أمّي سمعته ابحسره يتكسّر
ونظرت المحسن الغالي ابدم اتعفّر
ولا أنسى المصاب اللي جرى لحيدر
نظرت الهام من عنده غدا امطبّر

فؤادي انطر ** ابجرح حيدر
غريبه ودهرني عذّبني
.....*****.....
بعد فقد الأبو راح الحسن بعده
يويلي سمّته ابسَّم الحقد جعده
وعضيده من بعد فقده انفطر چبده
وأنا قلبي انفطر حسره بعد فقده

انفطر قلبي ** وحق ربّي
غريبه ودهرني عذّبني
.....*****.....
وجرح قلبي مصاب اللي انذبح ظامي
ودليلي اتعذّب ابفقد الولي الحامي
وشعر راسي تغيّر والحشى دامي
وأبو فاضل فقدته وضاعت أيّامي

اندهش بالي ** على الوالي
غريبه ودهرني عذّبني
.....*****.....
بقيت ابلا أهل تالي ولا عزوه
وبعدهم قلبي اتسلّى مع البلوه
أحس دهري هضمني وبيّه اشسوّه
إلى وقت المنيّه والحزن سلوه

مع اهمومي ** قرب يومي
غريبه ودهرني عذّبني
.....*****.....
أبو فاطمة الأحسائي
١٤٣٧/٧/١٤هـ

في ذكرى وفاة أم المصائب زينب عليها السلام

زينب آنه وكربله ابوجداني
وخدري حيّر يا خلق عدواني
حتّي بيّام اليسر ** ربّي حافظ لي الخدر
***•••••***
آنه زينب بضعة الزهره الأمينه
نور طه المصطفى ومهجة نبينه
آنه باقي كل هلي ونور المدينه
آنه مثل أمّي بعد حرّه ومصونه

ربّي خالقني وفرض لي احجابي
ومن جناب أمّي استوه جلبابي
بالخدر يحچي الدّهر ** ربّي حافظ لي الخدر
***•••••***
بنت أبويه المرتضى اليحمي جواره
اليعيش ابحضرته يحظى ابإماره
في حياته ما رضى ابذلّ الغيارى
اليصل حدها يصل ليه ابفقاره

عالخدر بويه علي ربّاني
وبعد أبويه المرتضى إخواني
والله وآنه امن الصغر ** ربّي حافظ لي الخدر
***•••••***
للطفوف احسين ودّاني ابضعينه
والستر يمشي ابكتر خدري ابسكِينه
ومن بعد ذبح الأهل صرنا رهينه
لكن ابعفّه وخدر والله بقينه

ربّي رغم اللي جرى حامينا
حتّى بعد احسين ما ذلّينا
اشكر الباري اشكثر ** ربّي حافظ لي الخدر
***•••••***
بالسفر ظلّ الخدر يمشي معانه
يخسى كل ظالم يمس خدري ابإهانه
ولو قِلِتْ متني يضربونه عِدانه
بالعبايه أنضرب واتألّم آنه

أنضرب والعفّه تبقى الباسي
وما نسيت احسين وي عبّاسي
من يوصّوني ابصبر ** ربّي حافظ لي الخدر
***•••••***
الخدر ما عفته يوم ابكل حياتي
خدري تحچيه ابفخر تبقى عباتي
من بداية عمري الغاية وفاتي
لنّه ابيوم الحشر خدري نجاتي

قدوه صرت ابعفّتي وحجابي
واليحبني خل يحَفْظ اجوابي
آنه من بيت الطُهُر ** ربّي حافظ لي الخدر
***•••••***
أبو فاطمة الأحسائي
١٤٣٧/٦/١٧هـ

في ذكرى وفاة السيدة العقيلة زينب الحوراء عليها السلام

نحيي واجبنه الليالي الزينبيّه
وبالأسى نذكر غريب الغاضريّه
ونذكر الزهره ابشجن * وننعى بنت أمّ الحسن
ونحيي واجبنه الليالي الزينبيّه
.....****.....
خلصت أيّام وليالي ابطول لسنين
وما برحنه انعيد لوعة أمّ لحسين
نذكر العصره ونهلها امدامع العين
ونذكر الـمحسن يويلي الغاله البين
الصباح ابدمعه يقضي وحسره وونين
والمسه أسود يجينه ومحني ضلعين

فاطميّه بالدهر عدنه ليالي
وكل صباح ابلوعته ينعى الموالي
يبچي لكسر الضلع * ويصبغ الوجنه الدمع
وينرسم فوق الوجن ضلع الزچيّه
.....****.....
بالدهر عشنه مصايب يوم عاشور
وكربله تسري ابدمانه ابفيضِ لنحور
ومن يمر اعلينه عاشر نلطم اصدور
وكل محب دمعه اعله خدّه يبقى منثور
ولو يموت الشيعي والله ابهذا معذور
لو سمع صوت النواعي احسين منحور

كل جهه اتصير ابعزانه الغاضريّه
وكل صباحات الدهر عاشر رزيّه
نذكر امصاب البله * وننعى لحسين وهله
الظلّوا يا وسفه على الغبره رميّه
.....****.....
العجب هاي العقيله وبنت الاطهار
من بعد جدها محمد شافت اكدار
شافت اهجوم الأعادي ابوسطة الدار
ونظرت العصروا الزچيّه وشبّوا النار
وشافت الطبره اللي بيها حيدر انهار
والزمن تالي عليها يا وسف جار

مات أبو الحمله ولا كمّل صيامه
وعاشت الحورا مع اخوتها يتامى
وفقدت احسين وحسن * ولاقت آلام ومحن
وقالت اعليها الأعادي خارجيّه
.....****.....
وسفه بنت المرتضى وأمّ الكرامات
ذاقت ابدنياها لوعه وحسره وآهات
وشافت أهوال ومحن بالغاضريّات
وماتت ابغصتها بس قالوا السبط مات
ومن بعد طف كربله وأم البليّات
عاشت ومحسوبه چنها ضمن الاموات

مات أبو اليمّه ولقت زينب أذيّه
وركّبوها من بعد عزها مطيّه
وراحت الحورا سبي * وهيّه بضعه امن النبي
ما رعوا بنت الشرف والهاشميّه
.....****.....
عاشت الحورا ابعزاها تنحب اعوام
من بعد بيت النبوّه وآل لاكرام
ومن بعد ذيچ المآسي وجور لأيّام
انتهى عمر العقيله الكلّه آلام
وانحفر ويلي قبرها ابّلدة الشام
ومهما صار اعله العقيله صعبه تنضام

ماتت الحورا ويظل عالي ذكرها
من بعد ما قضّت ابحسره عمرها
وسفه بنت المرتضى * اعليها مسودّ الفضا
ونصبت اعليها عزاها الجعفريّه
.....****.....
ماتت الحورا ابحزنها واظلم الكون
واصبح العالم يمهدي العتره محزون
وشيعتك نصبت عزاها وما يملّون
ومن محبّة آل طه ما يفترون
يمته تلفيها وتشوفك منها لعيون
وتنقضي كل حاجه عدها وكل شي ايهون

يا ختام العتره وخير البريّه
ضاقت اعلينه يمهدينه الدنيّه
وانته تدري ابهالزمن * امتله جور ومحن
وشفنه بالغيبه يمهدينه الأذيّه
.....****.....
أبو فاطمة الأحسائي
١٤٣٨/٦/٢١هـ

في وفاة السيدة العقيلة زينب الكبرى
عليها الصلاة والسلام

نكتب أبيات القصيد * والدهر دوبه يعيد
زينب ابعز وفخر عاشت أميره
حتى يوم العل جمل راحت أسيره
.......•••••.......
زينب انولدت عزيزه وعاشت اسنين
ابحضرة الهادي محمّد وأمّ لحسين
ونالت العزّه ابأبوها وقرّة العين
وبالحسن نالت فخرها وبعده احسين

تشهد أيام الدهور * زينب ابهالدنيا نور
للفضايل والشرف صارت سفيره
حتى يوم العل جمل راحت أسيره
.......•••••.......
زينب ابدنياها عاشت مثلِ الاطهار
مثّلت بالدنيا أمها ابكلِ الأدوار
وصارت اتمثّل أبوها ابوجه الاشرار
وللشهيد احسين صارت جملة أنصار

صارت ابيوم الطفوف * جمره والعالم يشوف
صارت امن المرتضى حيدر نظيره
حتى يوم العل جمل راحت أسيره
.......•••••.......
من رحل جدها محمّد شافت اهموم
شافت الزهره وضلعها وشافت ادموم
اوياوسف شافت أبوها وراسه مهشوم
وارتحل وظل دمعها ابحسره مسجوم

عالضلع ظلّت تنوح * ولعلي المهجه جروح
واعله كل الصار دمعتها غزيره
حتى يوم العل جمل راحت أسيره
.......•••••.......
الحسن من بعد أبوها شافته ايجود
من أثر سَمّه يولي چبده ممرود
والحُسين ابطف بلايه صار مفرود
وحاطته ارماح وهنادي وحاطته اجنود

خلّت ابطفّ الحُسين * القلب مرمي وطعين
وراحت لكل البشر تروي المسيره
حتى يوم العل جمل راحت أسيره
.......•••••.......
زينب الليله وسافه اتودّع الناس
لا حسن عدها ومحمّد راعي الباس
اولا أبو اليمّه ايحضرْها وجنبه عبّاس
من قبل ما تخمد امن الحرّه الأنفاس

ماتت ابغربة ديار * والدهر يبچيها صار
اوما نسى كل الجرى البنت العشيره
حتى يوم العل جمل راحت أسيره
.......•••••.......
أبو فاطمة الأحسائي
١٤٣٩/٧/١٢هـ

أبد والله ما ننسى العقيله

أبد والله ما ننسى العقيله
…****…
الف وسفه اعله زينب هالمسيّه
اشكثر لاقت من الدنيا أذيّه
لفت ليها بعد روحي المنيّه
وسافه بنت علي ماتت عليله
…****…
صحيح الليله باسم الحوره زينب
عقدناها ودمعنه اعليها ينصب
لاچن علجرى اعله الآل ننحب
مصاب الآل في قلب العقيله
…****…
زينب ما نست بو الزهره طه
وعليه امن الحزن زايد بچاها
قبل موته النبي طه رثاها
وفصّل كم مصاب وهم تشيله
…****…
وضلع أم الحسن وشلون ننساه
وضلعها ورّث اعله الآل ويلاه
وما تنسى العقيله الضلع والآه
ودمعها اعله الزچيّه دم تسيله
…****…
نعيد ابهالمسيّه امصاب حيدر
اودمع زينب عليه ابدم تنثّر
مثل راسه قلب زينب تطبّر
تقولن راح بويه الالتجي له
…****…
قلب زينب يشيعه صار شطرين
ودمعها اعله الحسن مذروف وحسين
إلى وقت المنيّه اتنوح الإثنين
وبعد فقد الأهل صارت نحيله
…****…
مصاب ام الخدر ما حل على الناس
يكفيها الجرى من جور الارجاس
ماتت والقلب بس ينعى عباس
أروحن بعده اِلمَن واشتكي له
…****…
قلب بنت الوصي يا وسفه مجروح
تون امن الطفوله وتنعى وتنوح
وسافه امن العقيله طِلْعت الروح
ماتت وانطفى نور العقيله
…****…
أبو فاطمة الأحسائي
١٤٤٥/٠٧/١٣هـ

جلوه (مهدينه مهدينه)

مهدينه مهدينه .. مهدينه مهدينه
يمته تشع ابنورك اعلينه
.…..*****……
يبن النبي المختار .. يبن النبي المختار
ينخاك نهج المصطفى ودينه
.…..*****……
يبن الوصي حيدر .. يبن الوصي حيدر
عجّل ادركنه ابجاه والينه
.…..*****……
يبن الطهر فاطم .. يبن الطهر فاطم
كل روح مشتاقه لك تدرينه
.…..*****……
يبن الحسن وحسين .. يبن الحسن وحسين
وابن الأيمّه الدوم تهدينه
.…..*****……
لكل حفل جينه .. لكل حفل جينه
لجلك ينجل الهادي بس جينه
.…..*****……
جينه ابقلب هايم .. جينه ابقلب هايم
هايم ابحب الهادي وبْنينه
.…..*****……
هالليله عدنه عيد .. هالليله عدنه عيد
شرّف الدنيه الليله مهدينه
.…..*****……
عيد لجميع الناس .. عيد لجميع الناس
يا هلا باللي ابجَيْته يحيينه
.…..*****……
يمته نشوف النور .. يمته نشوف النور
يطلع المهدي ابنور هادينه
.…..*****……
جار الزمن بينه .. جار الزمن بينه
ومالنه غيرك وانته تهدينه
.…..*****……
يا حجّة الباري .. يا حجّة الباري
من هالمحن يمته تنجّينه
.…..*****……
أبو فاطمة الأحسائي
١٤٤٥/٠٨/١٤هـ
على طور ( مولانه مولانه . حبك سفينه وفيها منجانه )

في ذكرى وفاة السيدة خديجة وأبي طالب عليهما السلام

يا طه عمّك من قضى ما مات عطشان
واعله خديجه ما لفت بالدار عدوان
ايكل لجرى وصار * تدري يمختار
عقبك يبو الزهره امتلت دنيانه باحزان
……******……
يا نبي الله رحل باللوعه عمّك
من بعد ما قاسه منّ اهموم همّك
حامى دين الله وحفظ يا طه دمّك
وباقي اسنين العمر قضّاها يمّك

الچان وصّف دينك ابخيرة الاديان
تبچي عليه اوتشهد ابفضله هالاكوان
ويبچي حمى الجار * تدري يمختار
من مات أبوه وشاهده امغطّى بالاكفان
……******……
يا رسول الله تون والله يعينك
كافلك هذا لحماك وحامى دينك
وما نلومك من تهل ادموع عينك
لن رحل سيف اليحاميك ومعينك

يا ويله اليوصل الك من چان ويّاك
يفني عداك ابصارمه لو تقرب احذاك
ويكفينه لو ثار * تدري يمختار
يمحي بواسل هالعدا ويشعلها نيران
……******……
يا حبيب الله الك ننصب عزيّه
لنّك ابأفضل شهر شفت الرزيّه
اخذَتِ الكافل يبو الزهره المنيّه
وبعده ماتت يا وسف أمّ الزچيّه

ماتت خديجه وكافلك يا سرّ لاكوان
وسمّيت عامك يا نبينه ابعام لاحزان
ما ظلّت أنصار * تدري يمختار
بس الله خلاّلك علي وسوّاكم اخوان
……******……
يا نبي الله الجرى ندري فجيعه
لچن انته تدري بالحل عالوديعه
منها ضلعين اكسروا يابو الشفيعه
وانذبح ظامي السبط يم الشريعه

الزهره عقبك ماتت ومكسوره ضلعين
وحلّت عليك أعظم فجيعه ابذبحة حسين
وعام الحزن صار * تدري يمختار
من طاح أبو اليمّه وصبح للخيل ميدان
……******……
قلبك الحاني اشحمل من هالمصايب
وشكثر قاسى بعد عمّك بو طالب
ويكفي نذكر كربله أم النوايب
البيها راس الزهره لجل حسين شايب

قلبك لجل ذبح السبط يا طه مجروح
والزهره تبقى للحشر يا مصطفى اتنوح
جار الزمن جار * تدري يمختار
راحت بنينك بالقتل يا عالي الشان
……******……
أبو فاطمة الأحسائي
١٤٤٥/٠٩/٠٦هـ

ليلة الضربة ١٩ رمضان

لا تفتك ابدين الله وتيتّم الإسلام
يا طاغي وتصوّب علي حيدر على الهام
صرختنا ويلاه ** آه وا عليّاه
……******……
إن چان ما تعرف علي يا ظالم اسمع
هذا حبيب الله اوصيّ الهادي يوشع
وهذا الأمير اعله الخليقه وهوّه الانزع
وهذا اللي بيه دين الله لو مات ايتضعضع

ندري ترى تعرف علي مثّل الايمان
ولكل عمل صار الوصي يا طاغي ميزان
لا تقرب احذاه ** آه وا عليّاه
……******……
هذا اللي بيه الله نصر شرعه ودينه
والدين اركانه انبنت والله ابيمينه
وانته ابشهر طاعه وشرف قاصد ولينه
يا ظالم ابليلة قدر تذبح علينه

تترقّب ايطرّ الفجر يا نسل الاوغاد
وتيتّم ابذبح الوصي يا طاغي الاولاد
وتنعى يتاماه ** آه وا عليّاه
……******……
هالليله حيدر للفضا دوم ايتردّد
وكل لحظه ينظر للسمه ودمعاته بالخد
ابهالليله واعدني النبي هادينه أحمد
ابشهر الله روحي لخالقي ياولادي تصعد

قاتل صناديد العرب يا وسفه هاليوم
يتصوّب ابفرض الفجر وبسيف مسموم
وحي الله ينعاه ** آه وا عليّاه
……******……
يا مهجة وروح الوصي خير البريّه
ابشهر الله بارينه قضى القى المنيّه
هالليله وحي الله ابحزن يبچي عليّه
وينعى النبيّ المصطفى وبنته الزچيّه

دين الله ياولاد الوصي هالليله مفجوع
وقلب الزچيّه ام الحسن لمصابي موجوع
وتنادي ويلاه ** آه وا عليّاه
……******……
ياولاد فارس يليل وبدر اويا خيبر
وقت الفريضه بالفجر ينصاب حيدر
وينادي جبريل الوحي الله واكبر
الطاغي راس المرتضى ابسيفه طبّر

الليله ينصاب الشرع والعروه تنصاب
وصوت الوحي ايقول الوصي ابمسجده انصاب
آه وا إماماه ** آه وا عليّاه
……******……
أبو فاطمة الأحسائي
١٤٤٥/٠٩/١٧هـ

لمصيبة ضربة الأمير ع

هالشايلينه امنين * چنه أبو الحسنين
أسأل واريد اجواب * اشصابه داحي الباب
——
والدي الچان لمحمد .. نفسه وباب المدينه
اليفخر الإسلام باسمه .. وراية الحق ابيمينه
هالفجر ويلي أشوفه .. عالأيادي شايلينه
وانظره ابحاله كئيبه .. واستمع منّه ونينه

شالصاير ابهالكون * چن العرش محزون
وانظر دمع لاحباب * اشصابه داحي الباب
——
بالفجر طالع أبونه .. سالم ايأدي صلاته
وأذّن ونسمع أذانه .. وبالندا صوته اشحلاته
لكن الفاجعني آنه .. واخوتي وجملة بناته
من سمعنه الصوت ناعي .. حيدره قرْبت وفاته

صوت الوحي ابهاليوم * دين الهدى مهدوم
وصاح ابأسى المحراب * اشصابه داحي الباب
——
حيدر الهزّ العوالم .. وذو الفقار ابعزمه شاهد
وتشهد ايّامه وسنينه .. ما وصل يم حدّه واحد
من وصلّه ابهالفريضه .. وفطّر اقلوب الأماجد
وخلّه كل الدنيا تنعى .. ولجله اتنوح الفراقد

الصوّبه اعله الهام * فطّر قلب لاسلام
مو هذا ليث الغاب * اشصابه داحي الباب
——
ونّة الوالد يشيعه .. اتفتّت اصخور الرواسي
الله لا يحرمني منّه .. والدي واهلي اويا ناسي ( احساسي )
ليته الصوّب أبويه .. صوّب ابهاليوم راسي
من بعد حيدر أبونه .. أصعب الشدة أقاسي

اشحل علينه اليوم * من ضربة الميشوم
قلبي اعله بويه ذاب * اشصابه داحي الباب
——
صارت العيله ابفجيعه .. من بعد طبرة وليها
هذا الينعى وعيونه .. حمره من كثرة بچيها
وهذي باللوعه اعله حيدر .. تلطم الهامه بديها
وزينب ابهاي الفجيعه .. تندب الهادي نبيها

من لينه يا جدّاه * بعد الأبو ويلاه
قلبي ابفجيعه انصاب * اشصابه داحي الباب
——
الحسن دمعه اعله خدّه .. والشهيد احسين ينحب
وبو الفضل ينعى وينادي .. ودْعي والدنه يزينب
والدي ابهالحاله يمنه .. وحالته كل لحظه تصعب
نطلب امن الله السلامه .. وبالفرج ندعو له يا رب

باقي الأمل لليوم * نتمنى لينه ايقوم
ونسمعها حيدر طاب * اشصابه داحي الباب
——
أبو فاطمة الأحسائي
١٤٤٤/٠٨/١٨هـ

في ذكرى استشهاد الأمير عليه السلام

ودّع صلاته المرتضى اودّع صيامه
بوداعة الله يا علي ومع السلامه
صاحت يتاماك ** روح الله وياك
نبقى بعد فقدك يمولانه يتامى
……******……
يا علي ابصرخه شجيّه نبدي الاحزان
ونهتف ابصيحه تزلزل كلِ الاكوان
لفقد طه يحيدر بينه نيران
وما نسينه فاطمه الماتت بالاشجان

الليله انعيد الحزن نبچي اعله طه
ونبچي على بنت النبي ونذكر بلاها
يا حيدر اجروح** نذكرها ونّوح
ونتمنى اتجازونه في يوم القيامه
……******……
الحسن هالليله يبچي وينعى وينوح
والشهيد اعله خدوده دمعه مسفوح
وزينب الليله ابچاها اتفتّت الروح
وكل قلب بعدك يحيدر ممتلي اجروح

عبّاس شوفه منفطر قلبه اعله حالك
ويمّك تون وتنتحب جملة اعيالك
ناحت يتاماك ** تبچي اعله فرقاك
يابويه من ترحل نظل عقبك يتامى
……******……
بالدهر نبچي اعله فقدك يابو لحسين
ننصب لفقدك تعازي وتهمل العين
ويا علي تنعى اعله جرحك هالملايين
وجرحك ايظل ابقلبها طولِ لسنين

اعليك ننعى سيّدي صبح ومسيّه
ونواسي طه وعترته وبنته الزچيّه
نبچي بلدموم ** يا حيدره اليوم
وبعدك ننوح وننتجب مثل الحمامه
……******……
يا علي يبقى الموالي ابصرخة الآه
من تمر ليلة الطبره ينعى ويلاه
ابمجلسك يحضر ينادي وا علياه
وكل محب ايواسي خِلّه وينعى ويّاه

يا مرتضى ابتاسع عشر رمضان فجعه
اعليك ننصبها مآتمنه وننعى
ونجدّد احزان ** ابلوعه واشجان
ابواحد وعشرين ننعى چاليتامى
……******……
من يمر اسمك يمولانه اعله الاسماع
نبقى من نذكر همومك ننعى باوجاع
ونذكر الماتت حزينه امكسّره اضلاع
ونبچي اعله الظل رميّه اموزّع اوزاع

احسين جمّع كل مصايبكم يحيدر
اعليه نبچي ونذكره ابدمّه امعفّر
في كلِ الاحزان ** نذكرِ العطشان
ونذكرها عالتربان مطحونه عظامه
……******……
حجّة الله بالأرض جينه نعزّيك
وبعلي جدّك يمولانه نواسيك
بالدعا امدد لنا الليله أياديك
وندري امصاب الوصي وجرحه يأذيك

ليلة قدر بيها انفجع قلب العقيله
ولجلك يمهدينه الدمع جينه نسيله
عجّل يموعود ** يمتى لنا اتعود
ولسانك انشنّف مسامعنه ابكلامه
……******……
أبو فاطمة الأحسائي
١٤٤٥/٠٩/١٩هـ

نزلة لاستشهاد الأمير ع

بو الحسن غمّض يشيعه اعيونه
لحقوا قبْل اعياله ايشيعونه
…..*****…..
هالندا انخصّه لجميع الرافضه
مات ابو الحسنين واسود الفضه
بالعجل قوموا نشيْع المرتضى
قبل ما في لحده ايدفنونه
…..*****…..
شيعة الكرار قوموا بالعجل
وصيحوا باللوعات يا خير العمل
وشوفوا جسم المرتضى عالمغتسل
بلكه بدموع الأسى اتغسلونه
…..*****…..
هالله هالله ابطبرته حامي الحمى
من تشدوا الجرح لا ينزف دمه
خاف تتأذّى لمصابه فاطمه
والنبي صوته لعلي اتسمعونه
…..*****…..
قوموا شيعوا نعش أمير المؤمنين
وعزّوا فيه المصطفى وام الحسين
وجملة اولاده وبناته الطاهرين
كِلْها بعد المرتضى محزونه
…..*****…..
مات هالليله أبو اليمّه علي
وهوّه البيه الشدايد تنجلي
وراح من هذا الدهر نعم الولي
وسفه غمّض بو الحسين عيونه
…..*****…..
هالمسيّه العالم أعلن للحداد
ولبست الدنيا لعلي حيدر سواد
وناحت اعله المرتضى السبع الشداد
ظلمه صارت هالأرض من دونه
…..*****…..
حجة الله تموج هالليله المهج
وجينه انعزّيك يا روح الحجج
ويمتى مولانه تعجّل بالفرج
تشفي اقلوب البقت محزونه
…..*****…..
أبو فاطمة الأحسائي
١٤٤٤/٠٩/١٩هـ

نزلة لاستشهاد الأمير ع

الليله زينب تنعى يم حيدر (٢)
وحيدر علي الكرار .. ابدمعه يوصيها
…..*****…..
الليله يا زينب علي عندچ (٢)
يبچي ويون اعليچ .. والدمعه يجريها
…..*****…..
لزمي الصبر يا بنتي يا زينب
باچر تجور اعداچ .. والعيله تفنيها
…..*****…..
محفور قبره بالنجف حيدر (٢)
وبعدي تشوفي هموم .. عذريني بحچيها
…..*****…..
بالشام عيد ابموتتي باچر (٢)
ونتي ابمصيبه ونوح .. واللوعه تبديها
…..*****…..
يقضي الحسن مسموم من بعدي (٢)
ونعشه تصيبه اسهام .. عدوانه ترميها
…..*****…..
وحسين بالطف ينذبح ظامي (٢)
وعياله تبقى ابنوح .. ونتي تحاميها
…..*****…..
بعد الفراقد تمشي مسبيّه (٢)
واعله الترب أجساد . بالطف تخليها
…..*****…..
الله يعينچ من بعد عيني (٢)
بلوى وغصص وهموم . بعدي تقاسيها
…..*****…..
أبو فاطمة الأحسائي
١٤٤٥/٠٩/١٩هـ