Stories 📖 Webview Telegram

ليلى:
أنا ما نسيتك يا آدم… ما نسيت شي منك.
يمكن اتغيرنا، بس في أشياء بتضل جوّاتنا… متل ريحة الماضي.

(آدم ساكت، متأثر، بس ما بيحكي شي. بيكمل أكله ببطء.)

ليلى (بهمس):
بتعرف شو أكتر شي وجعني؟
إنك ما أعطيتني فرصة أقاتل عنّا… عني وعنك.

(آدم بيبعد نظره، بيكمل أكله بصمت، لكنه واضح متأثر. بيقوم من الطاولة بدون ما يحكي، وبطلع عالغرفة، وبتضل ليلى واقفة… عيونها دموع ساكنة.)
بترجع ليلى لغرفتها وهي حاسة بأمل لسا بآدم وعم تفكر بخطة ترجعو فيها بأقرب وقت

ليلى صارت تلعب بذكاء ناعم، تجرّ آدم بعواطفه، وتخاطب الذاكرة، مو الرغبة.
ودلال، يلي كانت حاسّة حالها ربحِت الجولة، رح تحس بالخطر، وتبدأ ردة فعلها… بس مو بصراخ، بل بمحاولة احتكار آدم بالعاطفة الجسدية والغيرة.
أما آدم ف هو واقع بين نارين ومو عارف هو مع مين .....

بفوت آدم على غرفتو هو ودلال وكل عقلو بالكلام يلي حكيتو ليلى من شوي على الأكل بتركض دلال لعندو وبتحضنو
دلال : أهلين حبيبي اشتقتلك
آدم بإبتسامة مجاملة : وأنا كمان
دلال بتحس في شي مو طبيعي بس بتسكت
بعد بشوي
(دلال قاعدة جنب آدم، عم تحكي له عن مشوار بَدها يعملوه سوا. آدم ذهنه شارد، مو مركز، وعيونه مو عيونه. دلال بتحس بالفتور، وبتحاول تقرب منه أكتر، تلمس إيده.)

دلال (بغنج ناعم):
آدم… معقول ما اشتقتلي؟ أنا اشتقتلك كتير.

(آدم بيبتسم ابتسامة خفيفة، بس ما فيها لهفة.)

آدم:
أكيد اشتقت… بس تعبان شوي.

(دلال بتسحب حالها وبتوقف، بتحاول تخفي خيبة أملها، بس صوتها بيطلع فيه نبرة شك.)

دلال:
تعبان؟ ولا بالك بمكان تاني؟
مو معقول يعني… رجعت تحس بشي ناحيتها؟

(آدم بيوقف، بينزعج من السؤال.)

آدم (بهدوء فيه غضب):
ما بدي هالحكي يا دلال… لا تبلشي.
دلال : بس يا آدم
آدم : قلتلك تعبان وبعدين معك مابدك تفهمي
بدي نام اتركيني نام ماعاد بدي أسمع صوت شي
دلال مصدومة شو صرلو لسا قبل يومين كان وضعهم تمام ومبسوطين شو يلي صار بتقول يمكن صاير معو شي بالشغل او صاير مشكلة بينو وبين حدا بتتركو ينام وهي كمان بتنام وهي زعلانة
الساعة ٦ الصبح بتصحى ليلى بسرعة بتغسل وجهها وبتلبس فستان أبيض لفوق الركبة بموديل بسيط وناعم بتفرد شعرها متل ما آدم بحب بتحط مكياج خفيف كتير بس ليخفي شحوب وجهها ودبل عيونها وبتطلع على المطبخ
أما عند أدم بيصحى بيلاقي دلال جنبو بيتأملها وهو تايه مو عارف هو بحبها ولا بدو ليلى حاسس أنو اشتاق ل ليلى بس وجود دلال عندو مهم كمان بيسمع صوت طرطقة بالمطبخ بيعرف أنو ليلى صحيت بينسحب بهدوء من جنب دلال بيغسل وجهو وبيتعطر وبيطلع للمطبخ ليشوف ليلى شو عم تعمل

"وَينك... وكنت بقلبي وطن؟"

وينك؟
وكنت بقلبي وطن
وصار قلبك مَنفى
كنت تقول بحبك صِدق
واليوم حبك صَفّى؟

ذكّرتني بضحكتي
لما كنت تضحك من قلبي
وإيدي بإيدك نِحتمي
واليوم… بَردي مَغلبني

ما نسيت، لا والله ما نسيت
ضحكتك، لمستك، نظرتك
وحتى كِذبتك لما قلت
"أنا ما بخون، وما بتركك"

عيب الحب ينهان هيك
ويصير كأنو كان حلم
كان الوفا لحنٍ بريك
واليوم صرنا صوت ألم

بس ما رح إلّك إني ندمت
ولا رح قول يا ريتك ما جيت
لأنو حتى الخيبة وجع
خلّتني أفهم شو حبيت…

كانت عم تحكي شعر وهي واقفة عم تشتغل وآدم واقف عم يسمع كل كلمة عم تطلع منها وكأنها سكين بتغرز بقلبو
( كانت ليلى واقفة وبتعرف أنو آدم عم يتسمع عليها واتقصدت تقول هيك شعر حتى يتأثر فيه آدك، بتجهز قهوة، ولابسة شي بسيط بس أنيق. لما آدم بيفوت)
آدم : معقول عم تحسِ بكل هاد ليلى
ليلى بصدمة مصطنعة : آدم أنت هوون من ايمت
آدم : من وقت حكيتِ اول كلمة من الشعر
ليلى : أي عم أتسلى بما انو بقيانة لوحدي بين أربع حيطان عم أتسلى وأكتب بس هي القصة
آدم بإرتباك: نسيت قلك صباح الخير
ليلى : صباح النور تفضل

(بتبتسم بهدوء، وبتصبله فنجان بدون ما تحكي كتير. لحظة صمت دافئة.)

ليلى (بصوت ناعم):
لسا بتحب القهوة السادة؟
ولا دلال علمتك تحط سكر؟

(آدم بيبتسم رغماً عن حاله.)

آدم:
لسا قلبي مرّ متل أول.

ليلى (بعيون فيها حنية):
ويمكن لسا قلبي بينبض لنفس المرّ.

(لحظة طويلة من السكوت. آدم بياخد الفنجان، وبيشرب… وهي بتقعد مقابله. بتحكي بصوت واطي، ما فيه عتاب… بس فيه صدق.)

ليلى:
أنا مو عم حارب دلال… ولا عم نافس.
أنا بس عم أذكّرك مين كنت… ومين كنا.

(آدم بيطالعها نظرة فيها وجع، حنين، وتعب. بيهز راسه بصمت، وبيطلع من المطبخ.)

بتصحى دلال مابتلاقي آدم جنبها بتفتح باب غرفتها لتطلع بتنصدم بوجود آدم وليلى على نفس الطاولة وعم يشربو قهوتهم سوا ويتناقشو بهدوء حاولت تعرف عن شو عم يحكو ماسمعت لانو صوتهم نايص رجعت لغرفتها والنار شاعلة بقلبها معقول يلي شافتو آدم وليلى مع بعض هلاء فهمت ليش آدم متغير عليها هيك لكن يا ليلى شو عليه
---ناط

(دلال لحالها، قدّام المراية، .)

1.2K views°• ᒪᗩᗰOOᔕᕼ °•🌸, 11:45