وزارة العدل الأمريكية كشفت عن هوية مؤسس جروب الهاكرز المتخصص في هجمات الفدية Lockbit ☠️
حسب الإعلان الرسمي فنشاط الجروب مسئول عن 7000 هجوم على شركات في عدة دول أبرزها الولايات المتحدة، بريطانيا، فرنسا، ألمانيا.

وزارة العدل أعلنت عن مكافأة 10 مليون دولار مقابل أي معلومات تؤدي للقبض على المؤسس Dmitry Khoroshev.

من يومين موقع Stack Overflow أهم منتدى تعاوني للمطورين على الإنترنت أعلن عن شراكة مع شركة OpenAI، والشراكة باختصار إن OpenAI هتدفع مبلغ مالي مقابل استتخدام الداتا الخاصة بالموقع، واللي قدمها عشرات الآلاف من المطورين بشكل مجاني، عشان تدرب الـ AI الخاص بيها.

بعد الإعلان حصل غضب كبير من المطورين، وبدأ عدد منهم يحذف الإجابات الخاصة بيه على الموقع أو يعدلها بمحتوى تافه كرد فعل.

إدارة Stack Overflow ردت بإنها عطلت حسابات المطورين اللي شاركوا في الحملة دي، ورجعت المحتوى تاني.

نفس القصة دي حصلت لموقع Reddit من فترة قريبة.
الإنترنت بيتدمر لصالح شركات الذكاء الاصطناعي 😑

في سابقة تاريخية، شركة جوجل كلاود حذفت بالخطأ بيانات أحد عملائها بشكل كامل ❌

حساب شركة الاستثمارات UniSuper اللي بتدير أصول بقيمة 80 مليار دولار، تعرض للحذف من خدمات جوجل السحابية، بسبب خطأ في تهيئة الإعدادات من جانب جوجل.

لمدة أسبوع الـ 620 ألف عميل للصندوق فقدوا الوصول لحساباتهم وبياناتهم بسبب المشكلة.

المضحك في الموضوع إن الشركة كانت بتحتفظ بنسختين احتياطي من بياناتها على جوجل كلاود في موقعين مختلفين جغرافيا كنوع من الأمان وكدة، لكن لأن الخطأ كان على مستوى الحساب نفسه فالنسختين طاروا.

لحسن الحظ الشركة كان عندها نسخ احتياطية تانية موجودة على خوادم شركات تانية غير جوجل وقدرت تسترد بياناتها بالكامل.

شركة جوجل أعلنت بشكل رسمي إنها هتبدأ تستخدم إجابات مولّدة بالذكاء الاصطناعي في محرك البحث جوجل 😑


المنتج هيكون اسمه Search Generative Experience (SGE) وهيستبدل روابط المحتوى المكتوب بواسطة بشر بمحتوى مباشر في محرك البحث تم إنشاؤه بواسطة الذكاء الاصطناعي.

الخبر ده سيء جدا للأسف لمنشئي المحتوى وأصحاب المواقع اللي بيعانوا أصلا من شهور بسبب تحديثات المحرك الأخيرة واللي اتسببت في فقدان مواقعهم نسبة كبيرة من الترافيك!

ده استمرار من جوجل في سرقة مجهود أصحاب المواقع بعد ما بدأت بتقديم مقتطفات من محتوى المواقع مباشرة في محرك البحث واللي كان بنسبة كبيرة بيحتوي على المعلومة اللي بيبحث عنها المستخدم، وده في النهاية خسارة لمنشئ المحتوى، ودلوقتي المحرك هيسرق الإجابة مباشرة من المواقع ويعرضها على شكل إجابة AI!

القصة دي تبدو إنها تسهيل من الشركة على المستخدمين في البحث عن المعلومات، لكن الجانب التاني منها إن الشركة حرفيا بتقتل مجال كتابة المحتوى البشري، وبتحول الإنترنت لشبكة محتوى مولّد بالـAI.. ودي حاجة عمرها ما هتكون كويسة أبدا.

ملخص مؤتمر جوجل امبارح للي متابعش

بعد سنين من العمل وتسريب بيانات آلاف الشركات وملايين المستخدمين.. موقع التسريبات وسوق بيع البيانات الشهير BreachForums تم مصادرته من قبل مكتب التحقيقات الفيدرالي 🪦

قناة الموقع على تليجرام تم مصادرتها كذلك، ويبدو إن المؤسس التاني للموقع تم القبض عليه بعد القبض على المؤسس الأول العام الماضي.

جوجل في مؤتمرها الأخير أعلنت عن ميزة اكتشاف المكالمات الاحتيالية من خلال مساعدها الذكي على الأندرويد Gemini 🤖

النظام بيعمل تحليل للمكالمة بشكل آني وبيصدر تحذير للمستخدم لو تم اكتشاف نمط للمكالمات الاحتيالية زي طلب تفاصيل حساب بنكي، أو طلب تحويل مبالغ مالية أو بطاقات هدايا.. ودي من طرق الاحتيال المعروفة عبر الهاتف.

طبعا عشان المستخدم يستفيد من الميزة لازم يسمح لجوجل بالتنصت على مكالماته 👈👉

شركات الذكاء الاصطناعي عشان تدرب النماذج بتاعتها وتوصلها إنها تكون بالقدرة اللي وصلت ليها حاليا بتحتاج أحجام ضخمة من البيانات، والبيانات دي بيتم الحصول عليها بنسبة كبيرة بطرق غير مشروعة.

شركة زي OpenAI لما بدأت تدريب النموذج بتاعها GPT عمل زحف على الويب وجمعت كميات ضخمة من البيانات المحمية بحقوق طبع ونشر، منها كتب ومقالات وحتى فيديوهات اليوتيوب.. طبعا كل ده بدون ما تحصل الشركة على أي موافقات من أصحاب المحتوى، وهي حاليا زي معظم شركات الذكاء الاصطناعي مرفوع عليها قضايا من ناشرين وأصحاب المحتوى المسروق.

الموضوع ده ظهر بشكل أسوأ في المحتوى المرئي خصوصا الصور والتصميمات، لأن نماذج توليد الصور زي Stable Diffusion كمثال عملت نفس اللي عملته OpenAI، وبقت دلوقتي تقدر إنها تولّد صور بنفس أسلوب أشهر المصممين والفنانين، لأن النماذج دي اتدربت على محتواهم وقدرت تفهم مميزات أسلوب كل مصمم منهم.

للسبب ده بدأت تظهر تقنيات تحارب عمليات سرقة المحتوى من شركات الذكاء الاصطناعي، وأشهر التقنيات دي حاليا هي مشروع Glaze، وده مشروع بيعتمد على تسميم الصور بحيث لما يتم تدريب نموذج AI عليها ميقدرش إنه ينسخ الأسلوب بتاعها بعد كدة.

الطريقة بتعتمد على تغيير بيكسلات معينة في الصورة، والتغير ده لا يمكن إدراكه بالعين المجردة. يعني اللي يشوف الصورة قبل وبعد مش هيقدر يفرق بينهم، لكن بالنسبة لنموذج الذكاء الاصطناعي؛ التغيير اللي بيحصل بيكون ضخم جدا وبيعمل انحراف ضخم في مدى قدرة النموذج على فهم أسلوب المصمم ومحاكاته بعد كدة.

موضوع الملكية الفكرية والذكاء الاصطناعي من الحاجات اللي كنت مهتم بيها جدا الفترة اللي فاتت، وده اللي من خلاله اتعرفت على مشروع Glaze، وهو مشروع من تطوير فريق من الدكاترة والباحثين في مجال علوم الكمبيوتر في جامعة شيكاغو الأمريكية.

أنا كتبت مقال عن الموضوع، وفكرة وكيفية عمل مشروع Glaze، وجزء من المقال هو حوار عملته مع البروفسيور Ben Zhao أستاذ علوم الكمبيوتر في جامعة شيكاغو، واللي كان ليه أراء قوية ومختلفة عن الاتجاه الحالي في مجال الذكاء الاصطناعي وخطره على البشرية بشكل عام.
أنصح بمراجعة المقال 👇
https://bit.ly/4asEPOc

ده عرض إنترنت منزلاه شركة Comcast الأمريكية:

راوتر مجاني
بدون عقود أو اشتراكات
باقة بيانات غير محدودة
سرعة 100 ميجابت في الثانية

التكلفة 30$ في الشهر، وممكن ترفع السرعة لـ 200 ميجابت وتدفع 45$ 🙂

مساء الخير

شركة مايكروسوفت أعلنت عن "ميزة" جديدة قادمة لويندوز 11 اسمها Recall، ودي وظيفتها إنشاء ذاكرة فوتوجرافية للويندوز عن نشاط المستخدم 🎥
ازاي "الميزة" دي بتشتغل؟

ويندوز بياخد سكرين شوت للمعروض على الشاشة باستمرار طول ما انت بتستخدم الجهاز، وبعد كدة بيخزن الصور دي ويعالجها باستخدام "الذكاء الاصطناعي" ويفهرسها عشان يكون متاح البحث عنها.

يعني ويندوز حرفيا هياخد صور لأي حاجة انت بتفتحها على النظام، ويخزن البيانات دي 🙂

مايكروسوفت حاليا بتقول إن العملية دي هتتم على الجهاز نفسه، وبيكون المستخدم عنده تحكم التطبيقات اللي بيتم أخذ صور منها. طبعا كلنا عارفين مدى مصداقية كلام مايكروسوفت وثقة المستخدم فيها ❤️

من الحاجات الغربية بردو إن الميزة دي مش هيكون فيها خيار لإلغاء تفعيلها حسب الإعلان، ولا حتى موجود فيها إمكانية إدارة المحتوى، واللي بتخلي الأداة تحجب المعلومات الحساسة من الصور زي كلمات المرور مثلا!

الحاجة الكويسة في الميزة دي إنها بتحتاج إن جهاز المستخدم يكون فيه وحدة معالجة عصبية "NPU" وشريحة Snapdragon X ومتطلبات أخرى غير متوفرة عند الغالبية العظمى من المستخدمين.

فاكرين لما قولتلكم إن إنها جوجل هتبدأ تستخدم إجابات مولّدة بالذكاء الاصطناعي في محرك البحث جوجل..

الصورة دي نموذج لأحد إجابات جوجل المولدة بالذكاء الاصطناعي، وهي عرض حل لمشكلة إن الجبنة بتتزحلق من على البيتزا..

الذكاء الاصطناعي بتاع جوجل اقترح استخدام غراء كحل للمشكلة.

المضحك في الموضوع إن إجابة "الذكاء الاصطناعي" بتاعت جوجل مصدرها تعليق على موقع Reddit من 11 سنة من مستخدم اسمه زي ما انتوا شايفين كدة..

بعد حوالي 28 سنة من الخدمة.. تطبيق ICQ، واحد من أقدم وأشهر تطبيقات المراسلة الفورية اللي عرفها الإنترنت هيتم إيقافه بشكل نهائي في 26 يونيو القادم 🪦

دونالد ترامب في مؤتمر عمله الأسبوع الحالي أعلن إن في حالة فوزه بولاية رئاسية ثانية هيصدر عفو عن روس أولبريخت اللي بيقضي حاليا حكم بالسجن مدى الحياة.

روس أولبريخت هو مؤسس موقع طريق الحرير، اللي كان في فترة 2011-2013 أكبر سوق للبيع والشراء على الدارك ويب.

بالرغم إن الموقع كان عبارة عن سوق تجاري، لكنه كان مشهور بإنه الوجهة الأبرز لشراء وبيع المواد المخدرة بطريقة آمنة.

الموقع كان يعتبر أول تجربة فعلية واستخدام حقيقي لعملة البتكوين، اللي كانت أفضل وسيلة للدفع واستلام الأرباح بسبب صعوبة تتبع المعاملات وقتها، وكمان إمكانية الحصول عليها واستخدامها والدفع بيها واستلامها بدون توفير أي معلومة شخصية ممكن استخدامها فيما بعد لتتبع مصدر الأموال أو وجهتها النهائية وصولا لهوية المستخدم.

طبعا البتكوين حاليا لم يعد وسيلة آمنة للاستخدامات دي، وظهرت عملات بتوفر خصوصية تامة زي عملة Monero.

ترامب في مؤتمر وعد بتخفيف حكم روس للمدة اللي قضاها بالفعل (11 سنة)، وبالتالي هيتم الإفراج عنه.

روس كان اتحكم عليه في عام 2015 بالسجن مدى الحياة مرتين + 40 سنة.

عن الـ VPN المجاني والبرامج المكركة..

النهاردة تم الإعلان عن تفكيك شبكة 911 S5 أقدم وأكبر شبكة بوتات في تاريخ الإنترنت والقبض على مؤسسها.

خدمة 911 S5 كانت عبارة عن خدمة بتسمح بتأجير عناوين آي بي حقيقية موجودة في دول مختلفة حول العالم، واللي بيُطلق عليها (بروكسي المقيمين / Residential Proxies) واستخدامها في أي غرض ممكن.

فكرة العناوين دي ببساطة إن 99% من عناوين خدمات الفي بي إن أو تور أو غيرها من طرق تغيير عناوين الآي بي على الإنترنت بتكون معروفة، وممكن للمواقع اكتشافها بسهولة، بل ويتعملها فلترة.. وممكن تكون حصلت معاك ودخلت موقع قبل كدة وانت مشغل VPN والموقع رفض السماح لك بالدخول.

مثلا لو شغلت VPN ودخلت لأي موقع لمعرفة الآي بي هيقولك إن دي آي بي من خدمة الفي بي إن اللي بتستخدمها، لأن كل خدمة بيكون ليها مدى آي بي معين بتستخدمه في تطبيقاتها.

فكرة بروكسي المقيمين إنها بتبطل كل ده، لأن العنوان بيكون عنوان IP حقيقي تابع لمزود خدمة رسمي. يعني كإن فيه مستخدم حقيقي بيستخدم الموقع أو الخدمة.

2/1

خدمة 911 S5 قدرت إنها تبني شبكة بوتات بعدد خرافي وصل لـ 19 مليون IP حقيقي، وكانت بتأجر العناوين دي بمقابل مادي، ودي كانت من أهم الأدوات اللي بيتم استخدامها في الاحتيال على الأشخاص، الشركات وحتى الحكومات.

مثلا الشبكة دي، ومن خلال عناوين مقيمين في أمريكا، تم استخدامها لتقديم 560 ألف مطالبة تأمين ضد البطالة، وفشل نظام الحكومة الأمريكية في اكتشاف المشكلة اللي كلفتها 5.9 مليار دولار من التأمينات المزيفة.

الطريقة اللي تم بيها بناء الشبكة الضخمة دي كانت بتعتمد على تقديم خدمات مجانية، خصوصا تطبيقات الـ VPN المجانية، وأشهرهم MaskVPN - DewVPN، وكذلك الكراكات والبرامج المكركة والتحديثات المزيفة، وكانت الأدوات دي بينزل معاها مالوير جاهز بيسمح باستخدام جهاز الضحية كبروكسي في أي حاجة ممكنة، بما في ذلك ارتكاب جرائم زي السرقة، الاحتيال، الاختراق وغيرها من الأمور اللي بيتم ارتكابها بعنوان الإنترنت الخاص بيك.. وده بيكون أسوأ لو انت مقيم في دولة بتستخدم عناوين إنترنت ثابتة Static IP.

الشبكة حققت أرباح تخطت 100 مليون دولار لمؤسسها، واتسببت في خسائر بمليارات الدولارات لشركات مالية وحكومات وأفراد حول العالم.

مؤسس الشبكة اللي فضلت شغالة 10 سنين صيني الجنسية، اسمه Yunhe Wang، وتم القبض عليه في سنغافورة. هويتك كانت اتعرفت من سنتين لما خبير أمني عمل تتبع للدومينات اللي كانت الشبكة بتستخدمها واكتشف إنها متسجلة بنفس الاسم.
لو تم إدانته بالتهم الموجهة ليه هيواجه عقوبة بالسجن 65 سنة.

كيف تستثمر الدول الناشئة الناجحة..

الأسبوع الماضي رئيس الوزراء الماليزي أنور إبراهيم أعلن إن ماليزيا هتستثمر 25 مليار رينجيت ماليزي (حوالي 5.3 مليار دولار) في إيه بقى؟
في تدريب 60 ألف مهندس في مجال أشباه الموصلات، لتحويل ماليزيا لمركز ووجهة عالمية لصناعة الرقائق.

العالم دلوقتي أدرك مدى أهمية الصناعة دي خصوصا بعد إدراك مدى خطورة الاعتماد شبه الكلي على تايوان، في ظل تخوف من هجوم صيني عليها.

ماليزيا لما فكرت تستثمر.. قررت تستثمر في العمالة.. ودي يوضح لك عبقرية الناس المسئولة عن التخطيط هناك.

المدير التنفيذي لشركة آبل كان من فترة في مؤتمر واتكلم بسخرية من الناس اللي بتقول إن آبل، وغيرها من الشركات التكنولوجية الكبيرة، بتصنع منتجاتها في الصين بسبب "رخص العمالة". وقال إن الصين توقفت عن توفير "عمالة رخيصة" من فترة طويلة، وإن السبب الحقيقي إن الصين عندها وفرة عالية من العمالة المدربة على وظائف ومهام بتحتاج درجة عالية من المهارة، وده بيكون ضروري جدا للشركات اللي بتصنع منتجات عالية التقنية.

أمريكا حاليا بعد أزمة تايوان واتجاهها لإنشاء مصانع لأشباه الموصلات داخل الدولة ما زالت غير قادرة على تشغيل المصانع دي بسبب عدم وفرة العمالة المطلوبة.. وغالبا عشان يشغلوا المصانع هيستوردو عمالة من تايوان ودول أخرى.

بالمناسبة؛ ماليزيا تعتبر واحدة من المراكز المهمة في الصناعة، ودخلتها من حوالي 50 سنة، وحاليا مسئولة عن 13% من عمليات تعبئة وتجميع واختبار الرقائق على مستوى العالم.

https://asia.nikkei.com/Business/Tech/Semiconductors/Malaysia-to-train-60-000-engineers-in-bid-to-become-chip-hub

لو الويندوز عندك بطيء، أو جهازك ضعيف وعايز تخلي الويندوز يكون أسرع تقدر تستخدم AtlasOS 🚀

أطلس عبارة عن طبقة معدلة بيتم إضافتها على ويندوز عشان تحذف أجزاء من النظام غير هامة أو أهميتها محدودة وبيكون استهلاكها للهاردوير كبير.
العملية دي بتحسن جدا من أداء النظام وبتخليه أسرع بكتير من نظام ويندوز الخام.

الكود البرمجي لأطلس مفتوح المصدر، وتقدر تستخدمه بشكل مجاني تماما.. ودي أهم الأمور اللي بيعملها:

▪️ بيقلل من عدد العمليات في الخلفية
▪️ إزالة المكونات غير الضرورية في النظام
▪️ التخلص من تطبيقات مايكروسوفت المثبتة مسبقا
▪️ بيتم حذف أداة Telemetry اللي بتجمع بيانات المستخدم من النظام
▪️ تعطيل بعض الخدمات زي توفير الطاقة - RDP - OneDrive وغيرها

التعديلات دي بتخلي النظام خفيف جدا وبيكون فيه فرق كبير في الأداء.. مع تحسن على مستوى الخصوصية.

عشان تستخدم أطلس بتنزل نسخة ويندوز عادية وتسطبها، سواء ويندوز 10 أو 11، وبعد كدة تحمل حزمة Atlas OS مجانا وتثبتها على النظام.

ده مقال فيه شرح مفصل عن الأداة ومتطلباتها، وازاي تقدر تستخدمها لتسريع الويندوز والاستفادة من إمكانيات جهازك بشكل أفضل 👇
https://bit.ly/3VqoEwA

الأسبوع الماضي شركة هواوي أعلنت إنها هتبني منصة للخدمات السحابية في مصر لخدمة منطقة شمال إفريقيا ☁️

الشركة كمان أعلنت عن إطلاق نموذج ذكاء اصطناعي بيدعم اللغة العربية، بيدعم خدمات زي التعرف على النطق بدقة تصل إلى 96%، ودي هتكون من ضمان الخدمات اللي هتقدمها المنصة السحابية، بخلاف خدمات الذكاء الاصطناعي المختلفة، وخدمات الاستضافة وقواعد البيانات وغيرها من الأمور.

هواوي أعلنت إنها هتستثمر 300 مليون دولار في مصر على مدار 5 سنوات، وهتدرب 10,000 مطور.

بكدة هواوي أصبحت أول شركة في العالم تبني منصة خدمات سحابية عامة في مصر.

شركة نيفيديا تصل لقيمة سوقية 3 تريليون دولار للمرة الأولى في تاريخها، لتصبح ثالت شركة أمريكية عامة تصل للرقم ده بعد آبل ومايكروسوفت.

الشركة زادت قيمتها أكثر من 10 أضعاف خلال أقل من سنتين بدعم من التطور الضخم في مجال الذكاء الاصطناعي، وارتفاع الطلب على منتجات الشركة.

الجدير بالذكر إن 7 من أكبر 10 شركات من حيث القيمة على مستوى العالم بينشطوا في مجال التكنولوجيا.

شركة أدوبي حدثت شروط الاستخدام الخاصة ببرنامج فوتوشوب، وأضافت فقرة بتنص إن الشركة عندها الحق في الوصول لكل المشاريع والمحتوى اللي بيتم إنشائها من خلال البرنامج 🙂

الشركة قالت إن ده عشان "إدارة المحتوى" والتأكد إن البرنامج مش بيتم استخدامه في حاجات بتخالف سياسة الاستخدام.. لكن الحقيقة إن أدوبي عايزة تسرق محتوى المستخدمين عشان تستخدمه لتدريب أدواتها ونماذج التصميم بالذكاء الاصطناعي الخاصّة بيها.

المضحك إن الشروط دي بتشمل المحتوى اللي بيكون محمي باتفاقية عدم إفصاح NDA.

لو عايز تستمر في استخدام الفوتوشوب لازم توافق على الشروط الجديدة.. ولو عايز تحذف الفوتوشوب من جهازك مش هتقدر إلا لما توافق على الشروط الجديدة بردو 🤡