مع 2024 تعالوا احكيكم
على قول صحبتي السعودية

عندي مرشد جميل جدا وعجيب جدا
مره عملنا مواعيد معاهو كم شخص
وعايزين نثرثر ونسأل كالعادة ونسمع بعض الموسيقى

لما دخلنا قال لينا :
انا عايزكم تمشوا رحلة طويلة ..
وسكت 🥸

العايز يستفسر يكتب سؤاله في ورقة
مسموح ليك بسؤال واحد في كل ورقة وفي قدامك 5 أوراق

اتفضلوا اكتبوا أسئلتكم
انا اسئلتي كانت
رحلة ل وين ؟
معاي منو ؟
شهر كم ؟
بتاخد زمن قدر شنو؟ (عشان اجهز هدوم واجازه من شغلي تراني هايفة واحب الاجازات) 😁
ما كتبت السؤال الخامس

بعد شاف اسئلتتا 🌚🤢
جزء اتهزأ وجزء اخد شوكولاتة
انا اخدت عزومة على سينما

اكتر ناس اتهزأت اللي سألت
ليه انا 🌚
والقروش كم 😂

وطبعا ناس القروش كم اخدوا هدايا من نوع قوم نضف المكتب وقوم رسل ايميلات وقوم اعمل للناس نسكافيه واقرا كتاب وتعال اشرحه لينا

الرسالة كانت
الفرص لما تجيك ح تسأل من شنو
مستوى اسئلتك
مستوى شجاعة
ولا مستوى خوف
مستوى مسؤولية
مستوى متعة
مستوى عدم ثقة بالنفس

الحمد لله انا كنت زولة بهجة مع حبة انغماس في مسؤولياتي وقال لي بيني وبينكم شايف امك في كل اسئلتك 😂😂😂
قلت ليهو ارح لأمي قول ليها ارح رحلة
بتوريك ليهو بالأسئلة والمسؤوليات

الفكرة راقبوا نفسكم
انتوا بتواجهوا الفرص بأي نوع أسئلة
كل الأسئلة مباحة
لكن في اسئلة بتقيدك وتحبطك ما تختها اول شي
اصلا في ناس وصلت level ما تسأل بكم
مش ماديا لكن وعيها بالفرص بقى ما بتقيم بالمال
بس جرب
اي فرصة ما تضع سؤال (بكم) اول سؤال
غالبا ح تتصرف وتغتنمها
لأنه في فرص جاية تعمل ليك update و upgrade
في استحقاقك واكتشافك لفرص المال عندك

اسأل كل الأسئلة
وخلي سؤال (بكم) اخر شئ
اذا ما اخدت الفرصة دي هسي ح تاخدها المرة الجاية طوالي
انت فتحت مجال لعقلك الباطن يشوف أهميتها

وطبعا سؤال ليه انا ؟ هل استاهل؟ محتاج شغل كتير

جربوا في السنة الجديدة
واحكوا لي تجاربكم

احنا ما بنعيش مرتين❤️.


#حباب_غلاب.
@fadfadah98

#هذا_الصباح♥️

"احتفظت بوعدي ليكِ ..
ما إلتزمت بكلمه منك!."


ما كنا عايزين من العلاقات اللي خضناها في حياتنا و اللي لسه بنخوضا كل يوم حاجة غير الأمان .

و الأمان و ان كان تعريف عام ، فكل واحد مننا عنده تعريفه الخاص بيه ، تعريفه اللي جاي من مواقفو هو من تجاربه من كل حاجه سمحه و شينه عدت بيو ،بقا عارف شنو الأمان بالنسبه ليو او على الاقل عارف منو اللي قادر يقدمه ليه و منو لأ.

- صحبتي عندها زول بيحبها جدا و انا عارفه الحاجه دي، لما سألتها ليه سبتيه رغم الحب ده ؟ قالت لي ما حسيت بي أمان معاه .

عن نفسي ما ناقشتها ولا قلت كلمه بعد الرد ده ، رغم انه ممكن زول تاني يشوفه كلام واهي او مجرد عذر ، و لكني عارفه تماما انها كانت سعيده بالحب ده و انها بقت بتفكر حتلبس شنو في الزفاف !.

طالما قدرت تمسك نفسها و تقيف من كل شي كانت بتبني ليو ، يبقى فعلاً هي ما حست بي امان معاه.
..

إلتزامنا تجاه العلاقات افتكر انو هو حد اركان الامان اللي نحن بنتطلّع ليه ، قدر شنو انت وفيّ للكلام البتقولو ؟ و قدر شنو انت قادر تحقق كلامك ؟ و قدر شنو انت تطمني !؟

ما هو ما كلام و بس ..

احمد زكي لما ادى كريم عبدالعزيز كف في فلم "اضحك الصوره تطلع حلوه " قال ليه زول هو وعدها بحاجه ؟
احمد زكي قال ليه "أيوه وعدها ، كلمه بحبك وعد "!


(ده كان الحوار في اطارو العام قد اكون ما حافظاه كويس ، بس اللي اكيد حافظاه انو "كلمه بحبك وعد !")

لو فكرنا فيها كويس ما حنقولا ساي ولا حنخون الوعد ده ان كُنا قلناها ...

ده مش كلام عن الناس المرتبطه و بس ، لانه الحبّ ما مقتصر على كده ولا الامان ..

اصدقاءنا و اهلنا و الناس المفروض انهم كل حياتنا ديل اكتر ناس مفروض نحس بي أمان معاهم ..

عندي صديقه ايام ما عندي امتحانات و مكتئبه و ما بطلع من البيت ، بتفتح الايميل حقي و ترد على ناس الشغل و ترد على ناس الامتحان ، و تلقاني ما نجحت في الامتحان التجريبي ، تدفع قروش امتحان جديد ، و تضرب تصحيني من النوم ، قومي امشي المكتبة انا حجزت ليك للامتحان ♥️!

"عشاري " حكى عن صاحبة اختو اللي بقت اختهم من كتر ما هي لصيقه بي صديقتا ،، قال لما اختو كانت عيانه و راقده في المستشفى صحبتا كانت بتتدسا في الحمام ، لما يجو الحرس عشان يطردو الناس ، عشان تبيت مع صحبتا ♥️.


العلاقات بقى اللي ما قدرت تحسسنا بالامان ايا كان تعريفه الفردي ، ممكن نخليها تفوت مننا عادي ..

ابدا ما حنخسر حاجه ، غير احساس العشم الاولاني اللي انكسر جوانا ، و عشان ما تبقى سلسله انكسارات .. يكون الانسحاب ابرك !.



#سلمى_المصباح.
#علاقات.

@fadfadah98

كل حاجة بقت بتتغير في ثانية !

وظائف بتختفي - مدخرات بتضيع - صحة بتزول - علاقات بتنتهي - محبة بتتبخر!

فمهما كان وضعك المادي، المهني، الشخصي، مركزك الإجتماعي، عوّد نفسك دايماً تقول الدعاء ده :

"اللهم إني أعوذ بك من زوال نعمتك، وتحوُّل عافيتك، وفُجاءة نقمتك، وجميع سخطك، اللهم أدم علينا نعمك وبارك لنا فيها وإحفظها من الزوال❤️."

ربنا يزيد في بصيرتنا ، يلهمنا الرضا في الموجود ويطرح لينا فيه البركة وخلاص.

هذا المساء..


بيقول لك :

" Your identity should be so secure that when someone walks away from you they don’t take you with them."

يعني هويتك لازم تكون محمية كويس عشان لما حد يجي يبعد عنك ، ما ياخدش هويتك معاه!

- و يبقى السؤال كيف أحمي هويتي ؟؟

الموضوع مش مقتصر علي العلاقات العاطفية بس ، إنما حتي العلاقات الاسرية أو العلاقات الإجتماعية بين اعز الاصحاب، فكرة ان الانسان يكون في علاقة مهما كان شكلها عارف يحافظ علي كيانه بشكل خاص و واضح ، مش دايب في شريك عاطفي او حد من افراد اسرته .. !

فبيقول لك تاني :

" Learn to live without the person you can’t live without."

يعني " أتعلم تعيش من غير الشخص اللي مش عارف تعيش غيره .!!"


يعني في عز حبك و تعلقك بهذا الانسان لازم تكون علاقتك فيه قايمة علي وعيك بمحبتك له ، مش عشان انت هتضيع من غيره .. !

قايمة علي نضوج و كرامة ، مش علي اعتمادية و عجز ...

قايمة علي انت بتدي من عندك ، مش جعان مستني تاخد من غيرك .. !

فعشان الانسان يحافظ علي هويته لازم في الاساس يعرف كويس قيمة هويته ، قيمة نفسه الغالية عنده ، قيمة كل تفصيلة بتشكّل روحه و جوهره .

ساعتها اللي يقعد يقعد و اللي يمشي يمشي، هو مش مربوط بإحتياج او نقص ..

فسواء هو في علاقة او مش في علاقة هو كيان قوي متماسك بمبادئه و افكاره، هو شبعان بنفسه و مصدق بكدة مش خادع نفسه.


#كيرلس_بهجت.

@fadfadah98

حسألك سؤال واحد بس
ولو إجابتك كانت حاضرة بدون تفكير فما تقرأ البوست ده
ولو لا .. أوعدني إنك تقراه للنهاية

وسؤالي هو :
- إنت بالضبط كده ، مِنو؟

هل إنت الشخص البتعرفه عن نفسك والفاكرو عنك ، ولا إنت الشخص البيعرفوه عنك الناس ومفكرنّك عليه ، ولا إنت خليط بينهم ، ولاّ إنت لا هذا ولا ذاك ، ولا إنت ما بتعرف نفسك تماماً ولا الناس بيعرفوك تماماً..
وات إيفر..
خلِّيني أسهِّل عليك المهمة دي

مؤخراً قريت كِتاب لعالم نفس اسمه روبرت هير ، بيقول فيه :
إنو الشخصية عموماً ليها تلاتة تقسِيمات
الأولى
الشخصية الحقيقية واللي هي بتمثل حقيقتنا بكل جوانبها حتى الجوانب الناكرنها والماعارفنها عننا
والتانية
الشخصية النحن شايفين نفسنا عليها ، والبتمثل تصوراتنا عننا ، والطريقة البنحاول نظهر بيها للناس بما في ذلك الطريقة النحن عايزنهم يشوفنا بيها واللي بنبذل كل جهدنا عشان نغذّيها ونحسّنها
والثالثة
الشخصية الشايفنها علينا الناس ، والبتمثل تصوراتهم الشخصية عننا نحن ، ونظرتهم لينا سواءً كانت متوافقة أو مخالفة لنظرتنا لنفسنا ، وسواء كانت صحيحة أو خاطئة

يعني أنا كل الشخصيات دي؟
أيوه يا سيدي ، إنت كل دول
والرحلة الحقيقية بتتمثل في إننا نوازن بين الشخصيات التلاتة دي ، وكلما كان التباين بينها كبير كل ما كان ده بيعني إنو محتاجين نعيد حساباتنا ونشوف المشكلة وين بالضبط!
وبرأيي ، إنه بس الإنسان العنده وعيي ذاتي كبير هو الحيقدر يوازن بينها ، لأنه مدرِك لشخصيته الحقيقية وفي نفس الوقت يوجد تناسق كبير بين الشخص اللي هو عليه فعلاً والشخص اللي فاكرنو عنو الناس ، بإختصار مش متناقِض.

في كل الأحوال..
جزء كبير من الإتزان السلوكي والنفسي بيعتمد على إنو يكون عندك وعي كبير بحالك
والوعي الذاتي ده بدوره بيعتمد علي إنك تكون صريح صراحة تامة مع نفسك..
يعني الواحد يبقى شايف نفسو من كل زواياها
شايف الضلمة الفيهو زي ما شايف النور بالضبط.
وده صعب ، لأننا كلنا بنحاول نداري الجانب المظلم مننا ، بس أنا ما قلت ليك أعرضو للناس .. لأ ، إتقبّل وجوده ، إعترف بيه فيك ، لمن تعاين في المراية شوفو برضه.
عشان ما تتفاجأ بإنه غيرك بيعرفو فيك أكتر منك ، أو زي ما بيقول المتنبي :
ومَن جَهِلَت نَفسُهُ قَدرَهُ
رَأى غَيرُهُ مِنهُ مالا يَرى.

ده ذكرني مشهد في مسلسل الهرشة السابعة
لما واحدة كده اسمها نادين كل الحواليها قالوا ليها إنها بتحكم علي الأمور من وجهة نظرها دايماً من غير ما تراعي للشخص التاني وإنها بتفرض وجهة نظرها الخاصة وبس ، لمن سمعت الحاجة دي من أكتر من شخص قريب منها بمختلف الصِيغ إتصدمت جداً ، حست إنهم ظلموها ، ونظرتها لنفسها بدت تتهزّ ، وده كلو ما كان حيحصل لو هي كانت مُدركة لوجود العيب ده فيها مسبقاً!
فإنك تكون صريح معاك بيتطلّب إعترافك بعيوبك وبنقصك وبالحاجات الماحلوة فيك ، بيتطلّب بإختصار شجاعة إنك تحاكِم نفسك بحيادية وكأنها إنسان آخر.
العندو إدراك زي ده صعب يتكسِر ، صعب تحوّر عليه أو تضغطه ، صعب تهوِّب ليه بعيوبه وبنقصه أو تستخدمها ضده ، صعب تهزمه أو تهزّه أو تأثر فيه .. لأنه already مدرك الحاجة دي ، ومتقبِّل بل متصالِح مع حاله.

وزي ما قال واحد اسمه Mueiz :
(إنك تكون "زول كويس" دا جُهد عظيم ، وبيتطلّب أولاً معرفة بنفسك وعيوبك عشان تقننها ودا بحد ذاته تحدي ضخم جداً ، ثانياً تحتاج تتعلم كيف تتعامل مع الآخرين ودا تحدي أضخم لأنو كل شخص مختلف ، وكل شخص عنده عقدته براهو المحتاج تتعامل فيها معاه وتفهمها
إذن إذا كنت فاكر نفسك زول كويس فإنت غالباً زول سيئ لكن إنت لسه ما عارف الحاجة دي ، لأنه زي ما واضح إنك تكون زول "كويس" دا شئ صعب جداً ، وبما إنه شرط عشان تكون زول كويس يكون عندك وعي بالنفس معناه حتكون عارف عيوبك وعارف إنك ناقص ، وعندك الإحتمالية إنك تكون سيئ ودا حيخلق عندك تواضع وبالتالي وعي لنقطة إنك حتكون في رحلة مستمرة عشان تكون أحسن).

بلا شك ، كلنا نفسنا نكون عندنا وعي زاتي بينا ، كلنا عايزين نفهمنا ونفهم الآخرين بصورة أوضح
وده كلو مُمكن
ممكن لمن نبطل نشوف نفسنا ، أو نشوف الحياة ، أو نشوف الناس التانيين بصورة مثالية.


صباحكم موزون♥


#مريم_الشيخ.

-
" اللهم امنحنا في هذا اليوم من رحمتك وفضلك ماتُسعِدُ به قلوبنا، وتَشرح به صدورنا، وتُيَسّر به دروبنا، وتُنَفّس به كروبنا، وتغفر به ذنوبنا، ياربّ العالمين."


اللهم صل وسلم على نبينا محمد وعلى اله و
صحبه اجمعين💙.

زعلان منّي!؟

أنا آسف .. حقك علي♥️

تعالى كلمني ، وقول أنا زعلان منّك في كذا و كذا
أنا بقدِّر دا جدًا .. و ان شاءالله حنتراضي ونصفى.

لو زول قال ليك عني حاجة كعبة! ما تظلمني بسبب اللي سمعته؛ ممكن بيكذب عليك، تعال و اسألني، وأنا ببقى صريح معاك؛ ولو أنا كعب!! ساعدني أبقى كويس.

ياما ناس بعدت وكانوا فاكرين إننا مُتجاهلين زعلهُم، ونحنا أساساً ما عارفين انهم زعلانين.. و ناس اتكلمت من ورانا وقالوا عننا وخلو الناس تكرهنا ونحنا أصلًا أبسط من كدا بكتير.

ما تسيبوا فراغ سلبي بينَّا .. ممكن ؟!


@fadfadah98

صباح السلام النفسي ❤️


" انت ما مضطر تشارك في كل مشكلة في مواقع التواصل الاجتماعي ، ما لازم تكون مع أو ضد في كل ترند، ينفع عادي تكون ما مهتم بالقصة أو ماعندك حاجة تقولها أو حتي ما عايز تخش في صدام وحابي تحتفظ بوجهة نظرك لنفسك ..

مبارزات الآراء ماهي إلا شحن مستمر لطاقة الغضب جواك !

-أسامة عكاشة.

@fadfadah98

- عزيزي يا صاحب الظل الطويل ..
أعلمُ الآن
ما الذي يعنيه الناس حِين يقولون أنَّهم مُثقلون بالأشياء
أعلمُ كيف يرتجف الجسم، ويضيق النفس
ولا أحد يدرك ذلك ..

اليوم وأنا قاعده أكمل شغلي في البريك كدا اتلاقيت مع موظفة بالشركة ،
إتعرفنا ودردشنا شويه

وقالت لي جملة :

" ادي كل مرحله من مراحل حياتك حقها ، أنا وصلت للي أنا فيه بسبب إني ما كنت جادة مع نفسي زيادة عن اللزوم وسمحت لنفسي أجرب وأغلط بالوقت اللي كان عادي فيه إني أغلط"‏

الإنسان أحيانًا بيشدها بزيادة وينسى إن االسنين دي كلها محسوبة من عُمره..
ولازم يديها حقها ويصنع لنفسه ذكريات إذا شافها بعد سنين يقول يااااااه ❤️

#بودكاست_الصباح_البدري 🌷
#ريما_عباس

هذا المساء ..

كيف أرتب الأولويات ماقبل الزواج؟♥️


- سؤال سألتني ليه إحدى البنات..
وابدأ بمقولة لدكتور مصطفى محمود يقول فيها:
"الذي أؤمن به: أن مرحلة العزوبية ليست مرحلة
إصلاح الشعر المتقصف، والبشرة المترهلة فقط.
إنما هي أثمن فترة لديك لتصنعي عقلاً مختلفاً وشخصية قادرة على إنتاج جيل حي نابض بالفلاح..
هي أثمن فرصة لتتعلمي فن صناعة الإنسان وتلملمي شتات شخصيتك وترممي عيوبك كي لا يعيد التاريخ التربية الناقصة نفسها."

- في أولويات دين تأتي وتسبق أولويات
الدنيا..
وبتذكر حديث الرسول صلى الله عليه وسلم:
(إذا خطب إليكم من تَرْضَوْنَ دِينَه وخُلُقَهُ؛ فَزَوِّجُوهُ).
في مواصفاتك اللي عاوزاها بعدين وتدعي في كل صلاة، تكون أولويات الدين في الأول، تقوى الله، والأخلاق العالية، علمه ومعرفته بدينه، على أمور الدنيا اللي تأتي لاحقًا
من مال ونسب وجمال وغيره مما تتمنيه.

- الرضا والسعادة أمور مهمة جدًا..
وبتحصل وتستمر لمن ما تقدمي الدنيا واولوياتها وتكوني عاوزة بس شخص ذو مال وجاه وما مهم أخلاقه وتعامله.
دا ما معناه ولا بنفي إنو إنتِ ترغبي بشخص يكون مصدر دخله كويس وعندو قروش وتعيشي معاه حياة كريمة،
في زمن اوضاعه الاقتصادية سيئة، لكن بنتكلم
عن تقديم الأمر دا وإنو هو يكون أهم صفة والاولى
وبعدها يجي دينه وخلقه.

- في ناس عندها مواصفات بتصل بيها
درجة المثالية والكمال، الكمال لله وحده..
ماف شخص بكون بنفس اللي إنت تتمنيهِ بالضبط،
كلنا عندنا عيوب، بتلقي معظم الصفات فيه، والأهم موجود ودا يكفي.
بتلقي الشخص المسؤول دايمًا..
واللي عارف تمامًا إنو الزواج امر مش ساهل، وإنك حتى لو عندك عيوب بس بتحاول كل يوم تكون نسخة أفضل منك، تحسّنها ويكون عندك قبول ورضا تجاه نفسك والطرف الآخر، هنا بتستمر الحياة، وما بتكون مبنية على قروش ومناصب وحاجات دنيوية زائلة عمرها ما بتخلي الأشخاص سعيدين وراضين طول حياتهم.
ويا ما سمعنا قصص جميلة جدًا لناس اختارت
تستفيد من وقتها وتتعلم عن دينها وعن مختلف العلوم والمعرفة وتحسّن من نفسها وتسعى لآخرتها اكثر مما تسعى لدُنياها، واختارت بعدين الصالح المُصلح التّقِي واختاروا ما تكون الدنيا همهم الشاغل بقدر إصلاح أنفسهم وبناء بيوت آمنة مطمئنة تنتج أطفال صالحين وقادة وكيف
جاءتهم الدنيا راغمة وفُتحت لهم أبواب الخير كلها.♥️


في الأخير ..

قال رجل للحسن:
" قد خطب ابنتي جماعة فمن أُزَوِّجُهَا؟
قَالَ: مِمَّنْ يَتَّقِي اللَّهَ ، فَإِنْ أَحَبَّهَا أكرمها، وإن أبغضها لم يظلمها."♥️


#زكية_عاطف.
@fadfadah98

لما أتصل علي زول او أرسل رسالة لزول وما يرد ، وألقاهو بعدها مُنزّل بوست على الفيس أو إستوري على الواتس، ما بعمل لايك على البوست ولا Seen على الإستوري عشان ما أحرجه.

كل واحد ليهو مِساحة شخصية، و ما معنى إنك On line يبقى لازم ترد علي و ما تتأخر في الرد ، أوقات بنبقى ما عايزين نختلط بالناس ، وأوقات بنبقى ما عايزين نختلط بناس معينة عادي, يعني ما لازم نحرج بعض و نعتدي على المساحة الشخصية حتى لو كنا أصحاب وقريبين.!!

إحترام الحالة المزاجية المُتقلبة للناس بخلّي العلاقة تكون مُريحة جدا ومن غير تعقيدات ماليها ايّ لازمة !!

بمنظور تاني:

ذي ما إنت إخترت الزمن البريحك عشان ترسل لزول معين..خليهو هو يختار الزمن البريحو عشان يرد،ما نضيقها على بعض يا شباب اتفقنا♥️؟.



#Nasr_Aldin.

صباحُ الخير حباً
تساؤل اليوم

إحساسك شنو لما تترفض من شخص انت كنت فاكرو بحبك ذي ما انت بتحبو وما متوقع منو الرفض ابداً ، كنت متوقع يبادلك نفس الشعور بس هو رفضك؟؟


نقطه وحده ح اعيدها تاني
" ما ترفع سقف توقعاتك "

لو الطرف التاني ما صرح ليك ب عضمه لسانو انو بحبك ما تتوقعها منو بناءاً على إحساس.
بالنسبه ل احساسي!

اتوقع حيكون شي حزين بالذات لما تكون باني احلام بانه ممكن الشخص دا حيكون مبادلك نفس الشعور عموما ما نهايه العالم وحتى احساس الزعل دا ما حيقعد وقت طويل
فتره وحتعدي، الجانب المشرق في الموضوع انك حتكون قدرت تحسم القصه واتكلمت بمشاعرك عشان ماتقعد تقول ياريت اتكلمت وياريت وياريت..

#ريما_عباس
#بودكاست_الصباح_البدري 🪴📌

في أول يوم من رمضان
اللهم أحفظ السودان وأهله،
اللهم انصرنا عليهم فلا ناصر لما الاك

يارب احفظ تنزيل صابر وأهلها، اللهم اني استودعتك اياها احفظها لي بحفظك يا حفيظ ❤️