Message From: 958389

طيب السلام عليكم ورحمة الله وبركاته
بتمني القي أفاده ف الموضوع دا
انا عمري 22 سنه وعندي  ود خالتي عمرو 30 سنه متقدم لي ،أتقدم لي اكتر من مره وكنت برفض بقي جاري ورا الموضوع اكتر من سنتين وحاجه ،روحوا طلعت معاي ،المهم كنت كلمت امي ف الاول رفضت السبب كان عشان هو قاري دبلوم لكن شغاله وشبه مكون نفسوا،المهم جاء راجع وانا وافقت على اساسا اقنع امي،المهم العلاقه استمرت اكتر من شهرين وكسر م شفت منو شي حتي لو زعلتوا كان بجي علي نفسوا وبعتذر ،كان بجينا ف البيت كتير لانو انا ف الاول كنت رافضه المهم وكلم بت اهلي واتكلمت معاي والمهم مشي ،المهم اختي عرفت الموضوع صدفه وامي كانت شاكه من نظراتو لي وجياتو  الكتيره لينا المهم اتكلمت مع اختي وامي وامي رفضت تاني هو زول ربنا بيعلم محترم وشغال بس المشكله انو قاري دبلوم،المهم اتكلمت معاهو وبقي مستغرب انو انا كنت موافقه الحصل شنو ،بقيت م قادره اقول ليهو انو امي الرفضت لانها خالتوا وومكن تحصل مشاكل حتي اتكلم معاي انو اكلم امي وانو هو اكلم امو وتكلم امي ،ف هي بقي شايف انو ضحي كتير عشاني وانا م عملت شي،وانا حاسه بتأنيب الضمير لانو بالجد انا م عملت شي يعني هو م خلي شي م عملوا لي .
اسفه على الإطالة وشكرا مقدماً...

♡♡♡♡♡

وعليكم السلام ورحمة الله وبركاته..
حاولي افهمي من امك سبب الرفض الأساسي شنو لأنها مستحيل تكون رافضه عشان حكايه الدبلوم دي دايما الامهات بكونو عندهم نظره بعيده شديد وهي بحكم انها خالتو حتكون عارفه كل تفاصيلو من صغير فاحتمال عندها مشكله في شخصيتو او حاجه بالشكل دا ..
انتي اتكلمي مع امك ووريها انك عاوزاه واسأليها من سبب رفضها ولو لقيتيه مقنع خليها توصل ليه المعلومه بطريقه لائقه ومن غير تجريح..
ولو ليكم قسمه مع بعض صدقيني بتقع الليله قبل بكره ولو ماليكم ربنا بهيئ الاسباب لحدي ما كلكم تقتنعو..
ربي يسهل ليك الفيهو خير ليكم ..
ودايما ما تخلي تقيمك للإنسان انو هو قاري شنو او وضعو كيف..
قيمي الراجل بي التزامو وعلاقتو مع ربنا وبي خوفو علي اخواتو واحترامو لي امو لأنو صدقيني دي الحاجات الحاتنقصك بعد الزواج..

#بتمنى_اكون_ساعدتك

Message From: 958389

ممكن اكتب مشكله

♡♡♡تفضل/ي

Message From: 900882

السلام عليكم انا عايزة امي يكون عندها مكانة في المجتمع وتقرا الجامعة وعايزاها تمتحن السنة دي شهادة سودانية منازل مع العلم انو  ليها سنيييين خلت التعليم وحتى شهادة اساس ماعندها  عمرها ٤٥ سنة بسال هل في امتحان خاص للكبار ولامدرسة ولا طريقة تخش بيها الجامعة وهل ضروري يكون عندها شهادة تامن وعايزة وحدة تكون امتحنت منازل توريني كيف الاجراءات..
♡♡♡♡

وعليكم السلام ورحمة الله وبركاته..
ربنا يسهل عليك ويكرمك..
امك محتاجه شهاده اساس وثانوي وجامعه اذا كانت عاوزه تمتحن اكاديمي..
واذا عاوزه تقرا اهلي فأسهل لأنو بتمشي تمتحن مع اخر دفعه ممحتحنه تالته وما بطالبوها بشهاده اساس ولا متوسط ولو نجحت بتقرا مجالات معينه في الجامعه مصممه للناس الامتحنو اهلي والحكايه سهله شديدد ..
ربنا يعينكم ويوفقكم لما يحب ويرضى..
#بتمنى_اكون_ساعدتك

https://hottg.com/Estsharat333

Message From: 252661

السلام عليكم ورحمة الله وبركاته
انا عايزه انتقب بس امي رافضه وماعايزني افتح معاها الموضوع أو اتناقش..

♡♡♡♡
وعليكم السلام ورحمة الله وبركاته..
اولا ما تيأسي نهائي وحاولي بكل الطرق وريها حكمه وفضله وكل حاجه بتتعلق بيه ثانيا عليك بالدعاء ادعي كتيييير انو ربنا يلين قلبها عليك ويسهل ليك النقاب بأسرع فرصه وعليك بالصبر عليها ولو رفضت مره واتنين وتلاته واربعه ما تيأسي لأنو كثره الطرق على الحديد تلينه..
واتذكري انو ربنا قال "والذين جاهدوا فينا لنهدينهم سبلنا"♡
#بتمنى_اكون_ساعدتك
https://hottg.com/Estsharat333

Message From: 945644

سلام عليكم ورحمة الله
عايزة استشيركم
عندي واحد قريبي كان عندنا علاقة مع بعض واتطورت ل خطوبة رسمية يلا قاعد يجيب لي هدايا واحيانا مبالغ مادية وطلعات وكده يعني يلا حصلت خلافات بينا ووصلنا لطريق مسدود وإنفصلنا.  بعديها انا م دخلت في علاقة تاني ولا ح ادخل الا زواج رسمي بس الحاجة المزعلاني الحاجات الكان صرفها علي بالذات الانفصال جاء مني انا هي م كتيرة شديد بس ضميري مأنبني شديد كونو شلتهم وم واصلت معاهو .  لكن حرفيا كان إستحال الوصل بينا وروني الصاح شنو لانو متأذمة والله..

♡♡♡♡

وعليكم السلام ورحمة الله وبركاته..
اذا كانت الهدايه قيمتها كبيره فالأفضل انك ترجعيها يعني دهب تلفون او مبلغ كبير ولسه متوفر عندك المهم اي حاجه تحسيها غاليه وصعبه على الانسان انو يطلعها ..اما اذا كانت حاجات بسيطه وما غاليه فالأفضل انك تحتفظي بيها لنفسك..لأنها تعتبر هديه والانسان طلعها بكل رضاه..
والأفضل فالأفضل انو الانسان يتخلص من حقوق كل البني ادمين الحولو عشان ضميره يرتاح

#بتمنى_اكون_ساعدتك

https://hottg.com/Estsharat333

Message From: 941855

السلام عليكم  انا بحب واحد ولحد ما  أتقدم لي  وفجأة  وقف الاتصال ليهو شهرين وبتصل عليه م برد  ولا حتى على الرسائل  وناس البيت طوالي  يسألوني  منو  وما قادرة اوريهم  انو م قاعد يتصل
ف انا م قادرة افهم الحاصل شنو

♡♡♡♡

وعليكم السلام ورحمة الله وبركاته..
امشي بقاعده قتلوك ولا جوك جوك..
يعني بدل تتعبي نفسيا من أسأله الناس قولي لي اهلك ما وصلنا لي تفاهم وفرتقنا الموضوع ..لأنو الظاهر انو زاغ من الموضوع بطريقه ظريفه من غير ما يجرحك..
#دايما بنبه البنات من علاقات الحب وما فيها من خذلان يا بنات ما تلعبي بي مشاعرك ونفسك عشان زول ما بستاهل العاوزك بعرف يصل بيتكم والما عاوزك ح يستنزف كل حاجه كويسه فيك وبفكك عكس الهواا..
#بتمنى_اكون_ساعدتك

https://hottg.com/Estsharat333

Message From: 528022

سلام عليكم انا شخصيه عنيده ومرات لحي نفسي عندي برود عاطفي كيف اعلاجه تقدم لخطبتي كم شخص ويقولون لي نفس الكلام م بتتكلمي معاي لي زي الناس العايزين يتزوجو فهل هذا برود عاطفي ماعارفه احل مشكلتي دي كيف وشكرااا رينا يسعدك

♡♡♡♡

وعليكم السلام ورحمة الله وبركاته..
انا بشوف انو دي حاجه كويسه شديد ما بقصد العناد..ولو جينا للمسمى الصح دا ما اسمو عناد دا اسمو احترام وتربيه منك .. نرجع لموضوعنا..بقصد انك م بتعرفي تتفاهمي مع زول قبل الزواج ..كلميهم انو شرطك انك م تتواصلي مع واحد الا بعد الزواج بعدين مافي حاجه اسمها عواطف ومشاعر عشان نحنا عاوزين نتزوج اي زول بقول كلام زي دا جاهل العواطف دي مفترض تكون مكتومه الي ان يأذن الله لها بالحلال ..انتي ماشه صححح🔑..
ما ترجعي من اسلوبك دا ..
ربنا يرزقك حلال عاجلا غير آجل يارب..
#بتمنى_اكون_ساعدتك

https://hottg.com/Estsharat333

Message From: 939233

السلام عليكم ورحمة الله وبركاته انا
فى اخر سمستر لي فى الجامعة واموري جايطة شدييييد و محتاجة دعوات  وشكرا..
♡♡♡♡

وعليكم السلام ورحمة الله وبركاته..
وهبها منك يالله عوناً وتوفيقً اذا صعب المسير اللهم سهل لها درب البدايات وارزقها تمام النهايات❤️..
#ادعو ليها..الدعوه لأخيك في ظهر الغيب مستجابه♡♡

https://hottg.com/Estsharat333

Message From: 939645

بتمنى انك تساعدي  اول شي عندي ود عمتي بحبني شديد وانا بحبو وكلم ماما انو عايزني واشترى لي دبلتي وقال لي في اقرب فرصه نمشي نجيب المحبس وهو ورقو جاهز مسافر السعوديه سنه واحده بس ان شاء الله  ح يجي يعقد طوالي.. طيب نجي للمشكله.. زمان انا اول كن خشيت الجامعه كان عندي صاحبي شديد  متواصل معاي تاني  حباني وريتو انو عندي حبيب وعرفتهم علي بعض يوم في الجامعه يلا ود عمتي شاف دردشتنا مع بعض وقرا رساله صاحبي الصارحني فيها المهم شاكلنا الاتنين وانا اعتزرت ل حبيبي ورجعنا حلوين اكتر من اول الكلام دا قبل تلاته سنه... الليله فجاءه شفت تلفون حبيبي في الماسنجر متواصل مع بت قال بت اهلو من ابو من بعيد  وبقول ليها اشتقت ليك وجايننا متين في البيت المهم... انا زعلت وقلت ليه انت خاين.. قال لي  الكلام دا زمان لمن  كنا متشاكلين  واعتزر اكتر من ساعه انا ما قادره استوعبب كيف يتواصل مع بنات وانا حاميني اي ولد  معليش طولت عليك

♡♡♡♡

بتمنى من صاحبه الرساله انها تدخل توضح هي زعلانه عشان خطيبها مانعها من اصحابها وعاوزه ترجع ليهم ولا زعلانه عشان هو بكلم بنات وهي ممنوعه وهي ماعندها مشكله انو يتكلم طالما م حيمنهعا انها تكلم اصحابها؟؟؟؟😮‍💨
#احزنتني الاستشاره شديد..وين نحنا من ربنا ويين نحن من الدين يا جماعه😪

https://hottg.com/Estsharat333

صارحني 💌:
Message From: 936095

في البدايه حاجة اشكرك شديد علي الارشادات والنصايح البتدقمها لي النااس حقيقي دي حاجه ما هينة وما اي زول بتحمل بقدر يتحمل شكاوي الكل
✨✨✨✨✨✨✨✨✨
حرفيا انو انا م قادره اوصف ليك وجعي مهما حكيت و قلت ما ح يصل ربع الانا حاسة بيهو بس بتمني أنك تحاول تفهمي

هو انسان متزوج ليو عشرين سنه انسان عظيم جداً قدوة لكل النااس كل النااس البعرفو بحبو ومجرد م ينزكر اسمو ماف زول بقيدر يقول كلام عليو
قادر يخاطب كل العقول كل الاعمار اي زول قادر يتحاور معاهو بي طريقة تحسسك انو الانسان دا بعرفك من زمن طويل م بحسسك انو دي اول جلسة ليكم
بحبو اكتر من روحي ودمو جاري فيني ثقتي فيهو اكبر من اي حاجه
مهما وصفت وقولت ما بقدر اصفو ليك

ف المهم اصلان تلفونو فاتح ساي من دون رمز كل حاجه فيو مفتوحه فيس واتس ماسنجر
كل مره بمسكو وما حصل لقيت فيهو حاجه
بس مرة لقيت صورة وحده كانت عريانة في سلة المحزوفات كضبتا عيوني وقلت انا فاهمه الحكاية غلط وبرضو م ركزتا مع الموضوع لانو انا واثقه في اكتر من نفسي
بس مرة تاني شفتا صور لي المرة دي وكانت كم صورة م صورة وحده خلاص حاولت اتجاوز الموضوع وانا بطرد الوسواس والشيطان الجواي بس للمرة التالت لم شفتا صور المرة اتكدتا تماما

بقيت م قادره اعين فيو م قادره م قادره
كلامي نهائي ما مرتب وما ظنيت يترتب نهائي

Aļhamďulìllah💙:
فهمت عليك بس ف نقطه م واضحه هو زوجك ولا ع علاقه معاه ساي؟؟

صارحني 💌:
Message From: 936095

م زوجي ابوي..

♡♡♡♡♡

وعليكم السلام ورحمة الله وبركاته..
اولا ما تحسسيه انك عرفتي حاجه عنو ولا بنوع الخطأ طالما ربنا سترو من اعين الناس فالأفضل انك تستريه ..
اذا الكلام دا ثبت وبالجد بقى حقيقه فهو غلطان والغلط راكبو من ساسو لراسو ،لكن م عندك طريقه توجهيه ولا انك توريه انو البعمل فيه دا غلط الا بالتعريض يعني اسأليه زي البتستشيري فيه يا ابوي عندنا وحده صحبتنا حصل معاها كيت كيت واكتشفت انو اخوها كدا فالتصرف الصح شنو..
كدا ح تكسبي حاجتين الاولى انو حيفهم انك عرفتي واحتمال يرجع من البعمل فيه والتانيه انو الحل اللي حيديك ليه هو اللي حا تستخدميه معاه..

ابوي انا بقول لي نصيحه وانا عمري كلو بمشي بيها .."بقول لي الداير يقع في الغلط بقع والماداير بشوفو قدامو وما بقع فيه وبقول لي انت ما حتقدر توقف زول من حاجه غلط هو بعملها طالما الزول م مقتنع انو يوقفها ولو غلبك تصلح حاجه الجأ لي ربنا وربنا بصلحه ليك"💙
وانا بقتنع بقتنع بالكلام دا شديد لأنو واقعي جدا جدا..
فلو غلبت عليك كل الحلول عليك بالدعاء له بالهدايه وان شاء الله ربنا يهديه ويصلح حاله❤️‍🩹 ..
واعرفي انو كل الناس عايشه بستر ربنا ولو كانت للذنوب رائحه ما كان في زول استحمل التاني..

#بتمنى_اكون_ساعدتك
https://hottg.com/Estsharat333

صارحني 💌:
Message From: 887456

الرجاء إرسال الرسالة التي تريد إرسالها إلى "••عـابــر سبيـل!'.. undefined م قعد تزبط معاي الرساله نفسي ارسل استشاره ضروري بس م عارف كيف ارسل ممكن تساعدني كيف اقدر ارسل لي عابرسبيل ممكن🙏

Aļhamďulìllah💙:
ادخل القناه الرساله المثبته اضغط ع البوت بفتح معاك

Message From: 937440

السلام عليكم اولا كنت عايزاك تفيدني وتكلمني عن القلب الابيض وعكسه القلب الاسود وتاني النيه البيضااء واخيرااا الوساااوس البتجي لي الانسااان عن انو ضاااااايع والحياااه دي مااليها طعم..

♡♡♡♡

وعليكم السلام ورحمة الله وبركاته..
بالنسبه للقلب الأبيض والاسود والفرق بينهما..
القلب الأبيض يعني القلب السليم قلب ما بيحمل حقد ولا كره ولا حسد لأي انسان قلب همو ارضاء ربنا وبس ..ديل بلتقي ف القرآن انو ماف حاجه ح تنفعهم غير قلبهم السليم قال تعالى "يوم لا ينفع مال ولا بنون إلا من اتى الله بقلب سليم.."
ديل الناس البفلحو فالدنيا والأخره..
بالنسبه للناس القلوبها وسخانه وسوداء والحقد ماليها فديل لا حيفلحو في الدنيا ولا في الاخره همهم كلوو انو حياة الناس تكون اسوأ من حياتهم ومرضى بالمقارنات..حمانا الله وعافانا من ما ابتلاهم به ..دا بالنسبه للفرق بينهم..
تاني بالنسبه للنيه البيضاء فهي البتقدم الانسان كل ما كانت نيتك سودا كل ما ربنا يغطس حجرك وامورك تجوط..في مثل عربي "بقول على نياتكم ترزقون"
بالنسبه للضياع فهو البعد عن ربنا كل ما كانت علاقتك مع الله كاربه تاني ما بجيك حزن ولا تشتت ولا ضياع لأنو ربنا قال" ومن اعرض عن ذكري فإن له معيشه ضنكا ..
والمدخل الرئيسي للشيطان في حياه الانسان هو الحزن والهم عشان كدا الانسان يستعيذ منهم..
#بتمنى_اكون_ساعدتك

https://hottg.com/Estsharat333

Message From: 285674

السلام عليكم
جيتكم مشوشه ومحتاره
عندي راجلي تعامله كويس
بث اخوهو او اخو راجلي م بيطيقني وبيكرهني عديل عينك عينك مع انو م حصل دخلت معاهو في خلاف او اشتبكت معاهو في حاجه  حتى كلام م بيناتنا وبحاول اتجنبه وم عارفه سبب كرهو لي شنو وكتير حاول يدخل بينا ويخرب علاقتنا وبيملا علي راس راجلي
مثلآ ً لمن راجلي حتى في مصاريفي بتدخل
ويوم الااتغير علي بعرف انه محرشه علي
بحكم انو هو الكبير وداير اوعيه  ولمن كنت مخطوبه حاول افركش الخطوبة  وعرفت الشي دا بعد عرست من خلال رسايله مع راجلي هسي م عارفه اتصرف كيف ف عايزه حل لو ممكن  وانو تاني م يدخل بيناتنا لانو ب الجد خايفه اخرب علي...........


♡♡♡♡


وعليكم السلام ورحمة الله وبركاته..
الرسول صلى الله عليه وسلم قال" الحمو الموت"
حذر منو شديييد وحذر من خطوره التاعمل معاة وبلاحظ انو اغلبيه الشعب السوداني منفتح شدييد في الجانب دا وفي حجات كبار بلاقوك بقولو ليك هيي منقبه من فلان او ما بتسلمي علي فلان ليييه ماشي يعرسك؟؟ عادي خلي العقد دا زي اخوك وقلبو نضيف خليك زوله نضيفه وخلي العقد ووو كلام كتييير
الخلاصه منو انو العقده اصلا من المجتمع ما عارفين انو الحميان الا من رحم ربي بتكون نفوسهم ما كويسه تجاه زوجه الاخ وانا بكلامي دا ما بعمم انو كل المجتمع نفسو كعبه لأ ابدا انا بقصد انو في فئه عددها كبير بالطريقه دي لكن م بقصد تعميم..
علي العموم انتي عليك انك ما تقصري لا في بيتك ولا في راجلك واعلمي انه لو اجتمعت الأمه ان يضروك بشئ فلن يضروك إلا بشئ قد كتبه الله عليك..
والنيه السوداء زاملة سيدها يعني البحاول يخرب ع زول هو اول زول حياتو حتخرب ..فأطمئني وادعي كتييير انو ربنا يشغله بشاغل خيير ينسيه امرك..

#بتمنى_اكون_ساعدتك

https://hottg.com/Estsharat333

Message From: 977553

977553 انا صاحبه الاستشارة دي وحابه اشكرك جدا ربنا يجزيك الجنه ويجبر خاطرك بجاه القران العظيم ❤️
ابشرك هسي أحسن بقى حدي السلام وتعاملي أحسن منهم .. امين يارب العالمين جمعا ❤️


♡♡♡♡

وجزيتِ الجنه يارب🤍..اللهم امييين يارب.. 🤍🤍
الحمد لله ❤️‍🩹..
#دايما وابدا خلي شعارك :-
*"ادفع بالتي هي احسن "
وفقنا الله لما يحب ويرضى..🤍🤍

https://hottg.com/Estsharat333

سيستجيب✨19

Message From: 984752

سلام عليكم
أولاً: بارك الله فيك، وفي طريقة ردك على الإستشارات وخصوصاً الجانب الديني ،وإنك دائماً بتنصح الناس يبتعدوا عن العلاقات غير الشرعية .
ثانياً:الإستشارة هي إني ببني نظرتي على نظرة الناس (حتى قراراتي بتخذها بناء على رأي الناس )
نفسي أغير من شخصيتي ،وأكون مستقلة في أفكاري .

♡♡♡♡♡

وعليكم السلام ورحمة الله وبركاته..
وفيك بارك الله ♡..بتمنى من جوا قلبي انو حكايه العلاقات دي تقيف وحتى لو ما وقفت تقل شويه بسس.. لأنو اغلب الشباب بمشي ورا العاطفه اللي هي اتباع النفس ومعروف انو النفس اماره بالسوء..
وحتى لو الانسان قال انا بحافظ وحعمل حدود برضو محيقدر لأنو الشيطان شاطر في الباب دا بالذات...ربنا يهدينا ويهدي شبابنا لما يحب ويرضى🤍..
#بالنسبه للإستشاره..
انا ما بقول ليك ما تبني قراراتك بعيدا عن الناس نهائياً لكن اعملي موازنه لأنو ربنا قال" وأمركم شورى بينكم"
الرسول صلى الله عليه وسلم قال "لا خاب من استخار ولا ندم من استشار.."
يعني مثلا انتي ممتحنه شهاده محتاره بين علمي وادبي تمام؟ ..
حتقومي اول حاجه تحكمي عقلك انا نسبي في المواد العلميه كيف وفي الأدبيه كيف قدرتي كيف ع تحمل القرايه لأنو قدرات الناس بتتفاوت لحدي هنا كويس؟؟ نفترض انك لقيتيها كويسه في المواد العلميه بعد كدا حتستخيري وتشاوري ..فهمتي انا بقصد ليك شنو ؟؟؟؟؟؟
انك تشاوري بعد تتخذي قرارك مش قبله كدا انتي بتبني شخصيتك .. مثال تاني ..
اتقدم ليك زول وانتي شفتي الشخصيه وعرفتي كل حاجه عنها دينه تعليمه شغله وضع اهله واسلوبه معاهم وضعو المادي كلها عملتي عليها نقاط بعد كدا انتي بتحكمي عقلك انا اقتنعت او ما اقتنعت دي اول نقطه.. بعديها حتستخيري علي اختيارك حتى تسألي زول كبيير وعارف فالحاجات الزي دي فهمتي؟؟ الحاجه العاوز اواضحها؟؟
بعدين المشاوره زاتها ما لي اي زول اما زول عالم او مجرب غير كدا ما تشاوري لأنو غير التخبط في القرارات ما حتستفيدي حاجه ..
#بتمنى_اكون_ساعدتك

https://hottg.com/Estsharat333

السلام عليكم ورحمة الله وبركاته..
شعب استشارات الجميييل❤️❤️
مساء الخير عليييكم 💙✨
بطلب منكم طلب صغنوووووني كدااا
ياريت تكترو اللايكات والتفاااعلات ع الاستشاره اللي بتستفيدو منها عشان اعرف اذا في تقدم اولا ممكن🥹💙💙

اجدع لايك وانت ماري😂👍

Message From: 957367

سلام بجد حبيت قناتك دي شديد😍❤️ربنا يجبر بي خاطرك ويديك لمن يرضيك❤️❤️❤️مشكلتي مع زوجي المهم انا عندي صحبتي شديد بمش ليها طوالي وعن طريقه عرفتها اخواتها وبمش ليهم برضو لو عندهم منااسبه++قبل يومين مشيت لي صحبتي دي زوجي قال لي تااني م تمشي ليها نهااي لا هي ولا اخواتها لانو النااس بقولو عليهم كلام م كويس وانا م عاايز يقولو عليك حااجه لانو انتي بتمشي ليهن كتير++انا م عاايزه اقطع علاقتي بيهن لانو معرفتي بيهن ليها اكتر من5سنه وم شوفته منها حااجه كعبه او كدا والنقااش حااصل في الحااجه دي بيني وبين زوجي عاايزه لي حل😭🥹


♡♡♡♡♡

وعليكم السلام ورحمة الله وبركاته..
اللهم امييين يارب ❤️❤️ دعواتكم الحلوه دي هي البتخلي الانسان مبسوط طوول يومه❤️❤️ ..شكرا شكرا☺️..
طييب الرجال عامتاً عندهم خبره في الحاجات دي اكتر من النسوان يعني لما راجل يقول ليك خلي الزوله دي معنا هو بجد شاف حاجه او عرف حاجه من مصدر موثوق الرجال عكس النسوان القواله قليله عندهم فالأغلب في الاخبار البتصلهم انا موثوقه والله اعلم ..
فنصيحتي ليك خليهم لأنو الرسول صلى الله عليه وسلم قال " اتقوا الشبهات" اي حاجه حسيتي انها شبهه او ممكن تجيب ليك شبهات خليها وراجلك في النهايه داير مصلحتك لأنو عارف انو الشعب السوداني كلو لو شاف ليهو زول لافي مع زول طوالي بحكمو انو زيو او مشترك معاه في اي شي ..ودا م معناه انو صحباتك ديل م كويسات لأنك ما شفتي منهم حاجه لكن راجلك بنبهك ع اساس لو بقى في شي م يخرب سمعتك..فالتصرف حقك مفترض يكون كالآتي.. عزموك ولا حصل شي اعتذري جاينك اعتذري وهم ح يفهموها ..
و حتى لو انتي صعبه عليك تخليهم اتذكري انة طاعه زوجك هي جنتك وعصيانه نارك ..
#بتمنى_اكون_ساعدتك

https://hottg.com/Estsharat333..

Message From: 973288

السلام عليكم ورحمة الله
مشكور على المجهود البتعملو والنصايح المفيدة البتقدمها لينا في القناة.. أنا متابعاها من مدة لكن لاحظت أنك بقيت ما بتنشر فيها زي زمان، حتى قلت يا ربي القناة دي وقفت وللا شنو؟

استشارتي أو سؤالي عن أنو بلقى نفسي أغلب الوقت مهتمة برأي الناس شديد.. ما بتكلم لأني ما بحب أزعل زول.. فعقلي بيقول لي أنو مهما كان عندي رأي في أي شي، ما ضروري أعبر عنو عشان ما يزعل زول مني. أغلب الزمن بكون ساكتة وبيقولو أني مسكينة مهما حاولت أكون إجتماعية. مع ناس بيتنا بتكلم عادي لكن ما عدا ذلك يندر أني أتكلم بتلقائية مع أي زول.
بس في الدردشات الكتابية كأني ببقى زول تاني.. لو كنت في مزاج كويس بكتب كتير. لو زول اتأخر في الرد بلقى نفسي انزعجت..
فسؤالي هنا، في رأيك هل فعلا دي حاجة ما كويسة أنو أكون بالطبع ده؟

الشيء التاني أني زولة كتومة، يعني مع أنو ناس بيتي علاقتي بيهم حلوة شديد عمومًا، لكن لو في شيء مزعلني ما بتكلم معاهم في العادة. بس أحيانًا بدي نفسي فرصة أتكلم مع "أصدقاء إلكترونيين" وبلقى نفسي قلت كلام زيادة عن اللزوم. يمكن عشان هم ما بعرفو أنا منو و لا في فرصة أننا نتلاقى فيس تو فيس فما بكون خايفة من آثار كلامي معاهم.
بحس أنو عندي كلام كتير... عايزة زول يسمعني اليوم كلو بدون ما يزهج، زي نظام الواحدة العندها حبيب أو صاحب كل شوية تتفقدو ويتفقدها 😞.. ما القصد إلا راجل يعني.. حتى لو صحبة بت بكون أفضل ألف مرة طبعًا.
فبسبب الأفكار دي بلقى أنو بلوم في نفسي، ليه أكون كده؟ ليه نحنا البنات لو الواحدة زولة انطوائية أو اجتماعية بتكون عايزة زول يسمعها دايمًا مهما كان الموضوع تافه؟
للعلم، كان عندي صحباتي في الجامعة لكن ما أديت نفسي الفرصة أصلًا أكون على طبيعتي أو أفضفض ليهم لو في شيء مزعجني.

فسؤالي هنا، كيف أتعامل مع أفكار زي الرغبة الدايمة في وجود الشخص الداعم المستمع (مع أنو ناس بيتنا موجودين 🥲)، كيف أتقبل الأفكار دي؟

إن شاء الله أكون قدرت أوصل الشيء العايزة أسأل منو. وعذرًا للإطالة

♡♡♡♡

وعليكم السلام ورحمة الله وبركاته..
العفووو♡🤍♡..
فعلا وقفت فتره طويله شديد قرابه ال٨ شهور ..كنت بمر بظروف صعبه شديد والضغط النفسي كان محاوطني قرابه السنه.. وبحاول بس القى فرصه عشان اشوف القناه لكن ما اتوفقت نهائيا حتى العدد لقيته نزل💔 ..
نقول قدر الله ودعواتكم ربنا يفرج عني ❤️‍🩹 ..
#رداً على سؤالك الأول..
اولا الصمت دا من اعظم العطايا الربانيه!! دي حقيقه والله!!
يعني لما اشوف انسان قادر يتحكم في نفسو وماسك لسانه عليه حقيقيه بستغرب ..
وبتعجب من الناس اللي بتعذب غيرها تعليقاتها الكتيره ..فخليك عارفه انو الصمت دا نعمه ربنا رزقك ليها ..لكن لابد من انك تكوني اجتماعيه شويتين!! يعني مع صحباتك بنات اهلك جاراتك عادي ممكن اذا شفتي حاجه حلوه في وحده انك تعلقي بتعليق لطيف يظهر اعجابك بالحاجه دي والعكس تماماً لو شفتي حاجه سيئه في زول ما حلو انك تنبهي عليهاا !!..
قللي تركيزك مع البشر عامتاً يعني رسلتي رساله اطلعي خلي الدردشه ما ضروري ينرد عليك في نفس اللحظه حاولي املي زمنك بحاجات مفيده حتلقي نفسك نسيتي اصلا انك رسلتي الرساله دي متين ناهيك عن انو ردا عليك او لأ..
#بالنسبه لسؤالك انو دي حاجه كويسه انك تكوني بالطبع دا ؟؟
انا ما بشوف انو حاجه كويسه انك تكون منتظر زول يرد عليك او ينتبه ليك حتكون عايش في دوامه من الأسئله الا متناهيه ياربي حيرد ما حيرد مالو اتأخر كلامي ازعجه المهم راسك م حيقيف من التفكير اطلاقا في حين انو الموضوع ما مستاهل اصلاً .. فالأفضل انك تقللي الاهتمام بالجانب دا لأنو مرهق نفسياً..
#بالنسبه للسؤال التاني ..
انك تكوني محتاجه لي مستمع فدي حاجه في كل البشر اي انسان بحتاج زول يسمعه ويشاركه احزانه وكل تفاصيله واذا فتشتي لي انسان يسمعك طول اليوم ويهتم بيك فبقول ليك الله اعلم تلقي !!بتأسف قد يكون ردي قوي بالنسبه لي شخصيه حساسه زيك لكن بقولو اسمع كلام الببكيك🤷‍♂ ..عارفه ليه م حتلقي؟؟لأنو طبيعه البشر ملوله يعني الليله اذا صحبتك سمعت مشاكلك وحلتها معاك وبكرا تاني سمعت وحلت وبعدها برضو ..بعد اسبوع ح تسجلك فلانه مشاكل واحتمال زاتو ما ترد علييك!! عاوزه زول تكوني بتتكلمي معاه اليوم كلو صح؟؟ حتلقي وحتتكلمو الليله وبكرا وبعدها وشهر شهرين ٥شهور وحتزهجي منو وحيزهج منك لأنو الانسان ملول ما بيستحمل حاجه تقيده ..فلو عاوزه مني نصيحه صااادقه ♡
لو عندك حاجه مزعلاك احكيها لربنا انا ما بهظر والله بجد!!.. عدييل كدا قولي يارب حصل لي وحصل وحصل زي كأنك بتتكلمي مع زول ..احكي كل المضايقك ليه لأنو الشكيه لغيره مذله ..كل التخبط والحيره الأنتي فيها دي سببها انك ما اتخذتي ربنا قريب منك خلي عباده والجئي ليه وصدقيني حيكفيك من البشر

خلي الكتب ما تفارقك نهائيا اقري على قدر ما ربنا يديك من قوه اختاري اي نوع انتي بتحبيه وانغمسي في لأنو خير صديق في الزمان كتاب
#يدي_نملت_من_الكتابه🙇‍♂
#بتمنى_اكون_ساعدتك ♡

https://hottg.com/Estsharat333