Жаңылыктар | 23.06.2025 |Жакынкы Чыгыштагы жаңжал Борбор Азияга кандай таасир берет?

📌 АКШнын Ирандагы өзөктүк жайларга соккусу Жакынкы Чыгыштагы жаңжалды күчөттү. Тегеран Улуттар уюмунун нормалары бузулганын айтып, Москвадан колдоо издеп жатат. Израил болсо Тегеранга кайрадан чабуул койгону кабарланды.

📌 Жакынкы Чыгыштагы жаңжалдын Борбор Азия өлкөлөрүндөгү экономикасына кандай таасири болот?

📌 Кыргызстан Орусия менен бирге бирдиктүү билим берүү мейкиндигин түзүүнү көздөөдө. Бул демилге орусиялык “Евразия” уюму аркылуу ишке ашышы мүмкүн. 12 жылдык окууга өтүүнү жарыя кылгын Кыргызстан Орусия менен бирдиктүү билим системасына кандай өтөт?

❗️Өзбек лидери Мирзиёев кызы Саиданы президенттик администрациянын жетекчиси кылып дайындады

Өзбекстандын лидери Шавкат Мирзиёев кызы Саиданы президенттик администрациянын жетекчиси кылып дайындады. Бул тууралуу президенттин басма сөз катчысы Шерзод Асадов билдирди.

Маалыматка ылайык, эки жыл мурун жоюлган бул түзүм кайра түзүлдү. 40 жаштагы Саида буга чейин президенттин жардамчысы болуп иштеп келген. Ага чейин президенттик администрациянын Коммуникация жана маалымат саясатынын бөлүм башчысы, андан мурун 2019-2022-жылдары президенттик администрациянын алдындагы Маалымат жана массалык коммуникациялар агенттигинин директорунун орун басарлыгын аркалаган.

@azattyk_radiosu

Бишкекте жыл башынан бери автобус айдаган 733 айдоочу жумуштан алынды

Бишкекте ушул жылдын 1-январынан 18-июнга чейин мэриянын автобустарын эреже бузуп айдаган 733 айдоочу жумуштан алынып, “кара тизмеге” киргизилген. Алар мындан ары муниципалдык транспорт тармагында иштей албайт.

Бишкек шаарынын мэриясынын маалыматына ылайык, андан тышкары тартип комиссияларынын чечимдери менен 404 айдоочу 20% сый акыдан ажыратылып, сөгүш берилген.

24-июнда “Бишкек шаардык транспорт” муниципалдык ишканасында автобустун айдоочулары менен жыйын өттү. Анда айдоочуларга жол эрежелерин сактоо боюнча көзөмөлдү күчөтүү тапшырмасы берилди.

1-январдан 31-мартка чейинки аралыкта Бишкекте муниципалдык автобустар катышкан 158 кырсык катталган.

@azattyk_radiosu

⚡️Токмок шаарынын мэри Максат Нусувалиев кармалганы кабарланууда

Улуттук коопсуздук боюнча мамлекеттик комитеттин кызматкерлери 24-июнда Токмок шаарынын мэри Максат Нусувалиевди кармап кеткени кабарланууда.

23-июнда Инстаграмдагы tokmok_live баракчасында Токмок шаарынын 1-3-кичи райондорунун тургундарыбыз деген адамдар президент Садыр Жапаровго, УКМКнын төрагасы Камчыбек Ташиевге кайрылышкан. Видео кайрылууда ал аймакка салынып жаткан жаңы сейил бактын курулушу убагында бүтпөй жана курулуш сапатсыз жүрүп жатканын айтышкан.

24-июнда социалдык тармактарда Токмок шаарынын мэриясынын имаратынан жарандык кийимчен адамдар үч кишини алып чыгып кетип баратканы тартылган тасма тарады. Алардын бири Максат Нусувалиевге түспөлдөш экенин көрүүгө болот. Айрым жалпыга маалымдоо каражаттары 24-июнда мэрияда Камчыбек Ташиевдин катышуусунда жыйын өткөнүн, Максат Нусувалиев жана дагы эки адам жыйын учурунда кармалганын жазышууда.

@azattyk_radiosu

“Крокус Сити Холлдогу” чабуулга байланыштуу тергөө аяктады

Орусиянын Тергөө комитети “Крокус Сити Холлдогу” чабуулга байланыштуу тергөө аяктап, иш сотко жиберүү үчүн прокуратурага өткөнүн билдирди.

Маалыматка караганда, анын алкагында 19 адам камакка алынды. Алардын көбү Тажикстандын жарандары.

Тергөөнүн маалыматына караганда, теги тажикстандык төрт адам — Мухаммадсобир Файзов, Далержон Мирзоев, Фаридуни Шамсидин, Саидакрами Рачабализода саат 19:00 чамасында миңдей адам концерт көрүүгө келген залга кирип барып, ок чыгарышкан. Теракт учурунда 145 адам өлүп, ондогону жараат алганы кабарланган. Кол салууга шектүүлөрдү Брянск облусунан кармашкан.

@azattyk_radiosu

Жаңылыктар | 24.06.2025 | Өзбек президенти кызы Саиданы мураскерликке даярдап жатабы?

📌 АКШ президенти Иран менен Израил тынчтык келишимине жетишкенин жарыялады. Бирок ок атууну токтотуу режими бузулуп, тараптар бири-бирин айыптап чыгышты.

📌 Нарын облусу көңүл сыртында калды деген нааразы пикирлер социалдык тармактарда күч алды. Бийлик дооматтарды четке кагып, аткарылып жаткан иштерди тизмектеди.

📌 Өзбек президенти Шавкат Мирзиёев кызы Саиданы өз администрациясына жетекчи кылып дайындады. Мирзиеев кызын мураскерликке даярдап жатабы?

@azattyk_radiosu

Президенттин Нарындагы өкүлү Токмок шаарына мэр болуп дайындалды

Президент Садыр Жапаров 25-июнда Нарын облусундагы ыйгарым укуктуу өкүлү Алтынбек Эргешовду кызматтан бошотуп, Токмок шаарынын мэри кылып дайындады.

25-июнда Садыр Жапаров Токмок шаарынын мэри Максат Нусувалиевди кызматтан алды. Максат Нусувалиев, Токмок шаардык мэриясынын Муниципалдык менчик башкармалыгынын башчысы (Т.у.А.) жана шаарда эс алуу багын курууга жооптуу “Ал-Кадыр-Сантехсервис” ишканасынын директору (К.Т.Э.) 24-июнда Камчыбек Ташиевдин буйругу менен жыйын учурунда кармалган.

@azattyk_radiosu

Жогорку Кеңештин жетинчи чакырылышы кезектеги сессиясын жыйынтыктаганы турат. Эл өкүлдөрү соңку бир жылдын ичинде тарыхый чечимдерди кабыл алганын, аткаруу бийлиги менен тыгыз иштешкенин айтышат. Ошол эле учурда азыркы парламентти “демилгени колдон чыгарды, эрки сынды” деп сындагандар да жок эмес. “Азаттык” парламенттин бир жылдык ишмердиги боюнча депутаттардын пикирин укту.

@azattyk_radiosu

Жаңылыктар | 25.06.2025 | Ташиевдин ачуусу аймактагы абалды оңдойбу?

📌 Орус армиясынын Днепр шаарына соккусунан 18 киши каза таап, 300 киши жараат алды. Ал тапта Украинадагы согуш НАТОнун Гаагадагы саммитинде кыйыр талкууланды.

📌 Кыргыз бийлиги интернеттеги нааразылык айтылган аймактардын жетекчилерине чара көрүлөрүн убада кылууда. Соңку эки күндө Нарында облус башчысы кызмат которсо, Токмоктун мэри камалды. Бийликтин бул аракети көйгөй чечеби?

📌 Жогорку Кеңеш медиа чөйрөнү нааразы кылган, 2022-жылдан бери талаш-талкуу жараткан “Жалпыга маалымдоо каражаттары жөнүндө” мыйзамды кабыл алды.

‼️Токмоктун мурдагы мэри баш болгон төрт адам эки айга камалды

Токмок шаарынын мурдагы мэри Максат Нусувалиев, мэриянын муниципалдык менчик башкармалыгынын жетекчиси (Т.у.А.), техникалык көзөмөл боюнча адис (А.А.Э.) жана “Аль-Кадыр-Сантехсервис” ишканасынын башчысы (К.Т.Э.) 24-августка чейин камакка алынды. Мындай чечимди Бишкектин Октябрь райондук соту 25-июнда чыгарды. Аларга Кылмыш-жаза кодексинин “Коррупция” беренеси менен айып коюлууда.

Шектүүлөр 24-июнда Улуттук коопсуздук боюнча мамлекеттик комитеттин төрагасы (УКМК) Камчыбек Ташиевдин буйругу менен Токмокто жыйын учурунда кармалган.

Аларга “Токмокто сейил бакты көрктөндүрүү, шаардагы спорт мектебин оңдоо иштеринде кызмат абалынан кыянаттык менен пайдаланган жана коррупциялык иштерди жасаган” деген кине тагылды.

@azattyk_radiosu

Министрлер кабинетинин төрагасы Адылбек Касымалиев соода-экономикалык кызматташтыктын алкагында Кыргызстан чоң инвестициялык потенциалга ээ болуп, чет элдик инвесторлор, анын ичинде Кытай компаниялары үчүн ЕАЭБ жана Европа Биримдиги өлкөлөрүнүн рынокторуна «терезе» катары чыгууга даяр экенин билдирди.

@azattyk_radiosu

Аялга зомбулук көрсөткөн деген айып менен милиция кызматкери кармалды

Улуттук коопсуздук боюнча мамлекеттик комитет (УКМК) аялга зомбулук көрсөткөн делген айып менен Ички иштер министрлигинин (ИИМ) атайын багыттагы полкунун кызматкери, милициянын капитаны (Р.О.Б.) кармалганын билдирди.

25-июнда социалдык тармактарда эркек киши бир аялды чаап жиберген видео тараган. Жабыркаган аял бул факты боюнча арыз менен кайрылып (Н.к.Н.), окуя 17-майда ГЭС-5 аймагында болгонун айткан. Анда ИИМдин кызматкери мас болуп аны бетке чаап жибергенин билдирген.

Бул окуяга байланыштуу Кылмыш-жаза кодексинин “Бейбаштык” беренеси менен кылмыш иши козголуп, шектүү убактылуу кармоочу жайга киргизилди.

@azattyk_radiosu

Орусияда Украинаны колдогон казак жараны 12 жылга соттолду

25-июнда Орусиянын Ростов-на-Дону шаарындагы аймактык аскердик сот Казакстандын 19 жаштагы жараны Туран Устюговду “террордук уюмдун аракеттерине катышкан” жана “террордук аракеттерди ишке ашыруу үчүн окуудан өткөн” деген айыптар менен 12 жылга түрмөгө кести. Бул тууралуу “Азаттык Азия” анын апасы Элмира Жанабаевага шилтеме кылып жазды. Прокурорлор казак жаранын 25 жылга эркинен ажыратууну соттон өтүнгөн болчу.

«Ал эч нерсе кылган жок. Болгону ниети үчүн ага абак жазасын берип коюшту», - деди Жанабаева.

Ал уулу согуш башталгандан бери Телеграм аркылуу белгисиз адамдар менен байланышып, согушка баруунун жолдорун караштырып жүргөнүн, Украинаны коргоо керек деп айтканын кошумчалады.

Маалыматка ылайык, Туран 2024-жылдын 27-сентябрында Алматыдан чыгып кеткен. Казакстандын Улуттук коопсуздук комитети ал ошол күнү Кыргызстандын аймагына өтүп, андан ары кайда кеткени белгисиз болуп жатканын апасына билдирген. Беш күндөн кийин Туран Орусия аннексиялаган Крым жарым аралында кармалганы белгилүү болгон.

@azattyk_radiosu

Жаңылыктар | 26.06.2025 | Газадагы чабуул 80 адамдын өмүрүн алды

📌 Соңку күндөрү Газа тилкесиндеги чабуулдар ондогон адамдын өмүрүн алды. Иран ок атышпоо жөнүндө макулдашкан cоң Израил армиясы тилкеге кайрадан көбүрөөк көңүл бурарын билдирүүдө.

📌 Камакта жаткан эркин журналист Канышай Мамыркулованын соту кайрадан жылып калды. Бул жолу да анын ишин иликтеген эксперт сотко келбей койду. Журналисттин жакындары Мамыркулованы эркиндикке чыгарууну талап кылышууда.

📌 Апрелде Стабул аэропортунда кармалган кыргызстандык мугалим Азамат Нурмат уулу кыргыз бийлигинен көмөк сурады.

Кыргызстанда соңку апталарда "элге адал деп таанылган “Тойбосс” колбасаларынан чочконун ДНКсы чыгыптыр" деген маалымат талкууга туштү. Бул анын айланасындагы ушундай чуунун 2023-жылдан бери экинчи жолу кайталанышы. Компания муну четке какты.

Адал азык рыногундагы мындай окуялардын кайталанышына эмне себеп?

“Адал Азык” компаниясы анын “Тойбосс” колбасалары ондогон көз карандысыз лабораториялык текшерүүдөн өткөнүн, баарында тең “тыюу салынган кошулмалар табылбаганын”, “чочконун ДНКсы жоктугун” жана “курамы толугу менен адал стандарттарына туура келерин” билдирди. Жарыяланган документтерге караганда, текшерүүлөр Казакстандагы аккредитациядан өткөн “Еркин талгам” сыноо лабораториясында жүргүзүлгөн.

@azattyk_radiosu

Көлбаевдин кылмыштуу тобун каржылоого шек саналып төрт адам кармалды

Улуттук коопсуздук боюнча мамлекеттик комитет (УКМК) кримтөбөл Камчы Көлбаевдин (Камчыбек Асанбек) уюшкан кылмыштуу тобун каржылоого тиешеси бар деген шек менен төрт адам (Д.Л.К., Д. Р. Е., К.Я.К. жана Д.К.Ю.) кармалганын билдирди.

Атайын кызматтын маалыматына ылайык, бул ишке “Барон” каймана аты менен белгилүү болгон цыган улутундагы Д.Л.К. жана анын жакындары катышкан. Мекеме ал баңги затын Чүй облусунан Казакстанга жана Орусияга ташуу менен да алектенгени аныкталганын кошумчалады.

@azattyk_radiosu

Нурбек Сатаров президенттин Нарындагы өкүлү болуп дайындалды

Нурбек Сатаров президенттин Нарын облусундагы ыйгарым укуктуу өкүлү болуп дайындалды. Тиешелүү жарлыкка президент Садыр Жапаров кол койгонун мамлекет башчынын басма сөз кызматы кабарлады.

41 жаштагы Нурбек Сатаров 2021-жылы Ала-Бука районунун акими болуп иштеген. Ага чейин 2020-жылы Ат-Башы районунун акими, 2022-жылы Жалал-Абад шаарынын биринчи вице-мэри, 2024-жылы президенттин Нарын облусундагы ыйгарым укуктуу өкүлүнүн орун басары кызматын аркалаган.

25-июнда президенттин Нарын облусундагы ыйгарым укуктуу өкүлү Алтынбек Эргешов кызматтан бошотулуп, Чүйдүн Токмок шаарынын мэри болуп дайындалган.

@azattyk_radiosu

Ысык-Атадагы Такыр-Төр көлү ташып, 180ден ашуун киши коопсуз жайга чыгарылды

Өзгөчө кырдаалдар министрлигинин Чүй облусу боюнча башкармалыгынын саат 17:42ге карата берген маалыматына ылайык, Ысык-Ата районундагы Такыр-Төр көлү ташыган.

Учурда Алмалуу, Тоолуу Серафимовка жана Төмөнкү Серафимовка айылдарында жарандарды эвакуациялоо иши жүрүп жатат. Куткаруучулар коркунуч туудурган аймактан жалпы 180дей адам жана мүмкүнчүлүгү чектелгендер үйүндө жашагандарды коопсуз жайга чыгарышты.

Министрликтин билдирүүсүндө, Өзгөчө кырдаалдарга мониторинг жүргүзүү жана божомолдоо департаментинен адистер дрон менен Такыр-Төр көлүндөгү абалды тактоо жана суунун агымын көрүү боюнча иштерди үзгүлтүксүз улантып келген.

@azattyk_radiosu

Жаңылыктар | 27.06.2025 | Иран-Израил жаңжалында ким утту?

📌 Израил менен Иран ок атышууну токтоткону менен маалымат согушу токтой элек. Тараптар бири-бирин жеңдик деп жарыялады.

📌 Чүйдүн Ысык-Ата районундагы Такыр-Төр көлү ташып, 180ден ашуун киши коопсуз жайга чыгарылды. Өзгөчө кырдаалдар министрлиги учурда Алмалуу, Тоолуу Серафимовка жана Төмөнкү Серафимовка айылдарында жарандарды эвакуациялоо ишин жүргүзүүдө.

📌 Ошто көчөлөрдү кеңейтүү үчүн бузулган турак-жайлардын ээлерине кытайлык компания үй куруп берет. Ал үчүн чет өлкөлүк компанияга 20 гектар жер бөлүнөт.

📌 Бишкектин негизги аянттарында митинг өткөрүүгө тыюу салынганына үч жылдан ашты. Бир катар эл аралык уюмдар Кыргызстанда жарандардын тынч жыйындарды өткөрүү укугу бузулуп жатканын эскертип келишет.

@azattyk_radiosu