مستهل القصيده على طور مشتاكه وبعيد الدرب روحي الحاج باسم الكربلائي
أمي .. يالساكنه بوسط الكلب ..
أمي .. صدكيني غيرج ما أحب ..
أمي .. فراك الحنينه شكدصعب .. أمي
............................................
أمي باقة ورد يتناثر عطرهه ..
الجنه تحت أقدامهه الله نذرهه..
أمي حتى الصبر ياخذ من صبرهه..
أمي طيبه من رحت فدوه لعمرهه..
عاشت.. مابين لوعات وحزن..
عاشت.. لو أنهضم تبجي وتون..
عاشت.. من أمرض دموعج تصب.. أمي
.....................................
أتصفح أوراق الزمن وأقره بكتابه ..
الكال أفّ الأمه شيصير بشبابه ..
بوجهه كل خير ويسر مسدوده بابه ..
وكل دعاء الوالده ربنه أستجابه ..
تدعي .. الربيته بأحضاني طفل ..
تدعي .. على جنازتي يشد الحبل ..
تدعي .. يدفني أريده وينتحب .. أمي
.......................................
هزت الكاروك من عدهه أبتدينه ..
أمي دين الباري وبحبه أهتدينه ..
الخير بوجود الحنينه ترس أدينه ..
أمي شمس الله وتنّور عالمدينه ..
رايد .. كبل أمي أموتن وأندفن ..
رايد .. ولا أعيش آهات وحزن ..
رايد .. كبلج يغطيني الترب .. أمي
.................................
ربي خالق أمي كتله من المشاعر ..
لو رضت عني أبد ما أبقه حاير ..
لأم سوالف دافيه فدوه النواظر ..
شكبر حظه الترضه عنه أمه باجر ..
باجر .. يحتار وسط المكبره ..
باجر .. االيدفن أمه بالثره ..
باجر .. وياهه يتمنه يطب .. أمي
.........................................
تبقه أقدس ما خلق رب الجلاله ..
بحضرة أمي كل ورد ذب أستقاله ..
من على المنبر أريد أبعث رساله ..
فاز دنيه وآخره الأمه على باله ..
أدري .. اليرعاهه نال الغانمه ..
أدري .. ويرضى عليه رب السمه ..
أدري .. وما يدخل الجنه اليسب .. أمي
.........................................
أنتي باب الله الوسيعه الطيبه ذاتج ..
كل ركن بالدار شايل ذكرياتج ..
والله ستر الكون كله من عباتج ..
كل حياتي فدوه يايمه الحياتج ..
حقه .. الفاكد أمه ينفجع ..
حقه .. ويسيل نهران الدمع ..
حقه .. يا أصفه من ماي العذب .. أمي
......................................
حيدر مطر العبادي

اخذي ثوبي .. من اموتن يالعقيله
اخذي ثوبي .. اهناكى فرشي عالهزيله
خلي عندج شيلتي .. او ضمي هاي اعبايتي
من اموتن .. من اموتن

سمعي هالوصيه . إمن امج الزجيه
اخذي ثوبي الطف سبيكم لو مشيتي
فرشي بالخرابه . ثوبي عالترابه
نامي فوگ اثيابي يمى لو غفيتي

بالخرابه لو گعدتي . عالترب لتنامي بنتي
خوفي يالحره الصحاري . تاذي ضهرج لو وگعتي

من تنامي .. خلي ثوبي جوه خدج
من تنامي .. ألشمر لابد يگعدج
اتصبري يبنيّتي .. او ضمي هاي اعبايتي
من اموتن .. من اموتن
ـــــــــــــــــــــ
بنتي ديري بالج . انتي وي عيالج
شوك متروسه الخرايب يمى زينب
شيلتي افرشيها . او نومي عليها
ارقيه من اتحن لبوها او تبقى تنحب

الشوك ليأذي جسمها . ازغيره ما تحمل المها
طفله وانوبه يتيمه . مات ابوها او ماتت امها

اشگد عزيزه .. عند اخوج الطفله هايه
اشگد عزيزه .. او وسفه تمشي اويه السبايه
حگي اذرف دمعتي . او ضمي هاي اعبايتي
يمى يمى .. يمى يمى
ـــــــــــــــــــــ
اخذي هالعبايه . عندي بيها غايه
إمن الشمس غطي انتي بيها جم يتيمه
ومن يگع علمكم . ومن تشب خيمكم
سوي هاي اعباتي بالطف يمى خيمه

خيمه سويها الزغارج . من تشب يالحره نارج
بس تلمين ابيتامى . راح يخلص كل نهارج

ضلي يمهم . لايضيعون إمن ادينج
ضلي يمهم . عاليتامى خلي عينج
اتذكريها كلمتي . وضمي هاي اعبايتي
يمى يمى .. يمى يمى
ـــــــــــــــــــــ
يمى لو عطشتي . اتحملي يبنتي
الماي عنكم ينگطع من يوم سابع
لو رحل كفيلج . فدوه شدي حيلج
إمن النهر لو شفتي اخيج وحده راجع

إحسين لو رد يالسبيه . بيده شايل جف اخيه
يعني يازينب كفيلج . عالنهر جثته رميه

تنشدينه . وينه عباس او جربته
تنشدينه . ليش جايبلي يمنته
وينه كافل عيلتي . وضمي هاي اعبايتي
يمى يمى .. يمى يمى
ـــــــــــــــــــــ
بعدي عن شمرهم . بعدي عن جمرهم
لاتركضي من بعد حرگ المخيم
لاتخلي جدمج . ينجوي او يألمج
من تضلي امحيره عاشر محرم

من تصعدين اعله تله . عالوطيه اتشوفي طفله
گاعده اتگل الأبوها . الفارگاك ابعمره شله

هذي سكنه . شبگت إحسين او تكلمه
هذي سكنه . إمن الخدود اتمسحه دمه
اتگله حرگوا خيمتي . او ضمي هاي اعبايتي
يمى يمى .. يمى يمى
ـــــــــــــــــــــ
لو صبع لگيتي . طايح او بجيتي
إمن الارض شيلي لخيج هذه يمى
فدوه من تشوفي . عن حرمكم اخفي
وامسحي عنه التراب او مسحي دمه

يالعقيله شمي عطره . او ذكري اخوج او احله عشره
وسفه هسه انتي سبيه . وهو گطعوا وسفه نحره

الدنيا دارت . وانگضن ذيج الليالي
الدنيا دارت . وراح عندج اغله غالي
كل حسرتج حسرتي . وضمي هاي اعبايتي
يمى يمى .. يمى يمى

حيدر الحلفي

دارت سوالف بين ثنتين
مابين زينب وام لبنين
هذي تهل مدامع العين
وهذي تصك براح ليدين
على مصيبة العباس وحسين
.
وام البنين من الفجيعه
تصيح والمدمع تديعه
لا تحجين ليه يالوديعه
عن مذبحة حسين ورضيعه
وعباس وجفوفه القطيعه
.
اسمع يازينب تحجي الناس
يقولون شفتي حال عباس
ومخه طلع من طبرة الراس
و شفتي العزيز حسين ينداس
بالخيل والجثه بلا راس
.
ويقولون ظل حامي الضعينه
مرمي بلا اشماله ويمينه
سهم الي صابه خسف عينه
وحسين راسه يقطعونه
بالسيف وانتي تنظرينه
.
صاحت يافاطم لاتنشدين
العباس راسه انفضخ نصفين
والسهم صابه وطلع العين
وظل بالثرى من غير تجفين
ومن طاح طاحت راية حسين
.
حملة ابو فاضل فضيعه
حول على العسكر فجيعه
فرسان خلها صريعه
وهمه على ماي الشريعه
يسقي ابو سكنه ورضيعه
.
وقلبي من الحسرات مجروح
وراسي انصبغ من كثرة النوح
بعيني نظرت حسين مذبوح
عريان فوقه الطفل مطروح
من غير راسه مسلم الروح
.
وحاولت عذب عنه ياحره
وارفع شمر من فوق صدره
ضربني وطرحني على الغبره
ومن القفى ب ثنعش طبره
قدام عيني قطع نحره
.
وناسٍ يايمه يسلبونه
وب سيوف ناس يقطعونه
وفاجر قطع ننصر يمينه
ورأسه بحديده شايلينه
بخيول عشره يسحقونه
.
طوحت ونتها ام لبنين
وصفقت على اليسرى واليمين
مذبوح وتتفجر من العين
سكتي ترى قلبي شعبتيه
ويلي على العباس وحسين

كل ليله اونن للفجر يافاطمه
واشبع هظم واشبع قهر. يافاطمه
بالروح نــار اموجره. والبيت بعدج مگبره
يافاطمه يافاطمه

يافاطمه بيّه حزن يعكوب ماظن شافه
ماينحجي وماينوصف وشلون اصيغ اوصافه
ابروحي چن موگد جمر. ملتهبه كل اطرافه
ويازهره من بعدج علي. گوه يشيل جتافه

محني الظهر بعدج علي يافاطمه
ومو اني ذاك الاولي. يافاطمه
حيلي انهدم من الجره. والبيت بعدج مگبره
يافاطمه يافاطمه

ــــــــــــــــــــــــــــــ
يالتارسه بيتج صور. اوذكريات اشگدهه
كل صورة تذبحني وتمر وعن حالتج انشدهه
بعد الدفن راح الالم من فاطمه لو عدهه
وبس لا حجتله اعله الضلع. من التگت والدهه

ويه الصور اشبع حچي يافاطمه
وماينمـل اعليج البچي يافاطمه
خَضَرّ دمعنه اعلى الثره والبيت بعدج مگبره
يافاطمه يافاطمه
ـــــــــــــــــــــــــــــــ
مصلايه اوتربه ألچ. ليليه اشمـــــــاً بيهه
ومن كثر نوحي ابغرفتج حيطانهه امبجيهه
اجمع اثيابچ عالصدر وملهوف افتر بيهه
وداعت حزنه الما برد. عشرتنه ماناسيهه

صوتج اذكره ونبرتچ يافاطمه
وذبحتني آهي بفرگتچ يافاطمه
جنتيلي شمس منوره. والبيت بعدج مگبره
يافاطمه يافاطمه
ــــــــــــــــــــــــــــــــــ
يتكسر بروحي الحچي. وياهو الأروح احجيله
وبس الگبر يـافاطمه. ليليه اروح اشكيله
نتگابل اني اوزينبچ. عليج ودمعنه انسيله
وجرح الحسن ماينوصف. وحسينج انهد حيله

الجرح ضل يلجم جرح يافاطمه
وايتامج اتون للصبح يافاطمه
دمع الجفن من دم جره. والبيت بعدج مگبره
يافاطمه يافاطمه
ــــــــــــــــــــــــــــــــــــ
ياضحكت ايامي المضت ياأحلا شي بعمري
لظني انسه مصيبتج يالزهره حتى بكبري
يالجنتي الي صاحب وفي. وحزام ساند ظهري
حگي من اموت بحسرتي والدمع بعدج يجري

حيدر مرد كلبه الحزن. يافاطمه
والضيعچ ضيع وطن. يافاطمه
هم بعد نرجع ياتره. والبيت بعدج مكبره
يافاطمه. يافاطمه





خادم الزهراء ع ابو احمد الطائي

بويه ماتخفه بكبر إمي الزجيه
لومشت تترك عطر فوك الوطيه
حته بكبرها ... أشتم عطرها
***********
زينب أنه تيتمت ويه أمي أشعر متت
هي روحي وفاركتها
تكدر ترجع الزمن ماتردلي إم الحسن
بويه ليش إمي إدفنتها
همك إيطيح الجبل. إشلون كلبك من حمل
وإنت بيدك غسلتها
عليها ضهرك منكسر.. ودري كلبك منعصر
بيك أحس من وسدتها
من توسدها بلحد إيضل ضواها
بلاعطر يبقه الورد لو ماشذاها
.عشت بذكرها•••أشتم عطرها
**********
فصل الباب النعش. وكتب إنت ثمن طعش.
عالنعش هذاعمرها
ومن توسدها التراب•• چفن الزهره بحجاب
إنعصرت وضل بفكرها
إمي حته بالكبر •• منها ضل يطلع عطر
وأنه أموت بلاعطرها
إضمني چانت للصدر•• من أحزن ألكاها حجر
وماأعيش بلاحجرها.
طبع المفارك يحن يغفه على ونه
وانه جنت أغفه بحظن كله محنه
أذكر حجرها ••••أشتم عطرها
««««««««»»»»»»»
ربي إخذ مني العمر..إمي ماتت من زغر
وعمري بعده بالبدايه
حيلي من حزني إنهدم..بهمي ماواحد علم
غير علام الخفايه
بالصلاة أذكر ضلع••الكوثر أقراها بدمع
وماأكمل منها أيه
وأقره سورة قل أعوذ بيها من الشر ألوذ
ومن حزن هاي الرزايه
أشاهد الروحي شكثر من أنضر الباب
شكد تمنيت الكبر من هذا المصاب.
وغفه بكترها...وأشتم عطرها.
***********
إمي لورفعت خمار.. الدنيه بيها إيحل دمار
رحمة الله إيوصفوها
إنت شوف المنزله...لمي من هاالمسأله
إيقبل إديها چان إبوها
إمي لو لبست سواد..العرش يعلن حداد
عالوجه ليش إسطروها
كلبي أحسن منهدم..راحت وعشت بيتم
عذبوني وعذبوها
بلون ثوبي الدنيه أحس سوده حياتي
أضفر خيوط الشمس وي ذكرياتي..
أرسم صورها..أشتم عكرها
**** ****
ياعلي وكت الصلاة••الزهره وي كل أيه آه
تصرخ وإنت سندها
فاطمه بوضع السجود••ليش إديها على الخدود
تخفي سطرات على خدها.
وعالضلع وكت الركوع••تحط إديها تضل تلوع
والكسر والله ضهدها
عندك أمنها الرسول..ياعلي صعبه شتكول.
بياوضع حيدر تردها
بويه كلي شتعتذر راح من إبوها
تدري خد إمي إنسطر عني إبعدوها
عالباب أثرها..أشتم عطرها.
* **** **** * *


بقلم الشاعر الحسيني
نسيم الحميداوي

الشاعر ضياء الكناني:
الچمن روحي المصايب. من دفنها
الزچيه چفوفه بردن. من دفنها
علي چن علي دافن من دفنها
اعله روحه تراب هال وعالزچيه

اسألكم الدعاء
خادم ابي الاحرار
ضياء الكناني

(لخدام مولاتنا الزهراء ع)



يالصفيت النيه حاجتك مگضيه
وداعت العلويه ونحر الولاء
================≈====================
يالغبشت بخطوة الحره النجيبه
يله خير الخدمه وياك النه جيبه
يالعشت جمرة خيم ويه الغريبه
انته والعباس محبوب وحبيبه

اتصير كلك غيره بخدمتك لچبيره
مايظل بحيره العنده وفاء
================≈====================
أمشي ابد لتهمك ابمشيك ملامه
احنه خدمتنه تره بيهه السلامه
واليسألك گله عشره اويه الخدامه
ألف هنياله اليدافع عن أمامه

خدمتي معروفه سرهه من احروفه
هذا كله انشوفه بعين الرجاء
================≈====================
ياسوالف دافيه وتمطر محنّه
من الزغر هذا الزحف گلولي عنه
اتعلمينا الخدمه ياناس من اهلنه
بيها باچر بالحشر مكتوب املنه

نفحه رحمانيه هالمئاتم هيه
والمشت مسبيه عدنا أباء
================≈====================
مومهم تتجمل بثوب الشعائر
ألمهم تصبح وطن يأوي المناحر
خلي عندك مبدئ ايهز الضماير
وذكر بكل وكتك اخيام وحوافر

كلمتك عليهه بمهجتك خليهه
للعزه وديهه تصبح دواء
================≈====================
صير مجنون العقيده الحيدريه
ايبارك الله بيك ويحبك نبيه
تنرزق خدمة أمير الغاضريه
وبالگبر تگصدلك الزهره الزچيه

خدمه ربانيه قدّم بهالنيه
بالكره الأرضيه عليّ النداء
================≈====================
24/9/2021 الجمعه
#الشاعر_الميرزا_محمد_الساعدي

ليش بيا ذنب يا ناس
ظلـــع الزهره يتكسّر

وبدار الزجيه ليش
نــــار الگوم تتسعر
***
ليش ام الحسن وحسيــن
حتى امن البجي انحرمت

على طه النبي المختار
ما يــــرضون لو ونت

دفعوها ابحقد يا ناس
مكسورة ضلع ظلــــت

من كثر العصر بالباب
جرت النفس ما تگدر

ليش بيا ذنب يا ناس
ظلـــع الزهره يتكسر
***
لا رخصه ولا استأذان
طبّو حيـــــدر ادياره

من هجمو على ام حسين
ولــــــــــمجرم شعل نـاره

عصرآها النذل بالباب
نبّت بيـــــها بسماره

من دم الزجيه حيف
لون الباب صار احمر

ليش بيا ذنب يا ناس
ظلـــع الزهره يتكسر
***
اسئلكم واريد اجواب
ليش الزهره صفعوها


ليش ابيا ذنب ياناس
بنت الهادي دفعــوها

وظلوع الزجيه ليش
بالحايط يطــــبعوها

هالمنظر يهدّم الحيل
ترهب صورة المنظر

ليش بيا ذنب يا ناس
ظلـــع الزهره يتكسر
****
بت طه النبي المختار
ولعدوان ظـــــــــلموها

من طبو عليها الدار
يا هالناس هظموها

منّ المحسن الكـفار
بت الهادي حرموها

گلبها اعله الولد يا ناس
ظل ابحرگه يتحسّــــر

ليش بيا ذنب يا ناس
ظلـــع الزهره يتكسر
***
محسنها سگط عالگاع
طاح وفيّــــضاه دمه

لا شاف الضوه ولا شاف
حظن الوالـــــده وشمه

لا نام وغفه ابكاروك
لا لولت عليه امــــه

شمسوي الطفل ولگوم
حرموه شوفت الكوثر

ليش بيا ذنب يا ناس
ظلـــع الزهره يتكسر
****
جن ايگلها يمّ احسين
دمعج لا تـــــــذرفينه

خليه الدمع مضموم
يمّه ولا تهــــــــلينه

يوم العاشر ابعاشور
يم زينب تصـــبينه

لو شفتي الحسين هناك
جسمه ابكربلا امـــــوذّر

ليش بيا ذنب يا ناس
ظلـــع الزهره يتكسر

علي كاظم المنصوري